​ធនាគារ អេស៊ីលីដា នៅថ្ងៃទី ០៤ ​ខែធ្នូ ឆ្នាំ ២០២៥​ បានចុះហត្ថលេខាលើកិច្ចសហប្រតិបត្តិការ ជា​មួយ​ក្រុមហ៊ុន NPCI International Payments Limited (NIPL) ដែលជាក្រុមហ៊ុនដៃគូអន្តរជាតិរបស់​សាជីវកម្មទូទាត់រូបិយបណ្ណជាតិ​នៃប្រទេសឥណ្ឌា (NPCI)។ ​

​ភាពជាដៃគូនេះនឹងផ្តល់ជូនអ្នកធ្វើដំណើរជនជាតិឥណ្ឌា និងកម្ពុជា នូវភាពងាយស្រួល​នៃការទូទាត់​តាមឃ្យូអរកូត រហ័សទាន់ចិត្ត និងមានសុវត្ថិភាព នៅតាមតំបន់ទេសចរណ៍ ភោជនីយដ្ឋាន ហាងលក់ទំនិញ និងបណ្តាអាជីវកម្មផ្សេងៗទៀត។ ​

​ភ្ញៀវទេសចរដែលជាជនជាតិឥណ្ឌានៅកម្ពុជា អាចប្រើប្រាស់កម្មវិធី UPI ដើម្បីធ្វើការទូទាត់ថ្លៃទំនិញ និងសេវាកម្មផ្សេងៗ បានងាយស្រួលនៅតាមទីតាំងរបស់អាជីវករចំនួនជាង ៤.៥ លាន នៅប្រទេសកម្ពុជា។

ភ្ញៀវទេសចរកម្ពុជានៅប្រទេសឥណ្ឌា នឹងអាចស្កេន UPI QRs ចំនួនជាង ៧០៩ លាន ដើម្បីធ្វើការទូទាត់ថ្លៃទំនិញ និងសេវាកម្មផ្សេងៗ យ៉ាងងាយស្រួលដោយ​ប្រើកម្មវិធីទូទាត់​ប្រាក់ Bakong (KHQR) របស់កម្ពុជា។

កិច្ចសហការនេះនឹងគាំទ្រដល់ធុរកិច្ចក្នុងប្រទេសទាំងពីរដោយផ្តល់ជូននូវបទពិសោធន៍ទូទាត់ប្រកបដោយសុវត្ថិភាព ការទូទាត់តាមអន្តរប្រតិបត្តិការ និងមានប្រសិទ្ធភាព តាមរយៈ UPI និង KHQR ដែលជួយបង្កើនភាពងាយស្រួលសម្រាប់អ្នកប្រើប្រាស់នៅក្នុងទីផ្សារនៃប្រទេសទាំងពីរ។

​លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា មានប្រសាសន៍ថា៖ «​កិច្ចព្រមព្រៀងសេវា​កម្មទូទាត់ឆ្លងដែននេះ​ នឹងអនុវត្តតាមលក្ខខណ្ឌជាផ្លូវ​ការតាមលក្ខណៈ​បច្ចេកទេស និងការ​ភ្ជាប់​ប្រព័ន្ធប្រតិបត្តិការតាមរយៈបណ្តាញ UPI របស់ក្រុមហ៊ុន NPCI ជាមួយប្រព័ន្ធ​អេកូឡូស៊ី KHQR របស់ធនាគារ អេស៊ីលីដា»។​

ការបង្កើតបណ្តាញប្រតិបត្តិការនេះធានានូវការទូទាត់ដែលមានសុវត្ថិភាព និងអាចធ្វើអន្តរកម្ម​ទូទាត់​បានងាយស្រួល ដែលអនុញ្ញាតឱ្យអ្នកប្រើប្រាស់ និងអតិថិជនឥណ្ឌា ប្រើប្រាស់ទូរស័ព្ទចល័ត​ដើម្បី​ស្កេនឃ្យូអរកូតសម្រាប់ទូទាត់ទិញទំនិញ​និងសេវាកម្ម របស់ពាណិជ្ជករកម្ពុជា។

បន្ថែមពីនេះ កិច្ចសហប្រតិបត្តិការនេះតំណាងឱ្យជំហានដ៏សំខាន់មួយ ឆ្ពោះទៅរកអន្តរប្រតិបត្តិការ​នៃការទូទាត់ក្នុងតំបន់ ស្របតាមចក្ខុវិស័យរបស់អាស៊ានក្នុងការជំរុញបរិយាបន្នសេដ្ឋកិច្ចឌីជីថល និងនវានុវត្តន៍ហិរញ្ញវត្ថុតាមរយៈប្រព័ន្ធ QR ក្នុងការទូទាត់ប្រាក់តាមប្រព័ន្ធឌីជីថល ដោយផ្តល់​នូវមធ្យោ​បាយដល់អតិថិជនរបស់ធនាគារអេស៊ីលីដា ជាមួយនឹងជម្រើសការទូទាត់ឆ្លងដែន ល្បឿនរហ័ស និងមានសុវត្ថិភាព ដែលជំរុញពាណិជ្ជកម្ម និងទេសចរណ៍រវាងប្រទេសទាំងពីរ។

​ក្រោមកិច្ចផ្តួចផ្តើម និងដឹកនាំរបស់លោកជំទាវបណ្ឌិត ជា សិរី ទេសាភិបាល ធនាគារជាតិ​នៃកម្ពុជា ប្រទេសកម្ពុជា និងឥណ្ឌា បានផ្តួចផ្តើមបង្កើតការទូទាត់​តាមប្រព័ន្ធឌីជីថលឆ្លង​ដែនរវាងប្រទេសទាំងពីរ ដើម្បីលើកកម្ពស់ប្រតិបត្តិការទូទាត់ និងផ្ទេរប្រាក់ឱ្យកាន់តែមាន​ភាពងាយស្រួល និងមានប្រសិទ្ធភាព ជាពិសេសលើកកម្ពស់ការប្រើប្រាស់រូបិយ​បណ្ណជាតិរវាង​កម្ពុជា និងឥណ្ឌា។

