Kun Khmer World Champion Archives - Kampuchea Thmey Daily

លោក ខូវ ឆាយ ប្តេជ្ញាធ្វើឲ្យ«ជើងឯកគុនខ្មែរពិភពលោក»កក្រើកជាប្រវត្តិសាស្ត្រ ខណៈគុនខ្មែរជួរមុខ ៤ នាក់ដណ្តើមខ្សែក្រវាត់អាជីព

chean virakbot — Tue, 10 Feb 2026 03:13:13 +0000

ព្រឹត្តិការណ៍ប្រកួតកីឡាប្រដាល់គុនខ្មែរ ជើងឯកពិភពលោក លើកទី៦ ប្រចាំឆ្នាំ ២០២៥ ចាប់ផ្តើមពីថ្ងៃទី១០ ដល់ ថ្ងៃទី១៣ ខែកុម្ភៈ ឆ្នាំ ២០២៦ នៅខេត្តព្រះសីហនុ ដោយមានការប្រកួតកម្រិតមិនអាជីព កម្រិតអាជីព និងដណ្តើមខ្សែក្រវាត់។

ការប្រកួតលើកទី៦ មានប្រទេសចូលរួមប្រកួតបានថយចុះ ដោយសារវិបត្តិព្រំដែនជាមួយប្រទេសថៃ។ តាមការគ្រោងទុក និងប្រទេសដែលបានចុះឈ្មោះច្រើនជាងឆ្នាំមុនៗហើយ ប៉ុន្តែដោយសារមានសង្គ្រាមឈ្លានពានរបស់ថៃបានធ្វើឲ្យប្រទេសមួយចំនួនមិនបានចូលរួម។

ទោះបីជាយ៉ាងណា លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ ដែលជាអគ្គលេខាធិការស្តីទី សហព័ន្ធគុនខ្មែរអន្តរជាតិ បានប្តេជ្ញារៀបចំព្រឹត្តិការណ៍ប្រកួតលើកទី ៦ ឲ្យក្លាយជាព្រឹត្តិការណ៍អស្ចារ្យជាប្រវត្តិសាស្ត្រមិនធ្លាប់មាន និងទទួលបានការចាប់អារម្មណ៍ពីអន្តរជាតិ។

លោក ខូវ ឆាយ មានប្រសាសន៍ក្នុងពិធីបើកថា តាមពិតប្រទេសចំនួន ៣៥ ហើយបានចុះឈ្មោះដែលគ្រោងប្រកួតនៅខែធ្នូ ឆ្នាំ ២០២៥ ប៉ុន្តែពេលមានសង្គ្រាមឈ្លានរបស់ថៃ កម្មវិធីប្រកួតត្រូវបានពន្យារពេលមកខែកុម្ភៈ ឆ្នាំ ២០២៦ ហើយប្រទេសមួយចំនួនក៏សម្រេចមិនចូលរួមប្រកួតវិញ ដោយសារពួកគាត់ចំណាយថវិកាសម្រាប់ការកក់សំបុត្រយន្តហោះម្តងហើយ។

លោកបានបញ្ជាក់ថា ៖«នៅពេលនេះមានចំនួន ១៨ ប្រទេសបានចូលរួម ប៉ុន្តែយើងនឹងរៀបចំព្រឹត្តិការណ៍លើកទី ៦ ឲ្យក្លាយជាព្រឹត្តិការណ៍ប្រវត្តិសាស្ត្រលើកដំបូង។ ពិភពលោកនឹងចាប់អារម្មណ៍ ទទួលស្គាល់គុនខ្មែរ»។

ព្រឹត្តិការណ៍ដែលនឹងក្លាយជាការប្រកួតប្រវត្តិសាស្ត្រដំបូងគឺមានការប្រកួតកាន់តែពិសេសជាងឆ្នាំមុនៗ ក្នុងនោះមានការប្រកួតស្ម័គ្រចិត្ត ពាក់កណ្តាលអាជីព និងការប្រកួតកម្រិតអាជីពដែលមានកីឡាករគុនខ្មែរសុទ្ធតែលំដាប់ជួរមុខដើម្បីដណ្តើមខ្សែក្រវាត់។

កីឡាករគុនខ្មែរ ឈឿង ល្វៃ, ឡៅ ចិត្រា, បឺត សង្ឃឹម និង ហាន់ ពី ត្រូវប្រកួតគុនខ្មែរកម្រិតអាជីពដើម្បីដណ្តើមខ្សែក្រវាត់។ នេះជាការប្រកួតមិនធ្លាប់មានក្នុងប្រវត្តិសាស្ត្រគុនខ្មែរពិភពលោកដែលបានដំណើរការ ៥ លើកមកហើយ។

ក្រៅពីការប្រកួតដណ្តើមខ្សែក្រវាត់កម្រិតអាជីព ក៏មានការប្រកួតសំខាន់ៗជាច្រើនទាំងដណ្តើមខ្សែក្រវាត់ និងមេដាយ ស្របតាមកម្រិតស្ម័គ្រចិត្ត និងពាក់កណ្តាលអាជីព៕

គូដណ្តើមខ្សែក្រវាត់

ឈឿង ល្វៃ vs ជេន (អាល្លឺម៉ង់)
បឺត សង្ឃឹម vs ខេវិន ឡាប៉ាខេន (ហ្វីលីពីន)
ឡៅ ចិត្រា vs ម៉ីសស៊ី គូប៉ីឡា (បារាំង)
ហាន់ ពី vs យេសុន មូសស្តាមូ (ឥណ្ឌូណេស៊ី)

អត្ថបទ៖ វិរបុត្រ

The post លោក ខូវ ឆាយ ប្តេជ្ញាធ្វើឲ្យ«ជើងឯកគុនខ្មែរពិភពលោក»កក្រើកជាប្រវត្តិសាស្ត្រ ខណៈគុនខ្មែរជួរមុខ ៤ នាក់ដណ្តើមខ្សែក្រវាត់អាជីព appeared first on Kampuchea Thmey Daily.

មូលហេតុសំខាន់២ ប្រធានគុនខ្មែរអន្តរជាតិ ប្រគល់ភារកិច្ចដល់ លោក វ៉ាត់ ចំរើន និងលោក ខូវ ឆាយ ជាប្រធាន-អគ្គលេខាធិការស្តីទី

chean virakbot — Wed, 18 Jun 2025 00:00:00 +0000

សហព័ន្ធកីឡាគុនខ្មែរអន្តរជាតិ បានតែងតាំងលោក វ៉ាត់ ចំរើន ជាប្រធានស្តីទី និងលោក ខូវ ឆាយ ជាអគ្គលេខាធិការស្តីទីរបស់ខ្លួន កាលពីថ្ងៃទី១៧ ខែមិថុនា ឆ្នាំ២០២៥។

ការតែងតាំងសមាសភាពថ្នាក់ដឹកនាំថ្មីនេះបានជំរុញឲ្យមហាជនមានការចាប់អារម្មណ៍ខ្លាំង ដោយសារកាលពីប៉ុន្មានខែមុន សហព័ន្ធគុនខ្មែរអន្តរជាតិ និងសហព័ន្ធកីឡាប្រដាល់គុនខ្មែរហាក់មានសកម្មភាពខ្វែងគំនិតគ្នាតិចតូច។

