Maha Vajiralongkorn Archives - Kampuchea Thmey Daily

ស្វែងយល់រាជដំណើរទស្សនកិច្ចរបស់មហាក្សត្រថៃទៅកាន់មហាយក្សចិនពេលនេះ

Rann Reuy — Thu, 13 Nov 2025 02:46:14 +0000

មហាក្សត្រថៃ មហា វ៉ាជីរ៉ាឡុងកន (Maha Vajiralongkorn) រាមាទី១០នៃការឡើងគ្រងរាជតាមបែបសន្តតិវង្សក្នុងត្រកូលចក្រី នឹងចាប់ផ្តើមយាងទៅទស្សនកិច្ចនៅទីក្រុងប៉េកាំងនៅថ្ងៃព្រហស្បតិ៍ទី១៣ខែវិច្ឆិកានេះ ដែលទ្រង់នឹងក្លាយជាមហាក្សត្រថៃសោយរាជ្យដែលយាងធ្វើទស្សនកិច្ចផ្លូវរដ្ឋដំបូងគេទៅកាន់សាធារណៈរដ្ឋប្រជាមានិតចិន។

រាជវង្សានុវង្សរបស់ក្សត្រថៃ វ៉ាជីរ៉ាឡុងកន រាមាទី១០។

ក្រុមអ្នកវិភាគ បានចាប់អារម្មណ៍ចំពោះរាជដំណើរទស្សនកិច្ចលើកដំបូងក្នុងចំណងទំនាក់ទំនងការទូតផ្លូវការរវាងរាជាណាចក្រថៃនិងរដ្ឋាភិបាលចិនកុម្មុយនីស្តរយៈពេលកន្លះសតវត្សរ៍នេះ ដោយចាត់ទុកថាវាជាសញ្ញានៃការកើនឡើងឥទ្ធិពលរបស់មហាយក្សចិនប្រចាំតំបន់អាស៊ីលើព្រះរាជាណាចក្រថៃ ដែលគេដឹងថា ជាសម្ព័ន្ធមិត្តដ៏ជិតស្និទ្ធជាមួយសហរដ្ឋអាមេរិករាប់សិបទសវត្សរ៍មកហើយនោះ។

មានការកត់សម្គាល់ដែរថា របបរាជានិយមអាស្រ័យធម្មនុញ្ញរបស់ប្រទេសថៃចាប់តាំងពីឆ្នាំ១៩៣២ ប្រទេសថៃបានប្រើប្រាស់ព្រះរាជទស្សនកិច្ចរបស់មហាក្សត្រគ្រងរាជសម្បត្តិជាឧបករណ៍គោលនយោបាយការបរទេសដ៏សំខាន់បំផុត នៅក្នុងនោះ រួមទាំងដំណើរទៅកាន់សហរដ្ឋអាមេរិកចំនួនពីរលើកក្នុងកំឡុងសម័យសង្គ្រាមត្រជាក់ក្នុងទសវត្សរ៍ឆ្នាំ១៩៦០ របស់អតីតមហាក្សត្រថៃ ភូមិបុល អាឌុលយ៉ាដេត ( Bhumibol Adulyadej) ដែលសោយរាជ្យ៧០ឆ្នាំ ដោយទ្រង់មិនដែលយាងទស្សនកិច្ចនៅប្រទេសចិនម្តងណាឡើយ។ មកដល់រាជរបស់មហាក្សត្របច្ចុប្បន្ន វ៉ាជីរ៉ាឡុងកូន (Vajiralongkorn) គឺព្រះមហាក្សត្រថៃដែលយាងទៅទស្សនកិច្ចដោយផ្ទាល់ក្រោយពីការឡើងគ្រងរាជ៩ឆ្នាំ។

អត្ថបទស្រាវជ្រាវអំពីរាជដំណើរស្តេចថៃទៅកាន់ទីទីក្រុងប៉េកាំងលើកនេះ ដោយសារព័ត៌មានរ៉យទ័រ បានកត់សម្គាល់ថា រដ្ឋាភិបាលទីក្រុងបាងកកដែលគ្រប់គ្រងប្រទេសតាមបែបរាជាធិបតេយ្យអាស្រ័យរដ្ឋធម្មនុញ្ញនេះ បានបង្កើតទំនាក់ទំនងការទូតជាមួយរដ្ឋាភិបាលទីក្រុងប៉េកាំងនៅឆ្នាំ១៩៧៥ ហើយទំនាក់ទំនងទ្វេភាគីរបស់ពួកគេបានវិវត្តន៍ពីឆ្នាំក្រោយសង្គ្រាមត្រជាក់ ដោយមានការពង្រីកយ៉ាងសំខាន់ក្នុងពាណិជ្ជកម្ម និងការវិនិយោគទ្វេភាគី។

ប្រទេសចិនគឺជាទីផ្សារនាំចូលដ៏ធំបំផុតសម្រាប់ប្រទេសថៃ ដែលបានដឹកជញ្ជូនទំនិញរបស់ចិនមានតម្លៃ ៨០ពាន់លានដុល្លារកាលពីឆ្នាំមុន ក៏ដូចជាប្រភពកំពូលនៃអ្នកទេសចរសម្រាប់វិស័យទេសចរណ៍ដ៏សំខាន់របស់ព្រះរាជាណាចក្រថៃ និងជាអ្នកវិនិយោគធំនៅក្នុងវិស័យឧស្សាហកម្មដូចជារថយន្តជាដើម។

ការធ្វើចំណាកស្រុកពីប្រទេសចិនទៅប្រទេសថៃក៏មានរយៈពេលរាប់សតវត្សដែរ ហើយគ្រួសារថៃជាច្រើន រួមទាំងប្រធានផ្នែកឧស្សាហកម្ម អាជីវកម្ម និងនយោបាយ មានដើមកំណើតជាជនជាតិចិន។

នៅក្នុងសេចក្តីថ្លែងការណ៍មួយ ដែលប្រកាសអំពីដំណើរទស្សនកិច្ចរបស់ព្រះមហាក្សត្រ វ៉ាជីរ៉ាឡុងកន និងរាជក្សត្រី ស៊ុតធីតា (Suthida) រដ្ឋាភិបាលថៃបានរៀបរាប់ថា វាជាការឆ្លុះបញ្ចាំងពី «មិត្តភាពដ៏ស៊ីជម្រៅ និងការយោគយល់គ្នារវាងប្រទេសថៃ និងចិននៅគ្រប់កម្រិតទាំងអស់»។

តាមអ្នកនាំពាក្យក្រសួងការបរទេសទេសចិន អ្នកនាង ម៉ៅ នីង (Mao Ning) ដែលបានប្រកាសរាជដំណើរយាងទស្សនកិច្ចរបស់មហាក្សត្រថៃ គឺថា ព្រះមហាក្សត្រគ្រោងនឹងយាងទស្សនកិច្ចនៅប្រទេសចិនចំនួន៥ថ្ងៃ ចាប់ពីថ្ងៃទី១៣ដល់ថ្ងៃទី១៧ខែវិច្ឆិកា ដោយទ្រង់គ្រោងជួបសវនាជាមួយប្រធានាធិបតីចិន ស៊ី ជីនពីង (Xi Jinping) និងនាយករដ្ឋមន្ត្រីលោក លី ឈាង (Li Qiang)។

មហាក្សត្រថៃ វ៉ាជីរ៉ាឡុងកន និងក្សត្រី ក្នុងរាជពិធីបុណ្យឈាបនកិច្ចនៃមហាក្សត្រយានី។ REUTERS

ដំណើរទស្សនកិច្ចដ៏កម្រនិងកំពូលនៃមហាក្សត្រដ៏មានឥទ្ធិពលនៅអាស៊ីអាគ្នេយ៍ ប៉ុន្តែគ្មានកិច្ចព្រមព្រៀងណាមួយត្រូវបានគេរំពឹងថានឹងត្រូវបានចុះហត្ថលេខារវាងប្រទេសទាំងពីរក្នុងអំឡុងពេលនេះនោះទេ។

