Sports Archives - Kampuchea Thmey Daily

តេក្វាន់ដូWT បើកវគ្គបណ្តុះបណ្តាលគ្រូ បង្វឹកកម្រិតមូលដ្ឋាន និងគ្រូបង្វឹកថ្នាក់ជាតិ

Kang Tola — Fri, 22 Jan 2021 10:43:15 +0000

ភ្នំពេញ ៖ ខេមរសហព័ន្ធតេក្វាន់ដូ WT នៅព្រឹកថ្ងៃទី២២ ខែមករា ឆ្នាំ២០២១ បានបើកវគ្គបណ្តុះបណ្តាលគ្រូបង្វឹកតេក្វាន់ដូ WT កម្រិតមូលដ្ឋាន និងគ្រូបង្វឹកថ្នាក់ជាតិឆ្នាំ២០២០ដល់សិក្ខាកាមចំនួន៣០នាក់ឲ្យក្លាយគ្រូបង្វឹកកីឡាប្រភេទនេះនៅតាមសា លារៀនរដ្ឋ និងក្លិបតាមបណ្តាខេត្តនានាមកពី៨រាជធានីខេត្តក្រុង នៅសាលហ្វឺកហាត់បណ្ឌិត្យសភាតេក្វាន់ដូកម្ពុជាក្នុងមជ្ឈមណ្ឌលជាតិហ្វឹកហ្វឺកកីឡា។

លោកជាតិ ខេមរា អ្នកសម្រលសម្រួលវគ្គបានប្រាប់ឲ្យដឹងថា វគ្គនេះមានសិក្ខាកាមចំនួន៣០ជាគ្រូបង្វឹក ដែលមកពីក្លិបតាមបណ្តាខេត្តនានាមកពី៨រាជធានីខេត្តក្រុងរួមមានខេត្តព្រៃវែង ខេត្តកំពង់ចាម ខេត្ត បាត់ដំបង ខេត្តមណ្ឌលគីរី ខេត្តកណ្តាល ខេត្តសៀមរាប និងភ្នំពេញមានរយៈពេល ៤ថ្ងៃចាប់ពីថ្ងៃទី២១ដល់ថ្ងៃទី២៤ ខែមករា ឆ្នាំ២០២១។

លោកបានបន្តថា សម្រាប់គ្រូឧទ្ទេសវិញមានចំនួន៦នាក់ គឺលោកគ្រូជនជាតិកូរ៉េខាងត្បូង Cheon Samyeong លោក គង់ សក្ខិដា អគ្គលេខាធិការរងសហព័ន្ធ លោកគ្រូលី ស៊ុនរដ្ឋា លោក ប៉ាន់ ខេមរា លោក ទួន សាវុធ។ វគ្គនេះ បើកឡើងក្នុងគោលបំណង ដើម្បីអភិវឌ្ឍនវិស័យកីឡាតេក្វាន់ដូWTនៅប្រទេសកម្ពុជា ព្រមទាំងជាផែនការមេរបស់ប្រធានខេមរសហព័ន្ធក្នុងការជំរុញពង្រីកកីឡាមួយនេះ មាននៅទូទាំងប្រទេស និងត្រៀមដាក់បញ្ចូលក្នុងកម្មវិធីសិក្សានៅតាមសាលារដ្ឋ។

លោកខេមរា បន្ថែមទៀតថា វគ្គបណ្តុះ បណ្តាលនេះ អាចប្រព្រឹត្តទៅបានដោយការគាំទ្រថវិការបស់ក្រសួងអប់រំ យុវជន និង កីឡា ក្នុងការជួយពន្លឿនខេមរសហព័ន្ធតេក្វាន់ដូ ដើម្បីធ្វើការបណ្តុះបណ្តាលធនធាន មនុស្ស ដូចជាមន្ត្រីបច្ចេកទេស អាជ្ញាកណ្ដាល-ចៅក្រម និងគ្រូបង្វឹកតេក្វាន់ដូថ្នាក់មូលដ្ឋានថ្នាក់ជាតិ និងថ្នាក់អន្តរជាតិជាដើម សម្រាប់ត្រៀមធ្វើជាម្ចាស់ផ្ទះ នៃការប្រកួតកីឡាSEA GAMES លើកទី ៣២ នាឆ្នាំ២០២៣ខាងមុខ និងត្រៀមចូលរួមក្នុងកម្មវិធីប្រកួតជាលក្ខណៈអន្តរ ជាតិនានា៕