​កាលពីខែមីនា ឆ្នាំ២០២៣ ធនាគារជាតិ និងក្រុមហ៊ុន NIPL បានចុះហត្ថលេខាលើ​អនុស្សរណៈ​នៃការយោគយល់គ្នាស្តីពីកិច្ចសហប្រតិបត្តិការ ដើម្បីបើកដំណើរការឱ្យមានការទូទាត់​ប្រាក់ឆ្លងដែន​រវាងកម្ពុជា និងឥណ្ឌា។​

នៅខែឧសភា ឆ្នាំ២០២៣ ធនាគារ អេស៊ីលីដា ត្រូវបានជ្រើសរើសជាធនា​គារទំនាក់ទំនង (Sponsoring Bank) ជាមួយ NPCI International Payment Limited សម្រាប់ការទូទាត់ និងការផ្ទេរប្រាក់ឆ្លងដែន។ បន្ទាប់ពីការចុះហត្ថលេខាលើកិច្ចព្រមព្រៀងនេះ ធនាគារ អេស៊ីលីដា និង NIPL នឹងសហការគ្នាលើការអភិវឌ្ឍប្រព័ន្ធទូទាត់ឃ្យូអរ។

បច្ចុប្បន្ន ធនាគារ អេស៊ីលីដា និង NIPL បាននឹងកំពុងសហការគ្នាអភិវឌ្ឍសមា​ហរណកម្មប្រព័ន្ធទូទាត់ឆ្លងដែន។ ហើយគម្រោងនេះផងដែរ នឹងគ្រោងដាក់ឱ្យដំណើរការការទូទាត់ឆ្លងដែនតាម QR រវាងប្រទេសកម្ពុជា និងឥណ្ឌា (ឥណ្ឌា QR UPI ស្កេន KHQR) នៅក្នុងឆមាសទី ២ នៃឆ្នាំ២០២៦។

ធនាគារ អេស៊ីលីដា និង NPCI International Payment Limited (NIPL) នឹងសហការជាមួយធនាគារដៃគូបន្ថែមទៀត ដើម្បីរួមបញ្ចូលប្រព័ន្ធទូទាត់ឃ្យូអរ ដែលអាចឱ្យអតិ​ថិជនទទួលបានការទូទាត់ឆ្លងដែនរវាងប្រទេសកម្ពុជា និងឥណ្ឌា។

កិច្ចសហប្រតិបត្តិការនេះតំណាងឱ្យភាពជោគជ័យដ៏សំខាន់មួយនៅក្នុងការពង្រីកវិសាលភាពជាសកល ក្រៅពីតំបន់អាស៊ាន ដោយបន្ថែមប្រតិបត្តិការទូទាត់ឆ្លងដែនទៅកាន់ប្រទេសជប៉ុន កូរ៉េខាងត្បូង ចិន និងប្រទេសដទៃទៀត ដោយពង្រឹងទីតាំងរបស់ខ្លួន​នៅក្នុងប្រព័ន្ធ​អេកូនៃ​ការទូទាត់តាមឌីជីថលអន្តរជាតិ ដោយសម្របសម្រួលប្រតិបត្តិការកាន់តែមានភាពរលូន រហ័ស និងមានប្រសិទ្ធភាពជាងមុនសម្រាប់អ្នកធ្វើដំណើរ ដោយហេតុនេះ​ជំរុញការតភ្ជាប់​កាន់តែជិតស្និទ្ធរវាងប្រទេសឥណ្ឌា និងកម្ពុជា ដើម្បីឈានទៅរកបណ្តាញទូទាត់​សកលដែលអាច​ធ្វើអន្តរកម្មបានពេញលេញ។

លោក Ritesh Shukla នាយកប្រតិបត្តិ ក្រុមហ៊ុន NPCI International មានប្រសាសន៍ថា៖ «ភាពជាដៃគូរបស់យើងជាមួយធនាគារ អេស៊ីលីដា គឺជាជំហានដ៏សំខាន់មួយ​ក្នុងការពង្រឹងច្រករបៀងទូទាត់ឌីជីថលអន្តរប្រតិបត្តិការរវាងប្រទេសឥណ្ឌា និងកម្ពុជា»។

តាមរយៈការបើកដំណើរការឱ្យមានការទទួលយកការទូទាត់តាមរយៈ UPI និង KHQR នៅក្នុងប្រទេសទាំងពីរ គឺមានគោលបំណងជំរុញឱ្យការធ្វើដំណើររបស់ភ្ញៀវទេសចរណ៍​នៃប្រទេសទាំងពីរកាន់តែមានភាពងាយស្រួល និងផ្តល់ឱ្យអតិ​ថិជននូវជម្រើសនៃការទូទាត់សំបូរបែប និងប្រកបដោយទំនុកចិត្តខ្ពស់។

កិច្ចសហការនេះឆ្លុះបញ្ចាំងពីការប្តេជ្ញាចិត្តក្នុងការពង្រីកការទូទាត់ប្រាក់តាមបែបឌីជីថលប្រកបដោយសុវត្ថិភាព បរិយាបន្ន និងវិសាលភាពក្នុងការទូទាត់​ឌីជីថល​នៅក្នុងកម្រិតសកល៕

The post ​កម្ពុជា-ឥណ្ឌា បើកដំណើរការ​ទូទាត់ឆ្លងដែន​ តាមរយៈ UPI និង KHQR​ ជំរុញពាណិជ្ជកម្ម និងទេសចរណ៍ appeared first on Kampuchea Thmey Daily.

