គ្រូ​បង្គោល​សញ្ជាតិ​ជប៉ុនវ័យ​ ៦១ ​ឆ្នាំ ​បាន​ប្រាប់សារព័ត៌មាន​​ aseanutdfc ថា ៖«ការ​ប្រកួត​ជើង​ឯក​អាស៊ាន​ចុង​ក្រោយ ខ្ញុំ​ដឹក​នាំ​​​ប្រកួត​ក្នុង​ដី​ដោយ​​​ស្មើ ម៉ាឡេស៊ី ២-២ និង​ឈ្នះ ទីម័រ​ខាង​កើត ២-១ ហើយ​ពួក​យើង​ពិត​ជា​ធ្វើ​បាន​ល្អ»។

លោក​បាន​​បន្ត​ថា ៖«នៅ​ក្រៅ​ដី យើង​ចាញ់ សិង្ហបុរី (១-២) ហើយ​ក៏​ចាញ់​ ថៃ (១-២) តែ​យើង​លេង​ទល់​នឹង​ថៃ គឺ​កីឡាករ​យើង​​ធ្វើ​បាន​ល្អ ដោយ​ធ្វើ​ឲ្យ​ម្ចាស់​ផ្ទះ​ថៃ​ជួប​ការ​លំបាក​ខ្លាំង»។

«សម្រាប់​លើក​នេះ កីឡាករ​មាន​ការ​ប្រែ​ប្រួល កីឡាករ​ខ្លះ​ថ្មី ហើយ​ខ្ញុំ​នឹង​ព្យាយាម​បង្កើត​ប្រព័ន្ធ​ថ្មី​មួយ។ យើង​នឹង​ព្យាយាម​ឲ្យ​អស់​ពី​លទ្ធភាព ហើយ​យើង​ចង់​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ»។ លោក Gyotoku ដែល​ធ្វើការ​នៅ​កម្ពុជា​តាំង​ពី​ឆ្នាំ ២០១៩​ បាន​បញ្ជាក់។

កម្ពុជា​ស្ថិត​នៅពូល A ដែល​ប៉ះ​ដៃ​គូ​សុទ្ធ​តែ​ខ្លាំង​ៗ​មានដូច​ជា វៀតណាម សិង្ហបុរី ឥណ្ឌូណេស៊ី និង​ក្រុម​ជម្រុះ​ឋបម​រវាង ព្រុយណេ ឬ ទីម័រ​ខាង​កើត។ ស្ថិត​នៅ​ក្នុង​ពូល​នេះមហាជន​មើល​ឃើញ​ថា ពិត​ជា​ពិបាក​ខ្លាំង​សម្រាប់​កម្ពុជា​ក្នុង​ការ​ស្វែង​រក​ផ្លូវ​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ​ជា​លើក​ដំបូង​ក្នុង​ប្រវត្តិ​សាស្ត្រ​របស់​ខ្លួន។

ការ​ប្រកួត​វគ្គ​សន្សំពិន្ទុ​ក្នុង​ពូល កម្ពុជា បើក​ឆាក​ទទួល​ម្ចាស់​ជើង​ឯក​ ៤ សម័យ​កាល​ គឺ សិង្ហបុរី នា​​ថ្ងៃ​ទី​២៤ ខែ​កក្កដា នៅ​រាជ​ធានី​ភ្នំពេញ និង​ធ្វើ​ដំណើរ​ទៅ​ជួប​ក្រុម​រង​ជើង​ឯក​ ៦ សម័យកាល​គឺ​ ឥណ្ឌូណេស៊ី នៅ​ថ្ងៃ​ទី៣១ ខែ​កក្កដា។ នៅ​ថ្ងៃ​ទី​៣ ខែ​សីហា កម្ពុជា ត្រូវ​ទទួល​ ទីម័រ​ខាង​កើត ឬ ព្រុយណេ នៅរាជ​ធានី​ភ្នំពេញ ហើយ​​ចុង​ក្រោយ​ហោះ​ទៅ​ជួប វៀតណាម នៅ​ទី​ក្រុង​ហាណូយ ថ្ងៃ​ទី​៧ ខែ​សីហា។

លោក Gyotoku បាន​បញ្ជាក់​ថា ៖«គោល​ដៅ​​គឺ​ច្បាស់​ណាស់។ ក្រុម​កម្ពុជា​មិន​ធ្លាប់​ឆ្លង​ផុត​វគ្គ​សន្សំពិន្ទុ​ក្នុង​ពូល​ទេ ហើយ​លើក​​នេះ​គឺ​ជា​គោល​ដៅ​របស់​យើង​ឆ្លង​ឲ្យ​ផុត»។

