Narendra Modi Archives - Kampuchea Thmey Daily

ផ្ទុះឆេះរោងចក្រផលិតគ្រឿងផ្ទុះនៅឥណ្ឌាបណ្តាលឲ្យស្លាប់និងរបួស៣៥នាក់

Rann Reuy — Sun, 01 Mar 2026 10:41:54 +0000

ការផ្ទុះនៅរោងចក្រផលិតគ្រឿងផ្ទុះមួយបានសម្លាប់មនុស្សយ៉ាងហោចណាស់ ១៧នាក់ និង ១៨ នាក់ផ្សេងទៀតរងរបួសនៅថ្ងៃអាទិត្យថ្ងៃទី ១ខែមីនា។ យោងការផ្សាយរបស់ការផ្សាយរបស់ CNA ដែលយោងបន្តពីភ្នាក់ងារសារព័ត៌មានអន្តរជាតិ។

ផ្ទុះរោងចក្រផលិតគ្រឿងផ្ទុះសម្លាប់មនុស្ស១៧នាក់នៅឥណ្ឌានៅថ្ងៃនេះ។ Video Surfaces | PTI

មន្ត្រីនៅរដ្ឋ Maharashtra ភាគខាងលិចប្រទេសឥណ្ឌា ត្រូវបានស្រង់សម្តី និយាយថា គ្រោះថ្នាក់ដ៏អាក្រក់មួយនេះបានកើតឡើងនៅ Nagpur ចម្ងាយប្រហែល ៨០០ គីឡូម៉ែត្រពីរដ្ឋធានី Mumbai ។

លោកនាយករដ្ឋមន្ត្រី Narendra Modi បាននិយាយថា គ្រោះថ្នាក់នេះ «គួរឱ្យព្រួយបារម្ភយ៉ាងខ្លាំង» ហើយសូមជូនពរឱ្យអ្នកនៅរស់រានមានជីវិតឆាប់ជាសះស្បើយ។

លោក Devendra Fadnavis អភិបាលរដ្ឋ Maharashtra នៅក្នុងការបង្ហោះមួយនៅលើ X បានហៅឧប្បត្តិហេតុនេះថា៖«ជារឿងអកុសល និងសោកនាដកម្មយ៉ាងខ្លាំង»។

លោក Fadnavis បាននិយាយថា៖«ប្រតិបត្តិការជួយសង្គ្រោះត្រូវបានពន្លឿន ហើយរហូតមកដល់ពេលនេះ មនុស្ស ១៧ នាក់បានបាត់បង់ជីវិត» ដោយបន្ថែមថា មនុស្ស ១៨ នាក់ផ្សេងទៀតបានរងរបួស។

ការស៊ើបអង្កេតមួយត្រូវបានបញ្ជាឱ្យធ្វើលើឧប្បត្តិហេតុនេះ។

នៅថ្ងៃសៅរ៍ មនុស្ស ២១ នាក់បានស្លាប់នៅក្នុងការផ្ទុះនៅរោងចក្រផលិតផាវមួយនៅរដ្ឋ Andhra Pradesh ភាគអាគ្នេយ៍ប្រទេសឥណ្ឌា។

គ្រោះថ្នាក់ឧស្សាហកម្មគឺជារឿងធម្មតានៅក្នុងប្រទេសឥណ្ឌា ជារឿយៗដោយសារតែការមិនអើពើនឹងតម្រូវការសុវត្ថិភាព និងការអនុវត្តច្បាប់ធូររលុង។

កាលពីឆ្នាំមុន ការផ្ទុះរោងចក្រផលិតផាវមួយនៅភាគខាងលិចប្រទេសឥណ្ឌាបានសម្លាប់មនុស្ស ២១ នាក់៕

The post ផ្ទុះឆេះរោងចក្រផលិតគ្រឿងផ្ទុះនៅឥណ្ឌាបណ្តាលឲ្យស្លាប់និងរបួស៣៥នាក់ appeared first on Kampuchea Thmey Daily.

សារព័ត៌មានធំៗនៅឥណ្ឌាផ្សាយដូចទឹកបាក់ទំនប់ បកស្បែកមុខនៃអំពើយង់ឃ្នងរបស់ថៃ ក្រោយបំផ្លាញរូបព្រះវិស្ណុ

Rann Reuy — Thu, 25 Dec 2025 14:14:49 +0000

សារព័ត៌មានសំខាន់ៗទាំងសារព៌មានអនឡាញ និងប៉ុស្តិ៍ទូរទស្សន៍ នៅប្រទេសឥណ្ឌា នៅថ្ងៃព្រហស្បតិ៍នេះ បានចេញផ្សាយដូចទឹកបាក់ទំនប់ ដោយការបង្ហាញពីអំពើយង់ឃ្នងរបស់ថៃ ដែលបំផ្លាញរូបព្រះវិស្ណូដែលតំណាងឲ្យហិណ្ឌូសាសនា ឬព្រហ្មញ្ញសាសនា ដែលមានការគោរពច្រើនបំផុតក្នុងប្រទេសឥណ្ឌា។

ការចេញផ្សាយរបស់ពួកគេយ៉ាងភ្លូកទឹកភ្លូកដីនៅថ្ងៃព្រហស្បតិ៍ទី២៤ខែធ្នូនេះ គឺក្រោយ១ថ្ងៃបន្ទាប់ពីប្រតិកម្មរបស់អ្នកនាំពាក្យក្រសួងការបរទេសឥណ្ឌា ដែលបានសំដែងការមិនពេញចិត្តចំពោះទង្វើយង់ឃ្នងរបស់យោធាថៃ ដោយចាត់ទុកការបំផ្លាញរូបព្រះវិស្ណុនោះ ជាសកម្មភាពមិនគោរពដែលធ្វើឈឺចាប់ដល់សាវកនៅជុំវិពិភពលោក។

ទូរទស្សន៍ឥណ្ឌា Zee News English មិនត្រឹមតែចុះផ្សាយរៀបរាប់អំពើយង់ឃ្នងរបស់ទាហានថៃបំផ្លាញរូបសំណាកព្រះវិស្ណុទេ ប៉ុន្តែថែមទាំងបានរៀបរាប់សកម្មភាពរបស់យោធាថៃប្រើយន្តហោះទម្លាក់គ្រាប់បែកបំផ្លាញទីតាំងផ្សេងៗ មានបំផ្លាញប្រាង្គប្រាសាទ អគារនានានៅតាមព្រំដែនទៀតផង។

ចំណងជើងវីដេអូរបស់សារព័ត៌មាននេះ បានសរសេរថា ថៃកម្ទេចរូបបដិមាព្រះវិស្ណុជាម្ចាស់ក្នុងប្រទេសកម្ពុជា ឲ្យដួលបាក់ដោយគ្រឿងចក្រ, ឥណ្ឌាខឹង។

