​ឆ្នាំ ២០២៦ ពាន​រង្វាន់​ SEA V. League មាន​ក្រុម​ខ្លាំង​ជម្រើស​ជាតិ​ក្នុង​តំបន់​អាស៊ាន​ចំនួន ៦ មាន​សិទ្ធិ​ចូល​រួម​ប្រកួត​ប្រជែង​គឺ កម្ពុជា ឥណ្ឌូណេស៊ី ថៃ ហ្វីលីពីន វៀតណាម និង មីយ៉ាន់ម៉ា។

ការ​ប្រកួត​ជា​ទូទៅ​មាន​ពីរ​ដំណាក់​កាល​ដោយ​ដំណាក់​កាល​នីមួយ​ៗ​សុទ្ធ​តែ​​ត្រូវ​មាន​ក្រុម​ឈ្នះ​ជើង​ឯក។ សម្រាប់​ដំណាក់​កាល​ទី​១ ប្រទេស​ហ្វីលីពីន ទទួលធ្វើ​ជា​ម្ចាស់​ផ្ទះ​ចាប់​ពីថ្ងៃ​ទី​១៥ ដល់ ទី​១៩ ខែ​កក្កដា​ ឆ្នាំ ២០២៦ និង​ដំណាក់​កាល​ទី២​ ប្រទេស​ឥណ្ឌូណេស៊ី ទទួល​ធ្វើ​ម្ចាស់​ផ្ទះ​ចាប់​ពី​ថ្ងៃ​ទី​២២ ដល់ ទី​២៦ ខែ​កក្កដា ឆ្នាំ ២០២៦។

រូប​មន្ត​នៃ​ការ​ប្រកួត ឆ្នាំ ២០២៦ មិន​ទាន់​ត្រូវ​បាន​ប្រកាស​​ថា​តើ​មាន​ការ​ប្រែ​ប្រួល​យ៉ាង​ណា​នោះ​ទេ បើ​ទោះ​ជា​​ក្រុម​មាន​ចំនួន​ច្រើន​ជាង​ឆ្នាំ​មុនៗ។ ​ចាប់​តាំង​ពី​ពាន​រង្វាន់​នេះ​ត្រូវ​បាន​បង្កើត​ឡើង​កាល​ពី​ឆ្នាំ ២០២៣ តាម​ធម្មតា​ រូប​មន្ត​នៃ​ការ​ប្រកួត គឺ​​វិល​ជុំ​សន្សំ​ពិន្ទុ ក្រុម​ណា​ឈ្នះ​ច្រើន​ជាង​គេ និង​មាន​ពិន្ទុ​ច្រើន​ជាង​គេ​បាន​ក្លាយ​ជា​​ជើង​ឯក​តែ​ម្តង។

កាល​ពី​ឆ្នាំ ២០២៣ និង ២០២៤ មាន​ក្រុម​ជម្រើស​ជាតិ​តែ​ ៤ ប៉ុណ្ណោះ​គឺ ឥណ្ឌូណេស៊ី ថៃ វៀតណាម និង ​ហ្វីលីពីន ហើយ​​ឆ្នាំ ២០២​៥ មាន ចំនួន ៥ ក្រុម​ដោយ​​​​មាន​ក្រុម​​ជម្រើស​ជាតិ​​កម្ពុជាចូល​រួម​​ប្រកួត​ បន្ទាប់​ពី​ឈ្នះ​ជើង​ឯក SEA V. League Challenge។ នៅ​ឆ្នាំ ២០២៦​នេះ ក្រុម​បាន​កើត​ឡើង​ដល់​ចំនួន ៦ ដោយ​មាន​ក្រុម​​បាល់ទះ​ជម្រើស​ជាតិ មីយ៉ាន់ម៉ា មួយ​ទៀត ដូច្នេះ​​ក្រុម​ច្រើន​ រូប​មន្តនៃ​ការ​ប្រកួត​អាច​មាន​ការ​ប្រែ​ប្រួល។

