Koji Gyotoku Archives - Kampuchea Thmey Daily

លោក Koji Gyotoku បន្តដឹកនាំក្រុមជម្រើសជាតិកម្ពុជាក្នុងឆ្នាំ ២០២៦

chean virakbot — Wed, 21 Jan 2026 02:29:34 +0000

គ្រូបង្វឹកសញ្ជាតិជប៉ុន លោក Koji Gyotoku នឹងបន្តដឹកនាំក្រុមបាល់ទាត់ជម្រើសជាតិកម្ពុជាសម្រាប់ការប្រកួតអន្តរជាតិនានាក្នុងឆ្នាំ ២០២៦ បន្ទាប់ពីលោកត្រូវបានសហព័ន្ធកីឡាបាល់ទាត់កម្ពុជាបន្តកុងត្រាថ្មី។

លោក Koji Gyotoku ត្រូវបានសហព័ន្ធកីឡាបាល់ទាត់កម្ពុជាតែងតាំងជាគ្រូបង្គោលជម្រើសជាតិកម្ពុជា កាលពីចុងឆ្នាំ ២០២៤ និងត្រូវផុតកុងត្រានៅដើមឆ្នាំ ២០២៦ ប៉ុន្តែនៅពេលនេះ សហព័ន្ធកីឡាបាល់ទាត់កម្ពុជាផ្តល់សេចក្តីទុកចិត្តដល់លោកឲ្យដឹកនាំបន្តទៀត។

លោក កែវ សារ៉េត អគ្គលេខាធិការនៃសហព័ន្ធកីឡាបាល់ទាត់កម្ពុជា បានឆ្លើយតបនឹងសារព័ត៌មាន«កម្ពុជាថ្មី»ជុំវិញការរៀបចំក្រុមការងារគ្រូបង្វឹកត្រៀមពានអន្តរជាតិក្នុងឆ្នាំ ២០២៦ ថា ៖«ខ្ញុំសូមផ្តល់ចម្លើយពាក់កណ្តាលសិន សម្រាប់គ្រូបង្គោលគឺយើងយកគ្រូជនជាតិជប៉ុនដដែលគឺលោក Koji Gyotoku ហើយសម្រាប់ក្រុមការងារដែលមានគ្រូជំនួយជាដើមនៅលើលោក ឈូក ពិសិដ្ឋ ជាអ្នកចាត់ការក្រុម ធ្វើការជាមួយគ្រូបង្គោលដើម្បីរៀបចំក្រុមការងារ តែមិនទាន់បានលទ្ធផលមកទេ»។

ក្រុមបាល់ទាត់ជម្រើសជាតិកម្ពុជា ត្រូវមានភារកិច្ចសំខាន់ក្នុងឆ្នាំ ២០២៦ គឺការប្រកួត ជើងឯកអាស៊ាន ASEAN Championship ចាប់ពីខែកក្កដា ដល់ ខែសីហា។ កម្ពុជា ស្ថិតនៅពូល A ជាមួយក្រុមម្ចាស់ជើងឯកឆ្នាំចាស់ វៀតណាម ឥណ្ឌូណេស៊ី សិង្ហបុរី និងព្រុយណេ ឬ ទីម័រខាងកើត។

នេះជាលើកទី ២ ដែលលោក Koji Gyotoku ត្រូវដឹកនាំក្រុមជម្រើសជាតិកម្ពុជាសម្រាប់ការប្រកួតជើងឯក ASEAN Championship បន្ទាប់ពីលើកទី១ កាលពីឆ្នាំ២០២៤ លោកបានដឹកនាំឈ្នះ ទីម័រខាងកើត ២-១, ស្មើ ម៉ាឡេស៊ី ២-២ និងចាញ់ វៀតណាម និង ថៃ ២-១ ដូចគ្នា។ អ្នកគាំទ្រចង់ឃើញ កម្ពុជាបង្កើតប្រវត្តិសាស្ត្រដំបូងក្នុងការឆ្លងឲ្យផុតវគ្គសន្សំពិន្ទុក្នុងពូល ដោយសារមិនធ្លាប់ឆ្លងផុតវគ្គសន្សំពិន្ទុក្នុងពូលឡើយ។

ក្រៅពីការប្រកួតផ្លូវការក្នុងពានរង្វាន់ខាងលើ លោក Koji Gyotoku ក៏បានដឹកនាំក្រុមជម្រើសជាតិក្នុងការប្រកួតមិត្តភាពអន្តរជាតិចំនួន ៦ ប្រកួតទៀតគឺ ឈ្នះ១ ស្មើ១ និងចាញ់៤។

ស្ថិតិក្រោមការដឹកនាំរបស់លោក Koji Gyotoku គឺឈ្នះ ២ ស្មើ ២ និងចាញ់ ៧

ឈ្នះ ឆាយនីយ តៃប៉ិ ៣-២ (មិត្តភាពនៅកម្ពុជា ទី១១ វិច្ឆិកា ២០២៤)
ចាញ់ ហុងកុង ០-៣ (មិត្តភាពនៅ ហុងកុង ទី១៥ តុលា ២០២៤ )
ចាញ់ U23 កាតា ១-២ (មិត្តភាពបិទទ្វារនៅកាតា ទី១៦ វិច្ឆិកា ២០២៤)
ស្មើ ម៉ាឡេស៊ី ២-២ (ASEAN Championship នៅកម្ពុជា ទី៨ ធ្នូ ២០២៤)
ចាញ់ សិង្ហបុរី ១-២ (ASEAN Championship នៅសិង្ហបុរី ទី១១ ធ្នូ ២០២៤)
ឈ្នះ ទីម័រខាងកើត ២-១ (ASEAN Championship នៅកម្ពុជា ទី១៧ ធ្នូ ២០២៤)
ចាញ់ ថៃ ១-២ (ASEAN Championship នៅថៃ ទី២០ ធ្នូ ២០២៤)
ចាញ់ វៀតណាម ១-២ (មិត្តភាពនៅវៀតណាម ទី១៩ មីនា ២០២៥)
ចាញ់ អារូបា ១-២ (មិត្តភាពនៅកម្ពុជា ទី២៥ មីនា ២០២៥)
ចាញ់ តាជីហ្ស៊ីស្ថាន (មិត្តភាពនៅកម្ពុជា ទី៥ មិថុនា ២០២៥)
ស្មើ ហុងកុង ១-១ (មិត្តភាពនៅហុងកុង ទី១៣ វិច្ឆិកា ២០២៥)

អត្ថបទ៖ វិរបុត្រ

The post លោក Koji Gyotoku បន្តដឹកនាំក្រុមជម្រើសជាតិកម្ពុជាក្នុងឆ្នាំ ២០២៦ appeared first on Kampuchea Thmey Daily.