ចាប់តាំងពីការឡើងសោយរាជ្យនៅឆ្នាំ ២០១៦ ព្រះមហាក្សត្រ វ៉ាជីរ៉ាឡុងកន បានយាងធ្វើដំណើរជាផ្លូវការនៅរដ្ឋបរទេសតែមួយគត់គឺទៅកាន់ប្រទេស Bhutan ក្នុងតំបន់អាស៊ីខាងត្បូងកាលពីខែមេសា។

ទោះបីជាមានការយាងជាផ្លូវការក៏ដោយ អតីតព្រះមហាក្សត្រ Bhumibol ដែលបានចំណាយពេលប្រាំពីរទសវត្សរ៍នៅលើបល្ល័ង្កថៃដ៏មានឥទ្ធិពល មិនដែលបានទៅទស្សនាប្រទេសចិនទេ នោះក៏ដោយសារតែសម្ព័ន្ធមិត្តដ៏ស្អិតរមួតជាមួយសហរដ្ឋអាមេរិក។

តាមការដកស្រង់របស់រ៉យទ័រ អ្នកជំនាញទំនាក់ទំនងអន្តរជាតិនៃសាកលវិទ្យាល័យ Thammasat នៃទីក្រុងបាងកក លោក Sitthiphon Kruarattikan បាននិយាយថា ក្នុងអំឡុងពេលទ្រង់កាន់អំណាច ទោះបីមានការអញ្ជើញផ្លូវការក៏ដោយ អតីតព្រះមហាក្សត្រថៃ Bhumibol បានត្រឹមបញ្ជូនអ្នកតំណាង រួមទាំងស្តេចបច្ចុប្បន្នកាលដែលទ្រង់ត្រូវបានតែងតាំងជាអ្នកស្នងរាជ្យបន្តនៅឆ្នាំ ១៩៨៧។

អ្នកវិភាគរូបនេះ ត្រូវបានស្រង់សម្តីដូចនិយាយថា៖«ក្រឡេកមើលប្រទេសទាំងអស់ដែលចិនមានទំនាក់ទំនងការទូតជាមួយ ប្រមុខរដ្ឋនៃប្រទេសទាំងនោះភាគច្រើនបានទៅប្រទេសចិន ដោយប្រទេសថៃមានករណីលើកលែងជាយូរមកហើយ» ។
លោក Sitthiphon បន្ថែមថា៖«ដើម្បីមានព្រះមហាក្សត្រថៃដែលសោយរាជ្យមកទស្សនកិច្ចនេះគឺជាអ្វីដែលចិនចង់បាន»។

ដំណើរទស្សនកិច្ចនេះធ្វើឡើងក្នុងអំឡុងពេលកាន់ទុក្ខជាផ្លូវការតែប៉ុន្មានសប្តាហ៍បន្ទាប់ពីការសោយទិវង្គតរបស់មាតារបស់ព្រះមហាក្សត្រ ដែលជាសញ្ញាបញ្ជាក់ពីសារៈសំខាន់ដែលរាជវាំងផ្តល់ដល់ក្រុងប៉េកាំង៕

រ៉ាន់ រើយ

The post ស្វែងយល់រាជដំណើរទស្សនកិច្ចរបស់មហាក្សត្រថៃទៅកាន់មហាយក្សចិនពេលនេះ appeared first on Kampuchea Thmey Daily.

[វិភាគ] តើយោធាក្រោមបង្គាប់ស្តេចថៃ ប្រុងយកដីកម្ពុជា ធ្វើដង្វាយខួបកំណើតស្តេចរាមាទី១០ ដែលលើកបន្តុបខ្លួនឬ?

Rann Reuy — Mon, 28 Jul 2025 05:09:24 +0000

យោធាក្រោមបង្គាប់ស្តេចថៃ ក្នុងប៉ុន្មានថ្ងៃកន្លងមកនេះ បាននិងកំពុងបង្កើនការវាយប្រហារយ៉ាងសន្ធប់ ឃោរឃៅ សាហាវព្រៃផ្សៃជាទីបំផុត ប៉ុនប៉ងទម្លុះខ្សែកងទ័ពការពារជាតិរបស់កម្ពុជា ជាថ្នូរកាន់កាប់ទឹកដីរបស់ប្រទេសកម្ពុជាត្រង់ចំណុចណាមួយ ដើម្បីធ្វើដង្វាយក្នុងថ្ងៃខួបកំណើតគម្រប់៧២ឆ្នាំឈានចូល៧៣ឆ្នាំនៃស្តេចរាមាទី១០ នៅថ្ងៃទី២៨កក្កដានេះ។

វាហាក់ចៃដន្យពេកហើយដែលការវាយប្រហាររបស់យោធាថៃកើតឡើងត្រឹម៤ថ្ងៃប៉ុណ្ណោះមុនដល់ថ្ងៃខួបកំណើត៧២ឆ្នាំ របស់ ស្តេចថៃ វ៉ាជីរ៉ាឡុងកន រាមា ទី១០ (Vajiralongkorn Rama X) ដែលគ្រោងរៀបចំនៅទីក្រុងបាងកក ប៉ុន្តែត្រូវលុបចោលវិញ ក្រោយការប្រយុទ្ធគ្នាជាមួយកងទ័ពកម្ពុជាមិនដឹងឈ្នះឬចាញ់នោះ។

ការផ្ទុះអាវុធបានចាប់ផ្តើមឡើងនៅថ្ងៃទី២៤ខែកក្កដានៅប្រាសាទតាមាន់ធំ ដោយសារតែយោធាថៃបានបិទប្រាសាទតាមាន់ធំជាឯកតោភាគី ដោយការរាយលួសបន្លា ហើយទាហានកម្ពុជាទៅដោះចេញ រួចទាហានថៃក៏បានបាញ់ប្រហារមកទាហានកម្ពុជាតែម្តង។

គ្រាន់តែផ្ទុះអាវុធនៅប្រាសាទតាមាន់ធំភ្លាម ការផ្ទុះអាវុធបានរាលដាលយ៉ាងរហ័សទៅប្រាសាទតាក្របី និង បន្តបន្ទាប់ទៅដល់តំបន់មុំបីនៅជាប់ព្រំដែនឡាវ ដែលបញ្ជាក់ថា យោធាថៃបានគ្រោងទុករូចទៅហើយសម្រាប់ការផ្ទុះអាវុធនេះ។ គ្រាន់តែការផ្ទុះអាវុធ ដោយទាហានថ្មើជើងភ្លាមៗ មិនបានប៉ុន្មានម៉ោងផង យោធាថៃ បានប្រើប្រាស់យន្តហោះចម្បាំង F-16 បើកការវាយប្រហារតាមអាកាសលើទីតាំង ប្រាសាទព្រះវិហារ ទីស្នាក់យោធាកម្ពុជា វត្តអារាម នៅតាមបណ្តោយព្រំដែនយ៉ាងសន្ធប់ជាទីបំផុត។

ការចាប់ផ្តើមវាយប្រហារលើបូរណៈភាពទឹកដីកម្ពុជានៅត្រឹម៤ថ្ងៃមុនដល់ថ្ងៃខួបកំណើតស្តេចថៃ «វ៉ាជីរ៉ាឡុងកន» នេះ អាចជាផែនការរៀបចំឡើងដើម្បីយកទឹកដីខ្មែរត្រង់ចំណុចណាមួយ ទោះតូចក្តីឬធំក្តី ដើម្បីធ្វើជាដង្វាយក្នុងថ្ងៃអបអរខួប៧២ឆ្នាំរបស់ស្តេចថៃ។ ការប៉ាន់ស្មានថា ការយកទឹកដីកម្ពុជាដើម្បីធ្វើជារាជអំណោយខូបកំណើតស្តេចថៃនោះ គឺស្របគ្នានិងការអះអាងរបស់មេបញ្ជាការភូមិភាគី២ លោក ប៊ុនស៊ីន ប៉ាដក្លាង (Boonsin Padklang) ដែលធ្លាប់បានលើកឡើងថា «ការវាយប្រហារចូលកម្ពុជាប្រើពេលត្រឹមតែ៣ថ្ងៃប៉ុណ្ណោះ» ដោយយោងការចេញផ្សាយរបស់សារព័ត៌មានថៃកន្លងមក។

