Luvi FN Archives - Kampuchea Thmey Daily

ម្ចាស់ពានកីឡាករឆ្នើម Luvi ប្រាប់ពីសមត្ថភាពឆ្នាំនេះខ្លាំងជាងឆ្នាំមុន

chean virakbot — Mon, 24 Feb 2025 04:54:56 +0000

កីឡាករឥណ្ឌូណេស៊ី Luvi Febrian Nugraha បានបង្ហាញសមត្ថភាពដ៏គួរឲ្យភ្ញាក់ផ្អើលក្នុងពានរង្វាន់តេជោលីគ ឆ្នាំ២០២៥ បើប្រៀបធៀបនឹងការបង្ហាញសមត្ថភាព លើកទី១ កាលពីឆ្នាំ២០២៤។

Luvi បានក្លាយជាកម្លាំងដ៏មហាសាលក្នុងការជួយឲ្យក្រុមបាល់ទះ បញ្ជាការដ្ឋានអង្គរក្ស ឈ្នះជើងឯក តេជោលីគ ជាលើកទី២ បន្ទាប់ពីរូបគេបានជួយក្រុមមួយឈ្នះជើងឯកតេជោលីគ លើកទី១ម្តងហើយ។ ការបង្ហាញសមត្ថភាពលើកទី២នៅលើទឹកដីកម្ពុជាពិតជាគួរឲ្យចាប់អារម្មណ៍ និងទាក់ចិត្តអ្នកទស្សនាខ្លាំងមែនទែន។

ស្ថិតក្នុងវ័យ២១ឆ្នាំ កម្ពស់១.៨៨ម៉ែត្រ Luvi មានសមត្ថភាពទាំងព្រមតែម្តងគឺលោតបានខ្ពស់ វាយផ្តាច់ច្បាស់ពោរពេញដោយបច្ចេកទេស និងកម្លាំងធ្ងន់ជាមួយនឹងកាយសម្បទាមាំមួនល្អ។ ទាំងនេះហើយបានធ្វើឲ្យមហាជនកោតសរសើរយ៉ាងខ្លាំងពីសមត្ថភាពដ៏អស្ចារ្យរហូតបានធ្វើឲ្យរូបគេក្លាយជាតារាបាល់ទះឆ្នើមប្រចាំព្រឹត្តិការណ៍។

ក្នុងបទសម្ភាស Luvi បាននិយាយថា ៖«ខ្ញុំសូមអរគុណដល់ព្រះជាម្ចាស់ដែលបានផ្តល់ឲ្យខ្ញុំបានមកលេងនៅកម្ពុជាលើកទី១ ហើយធ្វើឲ្យខ្ញុំស្គាល់ពីកម្រិតសមត្ថភាពខ្លួនឯងកាន់តែច្បាស់ និងបានបង្កើនការខិតខំប្រឹងហ្វឹកហាត់។ អីចឹងហើយបានជាសមត្ថភាពរបស់ខ្ញុំកើនឡើងខ្លាំងជាងឆ្នាំមុន»។

កាលពីឆ្នាំ២០២៤ Luvi បានឈ្នះពានរង្វាន់កីឡាករវាយផ្តាច់ឆ្នើមក្នុងនាមជាសមាជិកជួយក្រុមបញ្ជាការដ្ឋានអង្គរក្ស ឈ្នះជើងឯកតេជោលីគ ហើយឆ្នាំ២០២៥ រូបគេបានឈ្នះពានរង្វាន់កីឡាករវាយផ្តាច់ឆ្នើមដដែល ប៉ុន្តែរឹតតែអស្ចារ្យគឺឈ្នះ ពានរង្វាន់ជាកីឡាករឆ្នើមប្រចាំព្រឹត្តិការណ៍ទាំងមូល។