ចំណែក​ពាន​រង្វាន់​អាស៊ាន​​លំដាប់​ទី​២ គឺ SEA V. League Challenge ដែល​កម្ពុជា​​​បាន​ធ្វើ​ជា​ម្ចាស់​ផ្ទះ​លើក​ដំបូង​កាល​ពី ឆ្នាំ ២០២៤ គឺ​មាន​ក្រុម​បាល់ទះ​ជម្រើស​ជាតិ​ចំនួន ៣ ត្រូវ​ចូលរួម​ប្រកួត​ប្រជែង​ក្នុង​ឆ្នាំ ២០២៦​ គឺ ម៉ាឡេស៊ី សិង្ហបុរី និង​ឡាវ។ រហូត​ដល់​ពេល​នេះ នៅ​មិន​ទាន់​ដឹង​ច្បាស់​ថា ពាន​រង្វាន់​លំដាប់​ទី​២​ ត្រូវ​រៀបចំ​ការ​ប្រកួត​នៅ​ប្រទេស​ណា​ទេ។

សូម​រម្លឹក​ថា កាល​ពី​ឆ្នាំ ២០២៥ ក្រុម​បាល់ទះ​ជម្រើស​ជាតិ​កម្ពុជា​ បាន​ចូល​រួម​ប្រកួត​ពាន​រង្វាន់ SEA V. League ជា​លើក​ដំបូង​ដោយ​មិន​ស្គាល់​ជ័យជម្នះ​សោះ​ពោល​គឺ ៨ ប្រកួត​ចាញ់​ទាំង​អស់៕

ក្រុម​ជម្រើស​ជាតិ

• កម្ពុជា ឥណ្ឌូណេស៊ី ថៃ ហ្វីលីពីន វៀតណាម និង មីយ៉ាន់ម៉ា

កាល​បរិច្ចេទ​ប្រកួត

• នៅហ្វីលីពីន ពីថ្ងៃ​ទី​១៥ ដល់​ទី​១៩ ខែ​កក្កដា ឆ្នាំ ២០២៦
• នៅ​ឥណ្ឌូណេស៊ី ពី​ថ្ងៃ​ទី២២ ដល់​ទី​២៦ ខែ​កក្កដា ឆ្នាំ ២០២៦

អត្ថបទ៖ វិរបុត្រ

The post ក្រុម​បាល់ទះ​កម្ពុជា ត្រូវ​ធ្វើ​ដំណើរ​ទៅ​ប្រកួត SEA V. League 2026 នៅហ្វីលីពីន និង​ឥណ្ឌូណេស៊ី appeared first on Kampuchea Thmey Daily.

មុនការប្រកួតពាន SEA V League ចាប់ផ្តើម ក្រុមបាល់ទះជម្រើសកម្ពុជា ទទួលបានដំណឹងល្អមួយ ដោយត្រូវបានគេបញ្ចូលចំណាត់ថ្នាក់ជាលើកដំបូងទៅក្នុងតារាងចំណាត់ថ្នាក់បាល់ទះពិភពលោក។ ពេលនោះ កម្ពុជា ស្ថិតនៅចំណាត់ថ្នាក់លេខ ៦៦ ឈរនៅលើក្រុមតំបន់ អាស៊ានគឺ ហ្វីលីពីន ២ ចំណាត់ថ្នាក់ ហើយឈរនៅក្រោមឥណ្ឌូណេស៊ី ១ ចំណាត់​​ថ្នាក់ ក្រោមវៀតណាម ៥ ចំណាត់ និងក្រោម ថៃ ១០ ចំណាត់ថ្នាក់។

យ៉ាងណា បន្ទាប់ពីបញ្ចប់ការប្រកួតពាន SEA V League ឆ្នាំ ២០២៥ ត្រឹមថ្ងៃ អាទិត្យ ទី ២០ ខែ កក្កដា ក្រុម​បាល់ទះ​ជម្រើសជាតិកម្ពុជា បានធ្លាក់ចំណាត់ថ្នាក់ខ្លាំង ពោលដល់ទៅ ២០ ចំណាត់ថ្នាក់ឯណោះ ដោយសារតែពួកគេធ្វើមិន​បានល្អនៅក្នុងពាននេះ ដោយឆ្លងកាត់ការប្រកួត ៨ ប្រកួតទាំង ២ ជើង គឺបរាជ័យទាំងអស់។