ដោយ ៖ វិសិទ្ធ

សូមចុចអាន ៖ ស្អែកនេះ ទ្រីយ៉ាត្លុងចាប់ផ្ដើមការប្រកួតហើយ នៅខេត្តកែប

សូមចុចអាន ៖ម្ចាស់ខ្សែក្រវាត់ Ramazanov សរសើរ Capitan ឆ្លាត តែបើខ្វះការគោរពនឹងផ្តួលឲ្យសន្លប់

The post តេក្វាន់ដូWT បើកវគ្គបណ្តុះបណ្តាលគ្រូ បង្វឹកកម្រិតមូលដ្ឋាន និងគ្រូបង្វឹកថ្នាក់ជាតិ appeared first on Kampuchea Thmey Daily.

គ្រូបង្វឹក ចាន់ រតនា រំលឹកអំពីបរាជ័យ និងដាក់ផែនការដល់កូនសិស្សនៅឆ្នាំ២០២១

Kang Tola — Mon, 18 Jan 2021 10:37:12 +0000

លោក Lorenzo ដែលជាគ្រូបង្វឹកផ្ទាល់របស់ ចាន់ រតនា បានរំលឹកអំពីបរាជ័យរបស់កូនសិស្ស កាលខែ ធ្នូ ២០២០ ដោយថ្វីដៃកីឡាករចិន Xie Wei និងដាក់ផែនការសម្រាប់ឆ្នាំ២០២១ ដល់អ្នកលេងគុនចម្រុះលំដាប់លេខ១នៅកម្ពុជា។

លោក Lorenzo បានថ្លែងបែបនេះ «ការប្រកួតឆ្នាំ២០២០ មិនដើរទៅតាមគោលដៅរបស់យើង។ ពួកយើងត្រូវបានដាក់នៅដោយឡែក(ចត្តាឡីស័ក) នៅសប្ដាហ៍ប្រកួត ដូច្នេះវាមិនងាយស្រួលក្នុងការសម្របខ្លួននោះទេ។ នៅឆ្នាំ ២០២១ យើងនឹងផ្ដោតជំនាញផ្សេងៗឡើងវិញ, ស្ដារកម្លាំងឲ្យល្អ, និងផ្ដោតលើការប្រកួតក្នុងជំហរដេក (ground game) ជាពិសេសដើម្បីជួបគូបដិបក្ខកម្រិតខ្ពស់ក្នុងពិភពគុនចម្រុះបន្តទៀត»។

គ្រូបង្វឹកសញ្ជាតិអ៊ីតាលីរូបនេះ ជាអ្នកធ្វើការងារស្និទ្ធស្នាលបំផុតជាមួយ ចាន់ រតនា ទោះស្ថិតក្នុងវិបត្តិកូវីដ-១៩ ក្រៅពី គ្រូបង្វឹកជឺជិតស៊ូ, ប្រដាល់សកល, និង គុនខ្មែរជាដើម។ ពេលមានការប្រកួតម្ដងៗនៅសង្វៀនលំដាប់ពិភពលោក ONE Championship លោកតែងតែនាំ រតនា ចេញទៅប្រកួត និងជាអ្នកឲ្យទឹកដល់កូនសិស្សផងដែរ។

