ONE Championship Archives - Kampuchea Thmey Daily

ជើងខ្លាំងផ្តួលថៃច្រើនរូប Nabati ត្រូវ ONE តេស្តឃើញសារធាតុហាមឃាត់

Kosal Sem — Thu, 06 Mar 2025 02:37:48 +0000

កីឡាករសញ្ជាតិ រុស្ស៊ី Kiamran Nabati ត្រូវបានស្ថាប័ន ONE Championship ផ្អាកឡើងសង្វៀនរយៈពេល ១ ឆ្នាំ ដោយសារពិនិត្យឃើញវិជ្ជមានសារធាតុហាមឃាត់។

Nabati ប្រកួតនៅ ONE

ការរកឃើញនេះបានកើតឡើង បន្ទាប់ពីការប្រកួតចុងក្រោយរវាងរូបគេ ទល់នឹងអ្នកប្រដាល់ ថៃ Ferrari Fairtex នៅសង្វៀន ONE Friday Fights 95 កាលពីខែមករា កន្លងទៅ ដែលពេលនោះរូបគេបានទទួលជ័យជម្នះ ដោយផ្តួលឱ្យសន្លប់ទឹកទី ១។

មិនមែន Nabati តែម្នាក់នោះទេ ដែលបានតេស្តឃើញវិជ្ជមានសារធាតុហាមឃាត់ សូម្បីដៃគូរបស់គេកីឡាករ Ferrari Fairtex ក៏រកឃើញវិជ្ជមានសារធាតុហាមឃាត់ដូចគ្នាដែរ ប៉ុន្តែកីឡាករ ថៃ រូបនេះនឹងត្រូវផ្អាកពីការឡើងសង្វៀន ONE ត្រឹមរយៈពេល ៣ ខែប៉ុណ្ណោះ។

កីឡាករ Nabati បានសាងកំណត់ត្រាល្អមែនទែននៅសង្វៀន ONE ដោយឆ្លងកាត់ ៥ ប្រកួតជាមួយជើងខ្លាំង ថៃ រូបគេបានឈ្នះទាំង ៥ ប្រកួត ក្នុងនោះអ្នកលេងកណ្តាប់ដៃវ័យ ៣០ ឆ្នាំរូបនេះបានឈ្នះកីឡាករ Pongsiri PK Saenchai, Avatar PK Saenchai, Suablack, Nong-O Hama និងចុងក្រោយបានយកឈ្នះលើ Ferrari Fairtex៕

Nabati ប្រកួតនៅ ONE ទល់នឹង Ferrari Fairtex

ប្រែសម្រួលអត្ថបទ៖ សេម កុសល
ប្រភព៖ Bangkok Post

The post ជើងខ្លាំងផ្តួលថៃច្រើនរូប Nabati ត្រូវ ONE តេស្តឃើញសារធាតុហាមឃាត់ appeared first on Kampuchea Thmey Daily.

សង្វៀន ONE ជួបវិបត្តិ រហូតកាត់បន្ថយបុគ្គលិក ជាច្រើននាក់

chean virakbot — Thu, 17 Oct 2024 07:35:53 +0000

ស្ថាប័នប្រដាល់គុនចម្រុះលំដាប់អាស៊ី ONE Championship បានកាត់បន្ថយបុគ្គលិកបន្ថែមទៀតហើយ បន្ទាប់ពីប៉ុន្មានឆ្នាំចុងក្រោយហាក់មានការថយចុះក្នុងការរៀបចំព្រឹត្តិការណ៍ប្រកួតនៅតំបន់អាស៊ី។

តាមការផ្សាយរបស់សារព័ត៌មាន The Straits Times បានបង្ហាញថា ក្រុមហ៊ុនត្រូវកាត់បន្ថយបុគ្គលិកប្រមាណ២០នាក់គិតចាប់ពីពាក់កណ្តាលខែតុលា ឆ្នាំ២០២៤។ បុគ្គលិកទាំងនោះក៏មាននៅការិយាល័យកណ្តាលក្នុងប្រទេសសិង្ហបុរីផងដែរ។ ការកាត់បន្ថយបុគ្គលិកនេះគឺដើម្បីកាត់បន្ថយលើការចំណាយ។