សារព័ត៌មានសំខាន់ៗដទៃទៀតរបស់ឥណ្ឌាដែលបានចេញផ្សាយ រួមមាន៖ times of india, bhaskarenglish.in, wionews.com, hindustantimes.com, newindianexpress.com, economictimes.indiatimes.com, news.abplive.com, pragativadi.com, www.theweek.in, www.ndtv.com, indiawest.com, myind.net…និងជាច្រើនទៀត។

ក្រៅពីប្រព័ន្ធផ្សព្វផ្សាយនៅប្រទេសឥណ្ឌា បណ្តាញផ្សព្វផ្សាយនៅប្រទេសផ្សេងៗទៀតក៏បានតាមដាននិងចុះផ្សាយអំពើយង់ឃ្នង ឃោរឃៅរបស់យោធាថៃនេះដែរ។

ទីភ្នាក់ងារព័ត៌មានបារាំង AFP បានផ្សាយរំលេចថា រូបសំណាកនោះសង់នៅក្នុងទឹកដីកម្ពុជាចម្ងាយ៤០០ម៉ែត្រពីបន្ទាត់ព្រំដែនដោយផ្អែកតាម Google Map។ ព័ត៌មាននេះក៏ត្រូវបានផ្សាយបន្តដោយសារព័ត៌មាន The Straits Times ដ៏ល្បីរបស់ប្រទេសសិង្ហបុរី។

ទីភ្នាក់ងារព័ត៌មានបែឡារុស mint ក៏បានចេញផ្សាយអំពីអំពើអាក្រក់របស់យោធាថៃក្នុងការបំផ្លាញរូបព្រះវិស្ណុនេះដែរ។

ប្រទេសឥណ្ឌាដែលមានប្រជាជនជាង១០០០លាននាក់ ហើយក្នុងនោះ ប្រជាជនឥណ្ឌាប្រមាណ១០០០លាននាក់គោរពជឿលើសាសនាហិណ្ឌូ ដែលទង្វើរបស់ថៃនឹងធ្វើឲ្យប៉ះពាល់ដល់ប្រទេសថៃយ៉ាងធ្ងន់ធ្ងរទៅថ្ងៃអនាគត៕

រ៉ាន់ រើយ

https://www.facebook.com/share/p/1H1xRrFQbD

The post សារព័ត៌មានធំៗនៅឥណ្ឌាផ្សាយដូចទឹកបាក់ទំនប់ បកស្បែកមុខនៃអំពើយង់ឃ្នងរបស់ថៃ ក្រោយបំផ្លាញរូបព្រះវិស្ណុ appeared first on Kampuchea Thmey Daily.

កម្ពុជា-ឥណ្ឌាត្រៀមផ្លាស់ប្ដូរដំណើរទស្សនកិច្ចកម្រិតខ្ពស់ ខណៈកន្លងមកនាយករដ្ឋមន្ត្រីឥណ្ឌាចង់ធ្វើទស្សនកិច្ចនៅកម្ពុជា

Ngoeul Narath — Wed, 13 Aug 2025 05:05:38 +0000

កម្ពុជា និងឥណ្ឌា កំពុងគិតគូរត្រៀមផ្លាស់ប្ដូរដំណើរទស្សនកិច្ចកម្រិតខ្ពស់ទៅវិញមករវាងថ្នាក់ដឹកនាំនៃប្រទេសទាំងពីរ ខណៈកន្លងមកនាយករដ្ឋមន្ត្រីឥណ្ឌា ធ្លាប់បង្ហាញបំណងចងធ្វើទស្សនកិច្ចផ្លូវការនៅកម្ពុជា។ ការគិតគូរអំពីគម្រោងផ្លាស់ប្ដូរទស្សនកិច្ចនេះ កើតឡើងនៅក្នុងជំនួបរវាងរដ្ឋលេខាធិការក្រសួងការបរទេសកម្ពុជា លោក អ៊ុន ឃាង ជាមួយឯកអគ្គរដ្ឋទូតឥណ្ឌាប្រចាំនៅកម្ពុជា លោក Bawitlung Vanlalvawna កាលពីព្រឹកថ្ងៃទី១២ ខែសីហា។

សេចក្ដីប្រកាសព័ត៌មានស្ដីពីជំនួបរវាង រដ្ឋលេខាធិការក្រសួងការបរទេសកម្ពុជាជាមួយទូតឥណ្ឌាប្រចាំកម្ពុជាសរសេរដូច្នេះ៖« ភាគីទាំងពីរក៏បានពិភាក្សាអំពីមធ្យោបាយ ដើម្បីពង្រីកបន្ថែមទៀតនូវកិច្ចសហប្រតិបត្តិការដែលមានផលប្រយោជន៍ទៅវិញទៅមក និងផ្លាស់ប្តូរយោបល់លើការរៀបចំដំណើរទស្សនកិច្ចកម្រិតខ្ពស់នាពេលខាងមុខ រួមទាំងគម្រោងទស្សនកិច្ចផ្លូវការរបស់ថ្នាក់ដឹកនាំកម្ពុជានៅប្រទេសឥណ្ឌា និងទស្សនកិច្ចផ្លូវការរបស់ថ្នាក់ដឹកនាំឥណ្ឌា នៅប្រទេសកម្ពុជាផងដែរ។ »។

នៅក្នុងជំនួប មន្ត្រីជាន់ខ្ពស់ក្រសួងការបរទេសកម្ពុជា និងឯកអគ្គរដ្ឋទូតឥណ្ឌា ក៏បានវាយតម្លៃខ្ពស់ចំពោះទំនាក់ទំនងមិត្តភាពដ៏យូរអង្វែង និងកិច្ចសហប្រតិបត្តិការជិតស្និទ្ធរវាងកម្ពុជា និងឥណ្ឌា ដែលបានបង្ហាញតាមរយៈការផ្លាស់ប្តូរទស្សនកិច្ចជាញឹកញាប់រវាងថ្នាក់ដឹកនាំនៃប្រទេសទាំងពីរ។

សូមរម្លឹកថា កាលពីថ្ងៃទី២៥ ខែធ្នូ ឆ្នាំ២០២៤ កន្លងទៅ ទូតឥណ្ឌាដែលចប់អាណត្តិការងារនៅកម្ពុជា បានគោរពជម្រាបជូនសម្ដេចតេជោ ហ៊ុន សែន ប្រធានព្រឹទ្ធសភា នៅក្នុងជំនួបសម្ដែងការគួរសម និងជម្រាបលា ថា នាយករដ្ឋមន្រ្តីឥណ្ឌា លោក ណារិនដ្រា ម៉ូឌី មានបំណងមកទស្សនកិច្ចនៅកម្ពុជា និងសង្ឃឹមថា សម្តេចមហាបវរធិបតី នាយករដ្ឋមន្រ្តី និងសម្តេចតេជោ នឹងបំពេញទស្សនកិច្ចនៅឥណ្ឌានាពេលវេលាសមស្របខាងមុខ ដើម្បីជាកម្លាំងចលករក្នុងការធ្វើឱ្យស៊ីជម្រៅនៃទំនាក់ទំនងប្រទេសទាំងពីរ។

