ដើម្បីបង្ការពីផលប៉ះពាល់បង្កដោយកម្តៅ អង្គការយូនីហសេហ្វ បានប្រាប់ពីប្រការគួរធ្វើ និងមិនគួរធ្វើ ដើម្បីការពារកុមារ ក្នុងរដូវក្តៅនេះ។

១.ប្រការគួរធ្វើ

-តាមដានឱ្យជាប់៖ សង្គេតមើលអាការៈស្រេកទឹកខ្លាំង បែកញើសជោក វិលមុខ ក្អួត ឈឺក្បាល ឬហត់នឿយខុសធម្មតា។ បើអាការៈមិនធូរស្រាល ត្រូវប្រញ៉ាប់រកគ្រូពេទ្រ។  

-ស្លៀកពាក់ស្រាសលៗ៖ ជ្រើសរើសសម្លៀកបំពាក់រលុងៗខ្យល់ចេញចូលបានល្អ ដើម្បីកាត់បន្ថយការឡើងកម្តៅខ្លាំង។

-បំពេញជាតិទឹកឱ្យបានញឹកញាប់៖ កុមារមិនងាយដឹងថាខ្លួនខ្វះជាតិទឹកទេ។ ទារកក្រោម ៦ខែ គួរបៅដោះម្តាយតែមួយមុខគត់។ កុមារវិញត្រូវញ៉ាំទឹកឱ្យបានច្រើន ចំណែកអ្នកម្តាយបំបៅដោះកូនក៏ត្រូវញ៉ាំទឹកឱ្យបានច្រើនដូចគ្នា។

-ជ្រកក្រោមម្លប់៖ នៅកន្លែងដែលមានម្លប់ត្រជាក់ និងប្រើមួក ឬឆត្រ នៅពេលចេញទៅខាងក្រៅ។

២.ប្រការមិនគួរធ្វើ

-កុំឱ្យថ្នាំផ្តេសផ្តាស៖ ហាមឱ្យទារក ឬកុមារញ៉ាំថ្នាំដោយគ្មានការពិគ្រោះ ឬការណែនាំពីគ្រូពេទ្យ។

-កុំទុកក្មេងក្នុងកន្លែងបិទជិត៖ ហាមទុកកុមារចោលក្នុងឡាន ឬក្នុងបន្ទប់ដែលហប់គ្មានខ្យល់ចេញចូលជាដាចខាត។

-កំណត់ការលេងខាងក្រៅ៖ ជៀសវាងឱ្យកុមារចេញលេងនៅខាងក្រៅ ក្នុងអំឡុងពេលដេលកម្តៅឡើងខ្លាំងបំផុត(ចន្លោះម៉ោង ១១ព្រឹក ដល់ ៤រសៀល)

-កុំលេងជាប់មិនឈប់៖ ត្រូវឱ្យកុមារសម្រាករៀងរាល់ ៣០នាទី ក្នុងអំឡុងពេលធ្វើសកម្មភាពខាងក្រៅ និងត្រូវញ៉ាំទឹកឱ្យបានច្រើន។

-ចៀសវាងសកម្មភាពកម្លាំងខ្លាំងក្រោមកម្តៅខ្លាំង៖ ការហាត់ប្រាណ ឬលេងកីឡាក្រោមដំបូលមេឃក្តៅខ្លាំង ងាយនឹងបង្កឱ្យរាងកាយខ្វះជាតិទឹកធ្ងន់ធ្ងរ។

បើតាមអង្គការយូនីសេហ្វ នៅពេលសីតុណ្ហភាពខាងក្រៅឡើងដល់ ៣៥°C ឬលើសពីនេះ ពិសេសក្នុងអំឡុងពេលមានរលកកម្ដៅ កុមារដែលនៅខាងក្រៅផ្ទះ ក្រៅម្លប់ អាចនឹងប្រឈមខ្ពស់ទៅនឹងកម្តៅ ដែលអាចបណ្ដាលឱ្យកើតមាន ការរងផលប៉ះពាល់ដោយសារកម្តៅ (Heat stress)។ ការរងផលប៉ះពាល់ដោយសារកម្តៅ (Heat stress) កើតឡើងនៅពេលដែលរាងកាយមិនអាច បញ្ចះកម្តៅបាន ហើយការចេញញើសពុំមានប្រសិទ្ធភាព ពិសេសក្នុងបរិយាកាសមានសំណើមខ្លាំង (ក្តៅសើម) ឬនៅពេលធ្វើសកម្មភាព៕

The post តើគួរធ្វើបែបណា ដើម្បីបង្ការកុំឱ្យកុមារ រងផលប៉ះពាល់បង្កដោយកម្តៅខ្លាំង? appeared first on Kampuchea Thmey Daily.