លោកបញ្ជាក់ទៀតថា «ក្រុមការងារគ្រូបង្វឹកLLFitness នឹងជួយឲ្យរូបគេហ្វឹកហាត់ដោយមានភាពឆ្លាតវៃ , ខ្លាំងទាំងកម្លាំងកាយ និងកម្លាំងស្មារតី។ ខ្ញុំមើលឃើញនូវបទពិសោធន៍ជាវិជ្ជមានសម្រាប់ រតនា ដែលនឹងធ្វើឲ្យ គេកាន់តែខ្លាំងជាងមុននៅប្រកួតបន្ទាប់នាឆ្នាំ ២០២១។ ក្នុងនោះ ការគាំទ្រ និងក្ដីស្រលាញ់ពីសំណាក់អ្នកគាំទ្រនៅកម្ពុជាបានជួយឲ្យរូបគេមានកម្លាំងចិត្តកាន់តែខ្លាំង និងត្រូវដាក់គោលដៅឲ្យជាតិមានមោទកភាពត្រលប់ទៅវិញផងដែរ»។

ក្នុងការប្រកួតចុងក្រោយ ចាន់ រតនា ចាញ់អ្នកលេងចំបាប់វ័យក្មេងចិន Xie Wei ក្នុងទម្ងន់ Flyweight នៅព្រឹត្តិការណ៍ ONE: COLLISION COURSE នាថ្ងៃទី១៨ ខែ ធ្នូ នៅកីឡដ្ឋាន Singapore Indoor Stadium ប្រទេសសិង្ហបុរី។ បន្ទាប់ពីចាញ់ដោយសន្លប់នៅទឹកទី៣ រតនា កំពុងតាំងចិត្តជាតិថ្មីដើម្បីសាងជ័យជម្នះជូនអ្នកគាំទ្រវិញនៅឆ្នាំ២០២១ នេះ។ វាជាលើកទី៣ ដែលរូបគេចាញ់កីឡាករចិននៅសង្វៀនលំដាប់ពិភពលោក ONE Championship។ ជើងខ្លាំងចិនពីររូបដែល ម្ចាស់ក្លិបសិល្បៈ ចាញ់នៅឆ្នាំ ២០១៦ និង ២០១៧ កន្លងមក មានដូចជា Haobin Ma និង Xie Bin ៕

សូមចុចអាន ៖ CAMSOCបើកសន្និបាតប្រចាំឆ្នាំ និងសិក្ខាសាលាថ្នាក់ជាតិ ស្ដីពីយុទ្ធនាការអប់រំសង្គមឆ្ពោះទៅស៊ីហ្គេម-២០២៣

សូមចុចអាន ៖ ទោះវិបត្តិកូវីដ-១៩ យាយី ប៉ុន្តែ ចាន់ រតនា មានរឿងល្អៗបំផុតចំនួន៣នៅឆ្នាំ២០២០

The post គ្រូបង្វឹក ចាន់ រតនា រំលឹកអំពីបរាជ័យ និងដាក់ផែនការដល់កូនសិស្សនៅឆ្នាំ២០២១ appeared first on Kampuchea Thmey Daily.

អ្នកគាំទ្រចង់ឃើញអ្នកលេងគុនខ្មែរ៣នាក់នេះ បន្តលេចធ្លោនៅ ONE ឆ្នាំ២០២១

Kang Tola — Wed, 13 Jan 2021 10:33:05 +0000

កាលពីឆ្នាំ២០២០កន្លងទៅ មានតែអ្នកលេងគុនខ្មែរ ៤ នាក់ដែលបានទៅប្រកួតនៅស្ថាប័នអន្តរជាតិ ONE Championship ដោយសារបញ្ហាជំងឺកូវិត-១៩ ដែលមិនមានអំណោយផលដល់កីឡាករផ្សេងៗទៀត។

អត្តពលិកកម្ពុជាទាំង៤រូបនោះគឺ ចាន់ រតនា, នៅ ស្រីពៅ , សុខ ធី និងខុន ស៊ីចាន់។ ដោយសារខុន ស៊ីចាន់ ទើបទទួលបានចំណងដៃកូនប្រុសម្នាក់។ ដូច្នេះអ្នកគាំទ្រសង្ឃឹមថា ចាន់ រតនា, នៅ ស្រីពៅ , និង សុខ ធី បន្តរះ និង ទទួលបានឱកាសប្រកួតនៅសង្វៀនអន្តរជាតិនេះទៀតក្នុងឆ្នាំ២០២១នេះ និងរឹតតែជោគជ័យជាងឆ្នាំមុន។

