Mason Greenwood Archives - Kampuchea Thmey Daily

Ronaldo ទទូចឱ្យ Al-Nassr ចុះកុងត្រាយកអតីតមិត្តរួមក្រុមនៅ Man United ម្នាក់

Kosal Sem — Tue, 05 Aug 2025 07:53:03 +0000

ប្រធានក្រុម Cristiano Ronaldo បានទទូចឱ្យក្លិប Al-Nassr នាំយកអតីតមិត្តរួមក្រុមរបស់ខ្លួននៅ Manchester United គឺកីឡាករ Mason Greenwood មករួមក្រុមជាមួយខ្លួននៅរដូវកាលថ្មី។ នេះបើតាមការចុះផ្សាយដោយសារព័ត៌មាន អេស្ប៉ាញ Marca។

Cristiano Ronaldo

ថ្មីៗនេះក្លិប Al-Nassr ទើបតែចុះកិច្ចសន្យាយកបាន Joao Felix ពីក្លិប Chelsea ក្នុងតម្លៃ ៥៧.៧៦ លានដុល្លារអាមេរិក បូកជាមួយលក្ខខណ្ឌបន្ថែមទឹកប្រាក់នៅពេលក្រោយចំនួន ៥៧.៧៦ លានដុល្លារអាមេរិកទៀត។ ទោះបីជាយ៉ាងណា ប្រធានក្រុម Ronaldo នៅតែមានបំណងចង់ឱ្យក្លិបយកកីឡាករដែលមានសក្តានុពលពីតំបន់ អឺរ៉ុប បន្ថែមទៀត ដើម្បីមកជួយក្រុម ក្នុងការប្រជែងពាននៅរដូវកាលថ្មី ២០២៥-២០២៦។

Joao Felix ផ្លាស់ទៅកាន់ Al-Nassr

ខ្សែប្រយុទ្ធសញ្ជាតិ ព័រទុយហ្គាល់ វ័យ ៤០ ឆ្នាំ បានសម្លឹងឃើញ Greenwood ជាកីឡាករដ៏សក្តិសម ដើម្បីមករួមក្រុមជាមួយខ្លួននៅរដូវកាលថ្មី ខណៈអ្នកទាំង ២ ធ្លាប់បានលេងក្នុងក្រុមជាមួយគ្នាម្តងរួចមកហើយ អំឡុងពេលនៅ Man United ចន្លោះពីឆ្នាំរដូវកាលក្តៅឆ្នាំ ២០២១ ដល់ចុងឆ្នាំ ២០២២។

Ronaldo និង Greenwood

គួរឱ្យដឹងថា កាលពីរដូវកាលមុន ២០២៤-២០២៥ ខ្សែប្រយុទ្ធសញ្ជាតិ អង់គ្លេស វ័យ ២៣ ឆ្នាំ ពិតជាបង្ហាញសមត្ថភាពលេចធ្លោរមែនទែនជាមួយក្រុម Marseille ដោយរូបគេបង្ហាញខ្លួនបានចំនួន ៣៦ ប្រកួត រកបាន ២២ គ្រាប់ និង ៦ បញ្ជូន (assist)៕

Greenwood

ប្រែសម្រួល៖ សេម កុសល
ប្រភព៖ Sportskeeda

The post Ronaldo ទទូចឱ្យ Al-Nassr ចុះកុងត្រាយកអតីតមិត្តរួមក្រុមនៅ Man United ម្នាក់ appeared first on Kampuchea Thmey Daily.