លោកស្រី June Kunugi បានបញ្ជាក់ថា «អង្គការ UNICEF តែងតែបាននឹងកំពុងយកចិត្តទុកដាក់ខ្ពស់លើការអនុវត្តគោលនយោបាយ និងផែនការយុទ្ធសាស្រ្តសុខាភិបាល ក្នុងការពង្រឹងប្រព័ន្ធសុខាភិបាល សុខភាពមាតា ទារក និងកុមារការផ្តល់ថ្នាំបង្ការ និងអាហារូបត្ថម្ភ»។

លោកស្រី June បានលើកឡើងថា ក្រោមកិច្ចសហប្រតិបត្តិការជិតស្និទ្ធ ជាមួយក្រសួងសុខាភិបាល អង្គការ UNICEF ប្រចាំតំបន់អាស៊ីបូព៌ា និងប៉ាស៊ីហ្វិក បានពិភាក្សាបញ្ហាគោលនយោបាយ/កម្មវិធីសំខាន់ៗ រួមមាន ការដោះស្រាយបញ្ហាកង្វះអាហារូបត្ថម្ភដែលនៅទ្រឹង ការគាំទ្រដល់ការផ្លាស់ប្តូរឌីជីថល និងការពន្លឿនផ្លូវឆ្ពោះទៅរកសមធម៌ និងការគ្របដណ្តប់សុខភាពជាសកល ព្រមទាំងការរៀបចំផែនការរយៈពេល ៥ឆ្នាំ (Country Program) ដោយអនុលោមតាមយុទ្ធសាស្ត្របញ្ចកោណ ដំណាក់កាលទី១ និងដោយផ្តោតជាសំខាន់លើការគ្របដណ្តប់ការចាក់វ៉ាក់សាំងនៅទូទាំងប្រទេសកម្ពុជា។

ទន្ទឹមនេះ លោកស្រី បានអបអរសាទរក្រសួងសុខាភិបាល ដែលបានទទួលការសម្រេចពីមូលនិធិសកល តាមរយៈមូលនិធិអាហារូបត្ថម្ភកុមារ នឹងផ្តល់ជូនកម្ពុជាឱ្យទទួលបានឱកាសជាប្រទេស Unlock សម្រាប់ការស្វែងរកការគាំទ្រ ពីគម្រោងនេះលើកម្មវិធីអាហារូបត្ថម្ភកុមារនៅកម្ពុជា ប៉ុន្តែត្រូវមានការប្តេជ្ញាចិត្តរបស់ក្រសួងសុខាភិបាល ជាមួយអង្គការ UNICEF ព្រមទាំងមានការគាំទ្រពីក្រសួងសេដ្ឋកិច្ច និងហិរញ្ញវត្ថុផងដែល សម្រាប់រយៈពេល ៥ឆ្នាំ ពីឆ្នាំ២០២៦-២០៣០។

ចំណែកលោករដ្ឋមន្ត្រី បានថ្លែងអំណរគុណ មូលនិធិកុមារអង្គការសហប្រជាជាតិ ដែលបានចូលរួមសហការគាំទ្រក្រសួងសុខាភិបាល ក្នុងការងារលើកកម្ពស់សុខុមាលភាពរបស់ប្រជាជនកម្ពុជា តាមរយៈការផ្ដល់ជូនទាំងបច្ចេកទេស និងហិរញ្ញវត្ថុ ក៏ដូចជាការអភិវឌ្ឍធនធានមនុស្សនាពេលកន្លងមក និងបានជួយដល់ការសម្រេចបាននូវគោលដៅសុខាភិបាលមួយចំនួន តាមរយៈកម្មវិធីចាក់ថ្នាំបង្ការ និងកម្មវិធីសុខភាពមាតា និងកុមារជាដើម។

