Benzema ជាកីឡាករដ៏ជោគជ័យបំផុតម្នាក់ អំឡុងពេលលេងនៅក្រុមមានមូលដ្ឋានក្នុងរដ្ឋធានី អេស្ប៉ាញ រយៈពេល ១៤ ឆ្នាំ ពីឆ្នាំ ២០០៩ ដល់ ២០២៣។ កីឡាករបានស៊ុតបញ្ចូលទីបានចំនួន ៣៥៤ គ្រាប់ ក្នុងចំណោមការលេង ៦៤៨ ប្រកួត ហើយខ្សែប្រយុទ្ធសញ្ជាតិ បារាំង រូបនេះ បានឈ្នះពាន La Liga ៤ សម័យ, Champions League ៥ សម័យ, UEFA Super Cup ៤ សម័យ និងពានមួយចំនួនទៀត។

ទោះបីជាយ៉ាងណា ខ្សែប្រយុទ្ធម្ចាស់ពាន Ballon d’Or រូបនេះ បានចាកចេញពី Real Madrid រយៈពេលជាង ២ ឆ្នាំកន្លះមកហើយ ដោយផ្លាស់ទៅចូលរួមជាមួយក្រុម Al-Ittihad។ កីឡាករនឹងអស់សុពលភាពកិច្ចសន្យាជាមួយក្លិបលីគ អារ៉ាប៊ីសាអ៊ូឌីត មួយនេះនៅខែ មិថុនា ឆ្នាំ ២០២៦ ប៉ុន្តែស្រាប់តែថ្មីៗនេះ រូបគេបង្ហើបបំណងរបស់ខ្លួន ចង់ផ្លាស់មកកាន់ទឹកដី អេស្ប៉ាញ វិញ។

ថ្លែងប្រាប់សារព័ត៌មាន AS ខ្សែប្រយុទ្ធសញ្ជាតិ បារាំង វ័យ ៣៧ ឆ្នាំ បាននិយាយអំពីលទ្ធភាពរបស់ខ្លួន ដែលអាចត្រឡប់មក Real Madrid វិញ យ៉ាងដូច្នេះ ថា៖ «ប្រសិនបើលោក Florentino Perez នៅតែនៅទីនោះ វានឹងអាចកើតឡើងបាន។ ខ្ញុំជជែកជាមួយគាត់ ហើយវាអាចកើតឡើង។ ខ្ញុំគឺជា Madridista ម្នាក់។ ខ្ញុំមានអារម្មណ៍នៅទីនោះ។ Madrid នៅតែជាទីក្រុងរបស់ខ្ញុំ។ ខ្ញុំមានអារម្មណ៍ដូចជា Madridista និង Madrileno ម្នាក់។ ពួកយើងនឹងឃើញ ពីអ្វីដែលនឹងកើតឡើង ប្រសិនបើគាត់បន្តនៅទីនោះ។ គាត់ជាមនុស្សម្នាក់ ដែលខ្ញុំមិនអាចនិយាយថា ទេ បានទេ។ Florentino ជាមនុស្សពិសេស»៕

ប្រែសម្រួល៖ សេម កុសល
ប្រភព៖ ONE Football

The post Benzema បង្ហើបពីករណីមួយ អាចនាំឱ្យខ្លួនត្រឡប់មក Real Madrid វិញ appeared first on Kampuchea Thmey Daily.

ស្ថិតិអ្នករកចំណូលច្រើនជាងគេបំផុតនេះ ខ្សែប្រយុទ្ធសញ្ជាតិ ព័រទុយហ្គាល់ វ័យ ៤០ ឆ្នាំ បានកាន់កាប់ចំនួន ៣ ឆ្នាំជាប់គ្នាមកហើយ ដោយគិតទាំងឆ្នាំ ២០២៥។ ឆ្នាំ ២០២៥ Ronaldo រកបានប្រាក់ចំណូលបានដល់ទៅ ២៧៥ លានដុល្លារអាមេរិក ខណៈ​ចំនួននេះ គឺបានវ៉ាដាច់តែម្តងចំពោះកីឡាករលំដាប់កំពូល ៤ រូបផ្សេងទៀត ដូចជា Lionel Messi, Karim Benzema, Neymar Jr. និង Kylian Mbappe។