ជ័យលាភីទាំងអស់ក្នុងពានរង្វាន់តេជោលីគ ឆ្នាំ២០២៥

លេខ១៖ បញ្ជាការដ្ឋានអង្គរក្ស ទទួលបានមេដាយមាស ពាន និងប្រាក់រង្វាន់៦០លានរៀល
លេខ២៖ វិសាខា ទទួលបានមេដាយប្រាក់ និងប្រាក់រង្វាន់១២លានរៀល
លេខ៣៖ ក្រសួងមហាផ្ទៃ ទទួលបានមេដាយសំរិទ្ធ និងប្រាក់រង្វាន់១០លានរៀល
លេខ៤៖ ក្រុមខេត្តស្វាយរៀង ទទួលបានប្រាក់រង្វាន់៨លានរៀល
កីឡាករបិទកណ្តាលល្អ៖ ឈាង ជីវែង របស់ បញ្ជាការដ្ឋានអង្គរក្ស
អ្នកបិទកណ្តាលល្អ៖ Praful របស់ក្រុមខេត្តស្វាយរៀង
លីប៊ើរ៉ូឆ្នើម៖ សេង គីមហាប់ របស់ វិសាខា
អ្នកវាយផ្តាច់ឆ្នើម៖ ធី ម៉េងហួង របស់ ក្រសួងមហាផ្ទៃ
អ្នកវាយផ្តាច់ឆ្នើម៖ មឿន ម៉េងឡាយ របស់ក្រសួងមហាផ្ទៃ
អ្នកវាយផ្តាច់ឆ្នើម៖ Luvi របស់ បញ្ជាការដ្ឋានអង្គរក្ស
អ្នកប៉ះសេឆ្នើម៖ Viko របស់បញ្ជាការដ្ឋានអង្គរក្ស
ហ៊ួត សុភាព ទទួលបានពានរង្វាន់កិត្តិយស
កីឡាករឆ្នើមប្រចាំព្រឹត្តិការណ៍៖ Luvi របស់បញ្ជាការដ្ឋានអង្គរក្ស

អត្ថបទ៖ វីរបុត្រ

The post ម្ចាស់ពានកីឡាករឆ្នើម Luvi ប្រាប់ពីសមត្ថភាពឆ្នាំនេះខ្លាំងជាងឆ្នាំមុន appeared first on Kampuchea Thmey Daily.

Luvi ក្លាយជាកីឡាករល្អ៤លើកជាប់គ្នាក្នុងចំណោម៥ប្រកួត នៅតេជោលីគ

chean virakbot — Mon, 20 Jan 2025 01:35:04 +0000

កីឡាករឥណ្ឌូណេស៊ី Luvi Febrian Nugraha ដែលជាអ្នកផ្តាច់ដ៏ល្អរបស់ក្រុមបាល់ទះបញ្ជាការដ្ឋានអង្គរក្សបានជាប់ជាកីឡាករល្អប្រចាំការប្រកួត៤លើកជាប់គ្នាក្នុងចំណោម៥ប្រកួតនៃព្រឹត្តិការណ៍បាល់ទះតេជោលីគ រដូវកាល២០២៥ ដែលទើបដំណើរការបាន២សប្តាហ៍។

ថ្ងៃបើកឆាកកាលពីទី១០ ខែមករា មិត្តរួមក្រុម ស៊ុយ ខន បានក្លាយជាកីឡាករល្អប្រចាំការប្រកួត បន្ទាប់ពីក្រុមបញ្ជាការដ្ឋានអង្គរក្ស បានយកឈ្នះ ក្រុមនគរបាលខេត្តតាកែវ ដោយលទ្ធផល ៣-០ ប៉ុន្តែ៤ប្រកួតចុងក្រោយកីឡាករល្អប្រចាំការប្រកួតសុទ្ធតែបានទៅកីឡាករ Luvi។