ជារួម តាមរយៈការបរាជ័យទាំងនោះ បានធ្វើឱ្យ កម្ពុជា ត្រូវគេដកពិន្ទុសរុបដល់ទៅ ៤៥.១ ពិន្ទុ ហើយបច្ចុប្បន្នបានធ្លាក់ចំណាត់ថ្នាក់មកឈរនៅលេខ ៨៦ ខណៈចំណាត់ថ្នាក់នេះ គឺ កម្ពុជា ឈរនៅលើក្រុម អ៊ីស្លង់ ដែលស្ថិតនៅបាតតារាងតែមួយប៉ុណ្ណោះ។

គួរបញ្ជាក់ថា លទ្ធផលការប្រកួតក្នុងពាន SEA V. League ២០២៥ កន្លងទៅ គឺកម្ពុជាបានបរាជ័យគ្រប់ការប្រកួត ដោយជើងទី ១ ចាញ់ វៀតណាម ០-៣, ឥណ្ឌូណេស៊ី ០-៣, ហ្វីលីពីន ២-៣ និង ថៃ ០-៣។ ចំណែកការប្រកួតជើងទី ២ បានចាញ់ វៀតណាម ០-៣, ថៃ ១-៣, ហ្វីលីពីន ១-៣, ឥណ្ឌូណេស៊ី ០-៣៕

អត្ថបទ៖ សេម កុសល

The post កម្ពុជា ធ្លាក់​ចំណាត់​ថ្នាក់​ចំនួន ២០ លេខ ក្នុង​តារាង FIVB ក្រោយចប់ពាន SEA V League appeared first on Kampuchea Thmey Daily.

ការជួបគ្នា​​កាល​ពី​​ថ្ងៃទី​ ១១ ខែ​កក្កដា ឆ្នាំ ២០២៥ នៅ​ប្រទេស​​ហ្វីលីពីន ក្នុង​ជុំ​ទី១ នៃពាន​រង្វាន់​ដដែល​នេះ កម្ពុជា​ ធ្វើមិនបានល្អនោះទេ ដោយការប្រកួតនោះបាន​ចាញ់ ឥណ្ឌូណេស៊ី ក្នុង​លទ្ធផល ៣ សិតទល់នឹង ០។

យ៉ាងណា ទាំងការប្រកួត កាលពីជើងទី ១ និងជើងទី ២ នេះ ដែលកំពុងប្រព្រឹត្តទៅនៅ ឥណ្ឌូណេស៊ី គឺ កម្ពុជា មិនទាន់រកបានជ័យជម្នះសូម្បីមួយប្រកួតនៅឡើយទេ ដោយឆ្លងកាត់ការប្រកួតសរុប ៧ ប្រកួត ចាញ់ទាំង ៧ ប្រកួត។ តាមរយៈលទ្ធផលនេះ បានធ្វើឱ្យ កម្ពុជា កំពុងប្រឈមជួបស្ថានភាពមិនល្អ ដោយអាចធ្លាក់ទៅលេងពានទី ២ SEA V. League Challenge វិញនៅឆ្នាំក្រោយ ២០២៦។

គួរឱ្យដឹងថា ការប្រកួតទល់នឹង ឥណ្ឌូណេស៊ី ល្ងាចនេះ គឺជាការប្រកួតទី ៤ ក្នុងជើងទី ២ នេះ ហើយក៏ជាការប្រកួតចុងក្រោយសម្រាប់ កម្ពុជា ក្នុងពាននេះផងដែរ។ ប្រវត្តិ​ជួប​គ្នា​ ៦ លើក​ចុង​ក្រោយ​គិត​ចាប់​តាំងពីឆ្នាំ ២០១១ មក កម្ពុជា មិនទាន់ទាន់ស្គាល់ជ័យជម្នះលើ ឥណ្ឌូណេស៊ី សូម្បីម្តង។

ខាងក្រោមនេះជាលទ្ធផលជួបគ្នាទាំង ៦ លើករវាងក្រុមបាល់ទះ កម្ពុជា​ និង ហ្វីលីពីន៖

• កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ២០១១)
• កម្ពុជា ចាញ់ ឥណ្ឌូណេស៊ី ០-៣ (កីឡា​ស៊ីហ្គេម ឆ្នាំ ២០១៥)
• កម្ពុជា ចាញ់ ឥណ្ឌូណេស៊ី ០-៣ (កីឡា​ស៊ីហ្គេម ឆ្នាំ ២០១៩)
• កម្ពុជា ចាញ់ ឥណ្ឌូណេស៊ី ១-៣ (កីឡា​ស៊ីហ្គេម ឆ្នាំ ២០២១)
• កម្ពុជា ចាញ់ ឥណ្ឌូណេស៊ី ០-៣ (កីឡា​ស៊ីហ្គេម ឆ្នាំ ២០២៣)
• កម្ពុជា ចាញ់ ឥណ្ឌូណេស៊ី ០-៣ (ជើងទី ១ ពាន SEA V League ២០២៥)៕