លោក វ៉ាត់ ចំរើន

ពាក់ព័ន្ធនឹងការតែងតាំងសមាសភាពថ្នាក់ដឹកនាំថ្មីនេះ លោកបណ្ឌិត មាម រ៉ា ប្រធានសហព័ន្ធគុនខ្មែរអន្តរជាតិ បានប្រាប់សារព័ត៌មាន«កម្ពុជាថ្មី»ថា ៖«នេះជាការណែនាំពីថ្នាក់លើដើម្បីឲ្យសហព័ន្ធគុនខ្មែរអន្តរជាតិ និងសហព័ន្ធកីឡាប្រដាល់គុនខ្មែររួបរួមសាមគ្គីគ្នា។ ម្យ៉ាងវិញទៀត ខ្ញុំអត់នៅក្នុងស្រុក។ ខ្ញុំមានបេសកកម្មនៅក្រៅប្រទេស ដូច្នេះតំណែងប្រធាន ខ្ញុំឲ្យឯកឧត្តម វ៉ាត់ ចំរើន ជាប្រធានស្តីទី ពេលខ្ញុំអត់នៅក្នុងស្រុក ដោយសារលោកមានតួនាទីជាអគ្គលេខាធិការ អីចឹងពេលលោកកាន់តំណែងជាប្រធានស្តីទី កន្លែងអគ្គលេខាធិការនៅទំនេរ ហើយឯកឧត្តម វ៉ាត់ ចំរើន បានសម្រេចដាក់ឯកឧត្តម ខូវ ឆាយ ជាអគ្គលេខាធិការស្តីទី។ នេះជាការរួបរួមគ្នា កុំឲ្យមានបញ្ហាខ្វែងគំនិត ឲ្យឯកឧត្តម ខូវ ឆាយ កាន់តួនាទីជាអគ្គលេខាធិការស្តីទីរហូតដល់យើងរៀបចំសន្និបាតដើម្បីរៀបចំសមាសភាពថ្មី»។

លោកបណ្ឌិតបានបញ្ជាក់ថា ៖«អត់មានបញ្ហាអ្វីទេ ដោយសារខ្ញុំនៅក្រៅប្រទេសរហូតដល់ចុងសីហា អីចឹងប្រធានបានលើកជូនឯកឧត្តម វ៉ាត់ ចំរើន ជាប្រធានស្តីទី។ នៅពេលយើងរៀបចំមហាសន្និបាតចុងឆ្នាំនេះ រៀបចំការប្រកួតជើងឯកគុនខ្មែរពិភពលោកប្រចាំឆ្នាំ ដែលសមាជិកទូទាំងពិភពលោកចូលរួម យើងនឹងរៀបចំសម្រួលដើម្បីឲ្យយើងងាយស្រួលក្នុងការបំពេញការងារដើម្បីអភិវឌ្ឍគុនខ្មែរទាំងអស់គ្នា»។

លោក ខូវ ឆាយ

ជារួមមូលហេតុសំខាន់ដែលនាំឲ្យមានការតែងតាំងសមាសភាពថ្មីគឺទី១ លោក មាម រ៉ា ដែលជាប្រធានជាប់រវល់នៅក្រៅប្រទេសច្រើនខែ និងទី២ ចង់ឲ្យសហព័ន្ធគុនខ្មែរ និងសហព័ន្ធកីឡាប្រដាល់គុនខ្មែររួបរួមសាមគ្គីគ្នាជាធ្លុងមួយដើម្បីអភិវឌ្ឍគុនខ្មែរលើឆាកអន្តរជាតិ។

បច្ចុប្បន្ន លោក វ៉ាត់ ចំរើន ជារដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) ខណៈ លោក ខូវ ឆាយ ជាប្រធានសហព័ន្ធគុនខ្មែរ និងប្រធានមជ្ឈមណ្ឌលកីឡានៃកងយោធពលខេមរភូមិន្ទ នៃក្រសួងការពារជាតិ។

នៅពាក់កណ្តាលឆ្នាំ ២០២៥ លោក ខូវ ឆាយ បានដឹកនាំកីឡាប្រដាល់គុនខ្មែរធ្វើសកម្មភាពនៅក្រៅប្រទេសជាច្រើនទាំងរៀបចំកម្មវិធីប្រកួត និងចាប់ដៃគូជាមួយស្ថាប័នកីឡាផ្សេងៗ។ ជាក់ស្តែងលោកបានដឹកនាំកីឡាករ កីឡាការិនី និងរៀបចំការប្រកួតនៅសហរដ្ឋអាមេរិក២ដង នៅប្រទេសបារាំង អេស្ប៉ាញ អូស្ត្រាលី ជប៉ុន ហុងកុង និងក្រិកជាដើម។ លោកក៏បានចាប់ដៃគូជាច្រើនទៀតនៅសហរដ្ឋអាមេរិក បារាំង ក្រិក អេស្ប៉ាញ ចិន ហុងកុង។ ទាំងនេះជាការបើកផ្លូវដ៏សំខាន់ដើម្បីជំរុញកីឡាគុនខ្មែរឲ្យរីកចម្រើនលើឆាកអន្តរជាតិ ស្របពេលថ្នាក់ដឹកនាំកម្ពុជាកំពុងមានគោលដៅដាក់គុនខ្មែរឲ្យចូលក្នុងកីឡាទ្វីបអាស៊ី និងកីឡាអូឡាំពិក៕

អត្ថបទ៖ វីរបុត្រ

The post មូលហេតុសំខាន់២ ប្រធានគុនខ្មែរអន្តរជាតិ ប្រគល់ភារកិច្ចដល់ លោក វ៉ាត់ ចំរើន និងលោក ខូវ ឆាយ ជាប្រធាន-អគ្គលេខាធិការស្តីទី appeared first on Kampuchea Thmey Daily.

កំណត់ត្រាដ៏អស្ចារ្យរបស់កំពូលអ្នកប្រដាល់ ធឿន ធារ៉ា លើសពីការរំពឹងទុក

chean virakbot — Fri, 13 Dec 2024 01:44:11 +0000

រយៈពេលប្រមាណ៣ឆ្នាំចុងក្រោយ កំពូលអ្នកប្រដាល់គុនខ្មែរ ធឿន ធារ៉ា សម្រេចបានសមិទ្ធផលដ៏អស្ចារ្យដែលមិនមានកីឡាករប្រដាល់ខ្មែរណាទទួលបានជោគជ័យដូចរូបគេឡើយ បន្ទាប់ពីទទួលបានខ្សែក្រវាត់ ប្រាក់រង្វាន់ រថយន្ត ផ្ទះល្វែង វីឡា ព្រមទាំងជាប់ឈ្មោះនៅក្នុងទស្សនាវដ្តីអាមេរិកដ៏ល្បី«Forbes»។

ឆ្នាំ២០២២

បើកទំព័រប្រវត្តិសាស្ត្រជោគជ័យនៅសង្វៀន Thai Fight ក្នុងខែវិច្ឆិកា ធឿន ធារ៉ា បានផ្តួលកីឡាកររុស្ស៊ី-អាមេនី Yurik Davtyan ឲ្យសន្លប់ក្នុងទឹកទី១ និងការប្រកួតវគ្គផ្តាច់ព្រ័ត្រ ចុងខែធ្នូ ឆ្នាំ២០២២ បានផ្តួលកីឡាករថៃ សៃយុគ ក្នុងទឹកទី១។ លទ្ធផលនេះបានធ្វើឲ្យលេងគុនខ្មែររូបនេះក្លាយជាកីឡាករកម្ពុជាទី១បានផ្តួលដៃគូឲ្យសន្លប់នៅសង្វៀន Thai Fight និងជាកីឡាករខ្មែរទី១បានផ្តួលដៃគូឲ្យសន្លប់២លើកជាប់គ្នា ហើយក៏ជាកីឡាករកម្ពុជាទី១ឈ្នះខ្សែក្រវាត់អន្តរជាតិ Thai Fight។