គួរឱ្យដឹងថា កម្ពុជា និងឥណ្ឌា បានចង់ភ្ជាប់ទំនាក់ទំនងការទូតជាផ្លូវការជាមួយគ្នា នៅក្នុងឆ្នាំ១៩៥២ ប៉ុន្តែទំនាក់ទំនងនៃប្រទេសទាំងពីរត្រូវបានកាត់ផ្ដាច់នៅក្នុងពេលដែលកម្ពុជា ធ្លាក់ទៅក្នុងការគ្រប់គ្រងរបស់ក្រុមខ្មែរក្រហម។ ក្នុងកាលៈទេសៈដែលកម្ពុជាបានជួបប្រទះការលំបាកក្នុងទសវត្សរ៍ឆ្នាំ១៩៨០ ដោយឥណ្ឌាជាប្រទេសប្រជាធិបតេយ្យទី១ ដែលបានទទួលស្គាល់កម្ពុជានៅក្រោយការដួលរលំនៃរបបខ្មែរក្រហម។

បន្ទាប់ពីបង្កើតទំនាក់ទំនងការទូតផ្លូវការ នៅក្នុងឆ្នាំ១៩៥៤ នាយករដ្ឋមន្ត្រីឥណ្ឌា Pandit Jawaharlal Nehru បានមកធ្វើទស្សនកិច្ចនៅកម្ពុជា បន្ទាប់នៅចុងឆ្នាំដដែល សម្ដេចនរោត្តម សីហនុ បានយាងទៅបំពេញព្រះរាជទស្សនកិច្ចនៅឥណ្ឌាវិញ។

តាមរយៈចំណងទាក់ទងការទូតជាមួយគ្នា នាយករដ្ឋមន្ត្រីឥណ្ឌា Atal Bihari Vajpayee ធ្លាប់បំពេញទស្សនកិច្ចនៅកម្ពុជានៅឆ្នាំ២០០២ ចំណែក៨ឆ្នាំក្រោយមកគឺនៅឆ្នាំ២០១០ ប្រធានាធិបតីឥណ្ឌា Pratibha Devi Singh Patil ក៏បំពេញទស្សនកិច្ចនៅកម្ពុជា រីឯនៅឆ្នាំ២០១២ នាយករដ្ឋមន្ត្រី Manmohan Singh ក៏បំពេញទស្សនកិច្ចនៅកម្ពុជា នៅឆ្នាំ២០១៥ អនុប្រធានាធិបតីឥណ្ឌា Mohammad Hamid Ansari ក៏បំពេញទស្សនកិច្ចនៅកម្ពុជា និងនៅឆ្នាំ២០២២ អនុប្រធានាធិបតីឥណ្ឌា Jagdeep Dhankha ក៏បានមកចូលរួមកិច្ចប្រជុំកំពូលអាស៊ាននៅកម្ពុជាផងដែរ។

ចំណែក សម្តេចតេជោ ហ៊ុន សែន ក្នុងឋានៈជានាយករដ្ឋមន្ត្រីកម្ពុជា ធ្លាប់បានធ្វើទស្សនកិច្ចនៅប្រទេសឥណ្ឌាច្រើនលើកជាច្រើនសារ ក្នុងនោះសម្ដេចធ្លាប់បំពេញទស្សនកិច្ចនៅឥណ្ឌានៅឆ្នាំ១៩៨៨, បន្ទាប់មកនៅឆ្នាំ១៩៩០,ឆ្នាំ១៩៩១, ឆ្នាំ២០០០, ឆ្នាំ២០០៧, ឆ្នាំ២០១២ និងឆ្នាំ២០១៨។

នៅក្នុងខែកុម្ភៈ ឆ្នាំ២០២៣ សម្តេចមហាបវរធិបតី ហ៊ុន ម៉ាណែត ក្នុងតួនាទីជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានធ្វើទស្សនកិច្ចនៅឥណ្ឌា។ បន្ទាប់មកនៅខែឧសភា ឆ្នាំ២០២៣ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានយាងបំពេញព្រះរាជទស្សនកិច្ចផ្លូវរដ្ឋនៅ ឥណ្ឌា ក្នុងឱកាសអបអរសាទរខួបលើកទី៧០ នៃការបង្កើតចំណងការទូតកម្ពុជា-ឥណ្ឌា។

តាមរយៈទំនាក់ទំនងនៅលើផ្លូវរួម ឥណ្ឌាបានជួយ ហើយនឹងបន្តជួយដល់កម្ពុជា លើការជួយបណ្តុះបណ្តាលអភិវឌ្ឍធនធានមនុស្សចាប់តាំងពីឆ្នាំ១៩៨១ ការចូលរួមក្នុងដំណើរការស្វែងរកសន្តិភាព ការបញ្ជូនកងកម្លាំងថែរក្សាសន្តិភាពមួកខៀវមកកម្ពុជា គម្រោងអភិរក្សប្រាសាទអង្គរវត្ត ប្រាសាទព្រះវិហារ ការកសាងសមត្ថភាព និងទំនាក់ទំនងផ្នែកពុទ្ធសាសនា និងការផ្តល់វ៉ាក់សាំងបង្ការជំងឺកូវីដ-១៩ ជាដើម។ ឥណ្ឌា ក៏មានគម្រោង បញ្ជូនសត្វខ្លា និងព្រះបរមសារីរិកធាតុរបស់គោតមពុទ្ធមកកម្ពុជានាពេលដ៏ខ្លីខាងមុខផងដែរ។

ទំនាក់ទំនងកម្ពុជា-ឥណ្ឌាដ៏យូរអង្វែង បានក្លាយទៅជាទំនាក់ទំនងដែលស៊ីជម្រៅនូវចំណងមិត្តភាពដ៏ប្រសើរ និងកិច្ចសហប្រតិបត្តិការដ៏ជិតស្និទ្ធដែលចាក់ឫសយ៉ាងជ្រៅនៅក្នុងបេតិកភណ្ឌវប្បធម៌ សាសនា និងប្រវត្តិសាស្ត្ររួម ដើម្បីជាប្រយោជន៍ទៅវិញទៅមកសម្រាប់ប្រជាជនទាំងពីរ៕

ដោយ៖ ង៉ិល ណារ៉ាត់

The post កម្ពុជា-ឥណ្ឌាត្រៀមផ្លាស់ប្ដូរដំណើរទស្សនកិច្ចកម្រិតខ្ពស់ ខណៈកន្លងមកនាយករដ្ឋមន្ត្រីឥណ្ឌាចង់ធ្វើទស្សនកិច្ចនៅកម្ពុជា appeared first on Kampuchea Thmey Daily.