Man United នឹងសម្រេចចិត្តជាថ្មីលើអនាគតរបស់ Greenwood

Pha Rothana — Thu, 22 Feb 2024 07:23:01 +0000

អនាគតរបស់កីឡាករ Mason Greenwood សម្រាប់ការវិលត្រឡប់ចូលរួម Manchester United វិញអាចត្រូវបានកំណត់ជាក់លាក់ បន្ទាប់ពីក្លិបនិងថ្នាក់ដឹកនាំគ្រោងធ្វើការសម្រេចចិត្ត។

ម្ចាស់ភាគហ៊ុន លោក Jim Ratcliffe និយាយថា Manchester United នឹងធ្វើការសម្រេចចិត្តថ្មីពីអនាគតរបស់ Mason Greenwood។ កីឡាករវ័យ២២ឆ្នាំ ត្រូវបានក្លិបលែងផ្ដល់សេចក្តីទុកចិត្ត បន្ទាប់ពីរូបគេជាប់ទោសពីបទប៉ុនប៉ងរំលោភដោយបង្ខិតបង្ខំ។

លោក Jim Ratcliffe បាននិយាយថា ៖«បាទយើងនឹងធ្វើការសម្រេចចិត្ត។ យើងនឹងបង្ហាញពីភាពត្រឹមត្រូវ។ គាត់ជាកីឡាកររបស់ Manchester United ដូច្នេះយើងទទួលខុសត្រូវលើការសម្រេចចិត្ត។ មកទល់ពេលនេះយើងមិនទាន់សម្រេចអ្វីជាក់លាក់ទេ។ គាត់កំពុងត្រូវបានខ្ចីជើង ប៉ុន្តែគាត់មិនមែនជាកីឡាករតែម្នាក់ដែលត្រូវដោះស្រាយនោះទេ។ យើងមានកីឡាករពីរបីនាក់ដែលយើងត្រូវដោះស្រាយ»។

ដំណឹងពីការសម្រេចចិត្តនេះ អ្នកគាំទ្រខ្លះសប្បាយចិត្ត និងមានអ្នកខ្លះក៏មិនគាំទ្រ ។ បច្ចុប្បន្នកីឡាករកំពុងលេងយ៉ាងល្អនៅក្លិប Getafe ក្នុងលក្ខខណ្ឌខ្ចីជើងរបស់ក្លិបអេស្ប៉ាញ។

លោក Jim Ratcliffe បានបន្ថែមថា ៖«ដំណើរការនេះគឺយើងត្រូវស្វែងយល់ការពិត។ មិនមែនជាការឃោសនាបំផ្លើស ហើយបន្ទាប់មកព្យាយាមសម្រេចចិត្តដោយយុត្តិធម៌ ដោយផ្អែកលើតម្លៃជាមូលដ្ឋានថា គាត់ជាបុរសល្អឬអត់។ចម្លើយគឺថា គាត់អាចលេងឲ្យក្រុម Man United អាស្រ័យលើភាពស្មោះត្រង់ឬអត់»៕

ប្រែសម្រួល៖ ផា រតនា
ប្រភព៖ Theathletic

The post Man United នឹងសម្រេចចិត្តជាថ្មីលើអនាគតរបស់ Greenwood appeared first on Kampuchea Thmey Daily.

កីឡាករ Man United មិនចង់ឲ្យ Greenwood ត្រលប់មករួមក្រុមវិញ

អ៊ិន ពិសី — Tue, 07 Feb 2023 06:36:39 +0000

កីឡាកររបស់ក្លិប Manchester United ត្រូវបានគេរាយការណ៍ថា ប្រឆាំងនឹងគំនិត នៃការស្វាគមន៍ Mason Greenwood ត្រលប់មករួមក្រុមវិញ សម្រាប់រដូវកាលដែលនៅសល់។

យុវជនវ័យ ២១ ឆ្នាំរូបនេះ នឹងត្រូវកាត់ទោសនៅខែវិច្ឆិកា ក្រោមបទចោទប៉ុនប៉ងរំលោភសេពសន្ថវៈ ដោយមានការបង្ខិតបង្ខំ និងគ្រប់គ្រងអាកប្បកិរិយា និងការវាយដំបង្កគ្រោះថ្នាក់ដល់រាងកាយ។

ការចោទប្រកាន់ទាំងអស់ទាក់ទងនឹងស្ត្រីដូចគ្នាដែលបានបង្ហោះការចោទប្រកាន់ជាបន្តបន្ទាប់លើបណ្ដាញអ៊ីនធឺណិតប្រឆាំងនឹង Greenwood ក្នុងខែមករា ឆ្នាំ ២០២២ ហើយខ្សែប្រយុទ្ធត្រូវបានចាប់ខ្លួនភ្លាមៗដោយសង្ស័យពីបទរំលោភសេពសន្ថវៈ និងការរំលោភបំពាន។