ជាមួយគ្នានេះ លោករដ្ឋមន្ត្រី ក៏បានថ្លែងអំណរគុណដល់ អង្គការ UNICEF ដែលជាដៃគូដែលគួរឱ្យទុកចិត្តចាប់តាំងពីឆ្នាំ១៩៥២ រួមទាំងក្នុងអំឡុងពេលដ៏លំបាកបំផុតមួយចំនួន នៅក្នុងប្រវត្តិសាស្ត្រប្រទេសកម្ពុជា ហើយបានបន្តដើរតួនាទីយ៉ាងសំខាន់ ក្នុងការគាំទ្រដល់ការស្តារឡើងវិញ និងការអភិវឌ្ឍរបស់ប្រទេសកម្ពុជា ព្រមទាំងបានពង្រីកកិច្ចសហប្រតិបត្តិការ គាំទ្រផែនការយុទ្ធសាស្ត្រថ្មីៗ របស់ក្រសួងសុខាភិបាល ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្តប់សុខភាពជា សកលស្របតាមយុទ្ធសាស្រ្តបញ្ចកោណដំណាក់កាលទី១ នៃរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

The post UNICEF បន្តជួយពង្រឹងសុខភាពមាតា ទារក និងកុមារ ពិសេសការផ្តល់ថ្នាំបង្ការ និងអាហារូបត្ថម្ភ appeared first on Kampuchea Thmey Daily.

ថវិកានេះនឹងផ្តល់លទ្ធភាពឲ្យយូនីសេហ្វអនុវត្តកម្មវិធីរយៈពេល ១២ខែ លើវិស័យអប់រំ ទឹកស្អាត និងអនាម័យ និងកិច្ចការពារកុមារ ដើម្បីគាំទ្រដល់ការស្តារឡើងវិញរបស់សហគមន៍ដែលរងផលប៉ះពាល់ដោយជម្លោះនៅក្នុងប្រទេសកម្ពុជា លើកកម្ពស់ភាពធន់ និងវិនិយោគលើអនាគតរបស់ក្មេងជំនាន់ក្រោយ។

លោក គីម ឆាងយ៉ុង (Kim Chang Yong) ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជា មានប្រសាសន៍ថា «សាធារណរដ្ឋកូរ៉េឈរនៅជាមួយប្រជាជនកម្ពុជាក្នុងគ្រាដ៏លំបាកនេះ។ យើងសង្ឃឹមថា ជំនួយនេះនឹងជួយឱ្យកុមារអាចត្រឡប់ទៅសាលារៀនវិញដោយសុវត្ថិភាព ទទួលបានទឹកស្អាត និងអនាម័យ និងសេវាគាំពារចាំបាច់នានា ព្រមទាំងជួយសហគមន៍ក្នុងការស្តារ និងកសាងភាពធន់ឡើងវិញ»។ លោកថា ការវិនិយោគលើអនាគតរបស់ក្មេងជំនាន់ក្រោយ គឺជាអាទិភាពសម្រាប់សាធារណរដ្ឋកូរ៉េ ហើយលោកមានមោទកភាពដែលបានចាប់ដៃគូជាមួយយូនីសេហ្វ ដើម្បីធានាបាននូវការផ្តល់ជំនួយទាន់ពេលវេលា និងមានអត្ថន័យសម្រាប់ប្រជាពលរដ្ឋដែលត្រូវការបំផុត។

បើតាមយូនីសេហ្វ ជំនួយនេះនឹងជួយគាំទ្រដល់ការបើកដំណើរការឡើងវិញយ៉ាងឆាប់រហ័សនូវទីកន្លែងសិក្សាប្រកបដោយសុវត្ថិភាព តាមរយៈការបង្កើតថ្នាក់រៀនបណ្តោះអាសន្ន ការផ្តល់ឧបករណ៍សិក្សាបែបឌីជីថល និងការគាំទ្រដល់ការបង្រៀនបំប៉ន ដែលអនុញ្ញាតឱ្យ កុមារជាង ២៤ ០០០នាក់ អាចត្រឡប់មករៀនវិញបន្ទាប់ពីមានការខកខានជាច្រើនខែ។ គម្រោងនេះក៏នឹងស្តារឡើងវិញនូវហេដ្ឋារចនាសម្ព័ន្ធទឹកស្អាត និងអនាម័យនៅក្នុងសាលារៀនដែលរងការខូចខាត និងផ្តល់សម្ភារអនាម័យចាំបាច់នានា ដែលជួយឲ្យសិស្ស និងគ្រូបង្រៀនយ៉ាងតិច ២០ ០០០នាក់ អាចរៀន និងបង្រៀនក្នុងលក្ខខណ្ឌដែលមានសុខភាពល្អ និងសុវត្ថិភាពជាងមុន។