ខាងក្រោមនេះ ជាព័ត៌មានលម្អិតអំពីកីឡាករលំដាប់កំពូលទាំង ៥ រកបានប្រាក់ចំណូលច្រើនបំផុតប្រចាំឆ្នាំ ២០២៥៖

៥. Neymar Jr. (Santos)៖ រកចំណូលសរុបបានចំនួន ៧៦ លានដុល្លារអាមេរិក។

៤. Kylian Mbappe (Real Madrid)៖ រកចំណូលសរុបបានចំនួន ៩៦ លានដុល្លារអាមេរិក។

៣. Karim Benzema (Al-Ittihad)៖ រកចំណូលសរុបបានចំនួន ១០៤ លានដុល្លារអាមេរិក។

២. Lionel Messi (Inter Miami)៖ រកចំណូលបានចំនួន ១៣៥ លានដុល្លារអាមេរិក។

១. Cristiano Ronaldo (Al-Nassr) រកចំណូលបានចំនួន ២៧៥ លានដុល្លារអាមេរិក។

គួរបញ្ជាក់ថា ប្រាក់ចំណូលរបស់កីឡាករទាំង ៥ ខាងលើ គឺជាការសរុបប្រាក់ចំណូលទាំងនៅក្រៅទីលាន និងនៅក្នុងទីលាន។ ប្រាក់ចំណូលនេះ គឺបូកសរុបរវាងប្រាក់ឈ្នួលប្រចាំឆ្នាំនៅក្លិប និងប្រាក់ដទៃទៀត ដែលទទួលបានពីចំណូលខាងក្រៅ តាមរយៈការផ្សព្វផ្សាយផលិតផលផ្សេងៗ៕

ប្រែសម្រួល៖ សេម កុសល
ប្រភព៖ Statista

The post Ronaldo វ៉ាដាច់កីឡាករក្នុងលោក ជាប់ជាកីឡាកររកចំណូលច្រើនបំផុត ឆ្នាំ ២០២៥ appeared first on Kampuchea Thmey Daily.

ជាការពិតណាស់ នាមួយរយៈចុងក្រោយនេះ មានកីឡាករឆ្នើមៗពីអឺរ៉ុប​ជា​ច្រើន​ បានសម្រេចចិត្តផ្លាស់ទៅលេងនៅលីគ Saudi Pro League តែអ្វីដែលគួរឱ្យកត់សម្គាល់ អ្នកគាំទ្រភាគច្រើនតែងតែគិតថា ពួក​គេ​សម្រេចចិត្តផ្លាស់ទៅទីនោះ​ គឺដោយសារលុយមួយមុខគត់ ពី​ព្រោះទីនោះពិតជាទទួលបានប្រាក់ពលកម្មច្រើនពិតមែន។

ទោះបីជាយ៉ាងណា Benzema ដែលជាកីឡាករកំពុងលេងនៅទីនោះមួយរូប បានចេញមុខទម្លាយមូលហេតុពិត ថាដោយសារខ្លួនមិនចង់លេងជួបក្លិបចាស់ Real Madrid ទើបជ្រើសរើសការផ្លាស់ទៅទឹកដីមជ្ឍឹមបូព៌ា។

ដកស្រង់ពាក្យសម្តីដើមពីអ្នកកាសែត អ៉ីតាលី លោក Fabrizio Romano អតីតខ្សែប្រយុទ្ធជម្រើសជាតិ បារាំង បានលើកឡើងយ៉ាងដូច្នេះថា ៖«ការសម្រេចចិត្តរបស់ខ្ញុំផ្លាស់ទៅ អារ៉ាប៊ីសាអ៊ូឌីត ដោយសារខ្ញុំមិនចង់លេងតទល់នឹង Real Madrid នៅក្នុងជីវិតខ្ញុំ»។

គួរបញ្ជាក់ថា Benzema គឺជាកីឡាករដ៏សំខាន់មួយរូបរបស់ក្រុមអធិរាជស អំឡុងពេលលេងទីនោះពីឆ្នាំ ២០០៩ ដល់ឆ្នាំ ២០២៣ មុនពេលចាកចេញទៅកាន់ Al-Ittihad៕

ប្រែ​សម្រួល៖ សេម កុសល

The post Benzema ទម្លាយមូលហេតុនៃការជ្រើសរើសទៅលេងនៅ អារ៉ាប៊ីសាអ៊ូឌីត appeared first on Kampuchea Thmey Daily.