អ្នកលេងគុនចម្រុះលេខ១កម្ពុជា ចាន់ រតនា ត្រូវបានអ្នកគាំទ្រមើលឃើញថា ទទួលបានជោគជ័យជាងគេនៅសង្វៀនអន្តរជាតិនេះ ព្រោះចន្លោះពីឆ្នាំ២០១៨ ដល់ ២០១៩ រូបគេទទួលបានជ័យជម្នះ៣លើកជាប់គ្នា។

យ៉ាងណា ក្នុងខែធ្នូ ឆ្នាំ២០២០ កន្លងទៅថ្មីៗនេះ ចាន់ រតនា បានចាញ់កីឡាករ Xie Wie នៅក្នុងទឹកទី៣ នៅ ONE: COLLISION COURSE។ ទាំងសាមីខ្លួនកីឡាករ និងអ្នកគាំទ្រយល់ឃើញថា អ្នកលេងគុនខ្មែរម្នាក់នេះមានសមត្ថភាពល្អជាងកីឡាករចិនទាំងក្បាច់លើ និងក្បាច់ក្រោម ប៉ុន្តែការធ្វេសប្រហែសធ្វើឲ្យរូបគេចាញ់ក្នុងទឹកទី៣។

តារាទូតសុច្ឆន្ទៈសែលកាតបានប្រាប់ក្រោយការប្រកួតថា «ខ្ញុំពិតជាសោកស្តាយខ្លាំង ព្រោះនៅទឹកទី២ ខ្ញុំមានប្រៀបហើយ។ ពេលនោះ ខ្ញុំគិតថា ខ្លួនឯងឈ្នះទៅហើយ តែខ្ញុំមើលស្រាលដៃគូ ក៏ភ្លាត់ត្រូវគេវ៉ៃឲ្យដួល»។

ចាន់ រតនា ប្តេជ្ញាថា «ឆ្នាំថ្មី២០២១នេះ ខ្ញុំខំប្រឹងឲ្យខ្លាំងទ្វេឡើង ព្រោះខ្ញុំមិនចង់ឲ្យបងប្អូន អ្នកគាំទ្រខកចិត្តទៀតទេ»។

ចំណែកកីឡាការិនី នៅ ស្រីពៅ ទទួលស្គាល់ថា ជំនាញគុនចម្រុះរបស់នាងនៅមានកម្រិត ពេលប្រកួតចាញ់កីឡាការិនីឥណ្ឌា Ritu Phogat ក្នុងទឹកទី២នៅ ONE: BIG BANG ក្នុងខែតុលា។ ម្យ៉ាងទៀត នាងមិនបានហ្វឹលហាត់ដិតដល់ទេដោយសារជំងឺខូវិត-១៩ និងត្រូវគោរពតាមវិធានការណ៍ការពារច្រើនថ្ងៃទៀតមុនពេលប្រកួតនោះមកដល់។

ស្រីពៅ ប្រាប់ថា «ខ្ញុំមិនទាន់ច្បាស់រឿងផ្តោតលើគុនចម្រុះទេ ពីព្រោះឆ្នាំ២០២១នេះ ខ្ញុំជាប់ភារកិច្ចនៅជម្រើសជាតិទៅស៊ីហ្គេមនៅប្រទេសវៀតណាម»។

កីឡាការិនី នៅ ស្រីពៅ ជាប់ជម្រើសជាតិកម្ពុជាផ្នែកប្រដាល់សកលដែលបានចូលរួមហ្វឹកហាត់ជាមួយក្រុមជម្រើសជាតិកម្ពុជាតាំងពីឆ្នាំ២០២០ដើម្បីត្រៀមខ្លួនទៅប្រកួតស៊ីហ្គេមនៅប្រទេសវៀតណាមចុងឆ្នាំនេះ។