នៅក្នុងពីធីជួបជុំជាមួយអ្នកសារព័ត៍មាននៅរសៀលថ្ងៃទី១៧កញ្ញានៅសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន លោកស្រីជាសិរី ទេសាភិបាលនៃធនាគារជាតិនៃកម្ពុជាបាន គូសបញ្ជាក់ថាការដាក់ដំណើរការប្រព័ន្ធឃ្យូអកូដជាប្រាក់រៀលនិងប្រាក់ដុល្លារបញ្ចូលគ្នាតែមួយក្នុងគោលបំណងបង្កលក្ខណៈងាយស្រួលដល់ប្រជាពលរដ្ឋក៏ដូចជាអ្នកលក់ដូរក្នុងការទូទាត់បើទោះបីជាទូទាត់ជាប្រាក់ដុល្លារឬប្រាក់រៀលគឺទូទាត់បានទាំងពីរដែលខុសពីមុនបើអ្នកលក់មានកុងដុល្លារទូទាត់បានតែប្រាក់ដុល្លារប៉ុណ្ណោះមិនអាចទូទាត់ជាប្រាក់រៀលបានទេ។

លោកស្រីបានបន្តថាលើសពីនេះទៀតវាក៏នឹងជួយសម្រួលដល់ភ្ញៀវទេសចរដែលមកកំសាន្តនៅកម្ពុជាក្នុងការទូទាត់ប្រាក់ផងដែរ ព្រោះថាបច្ចុប្បន្ននេះភ្ញៀវទេសចរមិនអាចទូទាត់ទំនិញជាមួយអ្នកលក់បានទេដោយសារអ្នកលក់មិនបានបើកគណនីជាប្រាក់រៀល។ប៉ុន្តែនៅពេលដាក់ដំណើរការប្រព័ន្ធឃ្យូអកូដបញ្ចូលគ្នាតែមួយនេះភ្ញៀវទេសចរអាចទូទាត់បានស្រួលដោយទូទាត់ពីប្រាក់ដុល្លារឬលុយប្រទេសគេទៅជាប្រាក់រៀលហើយប្រាក់រៀលនឹងចូលទៅក្នុងកុងអ្នកលក់តែម្តង។មួយវិញទៀតចំពោះប្រជាពលរដ្ឋខ្មែរដែលធ្វើដំណើរទៅកាន់ប្រទេសមួយចំនួនដូចជាថៃ វៀតណាម ឡាវ និងប្រទេសជាដៃគូមួយចំនួនទៀតអាចចាយប្រាក់រៀលបានងាយស្រួលផងដែរតាមរយៈឃ្យូរអកូដនេះ។

លោកស្រីបានសង្កត់ធ្ងន់ថា៖«ប៉ុន្តែប្រសិនបើអ្នកលក់មិនចង់ប្រើគណនីប្រាក់រៀលគាត់មិនអាចទូទាត់តាមប្រព័ន្ធអេឡេចត្រូនិចបានទេដោយសារតាមបច្ចេកទេសត្រូវតែមានពីរបើការណាមានតែមួយបាត់មួយអាស៊ីស្ទែមវាវ៉ល់។អីចឹងទេបានជាយើងបានទុកពេល៦ខែឱ្យគ្រឹះស្ថានឬធនាគារសម្របសម្រួលបង្កើតគណនីប្រាក់រៀលដោយស្វ័យប្រវត្តិទៅអតិថិជនរបស់ខ្លួនដែលមិនទាន់មានប្រាក់រៀលនិងពន្យល់ណែនាំពួកគាត់ឱ្យបានយល់ពីសារសំខាន់នៃការបង្កើតគណនីប្រាក់រៀលនេះពេលដាក់អនុវត្តទៅបានរលូន»។

លោកស្រីបានបន្ថែមថាការបង្កើតគណនីប្រាក់រៀលនេះមិនមានគិតថ្លៃសេវាទេហើយបើទោះបីជាអតិថិជនប្រើឬមិនប្រើជាសកម្មឬមិនសកម្មឬបិទគណនីក៏មិនគិតសេវាដែរ។ករណីនេះធនាគារជាតិនឹងចេញសេចក្តីណែនាំមួយឱ្យគ្រប់ធនាគារនិងគ្រឹះស្ថានហិរញ្ញវត្ថុមិបត្រូវគិតសេវាពីអតិថិជនឡើយ។លោកស្រីបានបញ្ជាក់ថាឃ្យូអកូដជាប្រាក់រៀលនិងប្រាក់ដុល្លារបញ្ចូលគ្នាតែមួយនេះដើម្បីលើកកម្ពស់ប្រាក់រៀល និងជួយសម្រួលការទូទាត់ក្នុងស្រុកនិងឆ្លងដែនព្រមទាំងបង្រួមឃ្យូអកូដដែលដាក់ច្រើនមកប្រើឃ្យូអកូដតែមួយវិញហើយពេលដាល់ដំណើរការខាងធនាគារធ្វើឱ្យពួកគាត់ជាស្វ័យប្រវត្តិ។

យ៉ាងណាក៏ដោយ លោកស្រីបានលើកឡើងថា៖« តាមពិតឃ្យូអកូដនេះត្រូវការដាក់អនុវត្តនៅថ្ងៃទី១៩កញ្ញានេះ។ប៉ុន្តែដោយសារយើងដោយទុកពេលឱ្យធនាគារឬគ្រឹះស្ថានបើកគណនីដល់អតិថិជនដែលមិនទាន់មានគណនីប្រាក់រៀលនិងពន្យល់ដល់អតិថិជនឱ្យបានច្បាស់លាស់ជាមុនសិនហេតុអ្វីត្រូវមានគណនីប្រាក់រៀល។ដូច្នោះទើបយើងត្រូវពន្យាពេលបន្ថែម»៕

អត្ថបទ៖សំអឿន

The post ធនាគារជាតិ គ្រោងនឹងដាក់ដំណើរការឃ្យូអកូដជាប្រាក់រៀល និងប្រាក់ដុល្លារតែមួយ ដើម្បីងាយស្រួលទូទាត់ក្នុងស្រុក និងឆ្លងដែន appeared first on Kampuchea Thmey Daily.