ប៉ះ អ៉ីរ៉ាក់ ថ្ងៃស្អែក លោក Koji ត្រូវការពិន្ទុ ដើម្បីបង្កើតកំណត់ត្រាលើកទី២ សម្រាប់យុវជនកម្ពុជា

chean virakbot — Mon, 08 Sep 2025 04:10:25 +0000

លោកគ្រូ Koji Gyotoku ត្រូវដឹកនាំក្រុម U23 កម្ពុជា រកឲ្យបានពិន្ទុពីក្រុម U23 អ៉ីរ៉ាក់ ទើបអាចមានឱកាសអ៊ុតក្រុមចំណាត់ថ្នាក់លេខ ២ ល្អបំផុតក្នុងពូលនៅពេលក្រុមទាំងពីរត្រូវប្រកួតកាត់សេចក្តីចុងក្រោយ ក្នុងពូល G ពានរង្វាន់យុវជនអាស៊ី AFC U23 Asian Cup វេលាម៉ោង៧យប់ថ្ងៃទី៩ ខែកញ្ញា ឆ្នាំ ២០២៥នេះ។

ក្រុម U23 កម្ពុជា

ឆ្លងកាត់ ២ ប្រកួតដូចគ្នា ក្រុមទាំងពីរមិនទាន់បរាជ័យដូចគ្នា។ អ៉ីរ៉ាក់ រកបាន ៦ ពិន្ទុពេញ កំពុងឈរលើកំពូលតារាង បន្ទាប់ពីឈ្នះ ប៉ាគីស្ថាន ៨-១ និងឈ្នះ អូម៉ង់ ១-០។ ចំណែក កម្ពុជា រកបាន ៤ ពិន្ទុ ឈរលេខ២ តាមរយៈជ័យជម្នះ ១-០ លើ ប៉ាគីស្ថាន និងស្មើ អូម៉ង់ ០-០។

ការប្រកួតនេះ ក្រុមណាឈ្នះ នឹងទទួលបានលេខ ១ ក្នុងពូល ឡើងទៅជុំចុងក្រោយដោយស្វ័យប្រវត្តិ។ ប្រសិនបើ អ៉ីរ៉ាក់ ចាញ់ ក៏ពួកគេនៅតែមានភាគរយខ្ពស់ក្នុងការឡើងទៅជុំចុងក្រោយក្នុងនាមជាក្រុមលេខ២ល្អបំផុត។ ផ្ទុយទៅវិញ ប្រសិនបើ កម្ពុជា ចាញ់គឺអស់ឱកាសហើយ ប៉ុន្តែ ប្រសិនបើស្មើគ្នាគឺ អ៉ីរ៉ាក់ លេខ១ ហើយ កម្ពុជាអាចមានឱកាសអ៊ុតមើលចំណាតត់ថ្នាក់លេខ ២ ល្អបំផុតក្នុងពូល។

កីឡាករកម្ពុជា ប្រកួតជាមួយ អូម៉ង់

ការប្រកួតនេះនឹងពិបាកខ្លាំងសម្រាប់ម្ចាស់ផ្ទះកម្ពុជា។ ក្រុមអ៉ីរ៉ាក់ ពិតជាមានទម្រង់លេងល្អហួសពីការស្មាន ដោយស្ទើរតែដូចមកពីតំបន់អឺរ៉ុបទៅហើយ។ ពួកគេមានបច្ចេកទេសលេងបាល់មួយប៉ះដ៏មានប្រសិទ្ធភាព ហើយលេងចង្វាក់លឿនៗ និងបោះបាល់ចោះចូលកណ្តាលដ៏គ្រោះថ្នាក់។ ទាំងតំបន់ការពារ បម្រើ និងប្រយុទ្ធសុទ្ធតែល្អ ហើយកាយសម្បទារបស់ពួកគេក៏មានប្រៀបជាងកម្ពុជាថែមទៀត។

ក្រុម អ៉ីរ៉ាក់ មិនធ្លាប់ធ្លាក់ត្រឹមវគ្គជម្រុះក្នុងពូលឡើយ។ ពួកគេតែងតែបានឡើងទៅជុំចុងក្រោយរហូតគិតចាប់តាំងពីឆ្នាំដំបូង ២០១៣ មក ហើយពួកគេធ្លាប់បានឈ្នះជើងឯកពានរង្វាន់នេះថែមទៀត។

ក្រុម U23 អ៉ីរ៉ាក់

កម្ពុជា ត្រូវការប្រុងប្រយ័ត្នខ្លាំងមែនទែនសម្រាប់ការប្រកួតនេះ។ កម្ពុជា ត្រូវគ្រប់គ្រងបាល់ឲ្យបានច្រើន ការពារឲ្យបានល្អ និងកាត់ផ្តាច់ចង្វាក់ពួកគេតាមដែលអាចទៅបាន ពីព្រោះពួកគេលេងបាល់មួយប៉ះកម្រខូចណាស់។ ការប្រកួតនេះពិបាកយកឈ្នះ អ៉ីរ៉ាក់ ណាស់ ដូច្នេះត្រឹមលទ្ធផលស្មើក៏ជារឿងល្អដែរ។

