តាមរបាយការណ៍របស់រដ្ឋបាលខណ្ឌទួលគោក នៅថ្ងៃទី ២ ខែកក្កដា ឆ្នាំ ២០២៦ នេះ បានឲ្យដឹងថា អនុវត្តតាមអនុក្រឹត្យលេខ ០៣ អនក្រ.បក ចុះថ្ងៃទី ៥ ខែមករា ឆ្នាំ ២០២៦ និង បទញ្ជាលេខ ០១ បប ចុះថ្ងៃទី ១៤ ខែកក្កដា ឆ្នាំ ២០២៥ របស់រាជរដ្ឋាភិបាល និង ក្រោមការដឹកនាំរបស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ នៅថ្ងៃទី ២ ខែកក្កដា ឆ្នាំ ២០២៦ លោក ជា ពិសី អភិបាល នៃគណៈអភិបាលខណ្ឌ និងជាប្រធានគណៈបញ្ជាការឯកភាពរដ្ឋបាលខណ្ឌទួលគោក បានដឹកនាំ និង ប្រគល់ភារកិច្ចជូនគណៈអភិបាលខណ្ឌ ដឹកនាំកម្លាំងចុះរដ្ឋបាល និង ស្រង់ស្ថិតិជនបរទេសនៅតាមបុរី សណ្ឋាគារ ខុនដូ អាផាតមិន ការដ្ឋានសំណង់ អគារស្នាក់នៅរួម ផ្ទះសំណាក់ និង ផ្ទះជួល នៅតាមសង្កាត់ទាំង ១០ បានចំនួន ១៣ ទីតាំង ក្នុងនោះមានជនបរទេសស្នាក់នៅសរុបចំនួន ៣៨ នាក់ (ស្រីចំនួន ១២ នាក់) និង ចំនួន ១០ សញ្ជាតិ មានលិខិតឆ្លងដែន និង ទិដ្ឋការត្រឹមត្រូវ ពុំមានបទល្មើស Online Scams កើតឡើងឡើយ៕

អត្ថបទ ៖ ស្រីរ័ត្ន

The post ថ្ងៃទី ២ កក្កដា អាជ្ញាធរខណ្ឌទួលគោក ចុះពិនិត្យ ១៣ ទីតាំង រកឃើញជនបរទេស ៣៨ នាក់ តែពុំមានបទល្មើស Online Scams ទេ appeared first on Kampuchea Thmey Daily.

ជាក់ស្តែង កាលពីថ្ងៃទី ០១ ខែកក្កដា ឆ្នាំ ២០២៦ ក្រោមការចង្អុលបង្ហាញពី លោក កៀង ល័ក្ស អភិបាលខណ្ឌចំការមន ក្រុមការងារចម្រុះ បានចុះត្រួតពិនិត្យរដ្ឋបាល និង បង្ក្រាបទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ចំនួន ០៣ គោលដៅ ក្នុងមូលដ្ឋាន។

ចំពោះរង្វង់ប្រតិបត្តិការនេះ អាជ្ញាធរជំនាញ បានចុះត្រួតពិនិត្យ ០៣ ទីតាំង (ខុនដូ អាផាតមិន)។ រកឃើញជនបរទេសចំនួន ៥០ នាក់ (១៧ សញ្ជាតិ) មានលិខិតឆ្លងដែន និង ទិដ្ឋាការត្រឹមត្រូវ។ ក្នុងនោះដែរ ឃាត់ខ្លួនជនជាតិកូរ៉េចំនួន ០២ នាក់ (មានដីកាបញ្ជាឲ្យចាប់ខ្លួន/និវេទក្រហម) និង ជនជាតិខ្មែរ ០២ នាក់ ដើម្បីសាកសួរ និង ដកហូតសម្ភារៈបច្ចេកវិទ្យាជាច្រើនគ្រឿង ព្រមទាំងសម្រេចបិទបន្ទប់សង្ស័យជាបណ្ដោះអាសន្ន។

