តាមប្រភពដដែល ក្នុងជំនួបនោះ លោកសាស្ត្រាចារ្យ Zhao Shuangliang បានបញ្ជាក់ថា សាកលវិទ្យាល័យគ័ងស៊ី ចង់បើកកិច្ចសហការជាមួយគ្រឹះស្ថានឧត្តមសិក្សាកម្ពុជា លើការអភិវឌ្ឍវិស័យបច្ចេកវិទ្យា ការសិក្សា STEM ការជំរុញការស្រាវជ្រាវលើបញ្ញាសិប្បនិម្មិត កសិកម្មឆ្លាតវៃ។ល។ លោកសាស្ត្រាចារ្យ Zhao ក៏បានបញ្ជាក់ទៀតថា សាកលវិទ្យាល័យគ័ងស៊ី គឺជាសាកលវិទ្យាល័យ ដែលមានកេរ្តិ៍ឈ្មោះមួយក្នុងប្រទេសចិន និងក្នុងសាកលលោក។ សាកលវិទ្យាល័យ ក៏មានបទពិសោធន៍ជាក់ស្ដែងក្នុងការអនុវត្តគម្រោងសហការរួមគ្នាក្នុងការជំរុញការសិក្សា និងការស្រាវជ្រាវលើវិស័យខាងលើ។ លោកសាស្ត្រាចារ្យ Zhao ក៏បានលើកទឹកចិត្តឱ្យគ្រឹះស្ថានឧត្តមសិក្សាកម្ពុជា ពិចារណាបញ្ចូលការសិក្សាភាសាចិន ដែលជាមធ្យោបាយដ៏មានប្រសិទ្ធភាពមួយ ក្នុងការជំរុញមិត្តភាពប្រជាជន និងប្រជាជន។

ជាការឆ្លើយតប បណ្ឌិត សោម រតនា បង្ហាញពីការចាប់អារម្មណ៍ក្នុងការជំរុញកិច្ចសហការជាមួយគ្រឹះស្ថានឧត្តមសិក្សាកម្ពុជា និងបានគូសបញ្ជាក់ថា ចេតនារបស់សាកលវិទ្យាល័យ ពិតជាបានឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល និងយុទ្ធសាស្ត្រអភិវឌ្ឍអនុវិស័យឧត្តមសិក្សា ដែលបានដាក់ចេញដោយក្រសួងអប់រំ យុវជន និងកីឡា។

អនុរដ្ឋលេខាធិការ ក្រសួងអប់រំ ស្នើឱ្យភាគីទាំងពីរបង្កើតក្រុមការងារ និងរៀបចំឯកសារពាក់ព័ន្ធ រួមទាំងផែនការសកម្មភាពជាក់ស្ដែង ដោយក្រសួងនឹងផ្តល់ការគាំទ្រលើកិច្ចការនេះ។

បន្ថែមពីនេះ លោកបណ្ឌិត ស្វាគមន៍ចំពោះការពិនិត្យលទ្ធភាពក្នុងការបញ្ចូលការសិក្សាភាសាចិន នៅក្នុងគ្រឹះស្ថានឧត្តមសិក្សា ដែលជាផ្នែកមួយនៃការធ្វើអន្តរជាតូបនីយកម្មឧត្តមសិក្សាកម្ពុជាទៅក្នុងតំបន់ និងអន្តរជាតិ និងក៏ជាមធ្យោបាយជំរុញទំនាក់ទំនងប្រជាជន និងប្រជាជន៕

The post កម្ពុជា-ចិន ពិភាក្សាពង្រឹងកិច្ចសហការលើជំនាញ STEM និង AI សម្រាប់កម្រិតឧត្តមសិក្សា appeared first on Kampuchea Thmey Daily.

ថ្លែងក្នុងបានអញ្ជើញជួបសំណេះសំណាលជាមួយគណៈប្រតិភូស្ត្រីជាង៣០០នាក់ ដឹកនាំដោយរដ្ឋមន្ត្រីកិច្ចការនារី អ៊ឹង កន្ថាផាវី នៅវិមានរដ្ឋសភាថ្ងៃទី៤ ខែមីនា ឆ្នាំ២០២៥ អបអរសាទរទិវាអន្តរជាតិនារីលើកទី១១៤ សម្ដេចសភាធិការធិបតី ឃួន សុដារី បានលើកឡើងថាជាមួយនឹងក្ដីបារម្ភពីការងាររបស់ក្មេងស្រីនៅពេលអនាគត ក្រោយឃើញមានការចាប់យកការសិក្សាថ្នាក់វិទ្យាសាស្ត្រសង្គមពីសំណាក់ក្មេងស្រីមានកម្រិតខ្ពស់។ សម្ដេចបានស្នើដល់អ្នកពាក់ព័ន្ធចូលរួមគិតគួរក្នុងការជំរុញក្មេងស្រីឱ្យបានចូលរៀនច្រើនលើមុខវិជ្ជា STEM។