កម្ពុជាមិនធ្លាប់មានប្រវត្តិឡើងដល់ជុំចុងក្រោយឡើយ ពោលគឺធ្លាក់ត្រឹមវគ្គជម្រុះក្នុងពូលរហូត។ ឆ្នាំ ២០២៥ គឺជាការទទួលធ្វើម្ចាស់ផ្ទះលើកទី ៣ បន្ទាប់ពីធ្លាប់ធ្វើម្ចាស់ផ្ទះឆ្នាំ ២០១៧ និង ឆ្នាំ ២០១៩។

កីឡាករអ៉ីរ៉ាក់ ប្រកួតជាមួយ ប៉ាគីស្ថាន

លោក Koji Gyotoku គ្រូបង្វឹកជម្រើសជាតិកម្ពុជា បានដឹកនាំក្រុម U20 កម្ពុជា បង្កើតប្រវត្តិសាស្ត្រដំបូងក្នុងការឡើងទៅជុំចុងក្រោយពានរង្វាន់ AFC U20 Asian Cup ឆ្នាំ២០២០។ លទ្ធផលការប្រកួតនៅពេលនោះធ្វើឲ្យមានការភ្ញាក់ផ្អើលមែនទែន ពីព្រោះស្ទើរតែឈ្នះគ្រប់ការប្រកួតក្នុងពូល ហើយជាពិសេសគឺបានឈ្នះថៃ។ ការប្រកួតពហុកីឡដ្ឋានជាតិអូឡាំពិក បើកឆាកចាញ់ ម៉ាឡេស៊ី ប្រផុតប្រផើយគឺ ៤-៥ ប៉ុន្តែ៣ប្រកួតចុងក្រោយ បានឈ្នះ កោះម៉ារីណា ៩-០, ឈ្នះ ថៃ ២-១ និង ឈ្នះ ព្រុយណេ ៣-០ ដើម្បីទទួលបានលេខ ២ ក្នុងពូល ឡើងទៅជុំចុងក្រោយ។ ទោះបីជាយ៉ាងណា ដោយសារវិបត្តិកូវីដ-១៩ ម្ចាស់ផ្ទះ អ៊ូបេគីស្ថាន បានលុបចោលសម្រាប់ការរៀបចំប្រកួតជុំចុងក្រោយ។

ឥឡូវនេះ គ្រូបង្វឹកសញ្ជាតិជប៉ុនកំពុងសម្លឹងឆ្ពោះទៅរកការបង្កើតកំណត់ត្រាជាលើកទី២ សម្រាប់ការដឹកនាំក្រុមបាល់ទាត់យុវជនកម្ពុជា នៅពានរង្វាន់កម្រិតអាស៊ី។

លោកគ្រូ Koji Gyotoku និងគ្រូជំនួយ ឃឹម បូរី

កុំភ្លេច វេលាម៉ោង ៧យប់ ថ្ងៃអង្គារ ទី៩ ខែកញ្ញា កម្ពុជា ប្រកួតជាមួយ អ៉ីរ៉ាក់ វគ្គសន្សំពិន្ទុក្នុងពូលចុងក្រោយ ពានរង្វាន់ AFC U23 Asian Cup នៅពហុកីឡដ្ឋានជាតិអូឡាំពិក៕

អត្ថបទ៖ វីរបុត្រ

The post ប៉ះ អ៉ីរ៉ាក់ ថ្ងៃស្អែក លោក Koji ត្រូវការពិន្ទុ ដើម្បីបង្កើតកំណត់ត្រាលើកទី២ សម្រាប់យុវជនកម្ពុជា appeared first on Kampuchea Thmey Daily.

លោកគ្រូ Koji ទទួលស្គាល់ យប់មិញបើគ្មានភ្លៀងខ្លាំង ខាង U23 អូម៉ង់ អាចមានប្រៀបជាង

Kosal Sem — Thu, 04 Sep 2025 03:33:40 +0000

គ្រូបង្គោលរបស់ក្រុមជម្រើសជាតិ កម្ពុជា អាយុក្រោម ២៣ ឆ្នាំលោក Koji Gyotoku បានលើកឡើងពីក្រុម U23 អូម៉ង់ អាចមានប្រៀបជាងកម្ពុជា ប្រសិនបើការប្រកួតយប់មិញអាកាសធាតុល្អ មិនមានភ្លៀង សម្រាប់ការប្រកួតដែលបញ្ចប់ដោយលទ្ធផលស្មើគ្នា។

លោក Koji Gyotoku

នៅយប់ថ្ងៃ ពុធ ទី ៣ ខែ កញ្ញា ឆ្នាំ ២០២៥ ក្រុមជម្រើសជាតិ កម្ពុជា អាយុក្រោម ២៣ ឆ្នាំបានប្រកួតជាមួយក្រុមជម្រើសជាតិ អូម៉ង់ អាយុក្រោម ២៣ ឆ្នាំ វគ្គជម្រុះពូល G ពាន AFC U23 Asian Cup ក្រោមតំណក់ទឹកភ្លៀងយ៉ាងជោកជាំនៅពហុកីឡដ្ឋានជាតិ អូឡាំពិក។ យ៉ាងណា បន្ទាប់ពីបញ្ចប់ការប្រកួត ៩០ នាទីពេញ ក្រុមទាំង ២ បានត្រឹមចែកគ្នាម្នាក់ ១ ពិន្ទុ ក្រោយស្មើគ្នាក្នុងលទ្ធផល 0 ទល់នឹង ០។

ក្រោយលទ្ធផលស្មើគ្នាបែបនេះ លោក Koji បានមានប្រសាសន៍នៅក្នុងសន្និសីទកាសែតថា៖ «ដោយសារមេឃភ្លៀង យើងគ្មានជម្រើសអ្វីក្រៅពីលេងដូចអ្វី ដែលយើងបានឃើញនោះទេ។ ខ្ញុំមើលឃើញថា កីឡាកររបស់ខ្ញុំបានព្យាយាម និងធ្វើបានល្អ។ យើងមានឱកាសច្រើន ហើយខ្ញុំគិតថា យើងគួរតែឈ្នះ ប៉ុន្តែចុងក្រោយបានត្រឹមស្មើ»។