ខាងក្រោមនេះជាកីឡាករ៥រូបរកចំណូលបានច្រើនបំផុតនៅឆ្នាំ២០២៣៖

១. កីឡាករ Cristiano Ronaldo

តារាឆ្នើមកីឡាករ Cristiano Ronaldo ជាកីឡាករបាល់ទាត់ដែលអាចរកបានប្រាក់ចំណូលច្រើនបំផុតនៅលើពិភពលោកក្នុងឆ្នាំ២០២៣ បើយោងតាមទស្សនាវដ្តី Forbes។ គិតត្រឹម​ចុងឆ្នាំ២០២៣ Ronaldo កំពុងឈរលេខ១ ក្នុងតារាងចំណាត់​ថ្នាក់​កីឡាករបាល់ទាត់​រកប្រាក់ចំណូលបានច្រើនបំផុត។ ប្រាក់ចំណូលសរុបដែលរំពឹងទុក​​គឺប្រមាណ២៦០លានដុល្លារ។ ចំណូលថ្លៃពលកម្ម២០០លានដុល្លារទទួលពី​ក្លិប Al Nassr ខណៈចំណូលផ្សេងរបស់​រួមមានជាមួយក្រុមហ៊ុន Nike និង Jacob & Co ត្រូវបានគេប៉ាន់ស្មានថា តម្លៃ៦០លានដុល្លារក្នុងមួយឆ្នាំ។

២. កីឡាករ Lionel Messi

កីឡាករ Lionel Messi ជាប់ចំណាត់ថ្នាក់លេខ២ ក្នុងបញ្ជីកីឡាករដែលរក​បាន​ចំណូល​ច្រើនបំផុត​​គឺ​ប្រមាណ​១៣៥​លាន​ដុល្លារ។ កិច្ចព្រមព្រៀងរបស់ Messi ជាមួយ Inter Miami ត្រូវបានគេប៉ាន់ប្រមាណថា រូបគេ​អាច​រក​ចំណូលបាន៦៥លានដុល្លារ​តាម​រយៈ​ដៃគូលីគ Adidas និង Apple TV ព្រម​ទាំង​ជម្រើសក្នុងការទិញភាគហ៊ុននៅ Inter Miami នៅពេលគាត់ព្យួរស្បែកជើង។ ប្រាក់​ចំណូល​ក្រៅ​ទីលាន​ប្រចាំ​ឆ្នាំ​ចំនួន៧០លាន​ដុល្លារ។

៣. កីឡាករ Neymar

ខ្សែប្រយុទ្ធប្រេស៊ីល Neymar បានឡើងមកចំណាត់ថ្នាក់ទាំង៣ ជាមួយនឹងប្រាក់ចំណូល​ចំនួន១១២លានដុល្លារ បន្ទាប់ពីបានចុះហត្ថលេខាចូលរួមជាមួយក្លិប Al Hilal នៃ​លីគអារ៉ាប៊ីសាអ៊ូឌីតកាលពីខែសីហា។ បើយោងតាមទស្សនាវដ្តី Forbes កីឡាករ​រូប​នេះ​ទទួល​បាន​ចំណូល​ប្រមាណ​៨០លានដុល្លារ​ពី​ក្លិប Al Hilal ខណៈចំណូល​ផ្សេង​ទៀត​បាន​ពី​ដៃគូសហការផ្សេង​ៗ​ប្រមាណ​៣២លានដុល្លារ។