កម្ពុជា ធ្លាប់​ចូល​រួម​ប្រកួត​ពាន​រង្វាន់​អាស៊ាន​កម្រិត​ទី​១​នេះ​ ១០ លើក​ហើយ ប៉ុន្តែ​តែង​តែ​ធ្លាក់​ត្រឹម​វគ្គ​សន្សំពិន្ទុ​ក្នុង​ពូល​រហូត៕

ប្រែ​សម្រួល៖ វិរបុត្រ

The post លោក Koji ប្តេជ្ញា​នាំ ក្រុម​កម្ពុជា​ ឆ្លង​ឲ្យ​ផុត​វគ្គ​​ក្នុង​ពូលពានអាស៊ាន ឆ្នាំ​នេះ appeared first on Kampuchea Thmey Daily.

នាល្ងាចថ្ងៃ ព្រហស្បតិ៍ ទី ៥ ខែ មិថុនា នេះ ក្រុមជម្រើសជាតិ កម្ពុជា បានប្រកួតមិត្តភាពចាញ់ក្រុមភ្ញៀវ តាហ្ស៊ីគីស្ថាន ក្នុងលទ្ធផល ២-១ នៅពហុកីឡដ្ឋានជាតិ អឡាំពិក។ ក្នុងនោះ ២ គ្រាប់របស់ តាហ្ស៊ីគីស្ថាន គឺរកបាននៅវគ្គទី ២ ទាំង ២ គ្រាប់។ ចំណែក ១ គ្រាប់របស់ កម្ពុជា វិញ គឺរកបានដោយខ្សែបម្រើ មិន រតនៈ នៅនាទីទី ៧១។

ក្រោយការប្រកួតបញ្ចប់ គ្រូបង្គោលលោក Koji បានមានប្រសាសន៍នៅក្នុងសន្និសីទសារព័ត៌មានថា៖ «បញ្ហារបស់កីឡាករយើង គឺដោយសារពួកគាត់ខ្វះកម្លាំង។ ទាក់ទងជាមួយការលេងរបស់ពួកគេ ប្រសិនបើពួកគេឆ្លងកាត់ការលេងដោយគុណភាពខ្ពស់មួយឆ្នាំពេញ ពួកគេប្រហែលជាអាចលេងបានល្អជាងហ្នឹង។ តួយ៉ាងដូចកីឡាករគេ ទោះបីជាពួកគេបានបញ្ចប់រដូវកាលក៏ពិតមែន ប៉ុន្តែពួកគេនៅតែអាចលេងបាន ដោយកម្លាំងពួកគេនៅមានពេញ និងអាចលេងបាន។ សម្រាប់ខ្ញុំ គឺចង់បានកីឡាករ ដែលមានកម្លាំងពេញអាចលេងបានបែបហ្នឹង»។

គួរឱ្យដឹងថា សមាសភាពកីឡាកររបស់ កម្ពុជា ទាំង ២៣ នាក់នៅក្នុងការប្រកួតទល់នឹងក្រុម តាហ្ស៊ីគីស្ថាន គឺភាគច្រើនសុទ្ធតែជាកីឡាករអាយុក្រោម ២៣ ឆ្នាំ ពោលគឺមាន ១៦ នាក់ឯណោះ។ យ៉ាងណា លោក Koji បានបញ្ជាក់នៅក្នុងសន្និសីទសារព័ត៌មានមុននេះរួចហើយ អំពីកូនក្រុមរបស់លោកថ្ងៃនេះ គឺមានបញ្ហាធំនៅត្រង់កម្លាំង។ ជាក់ស្តែងការរបូតគ្រាប់បាល់ ២ គ្រាប់របស់ កម្ពុជា គឺសុទ្ធតែនៅក្នុងវគ្គទី ២។ តាមប្រសាសន៍របស់លោក Koji ខាងលើ លោកក៏បានសង្កត់ធ្ងន់ផងដែរ ថាកីឡាករ ដែលលោកចង់បាន គឺកីឡាករដែលមានកម្លាំងអាចលេងបានពេញ ៩០ នាទី៕

អត្ថបទ៖ សេម កុសល

The post លោក Koji បាន​ចាត់​ទុក​កម្លាំង ជាបញ្ហាធំរបស់កីឡាករ​កម្ពុជា ថ្ងៃនេះ appeared first on Kampuchea Thmey Daily.