តាមការលើកឡើងខាងលើ លោក Koji បានបង្ហាញការកោតសរសើរលើកូនក្រុមរបស់ខ្លួន ថា ធ្វើបានល្អ ទោះបីលេងក្រោមតំណក់ទឹកភ្លៀង និងមានទឹកដក់នៅលើទីលានច្រើនក៏ដោយ។ លោកយល់ថា តាមឱកាស ដែលក្រុមរបស់លោកមានកាលពីយប់មិញ គឺក្រុម កម្ពុជា គួរតែឈ្នះក្នុងការប្រកួតនេះ ប៉ុន្តែលោកសោកស្តាយ បានត្រឹមស្មើ។

លោក Koji Gyotoku

ទោះបីជាយ៉ាងណា គ្រូបង្គោលសញ្ជាតិ ជប៉ុន វ័យ ៦០ ឆ្នាំ បានបង្ហាញទស្សនៈផ្សេងវិញថា បើការប្រកួតយប់មិញមិនមានភ្លៀងដូចនេះទេ នោះខាងក្រុម អូម៉ង់ អាចមានប្រៀបជាង កម្ពុជា វិញក៏ថាបាន។ ជុំវិញរឿងនេះលោក Koji បានមានប្រសាសន៍ ថា៖ «ប្រសិនបើស្ថានភាពអាកាសធាតុល្អជាងហ្នឹង លទ្ធផលប្រហែលជាមិនអ៊ីចឹងទេ។ ពួកគេអាចនឹងមានប្រៀបជាងពួកយើងវិញក៏ថាបានដែរ ប៉ុន្តែដោយសារអាកាសធាតុបែបនេះ ធ្វើឱ្យយើងទទួលបានលទ្ធផលស្មើគ្នា»។

គួរបញ្ជាក់ថា បន្ទាប់ពីស្មើគ្នាជាមួយក្រុម អូម៉ង់ កាលពីយប់មិញ ពេលនេះក្រុមជម្រើសជាតិ កម្ពុជា កំពុងឈរនៅលេខរៀងទី ២ ក្នុងពូល G បណ្តោះអាសន្ន។ ចំណែកក្រុម អ៉ីរ៉ាក់ អាយុក្រោម ២៣ ឆ្នាំ កំពុងឈរនៅកំពូលតារាង បន្ទាប់ពីបានយកឈ្នះលើក្រុម ប៉ាគីស្ថាន ក្នុងលទ្ធផលយ៉ាងចាស់ដៃ ៨ ទល់នឹង ១៕

ទិដ្ឋភាពប្រកួត

អត្ថបទ៖ សេម កុសល

The post លោកគ្រូ Koji ទទួលស្គាល់ យប់មិញបើគ្មានភ្លៀងខ្លាំង ខាង U23 អូម៉ង់ អាចមានប្រៀបជាង appeared first on Kampuchea Thmey Daily.

លោក Koji បានលើក ផលចំណេញ ២យ៉ាង នឹងជួយ U23 កម្ពុជា ធ្វើបានល្អក្នុងវគ្គជម្រុះ U23 Asian Cup

Kosal Sem — Tue, 02 Sep 2025 09:26:34 +0000

គ្រូបង្គោលរបស់ក្រុមជម្រើសជាតិ កម្ពុជា អាយុក្រោម ២៣ ឆ្នាំ លោក Koji Gyotoku បានបង្ហើបពីកត្តា ២ ដែលនឹងជួយឱ្យ ក្រុមម្ចាស់ផ្ទះកម្ពុជា មានប្រៀបលើក្រុមគូប្រជែងទាំង ៣ ក្នុងពូល G ហើយអាចធ្វើបានល្អសម្រាប់ការប្រកួតវគ្គជម្រុះពានរង្វាន់ AFC U23 Asian Cup Saudi Arabia 2026។

លោក Koji Gyotoku

ថ្លែងនៅក្នុងសន្និសីទសារព័ត៌មាន នាព្រឹកថ្ងៃ អង្គារ៍ ទី២ ខែ កញ្ញា ឆ្នាំ ២០២៥ គ្រូបង្គោលសញ្ជាតិ ជប៉ុន វ័យ ៦០ ឆ្នាំបានមានប្រសាសន៍ ថា៖ «ផលចំណេញរបស់ពួកយើង គឺយើងមិនចាំបាច់ធ្វើដំណើរ។ ចំណែកមួយទៀត គឺពួកយើងបានស៊ាំជាមួយអាកាសធាតុនៅក្នុងស្រុករបស់ពួកយើងស្រាប់។ ផលចំណេញគឺមាន ២ ចំណុចហ្នឹង។ ខ្ញុំសង្ឃឹម ថា កីឡាកររបស់ខ្ញុំ នឹងធ្វើបានល្អគ្រប់ការប្រកួត»។

ជុំវិញការលើកឡើងខាងលើ លោក Koji បានមើលឃើញពីផលចំណេញ ២ ដែល កម្ពុជា ធ្វើជាម្ចាស់ផ្ទះវគ្គជម្រុះពាន AFC U23 Asian Cup Saudi Arabia 2026 ទី ១ គឺមិនបាច់ធ្វើដំណើរ និងទី ២ គឺការស៊ាំជាមួយអាកាសធាតុស្រាប់។ ដូច្នេះកត្តាទាំងនេះ នឹងជួយឱ្យ កម្ពុជា អាចធ្វើបានល្អក្នុងការប្រកួតវគ្គជម្រុះនេះ។