៤ប្រទេស មានប្រជាជនជិះយន្តហោះដែលធ្លាក់នៅឥណ្ឌាថ្ងៃនេះ

Rann Reuy — Thu, 12 Jun 2025 14:42:13 +0000

មកដល់ម៉ោងនេះផ្អែកតាមការផ្សាយផ្ទាល់ (Live) របស់បណ្តាព័ត៌មានអង់គ្លេស BBC អ្នកដំណើរ អាកាសយានិក និងអ្នកបម្រើនៅយន្តហោះរបស់ក្រុមហ៊ុន Air India ជាង២០០នាក់ ត្រូវបានបញ្ជាក់ថា «ស្លាប់» ក្នុងចំណោមអ្នកនៅលើយន្តហោះសរុប២៤២នាក់។

ប្រតិបត្តិការជួយសង្គ្រោះរបស់ក្រុមជួយសង្គ្រោះនៅរសៀលថ្ងៃនេះ។ Reuters

តាមសេចក្តីរាយការណ៍នានា បង្ហាញថា ប្រទេសចំនួន៤ ដែលមានប្រជាជនធ្វើដំណើរតាមជើងយន្តហោះដែលធ្លាក់ បង្កជាសោកនាដកម្មដ៏សោកសង្រេងនៅប្រទេសឥណ្ឌាក្នុងថ្ងៃព្រហស្បតិ៍ទី១២ខែមិថុនានេះ។ ប្រទេសទាំង៤នោះរួមមាន ឥណ្ឌាមានប្រជាជនច្រើនជាងគេ បន្ទាប់មកអង់គ្លេស ព័រទុយហ្កាល់ និងចុងក្រោយគឺកាណាដា។

យន្តហោះ Air India ជើងហោះហើរ 171 ដែលជាប្រភេទយន្តហោះ Boeing 787-8 Dreamliner ឆ្ពោះទៅអាកាសយានដ្ឋាន Gatwick របស់ទីក្រុងឡុងដ៍ បានធ្លាក់ប៉ុន្មាននាទី បន្ទាប់ពីការហោះចេញពីអាកាសយានដ្ឋានអន្តរជាតិ Sardar Vallabhbhai Patel ក្នុងទីក្រុង Ahmedabad រដ្ឋ Gujarat ភាគខាងលិចប្រទេសឥណ្ឌា។

យោងតាមប្រភពព័ត៌មានរបស់សារព័ត៌មានឥណ្ឌា ក្រុមហ៊ុន Adani របស់ប្រទេសឥណ្ឌា ដែលប្រតិបត្តិការព្រលានយន្តហោះក្រោមការបណ្តាក់ទុនរួមគ្នាក្រោមគម្រោង សាធារណៈឯកជន បាននិយាយថា ខ្លួនកំពុងផ្តល់ជំនួយគ្រប់បែបយ៉ាងដល់ក្រុមគ្រួសារនៃអ្នកដែលរងផលប៉ះពាល់ដោយឧបទ្ទវហេតុនេះ។

យន្តហោះ Boeing 787-8 Dreamliner ជាប្រភេទយន្តហោះមានម៉ាស៊ីនភ្លោះដែលចុះឈ្មោះ VT‑ANB បានដឹកមនុស្ស ២៤២ នាក់ ក្នុងនោះមានមនុស្សពេញវ័យ ២១៧ នាក់ កុមារ ១១ នាក់ និងទារក ២នាក់។ យោងតាមក្រុមហ៊ុនអាកាសចរណ៍ Air India អ្នកដំណើរមានជនជាតិឥណ្ឌាមាន ១៦៩នាក់ អង់គ្លេសមាន ៥៣ នាក់ ព័រទុយហ្គាល់ មាន៧នាក់ និងកាណាដាមាន១នាក់។

យោងតាមការត្រួតពិនិត្យចរាចរណ៍ផ្លូវអាកាស និងទិន្នន័យអាកាសចរណ៍ពី Flightradar24 យន្តហោះបានឡើងដល់កម្ពស់ត្រឹមតែ ៦២៥ហ្វីត មុនពេលចេញការប្រកាសអាសន្ន Mayday និងបាត់ពីរ៉ាដា។ ក្នុងរយៈពេលប៉ុន្មានវិនាទី វាបានបុកដល់សាលបរិភោគអាហាររបស់ផ្ទះសំណាក់ បណ្តាលឱ្យមានការឆាបឆេះយ៉ាងសន្ធោសន្ធៅ និងការដួលរលំមួយផ្នែកនៃអគារ។

ក្រសួងអាកាសចរណ៍ស៊ីវិលឥណ្ឌា បានបញ្ជូនក្រុមស៊ើបអង្កេតពិសេសមួយចូលរួមដោយអ្នកជំនាញបច្ចេកទេសរបស់ក្រុមហ៊ុន Boeing និងការិយាល័យស៊ើបអង្កេតគ្រោះថ្នាក់យន្តហោះ (AAIB) ។ ជើងហោះហើរ VT‑ANB បានដំណើរការតាំងពីឆ្នាំ២០១៤ ហើយមុននេះ បានហោះហើរពីទីក្រុង Delhi ទៅកាន់ទីក្រុង Ahmedabad ដោយគ្មានឧបទ្ទវហេតុអ្វីសោះ៕

រ៉ាន់ រើយ

The post ៤ប្រទេស មានប្រជាជនជិះយន្តហោះដែលធ្លាក់នៅឥណ្ឌាថ្ងៃនេះ appeared first on Kampuchea Thmey Daily.

ម៉ូឌី រៀបរាប់ពីសោកនាដកម្មធ្លាក់យន្តហោះ ឯប៉ូលិសថា«គ្មានអ្នកនៅរស់ឡើយ»

Rann Reuy — Thu, 12 Jun 2025 12:40:38 +0000

នាយករដ្ឋមន្ត្រីឥណ្ឌា ណារ៉េនដ្រា ម៉ូឌី បានបង្ហោះសារលើបណ្តាញសង្គមហ្វេសប៊ុកផ្ទាល់របស់លោក ដោយបង្ហាញពីទុក្ខសោកដ៏ក្រៀមក្រំបំផុត និង ចាត់ទុកជាឧបទ្ទវហេតុដ៏សែនរន្ធត់ ក្រោយការធ្លាក់យន្តហោះដឹកអ្នកដំណើរសរុប២៤២នាក់ ដែលប៉ូលិសសន្និដ្ឋានថា «គ្មានម្នាក់ណានៅរស់រានមានជីវិតឡើយ»។

