Takeru បានបង្ហាញថ្វីដៃ​យ៉ាងអស្ចារ្យ រហូតសងសឹកលើ Rodtang បានសម្រេច ដែលបានផ្តួលខ្លួនឱ្យសន្លប់ទឹកទី ១ កាលពីខែ មីនា ឆ្នាំ ២០២៥។ សម្រាប់ការប្រកួតយប់មិញនេះ អ្នកប្រដាល់ ជប៉ុន វ័យ ៣៤ ឆ្នាំ បានគ្រប់គ្រងស្ថានភាពយ៉ាងល្អ រហូតឆក់ឱកាសប្រើកណ្តាប់ដៃធ្ងន់ៗផ្តួលឱ្យ Rodtang សន្លប់នៅទឹកទី ៥។

ក្រោយជ័យជម្នះដ៏ធំធេងនេះ Takeru ដណ្តើមបានខ្សែក្រវាត់ពិភពលោក ONE Championship មួយខ្សែ និងប្រាក់លើកទឹកចិត្តបន្ថែមចំនួន ១០ ម៉ឺនដុល្លារអាមេរិក។ ជាមួយគ្នានេះ កីឡាករក៏បានបានប្រកាសផងដែរ ថា នេះជាការប្រកួតប្រកួតចុងក្រោយរបស់ខ្លួន ដោយរូបគេសម្រេចព្យួរហ្គង់ពីអាជីពកីឡាករឃីកបុកស៊ីងហើយ។ កីឡាករបានបញ្ចប់អាជីព ដោយឆ្លងកាត់ការប្រកួតចំនួន ៥១ លើក ឈ្នះ ៤៦ និងចាញ់ ៥ លើក។

ងាកមកចាប់អារម្មណ៍ជាមួយចំណូលរបស់ Takeru សម្រាប់ការប្រកួតចុង​ក្រោយ​នេះ​ គឺមិនទាន់មានការបញ្ចេញផ្លូវការនោះទេ ប៉ុន្តែយោងតាមព័ត៌មានច្បាស់ការកន្លងមកអំពីតម្លៃខ្លួនរបស់ Takeru គឺរូបគេរកបាន ៧៥ ម៉ឺនដុល្លារអាមេរិក ក្នុងមួយប្រកួត។

ដោយឡែកការប្រកួតយប់មិញនេះ កីឡាករ ជប៉ុន ទទួលបានប្រាក់លើកទឹកចិត្តពីការឈ្នះសន្លប់ ១០ ម៉ឺនដុល្លារអាមេរិកបន្ថែមទៀត។ ដូច្នេះ សរុបមួយប្រកួតនេះ Takeru រកបានចំណូលពីតម្លៃខ្លួន បូកជាមួយប្រាក់លើកទឹកចិត្តបន្ថែម ចំនួន ៨៥ ម៉ឺនដុល្លារអាមេរិក។

គួរបញ្ជាក់ ថា ប្រាក់ចំណូលរបស់កីឡាករខាងលើ គឺគិតតែតម្លៃខ្លួន និងប្រាក់លើកទឹកចិត្តបន្ថែមប៉ុណ្ណោះ ពោលគឺមិនបានរាប់បញ្ចូលអំពីប្រាក់ឧបត្ថម្ភផ្សេងៗទៀតឡើយ។

ដូច្នេះ ប្រសិនបើគិតអំពីប្រាក់ឧបត្ថម្ភពីម្ចាស់ឧបត្ថម្ភផ្សេងទៀត កីឡាករអាចរកបានច្រើនជាងនេះ រហូតដល់ខ្ទង់លានដុល្លារអាមេរិក។ ជាក់ស្តែង អំឡុងពេលរូបគេចាញ់ Rodatang កាលពីឆ្នាំ ២០២៥ គឺរកបានរហូតដល់ ១.២ លានដុល្លារអាមេរិកឯណោះ៕

អត្ថបទ៖ សេម កុសល

The post Takeru រកបានជិតលានដុល្លារ ក្រោយផ្តួល Rodtang ឱ្យសន្លប់យប់មិញ appeared first on Kampuchea Thmey Daily.