ពិធី​សម្ពោធ​ជា​ផ្លូវការ​នៃ​ការ​ទូទាត់ QR Code ឆ្លង​ព្រំដែន​រវាង​ធនាគារជាតិ​នៃ​កម្ពុជា និង UnionPay International បាន​ប្រព្រឹត្តិ​ទៅ​នៅ​រសៀល​ថ្ងៃទី​២២​ធ្នូ​នៅ​សណ្ឋាគារ​រ៉ូ​ស​វូដ​ភ្នំពេញ ​ក្រោម​អធិបតីភាព​លោក ស្រី បណ្ឌិត ជា សេរី ទេសាភិបាល​ធនាគារ​ជាតិ​នៃ​កម្ពុជា លោក វ៉ាង វិ​ន ធៀន ឯកអគ្គរដ្ឋទូត​វិសាមញ្ញ និង​ពេញ​សមត្ថភាព នៃ​សាធារណៈរដ្ឋ​ប្រជាមានិត​ចិន ប្រចាំ​ព្រះរាជាណាចក្រ​កម្ពុជា​និង លោក តុ​ប សុភ័គ រដ្ឋលេខាធិការ និង​ជា​អ្នកនាំពាក្យ​ក្រសួងទេសចរណ៍​។

ថ្លែង​ក្នុង​ពិធី​បើក​សម្ពោធ​នា​ឱកាស​នោះ លោកស្រីបណ្ឌិត ជា​ សិរី​ ​បាន​មានប្រសាសន៍ថា​ ដើម្បី​បង្កើន​ការ​តភ្ជាប់​ប្រព័ន្ធ​ទូទាត់​សកល ធនាគារ​ជាតិ​នៃ​កម្ពុជា​បាន​ផ្តួចផ្តើម​កិច្ចសហប្រតិបត្តិការ​ជាមួយ UnionPay International ដើម្បី​ស្វែងយល់​អំពី​សក្តានុពល​ដ៏​ធំ​នៃ​ការទូទាត់​កូដ QR ឆ្លងដែន​សម្រាប់​ទាំង​អ្នកប្រើប្រាស់​ម្នាក់ៗ និង​ពា​ណិជ្ជ​ករ ក៏ដូចជា​អត្ថប្រយោជន៍​របស់​វា​ចំពោះ​សេដ្ឋកិច្ច​ពិតប្រាកដ​។

លោកស្រី​បណ្ឌិត បាន​បន្ត​ទៀត​ថា ​នៅ​ថ្ងៃទី​១០ ខែកក្កដា ឆ្នាំ​២០២៣​កន្លងទៅ​ភាគី​ទាំងពីរ​បាន​ចុះហត្ថលេខា​លើ​អនុស្សរណៈ​យោគយល់​គ្នា ដោយ​យល់ព្រម​រួមគ្នា​លើកកម្ពស់ QR ឆ្លង​ព្រំដែន​អន្តរ​ប្រតិបត្តិការ​កូដ​រវាង​បណ្តាញ​របស់​ពួកគេ​។ បន្ទាប់ពី​ចុះ MOU ភាគី​ទាំងពីរ​​បាន​ធ្វើ​ការ​សិក្សា​អំពី​លទ្ធភាព ដើម្បី​ស្វែងយល់​ពី​គោលនយោបាយ បច្ចេកទេស និង​ប្រតិបត្តិការ​តម្រូវការ​ស​ម្រា​ប់​គម្រោង​នេះ​។ តាមរយៈ​ការខិតខំ​ប្រឹងប្រែង និង​កិច្ចសហប្រតិបត្តិការ​ល្អ គម្រោង​នេះ​ឥឡូវនេះ​ត្រូវបាន​អនុវត្ត​ដោយ​ជោគជ័យ​។

លោកស្រី​បណ្ឌិត​បាន​បន្ថែម​ថា ​« ចាប់ពី​ថ្ងៃនេះ​តទៅ អ្នក​កាន់​បណ្ណ UnionPay​នឹង​អាច​ប្រើ​កាបូប​ដែល​បើក UnionPay របស់​ពួកគេ ដូចជា​កម្មវិធី UnionPay និង​កម្មវិធី​ធនាគារពាណិជ្ជ​ដែល​ត្រូវបាន​បើក​សម្រាប់​ការបង់ប្រាក់ UnionPay QR Code ដើម្បី​ស្កេ​ន KHQR​លេខ​កូដ​ដើម្បី​បញ្ចប់​ប្រតិបត្តិ​ការទូទាត់ ពាណិជ្ជករ​ប្រមាណ​១.៨​លាន​នាក់​នៅ​កម្ពុជា​។ លើស​ពី​នេះ នៅ​ដើមឆ្នាំ​២០២៤​ប្រជាពលរដ្ឋ​កម្ពុជា​នឹង​អាច​ប្រើប្រាស់​កាបូប​បាគង​ដើម្បី​ធ្វើការ​ទូទាត់​នៅ UnionPay QR code ទទួលយក​ពាណិជ្ជករ​នៅ​ក្នុង​ប្រទេស​ចិន និង​នៅ​ទូទាំង​ពិភពលោក​ធ្វើឱ្យ​បទពិសោធន៍​នៃ​ការ​បង់ប្រាក់​តាម​ទូរសព្ទ​កាន់តែ​ប្រសើរឡើង​ក្នុងអំឡុងពេល​ធ្វើដំណើរ​អន្តរជាតិ​»​។