៤. កីឡាករ Kylian Mbappé

ខ្សែប្រយុទ្ធ Kylian Mbappé ស្ថិត​​នៅ​ចំណាត់​ថ្នាក់​លេខ៤​គឺ​តាម​ពី​ក្រោយ​អតីត​មិត្ត​រួម​ក្រុម Paris Saint-Germain កីឡាករ Neymar រួម​ជាមួយ​នឹង​ប្រាក់​ចំណូល​​ប្រមាណ​១១០លាន​ដុល្លារ។ ​រូប​គេ​រក​បាន​ចំណូល​ពី​ទីលាន​ប្រមាណ​​៩០លានដុល្លារ និងចំណូល​ពី​ប្រភព​ផ្សេង​ប្រមាណ២០លានដុល្លារ។

៥. កីឡាករ Karim Benzema

ខ្សែប្រយុទ្ធកីឡាករ Karim Benzema ឈរនៅចំណាត់ទី៥ដោយចំណូល​ប្រមាណ​១០៦លានដុល្លារ។ កីឡាករ​បារាំង​​រូប​នេះ​ទទួលបានតម្លៃពលកម្មច្រើនបំផុត​លំដាប់​ទី២ ​នៅ​លីគអារ៉ាប៊ីសាអ៊ូឌីត បន្ទាប់ពី Cristiano Ronaldo។​ចំណូល​ពី​ក្លិប Al-Ittihad កីឡាករ Benzema ទទួលបានចំនួន១០០លានដុល្លារ ខណៈចំណូលពីដៃគូសហការផ្សេងៗ​ប្រមាណ​៦លានដុល្លារទៀត៕

ប្រភព៖ Forbes

ប្រែសម្រួល៖ ផា រតនា

The post តារាបាល់ទាត់ឆ្នើម៥រូប រកចំណូលបានច្រើនបំផុតក្នុងឆ្នាំ២០២៣ appeared first on Kampuchea Thmey Daily.

លីគ Saudi Professional League ត្រូវបានបង្កើតឡើងក្នុងឆ្នាំ ១៩៧៦ ​ដែល​បច្ចុប្បន្នមាន​ក្លិប​១៦​កំពុង​ប្រកួត​ប្រជែង និង​ជា​លីគ​មួយ​​​​មាន​ធនធាន​ហិរញ្ញវត្ថុ​ខ្ពស់​ក្នុង​ការ​ចំណាយ​ដើម្បី​ពង្រឹក​ក្លិប។ ដូច្នេះ​វា​​​បាន​ក្លាយ​ជា​កន្លែង​សំបូរ​កីឡាករ​​ឆ្នើម​ៗ​មក​ពី​​ប្រទេស​ផ្សេង​ៗ​​​ទៅ​ប្រកប​អាជីព និង​ទទួល​បាន​តម្លៃពលកម្ម​ខ្ពស់។

ថ្ងៃ​នេះ សូម​បង្ហាញ​​កីឡាករ​បាល់ទាត់​ឆ្នើម​​៥​រូប​ដែល​ទទួល​បាន​តម្លៃពលកម្ម​លើ​ទី​លាន​ខ្ពស់​ជាង​គេ​បំផុត​នៅ​លីគ​អារ៉ាប៊ីសាអូឌីត។

១. ខ្សែប្រយុទ្ធ Cristiano Ronaldo

ខ្សែប្រយុទ្ធ Al-Nassr រូបនេះ​ទទួល​បាន​​បា្រក់ចំណូល ៣,៦លានផោន​ក្នុង​មួយ​សប្តាហ៍។ ជាមធ្យម Ronaldo អាចរកប្រាក់ចំណូលបានប្រមាណ ១៧៣ លានផោន​ក្នុង​មួយ​ឆ្នាំ។ ប្រាក់​ចំណូល​ទាំង​អស់​នេះ រូប​គេ​ទទួល​បាន​​​ប្រមាណ​៦២លានផោន​​​ពី​កម្លាំង​ពលកម្ម​លើ​ទី​លាន និង​១១១​លានផោន​ពី​​កិច្ចព្រមព្រៀងពាណិជ្ជកម្ម និងសិទ្ធិរូបភាព។ នេះបើយោងតាម CBS Sports។

