NPIC Archives - Kampuchea Thmey Daily

ពលរដ្ឋ និង យុវជនមកពីគ្រួសារក្រីក្រជាង ៤ ពាន់នាក់ ទទួលបានជំនាញ ចំណូលសមរម្យ ក្រោយទទួលការបណ្ដុះបណ្ដាលក្នុងកម្មវិធី ១,៥ លាន របស់ សម្ដេចធិបតី

អ៊ិន ពិសី — Thu, 21 May 2026 10:22:19 +0000

ប្រជាពលរដ្ឋ និង យុវជនដែលមកពីគ្រួសារក្រីក្រ និង ងាយរងហានិភ័យ ចំនួនជាង ៤ ០០០ នាក់ ទទួលបានជំនាញពីកម្មវិធីបណ្ដុះបណ្ដាលជំនាញវិជ្ជាជីវៈ និង បច្ចេកទេស (TVET 1.5M) នៅវិទ្យាស្ថានជាតិពហុបច្ចេកទេសកម្ពុជា (NPIC) នៃក្រសួងការងារ និង បណ្ដុះបណ្ដាលវិជ្ជាជីវៈ ក្រោមកម្មវិធីអាហារូបករណ៍របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។

បើតាមវិទ្យាស្ថាន NPIC បានឱ្យដឹងថា គិតចាប់តាំងពីឆ្នាំ ២០២៤ រហូតមកដល់ត្រីមាសទី ១ ឆ្នាំ ២០២៦ វិទ្យាស្ថានបានផ្ដល់អាហារូបករណ៍ដល់ប្រជាពលរដ្ឋ និង យុវជនដែលមកពីគ្រួសារក្រីក្រ និង ងាយរងហានិភ័យសរុបចំនួន ៤ ៣៧០ នាក់ ចុះឈ្មោះចូលរៀនជំនាញបច្ចេកទេសក្នុងកម្មវិធី TVET 1.5M ក្រោមកម្មវិធីអាហារូបករណ៍របស់ សម្ដេចមហាបវរធិបតី ហ៊ុន ម៉ាណែត។

វិទ្យាស្ថាន NPIC កំពុងបណ្ដុះបណ្ដាលជំនាញដល់សិក្ខាកាមចំនួន ២០ មុខជំនាញ ដែលស្ថិតក្រោមកម្មវិធី TVET 1.5M ដើម្បីលើកកម្ពស់ជំនាញវិជ្ជាជីវៈ និង បង្កើនឱកាសការងារជូនដល់អតីតពលករខ្មែរត្រឡប់មកពីថៃផងដែរ។ ក្នុងនោះមានមុខជំនាញទាំង ៦ ដែលមានសិក្ខាកាមចាប់អារម្មណ៍ចុះឈ្មោះចូលរៀនច្រើនជាងគេនៅក្នុងវិទ្យាស្ថាន។

ជំនាញទាំង ៦ នោះរួមមាន ជំនាញ នៃការផលិតនំ , សេវាកម្មបរិក្ខារត្រជាក់ក្នុងគេហដ្ឋាន , ធុរកិច្ចភេសជ្ជៈ , ការរចនាក្រាហ្វិកដោយកុំព្យូទ័រ , ការថែទាំ និង ជួសជុលរថយន្ត , ការកែច្នៃបន្លែ និង ផ្លែឈើ។ ជំនាញទាំងនេះ ត្រូវបានចាត់ទុកជាជំនាញដែលស្របតាមតម្រូវការទីផ្សារការងារ និង អាចបង្កើតឱកាសរកចំណូលបានឆាប់រហ័ស ទាំងការបម្រើការងារនៅតាមស្ថាប័ន ឬ ការបង្កើតអាជីវកម្មផ្ទាល់ខ្លួន។

ចំពោះវគ្គសិក្សាថ្មី នឹងចាប់ផ្តើមចុះឈ្មោះចូលរៀនចាប់ពីថ្ងៃជូនដំណឹងនេះតទៅ។ សម្រាប់ព័ត៌មានអំពីការចុះឈ្មោះចូលរៀន សូមទាក់ទងទៅកាន់ទូរសព្ទលេខ ០១២ ៦៤៩ ២៦២/ ០៨៩ ៤២៦ ០៩៨/ ឬ អញ្ជើញមកវិទ្យាស្ថានជាតិពហុបច្ចេកទេសកម្ពុជា (NPIC) ដែលមានទីតាំងស្ថិតនៅភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