លោកស្រី​បណ្ឌិត​ជា​ សិរី ជឿជាក់​យ៉ាង​មុតមាំ​ថា ការ​ដាក់ឱ្យ​ប្រើប្រាស់​ការ​ទូទាត់​កូដ QR ឆ្លងដែន​រវាង​ធនាគារជាតិ​នៃ​កម្ពុជា បាគង និង UnionPay International នឹង​លើកកម្ពស់​កម្រិត​នៃ​កិច្ចសហប្រតិបត្តិការ​ហិរញ្ញវត្ថុ​រវាង​ស្ថាប័ន​ទាំងពីរ តាមរយៈ​ការប្រើប្រាស់​បច្ចេកវិទ្យា ដើម្បី​ផ្តល់​អត្ថប្រយោជន៍​ដល់​អ្នកប្រើប្រាស់​នៅក្នុង​ប្រទេស​ទាំងពីរ និង​ទូទាំង​ពិភពលោក​។ លើសពីនេះ កិច្ចសហប្រតិបត្តិការ​នេះ​នឹង​រួមចំណែក​យ៉ាងសំខាន់​ក្នុងការ​លើកកម្ពស់​ពាណិជ្ជកម្ម សកម្មភាព​ទេសចរណ៍ និង​ការដាក់បញ្ចូល​ហិរញ្ញវត្ថុ​។​

លោកស្រី​បណ្ឌិត​បានឱ្យដឹង​ទៀត​ថា ​ការលើកកម្ពស់​សុវត្ថិភាព និង​ប្រសិទ្ធភាព​នៃ​ផលិតផល និង​សេវាកម្ម​ប្រកបដោយ​ភាព​ច្នៃប្រឌិត គឺជា​គោលបំណង​ចម្បង​របស់​ធនាគារជាតិ​នៃ​កម្ពុជា ដើម្បី​គាំទ្រ​ដល់​របៀបវារៈ​នៃ​ការដាក់បញ្ចូល​ហិរញ្ញវត្ថុ​របស់​រាជរដ្ឋាភិបាល​កម្ពុជា និង​លើកទឹកចិត្ត​បន្ថែមទៀត​លើ​ការទូទាត់​តាម​ប្រព័ន្ធ​ឌីជីថល​។

លោកស្រី​បណ្ឌិត​បាន​បន្ត​ទៀត​ថា ​ធនាគារជាតិ​នៃ​កម្ពុជា​ប្តេជ្ញា​ពង្រឹង​បន្ថែម​ទៀត​នូវ​សុវត្ថិភាព និង​ភាព​ងាយស្រួល​នៃ​ការ​ទូទាត់​ឆ្លងដែន​ខណៈ​បច្ចុប្បន្ននេះ ធនាគារជាតិ​នៃ​កម្ពុជា បាន​ចាប់​​ផ្តើម​ដំណើរ​ការទូទាត់​ប្រាក់ QR code ឆ្លងដែន​ដោយ​ជោគជ័យ​ជាមួយ​ប្រទេស​ថៃ ឡាវ និង​វៀតណាម​៕

ដោយ ៖ សំអឿន

The post កម្ពុជា​-​ចិន​ ដាក់​ឱ្យ​ប្រើប្រាស់​ជា​ផ្លូវការ​ ការ​ទូទាត់ QR Code ឆ្លង​ព្រំដែន​រវាង​ធនាគារជាតិ​និង​UnionPay International appeared first on Kampuchea Thmey Daily.

ក្នុង​ជំនួប​ជា​មួយ​ក្រសួង​ប្រៃសណីយ៍ និង​ទូរគមនាគមន៍ ដើម្បី​ពិនិត្យ​វឌ្ឍនភាព​នៃ​ការ​ដាក់ QR Code ស្តង់​ដា​ថ្នាល verify.gov.kh នា​ថ្ងៃ​ទី២៦ ខែ​​កញ្ញា នេះ លោក ឌិត ទីណា មាន​ប្រសាសន៍​ថា ការ​ធ្វើ​ទំនើប​កម្ម​បច្ចេកវិទ្យាប្រើប្រាស់​កម្មវិធី​ទូរសព្ទ ឬ Application មាន​គោលដៅ​ផ្ដល់​ភាព​ងាយ​ស្រួល​សម្រាប់​អ្នក​ប្រើប្រាស់ ហើយ​ត្រូវ​ពិនិត្យ​លទ្ធភាព​ក្នុង​ការ​ដាក់​បញ្ចូល​គ្នា​ក្នុង ​App តែ​មួយ ដោយ​មាន​ក្រុម​ការងារ​ពិនិត្យ តាមដាន និង​វាយ​តម្លៃ​ច្បាស់​លាស់ ដើម្បី​ធានា​ប្រសិទ្ធភាព និង​សុវត្ថិភាព​ពិត​ប្រាកដ។ មិន​តែ​ប៉ុណ្ណោះ ដើម្បី​ធានា​ដល់​ឯកសារ​នានា​ដែល​ចេញ​ដោយ​រដ្ឋាភិបាល​ទៅ​កាន់​ប្រជាជន​ប្រកប​ដោយ​ទំនុក​ចិត្ត ម្ចាស់​ការ និង​មាន​ទំនួល​ខុស​ត្រូវ​ខ្ពស់​ជាដើម​។

បើ​តាម​លោក​រដ្ឋមន្ត្រី ការងារ​នេះ​ត្រូវ​ការ​​ទាំង​បច្ចេកទេស​ឌីជីថល និង​ធនធាន​មនុស្ស ដោយ​មាន​ការ​គិតគូរ​​ឲ្យ​បាន​ល្អិតល្អន់​ទាំង​ទិដ្ឋភាព​បច្ចេកទេស និង​នយោបាយ។ លើស​ពី​នេះ​ទៀត ត្រូវ​មាន​ការ​សហការ​គ្នា​ល្អ និង​រួមគ្នា​ដោះ​​ស្រាយ​បញ្ហា ដើម្បី​សម្រេច​ជោគជ័យ និង​មាន​និរន្តរភាព​ផង​ដែរ​៕

The post លោក ឌិត ទីណា៖ ការប្រើប្រាស់បច្ចេកវិទ្យា QR Code ដើម្បីធានាសុវត្ថិភាពព័ត៌មាន appeared first on Kampuchea Thmey Daily.