នៅពេលបញ្ជាការដ្ឋានអង្គរក្ស បានឈ្នះ ក្រុមនគរបាលខេត្តស្វាយរៀង ដោយលទ្ធផល ៣-០ Luvi វាយផ្តាច់បាន១៨ដង។ នៅពេលបញ្ជាការដ្ឋានអង្គរក្សបានឈ្នះ ក្រុមកងពលធំអន្តរាគមន៍លេខ៣ដោយលទ្ធផល ៣-០ រូបគេវាយផ្តាច់បាន១១ដង និងប្លុកបាន២ដង។ នៅពេលក្រុមបញ្ជាការដ្ឋានអង្គរក្ស បានឈ្នះ ក្រុមនគរបាលខេត្តពោធិ៍សាត់ ៣-០ រូបគេវាយផ្តាច់បាន១៣ដង និងប្លុកបាន២ដង និងចុងក្រោយក្រុមបញ្ជាការដ្ឋានអង្គរក្សចាញ់ ក្រុមក្រសួងមហាផ្ទៃ ១-៣ ក៏ Luvi នៅតែបានក្លាយជាកីឡាករល្អប្រចាំការប្រកួតដោយវាយផ្តាច់បាន២៣ដង ប្លុកបាន៣ដង និងវាយសេវាបានពិន្ទុ១ដង។

Luvi បានវិលត្រឡប់ចូលរួមជាមួយក្លិបបញ្ជាការដ្ឋានអង្គរក្សជាលើទី២ ក្នុងពានរង្វាន់បាល់ទះតេជោលីគរដូវកាលទី២។ កើតឆ្នាំ២០០៤ មានកម្ពស់១.៨៨ម៉ែត្រ Luvi ជាកម្លាំងដ៏សំខាន់ដែលជួយក្រុមឈ្នះជើងឯកតេជោលីគកាលពីរដូវកាលមុន។

ក្រុមបញ្ជាការដ្ឋានអង្គរក្ស កំពុងឈរលេខ២ ដោយមាន១២ពិន្ទុ បន្ទាប់ពីឈ្នះ៤ប្រកួត និងចាញ់១ប្រកួត ខណៈក្រុមក្រសួងមហាផ្ទៃមិនទាន់ស្គាល់បរាជ័យលើយដោយឈ្នះទាំង៥ប្រកួតរក១៥ពិន្ទុពេញឈរលើកំពូលតារាង។

ការប្រកួតសន្សំពិន្ទុជុំទី១នៅសល់២ប្រកួតទៀត ដោយក្រុមបញ្ជាការដ្ឋានអង្គរក្ស ត្រូវប៉ះ ក្រុមស្នងការដ្ឋានរាជធានីភ្នំពេញ នៅថ្ងៃទី២៥ ខែមករា និងចុងក្រោយ ប៉ះ ក្រុមខ្លាំង វិសាខា នៅថ្ងៃទី២៦ ខែមករា ឆ្នាំ២០២៥៕

អត្ថបទ៖ វីរបុត្រ

The post Luvi ក្លាយជាកីឡាករល្អ៤លើកជាប់គ្នាក្នុងចំណោម៥ប្រកួត នៅតេជោលីគ appeared first on Kampuchea Thmey Daily.

ស្មាត់ឆ្នើម៨រូបគួរឲ្យចាប់អារម្មណ៍ ក្នុងតេជោលីគ ចាប់ផ្តើមថ្ងៃនេះ

Pha Rothana — Fri, 10 Jan 2025 01:17:37 +0000

ការប្រកួតបាល់ទះពានរង្វាន់តេជោលីគ រដូវកាលទី២ នឹងចាប់ផ្តើមនៅថ្ងៃទី១០ ខែមករា ឆ្នាំ២០២៥ ដោយមានក្រុម៨ចូលរួមប្រកួតប្រជែង។ ថ្ងៃនេះសារព័ត៌មាន«កម្ពុជាថ្មី» សូមណែនាំពីកីឡាករស្មាត់ឆ្នើមៗគួរឲ្យចាប់អារម្មណ៍ ក្នុងព្រឹត្តិការណ៍ឆ្នាំនេះ។

ខាងក្រោមគ្រាន់តែកីឡាករវាយផ្តាច់ដែលបានលេចធ្លោកន្លងមក និងទើបនាំចូលជាផ្លូវការប៉ុណ្ណោះ ប៉ុន្តែនឹងមានកីឡាករលេចធ្លោជាច្រើនទៀតដែលមិនទាន់បង្ហាញសមត្ថភាព ដូចជា ក្រុមស្នងការដ្ឋាននគរបាលខេត្តតាកែវ នាំយកកីឡាករវៀតណាម៣រូប។ ក្រុមក្រសួងមហាផ្ទៃ ក្រុមខេត្តពោធិ៍សាតត់ និងកងពលធំអន្តរាគមន៍លេខ៣ ក៏មិនទាន់បានបង្ហាញសមាជិកបរទេសដែរ។