តាមរយៈជោគជ័យនៅសង្វៀនរបស់ថៃ ធឿន ធារ៉ា ទទួលបានប្រាក់ឧបត្ថម្ភយ៉ាងច្រើនសន្ធឹកសន្ធាប់ពីសប្បុរសជន និងបានសាងកេរ្តិ៍ឈ្មោះល្បីរន្ទឺរលើឆាកអន្តរជាតិ។

ឆ្នាំ២០២៣

ការប្រកួតដណ្តើមខ្សែក្រវាត់គុនខ្មែរពិភពលោក IPCC ធឿន ធារ៉ា បានប្រើពេល៤ទឹកទើបផ្តួលកីឡាករប្រេស៊ីល ធីអាហ្គោ (Thiago) ដើម្បីឈ្នះខ្សែក្រវាត់អន្តរជាតិមួយនេះកាលពីថ្ងៃទី១១ ខែកុម្ភៈ ឆ្នាំ២០២៣។

ធឿន ធារ៉ា បានផ្តួលដៃគូពីរនាក់ឲ្យសន្លប់ក្នុងទឹកទី១ដូចគ្នាក្នុងរាត្រីតែមួយដើម្បីឈ្នះខ្សែក្រវាត់គ្រុឌអន្តរជាតិកាលពីថ្ងៃទី១៨ ខែកុម្ភៈ ឆ្នាំ២០២៣។ ការប្រកួតជម្រុះជុំដំបូង ធារ៉ា បានផ្តួលកីឡាករថៃ ភេតម៉ៃ សន្លប់ធំក្នុងទឹកទី១ និងវគ្គផ្តាច់ព្រ័ត្រផ្តួលមិត្តរួមជាតិ ឈឿន ល្វៃ ឲ្យសន្លប់ធំក្នុងទឹកទី១។

ធឿន ធារ៉ា បានឈ្នះខ្សែក្រវាត់គុនខ្មែរអន្តរទ្វីប Kun Khmer Intercontinental ក្នុងកម្មវិធីសេនាគុនខ្មែរយ័ន្តប្រាំបីទិស បន្ទាប់ពីបានយកឈ្នះកីឡាកទុយនេស៊ី Sabri Benhyena ដោយពិន្ទុ កាលពីថ្ងៃទី៣០ ខែកញ្ញា ឆ្នាំ២០២៣។

ធឿន ធារ៉ា បានផ្តួលកីឡាររូម៉ានី Alex Bublea ក្នុងទឹកទី១ កាលពីថ្ងៃទី១៦ ខែកក្កដា ឆ្នាំ២០២៣ ដើម្បីក្លាយជាម្ចាស់ខ្សែក្រវាត់ តេជោសន្តិភាព គុនខ្មែរពិភពលោក។

ធឿន ធារ៉ា បានក្លាយជាជើងឯកគុនខ្មែរពិភពលោកក្នុងព្រឹត្តិការណ៍ប្រកួតបេក្ខភាព៨រូបមកពី៨ប្រទេសផ្សេងគ្នា (8 Men Tournament) បន្ទាប់ពីផ្តួលដៃគូ៣រូបក្នុងមួយរាត្រីនៅថ្ងៃទី២៣ ខែវិច្ឆិកា ឆ្នាំ២០២៣ ដើម្បីក្លាយជាម្ចាស់រថយន្តដ៏ថ្មីសន្លាង១គ្រឿងដែលមានតម្លៃមិនក្រោម៤ម៉ឺនដុល្លារ។

ធឿន ធារ៉ា បានឈ្នះពានរង្វាន់ និងខ្សែក្រវាត់ជាច្រើនទៀតនៅក្នុងឆ្នាំ២០២៣។ អ្វីដែលកាន់តែពិសេសនោះគឺរាល់ការប្រកួតឈ្នះខ្សែក្រវាត់ រូបគេទទួលបានប្រាក់រង្វាន់ និងប្រាក់ឧបត្ថម្ភលើកទឹកចិត្តយ៉ាងច្រើនពីសប្បុរសជន។ ការឈ្នះខ្សែក្រវាត់ខ្លះទទួលបានប្រាក់៣០លានរៀល ខ្សែក្រវាត់ខ្លះទទួលបាន៦០លានរៀល និងមានដល់១០០លានរៀលថែមទៀត ព្រមទាំងទទួលបានផ្ទះ១ល្វែងទៀត។

ឆ្នាំ២០២៤

ខ្សែក្រវាត់ និងប្រាក់រង្វាន់យ៉ាងច្រើនសន្ធឹកសន្ធាប់គឺបានក្លាយជារឿងសាមញ្ញទៅហើយសម្រាប់ ធឿន ធារ៉ា។ នៅចុងឆ្នាំ២០២៤ រូបគេសម្រេចបានគោលបំណងធំមួយទៀតគឺវីឡាកូនកាត់ បន្ទាប់ពីបានផ្តួលដៃគូ៣នាក់ក្នុងមួយរាត្រីដើម្បីទទួលបានខ្សែក្រវាត់គុនខ្មែរពិភពលោក 8 Men Tournament ជាលើកទី២ កាលពីវិច្ឆិកា ឆ្នាំ២០២៤។ រូបគេទើបតែរៀបចំពិធីឡើងគេហដ្ឋានកាលពីពេលថ្មីៗនេះ។

រឹតតែអស្ចារ្យទៀតនោះ ធឿន ធារ៉ា បានក្លាយជាអត្តពលិកខ្មែរដំបូងគេបង្អស់ដែលជាប់ឈ្មោះក្នុងទស្សនាវដ្តីអាមេរិកដ៏ល្បី «Forbes» បន្ទាប់ពីទទួលបានជោគជ័យយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយ និងរួមចំណែកយ៉ាងសំខាន់ក្នុងការផ្សព្វផ្សាយគុនខ្មែរទៅលើឆាកអន្តរជាតិ កាលពីខែឧសភា ឆ្នាំ២០២៤។

ទស្សនាវដ្តី Forbes បានចាត់ ធឿន ធារ៉ា ចូលក្នុងបញ្ជី «30 Under 30 Asia Class of 2024»ប្រចាំតំបន់អាស៊ីដែលផ្តោតលើសហគ្រិនជោគជ័យ បុគ្គលមានឥទ្ធិពល និងបុគ្គលមានវឌ្ឍភាពក្នុងអាជីពឈានដល់កម្រិតកំពូល។

សមិទ្ធផលសំខាន់ដែល ធឿន ធារ៉ា ទទួលបាន

ខ្សែក្រវាត់អន្តរជាតិ Thai Fight
ខ្សែក្រវាត់គុនខ្មែរអន្តរជាតិ IPCC Kun Khmer
ខ្សែក្រវាត់គុនខ្មែរអន្តរជាតិ
ខ្សែក្រវាត់គុនខ្មែរអន្តរទ្វីប Kun Khmer Intercontinental
ខ្សែក្រវាត់គុនខ្មែរពិភពលោកតេជោសន្តិភាព
ខ្សែក្រវាត់គុនខ្មែរពិភពលោក 8 Men Tournament ទី១
ខ្សែក្រវាត់គុនខ្មែរពិភពលោក 8 Men Tournament ទី២
ខ្សែក្រវាត់គុនខ្មែរអន្តរជាតិ IPCC Kun Khmer (ឈ្នះ ម៉ុងហ្គោលី ប្រាក់រង្វាន់១៨លានរៀល)
ពានរង្វាន់ ប្រាក់រង្វាន់ រថយន្ត ផ្ទះល្វែង និងវីឡាកូនកាត់
ចារឈ្មោះក្នុងទស្សនាវដ្តី Forbes

អត្ថបទ៖ ធឿន ធារ៉ា

The post កំណត់ត្រាដ៏អស្ចារ្យរបស់កំពូលអ្នកប្រដាល់ ធឿន ធារ៉ា លើសពីការរំពឹងទុក appeared first on Kampuchea Thmey Daily.