ដើម្បីចូលរៀនក្នុងកម្មវិធីនេះ យុវជនគោលដៅ ត្រូវបំពេញលក្ខខណ្ឌមួយចំនួនដូចជា យុវជនមកពីគ្រួសារក្រីក្រ និង ងាយរងហានិភ័យ , មានអាយុចាប់ពី ១៥ ឆ្នាំឡើង , មានអត្តសញ្ញាណបណ្ណសញ្ជាតិខ្មែរ ឬ សំបុត្រកំណើត , និង មានបណ្ណសមធម៌(កម្រិតភាពក្រីក្រ ១ និង ក្រីក្រ ២) ឬ បណ្ណសម្គាល់គ្រួសារងាយរងហានិភ័យ៕

The post ពលរដ្ឋ និង យុវជនមកពីគ្រួសារក្រីក្រជាង ៤ ពាន់នាក់ ទទួលបានជំនាញ ចំណូលសមរម្យ ក្រោយទទួលការបណ្ដុះបណ្ដាលក្នុងកម្មវិធី ១,៥ លាន របស់ សម្ដេចធិបតី appeared first on Kampuchea Thmey Daily.

លោក ហេង សួរ ៖ វិទ្យាស្ថានNPIC បានដើរតួនាទីយ៉ាងសំខាន់បណ្ដុះបណ្ដាល ក្រុមយុវជនគោលដៅ និងពលរដ្ឋកម្ពុជា ឲ្យមានជំនាញច្បាស់លាស់

អ៊ិន ពិសី — Mon, 12 May 2025 07:45:35 +0000

លោក ហេង សួរ សង្កត់ធ្ងន់ថា វិទ្យាស្ថានជាតិពហុបច្ចេកទេសកម្ពុជា (NPIC) បានដើរតួនាទីយ៉ាងសំខាន់បំផុតក្នុងការបណ្ដុះបណ្ដាលជំនាញដល់ក្រុមយុវជនគោលដៅ និងប្រជាពលរដ្ឋកម្ពុជា ឲ្យមានជំនាញច្បាស់លាស់។

ការសង្កត់ធ្ងន់នេះ ក្នុងឱកាស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និង លោក PARK Jong-Wook ឯកអគ្គរដ្ឋទូត នៃសាធារណរដ្ឋកូរ៉េប្រចាំកម្ពុជា បានអញ្ជើញចូលរួមជាអធិបតីក្នុងពិធីប្រារព្ធខួប ២០ ឆ្នាំ នៃការបង្កើតវិទ្យាស្ថានជាតិពហុបច្ចេកទេសកម្ពុជា (NPIC) និងពិព័រណ៍ការងារលើកទី ៤ ឆ្នាំ ២០២៥ ដែលធ្វើឡើងនៅទីតាំងវិទ្យាស្ថានផ្ទាល់ក្នុងរាជធានីភ្នំពេញ កាលពីព្រឹកថ្ងៃទី ១២ ខែឧសភា ឆ្នាំ ២០២៥ នេះ។

នាឱកាសនោះដែរ លោក ហេង សួរ បានមានប្រសាសន៍ថា ក្នុងរយៈពេល ២០ ឆ្នាំ មកនេះ វិទ្យាស្ថានNPIC បានក្លាយជាគ្រឹះស្ថានបណ្ដុះបណ្ដាលជំនាញដ៏លេចធ្លោមួយ ដោយមានការទទួលស្គាល់យ៉ាងទូលំទូលាយនៅទូទាំងប្រទេស និងលើអន្តរជាតិ តាមរយៈការរក្សាបាននូវគុណភាពបណ្ដុះបណ្ដាលបច្ចេកវិទ្យាទំនើបៗ បរិយាកាសសិក្សា និងការងារ ជាកត្តាផ្ដល់ជូនសិស្ស-និស្សិត និងសិក្ខាកាម ឲ្យមានទាំងចំណេះ ជំនាញ និងសីលធម៌វិជ្ជាជីវៈ ដែលបានធ្វើឲ្យក្រុមហ៊ុន ដៃគូនានា និងអ្នកពាក់ព័ន្ធទុកចិត្ត និងជឿជាក់។