បើតាមគណៈកម្មាធិការសេដ្ឋកិច្ច និងធុរកិច្ចឌីជីថល (គសធឌ) បានពន្យល់ថា បច្ចេកវិទ្យាហិរញ្ញវត្ថុ ផ្តល់នូវអត្ថ ប្រយោជន៍ជាច្រើនដោយជំរុញកំណើនសេដ្ឋកិច្ចជាតិ តាមរយៈការបង្កើនបរិយាបន្នហិរញ្ញវត្ថុ ការរក្សាស្ថិរភាពក្នុង វិស័យហិរញ្ញវត្ថុ និងការលើកកម្ពស់នវានុវត្តន៍ហិរញ្ញវត្ថុ។

ការប្រើប្រាស់បច្ចេកវិទ្យាហិរញ្ញវត្ថុនៅកម្ពុជា មានសន្ទុះនៃការចាប់យក កើនឡើងយ៉ាងឆាប់រហ័ស ជាពិសេសការ ប្រើប្រាស់ប្រព័ន្ធទូទាត់សងប្រាក់ឌីជីថល ការប្រើប្រាស់ប្រព័ន្ធបាគង ស្តង់ដា KHQR និងការប្រើប្រាស់សេវា ធនាគារចល័តផ្សេងទៀត។

ស្របគ្នានេះដែរ បច្ចេកវិទ្យាហិរញ្ញវត្ថុ ក្នុងវិស័យហិរញ្ញវត្ថុ​មិនមែនធនាគារមួយចំនួន ក៏កំពុងមានការរីកលូតលាស់ ជាលំដាប់ ដូចជាវិស័យធានារ៉ាប់រង មានការប្រើប្រាស់បច្ចេកវិទ្យាធានារ៉ាប់រង (InsurTech) និងវិស័យមូលបត្រ មានការដាក់ឱ្យប្រើប្រាស់នូវ ៖ ប្រព័ន្ឋជួញដូរចល័ត និងកម្មវិធីទូរស័ព្ទ CSX trade, ប្រព័ន្ឋផ្តល់លេខអត្តសញ្ញាណ​វិនិយោគិនតាមអនឡាញ, ប្រព័ន្ឋ និងកម្មវិធីទូរស័ព្ទជួញដូរឧបករណ៍និស្សន្ទ, ប្រព័ន្ធបើកគណនីជួញដូរមូលបត្រ និងគណនីជួញដូរឧបករណ៍និស្សន្ទតាមប្រព័ន្ធអនឡាញ ជាដើម។

តាមប្រភពដដែលឱ្យដឹងថា បច្ចេកវិទ្យាហិរញ្ញវត្ថុនៅកម្ពុជា មានសក្តានុពលខ្ពស់ក្នុងការរីកចម្រើននាពេលអនាគត ព្រោះប្រទេសកម្ពុជា មានប្រជាជនវ័យក្មេងច្រើន ការគ្របដណ្តប់នៃបណ្តាញអ៊ីនធឺណិតល្បឿនលឿនកាន់តែទូលំទូលាយ រួមទាំងការប្រើប្រាស់បណ្តាញសង្គម និងថ្នាលឌីជីថលមានការកើនឡើងគួរឱ្យកត់សម្គាល់ ផងដែរ។

មួយវិញទៀត ដើម្បីទាញយកផលប្រយោជន៍ជាអតិបរមាពីបច្ចេកវិទ្យាហិរញ្ញវត្ថុរាជរដ្ឋាភិបាលកម្ពុជា បានដាក់ចេញនូវ ផែនទីមគ្គទេសក៍អភិវឌ្ឍបច្ចេកវិទ្យាហិរញ្ញវត្ថុឆ្នាំ២០២០–២០២៥ ដែលមានគោលបំណង៖ ១. លើកកម្ពស់បរិយាបន្ន ហិរញ្ញវត្ថុតាមរយៈបច្ចេកវិទ្យាហិរញ្ញវត្ថុ, ២. ណែនាំបទប្បញ្ញត្តិជាប្រព័ន្ឋដែលផ្តល់នូវបរិស្ថានកាន់តែល្អប្រសើរសម្រាប់ការ អភិវឌ្ឍបច្ចេកវិទ្យាហិរញ្ញវត្ថុក្នុងរយៈពេលខ្លី មធ្យម និងរយៈពេលវែង, ៣. អភិវឌ្ឍក្របខណ្ឌបទប្បញ្ញត្តិគ្រប់គ្រងសកម្ម ភាពបច្ចេកវិទ្យាហិរញ្ញវត្ថុដែលមានស្រាប់នៅក្នុងប្រទេសកម្ពុជាឱ្យកាន់តែប្រសើរឡើង។

ទន្ទឹមនឹងនេះ រាជរដ្ឋាភិបាលបានដាក់ចេញនូវគោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨ កាលពីថ្ងៃទី ០៧ ខែ កក្កដា ឆ្នាំ ២០២៣ ដើម្បីបន្តជំរុញសន្ទុះនៃការរីកចម្រើនរបស់បច្ចេកវិទ្យាហិរញ្ញវត្ថុនៅកម្ពុជា៕

អត្ថបទ៖ ផល ធារិត

The post បច្ចេកវិទ្យាហិរញ្ញវត្ថុកម្ពុជា មានសក្តានុពលខ្ពស់ ពិសេសលើប្រព័ន្ធទូទាត់តាមឌីជីថល appeared first on Kampuchea Thmey Daily.