កាលពីយប់ថ្ងៃទី ១៩ ខែ មីនា ម្សិលមិញ ក្រុមគោព្រៃកម្ពុជា បានធ្វើដំណើទៅកីឡដ្ឋាន Binh Duong ដើម្បីប្រកួតមិត្តភាពកម្តៅសាច់ដុំទល់នឹងជម្រើសជាតិ វៀតណាម ហើយជាលទ្ធផលក្រោយបញ្ចប់ការប្រកួត ៩០ នាទីពេញ ក្រុម កម្ពុជា បានបរាជ័យក្រោមថ្វីជើងក្រុមម្ចាស់ផ្ទះ វៀតណាម ២-១។

ក្នុងនោះ ២ គ្រាប់របស់ វៀតណាម គឺរកបាននៅវគ្គទី ១ ទាំង ២ គ្រាប់ ដែលស៊ុតបញ្ចូលទីដោយកីឡាករ Nguyen Hai Long និង Nguyen Van Vi។ ចំណែក ១ គ្រាប់របស់ កម្ពុជា វិញ គឺរកបានដោយខ្សែបម្រើវ័យក្មេងមកពីភ្នំពេញក្រោន ប៊ុង សាំយូអែល នៅវគ្គទី ២។

បន្ទាប់ពីបញ្ចប់ការប្រកួតភ្លាម លោក Koji មានប្រសាសន៍ក្នុងសន្និសីទសារព័ត៌មានយ៉ាងដូច្នេះថា ៖«ជាដំបូង ខ្ញុំសូមអរគុណដល់សហព័ន្ធបាល់ទាត់វៀតណាម ដែលបានរៀបចំការប្រកួតបានយ៉ាងល្អនៅថ្ងៃនេះ។ ក្រុមរបស់ខ្ញុំលេងបានល្អក្នុងវគ្គទីពីរ។ បើ​ប្រៀប​ធៀប​កម្រិតក្រុម​ទាំង​ពីរ វៀតណាម​សព្វ​ថ្ងៃ​មាន​ប្រៀប​ជាង​គ្រប់​យ៉ាង តាំង​ពី​បច្ចេកទេស​ និង​កម្លាំង។ ក្រុមរបស់ខ្ញុំបានក្រេបយកនូវបទពិសោធ​ជាច្រើន។ នៅវគ្គទីពីរ មានឱកាសជាច្រើនក្នុងការស៊ុតបញ្ចូលទី ប៉ុន្តែយើងចាញ់ ២-១។ នេះ​មិន​មែន​ជា​លទ្ធផល ដែលយើង​ពេញ​ចិត្ត​ទេ ប៉ុន្តែ​ថ្ងៃ​នេះយើងក៏​មិន​មែន​លេង​អាក្រក់មើលពេកដែរ»​។

គ្រូបង្គោលសញ្ជាតិ ជប៉ុន វ័យ ៦០ ឆ្នាំបានមានប្រសាសន៍បន្តទៀតថា ៖«នៅក្នុងវគ្គទី ១ ពួកយើងមិនសូវទទួលបានបាល់ទេ ជាពិសេសគឺតំបន់បម្រើ។ ដោយឡែកនៅវគ្គទី ២ យើងមានឱកាសច្រើន ហើយគ្រប់គ្រងបាល់ក៏ច្រើន។ ខ្ញុំបានរកឃើញនូវបញ្ហា ដែលពួកយើងអាចយកមកកែប្រែក្រុមឱ្យកាន់តែប្រសើរឡើង»៕

អត្ថបទ៖ សេម កុសល

The post លោកគ្រូ Koji ថា ការ​លេង​យប់​មិញ​មិន​អាក្រក់​ពេក​ទេ តែមាន​ចំណុច​ខ្វះ​ខាត​ច្រើន appeared first on Kampuchea Thmey Daily.

ឆ្លងកាត់២លើកន្លងមក កម្ពុជា ធ្វើមិនសូវបានល្អទេ បន្ទាប់ពីស្មើ១ និង​ចាញ់១ រក​បាន​១ពិន្ទុ ឈរនៅលេខ៤ ក្នុងពូលA។ ​ ការប្រកួតទល់នឹងក្រុមសិង្ហបុរី កម្ពុជាបានភ្លាត់ស្នៀតធ្វើឲ្យខូចបាល់មុខទី ក្រោយអ្នកចាំទី វីរៈ ដារ៉ា បង្កកំហុស២លើក​ជា​ហេតុ​ធ្វើ​ឲ្យ​ចាញ់​សិង្ហបុរី ១-២។ រឿង​នេះ​​បានធ្វើឲ្យប៉ះពាល់ដល់អារម្មណ៍កីឡាករ និងអ្នកគាំទ្រយ៉ាងខ្លាំង។ ទោះ​បី​ជា​យ៉ាង​ណា កីឡាករ និង​គ្រូ​បង្វឹក​នាំ​គ្នា​បំភ្លេច​ចោលរឿង​ទាំង​នោះ និង​ចាប់​ផ្តោត​នូវ​ការ​ប្រកួត​ចំពោះ​មុខ។