Man United បានព្យួរ Greenwood រហូតដល់មានការជូនដំណឹងបន្ថែម ហើយបន្ទាប់មកគេត្រូវបានចាប់ខ្លួនបន្ថែមទៀតពីបទសង្ស័យ ពីបទរំលោភផ្លូវភេទ និងគំរាមកំហែងសម្លាប់ មុនពេលត្រូវបានដោះលែងឲ្យនៅក្រៅឃុំ។

ទោះបីជាយ៉ាងណាក៏ដោយ ការចោទប្រកាន់ទាំងអស់ប្រឆាំងនឹង Greenwood ត្រូវបានរួចទាំងអស់នៅដើមសប្ដាហ៍នេះ ហើយបច្ចុប្បន្ន Man United កំពុងធ្វើការស៊ើបអង្កេតផ្ទៃក្នុងរបស់ពួកគេ មុនពេលសម្រេចចិត្តលើការផ្លាស់ប្ដូរបន្ទាប់របស់ពួកគេ។

អតីតកីឡាករជម្រើសជាតិអង់គ្លេស ត្រូវបានបញ្ចូលក្នុងបញ្ជីក្រុមដែលធ្វើបច្ចុប្បន្នភាព Premier League របស់បិសាចក្រហមបន្ទាប់ពីបញ្ចប់ទីផ្សារដោះដូរកីឡាករខែមករា ប៉ុន្តែយោងទៅតាម The Sun កូនក្រុមរបស់ លោក Erik ten Hag មិនចាប់អារម្មណ៍លើគំនិត នៃការត្រឡប់មកវិញរបស់គេទេ ដោយសារតែឥទ្ធិពលដែលវាអាចប៉ះពាល់ដល់ភាពសុខដុមរមនារបស់ក្រុម។

ប្រភពមួយផ្សាយថា “កីឡាករបើកចំហឲ្យគាត់ត្រលប់ទៅក្រុមវិញ ប៉ុន្តែការត្រួតពិនិត្យអាចរំខានយ៉ាងខ្លាំង។ បន្ទប់ស្លៀកពាក់គឺរីករាយបំផុតដែលវាធ្លាប់មានជាច្រើនឆ្នាំ ហើយគ្មាននរណាម្នាក់ចង់រញ្ជួយទូកទេ”។

គ្មាន Greenwood ក្នុងក្រុម ក៏ Man United អាចរកបាន ៤២ ពិន្ទុ ពី ២១ ប្រកួត Premier League នៅរដូវកាលនេះ ដើម្បីឈរនៅលេខរៀងទី ៣ ក្នុងតារាង ពោលគឺតាមពីក្រោយក្រុមកំពូលតារាង Arsenal ចំនួន ៨ ពិន្ទុ និងទាបជាងក្រុម Manchester City ត្រឹមតែ ៣ ពិន្ទុប៉ុណ្ណោះ។

ក្រុមរបស់លោក Ten Hag បានកត់ត្រាជ័យជម្នះក្នុងដី ជាលើកទី ៦ ជាប់ៗគ្នារបស់ពួកគេក្នុងក្របខ័ណ្ឌកំពូលជាមួយនឹងជ័យជម្នះ ២-១ លើក្រុម Crystal Palace កាលពីថ្ងៃសៅរ៍ ប៉ុន្តែ Greenwood នៅតែទទួលបានប្រាក់ឈ្នួល ១០០,០០០ ផោន ក្នុងមួយសប្ដាហ៍ ខណៈគេនៅតែត្រូវបានព្យួរ។

គួរដឹងដែរថា Man United បាននិយាយនៅក្នុងសេចក្ដីថ្លែងការណ៍ផ្ទាល់ខ្លួនរបស់ពួកគេថា ពួកគេនឹងមិនធ្វើអត្ថាធិប្បាយបន្ថែមទេរហូតដល់ដំណើរការផ្ទៃក្នុងរបស់ពួកគេត្រូវបានបញ្ចប់-មតិដែលត្រូវបានធ្វើម្តងទៀតដោយ Ten Hag នៅក្នុងសន្និសីទសារព័ត៌មានកាលពីសប្ដាហ៍មុន។