លោករដ្ឋមន្ត្រី មានប្រសាសន៍បន្តថា កត្តាទាំងអស់នេះហើយបានជំរុញឲ្យក្រសួង-ស្ថាប័ន វិស័យឯកជន ដៃគូអភិវឌ្ឍន៍ជាតិ និងអន្តរជាតិ ទទួលស្គាល់ថា វិទ្យាស្ថានជាតិពហុបច្ចេកទេសកម្ពុជា គឺជាគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈមួយដែលមានសក្ដានុពល និងសកម្ម ក្នុងការចូលរួមចំណែកកសាងមូលធនមនុស្សសម្រាប់គាំទ្រដល់សេដ្ឋកិច្ចកម្ពុជា។

លោករដ្ឋមន្ត្រី ក៏បានរំលឹកថា វិទ្យាស្ថានជាតិពហុបច្ចេកទេសកម្ពុជា ជាសមិទ្ធផលដំបូង នៃកិច្ចសហប្រតិបត្តិការរបស់ព្រះរាជាណាចក្រកម្ពុជា និងសាធារណរដ្ឋកូរ៉េ ហើយវិទ្យាស្ថានដ៏ល្បីល្បាញនេះ បានចាប់បើកដំណើរការដំបូងនៅឆ្នាំ ២០០៥ ដែលមានសិស្សចំនួនត្រឹម ២០០ នាក់ ជាមួយនឹង ៨ មុខជំនាញ ប៉ុន្តែមកដល់បច្ចុប្បន្ន វិទ្យាស្ថានមានសិស្ស-និស្សិតចំនួនជាង ៧.៨ ពាន់នាក់ កំពុងសិក្សាលើមុខជំនាញ ២៤ ខណៈសិស្ស-និស្សិតបានបញ្ចប់ការសិក្សាគ្រប់កម្រិតប្រមាណជាង ១,៣ ម៉ឺននាក់ គិតត្រឹមឆ្នាំ ២០២៤។

លោករដ្ឋមន្ត្រី បានសង្កត់ធ្ងន់ថា «ខណៈរាជរដ្ឋាភិបាលកំពុងអនុវត្តកម្មវិធីបណ្ដុះបណ្ដាលជំនាញបច្ចេកទេសវិជ្ជាជីវៈ ១,៥ លាននាក់ យ៉ាងសកម្មនោះ វិទ្យាស្ថាន ក៏បានដើរតួនាទីយ៉ាងសំខាន់បំផុតផងដែរ ក្នុងការបណ្ដុះបណ្ដាលជំនាញដល់ក្រុមយុវជនគោលដៅ និងប្រជាពលរដ្ឋកម្ពុជា ឲ្យមានជំនាញច្បាស់លាស់ ដែលបាននិងកំពុងផ្ដល់ឱកាសឲ្យសិក្ខាកាមមានការងារនៅតាមក្រុមហ៊ុន រោងចក្រ សហគ្រាស និងការក្លាយជាម្ចាស់អាជីវកម្មផងដែរ»។

យ៉ាងណាក៏ដោយជាមួយនឹងមោទនភាព នៃខួប ២០ ឆ្នាំនេះ លោក ហេង សួរ ក្នុងនាមជារដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ក៏បានសង្កត់ធ្ងន់ពីការចូលរួមចំណែករបស់វិទ្យាស្ថានជាតិពហុបច្ចេកទេសកម្ពុជា (NPIC) ក្នុងការកសាងមូលដ្ឋានគ្រឹះដ៏សំខាន់ក្នុងការអភិវឌ្ឍប្រទេសជាតិដែលរាជរដ្ឋាភិបាល ជាពិសេស សម្ដេចមហាបវរធិបតី ហ៊ុន ម៉ាណែត បានយកចិត្តទុកដាក់ខ្ពស់ និងដូចមានកំណត់ក្នុងយុទ្ធសាស្ត្រនានារបស់រាជរដ្ឋាភិបាល និងផែនការសកម្មភាពរបស់ក្រសួងដែលរួមមានគោលនយោបាយជាតិស្ដីពីការអប់រំបណ្ដុះបណ្ដាលបច្ចេកទេស និងវិជ្ជាជីវៈ ឆ្នាំ ២០១៧-២០២៥ ផែនការយុទ្ធសាស្ត្រអភិវឌ្ឍន៍ វិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ២០២៤-២០២៨ និងគោលនយោបាយ និងផែនការពាក់ព័ន្ធផ្សេងទៀតផងដែរ៕

អត្ថបទ ៖ ពិសី

The post លោក ហេង សួរ ៖ វិទ្យាស្ថានNPIC បានដើរតួនាទីយ៉ាងសំខាន់បណ្ដុះបណ្ដាល ក្រុមយុវជនគោលដៅ និងពលរដ្ឋកម្ពុជា ឲ្យមានជំនាញច្បាស់លាស់ appeared first on Kampuchea Thmey Daily.