កីឡាករ​ សារ៉េត គ្រីយ៉ា បាននិយាយថា ៖‍«ជា​ធម្មតា មនុស្សគ្រប់គ្នាតែងតែមានកំហុស ហើយសម្រាប់ក្រុមទាំងមូល ពួកយើងបានតាំងចិត្ត និងផ្ដោតអារម្មណ៍​លើការប្រកួតដែល​នៅសល់។ យើងនៅតែជឿជាក់លើក្រុមទាំងមូល។ នៅ​សល់​២ប្រកូត​ទៀត​ ពួកយើងនៅតែមានក្ដីសង្ឃឹម និងព្យាយាមរកផ្លូវដែលល្អទាំងអស់គ្នា»។

ក្រុមកម្ពុជាត្រូវការ៣ពិន្ទុចាំបាច់ក្នុងការប្រកួតជាមួយក្រុមទីម័រខាង​កើត នៅ​ល្ងាច​​ថ្ងៃស្អែក ដើម្បីបន្ដក្ដីសង្ឃឹម ឡើងទៅវគ្គពាក់កណ្ដាលផ្ដាច់ព្រ័ត្រ។ ​ចំពោះ លោក Koji Gyotoku គ្រូបង្វឹកក្រុមកម្ពុជា បានបង្ហាញក្ដីរំពឹងចំពោះការឡើងវគ្គ​បន្ត​ ទោះបីមានភាគរយតិច បន្ទាប់​ពី ថៃ និងសិង្ហបុរី មាន៦​ពិន្ទុ​ឈរ ​លើ​កំពូល​តារាង។

លោក Koji Gyotoku បាននិយាយថា ៖«និយាយពីក្ដីសង្ឃឹម និង​ឱកាស​យើងនៅមាន។ គ្រាន់តែវាស្ដួចស្ដើងសម្រាប់យើង។ យើងនៅសល់២ប្រកួតទៀត។ អ្វីដែលខ្ញុំផ្ដោតសំខាន់បំផុត​គឺ​ការប្រកូតនៅថ្ងៃស្អែក ធ្វើយ៉ាងណាឲ្យ​ទទួល​បានលទ្ធផលល្អ ហើយនឹងការប្រកួតបន្ទាប់»។

ការប្រកួតស្អែក ក្រុមកម្ពុជានឹងអវត្តមានកីឡាករសំខាន់​គឺ​ខ្សែ​ការពារ​ កាន់ ម៉ូ និងខ្សែ​បម្រើ គីម សុខយុទ្ធ ដោយសារ​របួស។ ជា​មួយ​គ្នា​នេះ ខ្សែ​ប្រយុទ្ធ Andres Neito ក៏​មិន​ច្បាស់​ថែម​ទៀត៕

អត្ថបទ៖ ផា រតនា

The post សារ៉េត គ្រីយ៉ា ជឿជាលើមិត្តរួម​ក្រុម​សម្រាប់២​ប្រកួត​ចុង​ក្រោយ appeared first on Kampuchea Thmey Daily.

កំណត់​ត្រា​ល្អទី​១

លោក​បាន​ដឹក​នាំ​​ក្រុម​ជម្រើស​ជាតិ​កម្ពុជា​អាយុ​១៩​ឆ្នាំ​​បាន​ឡើង​ជុំ​ចុង​ក្រោយ​ជើង​ឯក​យុវជន​អាស៊ី AFC U19  Asian Cup ឆ្នាំ​២០២០ នៅ​ប្រទេស​អ៊ូបេគីស្ថាន ប៉ុន្តែ​ម្ចាស់​ផ្ទះ​បាន​លុប​ចោល​ដោយសារ​វិបត្តិ​កូវីដ-១៩។

លោក​បាន​ដឹក​នាំក្រុម U19 កម្ពុជា ឈ្នះ​៣ និង​ចាញ់១ រក​បាន​៩​ពិន្ទុ បាន​ក្លាយ​ជា​ក្រុម​លេខ​២​​ល្អ​បំផុតក្នុង​ពូល G  កាល​ពី​ឆ្នាំ​២០១៩ ដែល​នោះ​កម្ពុជា​ធ្វើ​ជា​ម្ចាស់​ផ្ទះ។ លទ្ធផល​៤​ប្រកួត​របស់​កម្ពុជា​នៅ​ពេល​នោះ​គឺឈ្នះ ថៃ ២-១, ឈ្នះព្រុយណេ ៣-០, ឈ្នះ កោះម៉ារីណាខាង​ជើង ៩-០ និង​ចាញ់​ ម៉ាឡេស៊ី ៤-៥។