សម្ដេចថា៖ «ខ្ញុំមិនដឹងថាការសិក្សារបស់ខ្ញុំខុសឬត្រូវយ៉ាងណាមិនដឹងទេ! តែគួរតែអ្នកដែលដាក់កម្មវិធីទៅគឺថាលើកទឹកចិត្តឱ្យក្មេងស្រីហ្នឹងជួយគិតគូរពិចារណារឿងហ្នឹងឱ្យបានច្រើនផង ឱ្យក្មេងស្រីបានរៀនលើបញ្ហាហ្នឹង។ បច្ចុប្បន្ន IT និង AI គេចាប់ផ្ដើមហើយបើជំនាន់នេះយើងអត់ឆ្លើយតបបានគឺទៅហើយ! ព្រោះបច្ចេកវិទ្យាវាជាគំនាស់មួយដើម្បីជំរុញកំណើនសេដ្ឋកិច្ចក៏ដូចជាការរស់នៅតាមបែបថ្មីទាន់សម័យឥឡូវនេះ»។

និន្នាការនៃការសិក្សារបស់សិស្សទៅរកថ្នាក់សង្គមបច្ចុប្បន្នហាក់មានចំនួនច្រើនឡើង បើធៀបនឹងថ្នាក់វិទ្យាសាស្ត្រ។ ទិន្នន័យនៃការប្រឡងមធ្យមសិក្សាទុតិយភូមិឆ្នាំ២០២៤ឱ្យដឹងថាក្នុងចំណោមសិស្សជិត១៤ម៉ឺននាក់ មានជាង៧០ភាគរយហើយដែលជ្រើសរើសថ្នាក់សង្គម។

អ្នកស្រាវជ្រាវការអភិវឌ្ឍន៍សង្គមលោកបណ្ឌិត ប៉ា ច័ន្ទរឿន ថាការអភវិឌ្ឍន៍ប្រទេសមួយចាំបាច់ត្រូវការតុល្យភាពនៃធនធានមនុស្សដែលមានទាំងវិទ្យាសាស្ត្រពិត និងសង្គម ហើយការដែលយុវជនខ្មែរមិនសូវចាប់អារម្មណ៍លើការសិក្សាថ្នាក់វិទ្យាសាស្ត្រច្រើនលើសលប់នេះគឺជាឧបសគ្គមួយក្នុងការអភិវឌ្ឍន៍។ លោកបន្ថែមថាដើម្បីកម្ពុជាក្លាយជាប្រទេសមានប្រាក់ចំណូលខ្ពស់បានត្រូវធ្វើយ៉ាងណាឱ្យក្លាយជាប្រទេសអ្នកផលិត បង្កើត និងច្នៃប្រឌិត ដែលវាទាមទារធនធានមនុស្សពីថ្នាក់វិទ្យាសាស្ត្រនេះហើយ។

លោកថា៖ «ទាល់តែភាគច្រើនរៀនមុខវិជ្ជាវិទ្យាសាស្ត្រ ជាពិសេសគឺការបណ្ដុះបណ្ដាលពលរដ្ឋឬក៏ធនធានមនុស្សយើងឱ្យក្លាយទៅជាកម្មករជំនាញ ឬក៏អ្នកបច្ចេកទេសនោះគឺជាមូលដ្ឋានគ្រឹះចាំបាច់ដើម្បីអាចអភិវឌ្ឍន៍សេដ្ឋកិច្ចយើងពីសេដ្ឋកិច្ចដែលប្រើប្រាស់មនុស្សអត់មានជំនាញទៅជាកម្មករជំនាញនិងក្លាយទៅជាអ្នកឯកទេសក្នុងវិស័យសេដ្ឋកិច្ចឧស្សាហកម្មធុនស្រាល ឧស្សាហកម្មកែច្នៃ និងឧស្សាហកម្មកម្រិតខ្ពស់បាន»។

លោកផ្ដល់ជាអនុសាសន៍ថាដើម្បីជំរុញសិស្សឱ្យចាប់អារម្មណ៍ការសិក្សាថ្នាក់វិទ្យាសាស្ត្រច្រើនគួរមានការជំរុញ​ពីគ្រួសារ គ្រូបង្រៀន បង្កើនថ្នាក់ពិសោធន៍ដែលមានឧបករណ៍គាំទ្រគ្រប់គ្រាន់ ទាក់ទាញបង្កើតការងារឧស្សាហកម្មជំនាញច្រើននៅកម្ពុជា ព្រមទាំងមានការជំរុញពីអ្នកឥទ្ធិពលលើបណ្ដាញសង្គមផងដែរ៕

អត្ថបទដោយ ហ៊ុន សិរីវឌ្ឍន៍

The post ប្រធានរដ្ឋសភាជំរុញក្មេងស្រីចាប់យកការសិក្សាថ្នាក់វិទ្យាសាស្ត្រ appeared first on Kampuchea Thmey Daily.