ផ្លាស់ប្តូរជីវិតពីកូនកសិករដែលមានជីវភាពខ្វះខាត ក្លាយជាម្ចាស់យានដ្ឋានដោយសារជំនាញបច្ចេកទេស

Sorn Phanith — Sat, 01 Jun 2024 07:11:06 +0000

លោក ផុន ប៉ាវ បានផ្លាស់ប្តូរជីវិតពីកូនកសិករដែលមានជីវភាពខ្វះខាត ក្លាយជាម្ចាស់យានដ្ឋាន ក្រោយបញ្ចប់ជំនាញបច្ចេកទេសជួសជុលយានយន្ត នៅវិទ្យាស្ថានជាតិ ពហុបច្ចេកទេសកម្ពុជា «NPIC»។

លោក ផុន ប៉ាវ ដែលជាកូនកសិករមកពីខេត្តតាកែវ ធ្លាប់តែពឹងផ្អែកខ្លាំងលើការធ្វើកសិកម្ម បានគូសបញ្ជាក់ថា ការសិក្សាជំនាញបច្ចេកទេសបានផ្លាស់ប្ដូរជីវិតរបស់លោកជាខ្លាំង ពិសេសអាចឲ្យលោករកចំណូលបានជាប្រចាំ។ លោកបញ្ជាក់ថា៖«គ្រួសារខ្ញុំនៅតែធ្វើកសិកម្ម តែគាត់មិនសូវពឹងខ្លាំងលើកសិកម្មដូចពីមុនទេ។ តាំងពីខ្ញុំបើកយានដ្ឋាននេះមកជាទូទៅវាអត់ស្ងាត់ទេ គឺមានភ្ញៀវរហូត ចំណូលមានរាល់ថ្ងៃគ្រាន់តែតិច ឬច្រើន»។

ទន្ទឹមនេះ លោក ផុន ប៉ាវ បានគូសបញ្ជាក់ទៀតថា សង្គមបច្ចុប្បន្នត្រូវការអ្នកមានជំនាញច្បាស់លាស់ ដូច្នេះការមានជំណាញណាមួយក៏ដោយសុទ្ធសំខាន់សម្រាប់ជីវិតមនុស្សម្នាក់ៗ និងសំខាន់សម្រាប់ការអភិវឌ្ឍន៍សង្គម។ បន្ថែមលើនេះ លោក ផុន ប៉ាវ ក៏បានបំផុសគំនិតយុវជនដែលមិនទាន់មានជំនាញច្បាស់លាស់គួរងាកមកចាប់យកជំនាញណាមួយដែលខ្លួនពេញចិត្ត ដើម្បីអាចមានលទ្ធភាពផ្គត់ផ្គង់ជីវភាពគ្រួសារ និងខ្លួនឯង ទៅថ្ងៃអនាគត៕

The post ផ្លាស់ប្តូរជីវិតពីកូនកសិករដែលមានជីវភាពខ្វះខាត ក្លាយជាម្ចាស់យានដ្ឋានដោយសារជំនាញបច្ចេកទេស appeared first on Kampuchea Thmey Daily.