២. ខ្សែប្រយុទ្ធ Karim Benzema 

ខ្សែប្រយុទ្ធសញ្ជាតិបារាំងរូបនេះ​រកបា្រក់ចំណូលបាន​៣,៥៨លានផោន​ក្នុង​មួយ​សប្តាហ៍​នៅ​ក្លិប Al-Ittihad។ អតីតតារាឆ្នើមរបស់ក្លិប Real Madrid រូបនេះជាមធ្យម​អាចរកប្រាក់ចំណូលបានប្រមាណ ១៧២ លានផោនក្នុងមួយឆ្នាំ។

៣. ខ្សែបម្រើ Ever Banega

ខ្សែបម្រើការពារជើងចាស់រូបនេះបានជួយ Sevilla លើកពាន Europa League ក្នុងឆ្នាំ ២០២០ មុនពេលផ្ទេរមកក្លិប Al-Shabab របស់​លីគ​អារ៉ាប៊ីសាអូឌីត។ កីឡាករ​សញ្ជាតិអាហ្សង់ទីន រូបនេះរកបាន ១៧៦,០០០ ផោនក្នុងមួយសប្តាហ៍ និង​ជាកីឡាករ​មានតម្លៃខ្លួន​ខ្ពស់​បំផុតនៅក្លិប​ Al-Shabab FC ។ ជាមធ្យម​រូបគេអាចរកប្រាក់ចំណូលបានប្រមាណជាង ៩,១លាន​ផោន​ក្នុង​មួយ​ឆ្នាំ។

៤. ខ្សែបម្រើប្រយុទ្ធ Matheus Peraira

កីឡាករប្រេស៊ីលរូបនេះបានធ្វើឱ្យ​មហា​ជន​​ភ្ញាក់ផ្អើលនៅពេលបានសម្រេចចិត្តបោះបង់ក្លិប​អង់គ្លេស​ West Brom ហើយផ្ទេរទៅកាន់ក្លិប Al-Hilal។ Peraira អារ៉ាប៊ីសាអូឌីត​ដោយ​​រកបាន ១០៧,០០០ ផោនក្នុងមួយសប្តាហ៍។ ជាមធ្យម Matheus អាចរកប្រាក់ចំណូលបានប្រមាណជាង ៥,៥លាន​ផោន​ក្នុង​មួយ​ឆ្នាំ។

 ៥. ខ្សែបម្រើប្រយុទ្ធ Anderson Talisca

ខ្សែប្រយុទ្ធសញ្ជាតិប្រេស៊ីលរូបនេះ បានផ្ទេរមកក្លិប​ Al-Nassr កាល​ពីឆ្នាំ ២០១១ ដោយរហូត​ដល់​ពេល​នេះ​​បង្ហាញខ្លួនបាន ៥១ ប្រកួត ស៊ុតបញ្ចូលទីបាន ៤០ គ្រាប់។ Talisca ទទួល​បាន​បាន ១០០,០០០ ផោន​ក្នុងមួយសប្តាហ៍។ ជាមធ្យម រូបគេអាចរកប្រាក់ចំណូលបានប្រមាណជាង ៥,១លានផោន​ក្នុង​មួយឆ្នាំ៕

ប្រែសម្រួល៖ ផា រតនា

The post កីឡាករ៥រូបមានតម្លៃពលកម្មខ្ពស់ជាងគេនៅលីគអារ៉ាប៊ីសាអូឌីត appeared first on Kampuchea Thmey Daily.