ទន្ទឹមនឹងនេះ ថវិកានេះនឹងប្រើប្រាស់សម្រាប់ពង្រឹងសេវាការពារកុមារតាមសហគមន៍ តាមរយៈការផ្តល់វគ្គបណ្តុះបណ្តាលបុគ្គលិកជួរមុខចំនួន ១០០នាក់ ការកែលម្អកន្លែងកុមារមេត្រី និងការលើកកម្ពស់ស្តង់ដារកិច្ចការពារកុមារក្នុងគ្រាមានគ្រោះអាសន្ន ដើម្បីធានាថាកុមារដែលរងផលប៉ះពាល់ អាចទទួលបានការការពារ និងការថែទាំទាន់ពេលវេលា។

ចំណែក លោកបណ្ឌិត វីល​​ ផាកស៍ នាយកយូនីសេហ្វប្រចាំកម្ពុជា បានលើកឡើងថា៖ «ការគាំទ្រដ៏សប្បុរសពីសាធារណរដ្ឋកូរ៉េនេះ គឺចំពេលដ៏ចាំបាច់បំផុតសម្រាប់កុមារ និងគ្រួសារដែលបានជួបប្រទះការលំបាកយ៉ាងខ្លាំង។ តាមរយៈការវិនិយោគលើវិស័យអប់រំ ទឹកស្អាត និងអនាម័យ និងកិច្ចការពារកុមារ ជំនួយនេះនឹងជួយកុមារឱ្យទទួលបានស្ថិរភាពឡើងវិញ ត្រឡប់ទៅរៀនដោយសុវត្ថិភាព និងទទួលបានសេវាសំខាន់ ដែលពួកគេត្រូវការដើម្បីការលូតលាស់ និងការស្តារឡើងវិញ។

រដ្ឋាភិបាលនៃសាធារណរដ្ឋកូរ៉េ និងយូនីសេហ្វ សង្ឃឹមថាការគាំទ្រនេះនឹងជំរុញការស្តារឡើងវិញ និងភាពធន់របស់សហគមន៍ដែលរងផលប៉ះពាល់ដោយសារជម្លោះដើម្បីឱ្យកុមារគ្រប់រូបនៅកម្ពុជាអាចរៀនសូត្រ មានសុវត្ថិភាព និងសម្រេចបានសក្តានុពលពេញលេញរបស់ពួកគេ៕

The post កូរ៉េផ្តល់ជំនួយ ៥សែនដុល្លារ ជួយដល់កុមារ និងគ្រួសាររងផលប៉ះពាល់ដោយសារជម្លោះព្រំដែនកម្ពុជា-ថៃ  appeared first on Kampuchea Thmey Daily.

កាលពីថ្ងៃទី៨ ខែកុម្ភៈ ឆ្នាំ២០២៦ លោក អ៊ីហ្កូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានអញ្ជើញចូលរួមជាមួយលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក អ៊ុំ រាត្រី អភិបាលខេត្តបន្ទាយមានជ័យ និង លោកវេជ្ជបណ្ឌិត Anirban Chatterjee នាយករងយូនីសេហ្វប្រចាំកម្ពុជា ដើម្បីប្រគល់សម្ភារសង្គ្រោះបន្ទាន់ជានិមិត្តរូបជូនដល់គ្រួសារភៀសសឹកនៅជំរំភៀសសឹក វត្តកណ្តោល។

បើតាមសេចក្តីប្រកាសព័ត៌មានរបស់យូនីសេហ្វ សម្ភារទាំងនោះរួមមាន តង់ និងកៅស៊ូតង់សម្រាប់ប្រើប្រាស់ជាកន្លែងសិក្សាបណ្តោះអាសន្ន និងទីកន្លែងកុមារមេត្រី ដើម្បីធានាថាកុមារអាចបន្តការសិក្សារបស់ពួកគេក្នុងបរិយាកាសដែលមានសុវត្ថិភាព។ ការផ្តល់ជូននេះក៏រួមបញ្ចូលផងដែរនូវកញ្ចប់អនាម័យ អំពូលសូឡា សម្ភារសុខភាព អនាម័យ និងទឹកស្អាតផ្សេងទៀត ដើម្បីជួយឱ្យគ្រួសារនីមួយៗអាចរក្សាបាននូវសុខភាព និងសេចក្តីថ្លៃថ្នូរ ក្នុងអំឡុងពេលស្នាក់នៅជំរំបណ្តោះអាសន្នទាំងនោះ។