NPIC បញ្ជូនសិក្ខាកាមចំនួន១២២នាក់ចុះហាត់ការនៅក្រុមហ៊ុនឯកជនដើម្បីដកស្រង់បទពិសោធន៍ពិត

Sokhom Khon — Tue, 07 May 2024 07:10:01 +0000

វិទ្យាស្ថានជាតិពហុបច្ចេកទេសកម្ពុជា (NPIC) បានបញ្ជូនសិក្ខកាមនៃកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ១,៥ លាននាក់ របស់រាជរដ្ឋាភិបាលចំនួន១២២នាក់ចុះហាត់ការនៅក្រុមហ៊ុនឯកជន លើជំនាញចំនួន៤ ដើម្បីដកស្រង់បទពិសោធន៍ពិត ខណៈសិក្ខាកាមរំពឹងខ្ពស់ក្នុងការក្លាយជាបុគ្គលិកពេញសិទ្ធិបន្ទាប់ពីហាត់ការរួច។

ការបញ្ជូនសិក្ខាកាមទៅចុះហាត់ការរបស់វិទ្យាស្ថានជាតិពហុបច្ចេកទេសនៅក្រុមហ៊ុនឯកជននេះ បន្ទាប់ពីសិក្ខាកាមបានសិក្សាជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលអាណត្តិទី៧ បានជិត៤ខែរួចមកហើយ ដោយឡែកការចុះហាត់ការនៅក្រុមហ៊ុនឯកជនពេលនេះ គឺជាវគ្គចុងក្រោយនៃការសិក្សាជំនាញបច្ចេកទេសរបស់សិក្ខាកាម។

បើតាមវិទ្យាស្ថានជាតិពហុបច្ចេកទេសកម្ពុជា (NPIC) ក្រុមហ៊ុនដែលសិក្ខាកាមចុះហាត់ការមានដូចជា Lotus Green Team, A2Z M &e Engineering Co,..Ltd, Fast Green, GTV, A C C E Service, Three L (Cambodia), Sokha Phnom Penh Hotel & Residence, Sokha Phnom Penh, Dara Airport City Hotel & Spa។ ក្នុងនោះជំនាញទាំង៤មានដូចជា ជំនាញដំឡើងបណ្តាញអគ្គិសនី, ការថែទាំ និងជុសជុលរថយន្ត, ការថែទាំ និងជុសជុលអគ្គិសនីរថយន្ត, សេវាកម្មបរិក្ខាត្រជាក់ក្នុងគេហដ្ឋាន, និងផ្នែកទេសចរណ៍ មុខជំនាញការធ្វើនំ។

យុវជន សូ កក្កដា សិក្ខាកាមសិក្សាជំនាញការដំឡើងបណ្តាញអគ្គិសនីក្នុងអាគារនៅវិទ្យាស្ថានជាតិពហុបច្ចេកទេសកម្ពុជាលើកឡើងថា «សាលាបានបញ្ជូនខ្ញុំមកចុះហាត់ការនៅក្រុមហ៊ុន A2Z រយៈពេល៣ខែ បន្ទាប់ពីសិក្សាជំនាញនៅក្នុងថ្នាក់រួច។ ខ្ញុំសប្បាយចិត្តពេលដែលបានចុះហាត់ការនៅក្រុមហ៊ុនឯកជននៅពេលនេះ ពីព្រោះវាជាឱកាសក្នុងពង្រឹងសមត្ថភាពបន្ថែមទៀត»។

យុវជនរូបនេះបន្ថែមថា ការចុះហាត់ការនៅក្រុមហ៊ុនឯកជននេះក៏ទទួលបានប្រាក់ឧបត្ថម្ភពីសំណាក់ក្រុមហ៊ុនសមរម្យជាប្រចាំខែផងដែរ។ ការចុះហាត់ការនៅក្រុមហ៊ុនឯកជននេះ គឺជាឱកាសក្នុងការក្លាយទៅជាបុគ្គលិកពេញសិទ្ធិរបស់ក្រុមហ៊ុនផងដែរ ហើយសង្ឃឹមថា ម្ចាស់ក្រុមហ៊ុននឹងទទួលខ្លួនជាបុគ្គលិកពេញសិទ្ធិបន្ទាប់ពីហាត់ការបាន៣ខែរួច។

គួរកត់សម្គាល់ដែរថា ចាប់តាំងពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១,៥ លាននាក់ សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យត្រូវបានដាក់ឱ្យអនុវត្តដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកាលពីថ្ងៃទី១៤ ខែវិច្ឆិកា ឆ្នាំ២០២៣ និងបានបើកបវេសនកាលវគ្គដំបូងកាលពីថ្ងៃទី១៥ ខែមករា ឆ្នាំ២០២៤ កន្លងទៅ សិក្ខាកាមទូទាំងប្រទេសបាននិងកំពុងសិក្សាជំនាញនានាដែលខ្លួនពេញចិត្ត ខណៈដែលសិក្ខាកាមមួយចំនួនក៏បាននិងកំពុងចុះហាត់ការនៅបណ្តាក្រុមហ៊ុនឯកជន ដើម្បីពង្រឹងសមត្ថភាព និងចាប់យកឱកាសការងារនៅក្រុមហ៊ុនឯកជន បន្ទាប់ពីបញ្ចប់វគ្គហាត់ការរួចផងដែរ៕