ទឹកប្រាក់សរុបដែលអតីតកីឡាករ Real Madrid នឹងរកបាន នឹងមិនតិចជាង ២២០លានអឺរ៉ូ ហើយ​អាចឡើងដល់ ៣២០លានអឺរ៉ូ។

ជាក់ស្ដែងនៅក្នុងប្រទេសអារ៉ាប៊ីសាអូឌីតគឺមិនមានពន្ធលើប្រាក់ចំណូលទេ។  វាជារឿងល្អសម្រាប់ Benzema ផ្ទាល់។

ក្រោយពេលបានផ្លាស់ទៅកាន់ក្លិបថ្មី Al-Ittihad កីឡាករ Benzema បានរំកិលខ្លួនក្លាយ​ជា​កីឡាករ​បាល់ទាត់​អន្តរជាតិ​ទី​៣​ដែល​រក​បាន​​តម្លៃ​ពលកម្ម​ខ្ពស់​បំផុត​លំដាប់​ទី​៣ បន្ទាប់​ពី​​តារា​ឆ្នើម Cristiano Ronaldo និង​ Lionel Messi។

គួររម្លឹក​ថា កីឡាករ Benzema បានចុះកិច្ចសន្យារយៈពេល ៣ ឆ្នាំជាមួយក្រុមជើងឯកអារ៉ាប៊ីសាអូឌីតAl-Ittihad បន្ទាប់ពីចាកចេញពីក្លឹប Real Madrid ៕

ប្រែសម្រួល៖ ផា រតនា
ប្រភព៖ Marca.com

The post Benzema ក្លាយជា​កីឡាករ​បាល់ទាត់មានតម្លៃខ្លួនខ្ពស់លំដាប់​ទី​៣​លើ​លោក​ appeared first on Kampuchea Thmey Daily.

Benzema  បាននិយាយអំពីលីគអារ៉ាប៊ីសាអូឌីតថា ៖«វាគឺជាលីគដ៏ល្អ ហើយមានកីឡាករល្អៗជាច្រើន។ Cristiano Ronaldo បានទៅទីនោះរួចហើយ។ គាត់ត្រូវជាមិត្តភ័ក្តិរបស់ខ្ញុំ។ គាត់បានបង្ហាញថា លីគអារ៉ាប៊ីសាអូឌីត កំពុងចាប់ផ្តើមរីកចម្រើនទៅមុខ។ ខ្ញុំទៅទីនេះដើម្បីឈ្នះពាន ដូចអ្វីដែលខ្ញុំធ្លាប់បានធ្វើនៅអឺរ៉ុប»។

ម្ចាស់ពានរង្វាន់បាល់មាស Ballon d’Or កីឡាករ Karim Benzema ជាអ្នកស៊ុតបញ្ចូលទីបាន ៣៥៤ គ្រាប់សម្រាប់ក្លិបអធិរាជស Real Madrid និងស្ថិតនៅលំដាប់ទីពីរ បន្ទាប់ពីកីឡាករ Cristiano Ronaldo ។

ខ្សែប្រយុទ្ធសញ្ជាតិបារាំង Benzema វ័យ៣៥ ឆ្នាំបានឈ្នះពានរង្វាន់សរុបចំនួន ២៥ រួមមានពានរង្វាន់ Champions League ចំនួន ៥, Club World Cup ចំនួន ៥, UEFA Super Cup ចំនួន៤, ពានរង្វាន់ LaLiga ចំនួន ៤, ពានរង្វាន់ Copa del Rey ចំនួន៣ និងពានរង្វាន់ Spanish Super Cup ចំនួន៤ លើកក្នុងរយៈពេល ១៤ ឆ្នាំជាមួយក្រុម Real Madrid។

Benzema លេងបាន ៦៤៨ប្រកួតឲ្យក្រុម Real បន្ទាប់ពីការផ្ទេរមកពីក្លិប Lyon របស់ប្រទេសបារាំង នៅឆ្នាំ ២០០៩ ហើយការបង្ហាញខ្លួនចុងក្រោយរបស់គាត់សម្រាប់ Real Madrid គឺគាត់ស៊ុតបញ្ចូលទីដោយបាល់ប៉េណាល់ទីក្នុងការប្រកួតស្មើ ១-១ កាលពីថ្ងៃអាទិត្យជាមួយ Athletic Bilbao មុនពេលត្រូវបានប្តូរចេញ។

សរុបមកវិញ ការផ្ទេររបស់កីឡាករ Benzema គឺគាត់ចង់ផ្លាស់ប្តូរបទពិសោធថ្មីមួយទៀត បន្ទាប់ពី​លោក​បានឈ្នះពានរង្វាន់នៅទ្វីបអឺរុបនៅយ៉ាងច្រើនក្នុងអាជីពជាកីឡាករ ហើយទៅនោះគាត់ក៏បានជួបមិត្តរួមចាស់គឺកីឡាករ Cristiano Ronaldo ផងដែរ៕

ប្រែសម្រួល៖ ផា រតនា
ប្រភព៖ BBC

The post Benzema បានផ្លាស់​ទៅ​ក្លិប Al-Ittihad គូ​ប្រជែងរបស់ Ronaldo appeared first on Kampuchea Thmey Daily.