បច្ចុប្បន្ន ជនបរទេស និង ខ្មែរ ចំនួន ០៤ នាក់ ត្រូវបានអាជ្ញាធរឃាត់ខ្លួនយកទៅសួរនាំ ដើម្បីបន្តនីតិវិធី៕
អត្ថបទ ៖ រដ្ឋា

The post បង្ក្រាបទីតាំងសង្ស័យប្រព្រឹត្តបទល្មើស Online Scams ឃាត់ខ្លួនជនជាតិកូរ៉េ និង ខ្មែរ ០៤ នាក់ នៅខណ្ឌចំការមន appeared first on Kampuchea Thmey Daily.

លើក​ឡើង​ក្នុង​ពិធី​សំណេះ​សំណាលជាមួយ​តំណាង​សហគ្រាស​តូច មធ្យម និងសិប្បកម្ម នៅ​រាជធានីភ្នំពេញ ព្រឹក​ថ្ងៃ​ទី​២៧ ខែ​មិថុនា ឆ្នាំ​២០២៦​នេះ សម្ដេច​ធិបតី ហ៊ុន ម៉ាណែត មាន​ប្រសាសន៍​ថា​ យើង​ត្រូវ​ទទួល​ស្គាល់​ការ​ពិតពី​ឧក្រិដ្ឋកម្ម​ឆបោក​បោក​អនឡាញ​នៅកម្ពុជា​ ហើយ​ត្រូវ​ដោះស្រាយ​ដើម្បី​ការពារ​​កេរ្តិ៍​ឈ្មោះ និង​ផល​ប្រយោជន៍​ជាតិ​។ ក្នុង​រយៈពេល​៥​ខែ​មក​នេះ​ កម្ពុជា​បង្ហាញ​ពិភព​លោក​ថា​ខ្លួន​អាច​ធ្វើ​បាន​។

សម្ដេច​ថា​៖ «ពេល​នេះ​កាសែត​លើ​លោក​បាន​ចេញ​មក​ទទួល​ស្គាល់​នូវ​យុទ្ធនាការ​វ៉ៃ​ SCAM នៅ​យើង​ ហើយ​ឧក្រិដ្ឋជន​បាន​រត់​ទៅ​ប្រទេស​ផ្សេង​ៗ ហើយ​ប្រទេស​ផ្សេង​ៗ​គេ​ក៏​ទទួល​ស្គាល់ថា​គេ​មាន​ដែរ​ នេះ​ជា​ជោគជ័យ​ ដែល​ពី​៥​ខែមុន​គឺ​ប្រទេស​កម្ពុជា​ជា​អ្នក​ទទួល​បន្ទុក​តែ​ខ្លួន​ឯង​»។

បន្ថែម​លើ​នេះ​សម្ដេច​ក៏​បញ្ជាក់​ថា ពេលនេះ​រាល់​ពេល​មាន​ជំនួប​ជាមួយ​ភ្ញៀវ​បរទេសមួយ​ចំនួន​​បាន​សរសើរ​កម្ពុជា ​សុំ​កម្ពុជា​ធ្វើជាគំរូ​ និង​សុំ​ឱ្យ​កម្ពុជា​ធ្វើ​ជា​ម្ចាស់​ផ្ទះ​នៃ​ការ​ធ្វើ​វេទិកាសន្និសីទ​ប្រឆាំង​ SCAM ONLINE នៅកម្ពុជា​ផងដែរ​៕

អត្ថបទដោយ ហ៊ុន សិរីវឌ្ឍន៍

The post នាយករដ្ឋមន្ត្រីថា ពេល​នេះ​កាសែត​លើ​លោក​បាន​​ទទួល​ស្គាល់​ប្រសិទ្ធភាពនៃ​យុទ្ធនាការ​ប្រឆាំង​ SCAM របស់​កម្ពុជា​ appeared first on Kampuchea Thmey Daily.