មេបញ្ជាការ ប៊ុនស៊ីន ប៉ាដក្លាង ត្រូវគេដឹងជាសាធារណៈថា ជាមេបញ្ជាការបង្កហេតុ តាមរយៈពាក្យសម្តីនិយាយអុជអាលនិងការដាក់ចេញការសម្រេចចិត្តជាច្រើនជាឯកតោភាគី ឈានទៅបង្កហេតុផ្ទុះអាវុធ។ ឧទាហរណ៍ ការប្រកាសបិទប្រាសាទតាមាន់ធំ និងឲ្យយោធារបស់ខ្លួនរាយលួសបន្លាបិទច្រកចូលនេះជាភស្តុតាងស្រាប់។

ការនិយាយប្រើពេលបីថ្ងៃ បានសេចក្តីថា យោធាថៃមានពេល១ថ្ងៃដើម្បីរៀបរយ ប្រកាសពីភាពជោគជ័យរបស់ពួកគេក្នុងការដណ្តើមបានដីកម្ពុជា ត្រង់«ត្រង់ចំណុចឬថាចំណែកណាមួយ» ដើម្បីធ្វើជាដង្វាយខួបកំណើតរបស់ព្រះមហាក្សត្ររបស់ពួកគេ ដែលខិតខំលើកបន្តុបក្រុមយោធានៅក្រោមអំណាចស្តេច ក្រោយពេលដែលក្សត្រអត់ប្រជាប្រិយភាពអង្គនេះឡើងគ្រងរាជសម្បត្តិបានត្រឹម៩ឆ្នាំ។

ការចេញផ្សាយរបស់ Kyodo Review ក្នុងពេលកន្លងមក ដោយបានដកស្រង់ពីសៀវភៅដែលមានចំណងជើងថា «A Soldier King: Monarchy and Military in the Thailand of Rama X» ដែលមានន័យជាភាសាខ្មែរថា «ស្តេចយោធាៈ រាជបល្ល័ង្ក និងយោធា ក្នុងប្រទេសថៃនៃស្តេច រាមាទី១០» ដែលអ្នកនិពន្ធ Supalak Genjanakhundee បានរៀបរាប់អំពីរបៀបដែលក្សត្រថៃអង្គនេះកសាងអំណាចយោធានៅជុំវិញរាជបល្ល័ង្ក តាមរយៈការលើកបន្តុបអ្នកស្ទិទ្ធនឹងទ្រង់ ក៏ដូចជាការបង្កើតកងអង្គភាពយោធាថ្មីៗចំណុះឲ្យរាជវាំង ក្រោមបង្គាប់របស់ទ្រង់។

ការចេញផ្សាយនោះ បានរៀបរាប់ថា ក្នុងការកសាងមូលដ្ឋានយោធាផ្ទាល់ខ្លួន ស្តេចអង្គនេះបច្ចុប្បន្នបានចែកចាយសៀវភៅណែនាំដល់សិស្សពលទាហាថ្មីៗ ដែលកំណត់ពីទស្សនវិជ្ជាបណ្តុះបណ្តាលរបស់លោក រួមទាំងវិធីសាស្រ្ត «ភ្ងំឬស្អំ (simmering)» ដែលប្រៀបបានទៅនឹងសិល្បៈនៃការហ្វឹកហ្វឺនទាហានតាមរបៀបនៃសិល្បៈនៃការចម្អិនអាហារ «khai pulo [ពងឆ្អិនក្នុងទឹកត្នោតផ្អែម]»។

ស្តេច វ៉ាជីរ៉ាឡុងកន បានបង្កើតឲ្យមានកម្មាភិបាលថ្មី ដែលគេហៅថា Kho Daeng ឬ «ទាហានក្រហម» [ព្រោះពួកគេពាក់អាវយឺតជាមួយកអាវក្រហម]។ មន្ត្រីយោធាវ័យក្មេងទាំងនេះបានបញ្ចប់ការសិក្សាពីវគ្គពិសេសរយៈពេលបីខែ ដែលពួកគេបានតាំងចិត្តបម្រើរាជានិយម ដែលជាក្រមសីលធម៌សម្រាប់អ្នកបម្រើក្នុងរាជវង្សដែលបានរស់ឡើងវិញពីសម័យនៃរបបរាជានិយមផ្តាច់ការ។ នេះបើតាមការរៀបរាប់ក្នុងសៀវភៅនោះ។

ក្រោយការបណ្តុះបណ្តាលនិងបំពាក់បំប៉នស្មារតីរួច ការលើកកម្ពស់ជួរកងកម្លាំងថ្មី (កម្មាភិបាលថ្មី) ឲ្យកាន់តំណែងជួរមុខសំខាន់ៗកំពុងផ្លាស់ប្តូរការពង្រឹងស្ថាប័ននៃទំនាក់ទំនងយោធាទៅរករាជានិយម។ មានការកត់សម្គាល់ដែរថា នៅក្រោម ស្តេចរាមាទី៩ (Rama IX) ដែលជាបិតារបស់ក្សត្របច្ចុប្បន្ន គឺព្រះអង្គបានសម្រុះសម្រួលទំនាក់ទំនងរបស់ទ្រង់ជាមួយយោធាជាចម្បងតាមរយៈក្រុមប្រឹក្សាមួយក្រុម (Privy Council) ដែលជារង្វង់នៃទីប្រឹក្សារបស់ព្រះមហាក្សត្រ។

សៀវភៅរៀបរាប់យ៉ាងលម្អិតអំពីការប្រមូលផ្តុំអំណាចយោធារបស់ក្សត្រថៃអង្គនេះ បានកត់សម្គាល់ថា ឥឡូវនេះ ក្សត្រអង្គនេះ ភាគច្រើនបានបដិសេធប្រើប្រាស់ក្រុមប្រឹក្សាដែលធ្លាប់មានពីមុន ដោយប្រគល់តួនាទីទៅកាន់ក្រុមដែលផ្តួចផ្តើមដោយព្រះអង្គឯងទៅវិញ។ ឥឡូវនេះ ស្តេច វ៉ាជីរ៉ាឡុងកន រាមាទី១០នេះ មានបណ្តាញផ្ទាល់ខ្លួន រួមមានមន្ត្រីដែលធ្លាប់រួមការងារ ក៏ដូចជាអ្នកដែលទើបចូលរួមក្នុងការបង្កើតអង្គភាពថ្មី ក្រោយឈ្មោះ «kho Daeng»។

ដូចការរៀបរាប់របស់អ្នកនិពន្ធសៀវភៅយោធាដ៏ល្បីល្បាញមួយនេះ ការប្រយុទ្ធក្នុងសមរភូមិ៤ថ្ងៃរបស់យោធាថៃ គឺសុទ្ធតែវ័យក្មេង ខណៈដែលរដ្ឋាភិបាលស៊ីវិលថៃគ្មានមេដឹកនាំច្បាស់លាស់ ដូចនេះស្តេចថៃអង្គនេះបញ្ជាឲ្យប្រតិបត្តិការយោធាមកកាន់សមរភូមិដោយប្រគល់ភារកិច្ច ឲ្យលោក Boonsin Padklang ជាអ្នកបញ្ជាប្រតិបត្តិការផ្ទាល់។

ការមិនអាចទម្លុះសំណាញ់ការពារជាតិដ៏ខ្លាំងរបស់កម្ពុជា ទោះបីថៃបានប្រើប្រាស់យុទ្ធោបករណ៍ទំនើបៗ ច្រើនសន្ទឹកសន្ទាប់យ៉ាងណា ធ្វើឲ្យកងទ័ពថៃត្រូវបរាជ័យ ស្លាប់ និងមានកន្លែងខ្លះត្រូវប្រកាសដកថយចូលទៅមូលដ្ឋានដើមវិញ ប៉ុន្មានម៉ោងមុនថ្ងៃខួបកំណើតរបស់ស្តេចអង្គនេះ។