The post NPIC បញ្ជូនសិក្ខាកាមចំនួន១២២នាក់ចុះហាត់ការនៅក្រុមហ៊ុនឯកជនដើម្បីដកស្រង់បទពិសោធន៍ពិត appeared first on Kampuchea Thmey Daily.

អ្នកប្រឡងបាក់ឌុបមិនជាប់ កុំអស់សង្ឃឹម អតីតសិស្សម្នាក់ ប្រាប់ពីជំនាញ បើកអាជីវកម្មផ្ទាល់ខ្លួន

អ៊ិន ពិសី — Wed, 29 Nov 2023 07:35:20 +0000

យុវជន ម៉ៅ វ៉ាន់ថេន ជានិស្សិតថ្នាក់បរិញ្ញាបត្ររងជំនាញមេកានិកទូទៅ នៃវិទ្យាស្ថានជាតិពហុបច្ចេកទេសកម្ពុជា (NPIC) លើកទឹកចិត្តដល់យុវជនដែលប្រឡងបាក់ឌុបមិនជាប់ កុំមានការអស់សង្ឃឹម ហើយសូមងាកមកសិក្សាចាប់យកជំនាញបច្ចេកទេសវិញ ព្រោះប្រទេសកម្ពុជាកំពុងត្រូវការអ្នកបច្ចេកទេសជាច្រើន ដូចជាផ្នែកគ្រឿងបន្លាស់នៅតាមរោងចក្រសហគ្រាស ជំនាញជួសជុលគ្រឿងយន្ត ជំនាញមេកានិកទូទៅ និងជំនាញអគ្គិសនីជាដើម…។

យុវជន ម៉ៅ វ៉ាន់ថេន និស្សិតផ្នែកមេកានិកទូទៅ

ក្នុងនាមជាអតីតសិស្សប្រឡងមិនជាប់បាក់ឌុបដែរនោះ យុវជន ម៉ៅ វ៉ាន់ថេន បានអំពាវនាវដល់យុវជនដទៃទៀត កុំយកពេលវេលាប្រព្រឹត្តអំពើមិនល្អក្នុងសង្គម ហើយត្រូវយកពេលមកសិក្សាជំនាញមួយច្បាស់លាស់ដែលអាចជួយខ្លួនឯងបាននាពេលអនាគតវិញ។

យុវជនដែលស្រឡាញ់ជំនាញមេកានិកទូទៅរូបនេះ ក៏បានចែករំលែកបទពិសោធន៍ថា “ទោះបីជាខ្ញុំប្រឡងមិនជាប់បាក់ឌុបក៏ដោយ តែខ្ញុំតាំងចិត្តថា ចូលរៀនថ្នាក់បរិញ្ញាបត្ររងជំនាញបច្ចេកទេសជាមុនសិន ហើយក៏មានគម្រោងបើកអាជីវកម្មផ្ទាល់ខ្លួនផ្នែកមេកានិកទូទៅនៅស្រុកកំណើតពេលរៀនចប់ បន្ទាប់មកបើមានលទ្ធភាព និងពេលវេលាគ្រប់គ្រាន់នោះ ខ្ញុំនឹងបន្តសិក្សាថ្នាក់បរិញ្ញាបត្រថែមទៀត”។

ទន្ទឹមនេះ យុវជន ម៉ៅ វ៉ាន់ថេន បានទទួលដំណឹងថា រាជរដ្ឋាភិបាល បានដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដោយឥតគិតថ្លៃ និងផ្តល់ជូនប្រាក់ឧបត្ថម្ភប្រចាំខែចំនួន ២៨ ម៉ឺនរៀលទៀត សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យទូទាំងប្រទេសចំនួន ១,៥ លាននាក់ ដែលនេះជាដំណឹងល្អណាស់សម្រាប់យុវជនមិនទាន់មានជំនាញច្បាស់លាស់ និងមិនមានលទ្ធភាពចូលរៀនជំនាញវិជ្ជាជីវៈ ឬ ជំនាញបច្ចេកទេស។