នាយករដ្ឋមន្ត្រី ឥណ្ឌា បានបង្ហោះសារលើទំព័រហ្វេសប៊ុករបស់លោកថា៖«សោកនាដកម្មនៅ Ahmedabad បានធ្វើឱ្យយើងរន្ធត់ឥតឧបមា និងសោកសៅក្រៃលែង។ វាជាការឈឺចិត្តដែលពីការថ្លែងរួច។ នៅក្នុងពេលវេលាដ៏សោកសៅនេះ គំនិតរបស់ខ្ញុំគឺនៅជាមួយមនុស្សគ្រប់គ្នាដែលរងផលប៉ះពាល់ដោយសារឧបទ្ទវហេតុនេះ។ [ខ្ញុំ]បានទាក់ទងជាមួយក្រុមរដ្ឋមន្ត្រី និងអាជ្ញាធរដែលកំពុងធ្វើការដើម្បីជួយអ្នកដែលរងគ្រោះ»។

សេចក្តីរាយការណ៍ផ្ទាល់របស់ BBC ដែលយោងពីការផ្សាយរបស់ AFP និង AP ដែលបានទាក់ទងផ្ទាល់ទៅប៉ូលិស បានផ្សាយថា «ទំនងគ្មានអ្នករស់រានមានជីវិតណាម្នាក់ពីការធ្លាក់យន្តហោះនេះទេ»។

រ៉ាន់ រើយ

ក្រុមជួយសង្គ្រោះក្នុងហេតុការណ៍ធ្លាក់នៅឥណ្ឌា។ Reuters

The post ម៉ូឌី រៀបរាប់ពីសោកនាដកម្មធ្លាក់យន្តហោះ ឯប៉ូលិសថា«គ្មានអ្នកនៅរស់ឡើយ» appeared first on Kampuchea Thmey Daily.

ប្រតិបត្តិការយោធាឥណ្ឌាឈ្មោះ «Sindoor» មានអត្ថន័យយ៉ាងណា ហើយ អ្វីជាគោលដៅ?

Rann Reuy — Wed, 07 May 2025 03:07:44 +0000

ឥណ្ឌាបានដាក់ឈ្មោះប្រតិបត្តិការយោធាចូលទឹកដីប៉ាគីស្ថាន និងតំបន់កាស្មៀរដែលគ្រប់គ្រងដោយប៉ាគីស្ថាននៅព្រឹកថ្ងៃពុធនេះថា «Sindoor» ដែលនាយករដ្ឋមន្ត្រីឥណ្ឌា លោក Narendra Modi តាមដានប្រតិបត្តិការពេញមួយយប់។

តើ «Sindoor» មានអត្ថន័យយ៉ាងដូចម្តេចនៅក្នុងប្រពៃណីឥណ្ឌា?

នាយករដ្ឋមន្ត្រី ឥណ្ឌា Narendra Modi អង្គុយប្រជុំតាមដានប្រតិបត្តិការ Sindoor ។ NDTV

តាមសេចក្តីពន្យល់ដែលចេញផ្សាយនៅលើ newsx.com «Sindoor» គឺ ឈ្មោះកូដមានតម្លៃជានិមិត្តសញ្ញាសម្រាប់ប្រតិបត្តិការយោធាចូលប៉ាគីស្ថានលើកនេះ។ អត្ថន័យនៅពីក្រោយឈ្មោះ Sindoor ឬ vermillion គឺជាម្សៅពណ៌ក្រហមដែលពាក់តាមប្រពៃណីដោយស្ត្រីហិណ្ឌូដែលបានរៀបការ។ ទោះបីជាយ៉ាងណាក៏ដោយ នៅក្នុងបរិបទនៃប្រតិបត្តិការយោធានេះ ឈ្មោះនេះហាក់ដូចជាសំដៅលើការកំណត់គោលដៅរបស់បុរសក្នុងអំឡុងពេលការវាយប្រហារលើងអ្នកទេសចរនៅ Pahalgam ដែលជាកន្លែងដែលភេរវករត្រូវបានគេរាយការណ៍ថា បានធ្វើឱ្យជនរងគ្រោះកំណត់អត្តសញ្ញាណខ្លួនឯងតាមឈ្មោះ និងសាសនា មុនពេលប្រហារជីវិតពួកគេ។

Sindoor (ក៏អាចត្រូវបានគេសរសេរថា sindur) គឺជាម្សៅគ្រឿងសំអាងពណ៌ក្រហម ឬពណ៌ស្រកំ (vermilion) ដែលពាក់ដោយស្ត្រីហិណ្ឌូដែលបានរៀបការហើយនៅក្នុងប្រទេសឥណ្ឌា និងវប្បធម៌អាស៊ីខាងត្បូងផ្សេងទៀត។ វាមានសារៈសំខាន់ខាងវប្បធម៌ និងសាសនា ជាចម្បងជានិមិត្តរូបនៃស្ថានភាពអាពាហ៍ពិពាហ៍។

សម្រាប់ជំនឿវប្បធម៌វិញ Sindoor បង្ហាញពីបំណងប្រាថ្នារបស់ស្ត្រីសម្រាប់អាយុវែង និងវិបុលភាពរបស់ស្វាមី។ នៅក្នុងទំនៀមទម្លាប់ជាច្រើន ស្ត្រីមេម៉ាយមិនស្លៀកពាក់ sindoor ឡើយ។

ប្រតិបត្តិការ Sindoor គឹកំណត់តំបន់គោលដៅរួមមាន Bahawalpur ដែលជាទីតាំងរឹងមាំនៃក្រុមភេរវករ Jaish-e-Mohammad។

នាយករដ្ឋមន្ត្រី Narendra Modi បាននិងកំពុងតាមដានជានិច្ចនូវប្រតិបត្តិការ Sindoor ដែលក្នុងនោះកងកម្លាំងប្រដាប់អាវុធបានធ្វើការវាយប្រហារដោយកាំជ្រួចនៅព្រឹកថ្ងៃពុធលើគោលដៅភេរវកម្មចំនួន ៩នៅក្នុងប្រទេសប៉ាគីស្ថាន និងកាស្មៀរដែលកាន់កាប់ដោយប៉ាគីស្ថាន ក្នុងការសងសឹកចំពោះការសម្លាប់រង្គាលទេសចរឥណ្ឌា២៥នាក់ និងជនជាតិនេប៉ាល់ម្នាក់ នៅ Pahalgam ក្នុងតំបន់កាស្មៀរ កាលថ្ងៃទី២២ខែមេសា។

តំបន់គោលដៅរួមមាន Bahawalpur ដែលជាទីតាំងរឹងមាំនៃក្រុមភេរវករ Jaish-e-Mohammad។
សេចក្តីរាយការណ៍របស់សារព័ត៌មាន NDTV នៅព្រឹកថ្ងៃពុធនេះ បានអះអាងថា ក្រសួងការពារជាតិឥណ្ឌា បានបញ្ជាក់ថា គោលដៅភេរវកម្មជាក់លាក់ចំនួនប្រាំបួនត្រូវបានវាយប្រហារក្នុងអំឡុងពេលប្រតិបត្តិការ រួមទាំងទីស្នាក់ការកណ្តាលរបស់ Jaish-e-Mohammed (JeM) នៅ Bahawalpur និង Lashkar-e-Taiba (LeT) នៅ Muridke ។