Ten Hag បានប្រាប់អ្នកយកព័ត៌មានថា “នៅពេលនេះខ្ញុំមិនអាចផ្ដល់ការអត្ថាធិប្បាយអំពីដំណើរការបានទេ។ ខ្ញុំមិនអាចនិយាយអ្វីអំពីវាបានទេ។ ខ្ញុំយោងទៅលើសេចក្ដីថ្លែងការណ៍របស់ក្លិប ហើយនៅពេលនេះខ្ញុំមិនអាចបន្ថែមអ្វីបានទេ”។

សេចក្ដីថ្លែងការណ៍មួយក៏ត្រូវបានចេញផ្សាយក្នុងនាមលោក Greenwood បន្ទាប់ពីករណីរបស់គេត្រូវបានបញ្ឈប់ ដែលសរសេរថា “ខ្ញុំមានអារម្មណ៍ធូរស្រាលដែលបញ្ហានេះបានបញ្ចប់ ហើយខ្ញុំសូមអរគុណដល់ក្រុមគ្រួសារ មិត្តភ័ក្ដិ និងមិត្តភ័ក្ដិរបស់ខ្ញុំសម្រាប់ការគាំទ្ររបស់ពួកគេ។ នៅពេលនេះ”។

Greenwood រកបាន ៣៥ គ្រាប់ និង assists ១២ ដង ក្នុងចំណោម ១២៩ ប្រកួត សម្រាប់ Man United ហើយការបង្ហាញខ្លួនចុងក្រោយរបស់គេសម្រាប់ក្លិបបានឈ្នះ ១-០ លើក្រុម West Ham United កាលពីថ្ងៃទី ២២ ខែមករាឆ្នាំមុន៕

ប្រភព ៖ The Sun

អត្ថបទ ៖ មន្នីរ័ត្ន

The post កីឡាករ Man United មិនចង់ឲ្យ Greenwood ត្រលប់មករួមក្រុមវិញ appeared first on Kampuchea Thmey Daily.

ខ្សែប្រយុទ្ធ Man United រួចផុតពីការចោទប្រកាន់ទាំងអស់ប្រឆាំងនឹងបទប៉ុនប៉ងរំលោភ

អ៊ិន ពិសី — Fri, 03 Feb 2023 02:15:12 +0000

ខ្សែប្រយុទ្ធ Mason Greenwood របស់ក្លិប Man Utd បានប្រឈមមុខនឹងការចោទប្រកាន់ពីបទប៉ុនប៉ងរំលោភ ការគ្រប់គ្រង និងអាកប្បកិរិយាបង្ខិតបង្ខំ និងការរំលោភ។ យ៉ាងណាមិញ ភ្នាក់ងារ CPS បាននិយាយថា “ការរួមបញ្ចូលគ្នា នៃការដកខ្លួនសាក្សីសំខាន់ៗ និងសម្ភារៈថ្មីដែលបានបំភ្លឺមានន័យថា លែងមានលទ្ធភាពជាក់ស្ដែង នៃការផ្ដន្ទាទោសទៀតហើយ”។

ខ្សែប្រយុទ្ធវ័យ ២១ ឆ្នាំរូបនេះ បានប្រឈមមុខនឹងការចោទប្រកាន់ពីបទប៉ុនប៉ងរំលោភ ការគ្រប់គ្រង និងអាកប្បកិរិយាបង្ខិតបង្ខំ និងការរំលោភ។ បទចោទទាំង ៣ ទាក់ទងនឹងស្ត្រីដូចគ្នា។