លោកទេសរដ្ឋមន្ត្រី បានគូសបញ្ជាក់ថា «ជាការពិតណាស់ ការរាតត្បាត និងការគំរាមកំហែងនៃបទល្មើសឆបោកតាមប្រព័ន្ធបច្ចេកវិទ្យា មិនមែនជាបញ្ហាដាច់ដោយឡែករបស់កម្ពុជានោះឡើយ ប៉ុន្តែវាជាវិបត្តិសកលដែលកំពុងកើតមានឡើងនៅតាមបណ្តាប្រទេសជាច្រើនលើពិភពលោក។ ក្នុងនោះ ជនបរទេសជាច្រើនសញ្ជាតិ ត្រូវបានលួងលោមអូសទាញដោយក្រុមមេខ្លោងឧក្រិដ្ឋជន ដើម្បីយកទឹកដីកម្ពុជាធ្វើជាទីតាំងលបលួចប្រព្រឹត្តសកម្មភាពឆបោកទៅក្រៅប្រទេសវិញ។

ឈរលើតថភាពដែលកម្ពុជាកំពុងទទួលរងនូវការខូចខាតកេរ្តិ៍ឈ្មោះ ដោយសារការលួចបន្លំយកទឹកដីធ្វើជាកន្លែងប្រព្រឹត្តបទល្មើសនេះ ប្រមុខរាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចចិត្តយ៉ាងម៉ឺងម៉ាត់ ក្នុងការប្រមូលផ្តុំកម្លាំងសរុប និងមធ្យោបាយសរុប ដើម្បីបើកយុទ្ធនាការប្រយុទ្ធប្រឆាំងនឹងបទល្មើសឆបោកតាមប្រព័ន្ធបច្ចេកវិទ្យានេះ។ រាជរដ្ឋាភិបាលបានដាក់ចេញនូវយុទ្ធសាស្ត្រច្បាស់លាស់ ក្នុងគោលដៅបង្ក្រាប និងបោសសម្អាតបណ្តាញឧក្រិដ្ឋកម្មទាំងនេះឱ្យអស់ពីទឹកដីកម្ពុជា ព្រមទាំងដាក់ចេញនូវវិធានការច្បាប់ដើម្បីទប់ស្កាត់យ៉ាងតឹងរ៉ឹង បង្ការមិនឱ្យកើតមានឡើងវិញជាដាច់ខាត។

ស្របតាមកិច្ចខិតខំប្រឹងប្រែងនេះ កម្ពុជាបានបង្កើត «ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា» ដែលជាលិខិតុបករណ៍គតិយុត្តដ៏មានសារៈសំខាន់ និងជាបុរេជំហានឈានមុខមួយ ដែលសូម្បីតែប្រទេសមួយចំនួននៅក្នុងតំបន់ និងលើសកលលោកក៏មិនទាន់មាននៅឡើយ។ ច្បាប់នេះ មានវិសាលភាពអនុវត្ត ចំពោះបទល្មើសឆបោកទាំងឡាយណា ដែលត្រូវបានប្រព្រឹត្តឡើងតាមប្រព័ន្ធបច្ចេកវិទ្យា ឬដែលប្រើប្រាស់ប្រព័ន្ធបច្ចេកវិទ្យាជាមធ្យោបាយដើម្បីប្រព្រឹត្តបទល្មើស ព្រមទាំងចំពោះបទល្មើសទាំងឡាយ ដែលពាក់ព័ន្ធនឹងការវិវឌ្ឍនៃល្បិចកល យុទ្ធសាស្ត្របំភាន់ និងការចាត់តាំងជាបណ្តាញឧក្រិដ្ឋកម្មឆ្លងដែន ក្នុងគោលដៅធានាការពារសន្តិសុខឌីជីថល សណ្តាប់ធ្នាប់សង្គម និងផលប្រយោជន៍ស្របច្បាប់របស់ប្រជាពលរដ្ឋ ក៏ដូចជាវិនិយោគិនបរទេសឱ្យបានពេញលេញ។