តាមសេចក្តីរាយការណ៍ បុគ្គលិកដែលត្រូវបានកាត់បន្ថយគឺនៅផ្នែកផ្សព្វផ្សាយ ផ្នែកកីឡាអេឡិចត្រូនិក ផ្នែកហិរញ្ញវត្ថុ ទីផ្សារ និងទំនាក់ទំនងសាធារណៈ។ សង្វៀនប្រដាល់ដ៏មានការិយាល័យនៅតាមបណ្តាប្រទេសផ្សេងៗដូចជា នៅទីក្រុងតូក្យូ ឡូសអេនជឺឡេស ញូវយ៉ក ឡុងដ៍ សៀងហៃ មីឡាន បាងកក ម៉ានីល ហ្សាកាតា និង Bengaluru។

យោងលើកិច្ចប្រជុំតាមអនឡាញកាលពីថ្ងៃទី១៦ ខែតុលា លោក Chatri Sityodtong នាយកប្រតិបត្តិ បានប្រកាសពីការកាត់បន្ថយបុគ្គលិកនេះ។ លោកបានសរសេរតាមអីម៉ែលថា ៖«សូមជ្រាប់ថា ថ្នាក់ដឹកនាំ និងខ្ញុំបានធ្វើការសម្រេចចិត្តដ៏លំបាក ជាមួយនឹងការឈឺចាប់បំផុត»។ ការកាត់បន្ថយបុគ្គលិកនេះដោយសារតែស្ថានភាពសេដ្ឋកិច្ចដ៏លំបាក»។

នៅចាំបានថា កាលពីឆ្នាំ២០២០ ពួកគាត់បានកាត់ប្រាក់ខែរបស់បុគ្គលិក ហើយបន្ទាប់មកបានកាត់បន្ថយបុគ្គលិកអស់ប្រមាណ២០%ទៀត៕

ប្រែសម្រួល៖ វីរបុត្រ

The post សង្វៀន ONE ជួបវិបត្តិ រហូតកាត់បន្ថយបុគ្គលិក ជាច្រើននាក់ appeared first on Kampuchea Thmey Daily.

Rukiya Anpo ថា ខ្លួនអាចប្រកួតនៅ ONE ទោះមិនចុះកុងត្រារយៈពេលវែង

Pha Rothana — Thu, 27 Jun 2024 02:47:05 +0000

ស្ថាប័ន ONE Championship កំពុងសម្លឹងរកការចុះហត្ថលេខាយកកីឡាករជប៉ុន Rukiya Anpo អតីតម្ចាស់ខ្សែក្រវាត់ K-1 Super Lightweight ក្នុងទម្ងន់៦៥គីឡូក្រាម។

ថ្មីៗនេះប្រជាប្រិយភាពរបស់គេកាន់តែកើនឡើង ក្រោយប្រកួតជាមួយអតីតម្ចាស់ខ្សែក្រវាត់ UFC Middleweight កីឡាករ Sean Strickland។ កីឡាករ Rukiya Anpo បានបង្ហើបថា រូបគេកំពុងពិភាក្សាជាមួយស្ថាប័ន ONE Championship។

នៅក្នុងវីដេអូ YouTube កីឡាករ Anpo បាននិយាយថា ៖«ឥឡូវនេះខ្ញុំបានពិភាក្សាជាមួយ ONE។ ខ្ញុំមិនអាចនិយាយលម្អិតអំពីកិច្ចសន្យាទេ ប៉ុន្តែខ្ញុំអាចប្រកួតនៅ ONE ទោះមិនទាន់ចុះកុងត្រារយៈពេលវែង។ សម្រាប់គំនិតផ្ទាល់ខ្លួន ខ្ញុំមិនចូលចិត្តការចុះកុងត្រាផ្ដាច់មុខទេ។ ខ្ញុំចង់មានសេរីភាព ទៅសង្វៀនណាក៏បាន»។

ចាប់តាំងពីស្ថាប័ន ONE Championship ចុះហត្ថលេខាលើកិច្ចព្រមព្រៀងជាមួយសេវាកម្មស្ទ្រីមរបស់ប្រទេសជប៉ុន (U-Next) គេសង្កេតឃើញថាមានកីឡាករប្រដាល់ជប៉ុនជាច្រើនបានផ្លាស់ទៅកាន់ស្ដាប័នមួយនេះ៕

ប្រភព៖ Beyondkick
ប្រែសម្រួល៖ ផា រតនា

The post Rukiya Anpo ថា ខ្លួនអាចប្រកួតនៅ ONE ទោះមិនចុះកុងត្រារយៈពេលវែង appeared first on Kampuchea Thmey Daily.

