ចិនបន្តកាត់អត្រាការប្រាក់សំខាន់ៗ ដើម្បីជំរុញសេដ្ឋកិច្ច

Huon Dina — Mon, 21 Oct 2024 02:42:23 +0000

ទីភ្នាក់ងារសារព័ត៌មានរ៉យទ័រ បានចុះផ្សាយថា ធនាគារកណ្ដាលចិនបានបន្តកាត់បន្ថយអត្រាការប្រាក់កម្ចីគោលសំខាន់ៗនាថ្ងៃចន្ទនេះ ដើម្បីជាផ្នែកមួយនៃវិធានការជំរុញសេដ្ឋកិច្ច ចំពេលមានក្ដីបារម្ភថាកំណើនសេដ្ឋកិច្ចនឹងកើនឡើងមិនដល់គោលដៅ ៥ ភាគរយ របស់រដ្ឋាភិបាល។

ធនាគារប្រជាជនចិន (PBOC) ដែលជាធនាគារកណ្ដាលរបស់ប្រទេស បានប្រកាសថា អត្រាការប្រាក់សម្រាប់កម្ចីរយៈពេលមួយឆ្នាំ(LPR) ត្រូវបានបញ្ចុះប្រមាណ ២៥ ពិន្ទុ ពី ៣,៣៥ ភាគរយ មកត្រឹម ៣,១០ ភាគរយ។

ចំណែកឯអត្រាការប្រាក់សម្រាប់កម្ចីរយៈពេល៥ឆ្នាំវិញ ត្រូវបានបញ្ចុះ ២៥ ពិន្ទុ ពីប្រមាណ ៣,៨៥ ភាគរយ មកត្រឹម ៣,៦០ ភាគរយ។ អត្រាការប្រាក់កម្ចីសំខាន់ៗទាំង២ ត្រូវបានកាត់បន្ថយជាលើកចុងក្រោយនៅខែកក្កដា។

ការប្រកាសពីវិធានការចុងក្រោយនេះ ធ្វើឡើងក្រោយ PBOC កាលពីចុងខែកញ្ញា បានប្រកាសកាត់បន្ថយអត្រាការប្រាក់ «Reverse Repo» (អត្រាការប្រាក់ដែលធនាគារកណ្ដាលទិញសន្ទនីយភាពពីធនាគារពាណិជ្ជ) រយៈពេល៧ថ្ងៃ មកត្រឹម ១,៥ ភាគរយ។

វាគឺផ្នែកមួយនៃកញ្ចប់វិធានការសេដ្ឋកិច្ច ដែលរដ្ឋាភិបាលចិនបានដាក់ចេញកាលនោះ ដើម្បីជំរុញសេដ្ឋកិច្ច តាមរយៈការគាំទ្រវិស័យអចលនទ្រព្យដែលជាប់គាំង និងជំរុញការប្រើប្រាស់ ដែលជួបក្នុងបញ្ហាបរិត្តផរណា៕

The post ចិនបន្តកាត់អត្រាការប្រាក់សំខាន់ៗ ដើម្បីជំរុញសេដ្ឋកិច្ច appeared first on Kampuchea Thmey Daily.

ចិនចេញវិធានការជំរុញសេដ្ឋកិច្ចថ្មីៗ រួមទាំងកាត់អត្រាការប្រាក់កម្ចីលើអចលនទ្រព្យ

Huon Dina — Tue, 24 Sep 2024 09:07:00 +0000

ប្រទេសចិននាថ្ងៃអង្គារនេះ បានប្រកាសពីគោលនយោបាយថ្មី ដើម្បីជំរុញសេដ្ឋកិច្ចដែលរងសម្ពាធដោយបរិត្តផរណា រួមទាំងការកាត់បន្ថយអត្រាកម្ចីអចលនទ្រព្យ និងសមាមាត្រនៃតម្រូវការទុនបម្រុងរបស់ខ្លួន។ នេះបើតាមការចុះផ្សាយរបស់កាសែត South China Morning Post។

សមាមាត្រតម្រូវការទុនបម្រុង (RRR) ដែលជាបរិមាណសាច់ប្រាក់ដែលធនាគារពាណិជ្ជកម្មត្រូវតែរក្សាទុកជាទុនបម្រុង និងអត្រាប្រាក់កម្ចីទិញអចលនទ្រព្យ អាចនឹងត្រូវកាត់បន្ថយ ៥០ ពិន្ទុ (០,៥ ភាគរយ) ហើយបញ្ចេញប្រាក់ប្រហែល ១ ទ្រីលានយន់ ឬ ១៤២ ប៊ីលានដុល្លារ សម្រាប់កញ្ចប់ប្រាក់កម្ចីថ្មី។ នេះបើយោងតាមលោក Pan Gongsheng ដែលជាទេសាភិបាលធនាគារប្រជាជននៃប្រទេសចិន (PBOC)