ឥណ្ឌូណេស៊ី ស្នើសុំធ្វើម្ចាស់ផ្ទះ ជើងឯកគុនខ្មែរពិភពលោក ឆ្នាំ២០២៥

chean virakbot — Wed, 11 Dec 2024 03:28:43 +0000

ប្រទេសឥណ្ឌូណេស៊ី ដែលស្ថិតនៅក្នុងតំបន់អាស៊ានបានស្នើសុំរៀបចំព្រឹត្តិការណ៍ប្រកួតគុនខ្មែរជើងឯកពិភពលោក លើកទី៦ ឆ្នាំ២០២៥ ដែលនឹងក្លាយជាការប្រកួតគុនខ្មែរជើងឯកពិភពលោកលើកដំបូងនៅក្រៅប្រទេស។

លោក មៀម រ៉ា ប្រធានសហព័ន្ធគុនខ្មែរអន្តរជាតិបានឲ្យដឹងថា នៅក្នុងមហាសន្និបាតប្រចាំរបស់សហព័ន្ធគុនខ្មែរអន្តរជាតិគឺរៀបចំកិច្ចពិភាក្សាដើម្បីស្វែងរកប្រទេសទទួលធ្វើជាម្ចាស់ផ្ទះការប្រកួតគុនខ្មែរពិភពលោក ឆ្នាំ២០២៥ ប៉ុន្តែបើគ្មានប្រទេសណាស្នើសុំទេ កម្ពុជានឹងបន្តរៀបចំទៀតនៅខេត្តព្រះសីហនុ។

ទោះបីជាយ៉ាងណា នៅក្នុង មហាសន្និបាតប្រចាំឆ្នាំ កាលពីថ្ងៃទី៥ ខែធ្នូ ឆ្នាំ២០២៤ នៅខេត្តសៀមរាប ប្រតិភូប្រទេសឥណ្ឌូណេស៊ី បានស្នើសុំរៀបចំធ្វើម្ចាស់ផ្ទះនៅឆ្នាំ២០២៥។ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអក្គលេខាធិការនៃគណៈកម្មាធិការជាតិអូឡាំពិកកម្ពុជាបានប្រាប់ថា ឥណ្ឌូណេស៊ី បានស្នើសុំរៀបចំការប្រកួតគុនខ្មែរពិភពលោក លើកទី៦ ឆ្នាំ២០២៥ ក្នុងនោះ សហព័ន្ធគុនខ្មែរអន្តរជាតិ និងប្រទេសជាសមាជិកទាំងអស់បានគាំទ្រ១០០%លើសំណើរបស់ឥណ្ឌូណេស៊ី។

នេះជាលើកទី១ហើយដែលប្រទេសជាសមាជិកទទួលរៀបចំការប្រកួតគុនខ្មែរពិភពលោក បន្ទាប់ពីការប្រកួត៥លើកន្លងទៅគឺកម្ពុជារៀបចំនៅក្នុងប្រទេសរហូតគឺនៅរាជធានីភ្នំពេញ ខេត្តសៀមរាប និងព្រះសីហនុ។

សម្រាប់លទ្ធផលការប្រកួតគុនខ្មែរជើងឯកពិភពលោក លើកទី៥ ពីថ្ងៃទី៦ ដល់ទី៨ ខែធ្នូ ឆ្នាំ២០២៤ នៅខេត្តសៀមរាប ម្ចាស់ផ្ទះ កម្ពុជា ស្ថិតនៅចំណាត់ថ្នាក់លេខ១ ក្នុងចំណោម១៨ប្រទេសដែលបានចូលរួម ដោយទទួលបានមេដាយមាស៧ ប្រាក់១០ និងសំរិទ្ធ៤ ខណៈគីជីស្ថាន ឈរលេខ២ ជាមួយមេដាយមាស៧ និងប្រាក់៣ ហើយអាហ្វហ្គានីស្ថានលេខ៣ដោយឈ្នះមេដាយមាស៤ និងសំរិទ្ធ២។

ប្រតិភូជីគីស្ថាន

មហាសន្និបាតប្រចាំឆ្នាំរបស់សហព័ន្ធគុនខ្មែរអន្តរជាតិ ដែលមានប្រទេសជាសមជិកចំនួន១៨ចូលរួមផ្ទាល់ និងប្រទេសជាសមាជិកផ្ដល់សិទ្ធិប្រទាន៤៦ប្រទេសបានចេញសេចក្តីថ្លែងការណ៍ចំនួន៧ចំណុចជុំវញនិរន្តរភាព និងការពង្រឹងគុនខ្មែរលើឆាកអន្តរជាតិ។

បាវចនាមហាគ្រួសារគុនខ្មែរពិភពលោក «រឹងមាំទាំងអស់គ្នា Stronger Together»។
សហព័ន្ធគុនខ្មែរអន្ដរជាតិ និងសមាជិកគុនខ្មែរទាំងអស់ បានឯកភាពគ្នារក្សាឱ្យបាននូវនិរន្ដរភាពនៃការរៀបចំការប្រកួតកីឡាគុនខ្មែរជ្រើសរើសជើងឯកពិភពលោក និងការប្រកួតជើងឯកគុនខ្មែរអាស៊ីឱ្យបានទៀងទាត់ជារៀងរាល់ឆ្នាំ។
សហព័ន្ធគុនខ្មែរអន្ដរជាតិ បាននឹងកំពុងខិតខំប្រឹងប្រែង ពង្រឹងយន្ដការគ្រប់គ្រង ដឹកនាំសហព័ន្ធ និងសមាជិកទាំងអស់ តាមយន្ដការអភិបាលកិច្ចល្អ តម្លាភាព និងស្មារតីមិត្តភាព សាមគ្គីភាព ឯកភាព និងសហប្រតិបត្តិការល្អ។
សហព័ន្ធគុនខ្មែរអន្ដរជាតិ អំពាវនាវសុំការឧបត្ថម្ភគាំទ្រឱ្យមាន «ចលនាជាតិអភិវឌ្ឍគុនខ្មែរពិភពលោក» ដើម្បីសម្រេចបានគោលដៅយុទ្ធសាស្ដ្រជាតិ «ការបញ្ចូលកីឡាគុនខ្មែរអន្ដរជាតិទៅក្នុងការប្រកួតពហុកីឡាគ្រប់កម្រិត»។
សហព័ន្ធគុនខ្មែរអន្ដរជាតិបន្ដបើកទ្វារចំហរជានិច្ច រង់ចាំទទួលសមាជិកភាពគុនខ្មែរពីគ្រប់ប្រទេសនៅលើពិភពលោក។
មហាសន្និបាត និងការប្រកួតគុនខ្មែរជ្រើសរើសជើងឯកពិភពលោក លើកទី៥ ឆ្នាំ២០២៤ នឹងប្រព្រឹត្តទៅនាថ្ងៃទី០៥ ខែធ្នូ ឆ្នាំ២០២៤ ហើយបើកទូលំទូលាយដល់ប្រទេសដែលមានបំណងចង់ចូលជាសមាជិកត្រូវដាក់ពាក្យស្នើសុំមួយឆ្នាំមុន។
សហព័ន្ធគុនខ្មែរអន្ដរជាតិប្ដេជ្ញាគោរពយ៉ាងម៉ឺងម៉ាត់ គោរពអនុវត្តនូវគោលការណ៍កីឡាយុត្តិធម៌ (Fair-Play) និងគោលការណ៍កីឡាស្អាតស្អំ (Clean Sport) ដោយគោរពបទដ្ឋានគតិយុត្ដនៃការប្រឆាំងដាច់ខាតការប្រើប្រាស់សារធាតុលើកកម្លាំង (WADA Code of Anti-Doping Rule)។