យោងតាមលេខាធិការដ្ឋានគ.ប.ឆ.ប. សមត្ថកិច្ចកម្ពុជាបាននិងកំពុងអនុវត្តវិធានយ៉ាងម៉ឺងម៉ាត់ ដើម្បីការរឹតបន្តឹងការគ្រប់គ្រងសន្តិសុខ សណ្តាប់ធ្នាប់នៅទូទាំងប្រទេស ការស្នាក់នៅរបស់ជនបរទេសដែលអាចជាប់ការសង្ស័យពាក់ព័ន្ធនឹងសកម្មភាពល្មើសច្បាប់កម្ពុជា ក៏ដូចជាការស៊ើបអង្កេតតាមដានបច្ចេកវិទ្យា ការសហការដោយបើកចំហជាមួយដៃគូអន្តរជាតិ និងការបន្តប្រតិបត្តិការបង្ក្រាប និងបោសសម្អាតលើការឆបោកគ្រប់ទម្រង់ដោយមិនដកដៃឡើយ។

ជាលទ្ធផល ចាប់តាំងពីដើម ឆ្នាំ២០២៥ ដល់ថ្ងៃទី២២ ខែមិថុនា ឆ្នាំ២០២៦ សមត្ថកិច្ចកម្ពុជាបានបង្ក្រាបអំពើឆបោកតាមប្រព័ន្ធបច្ចេកវិទ្យាចំនួនជាង ៥០០ទីតាំង ក្នុងរាជធានី-ខេត្ត ដើម្បីគ្រប់គ្រង ហើយកំពុងបន្តការស៊ើបអង្កេតប្រមូលភស្តុតាង ក្នុងនោះបានបិទសៀល(Sealed) ចំនួនជាង ៤០០ ទីតាំង ព្រមទាំងបានដកហូតនិងព្យួរអាជ្ញាប័ណ្ណកាស៊ីណូចំនួន២៥ទីតាំង។ ទន្ទឹមគ្នានេះ សមត្ថកិច្ចបានដំណើរការសំណុំរឿងក្នុងនីតិវិធីតុលាការចំនួន ១៨៤ សំណុំរឿង ក្នុងនោះមាន ៥៥ សំណុំរឿងស្ថិតក្នុងដំណាក់កាលជំនុំជម្រះ ដែលពាក់ព័ន្ធនឹងជនត្រូវចោទចំនួន ១ ៧៦១ នាក់ ខណៈជនជាប់សង្ស័យសញ្ជាតិបរទេសមានចំនួនប្រមាណ ជាង២ពាន់នាក់ មាន៣៣ សញ្ជាតិ។

លោក ឆៃ ស៊ីណារិទ្ធ បានគូសបញ្ជាក់ថា យុទ្ធនាការបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams) ចេញពីកម្ពុជា បាននិងកំពុងប្រព្រឹត្តទៅដោយភាពស្វាហាប់ និងមោះមុតបំផុត ទោះបីជាត្រូវប្រឈមនឹងភាពស្មុគស្មាញ និងឧបសគ្គជាច្រើនក្ដី។ ឈរលើស្មារតីនេះ ប្រមុខដឹកនាំរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត បានប្តេជ្ញាចិត្តយ៉ាងដាច់ខាត តាមរយៈការដាក់ចេញនូវបទបញ្ជាយ៉ាងម៉ឺងម៉ាត់បំផុតដល់គ្រប់ក្រសួង-ស្ថាប័ន អាជ្ញាធរមានសមត្ថកិច្ច និងរដ្ឋបាលរាជធានី-ខេត្ត ត្រូវរួមគ្នាកម្ទេចរាល់ទីតាំងឆបោកទាំងនេះឱ្យស្រឡះពីទឹកដីកម្ពុជា។ សម្រាប់រាជរដ្ឋាភិបាល ការធានា និងថែរក្សាភាពសុខសាន្តរបស់ប្រជាពលរដ្ឋ ការការពារកេរ្តិ៍ឈ្មោះ និងកិត្តិយសជាតិ ព្រមទាំងការអភិវឌ្ឍសេដ្ឋកិច្ចកម្ពុជាឱ្យកាន់តែមានសុវត្ថិភាព និងរីកចម្រើន គឺជាកិច្ចការអាទិភាព និងជាទិសដៅយុទ្ធសាស្ត្រក្នុងការដឹកនាំ៕ 