អត្ថបទ៖ សេម កុសល

The post ល្ងាចនេះ កម្ពុជា ជួប ឥណ្ឌូណេស៊ី ជាឱកាសចុងក្រោយរកជ័យជម្នះក្នុងពាន SEA V League appeared first on Kampuchea Thmey Daily.

ជួប​គ្នា​​កាល​ពី​​ថ្ងៃទី​ ១២ ខែ​កក្កដា ឆ្នាំ ២០២៥ នៅ​ប្រទេស​​ហ្វីលីពីន ក្នុង​ជុំ​ទី១ ពាន​រង្វាន់​ដដែល​នេះ កម្ពុជា​ បាន​ចាញ់ ហ្វីលីពីន ដោយ​លទ្ធផលទាំងប្រផិតប្រផើយ ៣ សិតទល់នឹង ២។ យ៉ាងណា កាលពីជើងទី ១ កន្លងទៅ កម្ពុជា មិនបានរកបានជ័យជម្នះសូម្បីមួយប្រកួត ដោយឆ្លងកាត់ ៤ ប្រកួត ចាញ់ទាំង ៤ ប្រកួត ក្នុងនោះក្រៅអំពីការចាញ់ ហ្វីលីពីន គឺបានចាញ់ វៀតណាម ឥណ្ឌូណេស៊ី និង ថៃ។

ដោយឡែកនៅ ជើងទី ២ ក្នុងប្រទេស ឥណ្ឌូណេស៊ី នេះវិញ កម្ពុជា ក៏មិនទាន់រកបានជ័យជម្នះនៅឡើយដែរ ដោយ ២ ប្រកួតកន្លងមក កម្ពុជា បានចាញ់ វៀតណាម ៣ សិត ០ និងចាញ់ ថៃ ៣ សិត ១។ ការប្រកួតទល់នឹង ហ្វីលីពីន ល្ងាចនេះ គឺជាការប្រកួតទី ៣ របស់ កម្ពុជា ក្នុងជើងទី ២ នៃពាន SEA V League មុនត្រូវជួបម្ចាស់ផ្ទះ ឥណ្ឌូណេស៊ី ដែលជាការប្រកួតចុងក្រោយនៅថ្ងៃស្អែកទី ១៩ ខែ កក្កដា ឆ្នាំ ២០២៥។

ប្រវត្តិ​ជួប​គ្នា​ ៤ លើក​ចុង​ក្រោយ​គិត​ចាប់​តាំងពីឆ្នាំ ២០១៩ មក កម្ពុជា បាន​ឈ្នះ​ ២ លើក ខណៈ ហ្វីលីពីន បានឈ្នះ ២​លើក។

ខាងក្រោមនេះជាលទ្ធផលជួបគ្នាទាំង ៤ លើករវាងក្រុមបាល់ទះ កម្ពុជា​ និង ហ្វីលីពីន៖

• កម្ពុជា ចាញ់ ហ្វីលីពីន ០-៣ (កីឡា​ស៊ីហ្គេម ឆ្នាំ ២០១៩)
• កម្ពុជា ឈ្នះ ហ្វីលីពីន ៣-១ (កីឡា​ស៊ីហ្គេម ឆ្នាំ ២០២១)
• កម្ពុជា ឈ្នះ ហ្វីលីពីន ៣-០ (កីឡា​ស៊ីហ្គេម ឆ្នាំ ២០២១)
• កម្ពុជា ចាញ់ ហ្វីលីពីន ២-៣ (ពាន SEA V League ឆ្នាំ ២០២៥)៕

អត្ថបទ៖ សេម កុសល

The post ជើងទី១ ចាញ់ទាំងប្រផិតប្រផើយ ល្ងាចនេះ កម្ពុជា ប៉ះ ហ្វីលីពីន ម្តង​ទៀត ក្នុងពាន SEA V. League appeared first on Kampuchea Thmey Daily.