បុគ្គលិកយោធាឥណ្ឌា ត្រួតពិនិត្យរថយន្តនៅតំបន់កាស្មៀរ។ AL Jazeera

យោងតាមប្រភពរដ្ឋាភិបាល នាយករដ្ឋមន្ត្រីផ្ទាល់បានតាមដានការវិវត្តន៍ជាក់ស្តែងក្នុងទីក្រុងញូវដេលី។ គាត់ត្រូវបានសង្ខេបជាបន្តបន្ទាប់ដោយប្រធានបុគ្គលិកការពារជាតិ មន្ត្រីចារកម្មជាន់ខ្ពស់ និងទីប្រឹក្សាសន្តិសុខជាតិ Ajit Doval ។ ការប្រាស្រ័យទាក់ទងគ្នាជាច្រើនជុំត្រូវបានធ្វើឡើងរវាងនាយករដ្ឋមន្ត្រី និងមេទ័ពជើងទឹក និងកងទ័ពអាកាស ដោយចាប់ផ្តើមពីល្ងាចថ្ងៃអង្គារ និងបន្តរហូតដល់ព្រឹកព្រលឹមថ្ងៃពុធ។

ប្រភពបាននិយាយថាប្រតិបត្តិការ Sindoor ត្រូវបានគេគិតគូរ និងគ្រោងទុកបន្ទាប់ពីការវាយតម្លៃស៊ើបការណ៍សម្ងាត់ដែលធ្វើឡើងក្នុងប៉ុន្មានថ្ងៃបន្ទាប់ពីការវាយប្រហារ Pahalgam។ ក្រសួងការពារជាតិ នៅក្នុងសេចក្តីថ្លែងការណ៍មួយ ដែលចេញនៅម៉ោង ១ៈ៤៤នាទីរំលងអធា្រត្រ បានបញ្ជាក់ថា ការផ្លោងត្រូវ«ចំគោលដៅ វាស់វែងបាន និងមិនមានការរាលដាលទេ»។ វាបានបន្ថែមទៀតថា ទ្រព្យសម្បត្តិយោធាឥណ្ឌា មិនបានកំណត់គោលដៅលើការដំឡើងយោធាប៉ាគីស្ថានណាមួយឡើយ ហើយថា ការវាយប្រហារគឺសំដៅទាំងស្រុងទៅលើហេដ្ឋារចនាសម្ព័ន្ធដែលប្រើប្រាស់សម្រាប់ការធ្វើផែនការ និងប្រតិបត្តិប្រតិបត្តិការភេរវករឆ្លងព្រំដែន។

ក្រុមមន្ត្រីបាននិយាយថា ការវាយប្រហារដោយកាំជ្រួចបានវាយប្រហារទីតាំងចំនួនប្រាំនៅក្នុងខេត្ត Punjab របស់ប្រទេសប៉ាគីស្ថាន រួមទាំង Bahawalpur និង Muridke និងចំនួនបួននៅ Kashmir ដែលកាន់កាប់ដោយប៉ាគីស្ថានគឺ Kotli, Muzaffarabad និង Bagh ។

បន្ទាប់ពីការវាយប្រហារនេះ ឥណ្ឌាបានផ្តួចផ្តើមការផ្សព្វផ្សាយការទូតទៅកាន់ដៃគូសំខាន់ៗរបស់ពិភពលោក។ មន្ត្រីជាន់ខ្ពស់ឥណ្ឌាបានទាក់ទងសមភាគីរបស់ពួកគេនៅសហរដ្ឋអាមេរិក ចក្រភពអង់គ្លេស រុស្ស៊ី អារ៉ាប៊ីសាអូឌីត និងអារ៉ាប់រួម ដើម្បីពន្យល់ពួកគេអំពីប្រតិបត្តិការនេះ។

ក្រសួងការពារជាតិឥណ្ឌាក៏បានរំលឹកឡើងវិញថា ការឆ្លើយតបរបស់ឥណ្ឌាគឺស្របតាមការប្តេជ្ញាចិត្តរបស់ខ្លួនក្នុងការធ្វើឱ្យជនល្មើសនៃអំពើភេរវកម្មឆ្លងដែនទទួលខុសត្រូវ៕

ដោយ រ៉ាន់ រើយ

The post ប្រតិបត្តិការយោធាឥណ្ឌាឈ្មោះ «Sindoor» មានអត្ថន័យយ៉ាងណា ហើយ អ្វីជាគោលដៅ? appeared first on Kampuchea Thmey Daily.

លោក ម៉ូឌី អបអរត្រាំដោយសារសន្យាធ្វើការរួមគ្នាកសាងសន្តិភាព ស្ថិរភាព និងវិបុលភាពសកលលោក

Rann Reuy — Wed, 06 Nov 2024 08:58:57 +0000

នាយករដ្ឋមន្ត្រីឥណ្ឌា លោក ណារ៉េនដ្រា ម៉ូឌី (Narendra Modi) បានចេញសារអបអរសាទរ លោក ដូណាល់ ត្រាំ ប្រធានាធិបតីជាប់ឆ្នោតរបស់សហរដ្ឋអាមេរិក ដោយបង្ហោះសារអមជាមួយរូបថតចំនួន៤សន្លឹកដែលរដ្ឋបុរសទាំងពីរធ្លាប់ជួបគ្នា។

នៅលើបណ្តាញសង្គមផ្ទាល់ខ្លួន នាយករដ្ឋមន្ត្រី ឥណ្ឌា បានសរសេរថា៖«សូមអបអរសាទរយ៉ាងស្មោះស្ម័គ្រចំពោះមិត្តរបស់ខ្ញុំ Donald J. Trump ចំពោះជ័យជំនះការបោះឆ្នោតជាប្រវត្តិសាស្ត្ររបស់អ្នក»។

លោក ម៉ូឌី បានបន្តថា៖«នៅពេលអ្នកបង្កើតភាពជោគជ័យនៃអាណត្តិមុនរបស់អ្នក ខ្ញុំទន្ទឹងរង់ចាំការបន្តកិច្ចសហការរបស់យើង ដើម្បីពង្រឹងបន្ថែមទៀតនូវភាពជាដៃគូជាសកល និងយុទ្ធសាស្ត្រគ្រប់ជ្រុងជ្រោយឥណ្ឌា-សហរដ្ឋអាមេរិក។ រួមគ្នាដើម្បីភាពប្រសើរឡើងនៃប្រជាជនរបស់យើង និងលើកកម្ពស់សន្តិភាព ស្ថិរភាព និងវិបុលភាពសកល»។