កំណត់​ត្រា​​ល្អ​ទី​២

លោក Koji Gyotoku បាន​ដឹក​នាំ​ក្រុម​យុវជន​កម្ពុជា​អាយុ​ក្រោម​១៦​ឆ្នាំ​​ដោយ​មិន​ចាញ់​សោះ​ក្នុង​ការ​ប្រកួត​សន្សំពិន្ទុ​ក្នុង​ពូល​ពាន​រង្វាន់ ASEAN U-16 Boys Championship កាល​ពី​ខែមិថុនា ឆ្នាំ​២០២៤ នៅ​ប្រទេស​ឥណ្ឌូណេស៊ី។

លោក​បាន​ដឹក​នាំ​ក្រុម U16 កម្ពុជា​ ​យក​ឈ្នះ មីយ៉ាន់ម៉ា ដោយ​លទ្ធផល ២-១, ឈ្នះ ព្រុយណេ ដោយ​លទ្ធផល ៦-០ និង​ស្មើ វៀតណាម ១-១ ដើម្បី​រក​បាន​៧​ពិន្ទុ។ ពេល​នោះ វៀតណាម មាន​៧​ពិន្ទុ​ស្មើ​កម្ពុជា ឈរ​លេខ​១​ក្នុង​ពូល ហើយ​ថៃ និង​អូស្ត្រាលី នៅ​ពូល​ផ្សេង​ក៏​មាន​៧​ពិន្ទុ ស្មើ​នឹង​កម្ពុជា​ដែរ ប៉ុន្តែ​កម្ពុជា ចាញ់​គ្រាប់​បាល់​ធ្វើ​ឲ្យ​មិន​បាន​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ។ ទោះ​បី​ជា​យ៉ាង​ណា កំណត់​ត្រារបស់​លោក​គឺ​មិន​ចាញ់​សោះ​ក្នុង​ការ​ប្រកួត​នេះ។

នៅ​ពេល​​​សហព័ន្ធ​កីឡា​បាល់ទាត់​កម្ពុជា​តែង​តែ​លោក​ជា​គ្រូ​បង្គោល​ក្រុម​ធំបណ្តោះអាសន្ន​នៅ​ថ្ងៃ​ទី​១៣ ខែ​កញ្ញា ឆ្នាំ​២០២៤​ លោក Koji Gyotoku កំពុង​ដឹក​នាំ​ក្រុម U20 កម្ពុជា​ហ្វឹក​ហាត់​នៅ​ប្រទេស​ថៃ​ដើម្បី​ចូល​រួម​ប្រកួត AFC U20 Asian Cup នៅ​ឆាយនីសតៃប៊ិ ​ចុង​​សប្តាហ៍​ក្រោយ​នេះ។

លោក​នឹង​ដឹក​នាំ​ក្រុម U20 កម្ពុជា ជួប នេប៉ាល់ នៅ​ថ្ងៃទី​២១ ខែ​កញ្ញា, ជួប អ៊ូបេគីស្ថាន នៅ​ថ្ងៃ​ទី​២៣ ខែ​កញ្ញា, ជួបបារ៉ែន នៅ​ថ្ងៃ​ទី​២៥ ខែ​កញ្ញា និង​ជួប​ម្ចាស់​ផ្ទះ ឆាយនីសតៃប៊ិ នៅ​ថ្ងៃ​ទី​២៩ ខែ​កញ្ញា។

នៅ​តុលា និង​វិច្ឆិកា លោកប្រហែល​ជា​ត្រូវ​ដឹក​នាំ​ក្រុម​ជម្រើស​ជាតិ​កម្ពុជា​ប្រកួត​មិត្តភាព​អន្តរជាតិ។ ​ប្រសិ​ន​មាន​លទ្ធផល​ល្អ ទំនង​ជា​លោក​ត្រូវ​ដឹក​នាំ​ក្រុម​ធំ​កម្ពុជា​ក្នុង​ពាន​រង្វាន់ AFF Championship ចុង​ឆ្នាំ​នេះ​តែ​ម្តង៕

អត្ថបទ៖ វីរបុត្រ

The post លោក Gyotoku ជា​គ្រូ​មានកំណត់ត្រាល្អបំផុត​សម្រាប់កម្ពុជា appeared first on Kampuchea Thmey Daily.