កីឡាករ Luvi FN

កីឡាករវ័យក្មេងសញ្ជាតិឥណ្ឌូណេស៊ីបានវិលត្រឡប់ចូលរួមជាមួយក្លិបបញ្ជាការដ្ឋានអង្គរក្សជាលើទី២ ក្នុងពានរង្វាន់បាល់ទះតេជោលីគរដូវកាលទី២។ កើតឆ្នាំ២០០៤ មានកម្ពស់១.៨៨ម៉ែត្រ Luvi Febrian Nugraha ល្អខ្លាំងខាងលោតវ៉ៃផ្តាច់ដើម្បីយកពិន្ទុ។

កីឡាករ Yasser Ramírez Boloy

កីឡាករ Yasser Ramírez Boloy មានកម្ពស់ ១.៩៨ ម៉ែត្រ ជាស្មាត់ចំណូលថ្មីដែលក្លិបបាល់ទះវិសាខាបាននាំយកដើម្បីប្រជែងពាន តេជោលីគ រដូវកាលទី២។ មុនពេលផ្លាស់មកពេលនៅកម្ពុជារូបគេបានលេងឲ្យក្លិប Leopardos de Camagüey ក្នុងប្រទេសគុយបា។

កីឡាករ ពិន សារ៉ុន

ពិន សារ៉ុន ជាកីឡាករដែលកម្ពស់ខ្ពស់ជាងគេនៅក្នុងក្រុមបាល់ទះជម្រើសជាតិកម្ពុជា ហើយជាកំពុងលេចធ្លោខ្លាំងនៅក្រុមវិសាខាជាមួយកម្ពស់ ២.០១ម៉ែត្រ បន្ទាប់ពីបានទៅលេងនៅវៀតណាមកាលពីឆ្នាំ២០២៤។ លោតវាយបានកម្ពស់៣.៤០ម៉ែត្រ និងលោតបាំងបានកម្ពស់៣.៣៧ម៉ែត្រ រូបគេច្បាស់ណាស់នឹងចាប់ដៃគូជាមួយ គួន ម៉ុម និងសមាជិកគុយបាថ្មី រួមជាមួយអ្នកប៉ះសេបារាំង។

កីឡាករ គួន ម៉ុម

គួន ម៉ុម ជាតារាឆ្នើមរបស់ក្រុមបាល់ទះជម្រើសជាតិកម្ពុជា និងក្លិបបាល់ទះវិសាខាដែលមានកម្ពស់១.៩៨ម៉ែត្រ លោតបានកម្ពស់៣.៣៨ម៉ែត្រ និងលោតបាំងកម្ពស់បាន៣.៣៥ម៉ែត្រ។ រូបគេមានបទពិសោធច្រើនលើឆាកអន្តរជាតិទាំងក្លិប និងជម្រើសជាតិកម្ពុជា។

កីឡាករ Sim Jian Qin

កីឡាករ Sim Jian Qin បានលេចធ្លោនៅពេលរូបគេបង្ហាញខ្លួនក្នុងក្រុមជម្រើសជាតិម៉ាឡេស៊ី ក្នុងពានរង្វាន់ SEA V. League Challenge នៅកម្ពុជាកាលពីឆ្នាំ២០២៤ ហើយក៏ទាក់ភ្នែកគ្រូបង្វឹកកម្ពុជា។ កាលពីចុងឆ្នាំ២០២៤រូបគេបានចូលរួមជាក្រុមខេត្តតាកែវក្នុងពានរង្វាន់សម្តេចក្រឡាហោម ស ខេង ហើយឥឡូវនេះចូលរួមជាមួយក្រុមនគរបាលខេត្តស្វាយរៀង។