ជាដំណឹងដ៏សោកសៅទៀតនោះ ស្តេច វ៉ាជីរ៉ាឡុងកននេះ បានបាត់បង់មាតារបស់ទ្រង់ គឺម្ចាស់ក្សត្រី សិរិគិត គិទិយ៉ាកន (Sirikit Kitiyakara) នៅត្រឹមតែ២ថ្ងៃ មុនដល់ថ្ងៃកំណើតរបស់លោក។

លោក Andrew MacGregor Marshall ដែលជាអ្នកសារព័ត៌មានរបស់ទីភ្នាក់ងារ Reuters និងជាសាស្ត្រាចារ្យជនជាតិស្កុតឡេន ដែលជិតស្និទ្ធជាមួយរាជវង្សសៀម នៅយប់ថ្ងៃសៅរ៍នេះ លាតត្រដាងថា មាតាព្រះមហាក្សត្រថៃ មហាវ៉ាជីរ៉ាឡុងកន សោយទិវង្គតហើយ។ លោកបន្តថា ព្រះសពរបស់ម្ចាស់ក្សត្រី សិរិគិត គិទិយ៉ាកន (Sirikit Kitiyakara) នឹងត្រូវរក្សាទុករហូតទាល់តែផុតពិធីចម្រើនព្រះជន្មព្រះមហាក្សត្រថៃនៅថ្ងៃចន្ទនេះ។

កាសែតថៃ Bangkok Post បានផ្សាយថា ព្រះមហាក្សត្រថៃ Maha Vajiralongkorn បានបញ្ជាឱ្យលុបចោលការប្រារព្ធពិធីខួបកំណើតរបស់ព្រះអង្គឈានចូលព្រះជន្ម ៧៣ព្រះវស្សា ដែលគ្រោងនឹងធ្វើឡើងនៅឯរាជវាំងថៃ នៅថ្ងៃទី២៨ និងថ្ងៃទី២៩ ខែកក្កដានេះ។ ការប្រកាសរំសាយរាជពិធីខូបកំណើត គួរណាស់តែរំសាយការវាយប្រហាររបស់យោធាថៃមកលើទឹកដីនៃប្រទេសកម្ពុជាដែរ ក្នុងថ្ងៃខួបកំណើតរបស់ទ្រង់៕

រ៉ាន់ រើយ

The post [វិភាគ] តើយោធាក្រោមបង្គាប់ស្តេចថៃ ប្រុងយកដីកម្ពុជា ធ្វើដង្វាយខួបកំណើតស្តេចរាមាទី១០ ដែលលើកបន្តុបខ្លួនឬ? appeared first on Kampuchea Thmey Daily.

តើស្តេចថៃ វ៉ាជីរ៉ាឡុងកន រាមាទី១០ ប្រមូលផ្តុំអំណាចយោធាដោយរបៀបណា?

Rann Reuy — Thu, 24 Jul 2025 10:23:40 +0000

អំឡុងពេល៩ឆ្នាំនៃការគ្រងរាជសម្បត្តិ ចាប់តាំងពីខែតុលាឆ្នាំ២០១៦មក មហាក្សត្រថៃ មហា វ៉ាជីរ៉ាឡុងកន រាមា ទី១០ (Maha Vajiralongkorn Rama X) ដែលមើលទៅហាក់ដូចជាស្ងប់ស្ងាត់ កម្រមានរាជឱង្កា ឬក៏វិធានការអ្វីដុំកំភួនក្នុងបញ្ហានយោបាយរបស់ប្រទេសថៃណាស់ ប៉ុន្តែមានការកត់សម្គាល់ថា មហាក្សត្រថៃបច្ចុប្បន្នបានប្រមូលផ្តុំអំណាចយ៉ាងខ្លាំងតាមរយៈការកែទម្រង់យោធាឲ្យស្ថិតនៅក្រោមអំណាចរបស់ព្រះអង្គ។

ការប្រមូលផ្តុំអំណាចយោធារបស់ស្តេចថៃ និងទំនាក់ទំនងរវាងអំណាចរាជបល្ល័ង្កនិងក្រុមយោធា បានបង្ហាញនូវភាពគួរឲ្យភ័យខ្លាចជាជាងក្តីស្រឡាញ់ (This is a relationship marked far more by fear than by lov)»។

នៅក្នុងសៀវភៅដែលមានចំណងជើងថា «A Soldier King: Monarchy and Military in the Thailand of Rama X» បោះពុម្ពកាលឆ្នាំ២០២២ របស់ លោក Supalak Ganjanakhundee ដែលជាអ្នកកាសែត និងជាអ្នកនិពន្ធ បានកត់សម្គាល់ពីការផ្លាស់ប្តូរក្នុងជូរកងទ័ពចាប់តាំងពីការឡើងគ្រងរាជរបស់ស្តេច វ៉ាជីរ៉ាឡុងកន រាមា ទី១០។

នៅក្នុងបុព្វកថារបស់គាត់ អ្នកនិពន្ធបានសរសេរថា៖«ក្រោមព្រះរាជាបច្ចុប្បន្នរបស់ប្រទេសថៃ យើងកំពុងឃើញនូវអ្វីដែលគួរឲ្យកត់សម្គាល់ នោះគឺការបង្កើតឡើងវិញនូវការនិយមចពោះបក្សពួក ក្រុមគ្រួសារ និងអ្នកស្មោះត្រង់។ តាមរយៈការបង្កើតកងទ័ពឯកជនដែលមានប្រភពមូលនិធិល្អ ទទួលខុសត្រូវចំពោះតែព្រះអង្គឯងតែម្នាក់ ព្រះចៅអធិរាជ វ៉ាជីរ៉ាឡុងកន បានគ្រប់គ្រងដោយត្រង់ និងផ្ទាល់ខ្លួន នៃផ្នែកសំខាន់ៗនៃកងកម្លាំងប្រដាប់អាវុធថៃ ដោយហេតុនេះ ដោយការរំលងរចនាសម្ព័ន្ធការិយាធិបតេយ្យរបស់រដ្ឋាភិបាល»។

មហា វ៉ាជីរ៉ាឡុងកន (Maha Vajiralongkorn) បានក្លាយទៅជាស្តេចថ្មីរបស់ប្រទេសថៃ បន្តវេនពីព្រះបីតា ព្រះអង្គម្ចាស់ ភូមិបុល អាឌុលយ៉ាដេតដែលសោយទីវង្គតកាលថ្ងៃទី១៣ខែតុលាឆ្នាំ២០១៦។ ព្រះអង្គម្ចាស់ភូមិបុល គឺជាស្តេចដែលសោជរាជ្យយូរជាងគេនៅលើពិភពលោក មុនពេលដែលទ្រង់បានសោយទិវង្គតក្នុងព្រះជន្មាយុ៨៨ឆ្នាំ បន្ទាប់សោយរាជសម្បត្តិអស់រយៈពេល៧០ឆ្នាំ។

អ្នកនិពន្ធជនជាតិថៃដែលមានកេរ្តិ៍ឈ្មោះ បោះសំឡេងជាអន្តរជាតិនេះ បានកត់សម្គាល់ដែរថា អ្វីដែលធ្វើឲ្យ មហាក្សត្របច្ចុប្បន្ន ខុសពីបិតារបស់ទ្រង់ គឺនៅត្រង់ថា «បិតាព្រះអង្គសិក្សាផ្នែកច្បាប់ និងចាប់អារម្មណ៍លើវិទ្យាសាស្ត្រ» ប៉ុន្តែមហាក្សត្របច្ចុប្បន្នវិញ គឹសិក្សាផ្នែកយោធាដោយផ្ទាល់»។ ការសិក្សាយោធានេះបានធ្វើឲ្យមហាក្សត្រអង្គបច្ចុប្បន្ននេះប្រមូលផ្តុំអំណាចយោធាយ៉ាងខ្លាំង ដោយតែងតាំង និងលើកតម្កើងតែអ្នកដែលស្និទ្ធនឹងព្រះអង្គឲ្យបម្រើតួនាទីកំពូលៗ។