លោក ដូណាល់ ត្រាំ បានយកឈ្នះការបោះឆ្នោតដោយងាយស្រួលសម្រាប់អាណត្តិនេះ ដោយសារនយោបាយរបស់លោកហាក់ងាកទៅរកវិធីបញ្ចប់សង្គ្រាមនៅអ៊ុយក្រែនជាមួយរុស្ស៊ី ដែលអូសបន្លាយពេលជិត៣ឆ្នាំទៅហើយ។

ឥណ្ឌាក៏បានបង្ហាញឆន្ទៈក្នុងការផ្សះផ្សាយសង្គ្រាមអ៊ុយក្រែននិងរុស្ស៊ីផងដែរក្នុងពេលកន្លងទៅថ្មីៗនេះ ដោយនាយករដ្ឋមន្ត្រីឥណ្ឌា បានទៅបំពេញទស្សនកិច្ចនៅអ៊ុយក្រែនដែលខ្លួនមិនធ្លាប់ធ្វើក្នុងពេលកន្លងមក៕

ដោយ រ៉ាន់ រើយ

The post លោក ម៉ូឌី អបអរត្រាំដោយសារសន្យាធ្វើការរួមគ្នាកសាងសន្តិភាព ស្ថិរភាព និងវិបុលភាពសកលលោក appeared first on Kampuchea Thmey Daily.

[វិភាគអន្តរជាតិ] ចិននិងឥណ្ឌាប្រជែងគ្នានាំយកសន្តិភាពក្នុងសង្គ្រាមអ៊ុយក្រែន-រុស្ស៊ី

Rann Reuy — Wed, 28 Aug 2024 09:58:30 +0000

ជម្លោះអ៊ុយក្រែននិងរុស្ស៊ីបានឆ្លងផុត២ឆ្នាំកន្លះឬរយៈពេល៣០ខែគត់កាលពីថ្ងៃទី២៤ខែសីហា។ ក្នុងអំឡុងសប្តាហ៍ចុងក្រោយនេះ ប្រទេសមហាអំណាចពីរក្នុងតំបន់អាស៊ី គឺ ឥណ្ឌាជាប្រទេសធំជាងគេនៅតំបន់អាស៊ីខាងត្បូង និង មហាអំណាចចិនស្ថិតនៅតំបន់អាស៊ីបូព៌ា បានបង្ហាញជំហរខិតខំខ្នះខ្នែងយ៉ាងខ្លាំងក្នុងការនាំយកសន្តិភាពឱ្យគូសត្រូវ អ៊ុយក្រែននិងរុស្ស៊ី។

នៅមុនមួយថ្ងៃដែលនាយករដ្ឋមន្ត្រីឥណ្ឌា ណារ៉េនដ្រា ម៉ូឌី បានទៅបំពេញទស្សនកិច្ចផ្លូវការលើកដំបូងបំផុតក្នុងវត្តិសាស្រ្តទំនាក់ទំនងទ្វេភាគី ឥណ្ឌា-អ៊ុយក្រែន៣២ឆ្នាំចាប់តាំងពីឆ្នាំ១៩៩២ នាយករដ្ឋមន្ត្រីចិន លី ឈាង (Li Qiang) បានចេញដំណើរទៅបំពេញទស្សនកិច្ចនៅទីក្រុងមូស្គូដើម្បីពិភាក្សាគ្នាជាមួយលោក ពូទីន វ៉្លាឌីមៀរ ពូទីន នៅថ្ងៃទី២២ខែសីហាឆ្នាំ២០២៤។

ក្នុងដំណើរទស្សនកិច្ចរបស់មេដឹកនាំនៃប្រទេសកំពូលអំណាចទាំងពីរប្រចាំទ្វីបអាស៊ីដែលមិនរណបក្រុមបច្ចឹមប្រទេសដែលគាំទ្រអ៊ុយក្រែនក្នុងសង្គ្រាមទប់ទល់ជាមួយរុស្ស៊ី ឥណ្ឌានិងចិនហាក់កំពុងប្រជែងឥទ្ធិពលរបស់ពួកគេរៀងៗខ្លួនក្នុងការនាំយកដំណើរការចរចាសន្តិភាពមួយដល់អ៊ឺរ៉ុបខាងកើត។

ជំហររបស់ប្រទេសចិននិងឥណ្ឌាចំពោះប្រទេសគូសត្រូវអ៊ុយក្រែននិងរុស្ស៊ី គឺអាចទទួលយកបានដូចគ្នាក្នុងដំណើរសង្គ្រាមកន្លងមកនេះ បើទោះបីជា អ៊ុយក្រែនធ្លាប់បានបង្ហាញជំហរមិនពេញចិត្តចំពោះចិន និងឥណ្ឌាក្នុងដំណាក់កាលដំបូងនៃសង្គ្រាមក្តី។

ប៉ុន្តែក្នុងដំណាក់កាលចុងក្រោយ ពោលគឺចាប់តាំងពីសង្គ្រាមរវាងអ៊ីស្រាអែលនិងក្រុមហាម៉ាសបាឡេស្ទីនកើតឡើង ហើយជំនួយគាំទ្ររបស់សហរដ្ឋអាមេរិកនិងអឹរ៉ុបដែលធ្លាប់គាំទ្រខ្លួនបានធ្លាក់ចុះ និងជួបវិបត្តិតានតឹងខ្លាំងឡើងៗ រដ្ឋាភិបាលរបស់លោក វ៉ុលឌីមៀរ ហ្សេឡេនស្គី បានបន្ទន់ជំហររបស់ខ្លួននៅចំពោះមុខចិន និងឥណ្ឌា។

ក្នុងខួប១ឆ្នាំដំបូងនៃសង្គ្រាម រដ្ឋាភិបាលក្រុងប៉េកាំងធ្លាប់បានដាក់ចេញសំណើរ១៤ចំណុចសម្រាប់ដំណើរការចរចាសន្តិភាពរវាងអ៊ុយក្រែននិងរុស្ស៊ី ប៉ុន្តែត្រូវអ៊ុយក្រែនបដិសេធដោយទាមទារឱ្យរុស្ស៊ីដកកងទ័ពចេញពីទឹកដីរបស់ខ្លួនដាច់ខាតមុនដំណើរការចរចា ខណៈរុស្ស៊ីមិនត្រឹមតែបដិសេធការទាមទារនោះ ថែមទាំងបង្កើនការវាយប្រហារការពារទឹកដីដែលខ្លួនវាយដណ្តើមបាន។

អ៊ុយក្រែនជារឿយៗចូលដៃជាមួយលោកខាងលិចដឹកនាំដោយសហរដ្ឋអាមេរិកចោទប្រកាន់ចិនថា បានផ្គត់ផ្គង់អាវុធទៅឱ្យរុស្ស៊ីសម្រាប់ការធ្វើសង្គ្រាមនៅអ៊ុយក្រែនទៀតផង ប៉ុន្តែចិនបានបដិសេធ។