មកស្តាប់សំដី Takeru យំផងនិយាយផងក្រោយចាញ់ Superlek

chean virakbot — Mon, 29 Jan 2024 03:20:37 +0000

កីឡាករឃីកបុកស៊ីងជប៉ុន Takeru Segawa បានបរាជ័យក្នុងការប្រកួតដណ្តើមខ្សែក្រវាត់ពីកីឡាករថៃ Superleek Kiatmoo9 កាលពីរសៀលថ្ងៃអាទិត្យ ទី២៨ ខែមករា ឆ្នាំ២០២៤ នៅប្រទេសជប៉ុនជាការប្រកួតលើកដំបូងនៅសង្វៀន ONE។

ការពិតទៅលើសង្វៀនរយៈពេល៥ទឹកពេញ ជើងខ្លាំងទាំងពីរមានជំនាញរៀងៗខ្លួន។ ម្ចាស់ខ្សែក្រវាត់ ONE Flyweight ពិភពលោកបានប្រើរន្ទះជើងទាត់ជើងក្រោមផ្ទួនៗចាប់ពីទឹកទី១ដល់៥ ហើយក៏បានប្រើជង្គង់ជាច្រើននៅទឹកទី៤ និងទី៥ ព្រមជាមួយគ្នានេះរូបគេក៏បានប្រើកណ្តាប់ដៃច្រើនដែរ។

ជាមួយគ្នានេះ កីឡាករម្ចាស់ផ្ទះ Takeru បានព្យាយាមដើរចូលវ៉ៃទាំង៥ទឹកជាមួយនឹងការព្យាយាមប្រើកណ្តាប់ដៃឆ្វេង-ស្តាំង។ អ្វីដែលគួរឲ្យចាប់អារម្មណ៍នៅទឹកទី២ កីឡាករជប៉ុនបានវ៉ៃកណ្តាប់ដៃសន្ធាប់យ៉ាងខ្លាំងដែលធ្វើឲ្យ Superlek តដៃលែងរួច ប៉ុន្តែរួចគេអាចទប់ទល់បាន។ ក្រៅពីកណ្តាប់ដៃ Takeru ក៏បានប្រើជើងទាត់ច្រើនដែរ។

គូនេះមិនសូវជាលើសខ្វះគ្នាប៉ុន្មានឡើយ។ ប្រសិនបើប្រកួតមិត្តភាពអាចនឹងស្មើ ប៉ុន្តែដោយសារការប្រកួតដណ្តើមខ្សែក្រវាត់ ដូច្នេះចៅក្រមបានផ្តល់ពិន្ទុឲ្យម្ចាស់ខ្សែក្រវាត់ជាអ្នកឈ្នះ។

ក្រោយចប់ការប្រកួត Takeru ពិតជាសោកស្តាយយ៉ាងខ្លាំងដែលមិនអាចសម្រេចបំណងខ្លួន និងអ្នកគាំទ្រ។ រូបគេបាននិយាយទាំងយំក្រោយចប់ការប្រកួតថា ៖«ខ្ញុំពិតជាចង់ឈ្នះខ្លាំងណាស់សម្រាប់ការប្រកួតនេះ។ ខ្ញុំពិតជាខំប្រឹងហ្វឹកហាត់ខ្លាំងណាស់អស់រយៈពេលជាយូរមកហើយដើម្បីស្វែងរកជ័យជម្នះជូនបងប្អូនអ្នកគាំទ្រ តែចុងក្រោយខ្ញុំមិនអាចធ្វើបាន។ ខ្ញុំពិតជាសោកស្តាយ ហើយខ្ញុំមិនដឹងថា ខ្ញុំបានធ្វើអ្វីល្អខ្លាំងជាងការប្រកួតលើកនេះទេ។ ខ្ញុំសូមអរគុណច្រើនដល់អ្នករាល់គ្នាដែលបានគាំទ្រយ៉ាងខ្លាំង»។