ជាការពិត ការប្រកួតជើងទី ១ ពីថ្ងៃទី ៩ ដល់ថ្ងៃទី ១៣ ខែ កក្កដា ឆ្នាំ ២០២៥ បានបញ្ចប់ជាស្ថាពរហើយ ក្នុងនោះក្រុមជម្រើសជាតិ ថៃ គឺជាក្រុមដណ្តើមបានមេដាយមាស។ ចំណែកក្រុមជម្រើសជាតិ ឥណ្ឌូណេស៊ី ដណ្តើមបានមេដាយប្រាក់ និងក្រុមជម្រើជាតិ វៀតណាម ដណ្តើមបានមេដាយសំរឹទ្ធ។ ដោយឡែកក្រុម កម្ពុជា ស្ថិតនៅចំណាត់ថ្នាក់លេខ ៥ ដោយឆ្លងកាត់ ៤ ប្រកួត បរាជ័យទាំង ៤ ប្រកួត។

ក្រឡេកមកមើលសមាសភាពកីឡាករតាមក្រុមនីមួយៗវិញ ឃើញថា មុនការប្រកួតជើងទី ២ មកដល់ ក្រុមជម្រើសជាតិ ឥណ្ឌូណេស៊ី និង ហ្វីលីពីន បានផ្លាស់ប្តូរសមាជិកមួយចំនួន។ ចំណែកក្រុមជម្រើសជាតិ ៣ ផ្សេងទៀតដូចជា វៀតណាម ថៃ និង កម្ពុជា គឺមិនមានអ្វីប្រែប្រួលឡើយ។

ឥណ្ឌូណេស៊ី បានប្រែប្រួលកីឡាករ ២ នាក់ ក្នុងនោះពួកគេបានផ្លាស់ប្តូរអ្នកលេងតួនាទីស្មាត់ Doni Haryono ចេញ និង​ជំនួសវិញដោយកីឡាករ Agil Angga។ ចំណែកមួយរូបទៀត គឺអ្នកលេងតួនាទីលើកបាល់ Dio Zulfikri ចេញ និងជំនួសវិញ ដោយកីឡាករ Alfin Daniel។

រីឯក្រុមជម្រើសជាតិ ហ្វីលីពីន បានផ្លាស់ប្តូរកីឡាករមួយរូប គឺអ្នកលេងតំណែងលីប៊ើរ៉ូ Vince Lorenzo ចេញ និងជំនួសវិញដោយកូឡាករ Jack Kalingking។

គួរបញ្ជាក់ថា ការប្រកួតពាន SEA V League ជើងទី ២ នឹងចាប់ផ្តើមពីការប្រកួតពីថ្ងៃទី ១៦ ខែកក្កដា ដល់ថ្ងៃទី ២០ ខែ កក្កដា ឆ្នាំ ២០២៥។

ក្នុងនោះក្រុមជម្រើសជាតិ កម្ពុជា ត្រូវប្រកួតបើកឆាក ដោយជួបជាមួយក្រុមជម្រើសជាតិ វៀតណាម និងថ្ងៃទី ១៦ ខែ​កក្កដា, ប្រកួតទី ២ ជួប ថៃ ថ្ងៃទី ១៧ ខែ​កក្កដា, ប្រកួតទី ៣ ជួប​ ហ្វីលីពីន នៅថ្ងៃទី ១៨ ខែ​កក្កដា និងប្រកួតទី ៣ ជួបក្រុម ឥណ្ឌូណេស៊ី នៅថ្ងៃទី ១៩ ខែ​កក្កដា៕

អត្ថបទ៖ សេម កុសល

The post ជើងទី២ ពាន SEA V League ឥណ្ឌូណេស៊ី និងហ្វីលីពីន ផ្លាស់ប្តូរកីឡា​ករមួយចំនួន appeared first on Kampuchea Thmey Daily.