កីឡាករ Herrera Raciel

កីឡាករ Herrera Raciel ដែលមានកម្ពស់ ១.៩៨ម៉ែត្រ បន្ដចូលរួមជាមួយក្រុមស្នងការខេត្តស្វាយរៀង ក្នុងពានរង្វាន់តេជោលីគ រដូវកាលពី២។ រូបគេជាកម្លាំងសំខាន់ក្នុងក្រុម នឹងបន្ដសហគ្នាជាមួយកំពូលអ្នកប៉ះសេ សួន ចាន់ណារ៉ូ ក្នុងការស្វែងរកពិន្ទុ។ ក្នុងពានរង្វាន់ សម្តេចក្រឡាហោម ស ខេង លើកទី៣ កីឡាករគុយបារូបនេះបានឈ្នះពានរង្វាន់អ្នកវាយផ្តាច់ស្តាំល្អបំផុត។

កីឡាករ មឿន ម៉េងឡាយ

មឿន ម៉េងឡាយ ជាកីឡាករដែលកំពុងលេចធ្លោខ្លាំងនៅក្រុមក្រសួងមហាផ្ទៃ និងក្រុមជម្រើសជាតិកម្ពុជា ជាមួយកម្ពស់ ១.៩៤ម៉ែត្រ លោតវាយបានកម្ពស់៣.៤៦ម៉ែត្រ និងលោតបាំងបានកម្ពស់៣.៤០ម៉ែត្រ។

កីឡាករ ធី ម៉េងហួង

កីឡាករវ័យក្មេង ធី ម៉េងហួង បានអភិវឌ្ឍសមត្ថភាពបានយ៉ាងឆាប់រហ័ស។ ឥឡូវរូបគេបានក្លាយជាកីឡាករសំខាន់មួយក្នុងក្រុមសមាគមបាល់ទះក្រសួងមហាផ្ទៃ។ ក្នុងពានរង្វាន់សម្ដេចក្រឡាហោម ស ខេង ម៉េងហួង បានឈ្នះពានរង្វាន់កីឡាករវាយផ្តាច់ឆ្វេងល្អបំផុត និងកីឡាករល្អបំផុតប្រចាំព្រឹត្តិការណ៍។

កីឡាករ Mendeze Iglesias Liosbel

កីឡាករគុយបាកើតនៅឆ្នាំ១៩៩៥មានកម្ពស់១.៩៩ម៉ែត្រ ជាអ្នកផ្តាច់លេចធ្លោនៅក្លិបស្នងការដ្ឋាននគរបាលរាជធានីភ្នំពេញ។ រូបគេត្រូវជាកម្លាំងសំខាន់មួយក្នុងក្រុម ដើម្បីប្រជែងជាមួយក្រុមទាំង៧ផ្សេងទៀត៕

អត្ថបទ៖ ផា រតនា

The post ស្មាត់ឆ្នើម៨រូបគួរឲ្យចាប់អារម្មណ៍ ក្នុងតេជោលីគ ចាប់ផ្តើមថ្ងៃនេះ appeared first on Kampuchea Thmey Daily.

Luvi FN Archives - Kampuchea Thmey Daily

ម្ចាស់​ពាន​កីឡាករ​ឆ្នើម Luvi ប្រាប់​ពី​សមត្ថភាព​​ឆ្នាំ​នេះ​​ខ្លាំង​ជាង​ឆ្នាំ​មុន

Luvi ក្លាយ​ជា​កីឡាករ​ល្អ​៤​លើក​ជាប់​គ្នា​ក្នុង​ចំណោម៥ប្រកួត នៅ​តេជោលីគ​

ស្មាត់ឆ្នើម​៨​រូប​​គួរឲ្យចាប់អារម្មណ៍​ ក្នុងតេជោលីគ​ ចាប់ផ្តើមថ្ងៃនេះ

ម្ចាស់ពានកីឡាករឆ្នើម Luvi ប្រាប់ពីសមត្ថភាពឆ្នាំនេះខ្លាំងជាងឆ្នាំមុន

Luvi ក្លាយជាកីឡាករល្អ៤លើកជាប់គ្នាក្នុងចំណោម៥ប្រកួត នៅតេជោលីគ

ស្មាត់ឆ្នើម៨រូបគួរឲ្យចាប់អារម្មណ៍ ក្នុងតេជោលីគ ចាប់ផ្តើមថ្ងៃនេះ