គិតទាំងលើកនេះ Takeru បានចាញ់៤ដងហើយក្នុងចំណោមការប្រកួត៤៧ដងក្នុងអាជីពរបស់ខ្លួន ដែលឈ្នះ៤៣ដង និងផ្តួលដៃគូឲ្យសន្លប់៤៣ដងក្នុងអាជីព។ តាមពិតទៅ រូបគេត្រូវប្រកួតជាមួយកីឡាករ Rodtang ប៉ុន្តែដោយសារកីឡាករថៃម្នាក់នេះរបួសត្រូវបានជំនួសដោយកីឡាករ Superlek។

តាមព័ត៌មានដែលបានផ្សាយ Takeru ទទួលបានតម្លៃខ្លួប្រហែលជា៧៥ម៉ឺនដុល្លារ ខណៈ Superlek ទទួលបានប្រហែលជាក្រោម១០ម៉ឺនដុល្លារ ប៉ុន្តែតាមរយៈជ័យជម្នះនេះរូបគេទទួលបានប្រាក់រង្វាន់លើកទឹកចិត្តបន្ថែម៥ម៉ឺនដុល្លារ៕

អត្ថបទ៖ វីរបុត្រ

The post មកស្តាប់សំដី Takeru យំផងនិយាយផងក្រោយចាញ់ Superlek appeared first on Kampuchea Thmey Daily.

Superlek កំពុងកាន់កំណត់ត្រាមិនទាន់ចាញ់ជិត៣ឆ្នាំមុនប៉ះជើងខ្លាំង Takeru

Pha Rothana — Thu, 25 Jan 2024 01:58:18 +0000

កីឡាករប្រដាល់ Superlek មិនទាន់ស្គាល់បរាជ័យឡើយសម្រាប់ការប្រកួតផ្លូវការក្នុងរយៈពេលជិត៣ឆ្នាំចុងក្រោយនេះ មុនពេលរូបគេបានដាក់ខ្សែក្រវាត់ឃីកបុកស៊ីងរបស់ខ្លួនឲ្យជើងខ្លាំងជប៉ុន Takeru ដណ្តើមនាថ្ងៃអាទិត្យ ទី២៨ ខែមករា ឆ្នាំ២០២៤ នៅក្នុងទីក្រុងតូក្យូ ប្រទេសជប៉ុន។

មុនពេលជួបជើងខ្លាំងជប៉ុន Takeru កីឡាករ Superlek បានយកឈ្នះជើងខ្លាំងថៃកីឡាករ Rodtang ដោយពិន្ទុកាលពីថ្ងៃទី២២ ខែកញ្ញា ឆ្នាំ២០២៣។ អ្នកប្រដាល់វ័យ ២៨ ដែលជំនាញប្រើជើងទាត់សន្ធាប់រូបនេះកំពុងមានកំណត់ត្រាល្អ ដោយ១០ប្រកួតចុងក្រោយមិនទាន់ស្គាល់បរាជ័យឡើយ។ ស្ថិតិ១០ប្រកួតចុងក្រោយរូបគេបានយកឈ្នះកីឡាករ Rungkit ជាជនជាតិថៃដូចគ្នាកាលពីថ្ងៃទី៨ ខែមេសា ឆ្នាំ២០២១ ហើយនៅថ្ងៃទី៧ ខែមេសា ឆ្នាំ២០២២ បន្តយកឈ្នះមិត្តរួមជាតិ Superball។

នៅថ្ងៃទី២០ ខែឧសភា ឆ្នាំ២០២២ Superlek បានយកឈ្នះកីឡាករជប៉ុន Taiki Naito ក្នុងកម្មវិធី ONE 157 នៅប្រទេសសិង្ហបុរី ហើយនៅខែសីហាឆ្នាំដដែល រូបគេបានផ្ដួលឲ្យកីឡាករប្រេស៊ីល Walter Goncalves ឲ្យបង់បោះការប្រកួតក្នុងទឹកទី១ នៅសង្វៀន ONE និងចុងឆ្នាំ២០២២ រូបគេបានយកឈ្នះមិត្តរួមជាតិ Panpayak នៅសង្វៀន ONE ក្នុងប្រទេសហ្វីពីលីន។