ខ្សែបម្រើបុង សាំយូអ៊េល

ដោយឡែកខ្សែបម្រើបុង សាំយូអ៊េល វិញ ក៏បានមើលឃើញពីផលផលចំណេញ ដែលកម្ពុជាធ្វើជាម្ចាស់ផ្ទះនេះផងដែរ ហើយគេជឿជាក់ ថា ក្រុមរបស់ខ្លួននឹងធ្វើបានល្អសម្រាប់ការប្រកួតក្នុងវគ្គជម្រុះពាន AFC U23 Asian Cup នេះ។ ខ្សែបម្រើដ៏មានទេពកោសល្យរបស់ ភ្នំពេញក្រោន បាននិយាយថា៖ «ខ្ញុំគិតថា ពួកយើងធ្លាប់លេងនៅទឹកដីរបស់យើងច្រើនដងហើយ។ អ៊ីចឹងខ្ញុំគិតថា ទីលានក៏មានភាពងាយស្រួល។ ដូច្នេះជួបជាមួយក្រុមខ្លាំង ខ្ញុំគិតថា ពួកយើងនឹងធ្វើបានល្អ»។

កីឡាករជម្រើសជាតិ កម្ពុជា អាយុក្រោម ២៣ ឆ្នាំ

គួរបញ្ជាក់ថា កម្ពុជា គឺទទួលបានសិទ្ធិធ្វើជាម្ចាស់ផ្ទះពានរង្វាន់ AFC U23 Asian Cup សម្រាប់ជម្រុះពូល G។ ក្នុងនោះការប្រកួតដំបូង ក្រុម កម្ពុជា អាយុក្រោម ២៣ ឆ្នាំ នឹងត្រូវជួបជាមួយក្រុម អូម៉ង់ នៅថ្ងៃទី ៣ ខែ កញ្ញា។ ប្រកួតទី ២ ត្រូវជួបជាមួយក្រុម ប៉ាគីស្ថាន នៅថ្ងៃទី ៦ ខែ កញ្ញា និងការប្រកួតទី ៣ ត្រូវជួបក្រុម អ៊ីរ៉ាក់ នៅថ្ងៃទី ៩ ខែ កញ្ញា៕

កាលវិភាគប្រកួត

អត្ថបទ៖ សេម កុសល

The post លោក Koji បានលើក ផលចំណេញ ២យ៉ាង នឹងជួយ U23 កម្ពុជា ធ្វើបានល្អក្នុងវគ្គជម្រុះ U23 Asian Cup appeared first on Kampuchea Thmey Daily.

ជាប្រវត្តិសាស្ត្រ លោក Koji ជាគ្រូបង្វឹកដឹកនាំក្រុមបាល់ទាត់កម្ពុជា ច្រើនកម្រិតបំផុត

chean virakbot — Fri, 01 Aug 2025 04:27:38 +0000

លោក Koji Gyotoku ត្រូវបានសហព័ន្ធកីឡាបាល់ទាត់កម្ពុជាផ្តល់ភារកិច្ចឲ្យដឹកនាំ ក្រុមបាល់ទាត់ជម្រើសជាតិនារីកម្ពុជា ទៅប្រកួតជើងឯកនារីអាស៊ាន ASEAN MSIC Serenity Cup 2025 នៅប្រទេសវៀតណាម ចាប់ពីថ្ងៃទី៦ ដល់ទី១៩ ខែសីហា ឆ្នាំ២០២៥។

លោក Koji Gyotoku

តាមរយៈការទទួលបានភារកិច្ចថ្មីបន្ថែមទៀតនេះសបញ្ជាក់ឲ្យឃើញថា បុរសជនជាតិជប៉ុនជាគ្រូបង្វឹកដែលមានកំណត់ត្រាក្នុងការដឹកនាំក្រុមបាល់ទាត់កម្ពុជាច្រើនបំផុត។ លោកបានចូលមកធ្វើការផ្នែកគ្រូបង្វឹកបាល់ទាត់នៅកម្ពុជាកាលពីឆ្នាំ ២០១៩។ ពេលនោះ លោកជាគ្រូបង្វឹកក្រុមបាល់ទាត់យុវជនកម្ពុជាអាយុ ១៥ឆ្នាំ ១៨ឆ្នាំ និង ២០ឆ្នាំ។

ក្រុមធំជម្រើសជាតិកម្ពុជា

លោក Koji បានដឹកនាំក្រុមយុវជនកម្ពុជាអាយុ ២០ ឆ្នាំ ដោយបានបង្កើតកំណត់ត្រាជាប្រវត្តិសាស្ត្រលើកដំបូងក្នុងការឡើងទៅជុំចុងក្រោយពានយុវជនអាស៊ី AFC U20 Asian Cup ឆ្នាំ ២០២០ ប៉ុន្តែដោយសារវិបត្តិកូវីដ-១៩ ទើបការប្រកួតជុំចុងក្រោយនៅប្រទេសអ៊ូបេគីស្ថានត្រូវបានលុបចោល។

ក្រុម U23 កម្ពុជា

ឆ្នាំ ២០២៤ លោកត្រូវបានប្រគល់ភារកិច្ចដឹកនាំក្រុមយុវជនអាយុ ១៦ឆ្នាំ និង ២០ឆ្នាំទៀត។ លោកបានដឹកនាំក្រុម U16 កម្ពុជាមិនចាញ់សោះក្នុងវគ្គជម្រុះក្នុងពូល ពានយុវជនអាស៊ាន ASEAN U16 Championship នៅប្រទេសឥណ្ឌូណេស៊ី និងដឹកនាំក្រុម U20 កម្ពុជាក្នុងពានរង្វាន់អាស៊ី AFC U20 Asian Cup ក្នុងខែកញ្ញា នៅឆាយនីស តៃប៉ិ។

ក្រុម U20 កម្ពុជា

នៅខែកញ្ញា ឆ្នាំ ២០២៤ ដដែល លោក Koji Gyotoku ត្រូវបានតែងតាំងជាគ្រូបង្គោលដើម្បីដឹកនាំក្រុមធំជម្រើសជាតិលើកដំបូង។ លោកបានដឹកនាំប្រកួតអន្តរជាតិលើកដំបូងជាមួយ ក្រុមឆាយនីតៃប៉ិ និង ហុងកុង មុនពេលដឹកនាំក្នុងពានរង្វាន់ផ្លូវការ AFF Championship ចុងឆ្នាំ ២០២៤។ លោកបានដឹកនាំការប្រកួតមិត្តភាពអន្តរជាតិជាបន្តបន្ទាប់ទៀត។