Karim Benzema បានប្រកាសចូលនិវត្តន៍ពីក្រុមជម្រើសជាតិ បន្ទាប់ពីខកខានការប្រកួតរបស់ក្រុមជម្រើសជាតិបារាំងទៅកាន់វគ្គផ្តាច់ព្រ័ត្រ World Cup។

Benzema ត្រូវបានបញ្ជូនត្រលប់ទីមាតុប្រទេសវិញនៅមុនការប្រកួត បន្ទាប់ពីទទួលរងរបួស ប៉ុន្តែមានការរំពឹងទុកខ្លះ​ថា​អាចត្រលប់មកវិញសម្រាប់វគ្គផ្តាច់ព្រ័ត្រ បន្ទាប់ពីបានចូលលេងក្នុងការប្រកួតមិត្តភាពជាមួយ Real Madrid មុនការប្រកួតផ្ដាច់ព្រ័ត្រមកដល់។

ទោះបីជាយ៉ាងណាក៏ដោយ គេបានច្រានចោលនូវឱកាសត្រឡប់ទៅប្រទេសកាតាវិញ បន្ទាប់ពីលេចចេញបញ្ហាជាមួយគ្រូបង្វឹក លោក Didier Deschamps ហើយឥឡូវនេះគេបានបង្ហោះនៅលើបណ្តាញសង្គមដើម្បីបញ្ជាក់ថា ខ្លួនបានសម្រេចចិត្តបញ្ចប់ការងារជាមួយក្រុមជម្រើសជាតិ។

«ខ្ញុំបានខិតខំប្រឹងប្រែង និងកំហុសឆ្គងដែលខ្ញុំបានធ្វើនៅថ្ងៃនេះ ហើយខ្ញុំមានមោទនភាពចំពោះវា!» Benzema បានសរសេរលើ Instagram កាលពីរសៀលថ្ងៃចន្ទ (យប់ថ្ងៃចន្ទនៅកម្ពុជា)។

Benzema បានច្រានចោលសំណើរបស់ប្រធានាធិបតីបារាំង Emmanuel Macron ដើម្បីជិះយន្តហោះឯកជនផ្ទាល់ខ្លួនរបស់លោកទៅកាន់ប្រទេសកាតា សម្រាប់ការប្រកួតវគ្គផ្តាច់ព្រ័ត្រកាលពីថ្ងៃអាទិត្យ។ នោះដោយយោងតាមសាររបស់គេសរសេរថា ‘ខ្ញុំមិនចាប់អារម្មណ៍’ ពោលគឺនៅមុនការប្រកួតវគ្គផ្តាច់ព្រ័ត្រ ខណៈដែលគេបានប្រាប់យ៉ាងមុតមាំថា នឹងបដិសេធការកោះហៅណាមួយ។

Deschamps គ្រោងជួបពិភាក្សាជាមួយសហព័ន្ធបាល់ទាត់បារាំងក្នុងឆ្នាំថ្មីអំពីអនាគតរបស់លោក ប៉ុន្តែ Benzema បានជ្រើសរើសមិនរង់ចាំមើលពីរបៀបដែលការពិភាក្សានោះដំណើរការយ៉ាងម៉េចនោះទេ ហើយបានប្រកាសលាឈប់ពីក្រុមជម្រើសជាតិ។