ដើមឆ្នាំ២០២៣ Superlek បានយកឈ្នះកីឡាករអេស្ប៉ាញ Daniel Puertas នៅសង្វៀន ONE ក្នុងប្រទេសថៃ។ ក្នុងខែមីនា រូបគេបានផ្ដួលកីឡាករអូស្រ្ដាលី Danial Williams ឲ្យបោះបង់ការប្រកួតនៅសង្វៀន ONE ប្រទេសសិង្ហបុរី។

ថ្ងៃទី២៣ ខែមិថុនា ឆ្នាំ២០២៣ Superlek បន្តកំណត់ត្រាមិនដែលចាញ់របស់ខ្លួនទៀត តាមរយៈការផ្ដួលកីឡាករកូនកាត់ថៃ-អាល់ហ្សេរី Nabil Anane ឲ្យបង់បោះការប្រកួតនៅទឹកទី១ ហើយនៅថ្ងៃទី១៥ ខែកក្ដដា បន្តយកឈ្នះកីឡាកររុស្ស៊ី Tagir Khalilov ដោយអាជ្ញកណ្ដាលបញ្ឍប់ការប្រកួតក្នុងទឹកទី២ និងចុងក្រោយបំផុតបានយកឈ្នះកីឡាករជើងខ្លាំងមិត្តរួមជាតិ Rodtang ដោយពិន្ទុជាឯកច្ឆន្ទ។

រង់ចាំតាមដានទាំងអស់គ្នាថាតើ Superlek អាចបន្តកំណត់ត្រាមិនចាញ់ និងការពារខ្សែក្រវាត់ឃីកបុកស៊ីងពិភពលោក ONE flyweight របស់ខ្លួនបានទេ នាថ្ងៃអាទិត្យនេះនៅពេលប៉ះជើងខ្លាំងម្ចាស់ផ្ទះជប៉ុន Takeru ក្នុងកម្មវិធី ONE 165 ក្នុងទីក្រុងតូក្យូ៕

អត្ថបទ៖ ផា រតនា

The post Superlek កំពុងកាន់កំណត់ត្រាមិនទាន់ចាញ់ជិត៣ឆ្នាំមុនប៉ះជើងខ្លាំង Takeru appeared first on Kampuchea Thmey Daily.

ខាន់ ចេសា និយាយពីកំហុសរបស់ខ្លួនក្នុងការប្រកួតនៅសង្វៀនONE

Pha Rothana — Mon, 02 Oct 2023 06:32:13 +0000

ព្រឹត្តិការណ៍ ONE Fight Night 14 កាលពីថ្ងៃសៅរ៍គឺជាការប្រកួតលើកដំបូងរបស់កីឡាការិនី ខាន់ ចេសា នៅសង្វៀន ONE Championship ប៉ុន្តែបានចាញ់កីឡាការិនីអាមេរិក Daniel Kelly ដោយពិន្ទុ។

ក្រោយបញ្ចប់ការប្រកួតកីឡាការិនី ខាន់ ចេសា បាននិយាយថា ៖«នេះមិនមែនជាលទ្ធផលដែលខ្ញុំចង់បានទេ តែជារឿងធម្មតាក្នុងកីឡា។ ខ្ញុំដឹងថា ក្បាច់ជឺជីតស៊ូរបស់ខ្ញុំល្អជាង (Kelly) ប៉ុន្តែគាត់មានយុទ្ធសាស្ត្រល្អគឺបានរុញឲ្យខ្ញុំទៅទល់នឹងទ្រុង។ ខ្ញុំក៏មានឱកាសល្អមួយចំនួនដែរ ដូចជាការនៅក្រោយខ្នងរបស់ Kelly។ កំហុសរបស់ខ្ញុំគឺការធ្វើមិនបានសម្រេចនៅពេលឱកាសឃ្លេនៅពីក្រោយហើយ។ នេះជាមេរៀនផ្តល់ឲ្យខ្ញុំនូវអ្វីដែលត្រូវហ្វឹកហាត់បន្ថែម»។

កីឡាការិនី ខាន់ ចេសា ក៏បានទទួលស្គាល់សមត្ថភាពរបស់កីឡាការិនី Danielle Kelly គឺជាកីឡាការិនីម្នាក់ដែលពូកែទប់ការពារ និងរកក្បាច់រំដោះខ្លួនចេញពីស្ថានភាពដែលគ្រោះថ្នាក់នៅក្នុងអំឡុងពេលការប្រកួត។