ក្រុម U16 កម្ពុជា

ស្របពេលក្រុមធំជម្រើសជាតិកម្ពុជាគ្មានការប្រកួតពានរង្វាន់ផ្លូវការក្នុងឆ្នាំ ២០២៥ លោកត្រូវបានផ្តល់អាទិភាពឲ្យដឹកនាំក្រុម U23 កម្ពុជាដើម្បីចូលរួមប្រកួតព្រឹត្តិការណ៍អន្តរជាតិ ៣ ផ្សេងគ្នា គឺ ពានរង្វាន់ ASEAN U23 Championshiop នៅប្រទេសឥណ្ឌូណេស៊ី កាលពីខែកក្កដា ជម្រុះពានយុវជនអាស៊ី AFC U23 Asian Cup នៅកម្ពុជា នៅខែកញ្ញាខាងមុខ និងចុងឆ្នាំនេះក្នុងកីឡាស៊ីហ្គេម នៅប្រទេសថៃ។

ព្រឹត្តិការណ៍អន្តរជាតិ ២ សម្រាប់ក្រុម U23 កម្ពុជាមិនទាន់មកដល់ លោក Koji Gyotoku ត្រូវបានផ្តល់ភារកិច្ចឲ្យដឹកនាំក្រុមនារីកម្ពុជា ASEAN MSIC Serenity Cup 2025 នៅប្រទេសវៀតណាមទៀត។

ក្រុមនារីកម្ពុជា

សរុបសេចក្តីទៅ លោកគ្រូបង្វឹកជប៉ុនរូបនេះបានដឹកនាំក្រុមបាល់ទាត់កម្ពុជាគ្រប់កម្រិតផ្នែកបុរសមានដូចជា ក្រុម U16, U18, U20, U23 និងក្រុមធំ ហើយឥឡូវនេះក្រុមជម្រើសជាតិនារីថែមទៀត៕

អត្ថបទ៖ វីរបុត្រ

The post ជាប្រវត្តិសាស្ត្រ លោក Koji ជាគ្រូបង្វឹកដឹកនាំក្រុមបាល់ទាត់កម្ពុជា ច្រើនកម្រិតបំផុត appeared first on Kampuchea Thmey Daily.

ការចាញ់យប់មិញ គ្រូ Koji មិនភ្ញាក់ផ្អើល ដោយចាត់ទុក វៀតណាម ល្អជាង កម្ពុជា ឆ្ងាយ

Kosal Sem — Wed, 23 Jul 2025 07:00:10 +0000

គ្រូបង្គោលរបស់ក្រុមជម្រើសជាតិកម្ពុជា អាយុក្រោម ២៣ ឆ្នាំ លោក Koji Gyotoku ហាក់មិនមានភាពភ្ញាក់ផ្អើលឡើយ ចំពោះលទ្ធផល ដែល កម្ពុជា បរាជ័យក្រោមថ្វីជើងក្រុមវៀតណាម អាយុក្រោម ២៣ ឆ្នាំ ២-១ ក្នុងពានរង្វាន់ ASEAN U-23 Championship កាលពីយប់មិញថ្ងៃទី ២២ ខែ កក្កដា ឆ្នាំ ២០២៥ ដោយលោកបានដឹងរួចទៅហើយ អំពីកម្រិតរបស់ក្រុម វៀតណាម ល្អជាង កម្ពុជា ឆ្ងាយ។

ទិដ្ឋភាពប្រកួត

ថ្លែងនៅក្នុងសន្និសីទសារព័ត៌មាន ក្រោយបញ្ចប់ការប្រកួត បុរសសញ្ជាតិ ជប៉ុន វ័យ ៦០ ឆ្នាំបានលើកឡើងថា ៖«មុនពេលកែបាល់ ខ្ញុំបានដឹងហើយ ថា វានឹងពិបាកខ្លាំង ពីព្រោះក្រុម U23 វៀតណាមគឺជាក្រុមដ៏ខ្លាំងមួយ។ គ្រប់កីឡាករគឺល្អខ្លាំង ហើយក្រុមទាំងមូលក៏ល្អផងដែរ។ U23 វៀតណាម និង កម្ពុជា គឺមានកម្រិតខុសគ្នាខ្លាំង»។

លោក Koji បានបន្តថា ៖«វៀតណាម គឺល្អខ្លាំងជាងយើង។ ពួកគេល្អឥតខ្ចោះទាំងជំនាញជាបុគ្គល។ បច្ចេកទេសល្អខ្លាំង។… ពួកយើងមិនអាចឆ្លងផុតវគ្គក្នុងពូលទេ ប៉ុន្តែពួកយើងនៅមានព្រឹត្តិការណ៍សំខាន់ៗនាពេលខាងមុខទៀត។ ពួកយើងត្រូវរត់ឱ្យខ្លាំង ព្យាយាមឱ្យខ្លាំងជាងនេះ និងប្រឹងធ្វើការឱ្យខ្លាំងបន្ថែមទៀត»។

ទិដ្ឋភាពប្រកួត

តាមការលើកឡើងរបស់លោក Koji គឺលោកហាក់បានដឹងមុនទៅហើយអំពីលទ្ធផល ដោយលោកទទួលស្គាល់ថា វៀតណាម គឺជាក្រុមខ្លាំង ហើយមានកម្រិតល្អជាង កម្ពុជា ឆ្ងាយ។ យ៉ាងណា កម្ពុជា នៅមានការប្រកួតពានរង្វាន់ផ្សេងៗទៀតនៅពេលអនាគត ហើយលោកបានទទូចឱ្យកីឡាករកម្ពុជា ត្រូវបន្តទៅមុខ និងប្រឹងប្រែងឱ្យកាន់តែខ្លាំងថែមទៀត។

គួរបញ្ជាក់ថា បន្ទាប់ពីបរាជ័យក្រោមថ្វីជើង វៀតណាម ២-១ យប់មិញ ក្រុម កម្ពុជា អាយុក្រោម ២៣ ឆ្នាំ បានធ្លាក់ចេញពីពានរង្វាន់ ASEAN U23 Championship ត្រឹមវគ្គក្នុងពូល៕

ក្រុម U23 កម្ពុជា

ប្រែសម្រួល៖ សេម កុសល
ប្រភព៖ Vietnam. VN

The post ការចាញ់យប់មិញ គ្រូ Koji មិនភ្ញាក់ផ្អើល ដោយចាត់ទុក វៀតណាម ល្អជាង កម្ពុជា ឆ្ងាយ appeared first on Kampuchea Thmey Daily.