សៀវភៅថ្មីរបស់ Supalak Ganjanakhundee គឺជាការរួមចំណែកដ៏សំខាន់ និងច្រើនក្នុងការចងក្រងឯកសារអំពីរបៀបដែលព្រះមហាក្សត្រថ្មីរបស់ប្រទេសថៃកំពុងរស់ឡើងវិញនូវការអនុវត្តនៃការគ្រប់គ្រងដាច់ខាត។ គាត់ពន្យល់ពីរបៀបដែលយោធារាជាធិបតេយ្យ ដោយបានឧបត្ថម្ភដល់ការរស់ឡើងវិញនៃសង្រ្គាមត្រជាក់នៃរាជានិយម ដើម្បីប្រឆាំងនឹងកុម្មុយនិស្ត និងធ្វើឱ្យការគ្រប់គ្រងរបស់ខ្លួនស្របច្បាប់ កាន់តែទទួលរងនូវភាពស្និទ្ធស្នាល និងតម្លៃនៃបុគ្គលតែមួយ។

អ្នកនិពន្ធ Supalak បានកំណត់ពីមូលហេតុ និងរបៀបដែលទំនាក់ទំនងយោធា-រាជាធិបតេយ្យបានផ្លាស់ប្តូរយ៉ាងខ្លាំងចាប់តាំងពីរជ្ជកាលរបស់ស្តេចអង្គមុន។ ដូចដែល អ្នកនិពន្ធ លោក ក្លឌីយ៉ូ សុប្រានសិទ្ធិ (Claudio Sopranzetti) បានបញ្ជាក់យ៉ាងច្បាស់នៅក្នុងអត្ថបទបុព្វកថា (Rama X, Yale University Press) ថា «នេះគឺជាទំនាក់ទំនងដែលត្រូវបានបង្ហាញ«ដោយការភ័យខ្លាចជាជាងដោយក្តីស្រឡាញ់ (This is a relationship marked far more by fear than by lov)»។

ទីមួយ មហាក្សត្រ វ៉ាជីរ៉ាឡុងកន ជាមន្ត្រីយោធាដែលមានជំនាញវិជ្ជាជីវៈ ដោយការអប់រំ និងការបណ្តុះបណ្តាល។ គាត់បានបញ្ចប់ការហ្វឹកហ្វឺនមន្រ្តីនៅ Royal Military College Duntroon របស់ប្រទេសអូស្ត្រាលី ដែលកាន់មុខតំណែងបញ្ជា ដូចជា កងឆ្មាំស្តេច បានទទួលការហ្វឹកហ្វឺនយោធានៅក្រៅប្រទេសបន្ថែមទៀត ហើយថែមទាំងបានឃើញសកម្មភាពខ្លីៗប្រឆាំងនឹងការបះបោរកុម្មុយនិស្តរបស់ប្រទេសថៃក្នុងទសវត្សរ៍ឆ្នាំ៧០ទៀតផង។

ទីពីរ សាវតាវិជ្ជាជីវៈនេះ រួមផ្សំជាមួយនឹងទំនោរផ្ទាល់ខ្លួនដែលរួមបញ្ចូលការមិនចាប់អារម្មណ៍គួរឱ្យកត់សម្គាល់នៅក្នុងដំណើរការប្រជាធិបតេយ្យ កំពុងសម្របសម្រួលផលប៉ះពាល់យ៉ាងសំខាន់លើកងកម្លាំងប្រដាប់អាវុធថៃ។ ការបង្កើតកងកម្លាំងឯកជនរបស់ មហា វ៉ាជីរ៉ាឡុងកន ទីបញ្ជាការសន្តិសុខរាជវង្ស រួមទាំងដោយការដាក់បញ្ចូលកងឆ្មាំរបស់ព្រះមហាក្សត្រចំនួនពីរ ដែលពីមុនស្ថិតនៅក្រោមបញ្ជាការកងទ័ពថៃ គឺជាការវិវឌ្ឍថ្មីៗដ៏សំខាន់ក្នុងជួរកងទ័ពថៃ។ ក្រៅពីនោះទៀត ក៏មានសេចក្តីបង្គាប់របស់ មហា វ៉ាជីរ៉ាឡុងកន ទាក់ទងនឹងការបណ្តុះបណ្តាលវិជ្ជាជីវៈយោធាផងដែរ។

តាមការចេញផ្សាយរបស់ Kyodo Review អ្នកនិពន្ធ Supalak បានរៀបរាប់យ៉ាងលម្អិត នៅត្រង់ទំព័រ៨៤ អំពីរបៀបដែល មហាក្សត្រថៃបច្ចុប្បន្នបានចែកចាយសៀវភៅណែនាំដល់សិស្សពលទាហាថ្មីៗ ដែលកំណត់ពីទស្សនវិជ្ជាបណ្តុះបណ្តាលរបស់គាត់ រួមទាំង «ការភ្ងំ (simmering)» ដែលសិល្បៈនៃការហ្វឹកហ្វឺនទាហានត្រូវបានប្រៀបធៀបទៅនឹងសិល្បៈនៃការចម្អិនអាហារ «khai pulo [ពងឆ្អិនក្នុងទឹកត្នោតផ្អែម]»។ ទីបំផុតមានការបង្កើតកម្មាភិបាលថ្មីរបស់ មហា វ៉ាជីរ៉ាឡុងកន ដែលគេហៅថា Kho Daeng ឬ «ទាហានជួរក្រហម» [ព្រោះពួកគេពាក់អាវយឺតជាមួយកអាវក្រហម]។ មន្ត្រីទាំងនេះបានបញ្ចប់ការសិក្សាពីវគ្គពិសេសរយៈពេលបីខែ ដែលពួកគេបានតាំងចិត្តចំពោះរាជានិយម ដែលជាក្រមសីលធម៌សម្រាប់អ្នកបម្រើក្នុងរាជវង្សដែលបានរស់ឡើងវិញពីសម័យនៃរបបរាជានិយមផ្តាច់ការ។

ទីបី ការលើកកម្ពស់ជួរកងកម្លាំងថ្មី (កម្មាភិបាលថ្មី) ឲ្យកាន់តំណែងជួរមុខសំខាន់ៗកំពុងផ្លាស់ប្តូរការពង្រឹងស្ថាប័ននៃទំនាក់ទំនងយោធាទៅរករាជានិយម។ មានការកត់សម្គាល់ដែរថា នៅក្រោម ស្តេចរាមាទី៩ (Rama IX) ដែលជាបិតារបស់ក្សត្របច្ចុប្បន្ន គឺព្រះអង្គបានសម្រុះសម្រួលទំនាក់ទំនងរបស់ទ្រង់ជាមួយយោធាជាចម្បងតាមរយៈក្រុមប្រឹក្សាមួយក្រុម (Privy Council) ដែលជារង្វង់នៃទីប្រឹក្សារបស់ព្រះមហាក្សត្រ។ ឥឡូវនេះ មហាក្សត្របច្ចុប្បន្ន ភាគច្រើនបានបដិសេធក្រុមប្រឹក្សាដែលធ្លាប់ដំណើរការ ដោយប្រគល់វាទៅឱ្យសហគមន៍ និងគម្រោងដែលផ្តួចផ្តើមដោយព្រះអង្គឯងទៅវិញ។ ឥឡូវនេះមហាក្សត្រ មានបណ្តាញផ្ទាល់ខ្លួនរបស់ព្រះអង្គ រួមមានមន្ត្រីដែលគាត់បានស្គាល់វិជ្ជាជីវៈ ក៏ដូចជាអ្នកដែលទើបនឹងចូលថ្មីដោយដំណើរការ kho Daeng៕

រ៉ាន់ រើយ

The post តើស្តេចថៃ វ៉ាជីរ៉ាឡុងកន រាមាទី១០ ប្រមូលផ្តុំអំណាចយោធាដោយរបៀបណា? appeared first on Kampuchea Thmey Daily.