នេះជាការប្រកួតលើកដំបូងរបស់ ខាន់ ចេសា ខណៈ Danielle Kelly ធ្លាប់ប្រកួត៣លើកមិនចាញ់សោះ មុនប៉ះ ខាន់ ចេសា៕

ខាន់ ចេសា បានបន្ថែមថា ៖«សូមអរគុណដល់ស្ថាប័ន ONE និងលោក Chatri ដែលបានផ្តល់ឱកាសឲ្យខ្ញុំបានបង្ហាញសមត្ថភាពដ៏អស្ចារ្យ ហើយខ្ញុំនឹងមកកាន់ទីនេះម្តងទៀត»។

អត្ថបទ៖ ផា រតនា

The post ខាន់ ចេសា និយាយពីកំហុសរបស់ខ្លួនក្នុងការប្រកួតនៅសង្វៀនONE appeared first on Kampuchea Thmey Daily.

សោកស្តាយ ខាន់ ចេសា ចាញ់ពិន្ទុ Danielle អត់បានខ្សែក្រវាត់ ONE

Pha Rothana — Sat, 30 Sep 2023 04:41:10 +0000

កីឡាការិនីកម្ពុជា-អាមេរិក ខាន់ ចេសា មិនបានក្លាយជាម្ចាស់ខ្សែក្រវាត់លើកដំបូង នៅសង្វៀន ONE Championship ក្រោយចាញ់កីឡាការិនី Danielle Kelly ដោយពិន្ទុមិនឯកច្ឆន្ទ។

ការប្រកួតធ្វើឡើងមួយទឹករយៈពេល ១០នាទី លក្ខខណ្ឌនៃការប្រកួតគឺតម្រូវឲ្យប្រើក្បាច់ឃ្លេ តាមបែបកីឡាជឺជីតស៊ូ។ នេះជាការប្រកួតដំបូងរបស់កីឡាការិនី ខាន់ ចេសា នៅសង្វៀន ONE ខណៈ Danielle Kelly លើកទី៤គិតទាំងឈ្នះកីឡាការិនីកម្ពុជា ។

(រូបភាពផ្ដល់ឲ្យដោយ ONE Championship)

ក្នុងការប្រកួត កីឡាការិនីទាំង២បានព្យាយាមប្រើក្បាច់ឃ្លេ និងបច្ចេកទេសរៀងៗខ្លួន ដើម្បីធ្វើយ៉ាងណាឃ្លេគូប្រកួតឲ្យសុំចុះចាញ់។ ខាន់ ចេសា ក៏មានឱកាសល្អក្នុងការឃ្លេ Kelly ដែរ ប៉ុន្តែធ្វើមិនបានសម្រេច ដោយសារ Kelly ជាកីឡាការិនីដែលទប់ និងរកវីធីរំដោះខ្លួនចេញពីស្ថានការនោះបាន។ ជាលទ្ធផល កីឡាការិនី Danielle Kelly បានយកឈ្នះកីឡាការិនី ខាន់ ចេសា ដោយពិន្ទុមិនឯកច្ឆន្ទ និងក្លាយជាម្ចាស់ខ្សែក្រវាត់ជំនាញឃ្លេពិភពលោក៕

(រូបភាពផ្ដល់ឲ្យដោយ ONE Championship)

អត្ថបទ៖ ផា រតនា

The post សោកស្តាយ ខាន់ ចេសា ចាញ់ពិន្ទុ Danielle អត់បានខ្សែក្រវាត់ ONE appeared first on Kampuchea Thmey Daily.

ព្រឹកស្អែក Danielle រំពឹងសងសឹក ខាន់ ចេសា បានសម្រេចដើម្បីខ្សែក្រវាត់ ONE

Pha Rothana — Fri, 29 Sep 2023 04:41:51 +0000

ព្រឹត្តិការណ៍ ONE Fight Night 14 នឹងធ្វើនៅថ្ងៃសៅរ៍ស្អែកនេះ ចាប់ពីម៉ោង៧ព្រឹកក្នុងប្រទេសសិង្ហបុរីដែលមានការប្រកួតកីឡាការិនី៤គូដើម្បីដណ្តើមខ្សែក្រវាត់ពិភពលោក។ ក្នុងនោះកីឡាការិនីអាមេរិក Danielle Kelly ប្រកួតជាមួយកីឡាការិនីកម្ពុជា ខាន់ ចេសា លើជំនាញឃ្លេ។