លោក Gyotoku បានបង្កើតកំណត់ត្រាល្អ២ជាមួយយុវជនវៀតណាម

chean virakbot — Wed, 19 Mar 2025 03:33:13 +0000

លោក Koji Gyotoku ធ្លាប់បានដឹកនាំក្រុមយុវជនជម្រើសជាតិកម្ពុជាបង្កើតស្ថិតិល្អក្នុងការប្រកួតជាមួយក្រុមយុវជនជម្រើសជាតិវៀតណាម មុនពេលលោកត្រូវដឹកនាំក្រុមកម្ពុជាជម្រើសទី១ប៉ះក្រុមវៀតណាមជម្រើសទី១ វេលាម៉ោង៧:៣០នាទីយប់នេះ។

ស្មើយុវជនវៀតណាម ១-១

ក្រុមយុវជនជម្រើសជាតិកម្ពុជាអាយុ១៦ឆ្នាំ បានប្រកួតស្មើជាមួយក្រុមយុវជនវៀតណាម ដោយលទ្ធផល ១-១ ក្នុងពានរង្វាន់ AFF U16 Championship កាលពីថ្ងៃទី២៥ ខែមិថុនា ឆ្នាំ២០២៤ នៅប្រទេសឥណ្ឌូណេស៊ី។ ពេលនោះ លោកគ្រូ Koji Gyotoku បានដឹកនាំក្រុម U16 កម្ពុជាមិនចាញ់សោះនៅវគ្គសន្សំពិន្ទុក្នុងពូលគឺឈ្នះ២ និងស្មើ១ ដោយមាន៧ពិន្ទុស្មើវៀតណាម ប៉ុន្តែមិនបានឡើងវគ្គពាក់កណ្តាលផ្តាច់ព្រ័ត្រដោយសារចាញ់គ្រាប់បាល់វៀតណាម។

ឈ្នះយុវជនវៀតណាម ២-១

ក្រុមបាល់ទាត់កម្ពុជាអាយុក្រោម១៨ឆ្នាំ បានបង្កើតកំណត់ត្រាជ័យជម្នះជាលើកដំបូង នៅក្នុងពានរង្វាន់ AFF U-18 Youth Championship កាលពីថ្ងៃទី១៥ ខែសីហា ឆ្នាំ២០១៩ ដែលស្ថិតក្រោមការដឹកនាំរបស់លោកគ្រូ Koji Gyotoku។ កីឡាករកម្ពុជា ធី លៀង និង សៀង ចន្ធា ជាអ្នកស៊ុតចូលវៀតណាមដើម្បីទទួលបានជ័យជម្នះនៅលើទឹកដីវៀតណាមតែម្តង។ នៅពេលនោះ កម្ពុជារកបាន៦ពិន្ទុ ស្ថិតនៅលេខ៤ ហើយវៀតណាមរកបាន៧ពិន្ទុ ស្ថិតនៅលេខ៣ ប៉ុន្តែមិនបានឡើងទៅកាន់វគ្គពាក់កណ្តាលផ្តាច់ព្រ័ត្រដូចគ្នា ខណៈ អូស្ត្រាលី និង ម៉ាឡេស៊ី បានឡើងវគ្គបន្ត។

ប៉ះវៀតណាមជាលើកដំបូង

លោក Koji Gyotoku ត្រូវដឹកនាំក្រុមជម្រើសជាតិកម្ពុជាជម្រើសទី១ប៉ះវៀតណាមជាលើកដំបូង ក្នុងនាមជាគ្រូបង្គោល វេលាម៉ោង៧:៣០នាទីយប់នេះ។ តាមប្រវត្តិសាស្ត្រគិតចាប់តាំងពីឆ្នាំ១៩៩៦ កម្ពុជាធ្លាប់ជួបវៀតណាម៩លើកក្នុងពានរង្វាន់ផ្លូវការ ប៉ុន្តែមិនធ្លាប់ឈ្នះ ឬស្មើវៀតណាមឡើយ។ ចាំមើលលើកនេះ លោកគ្រូអាចកែប្រែប្រវត្តិសាស្ត្របានដែរឬទេ?

អត្ថបទ៖ វីរបុត្រ

The post លោក Gyotoku បានបង្កើតកំណត់ត្រាល្អ២ជាមួយយុវជនវៀតណាម appeared first on Kampuchea Thmey Daily.

គ្រូ Koji ទទួលស្គាល់សមត្ថភាពក្រុមកម្ពុជា ពុំទាន់អាចប្រជែងជាមួយ វៀតណាម

Kosal Sem — Tue, 18 Mar 2025 01:38:40 +0000

លោក Koji Gyotoku ដែលទើបត្រូវបានសហព័ន្ធបាល់ទាត់កម្ពុជា ប្រកាសតែងតាំងជាគ្រូបង្គោលថ្មីៗនេះ បានបង្ហាញទស្សនៈផ្ទាល់ខ្លួន ដោយបានចាត់ទុកសមត្ថភាពក្រុមគោព្រៃបច្ចុប្បន្ន ពុំទាន់អាចប្រកួតប្រជែងជាមួយក្រុមជម្រើសជាតិ វៀតណាមបាននៅឡើយទេ។