កីឡាការិនីអាមេរិកឈ្នះខ្សែក្រវាត់គុនខ្មែរពិភពលោកពាក់កណ្តាលអាជីព

អត្ថបទ៖ វីរបុត្រ

The post ឥណ្ឌូណេស៊ី ស្នើសុំធ្វើម្ចាស់ផ្ទះ ជើងឯកគុនខ្មែរពិភពលោក ឆ្នាំ២០២៥ appeared first on Kampuchea Thmey Daily.

ថ្ងៃទី១ អត្តពលិកគុនខ្មែរ ឈ្នះ៧ ចាញ់៤ ក្នុងការប្រកួតគុនខ្មែរពិភពលោក

chean virakbot — Sat, 07 Dec 2024 00:24:27 +0000

ការប្រកួតគុនខ្មែរជ្រើសរើសជើងឯកពិភពលោក លើកទី៥ បានបញ្ចប់ថ្ងៃទី១ កាលពីថ្ងៃទី៦ ខែធ្នូ ឆ្នាំ២០២៤ នៅខេត្តសៀមរាប។ ជាលទ្ធផលកីឡាករ កីឡាការិនីគុនខ្មែរ៧នាក់បានឡើងទៅវគ្គបន្ត ហើយអ្នកលេងគុនខ្មែរមួយចំនួនបានធ្លាក់ដែរ។

ថ្ងៃទី២ ត្រូវនឹងថ្ងៃទី៧ ខែធ្នូ ឆ្នាំ២០២៤ នឹងមានការប្រកួតជាច្រើនគូដែលមានទាំងកីឡាករ កីឡាការិនីខ្មែរ ប៉ះកីឡាករ កីឡាការិនីបរទេស និងកីឡាករ កីឡាការិនីបរទេសប៉ះកីឡាការិនីបរទេសថែមទៀតផង។

ខាងក្រោមជាលទ្ធផលកាលពីថ្ងៃទី៦ ខែធ្នូ ឆ្នាំ២០២៤។

កីឡាករកម្ពុជា ស៊ុន អ៊ូខុង បានឈ្នះកីឡាករឥណ្ឌា Hanieshvin Deenadaya ដោយពិន្ទុ លើវិញ្ញាសាស្ម័គ្រចិត្ត យុវជនទម្ងន់ ៣៥គីឡូក្រាម។
កីឡាការិនីកម្ពុជា ខេ ខេម៉ា បានចាញ់ពិន្ទុកីឡាការិនីឥណ្ឌា Dhuvaritha Prabhu លើវិញ្ញាសាស្ម័គ្រចិត្តនារីទម្ងន់ ៤៥គីឡូក្រាម។
កីឡាការិនីកម្ពុជា សៃ ស្រីភា បានចាញ់ពិន្ទុកីឡាការិនីកៀហ្ស៊ីស៊ីស្ថាន Saalyeva Alia លើវិញ្ញាសាស្ម័គ្រចិត្តនារីទម្ងន់ ៤៨គីឡូក្រាម។
កីឡាករកម្ពុជា ប៉ែន បូរ៉ា បានឈ្នះកីឡាករឥណ្ឌូនេស៊ី Gading Mukti Wibowo ដោយពិន្ទុ លើវិញ្ញាសាបុរសទម្ងន់ ៥៤គីឡូក្រាម។
កីឡាករកម្ពុជា រិទ្ធ រ័ត្ន បានឈ្នះកីឡាករ កៀហ្ស៊ីស៊ីស្ថាន Kanymetov Ikhtiiar ក្នុងទឹកទី១ លើវិញ្ញាសាបុរសទម្ងន់ ៦៣.៥គីឡូក្រាម។
កីឡាការិនីកម្ពុជា សំណាង រក្សា បានចាញ់កីឡាការិនីកៀហ្ស៊ីស៊ីស្ថាន Orozbekova Makhabat ក្នុងទឹកទី១ លើវិញ្ញាសាបុរសទម្ងន់ ៧០គីឡូក្រាម។
កីឡាករកម្ពុជា ប៊យ ព្រីន បានឈ្នះកីឡាកររុស្ស៊ី Asainov Daulet ដោយពិន្ទុ លើវិញ្ញាសា ពាក់ កណ្ដាល អាជីពបុរសទម្ងន់ ៥១គីឡូក្រាម។
កីឡាករកម្ពុជា ហាត់ ភី បានឈ្នះកីឡាករបារាំង Meaume Pierre ក្នុងទឹកទី៣ លើវិញ្ញាសាពាក់កណ្ដាល អាជីព បុរសទម្ងន់ ៧១គីឡូក្រាម។
កីឡាករកម្ពុជា ឬទ្ធី ចៅចិត្រ បានចាញ់កីឡាករកាមេរ៉ូន Mbang Fen Eric ដោយពិន្ទុ លើវិញ្ញាសាអាជីពបុរសទម្ងន់ ៦៣.៥គីឡូក្រាម។
កីឡាករកម្ពុជា គោរមៈ ច័ន្ទរាជ បានឈ្នះកីឡាករមីយ៉ាន់ម៉ា Saw Jonh ដោយពិន្ទុ លើវិញ្ញាសាអាជីពបុរសទម្ងន់ ៥៦គីឡូក្រាម។
កីឡាករកម្ពុជា ទៀ វណ្ណា បានឈ្នះកីឡាករថៃ Choknamchai Pa Kong Pattaya ក្នុងទឹកទី៣ លើវិញ្ញាសាអាជីពបុរសទម្ងន់ ៦៩គីឡូក្រាម។

អត្ថបទ៖ វីរបុត្រ

The post ថ្ងៃទី១ អត្តពលិកគុនខ្មែរ ឈ្នះ៧ ចាញ់៤ ក្នុងការប្រកួតគុនខ្មែរពិភពលោក appeared first on Kampuchea Thmey Daily.