ការ​ប្រកួត​លើក​ទី​៣​នេះ កម្ពុជា ត្រូវ​ប៉ះ​ម្ចាស់​ផ្ទះ ហ្វីលីពីន ដែល​ជា​ដៃ​គូ​មួយ​មិន​អាចមើល​រំលង​បាន។ ឆ្លង​កាត់ ២ ប្រកួតដូច​គ្នា កម្ពុជា បាន​ចាញ់ វៀតណាម ០-៣ និង ចាញ់ ឥណ្ឌូណេស៊ី ០-៣ ខណៈ ហ្វីលីពីន បានឈ្នះ វៀតណាម ៣-០ និង​ចាញ់ ថៃ ០-៣។ ការ​ប្រកួត​នេះ ហ្វីលីពីន មាន​ប្រៀប​ខាង​កម្លាំង ពី​ព្រោះ​បាន​សម្រាក​កា​ល​ពី​ម្សិល​មិញ ខណៈ កម្ពុជា បាន​ប្រកួត​ពីរ​ថ្ងៃ​ជាប់់​គ្នា។

​គិត​​តែ​ក្នុង​កីឡា​ស៊ីហ្គេម តាំង​ពី​ឆ្នាំ ២០១១ ដល់​ ឆ្នាំ ២០២៣ កម្ពុជា និង​ ហ្វីលីពីន ធ្លាប់​ជួប​​ ៣ ដង ក្នុង​នោះ​ កម្ពុជា បាន​​ចាញ់ ហ្វីលីពីន ១​ លើក ដោយ​លទ្ធផល ០-៣ នៅ​ឆ្នាំ​ ២០១៩ ប៉ុន្តែ​នៅ​ឆ្នាំ ២០២១ កម្ពុជា​បាន​ឈ្នះ ដោយ​លទ្ធផល ៣-១ និង​ឆ្នាំ ២០២៣ បាន​ឈ្នះ ៣-០។

ក្រុម​កម្ពុជា ស្ថិត​នៅ​ក្រោម​គេ​ក្នុង​តារាង បន្ទាប់​ពី​ចាញ់ ២ លើក​ជាប់​គ្នា ហើយ ថៃ ស្ថិត​នៅ​លេខ ១ បើ​ទោះ​ជា​ចាញ់ វៀតណាម ដែល​ស្ថិត​លេខ២ ខណៈ​ ឥណ្ឌូណេស៊ី ស្ថិត​នៅ​លេខ​៣។ ការ​ប្រកួត​នេះ​វិល​ជុំ​សន្សំពិន្ទុ ក្រុម​ណា​មាន​ពិន្ទុ​ខ្ពស់​ជាង​គេ​ក្លាយ​ជា​ជើង​ឯក ហើយ​លេខ២ ទទួល​បាន​មេដាយ​ប្រាក់ និង​លេខ​៣ ទទួលបាន​មេដាយ​សំរិទ្ធ។ ចំណែក​ក្រុម​លេខ​៤ បន្ត​រក្សា​កៅអី​ទៅ​ឆ្នាំ​ក្រោយ​ទៀត ខណៈ​ក្រុម​បាតតារាង​​ ត្រូវ​ធ្លាក់​ទៅ​កម្រិត​ទី​២​វិញ ប៉ុន្តែ​នៅ​ចាំ​ការ​ប្រកួត​ជុំ​ទី​២ នៅ​ប្រទេស​ឥណ្ឌូណស៊ី៕

ជួប​គ្នា ៣ លើក​ចុង​ក្រោយ កម្ពុជា និង ហ្វីលីពីន

• កម្ពុជា ចាញ់ ហ្វីលីពីន ០-៣ (កីឡា​ស៊ីហ្គេម ឆ្នាំ ២០១៩)
• កម្ពុជា ឈ្នះ ហ្វីលីពីន ៣-១ (កីឡា​ស៊ីហ្គេម ឆ្នាំ ២០២១)
• កម្ពុជា ឈ្នះ ហ្វីលីពីន ៣-០ (កីឡា​ស៊ីហ្គេម ឆ្នាំ ២០២១)

អត្ថបទ៖ វីរបុត្រ

The post កម្ពុជា ធ្លាប់ឈ្នះ ហ្វីលីពីន ២​លើក​ចុង​ក្រោយ មុន​ប៉ះគ្នា​ម៉ោង​៦​ល្ងាច​នេះ appeared first on Kampuchea Thmey Daily.