គិត​មក​ទល់​ពេលនេះ​មាន​រយៈពេល​ជាង ៣ ឆ្នាំ​ហើយ ដែល​ប្រទេស​កម្ពុជា និង​ថៃ បាន​អនុញ្ញាត​ដាក់​ឲ្យ​ប្រើប្រាស់​នូវ​ប្រព័ន្ធ​ប្រតិបត្តិការ​ទូទាត់​ឆ្លងដែន តាមរយៈ​ការ​ស្កេន QR ដែល​ធ្វើ​ឲ្យ​អ្នក​ប្រើប្រាស់​អេស៊ីលីដា​ម៉ូបាល នៅ​កម្ពុជា ស្កេន​ទូទាត់​ក្នុង​ប្រទេស​ថៃ បាន​រហូតដល់ ៥២ លាន​រៀល នៅ​ក្នុង​មួយថ្ងៃៗ រីឯ​ចំនួន​ប្រតិបត្តិការ​ទូទាត់​ក្នុង​មួយថ្ងៃ គឺ​មិន​ត្រូវ​បាន​កំណត់​នោះ​ទេ។

ថ្លែង​ក្នុង​សន្និសីទ​សារ​ព័ត៌មាន​កាលពី​ព្រឹក​ថ្ងៃ​ទី ០៨ មិថុនា នៅ​ទីស្នាក់ការ​កណ្ដាល​ធនាគារ អេស៊ីលីដា លោក​បណ្ឌិត អ៉ិន ចាន់នី ប្រធាន​នាយក​ប្រតិបត្តិ​ធនាគារ អេស៊ីលីដា ភីអិលស៊ី មាន​ប្រសាសន៍​ថា ចាប់​តាំងពី​ធនាគារ អេស៊ីលីដា ភីអិលស៊ី ត្រូវ​បាន​អនុញ្ញាត​ដោយ​ធនាគារ​ជាតិ នៃ​កម្ពុជា សម្រាប់​ការ​ដាក់​ឲ្យ​ប្រើប្រាស់​នូវ​ប្រព័ន្ធ​ប្រតិបត្តិការ​ទូទាត់​ឆ្លងដែន​ជាមួយ​ប្រទេស​ថៃ កាលពី​ថ្ងៃ​ទី ១៨ ខែ​កុម្ភៈ ឆ្នាំ ២០២០ មក ប្រតិបត្តិការ​ទូទាត់​ឆ្លងដែន​រវាង​ប្រទេស​ទាំងពីរ​មាន​ការ​កើន​ឡើង​គួរ​ឲ្យ​កត់សម្គាល់។ ដោយសារ​អ្នកប្រើប្រាស់​អេស៊ីលីដា​ម៉ូបាល ស្កេន QR ទូទាត់​ថ្លៃ​ទំនិញ និង​សេវាកម្ម​នានា​នៅ​ក្នុង​ប្រទេស​ថៃ បាន​រហូតដល់​ទៅ ៥២ លាន​រៀល ក្នុង​មួយថ្ងៃ។

លោក​បណ្ឌិត បាន​បន្ត​ថា គិត​ចាប់ពី​ខែ​កុម្ភៈ ឆ្នាំ ២០២០ រហូតដល់​ខែ​ឧសភា ឆ្នាំ ២០២៣ ចំនួន​ប្រតិបត្តិការ​ទូទាត់​មាន​ដល់​ទៅ ៩,៥៥៥ និង​មាន​ទំហំ​ទឹកប្រាក់​សរុប​ប្រមាណ ២៧ លាន​បាត។

លោក​បណ្ឌិត បាន​ជម្រាប​បន្ថែម​ទៀត​ថា «ឥឡូវ​នេះ​កម្ពុជា​បាន​ទទួល​ការ​ស្កេន​ទូទាត់​ពី​អតិថិជន នៃ​ធនាគារ​ពី​ប្រទេស​ថៃ មក​ស្កេន​នៅ​លើ KHQR របស់​ពាណិជ្ជករ​ធនាគារ​នីមួយៗ នៅ​កម្ពុជា ដែល​ជា​សមាជិក Bakong បាន​ហើយ ដែល​បច្ចុប្បន្ន​សមាជិក​របស់ Bakong មាន​ចំនួន​សរុប ៤៨ ធនាគារ​/​ស្ថាប័ន​»។

លោក​បណ្ឌិត បាន​បន្ថែម​ទៀត​ថា ដើម្បី​អាច​ស្កេន​ទូទាត់​ឆ្លងដែន​ពី​កម្ពុជា នៅ​ប្រទេស​ថៃ បាន អតិថិជន​ត្រូវ​មាន​គណនី​ជា​ប្រាក់​រៀល ហើយ​ពាណិជ្ជករ​ថៃ (Merchant) ត្រូវ​មាន​ស្លាក​សញ្ញា ThaiQR Promptpay របស់​ធនាគារ​ចំនួន​ប្រាំ​នៅ​ប្រទេស​ថៃ​មាន​ដូចជា ៖ Kasikorn Bank, KrungThai Bank, Bangkok Bank, Bank of Ayudhya និង Siam Commercial Bank។

លោក​បណ្ឌិត បាន​បញ្ជាក់​បន្ត​ទៀត​ថា នៅ​ប្រទេស​កម្ពុជា មាន​ធនាគារ​ទំនាក់ទំនង​(Sponsoring Banks) ចំនួន​បី មាន​ដូចជា ៖ ACLEDA Bank Plc, Cambodia Commercial Bank (CCB) និង Foreign Trade Bank (FTB) សម្រាប់​គាំទ្រ​អតិថិជន​ធ្វើ​ប្រតិបត្តិការ​ស្កេន​ទូទាត់​ឆ្លងដែន​ទៅមក​រវាង​ប្រទេស​កម្ពុជា និង​ប្រទេស​ថៃ។

សូម​បញ្ជាក់​ថា ចំពោះ​កម្រៃ​សេវា​សម្រាប់​ប្រតិបត្តិការ​ស្កេន​ទូទាត់ ឆ្លងដែន រវាង​ខ្មែរ ស្កេន ថៃ និង​ថៃ ស្កេន ខ្មែរ គឺ​មិន​គិត​ថ្លៃ​សេវា​ឡើយ៕

The post ការស្កេន QR សម្រាប់ការទូទាត់ឆ្លងដែនរវាងកម្ពុជា និងថៃ កើនដល់ ៥២ លានរៀល ក្នុងមួយថ្ងៃ appeared first on Kampuchea Thmey Daily.