The post កម្ពុជា បង្ហាញដល់អ្នកសារព័ត៌មានទូរទស្សន៍ជប៉ុន TBS អំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា Online Scams appeared first on Kampuchea Thmey Daily.

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងនាថ្ងៃទី២៥មិថុនានេះថា ក្រោមការដឹកនាំ និងបញ្ជាផ្ទាល់របស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ កាលពីថ្ងៃទី២៤ ខែមិថុនា ឆ្នាំ២០២៦ម្សិលមិញនេះ គណៈបញ្ជាការឯកភាពរដ្ឋបាលខណ្ឌទាំង១៤ បានចុះត្រួតពិនិត្យ និងផ្សព្វផ្សាយអនុក្រឹត្យលេខ ០៣ នៅតាមទីតាំងអគារខុនដូរ អាផាតមិន បុរី ផ្ទះសំណាក់ និងសណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងភូមិសាស្ដ្ររាជធានីភ្នំពេញ បានចំនួន ១០១ទីតាំង រកឃើញជនបរទេសស្នាក់នៅសរុបចំនួន ៣៤១នាក់ (ស្រី ១១៨នាក់) គ្មានលិខិតឆ្លងដែន ២០នាក់។

លោកស្រី ដោ សម្ផស្ស បានបញ្ជាក់ថា ក្នុងចំណោមទីតាំងទាំង ១០១នេះ ក្រុមការងារបានរកឃើញបទល្មើសឆបោកតាមប្រព័ន្ធបច្ចេកវិទ្យា ១ករណី ស្ថិតនៅបុរីជីបម៉ុង ៥០ម៉ែត្រ ភូមិគ្រឹះលេខ១១ ផ្លូវP០៤ ភូមិថ្មី សង្កាត់ដង្កោ ខណ្ឌដង្កោ ដោយបានឃាត់ខ្លួនជនសង្ស័យចំនួន ២៤នាក់ (ស្រី ១នាក់) ក្នុងនោះមានជនជាតិចិន ២៣នាក់ និងជនជាតិម៉ាឡេស៊ី ១នាក់ (ស្រី) ព្រមទាំងដកហូតសម្ភារមួយចំនួនរួមមាន៖ ម៉ូនីទ័រ ២គ្រឿង ធុងCPU ១គ្រឿង កុំព្យូទ័រយួរដៃ ២២គ្រឿង ទូរស័ព្ទ ៦៩១គ្រឿង Router WiFi ១គ្រឿង ដុំបំបែកអ៊ីនធឺណែត (Wireless Access Point) ១០គ្រឿង ដុំសាកទូរស័ព្ទ ១០គ្រឿង និងម៉ាស៊ីន DVR ១គ្រឿង។

តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យឃើញថាជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្រោមរូបភាពបញ្ចុះបញ្ចូលអូសទាញជនរងគ្រោះឱ្យចូលរួមវិនិយោគភាគហ៊ុនតាមប្រព័ន្ធបច្ចេកវិទ្យា និងមានគោលដៅទៅប្រទេសម៉ាឡេស៊ី។