ចំណែក សុខ ធី បានក្លាយជាអត្តពលិកកម្ពុជាតែម្នាក់គត់ ដែលទទួលបានជ័យជម្នះនៅឆ្នាំ២០២០ និងជាកីឡាករកម្ពុជាទី១ឈ្នះនៅ ONE Super Serie បន្ទាប់ពីផ្តួលកីឡាករចិន Huang Ding ក្នុងទឹកទី១ នៅ ONE: A NEW BREED ក្នុងខែសីហា ប៉ុន្តែប្រកួតមួយទៀតចាញ់ពិន្ទុកីឡាករថៃ Mongkolpetch នៅ ONE: NO SURRENDER III ក្នុងខែកក្កដា។

សុខ ធី ប្រាប់ថា «ឆ្នាំ២០២១នេះ ខ្ញុំចង់ឲ្យទទួលបានជោគជ័យ និងល្អប្រសើរជាងឆ្នាំ២០២០។ សមត្ថភាពរបស់ខ្ញុំនៅមានកម្រិត បើប្រៀបធៀបជាមួយម្ចាស់ខ្សែក្រវាត់ពិភពលោក ដូច្នេះខ្ញុំមិនទាន់ប្រាថ្នាប្រកួតដណ្តើមខ្សែក្រវាត់ពិភពលោកឡើយ»។

សព្វថ្ងៃនេះ សុខ ធី កំពុងហ្វឹកហាត់នៅប្រទេសថៃយ៉ាងដិតដល់ជាច្រើនខែមកហើយ។ រូបគេថែមទាំងទទួលបានជ័យជម្នះក្នុងការឡើងប្រកួតនៅសង្វៀនក្នុងប្រទេសថៃ។ សម្រាប់ឆ្នាំ២០២១នេះអាចជាឆ្នាំល្អសម្រាប់ សុខ ធី នៅស្ថាប័ន ONE នៅពេលគេរៀបចំការប្រកួតនៅប្រទេសថៃ៕

សូមចុចអាន ៖ ក្រសួងអប់រំ និងNOCC ប្រកាសទទួលសហព័ន្ធកីឡាប្រដាល់ឃីកបុកស៊ីងកម្ពុជាជាផ្លូវការ

សូមចុចអាន ៖ កាលពីឆ្នាំ២០២០កន្លងទៅ មានតែអ្នកលេងគុនខ្មែរ ៤ នាក់ដែលបានទៅប្រកួតនៅស្ថាប័នអន្តរជាតិ ONE Championship ដោយសារបញ្ហាជំងឺកូវិត-១៩

The post អ្នកគាំទ្រចង់ឃើញអ្នកលេងគុនខ្មែរ៣នាក់នេះ បន្តលេចធ្លោនៅ ONE ឆ្នាំ២០២១ appeared first on Kampuchea Thmey Daily.

Sports Archives - Kampuchea Thmey Daily

តេ​ក្វាន់​ដូ​WT បើក​វគ្គ​បណ្តុះបណ្តាល​គ្រូ បង្វឹក​កម្រិត​មូលដ្ឋាន និង​គ្រូបង្វឹក​ថ្នាក់ជាតិ

គ្រូបង្វឹក ចាន់ រតនា រំលឹក​អំពី​បរាជ័យ និង​ដាក់​ផែនការ​ដល់​កូនសិស្ស​នៅ​ឆ្នាំ​២០២១

អ្នកគាំទ្រ​ចង់ឃើញ​អ្នកលេង​គុន​ខ្មែរ​៣​នាក់​នេះ​ បន្ត​លេចធ្លោ​នៅ ONE ឆ្នាំ​២០២១

តេក្វាន់ដូWT បើកវគ្គបណ្តុះបណ្តាលគ្រូ បង្វឹកកម្រិតមូលដ្ឋាន និងគ្រូបង្វឹកថ្នាក់ជាតិ

គ្រូបង្វឹក ចាន់ រតនា រំលឹកអំពីបរាជ័យ និងដាក់ផែនការដល់កូនសិស្សនៅឆ្នាំ២០២១

អ្នកគាំទ្រចង់ឃើញអ្នកលេងគុនខ្មែរ៣នាក់នេះ បន្តលេចធ្លោនៅ ONE ឆ្នាំ២០២១