ប្រព័ន្ធ QR Code «StopCovid QR Vaccine» នេះផងដែរមានមុខងារសំខាន់ចំនួនបីគឺ (១) សម្រួលដល់ការស្រាវជ្រាវរកអ្នកពាក់ព័ន្ធនឹងជំងឺកូវីដ-១៩ (២) គ្រប់គ្រងការធ្វើចត្តាឡីស័ក និង (៣) បង្ហាញព័ត៌មានអំពីការចាក់វ៉ាក់សាំងកូវីដ-១៩ របស់បុគ្គលម្នាក់ៗ។

បន្ថែមពីលើនោះ ប្រព័ន្ធនេះ អាចបង្ហាញពីព័ត៌មាន នៃការចាក់វ៉ាក់សាំង រូបថត និងអត្តសញ្ញាណរបស់បុគ្គលម្នាក់ៗ តាមរយៈការស្កេន QR Code នៅតាមច្រកចេញ-ចូលក្រសួង ស្ថាប័ន សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន កន្លែងកំសាន្ត អគារស្នាក់នៅរួម (ខុនដូ) ក្រុមហ៊ុន រោងចក្រ សហគ្រាសនានា។

ក្នុងនោះ ក្រសួង ប្រៃសណីយ៍ និងទូរគមនាគមន៍ រួមគ្នាជាមួយក្រសួងសុខាភិបាល បានផលិតវីដេអូណែនាំពីរបៀបចុះឈ្មោះចូលក្នុងប្រព័ន្ធ QR Code របស់ប័ណ្ណចាក់វ៉ាក់សាំងបង្ការកូវីដ-១៩ ដូចខាងក្រោម៖

អត្ថបទ៖ សន្យា

ចុចអាន៖ សារសំខាន់នៃ QR Code របស់ប័ណ្ណចាក់វ៉ាក់សាំងកូវីដ-១៩​ គ្រប់គ្នាត្រូវយល់ដឹង

ចុចអាន៖ បង្ហោះបណ្ណចាក់វ៉ាក់សាំងដូសជំរុញព្រោងព្រាតលើហ្វេសប៊ុក មានដឹងគុណវិបត្តិឬនៅ?

The post អត់ចេះភ្ជាប់ប័ណ្ណចាក់វ៉ាក់សាំងឌីជីថល ចូលទស្សនាវីដេអូនេះ appeared first on Kampuchea Thmey Daily.

បើយោងតាមសេចក្តីជូនដំណឹងរបស់ក្រសួងប្រៃសណីយ៍ បានឲ្យដឹងថា ប្រព័ន្ធ QR Code នៃប័ណ្ណចាក់វ៉ាក់សាំងកូវីដ-១៩ ឬ «StopCovid QR Vaccine» មានមុខងារសំខាន់ចំនួន៣គឺ៖

១. សម្រួលដល់ការស្រាវជ្រាវរកអ្នកពាក់ព័ន្ធនឹងជំងឺកូវីដ-១៩

២. គ្រប់គ្រងការធ្វើចត្តាឡីស័ក

៣. បង្ហាញព័ត៌មានអំពីការចាក់វ៉ាក់សាំងកូវីដ-១៩ របស់បុគ្គលម្នាក់ៗ

ក្រសួងបានបន្តថា ប្រព័ន្ធ QR Code «StopCovid QR Vaccine» នឹងចូលរួមទប់ស្កាត់ការរីករាលដាលនៃជំងឺកូវីដ-១៩ តាមរយៈការកាត់បន្ថយការប៉ះពាល់ដោយផ្ទាល់ ក្នុងការត្រួតពិនិត្យបណ្ណចាក់វ៉ាក់សាំង ដោយមិនចាំបាច់យកប័ណ្ណចាក់វ៉ាក់សាំង តាមខ្លួនគ្រប់ពេលវេលា ឬព្រួយបារម្ភអំពីការបាត់បង់ ឬខូចខាតប័ណ្ណចាក់វ៉ាក់សាំងដោយប្រការណាមួយឡើយ ព្រមទាំងកាត់បន្ថយហានិភ័យ នៃការក្លែងបន្លំទិន្នន័យលើប័ណ្ណចាក់វ៉ាក់សាំង។

ក្រៅពីនោះ ប្រព័ន្ធនេះ អាចបង្ហាញពីព័ត៌មាននៃការចាក់វ៉ាក់សាំង រូបថត និងអត្តសញ្ញាណរបស់បុគ្គលម្នាក់ៗ តាមរយៈការស្កេន QR Code នៅតាមច្រកចេញ-ចូលក្រសួង ស្ថាប័ន សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន កន្លែងកម្សាន្ត អគារស្នាក់នៅរួម (ខុនដូ) ក្រុមហ៊ុន រោងចក្រ និងសហគ្រាសនានា។

គួររំលឹកថា កាលពីថ្ងៃទី ១៦ ខែតុលា កន្លងទៅ ក្រសួងប្រៃសណីយ៍ និងទូរគមនាគមន៍ បានប្រកាសដាក់ឲ្យដំណើរការប្រព័ន្ធ QR Code «បណ្ណចាក់វ៉ាក់សាំងឌីជីថល StopCovid QR Vaccine» ដោយតភ្ជាប់ប្រព័ន្ធ QR Code «ទប់ស្កាត់កូវីដ Stop Covid» ទៅនឹងប្រព័ន្ធទិន្នន័យចាក់វ៉ាក់សាំង ចាប់ពីថ្ងៃទី១៨ ខែតុលា ឆ្នាំ២០២១ នេះតទៅ៕

អត្ថបទ៖​ សន្យា

ចុចអាន៖ ៨ ទីតាំង ចែកកាតចាក់វ៉ាក់សាំងឥតគិតលុយ សម្រាប់អ្នកមិនទាន់បាន

ចុចអាន៖ កាតវ៉ាក់សាំងសំខាន់ណាស់ ចុះបើបាត់ គួរធ្វើយ៉ាងម៉េច?

The post សារសំខាន់នៃ QR Code របស់ប័ណ្ណចាក់វ៉ាក់សាំងកូវីដ-១៩​ គ្រប់គ្នាត្រូវយល់ដឹង appeared first on Kampuchea Thmey Daily.