ការ​ប្រកួត​លើក​ទី១ ក្រុម​ទាំង​ពីរ​សុទ្ធ​តែ​ខក​ចិត្ត​ដូច​គ្នា ដោយ ​ឥណ្ឌូណេស៊ី បាន​ចាញ់ ក្រុម​ខ្លាំង​ថៃ ដោយ​លទ្ធផល ១-៣ ខណៈ​ កម្ពុជា បាន​ចាញ់ វៀតណាម ០-៣។ ថ្ងៃ​នេះ​ជា​ការ​ប្រកួត​ដែល​ក្រុម​ទាំង​ពីរ​ត្រូវ​ស្វែង​រក​ជ័យជម្នះ​លើក​ដំបូង​ដូច​គ្នា ប៉ុន្តែ​បើ​និយាយ​ពី​សមត្ថភាព​គឺ ក្រុម​កម្ពុជា​ស្ថិត​នៅ​ក្រោម​ ឥណ្ឌូណេស៊ី។

កាល​ពី ចាញ់​វៀតណាម ដោយ​លទ្ធផល ០-៣ ក្រុម​កម្ពុជា បាន​បង្ហាញ​ទម្រង់​លេង​មិន​ល្អ​សោះ​ឡើយ បើ​ទោះ​ជា​មាន​កីឡាករ​វាយ​ផ្តាច់​ឆ្នើម​ៗ​ដូច​ជា វឿន វាសនា និង គួន ម៉ុម ក៏​ដោយ។ អ្វី​ដែល​មើល​ឃើញ​ជា​បញ្ហា​គឺ កីឡាករ​ប៉ះសេ នៅ​ស្ទើរ ហើយ​ការ​ទទួល​បាល់​មិន​សូវ​ល្អ និង​​វាយ​សេវា​ខូច​ច្រើន សូម្បី​តែ​ជើង​ក្រោម​ក៏​ធ្វើ​មិន​បាន​ល្អ។ និយាយ​រួម​គឺ ក្រុម​​កម្ពុជា​ខ្វះ​សហការ​ជាក្រុម។

គិត​ចាប់​តាំង​ពី​ឆ្នាំ ២០១១ ជា​ពេល​ដែល​កម្ពុជា​មាន​ក្រុម​បាល់ទះ​ចូល​រួម​ប្រកួត​ក្នុង​ព្រឹត្តិការណ៍​កីឡា​ស៊ីហ្គេម ក្រោយ​សម័យ​សង្គ្រាម កម្ពុជា ធ្លាប់​បាន​ជួប ឥណ្ឌូណេស៊ី ៦ លើក ប៉ុណ្ណោះ​មិន​ធ្លាប់​ឈ្នះ​ឡើយ។

ប្រវត្តិ​ជួប​គ្នា​រវាង កម្ពុជា និង ឥណ្ឌូណេស៊ី

• កម្ពុជា ចាញ់ ឥណ្ឌូណេស៊ី ០-៣ (ស៊ីហ្គេម ២០១១)
• កម្ពុជា ចាញ់ ឥណ្ឌូណេស៊ី ០-៣ (ស៊ីហ្គេម ២០១៥)
• កម្ពុជា ចាញ់ ឥណ្ឌូណេស៊ី ០-៣ (ស៊ីហ្គេម ២០១៩)
• កម្ពុជា ចាញ់ ឥណ្ឌូណេស៊ី ១-៣ (ស៊ីហ្គេម ២០២១)
• កម្ពុជា ចាញ់ ឥណ្ឌូណេស៊ី ០-៣ (ស៊ីហ្គេម ២០២៣
• កម្ពុជា ចាញ់ ឥណ្ឌូណេស៊ី ០-៣ (ស៊ីហ្គេម ទទួល​បាន​មេដាយ​ ប្រាក់ ២០២៣)

អត្ថបទ៖ វីរបុត្រ

The post ប្រវត្តិ​មិន​ធ្លាប់​ឈ្នះ ក្រុម​បាល់ទះ​ កម្ពុជា ប៉ះ ឥណ្ឌូណេស៊ី លើក​ទី​៧ រសៀល​នេះ appeared first on Kampuchea Thmey Daily.