សហព័ន្ធគុនខ្មែរចាប់ផ្តើមកំណត់កីឡាករម្នាក់អាចវ៉ៃតែ២ដងក្នុង១ខែ

chean virakbot — Wed, 27 Nov 2024 02:49:23 +0000

សហព័ន្ធកីឡាប្រដាល់គុនខ្មែរបានចាប់ផ្តើមកំណត់គោលការណ៍នៃការចាប់គូឡើងប្រកួតរបស់កីឡាករ កីឡាការិនីជាថ្មីដោយអាចឡើងប្រកួតមិនលើសពី២ដងក្នុងមួយខែ។

ការកំណត់គោលការណ៍ជាថ្មីនេះបានកើតមានឡើង បន្ទាប់ពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាបានស្នើឲ្យសហព័ន្ធកីឡាប្រដាល់គុនខ្មែរពិចារណាឡើងវិញចំពោះកីឡាករ កីឡាការិនីដែលឡើងប្រកួតញឹកញាប់ពេក។

កាលពីថ្ងៃទី១ ខែវិច្ឆិកា ឆ្នាំ២០២៤ នៅមជ្ឈមណ្ឌលសន្និបាត និងពិព័ណ៌ជ្រោយចង្វារ ក្នុងឱកាសអញ្ជើញចូលរួមពិធីសំណេះសំណាល និងពិសាភោជនាហារសាមគ្គីជាមួយក្រុមបាល់ទាត់តារាកម្ពុជា ដែលបានប្រកួតបាល់ទាត់មិត្តភាពជាមួយ ក្រុមកីឡាករគុនខ្មែរ ដើម្បីស្វែងរកថវិកាជួយទ្រទ្រង់កីឡាគុនខ្មែរ សម្តេចតេជោ ហ៊ុន សែន មានប្រសាសន៍ថា ៖«ការឡើងប្រកួតមួយអាទិត្យម្តងមិនអាចទៅរួចទេ ខូចកីឡាករអស់ហើយ។ សូមឲ្យថ្នាក់ដឹកនាំកីឡាយកចិត្តទុកដាក់ទៅលើបញ្ហាការផ្គូផ្គងសម្រាប់ការប្រកួត។ ប្រសិនបើការប្រកួតញឹកញាប់ពេក ឈឺខ្លួនមួយថ្ងៃ ឈឺខ្លួនមួយអាទិត្យ មួយអាទិត្យក្រោយឡើងវ៉ៃទៀតគឺមិនអាចទៅរួចទេ។ ធ្វើយ៉ាងនេះខូចកីឡាករ បាក់កីឡាករអស់»។

សម្តេចតេជោបន្តថា ៖«ស្ថានភាពនេះមិនគួរឲ្យកើតមានក្នុងការគ្រប់គ្រងកីឡាទេ។ នៅពេលខាងមុខនេះត្រូវតែយកចិត្តទុកដាក់ក្នុងការផ្គូផ្គងកីឡាករឲ្យឡើងប្រកួត។ មិនអាចចេះតែធ្វើទៅតាមចំណង់ចំណូលចិត្តបានទេ ប៉ុន្តែយើងត្រូវទទួលស្គាល់ដែរថា យើងក៏ខ្វះអ្នកកីឡាពេលនេះ។ ការខ្វះកីឡាករ កីឡាការិនី ជាពិសេសកីឡាប្រដាល់របស់យើងក៏អាចបណ្តាលមកពីការខ្វះការបណ្តុះបណ្តាលធនធានកីឡារបស់យើង»។

ចាប់តាំងពីការលើកឡើងរបស់សម្តេចតេជោ ហ៊ុន សែន ពីពេលនោះមក គេសង្កេតឃើញថា កីឡាករ កីឡាការិនីប្រដាល់គុនខ្មែរមិនបានឡើងប្រកួតញឹកញាប់ចាប់ពី៣ដងឡើងក្នុងមួយខែឡើយ។

កាលពីថ្ងៃទី១៩ ខែវិច្ឆិកា ឆ្នាំ២០២៤ សហព័ន្ធកីឡាប្រដាល់គុនខ្មែរបានធ្វើការកោះប្រជុំជាមួយភាគីពាក់ព័ន្ធទាំងអស់មានដូច គណៈកម្មការរៀបចំការប្រកួត ក្រុមការងារផ្គូផ្គង ស្ថានីយ៍ទូរទស្សន៍រៀបចំកម្មវិធីប្រកួត និងម្ចាស់ឧបត្ថម្ភកម្មវិធី ដើម្បីកំណត់លក្ខខណ្ឌជាថ្មីឲ្យមានប្រសិទ្ធភាពចំពោះការផ្គូផ្គងនោះ។ តាមសេចក្តីសម្រេចគឺ«កំណត់ឲ្យមានកីឡាករ កីឡាការិនីប្រដាល់គុនខ្មែរអាចឡើងប្រកួតច្រើនបំផុតត្រឹមតែ២ដងប៉ុណ្ណោះក្នុងមួយខែ។ ប្រសិនបើ កីឡាករ កីឡាការិនីណាឡើងប្រកួតលើសពី២ដង ឬចាប់ពី៣ដងឡើងក្នុងមួយខែគឺត្រូវអនុវត្តតាមច្បាប់នៃការប្រកួត។

នេះមិនមែនជាលើកទី១ទេដែលសហព័ន្ធកីឡាប្រដាល់គុនខ្មែរបានកំណត់គោលការនៃចំនួនឡើងប្រកួតរបស់កីឡាករ កីឡាការិនីសម្រាប់ការឡើងប្រកួតក្នុងមួយៗខែ ប៉ុន្តែកន្លងមក មិនសូវមានភាពប្រសិទ្ធភាព ដោយសារកីឡាករល្បីៗមិនសូវមានច្រើន ខណៈកម្មវិធីប្រកួត និងម្ចាស់ឧបត្ថម្ភកម្មវិធីក៏កាន់តែសំបូរដែលពេលខ្លះកីឡាករល្បីៗឡើងប្រកួត៣ទៅ៤ដងក្នុងមួយខែពោលគឺប្រកួតស្ទើររាល់សប្តាហ៍ក្នុងខែខ្លះ៕

អត្ថបទ៖ វីរបុត្រ

The post សហព័ន្ធគុនខ្មែរចាប់ផ្តើមកំណត់កីឡាករម្នាក់អាចវ៉ៃតែ២ដងក្នុង១ខែ appeared first on Kampuchea Thmey Daily.

គ្រូបង្ហាត់គុនខ្មែរ៣រូបកំពុង ជោគជ័យខ្លាំងនាពេលបច្ចុប្បន្ន

chean virakbot — Wed, 20 Nov 2024 08:43:27 +0000

លោក អេ ភូថង, ពេជ្រ សុផាន់ និង ធន់ សុភា អាចត្រូវបានចាត់ទុកជាគ្រូបង្ហាត់ប្រដាល់គុនខ្មែរដែលទទួលបានជោគជ័យបំផុតនាពេលបច្ចុប្បន្ន បន្ទាប់ពីពួកគាត់បានឈប់ពីអាជីពប្រដាល់ និងចាប់អាជីពគ្រូបង្ហាត់។