Takeru ជាមនុស្សមាននិស្ស័យជាមួយកីឡាប្រយុទ្ធតាំងពីក្មេង ដោយសារឪពុករបស់គេជាកីឡាករចំបាប់អាជីព។ ទោះបីជាយ៉ាងណា រូបគេមិនចាប់អារម្មណ៍ជាមួយកីឡាចំបាប់ទេ ប៉ុន្តែបែរ​ជាចូលចិត្តកីឡាឃីគបុកស៊ីងជំនួសវិញ។ ពេលនោះ រូបគេមានក្តីស្រមៃដ៏ធំមួយ គឺចង់ក្លាយជាកីឡាករឃីគបុកស៊ីងដ៏ល្បីម្នាក់នៅសង្វៀនលំដាប់​ពិភព​លោក K-1។

អំឡុងពេលរៀននៅថ្នាក់ទី ២ ដោយសារស្រឡាញ់កីឡាឃីគបុកស៊ីងនេះ Takeru ក៏មានឱកាសបានហ្វឹកហាត់កីឡានេះបន្តិចបន្តួច និងបានហ្វឹកហាត់កីឡាការ៉ាតេផងដែរ។ លុះឈានចូលដល់ថ្នាក់វិទ្យាល័យ Takeru ស្រាប់តែបានប្រែចិត្តលែងចង់ក្លាយជាកីឡាករឃីគបុកស៊ីងវិញ ដោយសាររូបគេគិតថាកីឡានេះគ្មានអនាគត ហើយក៏បានរៀនជំនាញអ្នកមើលថែទាំកុមារ ដើម្បីចាប់យកអាជីពនេះ មកចិញ្ចឹមជីវិតខ្លួនឯងនៅពេលអនាគត។

Takeru រៀនបានតែ ៣ ខែប៉ុណ្ណោះ ក៏ត្រូវបានគ្រូបណ្តេញចេញពីសាលា ដោយសាររូបគេបានបង្ក​រឿងនៅសាលា បន្ទាប់ពីសេពគប់មិត្តភក្តិមិនល្អ។ ទីបំផុត បំណងប្រាថ្នាចង់ចាប់អាជីពជាអ្នកមើលថែទាំកុមារក៏ត្រូវបានរលាយ។ យ៉ាងណា ចំណុចនេះបានក្លាយជារឿងវិជ្ជមានវិញនៅក្នុងខ្សែជីវិតរបស់គេ ដោយសារ វាបានក្លាយជាចំណុចចាប់ផ្តើម​ថ្មី ធ្វើឱ្យគេរកឃើញខ្លួនឯងពិតប្រាកដ តាមរយៈការចាប់អាជីពជាកីឡាករឃីគបុកស៊ីង។

បច្ចុប្បន្ន Takeru ត្រូវបានគេចាត់ទុកជាកីឡាករឃីគបុកស៊ីងលំដាប់កំពូលម្នាក់នៅក្នុងប្រទេស ជប៉ុន ជាមួយនឹងគូប្រជែងរបស់គេកីឡាករ Tenshin Nasukawa។ Takeru មានសមិទ្ធផលជាច្រើនដូចជាខ្សែក្រវាត់ K-1 World GP Super Featherweight World Grand Prix, K-1 Super Featherweight Championship, ISKA K-1 World Lightweight Championship ទម្ងន់ ៦១ គីឡូក្រាម និង KGP K-1 World Lightweight Championship ទម្ងន់ ៦១ គីឡូក្រាម។

កំណត់ត្រាដ៏ពិសេសមួយទៀត គឺកីឡាករធ្លាប់ប្រកួតមិនចាញ់សោះរយៈពេល ១០ ឆ្នាំ ពីឆ្នាំ ២០១២ ដល់ ២០២២។ Takeru បច្ចុប្បន្នមានកំណត់ត្រាប្រកួតអាជីពសរុបចំនួន ៥០ ដង ឈ្នះ ៤៥ ដង (ផ្តួលដៃគូឱ្យសន្លប់ ២៧ ដង) ចាញ់ ៥ ដង និងមិន​ធ្លាប់ស្មើ។