បុត្រាទី ២ ស្ដេចថៃ ចង់យាងមកគង់នៅមាតុប្រទេសវិញ តែទ្រង់ស្នើឲ្យរដ្ឋាភិបាលសម្រួលរឿងមួយ

សាង ស្រីល័ក្ខ — Thu, 21 Mar 2024 09:18:11 +0000

យោងតាមកាសែតបាងកកប៉ុស្តិ៍បានឲ្យដឹងថា បុត្រារបស់ព្រះមហាក្សត្រថៃ Maha Vajiralongkorn ចង់យាងវិលមកគង់នៅមាតុប្រទេសកំណើតរបស់ទ្រង់វិញ បន្ទាប់ពីគង់ក្រៅប្រទេសអស់រយៈពេលជិតបីទសវត្សរ៍ ខណៈដែលទ្រង់ស្នើឲ្យរដ្ឋាភិបាលជួយធានាអត្តសញ្ញាណប័ណ្ណ និងលិខិតឆ្លងដែន។

បន្ទាប់ពីគង់នៅទីក្រុងញូវយ៉កអស់រយៈកាលយូរ ព្រះបុត្រាទី២ Vacharaesorn Vivacharawongse បានក្លាយជាជនបរទេស ហើយទ្រង់តែងតែប្រើប្រាស់លិខិតឆ្លងដែនសម្រាប់ដំណើរទស្សនកិច្ចរបស់ទ្រង់ទាំងបីលើក ទៅកាន់មាតុប្រទេសកំណើត ក្នុងរយៈពេល ៧ ខែមកនេះ។

យោងតាមរបាយការណ៍បានបញ្ចាក់ឲ្យដឹងទៀតថា បុត្រា Vacharaesorn មានព្រះបំណងចង់យាងមកប្រទេសថៃវិញ ជាមួយនឹងការគង់នៅជាអចិន្ត្រៃយ៍តែម្ដង ប៉ុន្តែការងាររបស់ទ្រង់ និងកត្តាផ្សេងទៀតត្រូវតែមានព្រះរាជតម្រិះ មុននឹងសម្រេចព្រះទ័យផ្លាស់ពីសហរដ្ឋអាមេរិក ។ បច្ចុប្បន្នទ្រង់បានធ្វើការជាមេធាវីនៅទីក្រុងញូវយ៉ក និងរដ្ឋផ្លរីដា អស់រយៈពេលប្រហែល ១៥ ឆ្នាំ ហើយឥឡូវនេះទ្រង់កំពុងធ្វើការជាអ្នកប្រឹក្សាផ្នែកច្បាប់ ជាពិសេសទ្រង់កំពុងព្រះរាជតម្រិះបង្កើតក្រុមហ៊ុនប្រឹក្សាយោបល់ ដើម្បីផ្តល់ប្រឹក្សាដល់ក្រុមហ៊ុនបរទេស ដែលកំពុងស្វែងរកការវិនិយោគនៅក្នុងប្រទេសថៃផងដែរ ។

ថ្វីបើយ៉ាងនេះក្ដី បុត្រាអង្គនេះបានមានព្រះបន្ទូលទៅកាន់កាសែតដដែលនៅក្នុងបទសម្ភាសន៍មួយថា ការយាងដំណើររបស់ទ្រង់កន្លងមក មានត្រឹមតែលក្ខណៈផ្ទាល់ខ្លួនប៉ុណ្ណោះ ហើយមិនមានរបៀបវារៈពិសេសអ្វីនោះទេ។ ស្របពេលដែល ព្រះរាជដំណើរទស្សនកិច្ចលើកដំបូងរបស់បុត្រា Vacharaesorn នៅក្នុងខែសីហា បានលេចវត្តមានព្រះអនុជយាងតាមក្រោយ។ ក្នុងដំណើរយាងមកកាន់ទឹកដីកំណើតលើកដំបូងរបស់ទ្រង់ បានបង្កើតការភ្ញាក់ផ្អើលយ៉ាងខ្លាំងពីសំណាក់ក្រុមអ្នកសារព័ត៌មានពិភពលោក។

សូមជម្រាបជូនថា ព្រះអង្គ Vacharaesorn គឺជាបុត្រាមួយអង្គក្នុងចំណោមបុត្រាទាំងប្រាំរបស់ស្តេច Maha Vajiralongkorn ជាមួយនឹងមហេសីទីពីរគឺព្រះនាង Sujarinee Vivacharawongse ដែលជាអតីតតារាសម្តែង ។ ក្រោយមក ទ្រង់ និងមាតារួមទាំងបុត្រា ៣ អង្គផ្សេងទៀត ត្រូវស្ដចថៃដកឋានៈ និងនិរទេសចេញពីទឹកដីកំណើត បន្ទាប់ពីលែងលះរបស់ព្រះបិតា និងព្រះមាតាក្នុងឆ្នាំ ១៩៩៦ ដោយទុកតែព្រះនាង Sirivannavari Nariratana ក្នុងនាមជាសែព្រះរាជវង្សានុវង្ស ហើយគង់នៅក្នុងប្រទេសថៃសព្វថ្ងៃនេះ ៕

អត្ថបទ៖ សាង ស្រីល័ក្ខ

The post បុត្រាទី ២ ស្ដេចថៃ ចង់យាងមកគង់នៅមាតុប្រទេសវិញ តែទ្រង់ស្នើឲ្យរដ្ឋាភិបាលសម្រួលរឿងមួយ appeared first on Kampuchea Thmey Daily.

ធ្វើមាតុប្រទេសលើកទី២ភ្លាម បុត្រារបស់ស្ដេចថៃ យាងគោរពព្រះវិញ្ញាណក្ខន្ធអតីតក្សត្រ Bhumibol ដោយឥតបង្អង់យូរ

សាង ស្រីល័ក្ខ — Tue, 05 Dec 2023 07:17:39 +0000

រាជបុត្រាទីពីររបស់ស្ដេច Maha Vajiralongkorn បានយាងមកដល់ប្រទេសថៃជាលើកទី២ដូចការគ្រោងទុក ហើយមិនបង្អង់យូរនៅពេលមកដល់ទឹកដីកំណើតភ្លាម ទ្រង់យាងទៅកាន់ព្រះបរមរាជវាំងដើម្បីគោរពវិញ្ញាណក្ខន្ធព្រះអង្គម្ចាស់ Bhumibol Adulyadej ។

តាមរយៈរូបភាពលើបណ្ដាញហ្វេសប៊ុកផ្ទាល់របស់ទ្រង់ Vacharaesorn Vivacharawongse ដែលជារូបភាពនៃការថ្វាយបង្គំព្រះរាជា Bhumibol Adulyadej នៅឧទ្យានព្រះបាទភូមិបុលអាឌុលយ៉ាដេត ក្នុងព្រះរាជពិធីបុណ្យចម្រើនព្រះជន្មរបស់ទ្រង់ នាថ្ងៃទី ០៥ខែ ធ្នូ ឆ្នាំ ២០២៣ ដោយបុត្រាបានសរសេរចំណងជើងពេញដោយអត្ថន័យថា “ទៅនិយាយជាមួយលោកតា។ ថ្វាយបង្ខំព្រះមហាក្សត្រ ព្រះបាទភូមិបុលអាឌុលយ៉ាដេត ព្រះករុណាដ៏អស្ចារ្យ ក្នុងព្រះរាជពិធីបុណ្យចម្រើនព្រះជន្ម ៥ធ្នូ”។

ទន្ទឹមនោះទៀតសោត ដូចអ្វីដែលបុត្រា Vacharaesorn Vivacharawongse ធ្លាប់មានបន្ទូលកាលនៅអាមេរិកប្រាប់មនុស្សជិតស្និតយ៉ាងដូច្នោះ។ បន្ទាប់ពីគោរពព្រះអង្គម្ចាស់ Bhumibol Adulyadej រួចរាល់ ទ្រង់បានយាងដំណើរបន្តទៅបំពេញរាជកិច្ចផ្ទាល់ព្រះកាយ ក្រោមការបង្ហាញពីអ្នកហែហមជាមួយទ្រង់យ៉ាងច្រើនកុះករ។