លោក អេ ភូថង

អតីតអ្នកប្រដាល់ល្បីឈ្មោះ អេ ភូថង បានចាប់ផ្តើមអាជីពជាគ្រូបង្ហាត់ពេញលេញក្នុងឆ្នាំ២០០៥ បន្ទាប់ពីប្រកបអាជីពឡើងសង្វៀនប្រដាល់អស់រយៈប្រហែលជាង២០ឆ្នាំ។ លោកជាគ្រូបង្វឹកម្នាក់ដែលបណ្តុះបណ្តាលកូនបង្កើតរបស់ខ្លួនទទួលបានជោគជ័យបំផុតគឺ ម៉ឺន មេឃា, អេ អាំម៉ារីនភូថង និង អេ យ៉ានុត។ កូនទាំង៣របស់លោកសុទ្ធតែក្លាយជាកីឡាករលំដាប់ជួរមុខដោយទទួលបានប្រាក់តម្លៃខ្លួនខ្ទង់ពាន់ដុល្លារ ឈ្នះខ្សែក្រវាត់ជាច្រើន និងរង្វាន់រថយន្តថែមទៀត។ កូនសិស្សដែលទទួលបានជោគជ័យបំផុតគឺ ធឿន ធារ៉ា ដែលបានខ្សែក្រវាត់ជាច្រើនខ្សែ រថយន្ត និងវីឡា។

លោក ពេជ្រ សុផាន់

លោក ពេជ្រ សុផាន់ កំពុងទទួលបានជោគជ័យក្នុងអាជីពគ្រូបង្វឹកច្រើនជាងអាជីពជាកីឡាករ។ លោកធ្លាប់ជាកីឡាករអស់រយៈពេលជាង១៥ឆ្នាំគិតចាប់តាំងពីឆ្នាំ២០០៩ ប៉ុន្តែក្រោយមក លោកបានធ្វើជាគ្រូជំនួយនៅក្លិបប្រដាល់ក្រសួងការពារជាតិ។ ក្រោយមកលោកបានបើកក្លិបប្រដាល់ផ្ទាល់ខ្លួនដែលទទួលបានកូនសិស្សចូលហ្វឹកហាត់ជាបន្តបន្ទាប់។

បុរសដែលល្បីគ្រូកម្លាំងបាយមានកូនសិស្សជាច្រើនកំពុងទទួលបានជោគជ័យ។ ជាក់ស្តែង ពេជ្រ សម្បត្តិ ជាកីឡាករលំដាប់ឈានមុខគេទម្ងន់៦០គីឡូក្រាមដែលមានតម្លៃខ្លួនមិនក្រោមពាន់ដុល្លារឡើយ។ កីឡាកររូបនេះទទួលបានជោគជ័យច្រើនណាស់ដោយមានខ្សែក្រវាត់ជាច្រើន និងរង្វាន់រថយន្តថែមទៀត។ ជាមួយគ្នានេះ អ្នកគាំទ្រមិនអាចរំលងបានទេ កីឡាករ ពេជ្រ ប៊ុនសិទ្ធ, ពេជ្រ អាទិទេព, ពេជ្រ កក្កដា និងកីឡាករត្រកូលពេជ្រជាច្រើនទៀតកំពុងលេចធ្លោ។

លោក ធន់ សុភា

លោក ធន់ សុភា ជាគ្រូបង្វឹកដែលមិនសូវនិយាយច្រើនទេ ប៉ុន្តែកូនសិស្សរបស់លោកជាច្រើនកំពុងជោគជ័យ។ ផ្តើមអាជីពប្រដាល់នៅអំឡុងឆ្នាំ១៩៩៨ លោកបានចាប់ផ្តើមបង្ហាត់ប្រហែលឆ្នាំ២០១២នៅក្លិបប្រដាល់របស់សមាគមកីឡាក្រសួងការពារជាតិ។ កូនសិស្សរបស់លោកដែលកំពុងលេចធ្លោដូចជា ប៊ុន សុធា, លន បញ្ញា, ធន់ រិទ្ធី, ធន់ ផានិត, ធន់ មករា, ធន់ អៀងឡៃ ជាដើម។

ក្រៅពីគ្រូល្បីទាំង៣ខាងលើ នៅមានគ្រូជាច្រើនទៀតដែលកំពុងទទួលបានជោគជ័យក្នុងអាជីពដូចជា លោក សេន ប៊ុនថេន, បឺត ខាំ, ហង្ស សឿន, ស្វាយ សុខុន ជាដើម៕

អត្ថបទ៖ វីរបុត្រ

The post គ្រូបង្ហាត់គុនខ្មែរ៣រូបកំពុង ជោគជ័យខ្លាំងនាពេលបច្ចុប្បន្ន appeared first on Kampuchea Thmey Daily.

កីឡាករ កីឡាការិនីជាតិ-អន្តរជាតិ១១៨នាក់នឹងប្រកួត គុនខ្មែរពិភពលោកក្នុងខែធ្នូ

chean virakbot — Tue, 19 Nov 2024 04:50:36 +0000

សហព័ន្ធកីឡាគុនខ្មែរអន្តរជាតិនឹងរៀបចំព្រឹត្តិការណ៍ប្រកួតគុនខ្មែរ ពិភពលោក លើកទី៥ នៅថ្ងៃទី៦-៧-៨ ខែធ្នូ ឆ្នាំ២០២៤ នៅមុខឧទ្យានព្រះរាជដំណាក់ ក្នុងខេត្តសៀមរាប។

លោក មៀម រ៉ា ប្រធានសហព័ន្ធកីឡាគុនខ្មែរអន្តរជាតិបានថ្លែងក្នុងសន្និសីទសារព័ត៌មាននៅថ្ងៃទី១៩ ខែវិច្ឆិកា ឆ្នាំ២០២៤ ថា ប្រទេសចំនួន២៤ស្មើនឹងកីឡាករ កីឡាការិនីចំនួន១១៨នាក់នឹងចូលរួមប្រកួតគុនខ្មែរពិភពលោកលើកទី៥។ ការប្រកួតត្រូវបានបែងចែកជា៣កម្រិតផ្សេងគ្នាគឺ ការប្រកួតមិនអាជីព ការប្រកួតពាក់កណ្តាលអាជីព និងការប្រកួតអាជីព។ ការប្រកួតទាំង៣កម្រិតនេះត្រូវបានកំណត់ទៅតាមអាយុគឺចាប់ពី១០-១៣ឆ្នាំ អាយុ១៤-១៧ឆ្នាំ និងអាយុ១៨-៤៨ឆ្នាំ ទៅតាមប្រភេទទម្ងន់។

លោក មៀម រ៉ា បានឲ្យដឹងថា ព្រឹត្តិការណ៍ប្រកួតគុនខ្មែរពិភពលោក លើកទី៥ មានទ្រង់ទ្រាយធំជាលើកមុនៗ។ គោលដៅសំខាន់នៃការរៀបចំព្រឹត្តិការណ៍ប្រកួតគុនខ្មែរពិភពលោកគឺដើម្បីសម្លឹងឆ្ពោះទៅការដាក់គុនខ្មែរក្នុងទ្វីបអាស៊ី និងកីឡាអូឡាំពិក។

«យើងដាក់គោលដៅចូលកីឡាអូឡាំពិកនៅក្នុងឆ្នាំ២០៣៦ ប៉ុន្តែយើងក៏សម្លឹងឆ្ពោះទៅចូលកីឡាអូឡាំពិក ឆ្នាំ២០៣២ នៅប្រទេសអូស្ត្រាលី ដូច្នេះធ្វើយ៉ាងណាដើម្បីរុញច្រានគុនខ្មែរឲ្យសម្រេចគោលដៅ»។ លោក មៀម រ៉ា បានបញ្ជាក់។