ដូចគ្នានេះ យុវជន ច្រឹក ឡេងប៊ុនលី ជានិស្សិតផ្នែកមេកានិករថយន្ត នៃវិទ្យាស្ថាន NPIC ក៏យល់ឃើញថា ក្នុងនាមយុវជនជាទំពាំងស្នងឫស្សី ត្រូវតែមានជំនាញមួយច្បាស់លាស់ដើម្បីខ្លួនឯង និងគ្រួសារ ប្រសើរជាងយកពេលវេលាដើរលេងច្រើនពេក។ យុវជនរូបនេះ ក៏ជំរុញដល់យុវជន គួរចំណាយពេលខ្លីចូលរៀនជំនាញវិជ្ជាជីវៈ ឬ ជំនាញបច្ចេកទេសណាមួយដែលខ្លួនស្រឡាញ់ដោយឥតគិតថ្លៃនៅវិទ្យាស្ថាន NPIC តាមរយៈកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស សម្រាប់យុវជនមកពីគ្រួសារក្រីក្រ និងងាយរងហានិភ័យ ដែលរាជរដ្ឋាភិបាលបានប្រកាសអនុវត្តជាផ្លូវការហើយ។

យុវជន ច្រឹក ឡេងប៊ុនលី និស្សិតផ្នែកមេកានិករថយន្ត

សូមបញ្ជាក់ថា វិទ្យាស្ថានជាតិពហុបច្ចេកទេសកម្ពុជា (NPIC) ដែលមានទីតាំងតាមបណ្ដោយមហាវិថីឈ្នះឈ្នះ ឬផ្លូវកប់ស្រូវ ស្ថិតក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ គឺជាគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈដ៏ធំមួយ កំពុងរង់ចាំស្វាគមន៍យុវជនមកពីគ្រួសារក្រីក្រ គ្រួសារងាយរងហានិភ័យ ក៏ដូចជាបុគ្គល នៃសេដ្ឋកិច្ចក្រៅប្រព័ន្ធ និងក្នុងប្រព័ន្ធ មានអាយុចាប់ពី ១៥ ឆ្នាំឡើង អាចចុះឈ្មោះចូលសិក្សាជំនាញវិជ្ជាជីវៈ និងបច្ចេកទេសកម្រិត ១ រយៈពេលខ្លីដោយឥតគិតថ្លៃ លើវិស័យដូចជា វិស័យសំណង់ វិស័យអគ្គិសនី និងថាមពល វិស័យមេកានិករថយន្ត វិស័យកម្មន្តសាល វិស័យសេវាកម្មធុរកិច្ច និងព័ត៌មានវិទ្យា វិស័យអេឡិចត្រូនិក វិស័យបរិក្ខារត្រជាក់ និងកម្តៅ វិស័យសេវាកម្ម វិស័យទេសចរណ៍ វិស័យកសិកម្ម និងកសិ-ឧស្សាហកម្ម។

សម្រាប់ការស្វែងរកព័ត៌មាន នៃការចុះឈ្មោះ និងស្វែងរកព័ត៌មានផ្សេងៗ នៃវិទ្យាស្ថានជាតិពហុបច្ចេកទេសកម្ពុជា (NPIC) សូមចូលទៅកាន់គេហទំព័រ npic.edu.kh (https://npic.edu.kh/) ឬ តាមរយៈហ្វេសប៊ុកឈ្មោះថា NPIC- National Polytechnic Institute of Cambodia (https://www.facebook.com/npic.edu.kh)៕

សូមទស្សនាវីដេអូខាងក្រោម ៖

អ្នកប្រឡងបាក់ឌុបមិនជាប់កុំអស់សង្ឃឹម យុវជនម្នាក់នេះ ប្រាប់ពីជំនាញដែលមានឱកាសបើកអាជីវកម្មបាន

The post អ្នកប្រឡងបាក់ឌុបមិនជាប់ កុំអស់សង្ឃឹម អតីតសិស្សម្នាក់ ប្រាប់ពីជំនាញ បើកអាជីវកម្មផ្ទាល់ខ្លួន appeared first on Kampuchea Thmey Daily.