លោកស្រី ដោ សម្ផស្ស បន្តថា ដោយឡែកក្នុងប្រតិបត្តិការនេះដែរ រដ្ឋបាលខណ្ឌសែនសុខបានចុះត្រួតពិនិត្យរកឃើញទីតាំងប្រព្រឹត្តបទល្មើសប្រើប្រាស់ និងជួញដូរគ្រឿងញៀនខុសច្បាប់ចំនួន ១ករណី ស្ថិតនៅខុនដូរ អេចសែនសុខ ជាន់ទី២៥ បន្ទប់A២ ស្ថិតនៅភូមិទំនប់ សង្កាត់ភ្នំពេញថ្មី ខណ្ឌសែនសុខ ដោយបានឃាត់ខ្លួនជនសង្ស័យជនជាតិចិនចំនួន ២នាក់ (ប្រុស) ព្រមទាំងដកហូតសម្ភាររួមមាន៖ គ្រឿងញៀន ៥កញ្ចប់ និងដបទឹកកែច្នៃសម្រាប់ប្រើប្រាស់គ្រឿង ៤ដប។

បច្ចុប្បន្នជនសង្ស័យ និងសម្ភារទាំងអស់ដែលពាក់ព័ន្ធនឹងបទល្មើសទាំងពីរត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្ដនីតិវិធី៕

អត្ថបទ៖ ស្រីរ័ត្ន

The post ថ្ងៃទី២៤មិថុនា កម្លាំងជំនាញរកឃើញបទល្មើស​ONLINE SCAMS ១ករណី និងបទល្មើសគ្រឿងញៀន១ករណី appeared first on Kampuchea Thmey Daily.

ប្រតិបត្តិការចុះត្រួតពិនិត្យ និងរកឃើញប្រព្រឹត្តបទល្មើស ONLINE SCAMSនេះ ធ្វើឡើងនៅក្នុងបុរី ជីបម៉ុង៥០ម៉ែត្រ ភូមិគ្រឹះលេខ១១ ផ្លូវP05 ស្ថិតនៅភូមិថ្មី សង្កាត់ដង្កោ រកឃើញជនបទេស២៤នាក់ ក្នុងនោះជនជាតិចិន២៣នាក់ មានលិខិតឆ្លងដែនជនជាតិចិនចំនួន៦នាក់(ក្នុង៦នាក់នេះមាន២នាក់ផុតសុពលភាពទឹដ្ឋាការស្នាក់នៅ), ជនជាតិម៉ាឡេស៊ីចំនួន១នាក់(ស្រី១នាក់) រួមនឹងវត្ថុតាងមួយចំនួនមាន ម៉ូនីទ័រចំនួន២គ្រឿង, CPUចំនួន១គ្រឿង, Laptopចំនួន២២គ្រឿង, ទូរស័ព្ទដៃចំនួន៦៩១គ្រឿង, ROUTER WIFI ចំនួន១គ្រឿង, ដុំបំបែកអ៊ីនធឺណែត(Wireless Access Point)ចំនួន១០គ្រឿង, ដុំសាកទូរស័ព្ទ(Charger USB) ចំនួន១០គ្រឿង, ម៉ាស៊ីនDVRចំនួន១គ្រឿង ។

យោងតាមធ្វើកោសល្យវិច័យពីមន្រ្តីជំនាញ នៃការិយាល័យប្រឆាំងបទល្មើសបច្ចេកវិទ្យា ឃើញជាប់ពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា (ONLINE SCAMS )។ ជនសង្ស័យ២៤នាក់ និងវត្ថុតាង ត្រូវបញ្ជូនទៅស្នងការដ្ឋានរាជធានីភ្នំពេញ ដើម្បីកសាងសំណុំរឿងបញ្ជូនបន្តទៅអយ្យការអមសាលាដំបូងរាជធានីភ្នំពេញចាត់ការទៅតាមផ្លូវច្បាប់៕

The post ខណ្ឌដង្កោចុះពិនិត្យទីតាំងសង្ស័យចំនួន៣ រកឃើញមួយទីតាំងប្រព្រឹត្តបទល្មើស ONLINE SCAMS appeared first on Kampuchea Thmey Daily.