សេវាអយ្យការកាត់ក្ដី (CPS) បាននិយាយថា ខ្លួនមាន”កាតព្វកិច្ចបញ្ឈប់សំណុំរឿង”បន្ទាប់ពី” ការដកសាក្សីសំខាន់ៗ និងសម្ភារៈថ្មីមកបំភ្លឺ”។ គេបានបន្ថែមថា ការវិវឌ្ឍន៍ទាំងនោះមានន័យថា “មិនមានការរំពឹងទុកជាក់ស្ដែង នៃការផ្ដន្ទាទោស”ទៀតទេ។

“នៅក្នុងកាលៈទេសៈទាំងនេះ យើងស្ថិតនៅក្រោមកាតព្វកិច្ចដើម្បីបញ្ឈប់ករណីនេះ។ យើងបានពន្យល់ពីការសម្រេចចិត្តរបស់យើងទៅកាន់គ្រប់ភាគីទាំងអស់”។

គួរដឹងដែរថា ការស៊ើបអង្កេតបានចាប់ផ្ដើមជាងមួយឆ្នាំមុន គឺក្នុងខែមករា ឆ្នាំ ២០២២។ កាលបរិច្ឆេទកាត់ក្ដី ត្រូវបានកំណត់សម្រាប់ថ្ងៃទី ២៧ ខែវិច្ឆិកា ឆ្នាំនេះ។

សេចក្ដីថ្លែងការណ៍របស់ក្លិប Manchester United ក៏បានសរសេរថា “Manchester United កត់សម្គាល់ការសម្រេចចិត្តរបស់សេវាកាត់ក្ដីរបស់សេវាអយ្យការកាត់ក្ដី ដែលដកការចោទប្រកាន់ទាំងអស់ប្រឆាំងនឹង Mason Greenwood។ ឥឡូវនេះ ក្លិប នឹងដំណើរការដោយខ្លួនឯង មុនពេលកំណត់ជំហានបន្ទាប់។ យើងនឹងមិនធ្វើអត្ថាធិប្បាយណាមួយបន្ថែមទៀតទេ រហូតដល់ដំណើរការនោះបានបញ្ចប់”។

Greenwood ត្រូវបានគេយល់ឃើញថា នឹងមិនត្រលប់មកហ្វឹកហាត់ ឬលេងវិញទេ ខណៈពេលដំណើរការនេះកំពុងធ្វើឡើង។

កាលពីថ្ងៃទី ៣០ ខែមករា ឆ្នាំមុន United បានប្រកាសថា គេនឹងមិនត្រលប់ទៅហ្វឹកហាត់ ឬលេងការប្រកួតណាមួយឡើយ “រហូតដល់មានការជូនដំណឹងបន្ថែម”។

ក្រុមហ៊ុន Nike ក៏បានផ្អាក ហើយក្រោយមកបានបញ្ចប់កិច្ចព្រមព្រៀងឧបត្ថម្ភរបស់ខ្លួនជាមួយ Greenwood ខណៈក្រុមហ៊ុនហ្គេម Electronic Arts (EA) បានបញ្ជាក់ថា គេត្រូវបានដកចេញពីសកម្មភាពនៅក្នុងហ្គេម FIFA 22 របស់ខ្លួនផងដែរ។

កីឡាករដែលកើតនៅ Bradford បានឆ្លងកាត់ការហ្វឹកហាត់នៅថ្នាលរបស់ក្លិប Man United Academy ហើយបានបង្ហាញខ្លួនជាលើកដំបូងរបស់គេក្នុងការប្រកួត Champions League នៅឯទឹកដី Paris Saint-Germain ក្នុងខែមីនា ឆ្នាំ ២០១៩។ គេបានបង្ហាញខ្លួនក្នុងជម្រើសជាតិអង់គ្លេសឈុតធំម្ដងផងដែរ ដោយលេងក្នុងការប្រកួត Nations League ជាមួយអ៊ីស្លង់ ក្នុងខែកញ្ញា ឆ្នាំ ២០២០៕

ប្រភព ៖ Skysports.com

អត្ថបទ ៖ មន្នីរ័ត្ន

The post ខ្សែប្រយុទ្ធ Man United រួចផុតពីការចោទប្រកាន់ទាំងអស់ប្រឆាំងនឹងបទប៉ុនប៉ងរំលោភ appeared first on Kampuchea Thmey Daily.