ជាមួយគ្នានោះ PBOC នឹងគាំទ្រដល់ការទិញដីរបស់ក្រុមហ៊ុនអចលនទ្រព្យ ដោយសិក្សាវិធានការដើម្បីអនុញ្ញាតឱ្យគោលនយោបាយ និងធនាគារពាណិជ្ជផ្តល់ប្រាក់កម្ចីដល់ក្រុមហ៊ុនដែលមានសិទ្ធិទទួលបានដី ស្តារភាគហ៊ុនដីឡើងវិញ និងបន្ធូរបន្ថយសម្ពាធហិរញ្ញវត្ថុលើក្រុមហ៊ុនអចលនទ្រព្យ។

លើសពីនោះ លោក Pan បានបន្ថែមថា ប្រសិនបើចាំបាច់ ធនាគារកណ្តាលអាចផ្តល់ការគាំទ្រគោលនយោបាយ
ដោយបន្តថា៖ «ការកាត់បន្ថយអត្រាការប្រាក់កម្ចីទិញផ្ទះដែលមានស្រាប់ រំពឹងថានឹងផ្តល់អត្ថប្រយោជន៍ដល់ ៥០ លានគ្រួសារ ឬប្រជាជន ១៥០ លាននាក់ ដោយកាត់បន្ថយការចំណាយការប្រាក់គ្រួសារជាមធ្យមប្រហែល ១៥០ ប៊ីលានយន់/ឆ្នាំ ដែលវានឹងជំរុញការប្រើប្រាស់ និងការវិនិយោគប្រកបដោយប្រសិទ្ធភាព»។

លោក Pan បាននិយាយថា អាស្រ័យលើស្ថានភាពសាច់ប្រាក់ងាយស្រួលទីផ្សារនៅចុងឆ្នាំនេះ RRR អាចនឹងត្រូវបានកាត់បន្ថយ ០,២៥-០,៥ ភាគរយ បន្ថែមទៀត។ PBOC ក៏នឹងកាត់បន្ថយអត្រាការប្រាក់ «Reverse Repo» (អត្រាការប្រាក់ដែលធនាគារកណ្ដាលទិញសន្ទនីយភាពពីធនាគារពាណិជ្ជ) រយៈពេល៧ថ្ងៃ ប្រមាណ ០,២ ភាគរយ មកត្រឹម ១,៥ ភាគរយ ក៏ដូចជាអត្រាការប្រាក់ផ្សេងទៀតផងដែរ។

ខណៈវិនិយោគិនបានរំពឹងទុកពីវិធានការមួយចំនួន ការផ្សព្វផ្សាយជាសាធារណៈយ៉ាងគគ្រឹកគគ្រេងរបស់ PBOC បានបង្ហាញថា អាជ្ញាធរចិនកំពុងព្រួយបារម្ភថា កំណើនសេដ្ឋកិច្ចរបស់ប្រទេសអាចនឹងបរាជ័យក្នុងការហក់ទៅដល់អត្រាគោលដៅ ៥ ភាគរយ នៅឆ្នាំនេះ។ ការដាក់ចេញនូវគោលនយោបាយផ្សេងៗ អាចនឹងធ្វើឱ្យចិនសម្រេចបាននូវគោលដៅនេះ ប៉ុន្តែគេនៅតែមានភាពស្រពិចស្រពិល ដោយខ្លាចថា គោលនយោបាយទាំងនោះមិនគ្រប់គ្រាន់ក្នុងការដោះស្រាយវិបត្តិបរិត្តផរណារយៈពេលវែង និងវិបត្តិអចលនទ្រព្យដ៏អូសបន្លាយ ដែលជាបន្ទុកដ៏ធ្ងន់សម្រាប់សេដ្ឋកិច្ចចិន។

លើសពីនេះ សេដ្ឋវិទូមួយចំនួនលើកឡើងថា អាជ្ញាធរចិនមិនទាន់បង្ហាញវិធានការទ្រង់ទ្រាយធំបន្ថែមទៀត ដើម្បីជំរុញតម្រូវការក្នុងចំណោមអ្នកប្រើប្រាស់នៅឡើយទេ ទោះបីជាកម្សោយនៃតម្រូវការជាកត្តាសំខាន់ ក្នុងការទាញទម្លាក់កំណើនសេដ្ឋកិច្ចចិនក៏ដោយ៕

The post ចិនចេញវិធានការជំរុញសេដ្ឋកិច្ចថ្មីៗ រួមទាំងកាត់អត្រាការប្រាក់កម្ចីលើអចលនទ្រព្យ appeared first on Kampuchea Thmey Daily.

PBOC Archives - Kampuchea Thmey Daily

ចិន​បន្ត​កាត់​អត្រាការ​ប្រាក់​សំខាន់​ៗ​ ដើម្បី​ជំរុញ​សេដ្ឋកិច្ច​

ចិន​ចេញ​វិធានការ​ជំរុញ​សេដ្ឋកិច្ចថ្មី​ៗ រួម​ទាំង​កាត់អត្រាការប្រាក់​កម្ចីលើ​អចលនទ្រព្យ​

ចិនបន្តកាត់អត្រាការប្រាក់សំខាន់ៗ ដើម្បីជំរុញសេដ្ឋកិច្ច

ចិនចេញវិធានការជំរុញសេដ្ឋកិច្ចថ្មីៗ រួមទាំងកាត់អត្រាការប្រាក់កម្ចីលើអចលនទ្រព្យ