Benzema បញ្ចប់អាជីពនៅប្រទេសបារាំងជាមួយនឹងគ្រាប់បាល់ ៣៧គ្រាប់ ក្នុងការបង្ហាញខ្លួន ៩៧ប្រកួត ប៉ុន្តែដំណើររបស់គេជាមួយក្រុមជម្រើសជាតិគឺនៅឆ្ងាយពីភាពរលូនចាប់តាំងពីការបង្ហាញខ្លួនលើកដំបូងកាលពី ១៥ឆ្នាំមុន។

Benzema បានបង្ហាញខ្លួនលើឆាកអន្តរជាតិដំបូងរបស់គេជាមួយអូទ្រីស ក្នុងខែមីនា ឆ្នាំ២០០៧ ហើយបានស៊ុតបញ្ចូលទីក្នុងអំឡុងពេលផ្លាស់ប្ដូរចូលនៅតង់ទីពីរ។

គេត្រូវបានជ្រើសរើសសម្រាប់ក្រុមបាល់ទាត់ជម្រើសជាតិបារាំងលេងក្នុង Euro 2008 ប៉ុន្តែត្រូវបានរិះគន់ចំពោះការលេងរបស់គេក្នុងវគ្គចែកពូលនៃការប្រកួត ខណៈដែលក្រុមបានធ្លាក់ចេញពីពូល។

ទោះបីជាលេងជាទៀងទាត់ក្នុងអំឡុងពេលយុទ្ធនាការជម្រុះក៏ដោយ Benzema ត្រូវបានចាកចេញពីក្រុមរបស់ប្រទេសបារាំងសម្រាប់ការប្រកួត World Cup ឆ្នាំ២០១០ ទោះបីជាគ្រូបង្វឹក Raymond Domenech បានទទូចថាវាគឺដោយសារតែទម្រង់នៅក្លិបរបស់គេជាមួយ Real Madrid ជាជាងការចោទប្រកាន់ពាក់ព័ន្ធនឹងរឿងអាស្រូវផ្លូវភេទនៅពេលនោះ។

Benzema នឹងត្រូវលេងនៅ Euro 2012 និង World Cup 2014 ប៉ុន្តែបញ្ហានៅក្នុងរឿងអាស្រូវផ្លូវភេទដែលពាក់ព័ន្ធនឹងមិត្តរួមក្រុមរបស់បារាំង Mathieu Valbuena បាននាំឱ្យអវត្តមានរយៈពេល ៥ឆ្នាំពីការប្រកួតជាមួយក្រុមជម្រើសជាតិ ដែលរួមបញ្ចូលទាំងយុទ្ធនាការ World Cup 2018។

គេបានត្រលប់ទៅក្រុមជម្រើសជាតិបារាំងវិញសម្រាប់ Euro 2020 កាលពីឆ្នាំមុន ហើយបានស៊ុតបាល់បញ្ចូលទីចំនួន ៤ គ្រាប់ក្នុងអំឡុងការប្រកួតដើម្បីបញ្ចប់ក្នុងនាមជាអ្នកស៊ុតបញ្ចូលទីច្រើនជាងគេទី៣។

បន្ទាប់ពីធ្វើឱ្យមានការចាប់អារម្មណ៍ក្នុងការប្រកួតវគ្គផ្តាច់ព្រ័ត្រ UEFA Nations League Benzema បានឈ្នះពានរង្វាន់ជាលើកដំបូងជាមួយនឹងក្រុមជម្រើសជាតិ។

បន្ទាប់ពីឆ្នាំដ៏ល្អ បានឈ្នះពានរង្វាន់ Champions League និង Ballon d’Or ធ្វើឱ្យ Benzema រំពឹងថានឹងក្លាយជាកម្លាំងក្នុងតំបន់ប្រយុទ្ធរបស់បារាំងនៅ World Cup រហូតដល់របួសត្រូវបានធ្វើឱ្យអាក់ខាន៕

ប្រភព៖ dailymail.co.uk
អត្ថបត៖ មន្នីរ័ត្ន

The post រឿងរ៉ាវនាំទៅធ្វើឱ្យ Benzema សម្រេចប្រកាសចូលនិវត្តន៍ពីក្រុមជម្រើសជាតិបារាំង ជាផ្លូវការ appeared first on Kampuchea Thmey Daily.