លោក Koji Gyotoku

ជាការពិតណាស់ នៅក្នុងការប្រកួតកម្រិតឈុតធំ ក្រុមជម្រើសជាតិកម្ពុជា គឺពុំទាន់បានយកឈ្នះលើក្រុម វៀតណាម បានសូម្បីម្តង ពោលគឺជួបគ្នា ១០ លើកចុងក្រោយ ដោយរាប់តាំងពីឆ្នាំ ១៩៩៥ គឺក្រុម កម្ពុជា បានបរាជ័យទាំងអស់។ ប៉ុន្តែបើក្រឡេកទៅមើលស្ថិតិរបស់ក្រុមថ្នាលយុវជនវិញ គឺហាក់មានស្ថិតិល្អជាង ដោយពួកគេធ្លាប់ឈ្នះវៀតណាមបានម្តង ដែលពេលនោះបានឈ្នះក្នុងលទ្ធផល ២-១ នៅក្នុងការប្រកួតពាន AFF U-19 Championship។

យ៉ាងណា នៅវេលាព្រឹកម្សិលមិញនេះ មុនហោះទៅកាន់ប្រទេស វៀតណាម លោក Koji Gyotoku ត្រូវបានអ្នកសារព័ត៌មានសួរថា តើលោកចង់ឈ្នះ វៀតណាម ខ្លាំង ដ្បិតជាការប្រកួតមិត្តភាពនៅថ្ងៃទី ១៩ នេះដែរឬទេ ដើម្បីបង្កើតកំណត់ត្រាឈ្នះលើកដំបូង ក្នុងនាមជាគ្រូបង្វឹកផ្លូវការរបស់កម្ពុជា? ភ្លាមនោះបុរសសញ្ជាតិ ជប៉ុន វ័យ ៦០ ឆ្នាំ បានឆ្លើយតបមកវិញថា៖ «ប្រកួតលើកនេះ បើយើងឈ្នះវៀតណាម យើងប្រៀបដូចជាក្រុមជើងឯកអាស៊ីហើយ (សើច)។ យើងមិនទាន់មានសមត្ថភាព ដែលអាចឈ្នះ ១០០% ទេ ប៉ុន្តែពួកយើងនឹងប្រឹងឱ្យអស់ពីសមត្ថភាព ដើម្បីការប្រកួតមួយនេះ»៕

Poster ការប្រកួតរវាងក្រុម កម្ពុជា ទល់នឹង វៀតណាម

អត្ថបទ៖ សេម កុសល

The post គ្រូ Koji ទទួលស្គាល់សមត្ថភាពក្រុមកម្ពុជា ពុំទាន់អាចប្រជែងជាមួយ វៀតណាម appeared first on Kampuchea Thmey Daily.

Koji​ Gyotoku Archives - Kampuchea Thmey Daily

លោក Koji Gyotoku បន្ត​ដឹក​នាំ​ក្រុម​ជម្រើស​ជាតិ​​កម្ពុជាក្នុង​ឆ្នាំ ២០២៦

ប៉ះ អ៉ីរ៉ាក់ ថ្ងៃ​ស្អែក ​លោក Koji ត្រូវ​ការ​ពិន្ទុ​ ដើម្បី​បង្កើត​កំណត់​ត្រា​លើក​ទី​២ សម្រាប់​យុវជន​កម្ពុជា

លោកគ្រូ Koji ទទួលស្គាល់ យប់មិញ​បើ​គ្មាន​ភ្លៀង​ខ្លាំង ខាង U23 អូម៉ង់ អាចមានប្រៀបជាង

លោក Koji បាន​លើក​​​ ផលចំណេញ ២​យ៉ាង​ នឹង​ជួយ U23 កម្ពុជា ធ្វើបានល្អក្នុងវគ្គជម្រុះ U23 Asian Cup

ជា​ប្រវត្តិ​សាស្ត្រ លោក Koji ជា​គ្រូ​បង្វឹក​​ដឹក​នាំ​ក្រុម​បាល់ទាត់​កម្ពុជា ​​ច្រើន​កម្រិត​បំផុត

ការ​ចាញ់យប់មិញ គ្រូ Koji មិនភ្ញាក់ផ្អើល​ ដោយចាត់ទុក វៀតណាម ល្អជាង កម្ពុជា ឆ្ងាយ

លោក Gyotoku បាន​បង្កើត​កំណត់​ត្រាល្អ​២​ជាមួយ​យុវជន​វៀតណាម

គ្រូ Koji ទទួលស្គាល់សមត្ថភាពក្រុមកម្ពុជា ពុំទាន់អាចប្រជែងជាមួយ វៀតណាម

Koji Gyotoku Archives - Kampuchea Thmey Daily

លោក Koji Gyotoku បន្តដឹកនាំក្រុមជម្រើសជាតិកម្ពុជាក្នុងឆ្នាំ ២០២៦

ប៉ះ អ៉ីរ៉ាក់ ថ្ងៃស្អែក លោក Koji ត្រូវការពិន្ទុ ដើម្បីបង្កើតកំណត់ត្រាលើកទី២ សម្រាប់យុវជនកម្ពុជា

លោកគ្រូ Koji ទទួលស្គាល់ យប់មិញបើគ្មានភ្លៀងខ្លាំង ខាង U23 អូម៉ង់ អាចមានប្រៀបជាង

លោក Koji បានលើក ផលចំណេញ ២យ៉ាង នឹងជួយ U23 កម្ពុជា ធ្វើបានល្អក្នុងវគ្គជម្រុះ U23 Asian Cup

ជាប្រវត្តិសាស្ត្រ លោក Koji ជាគ្រូបង្វឹកដឹកនាំក្រុមបាល់ទាត់កម្ពុជា ច្រើនកម្រិតបំផុត

ការចាញ់យប់មិញ គ្រូ Koji មិនភ្ញាក់ផ្អើល ដោយចាត់ទុក វៀតណាម ល្អជាង កម្ពុជា ឆ្ងាយ

លោក Gyotoku បានបង្កើតកំណត់ត្រាល្អ២ជាមួយយុវជនវៀតណាម