ក្រៅពីការទទួលបានសមិទ្ធផលជាច្រើន ក្នុងអាជីពកីឡាឃីគបុកស៊ីង បច្ចុប្បន្ន Takeru ក៏ជាកីឡាករ ដែលមានទ្រព្យសម្បត្តិច្រើនបំផុតម្នាក់នៅ ជប៉ុន ផងដែរ។ តាមការវាយតម្លៃរបស់សារព័ត៌មាន Sportskeeda បានឱ្យដឹងថា កីឡាករវ័យ ៣៤ ឆ្នាំរូបនេះ មានទ្រព្យសម្បត្តិចន្លោះពី ១ ទៅ ២ លានដុល្លារអាមេរិក៕

ប្រែសម្រួល៖ សេម កុសល
ប្រភព៖ ONE & Sportskeeda

The post Takeru ជាក្មេងត្រូវបណ្តេញចេញពីសាលា ប្រែ​ជីវិត​ក្លាយ​ជា​កំពូល​​កីឡាករ​មានទ្រព្យខ្ទង់លានដុល្លារ appeared first on Kampuchea Thmey Daily.

បន្ទាប់ពីចាញ់កីឡាករថៃ​ Superlek នៅ​សង្វៀន ONE កីឡាករជប៉ុន​ Takeru វ័យ៣៣ឆ្នាំត្រូវបានកំណត់ឲ្យជួប​កីឡាករថៃ Black Panther Venum។ កីឡាករ​ជប៉ុន​រូប​នេះ​ជាអ្នកប្រដាល់លំដាប់កំពូល​ម្នាក់​ក្នុងរយៈពេល​ជា​ច្រើន​ឆ្នាំ​​ហើយ​ក្នុងពិភព​ប្រដាល់​ឃីកបុកសុីង ប៉ុន្តែ​កីឡាករ​ថៃ​ Black Panther ​នឹង​ជាការប្រកួតលើកដំបូងរបស់​ខ្លួន​​ក្នុងកីឡា​ឃីកបុងសុីង។

Takeru ដែល​ជាការប្រកួតលើកទី២ នៅសង្វៀន ONE ជាឱកាស​​​ត្រូវ​ស្ដារមុខមាត់​ឡើង​វិញ​ ក្នុងនាមជាអ្នកប្រដាល់ឃីកបុកសុីងកំពូលមួយ​រូប​ក្នុង​ពិភព​លោក បន្ទាប់​ពី​ចាញ់ Superlek កាល​ពី​ខែ​មករា ឆ្នាំ​២០២៤។ ចំណែក​កីឡាករ​ថៃ​វ័យ​​ទើប​២៤ឆ្នាំមានបទពិសោធ​ច្រើន​សម្រាប់​ការ​ប្រកួតនៅសង្វៀន ONE ប៉ុន្តែ​មិន​មែន​ជា​ការ​ប្រកួត​ឃីក​បុកស៊ីង​ទេ។

ទោះបីធ្វើមិន​បានល្អ​ក្នុងការបង្ហាញខ្លួនលើកដំបូងនៅ​សង្វៀន​ ONE ​​ដោយ​​ចាញ់កីឡាករជើងចាស់ Tagir Khalilov ប៉ុន្តែកីឡាករ Black Panther ធ្វើបានយ៉ាង​ល្អ​ក្នុងការប្រកួត៣លើកចុងក្រោយ ដោយឈ្នះទាំង៣ប្រកួត។ ប្រសិន​បើ Takeru អាច​យកឈ្នះ​កីឡាករ​ថៃ​ Black Panther បាន​ រូបគេទំនង​ជា​ត្រូវ​ជួប Rodtang ក្នុង​ការ​ប្រកួត​ដ៏​ធំ​មួយ​។

សូម​បញ្ជាក់​ថា Takeru អាយុ​៣៣​ឆ្នាំ ធ្លាប់​ប្រកួត​បាន​៤៧​ដង ក្នុង​នោះ​ឈ្នះ​៤៣​ដង និង​ចាញ់​៤​ដង៕

ប្រែសម្រួល៖ ផា រតនា

The post ជើងខ្លាំងជប៉ុន Takeru ត្រៀមឡើងសង្វៀន ONE វិញ​ប៉ះកីឡាករ​ថៃ​ទៀត​ appeared first on Kampuchea Thmey Daily.