ត្បិតថាដំណើររបស់រាជបុត្រាជាលើកទីពីរមិនដូចលើកទីមួយក្ដី តែការបង្ហាញព្រះភ័ក្ររបស់ទ្រង់បានក្លាយជាទីពេញចិត្តរបស់មនុស្សគ្រប់គ្នា។ ហើយបើទោះបីជាបុត្រាទីពីរអង្គនេះមិនមែនជាសែរាជវង្សដូចកាលពីមុនក៏ដោយ ប៉ុន្តែវត្តមានរបស់ទ្រង់ បានក្លាយជារឿងកក់ក្ដៅសម្រាប់ប្រជាជនទាំងអស់។

ទោះយ៉ាងណាក៏ដោយ ការលេចនូវវត្តមានរបស់បុត្រាទីពីររបស់ព្រះរាជា Maha Vajiralongkorn នៅជាការភ្ញាក់ផ្អើលរបស់មនុស្សទូទាំងពិភពលោក និងប្រព័ន្ធផ្សព្វផ្សាយធំៗមកទល់សព្វថ្ងៃ។ ជាពិសេសប្រជានុរាស្រ្តថៃ តែងតែទន្ទឹងការយាងវិលត្រលប់មកកាន់ទឹកដីកំណើត ដែលទ្រង់គង់និរទេសអស់រយៈពេលជាង២៧ឆ្នាំឯណោះ៕

ប្រែសម្រួល៖ សាង ស្រីល័ក្ខ

ប្រភព៖dailynews

ចុចអាន៖លេចវត្តមានព្រះរាជបុត្រាថៃ Vacharaesorn វិលចូលមាតុភូមិលើកទី ២

The post ធ្វើមាតុប្រទេសលើកទី២ភ្លាម បុត្រារបស់ស្ដេចថៃ យាងគោរពព្រះវិញ្ញាណក្ខន្ធអតីតក្សត្រ Bhumibol ដោយឥតបង្អង់យូរ appeared first on Kampuchea Thmey Daily.

លេចវត្តមានព្រះរាជបុត្រាថៃ Vacharaesorn វិលចូលមាតុភូមិលើកទី ២

សាង ស្រីល័ក្ខ — Mon, 04 Dec 2023 03:56:40 +0000

សារព័ត៌មាន thairath បានរាយការណ៍ថា ព្រះបុត្រាទីពីរ Vacharaesorn Vivacharawongse នឹងយាងត្រលប់ចូលប្រទេសថៃនៅថ្ងៃទី០៤ ខែធ្នូ ឆ្នាំ២០២៣ ដូចការគ្រោងទុក ដោយលើកនេះទ្រង់មកបំពេញកិច្ចការងារផ្ទាល់ខ្លួនតែប៉ុណ្ណោះ។

ក្នុងដំណើរយាងមកដល់ប្រទេសថៃជាលើកទីពីររបស់បុត្រាស្ដេច Maha Vajiralongkorn លើកនេះត្រូវបានគេដឹងថាជាដំណើរផ្ទាល់ខ្លួនដោយទ្រង់មានបំណងចូលរួមសកម្មភាពគោរពវិញ្ញាណក្ខន្ធព្រះករុណា ព្រះមហាក្សត្រ ភូមិបុល អាឌុលយ៉ាដេត និងធ្វើសកម្មភាពក្នុងថ្ងៃបុណ្យបិតាជាតិ ៥ ធ្នូ រួមទាំងការយាងទៅខេត្តនានា។ ស្របពេលដែលគេរំពឹងថាទ្រង់នឹងគង់នៅទឹកដីកំណើតរយៈពេល ២ សប្តាហ៍ឯណោះ។

លើសពីនេះថែមទៀតដែរ ព្រះបុត្រា Vacharaesorn បានមានព្រះបន្ទូលប្រាប់អ្នកជិតស្និទ្ធកាលពីនៅសហរដ្ឋអាមេរិកថា ទ្រង់យាងមកលើកនេះព្រោះចង់ធ្វើដំណើរទៅខេត្តជាច្រើន ប៉ុន្តែមិនបានបញ្ចាក់លម្អិតនោះទេ។ ក្នុងនោះទ្រង់ចង់ទៅបែបសាមញ្ញដោយមិនមានអ្នកហែរហមច្រើនឡើយ។

សូមរម្លឹកដែរថា កាលពីថ្ងៃទី ០៧ ខែសីហា ឆ្នាំ ២០០៣បុត្រាទីពីររបស់ស្ដេចថៃអង្គនេះ បានធ្វើដំណើរយាងត្រឡប់ទៅប្រទេសថៃវិញជាលើកដំបូងក្នុងរយៈពេល ២៧ ឆ្នាំ នៅពេលនោះទ្រង់បានធ្វើដំណើរទៅថ្វាយបង្គំព្រះពុទ្ធរូប និងវត្ថុស័ក្តិសិទ្ធិជាច្រើនតាមវត្តអារាម ព្រះបរមរាជវាំង និងទីសក្ការៈបូជាក្នុងក្រុង។ ក្រោយមកទ្រង់បានបានបង្ហោះរូបមួយសន្លឹកលើទំព័រហ្វេសប៊ុកផ្ទាល់ឈ្មោះ Vacharaesorn Vivacharawongse ពេលកំពុងគង់លើតុកតុក ព្រមទាំងបានសោយគុយទាវជាមួយក្រុមធ្វើដំណើរ ដែលហេតុការណ៍នេះត្រូវបានបង្ហោះក្នុងឃ្លិបដោយអ្នកយកព័ត៌មាន Wassana Nanum ។

ទោះយ៉ាងណាក៏ដោយ ការយាងត្រលប់ចូលប្រទេសថៃរបស់បុត្រា Vacharaesorn Vivacharawongse បានធ្វើឲ្យប្រព័ន្ធផ្សព្វផ្សាយធំៗភ្ញាក់ផ្អើលយ៉ាងខ្លាំង ខណៈនៅលើគេហទំព័រ X ប្រជាជនជាច្រើនបានបង្កើត hashtag គាំទ្រទ្រង់ជាង ៣៩០,០០០ ដង ហើយដំណើរទស្សនកិច្ចរបស់ទ្រង់បានទទួលការចាប់អារម្មណ៍ខ្លាំង ទាំងក្នុងប្រព័ន្ធផ្សព្វផ្សាយក្នុងស្រុក និងអន្តរជាតិរួមមាន CNN, BBC និង Reuters៕

ប្រែសម្រួល៖ សាង ស្រីល័ក្ខ

ចុចអាន៖ការយាងចូលមកមាតុភូមិរបស់បុត្រាស្ដេច ថៃ ដែលគង់និរទេស២៧ឆ្នាំ បង្កើតភាពភ្ញាក់ផ្អើលពីសារព័ត៌មានពិភពលោក

The post លេចវត្តមានព្រះរាជបុត្រាថៃ Vacharaesorn វិលចូលមាតុភូមិលើកទី ២ appeared first on Kampuchea Thmey Daily.