Danielle Kelly បាននិយាថា៖«ខ្ញុំមិនគិតថា ខ្ញុំអន់ទេ។ ទោះខ្ញុំធ្លាប់ចាញ់ ចេសា តែនោះជារឿងអតីតកាល។ វាមានរយៈពេលជិត២ឆ្នាំហើយ។ អ្វីៗមានការប្រែប្រួល។ ខ្ញុំពិតជាទន្ទឹងរង់ចាំការប្រកួតគួរឱ្យអស្ចារ្យមួយនេះ ហើយបង្ហាញពីអ្វីដែលខ្ញុំបានអភិវឌ្ឍកន្លងមក»។

ជួបគ្នាលើកទី១កាលពីឆ្នាំ២០២១ នៅទឹកដីអាមេរិក Kelly បានចាញ់ ចាន់ ចេសា ដោយពិន្ទុ ប៉ុន្តែក្នុងរយៈពេល២ឆ្នាំចុងក្រោយនេះ អ្នកទាំងពីរបានរីកចម្រើនគួរឲ្យកត់សំគាល់។

កីឡាការិនី Danielle Kelly បានចុះកុងត្រាចូល ONE Championship កាលពីឆ្នាំ ២០២២ ជាទីកន្លែងដែលនាងបានប្រកួត៣លើកដោយមិនទាន់ស្គាល់បរាជ័យឡើយ។ លើកទី១ស្មើពិន្ទុកីឡាការិនីជប៉ុន Mei Yamaguchi, លើកទី២ឈ្នះពិន្ទុកីឡាការិនីរុស្ស៊ី Mariia Molchanova និងលើកទី៣ឈ្នះពិន្ទុកីឡាការិនីជប៉ុន Ayaka Miura។

ការប្រកួតថ្ងៃស្អែក កីឡាការិនីទាំង២សុទ្ធតែមានទំនុកចិត្តដូចគ្នា។ សម្រាប់លក្ខខណ្ឌនៃការប្រកួតគឺជាការប្រកួតបែបឃ្លេមួយទឹកមានរយៈពេល១២នាទី៕

អត្ថបទ៖ ផា រតនា

The post ព្រឹកស្អែក Danielle រំពឹងសងសឹក ខាន់ ចេសា បានសម្រេចដើម្បីខ្សែក្រវាត់ ONE appeared first on Kampuchea Thmey Daily.

ONE Championship Archives - Kampuchea Thmey Daily

ជើង​ខ្លាំង​ផ្តួល​ថៃ​ច្រើន​រូប Nabati ត្រូវ ONE តេស្តឃើញសារធាតុហាម​ឃាត់

សង្វៀន​ ONE ជួបវិបត្តិ រហូត​កាត់បន្ថយបុគ្គលិក ជា​ច្រើននាក់

Rukiya Anpo ថា ខ្លួនអាចប្រកួតនៅ ONE ទោះមិនចុះកុងត្រារយៈពេលវែង

មកស្តាប់សំដី Takeru យំផងនិយាយផងក្រោយចាញ់ Superlek

Superlek កំពុងកាន់កំណត់ត្រាមិនទាន់ចាញ់ជិត៣ឆ្នាំមុនប៉ះជើងខ្លាំង Takeru

ខាន់ ចេសា និយាយពីកំហុសរបស់ខ្លួនក្នុងការប្រកួតនៅសង្វៀនONE

សោកស្តាយ ខាន់ ចេសា ចាញ់ពិន្ទុ Danielle អត់បានខ្សែក្រវាត់ ONE

ព្រឹកស្អែក Danielle រំពឹងសងសឹក ខាន់ ចេសា បានសម្រេចដើម្បីខ្សែក្រវាត់ ONE

ជើងខ្លាំងផ្តួលថៃច្រើនរូប Nabati ត្រូវ ONE តេស្តឃើញសារធាតុហាមឃាត់

សង្វៀន ONE ជួបវិបត្តិ រហូតកាត់បន្ថយបុគ្គលិក ជាច្រើននាក់