ការប្រគល់-ទទួល និង បញ្ជូនចេញនូវជនជាតិថៃខាងលើធ្វើឡើងនាថ្ងៃទី ២៣ ខែមិថុនា ឆ្នាំ ២០២៦ នៅមាត់ច្រកទ្វារព្រំដែនអន្ដរជាតិប៉ោយប៉ែត ខេត្តបន្ទាយមានជ័យ ដោយខាងកម្ពុជាដឹកនាំដោយលោកឧត្ដមសេនីយ៍ទោ យឿម ម៉ាន់ អនុប្រធាននាយកដ្ឋានស៊ើបអង្កេត និង អនុវត្តនីតិវិធី , លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកអន្តរជាតិប៉ោយប៉ែត , លោកឧត្ដមសេនីយ៍ត្រី អេង លីហួរ ស្នងការរង នៃស្នងការដ្ឋាននគរបាលខេត្តបន្ទាយមានជ័យ និង ខាងភាគីថៃចាំទទួលដឹកនាំដោយលោកស្រី Varunee Mangkorn នាយរងផ្នែក ប៉ុស្តិ៍នគរបាលអន្តោប្រវេសន៍ ច្រកទ្វារព្រំដែនអន្តរជាតិ បានខ្លងលឹក ស្រុកអារញ្ញ ខេត្តស្រះកែវ។

លោកឧត្តមសេនីយ៍ត្រី អ៊ី ចំរើន បានឲ្យដឹងថា ជនជាតិថៃដែលត្រូវបានបណ្តេញចេញខាងលើ សរុបចំនួន ​៤៩ នាក់ ក្នុងនោះ ស្រី ១៨ នាក់ បានមកលួចលាក់ស្នាក់នៅ និង ប្រព្រឹត្តបទល្មើស Online Scams ខុសច្បាប់ នៅកម្ពុជា។ ក្នុងចំណោមជនជាតិថៃទាំង ៤៩ នាក់ មាន ៤៣ នាក់ ត្រូវបានប្រថាប់ត្រាហាមចូលប្រទេសកម្ពុជារយៈពេល ៣ ឆ្នាំ។ ចំណែក ៦ នាក់ទៀត ត្រូវបានប្រថាប់ត្រាហាមចូលប្រទេសកម្ពុជារយៈពេល ៥ ឆ្នាំ៕
អត្ថបទ ៖ អពៅ

The post អាជ្ញាធរ បណ្តេញ ជនជាតិថៃ ៤៩ នាក់ ចេញពី កម្ពុជា ពាក់ព័ន្ធបទល្មើស Online Scams appeared first on Kampuchea Thmey Daily.

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងនាព្រឹកថ្ងៃទី ២៣ មិថុនា នេះថា ក្រោមការដឹកនាំ និង បញ្ជាផ្ទាល់របស់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ នៅថ្ងៃទី ២២ ខែមិថុនា ឆ្នាំ ២០២៦ ម្សិលមិញនេះ បានដឹកនាំគណៈបញ្ជាការឯកភាពរដ្ឋបាលខណ្ឌទាំង ១៤ ចុះត្រួតពិនិត្យ និង ផ្សព្វផ្សាយអនុក្រឹត្យលេខ ០៣ នៅតាមទីតាំងអគារខុនដូរ អាផាតមិន បុរី ផ្ទះសំណាក់ និង សណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងភូមិសាស្ដ្ររាជធានីភ្នំពេញ បានចំនួន ៦៤ ទីតាំង រកឃើញជនបរទេសស្នាក់នៅសរុបចំនួន ៣០៦ នាក់ (ស្រី ៩០ នាក់) មានលិខិតឆ្លងដែនត្រឹមត្រូវ។