រហូតដល់ រដ្ឋមន្ត្រីការបរទេសអ៊ុយក្រែន លោក លោក Dmytro Kuleba បានបំពេញទស្សនកិច្ចនៅចិនលើកដំបូងកាលខែកក្កដា ទើប ប្រធានាធិបតីអ៊ុយក្រែន លោក វ៉ុលឌីមៀ ហ្សេឡេនស្គី បានទទួលស្គាល់ថា ចិនមិនបានគាំទ្ររុស្ស៊ីនិងផ្តល់អាវុធឱ្យរុស្ស៊ីក្នុងសង្គ្រាមនោះទេ។ រហូតដល់ពេលនេះ រដ្ឋមន្ត្រីការបរទេសអ៊ុយក្រែននិងចិនបានជួបគ្នាចំនួនពីរលើករួចមកហើយដើម្បីជជែករកដំណោះស្រាយសន្តិភាព។

សម្រាប់ប្រទេសឥណ្ឌាវិញ រដ្ឋាភិបាលរបស់លោកហ្សេឡេនស្គីហាក់បានសម្តែងការខកចិត្តម្តងម្កាល ដោយសារជំហររបស់ឥណ្ឌាមិនចោទប្រកាន់ និងរួមគ្នាដាក់ទណ្ឌកម្មសេដ្ឋកិច្ចនិងការទូតជាមួយបច្ចឹមប្រទេសលើប្រទេសរុស្ស៊ី ដោយបន្តធ្វើមិនដឹងមិនឮចំពោះសោកនាដកម្មកើតមាននៅប្រទេសអ៊ុយក្រែន។

ក្នុងពេលមួយដែលនាយករដ្ឋមន្ត្រីឥណ្ឌា ណារ៉េនដ្រា ម៉ូឌី បានទៅបំពេញទស្សនកិច្ចចុងក្រោយនៅថ្ងៃទី៨-៩ខែកក្កដា ទៅកាន់ប្រទេសរុស្ស៊ីដោយឱបរឹតយ៉ាងណែនដៃជាមួយមេដឹកនាំរុស្ស៊ី លោក វ៉្លាឌីមៀ ពូទីន ចំថ្ងៃដែលរុស្ស៊ីវាយប្រហារលើមន្ទីរពេទ្យនៅទីក្រុងកៀវ ដោយបានសម្លាប់អ្នកជំងឺនិងកុមារជាច្រើន លោក ហ្សេឡេនស្គីសំដែងការខកខិតមិនធ្លាប់មាន។

តាមរយៈការខកចិត្តនោះ នាយករដ្ឋមន្ត្រីឥណ្ឌាក៏បានប៉ះប៉ូវសងអ៊ុយក្រែនវិញនូវការស្តីបន្ទោសការវាយប្រហាររបស់រុស្ស៊ី និងដាក់ពេលវេលាសម្រាប់ទស្សនកិច្ចនៅអ៊ុយក្រែនដែលគេជឿជាក់ថា លោក ម៉ូឌី ប្រឹងប្រែងដើម្បីនាំយកលក្ខខណ្ឌសម្រាប់នាំភាគីទាំងពីរទៅរកតុចរចា។

សម្រាប់មេដឹកនាំនៃប្រទេសរុស្ស៊ីវិញ ជំហររបស់ចិននិងឥណ្ឌាគឺរុស្ស៊ីអាចទទួលយកបានតាំងពីដើមសង្គ្រាមរហូតដល់បច្ចុប្បន្ន ដោយរុស្ស៊ីរក្សាទំនាក់ទំនងពាណិជ្ជកម្មនិងការទូត បានយ៉ាងល្អ។

សរុបសេចក្តីមក ជម្លោះប្រដាប់អាវុធរុស្ស៊ីនិងអ៊ុយក្រែនបានចំណាយពេលអស់២ឆ្នាំកន្លះ ឬរយៈពេល៣០ខែគត់គិតត្រឹមថ្ងៃទី២៤ខែសីហាកន្លងទៅនេះ ប្រទេសទាំងពីរមិនបានបង្ហាញភាពឈ្នះដាច់ណាត់ក្នុងសង្គ្រាមធំបំផុតនៅដើមសតវត្សរ៍ទី២១នេះទេ។

ផ្ទុយទៅវិញភាគីទាំងពីរហាក់បានបង្ហាញជំហរចង់ចរចាក្នុងរយៈពេលក្រោយនេះ ដើម្បីបញ្ចប់សង្គ្រាមដ៏រុំារ៉ៃ ដោយភាគីទាំងសងខាងប្រើប្រាស់បច្ចេកវិទ្យាដ៏ច្រើនលើសលប់សម្រាប់ជំនួយដល់ការប្រយុទ្ធបង្កការបាត់បង់ជីវិតកងទ័ពទាំងសងខាង និងការខូចខាតសម្ភារៈយោធា និងហេដ្ឋារចនាសម្ព័ន្ធយ៉ាងធ្ងន់ធ្ងរ។

រហូតដល់ដំណាកកាលចុងក្រោយនេះ ជំហររបស់ចិននិងឥណ្ឌាសុទ្ធតែត្រូវបានស្វាគមន៍ដោយភាគីជម្លោះអ៊ុយក្រែននិងរុស្ស៊ីដែលអាចនាំយកលក្ខខណ្ឌចរចាសន្តិភាព៕

រ៉ាន់ រើយ

The post [វិភាគអន្តរជាតិ] ចិននិងឥណ្ឌាប្រជែងគ្នានាំយកសន្តិភាពក្នុងសង្គ្រាមអ៊ុយក្រែន-រុស្ស៊ី appeared first on Kampuchea Thmey Daily.

Narendra Modi Archives - Kampuchea Thmey Daily

​​ផ្ទុះ​ឆេះ​រោងចក្រ​​​ផលិតគ្រឿងផ្ទុះ​នៅឥណ្ឌាបណ្តាល​ឲ្យស្លាប់​និងរបួស​​៣៥នាក់​

​៤ប្រទេស ​មាន​​​ប្រជាជន​ជិះយន្តហោះ​ដែលធ្លាក់​នៅ​ឥណ្ឌាថ្ងៃ​នេះ​​

​ម៉ូឌី ​​​រៀប​រាប់​ពីសោកនាដកម្ម​ធ្លាក់យន្តហោះ ឯប៉ូលិស​ថា«គ្មាន​​អ្នកនៅរស់ឡើយ​»

​​ប្រតិបត្តិការ​យោធាឥណ្ឌា​ឈ្មោះ «Sindoor» មាន​អត្ថន័យយ៉ាងណា ហើយ អ្វីជាគោលដៅ?​