ជាមួយគ្នានេះ ការប្រកួតអាជីពមាន៩គូដែលជាការប្រកួតគូពិសេសមិត្តភាពអន្តរជាតិ។ កីឡាករ កីឡាការិនីគុនខ្មែរ៩នាក់នឹងប្រកួតអាជីពមានដូចជា ព្រុំ សំណាង, សុខ ធី, មឿន សុខហ៊ុច, គោមរៈ ច័ន្ទរាជ, រិទ្ធី រុងរឿង, សំអឿន សុផា និងកីឡាករ កីឡាការិនី៣នាក់ទៀត។

ក្នុងព្រឹត្តិការណ៍ការប្រកួតគុនខ្មែរពិភពលោក សហព័ន្ធកីឡាគុនខ្មែរអន្តរជាតិនឹងរៀបចំមហាសន្និបាតគុនខ្មែរប្រចាំឆ្នាំ២០២៤។ ក្នុងមហាសន្និបាតនេះនឹងមានកិច្ចពិភាក្សាលើការងារសំខាន់ផ្សេងៗដែលធ្វើយ៉ាងណាជំរុញវិស័យកីឡាគុនខ្មែរឲ្យរីកចម្រើនស្តង់ដាអន្តរជាតិ។ ជាពិសេស មហាសន្និបាតនឹងមានកិច្ចពិភាក្សាដើម្បីជ្រើសរើសប្រទេសណាដែលនឹងទទួលរៀបចំការប្រកួតគុនខ្មែរពិភពលោកនៅក្រៅប្រទេស។

លោក មៀច រ៉ា បានប្រាប់ថា ៖«គោលបំណងរបស់យើងគឺចង់ឲ្យប្រទេសជាសមាជិកទទួលរៀបចំធ្វើម្ចាស់ផ្ទះការប្រកួតគុនខ្មែរពិភពលោកនៅឆ្នាំ២០២៥។ រហូតដល់ពេលនេះ យើងមិនទាន់ទទួលបានព័ត៌មានណាមួយពីប្រទេសណាបង្ហាញការចាប់អារម្មណ៍ធ្វើម្ចាស់ផ្ទះទេ តែក្នុងមហាសន្និបាត យើងនឹងជជែកគ្នា ហើយបើកចំហឲ្យប្រទេសជាសមាជិកដាក់ពាក្យដើម្បីទទួលរៀបចំការប្រកួត»។

លោកបានសង្កត់ធ្ងន់ថា ៖«យើងខ្ញុំនឹងជួយរកដៃគូឧបត្ថម្ភដើម្បីអាចរួមចំណែកជួយដល់ប្រទេសណាដែលចង់ធ្វើម្ចាស់ផ្ទះ។ យើងអាចទៅរួច ពីព្រោះនៅក្រៅប្រទេស ការរៀបចំព្រឹត្តិការណ៍ គេលក់សំបុត្រចូលទស្សនា ហើយបើម្ចាស់ផ្ទះស្វែងរកបានដៃគូឧបត្ថម្ភខ្លះ លក់សំបុត្រផង ហើយយើងជាម្ចាស់ផ្ទះក្បាច់ អាចរកម្ចាស់ឧបត្ថម្ភទៀតនោះគឺអាចទៅរួច»។

លោកបានបន្ថែមថា ប្រសិនបើឆ្នាំ២០២៥មិនមានប្រទេសណាទទួលធ្វើម្ចាស់ផ្ទះរៀបចំការប្រកួតគុនខ្មែរពិភពលោក លើកទី៦ សហព័ន្ធគុនខ្មែរអន្តរជាតិនឹងរៀបចំនៅខេត្តព្រះសីហនុវិញម្តង។

នៅក្នុងព្រឹត្តិការណ៍ប្រកួតគុនខ្មែរពិភពលោក សម្រាប់ការប្រកួតគុនខ្មែរអាជីព មានកីឡាករមួយចំនួនបានដឹងដៃគូប្រកួតហើយ ក្នុងនោះកីឡាករ ព្រុំ សំណាង ប៉ះកីឡាករវៀតណាម កីឡាករ គោមរៈ ច័ន្ទរាជ និងកីឡាករ រុង រឿង ប៉ះកីឡាករមីយ៉ាន់ម៉ា។

សូមបញ្ជាក់ថា ការប្រកួតគុនខ្មែរពិភពលោកនេះមានប្រទេសជាសមាជិកប្រមាណ៥ទៅ៧នឹងបញ្ជូនកីឡាករ កីឡាការិនីមកចូលរួមប្រកួតជាលើកដំបូង។ ជាពិសេស ប្រទេសបារាំងបានត្រៀមកីឡាករ កីឡាការិនី១៥នាក់ដើម្បីមកប្រជែងមេដាយ និងខ្សែក្រវាត់គុនខ្មែរពិភពលោក៕

អត្ថបទ៖ វីរបុត្រ

The post កីឡាករ កីឡាការិនីជាតិ-អន្តរជាតិ១១៨នាក់នឹងប្រកួត គុនខ្មែរពិភពលោកក្នុងខែធ្នូ appeared first on Kampuchea Thmey Daily.

Kun Khmer World Champion Archives - Kampuchea Thmey Daily

កំណត់ត្រាដ៏​អស្ចារ្យ​របស់កំពូល​អ្នក​ប្រដាល់​​ ធឿន ធារ៉ា លើស​ពី​ការ​រំពឹង​ទុក​

ឥណ្ឌូណេស៊ី ស្នើ​សុំ​​ធ្វើ​ម្ចាស់​ផ្ទះ ជើង​ឯក​គុន​ខ្មែរ​ពិភព​លោក ឆ្នាំ​២០២៥

ថ្ងៃ​ទី​១ អត្តពលិក​គុន​ខ្មែរ ឈ្នះ៧ ចាញ់៤​ ក្នុង​ការ​ប្រកួត​គុនខ្មែរ​ពិភព​លោក

សហព័ន្ធ​គុន​ខ្មែរ​ចាប់​ផ្តើម​កំណត់​កីឡាករ​ម្នាក់​អាច​វ៉ៃ​តែ២​ដងក្នុង១ខែ

គ្រូបង្ហាត់​គុន​ខ្មែរ​៣​រូប​កំពុង​​ ជោគជ័យ​​ខ្លាំង​នាពេលបច្ចុប្បន្ន

កីឡាករ កីឡាការិនី​ជាតិ-អន្តរជាតិ​១១៨​នាក់​នឹង​​​ប្រកួត​ គុន​ខ្មែរ​ពិភព​លោកក្នុងខែធ្នូ

កំណត់ត្រាដ៏អស្ចារ្យរបស់កំពូលអ្នកប្រដាល់ ធឿន ធារ៉ា លើសពីការរំពឹងទុក

ឥណ្ឌូណេស៊ី ស្នើសុំធ្វើម្ចាស់ផ្ទះ ជើងឯកគុនខ្មែរពិភពលោក ឆ្នាំ២០២៥

ថ្ងៃទី១ អត្តពលិកគុនខ្មែរ ឈ្នះ៧ ចាញ់៤ ក្នុងការប្រកួតគុនខ្មែរពិភពលោក

សហព័ន្ធគុនខ្មែរចាប់ផ្តើមកំណត់កីឡាករម្នាក់អាចវ៉ៃតែ២ដងក្នុង១ខែ

គ្រូបង្ហាត់គុនខ្មែរ៣រូបកំពុង ជោគជ័យខ្លាំងនាពេលបច្ចុប្បន្ន

កីឡាករ កីឡាការិនីជាតិ-អន្តរជាតិ១១៨នាក់នឹងប្រកួត គុនខ្មែរពិភពលោកក្នុងខែធ្នូ