លោកស្រី ដោ សម្ផស្ស បានបញ្ជាក់ថា ក្នុងចំណោម ៦៤ ទីតាំងនេះ ក្រុមការងារ បានរកឃើញបទល្មើសឆបោកតាមប្រព័ន្ធបច្ចេកវិទ្យា ២ ករណី រួមមាន ៖ ១.នៅខុនដូរភ្នំពេញកាឡាក់ស៊ីហ្គាដេន អគារ B បន្ទប់លេខ ១៦០៤ ភូមិបន្លាស្អិត សង្កាត់ឃ្មួញ ខណ្ឌសែនសុខ ឃាត់ខ្លួនជនសង្ស័យជនជាតិចិនចំនួន ២ នាក់ (ប្រុស) ព្រមទាំងដកហូតសម្ភាររួមមាន ៖ ទូរស័ព្ទ ១ គ្រឿង និង Tablet ៤ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យឃើញថាជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្រោមរូបភាពឆបោកក្លែងកិច្ចសន្យា ឬ ឆបោកប្រាក់កម្ចី។ ២.នៅអគារខុនដូរដដែល ក្នុងបន្ទប់លេខ ២៤០២ គ្មានមនុស្សសា្នក់នៅ និង ដកហូតសម្ភារ រួមមាន ៖ ទូរស័ព្ទ ១៣ គ្រឿង និង កុំព្យូទ័រយួរដៃ ១ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យឃើញថាជាប់ពាក់ព័ន្ធនឹងបទល្មើសរក្សាទុកឧបករណ៍បម្រើឱ្យបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS)។

លោកស្រី ដោ សម្ផស្ស បានបន្តថា ពាក់ព័ន្ធនឹងការងារចុះពិនិត្យនេះដែរ ក្រុមការងារខណ្ឌចំការមន បានចុះត្រួតពិនិត្យទីតាំង LH Residence ស្ថិតនៅអគារលេខ ១៣ ផ្លូវលេខ ៩ ភូមិ ៥ សង្កាត់ទន្លេបាសាក់ ក្នុងអគារ A បន្ទប់លេខ ៦០៥ ជាន់ទី ៦ និង អគារ B បន្ទប់លេខ ៨០១ ជាន់ទី ៨ បានរកឃើញបទល្មើសចំនួន ១ ករណី ដោយបានដកហូតសម្ភារៈកុំព្យូទ័រ All in one ចំនួន ៥ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យឃើញថាជាប់ពាក់ព័ន្ធនឹងបទល្មើសរក្សាទុកទិន្នន័យវេបសាយសម្រាប់ចែកចាយរូបភាព និង វីដេអូអាសអាភាសតាមប្រព័ន្ធបច្ចេកវិទ្យា។ បច្ចុប្បន្ន ជនសង្ស័យ និង សម្ភារទាំងអស់ ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្ដនីតិវិធី។

លោកស្រី ដោ សម្ផស្ស ក៏បានរំលឹកផងដែរថា ក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ កាលពីព្រឹកថ្ងៃទី ២២ ខែមិថុនា ម្សិលមិញនេះ លោក ឃួង ស្រេង ក៏បានលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធ ទាំងអាជ្ញាធរ កងកម្លាំងមានសមត្ថកិច្ច ម្ចាស់ទីតាំង និង ប្រជាពលរដ្ឋទូទៅ សហការធ្វើយ៉ាងណាឱ្យការបង្រ្កាបបទល្មើសឆបោកតាមប្រព័ន្ធបច្ចេកវិទ្យា (Online Scams) កាន់តែមានប្រសិទ្ធិភាព៕
អត្ថបទ ៖ ស្រីរ័ត្ន

The post ថ្ងៃទី ២២ មិថុនា ចុះត្រួតពិនិត្យ ៦៤ ទីតាំង នៅភ្នំពេញ រកឃើញ ONLINE SCAMS ២ ករណី ឃាត់ខ្លួនជនសង្ស័យ ២ នាក់ appeared first on Kampuchea Thmey Daily.