ព្រះមហាក្សត្រ ថៃ មានព្រះបន្ទូលទៅកាន់ប្រជារាស្ត្រ ពាក់ព័ន្ធស្ថានភាពនយោបាយក្នុងប្រទេស

Sok Chivon — Sat, 29 Jul 2023 05:01:43 +0000

ទីបំផុត ព្រះមហាក្សត្រថៃ មហា វ៉ាជីរ៉ាឡុងកន បានយាងចេញមក និងមានព្រះបន្ទូលទៅកាន់ប្រជារាស្ត្រអំពីស្ថានភាពនយោបាយក្នុងប្រទេសបច្ចុប្បន្ន ក្នុងអំឡុងព្រះរាជពិធីចម្រើនព្រះជន្មគម្រប់ ៧១ ព្រះវស្សារបស់ព្រះអង្គ ។

មានព្រះបន្ទូលនៅឯរាជបល្ល័ង Amarindra Vinijaya ក្នុងព្រះបរមរាជវាំង ព្រះអង្គបានសម្ដែងព្រះទ័យដាស់តឿនដល់ប្រជារាស្ត្រថៃទាំងអស់ឲ្យប្រើប្រាជ្ញា និងការវិនិច្ឆ័យ ហើយតាំងចិត្តធ្វើអ្វីដែលត្រឹមត្រូវ មិនត្រឹមតែជាប្រយោជន៍ផ្ទាល់ខ្លួនប៉ុណ្ណោះទេ ប៉ុន្តែថែមទាំងជាប្រយោជន៍ដល់អ្នកដទៃផងដែរ ។

ព្រះអង្គម្ចាស់ មហា វ៉ាជីរ៉ាឡុងកន មានព្រះបន្ទូលទៀតថា ព្រះរាជកិច្ចដើម្បីនាំមកនូវភាពរីកចម្រើនរបស់ប្រទេសជាតិ គឺជាព្រះរាជកិច្ចការដ៏សំខាន់បំផុត ហើយទាមទារនូវអភិបាលកិច្ចល្អ និងឆ្លាតវៃដូចគ្នាផងដែរ ជាពិសេសការគាំទ្រពីប្រជាជាតិទាំងមូលតែម្ដង ។

ជាចុងក្រោយព្រះអង្គម្ចាស់បញ្ជាក់ថា “ខ្ញុំសូមជូនពរឲ្យអស់លោកដែលកាន់មុខតំណែងសំខាន់ៗក្នុងស្ថាប័នធំៗ ក៏ដូចជាប្រជានុរាស្ត្រ ធ្វើអ្វីតាមប្រាជ្ញា និងការវិនិច្ឆ័យ តាំងចិត្តក្នុងការអនុវត្តការងារដែលល្អ និងត្រឹមត្រូវសម្រាប់ខ្លួន និងអ្នកដទៃ ហើយលទ្ធផលនៃសកម្មភាពទាំងនេះនឹងនាំទៅរកភាពរីកចម្រើនរបស់ប្រទេសជាតិ និងសន្តិភាព និងសុភមង្គលរបស់ប្រជាពលរដ្ឋ” ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ តុលាការធម្មនុញ្ញ ថៃ ដាក់ថ្ងៃប្រកាសគាំទ្រ ឬបដិសេធញត្តិឲ្យលោក Pita ឈរឈ្មោះនាយករដ្ឋមន្ត្រីជុំទី២ ឬអត់

The post ព្រះមហាក្សត្រ ថៃ មានព្រះបន្ទូលទៅកាន់ប្រជារាស្ត្រ ពាក់ព័ន្ធស្ថានភាពនយោបាយក្នុងប្រទេស appeared first on Kampuchea Thmey Daily.

ការប្រគំតន្ត្រីរបស់ BLACKPINK ទាក់ទាំងព្រះទ័យព្រះរៀមរបស់ស្ដេចថៃ មហា វ៉ាជីរ៉ាឡុងកន យាងទតផ្ទាល់

សាង ស្រីល័ក្ខ — Mon, 09 Jan 2023 06:56:51 +0000

ព្រះនាង Ubolratana Rajakanya ជាព្រះរៀមស្ដេចថៃ ត្រូវបានគេប្រទះឃើញទ្រង់យាងមកទតផ្ទាល់ការប្រគំតន្ត្រីទេសចរណ៍អាស៊ីរបស់ក្រុម BLACKPINK ដែលប្រព្រឹត្តទៅនៅពហុកីឡដ្ឋានជាតិ កាលពីល្ងាចថ្ងៃទី ៧ ខែមករា កន្លងទៅ ។

នៅលើបណ្ដាញ SNS ព្រះនាង Ubolratana Rajakanya ដែលជាព្រះរៀមរបស់ព្រះមហាក្សត្រ មហា វ៉ាជីរ៉ាឡុងកន បានបង្ហោះរូបថតមួយសន្លឹកជាមួយនឹងអំពូលភ្លើង (light stick blackpink) តំណាងឲ្យក្រុម BLACKPINK ខណៈការបង្ហាញខ្លួនរបស់ទ្រង់បានជះឥទ្ធិពលពិសេស ធ្វើឲ្យអ្នកលេងអ៊ីនធឺណិតរំភើបចិត្ត និងភ្ញាក់ផ្អើល ហើយចូលទៅបញ្ចេញមតិព្រាត។

សូមរម្លឹកដែរថា ជំទាវទីមួយបារាំង Brigitte Macron ក៏ទើបតែបានចូលរួមការប្រគុំតន្ត្រី Born Pink នៅទីក្រុងប៉ារីស កាលពីថ្ងៃទី ១២ ខែធ្នូ ឆ្នាំ ២០២២។ នេះសបញ្ជាក់ឲ្យឃើញថា ឥទ្ធិពលរបស់ BLACKPINK បានហួសពីឧស្សាហកម្មកម្សាន្ត មិនត្រឹមតែមានអ្នកគាំទ្រធម្មតាបានចូលរួមនោះទេ សូម្បីតែព្រះរៀមរបស់ស្តេចថៃ ក៏មានវត្តមានផងដែរ៕

ប្រែសម្រួល៖ សាង ស្រីល័ក្ខ

ចុចអាន៖អ្នកគាំទ្របារម្ភ Jennie ក្រោយកាំជ្រួចបាញ់ចំនាងពេលកំពុងប្រគំតន្ត្រី នៅ ថៃ

The post ការប្រគំតន្ត្រីរបស់ BLACKPINK ទាក់ទាំងព្រះទ័យព្រះរៀមរបស់ស្ដេចថៃ មហា វ៉ាជីរ៉ាឡុងកន យាងទតផ្ទាល់ appeared first on Kampuchea Thmey Daily.

Maha Vajiralongkorn Archives - Kampuchea Thmey Daily

​​​​​​​​​ស្វែងយល់រាជដំណើរ​ទស្សនកិច្ច​របស់មហាក្សត្រថៃ​ទៅកាន់​មហាយក្សចិន​ពេលនេះ​​

​​​​តើ​ស្តេច​ថៃ វ៉ាជីរ៉ាឡុងកន រាមាទី​១០ ​​ប្រមូលផ្តុំអំណាច​យោធា​ដោយ​របៀបណា?​

បុត្រាទី ២ ស្ដេចថៃ ចង់យាងមកគង់នៅមាតុប្រទេសវិញ តែទ្រង់ស្នើឲ្យរដ្ឋាភិបាលសម្រួលរឿងមួយ

ធ្វើមាតុប្រទេសលើកទី២ភ្លាម បុត្រារបស់ស្ដេចថៃ យាងគោរពព្រះ​វិញ្ញាណក្ខន្ធ​អតីតក្សត្រ Bhumibol ដោយឥតបង្អង់យូរ

លេចវត្តមានព្រះរាជបុត្រាថៃ Vacharaesorn វិលចូលមាតុភូមិលើកទី ២

ព្រះមហាក្សត្រ ថៃ មានព្រះបន្ទូលទៅកាន់ប្រជារាស្ត្រ ពាក់ព័ន្ធស្ថានភាពនយោបាយក្នុងប្រទេស

ការប្រគំតន្ត្រីរបស់ BLACKPINK ទាក់ទាំងព្រះទ័យព្រះរៀមរបស់ស្ដេចថៃ មហា វ៉ាជីរ៉ាឡុងកន យាងទតផ្ទាល់

ស្វែងយល់រាជដំណើរទស្សនកិច្ចរបស់មហាក្សត្រថៃទៅកាន់មហាយក្សចិនពេលនេះ

តើស្តេចថៃ វ៉ាជីរ៉ាឡុងកន រាមាទី១០ ប្រមូលផ្តុំអំណាចយោធាដោយរបៀបណា?

ធ្វើមាតុប្រទេសលើកទី២ភ្លាម បុត្រារបស់ស្ដេចថៃ យាងគោរពព្រះវិញ្ញាណក្ខន្ធអតីតក្សត្រ Bhumibol ដោយឥតបង្អង់យូរ