សិត​ទី១ កម្ពុជា បាន​ចាញ់ វៀតណាម ២៣-២៥, សិត​ទី​៣ បន្ត​ចាញ់ ២០-២៥ និង​សិត​ទី​៣ បន្ត​ចាញ់ ២១-២១ ដោយ​មិន​អាច​តដៃ​ជា​មួយ​ វៀតណាម​ បាន​ឡើយ។ សរុប​ទាំង ​៣ ​សិត កម្ពុជា បាន​ចាញ់ ដោយ​ពិន្ទុ ៦៤-៧៥។

ការ​ប្រកួត​បង្ហាញ​យ៉ាង​ច្បាស់​ពី​ចង្វាក់​លេង​មិន​ល្អ​សម្រាប់​កម្ពុជា​ ជា​ពិសេស​កីឡាករ​លើក​បាល់គឺ​មិន​ច្បាស់ ដែល​ធ្វើ​ឲ្យ​កីឡាករ​ផ្តាច់​ពិបាក​រក​ពិន្ទុ​ខ្លាំង​មែន​ទែន។ ម្យ៉ាង​វិញ កម្ពុជា ព្យាយាម​លេង​សេវា​កាច ដែល​ធ្វើ​ឲ្យ​ខូច​ច្រើន ខណៈ​វៀតណាម​មិន​ព្យាយាម​លេង​បាល់​កាច​ទេ​ដែល​ធ្វើ​ឲ្យ​ពួក​គេ​កម្រ​ខូច​សេវា។ លើស​ពី​នេះ​ទៀត កម្ពុជា​ហាក់​ដូច​ជា​ខ្វះ​ស្មារតី​នាំ​លេង។

កែវ ស្រេងលីហ៊ួរ និង យុន ខេមរៈ ជា​អ្នក​ប៉ះ​សេ​ដែល​ស្ទើរ​បទ​ពិសោធ ដោយសារ​ពួក​គេ​នៅ​ក្មេង​ខ្ចី ហើយ​មិន​សូវ​បាន​លេង​ព្រឹត្តិការណ៍​ធំ​ៗឡើយ បន្ទាប់​ពី​អ្នក​ប៉ះ​សេ​ឆ្នើម សួន ចាន់ណារ៉ូ​ បានចូល​និវត្តន៍។

តាម​រយៈ​លទ្ធផល​ចាញ់​វៀតណាម​នេះ កម្ពុជា​ប្រឈម​នឹង​ធ្លាក់​មក​ពាន​រង្វាន់​កម្រិត​ទី​២ SEA V. League វិញ ដោយសារ​ការ​ប្រកួត​បន្ទាប់​ប៉ះ​ក្រុម​ដែល​ខ្លាំង​ជាង​វៀតណាម​ថែម​ទៀតគឺ ឥណ្ឌូណេស៊ី ហ្វីលីពីន និង​ថៃ។

ការ​ប្រកួត​នេះ​ប្រើ​រូប​មន្ត​វិល​ជុំ​សន្សំពិន្ទុ ដោយ​ក្រុម​ណា​ឈ្នះ​ទាំង​៤ ប្រកួត​មាន​ពិន្ទុ​ច្រើន​ជាង​គេ​ក្លាយ​ជា​ឯក ហើយ​ក្រុម​លំដាប់​ទី២ ទទួល​បាន​មេដាយ​ប្រាក់ និង​ក្រុម​លំដាប់​លេខ ៣ ទទួល​បាន​មេដាយ​សំរិទ្ធ ខណៈ​ក្រុម​លេខ​៤ អាច​បន្ត​នៅ​ពាន​រង្វាន់​ទៅ​រដូវ​កាល​ក្រោយ​ទៀត ហើយ​ក្រុម​ចំណាត់​ថ្នាក់​បាត​តារាង ត្រូវ​ធ្លាក់​ចេញ។

កាល​ពី​ម្សិល​មិញ វៀតណាម បាន​ចាញ់ ហ្វីលីពីន ០-៣ ប៉ុន្តែ​លើក​នេះ​បាន​ឈ្នះ​កម្ពុជា ដែល​ធ្វើឲ្យ​ពួក​គេ​មាន​សង្ឃឹម​នៅ​បន្ត​ទៅ​ឆ្នាំក្រោយ៕

អត្ថបទ៖ វីរបុត្រ

The post ស្ទើរ​អ្នក​ប៉ះ​សេ ធ្វើ​ឲ្យ​កម្ពុជា ចាញ់ វៀតណាម ០-៣ បើក​ឆាកពាន SEA V. League appeared first on Kampuchea Thmey Daily.