លោក អ៊ីហ្កូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានមានប្រសាសន៍ថា «ថ្ងៃនេះ យើងមានមោទកភាពក្នុងការផ្តល់ជូនសម្ភារចាំបាច់តាមរយៈភាពជាដៃគូជាមួយយូនីសេហ្វប្រចាំកម្ពុជា បន្ថែមពីលើការគាំទ្រផ្នែកសុខភាពផ្លូវចិត្តដែលកំពុងអនុវត្តដោយអង្គការចិត្តសង្គមអន្តរវប្បធម៌ (TPO) ដើម្បីផ្តល់សេវាកម្មប្រឹក្សាផ្លូវចិត្តដែលបង្កដោយជម្លោះប្រដាប់អាវុធដល់ប្រជាជនភៀសសឹក«។ លោកបន្តថា សហភាពអឺរ៉ុបប្តេជ្ញាគាំទ្រកម្ពុជា និងដៃគូក្នុងការការពារសុខុមាលភាព និងសេចក្តីថ្លៃថ្នូររបស់កុមារ និងគ្រួសារភៀសសឹកគ្រប់រូប។

ចំណែក លោកវេជ្ជបណ្ឌិត Anirban Chatterjee នាយករងយូនីសេហ្វប្រចាំកម្ពុជា បានថ្លែងអំណរគុណដល់សហភាពអឺរ៉ុបសម្រាប់ការគាំទ្រដល់កុមារ និងគ្រួសារជនភៀសសឹកក្នុងអំឡុងពេលមានវិបត្តិនេះ ដែលផ្តល់ឱ្យពួកគេទទួលបាននូវសេវាចាំបាច់នានា និងឱកាសក្នុងការកសាងអនាគតឡើងវិញ។ លោកថា «ការគាំទ្រនេះនឹងជួយធានាថាកុមារតូចៗនៅតែអាចបន្តការរៀនសូត្រ គ្រួសារសម្ភារបរិក្ខាទឹកស្អាត និងអនាម័យប្រើប្រាស់ ហើយសហគមន៍អាចរក្សាបាននូវសុខភាព និងសេចក្តីថ្លៃថ្នូរ នៅក្នុងអំឡុងពេលដែលពួកគេកំពុងឆ្លងកាត់ដំណាក់កាលដ៏លំបាកនេះ»។

ក្នុងសេចក្តីប្រកាសព័ត៌មានដដែល បានបញ្ជាក់ទៀតថា សហភាពអឺរ៉ុប និងយូនីសេហ្វ នៅតែបន្តប្តេជ្ញាចិត្តក្នុងការធានាថាកុមារ និងគ្រួសាររបស់ពួកគេទទួលបានជំនួយចាំបាច់ ព្រមទាំងគាំទ្រដល់កិច្ចខិតខំប្រឹងប្រែងត្រៀមបង្ការ និងការស្តារឡើងវិញសម្រាប់សហគមន៍ដែលរងផលប៉ះពាល់ដោយសារវិបត្តិនៅតាមព្រំដែននេះ៕

The post កុមារ និងគ្រួសារភៀសសឹកជាង ១ម៉ឺននាក់ ទទួលបានជំនួយសម្ភារ ពីសហភាពអឺរ៉ុប និងយូនីសេហ្វ appeared first on Kampuchea Thmey Daily.

ឆ្លើយតបទៅនឹងកុមារ និងគ្រួសារដែលរងគ្រោះដោយសារវិបត្តិនេះ អង្គការយូនីសេហ្វប្រចាំកម្ពុជា ក្រោមកិច្ចសហការជាមួយ ក្រសួងសង្គមកិច្ច អតីតយុទ្ធជន និងយុវនីតិសម្បទា កំពុងបង្កើត «ទីកន្លែងកុមារមេត្រី» ជាកន្លែងដែលអនុញ្ញាតឱ្យកុមារភៀសសឹកអាចលេងកម្សាន្ត រៀនសូត្រ និងមានអារម្មណ៍សុវត្ថិភាពឡើងវិញ។ នេះតាមការបង្ហោះរបស់ទំព័រហ្វេសប៊ុក UNICEF Cambodia កាលពីថ្ងៃទី២៤ ខែធ្នូ ឆ្នាំ២០២៥។

អង្គការយូនីសេហ្វ បានឱ្យដឹងថា បុគ្គលិកសង្គមកិច្ចកំពុងទទួលបានការគាំទ្រ និងការបណ្តុះបណ្តាលដើម្បីគ្រប់គ្រងទីតាំងទាំងនេះប្រកបដោយប្រសិទ្ធភាព ដើម្បីពិគ្រោះយោបល់ និងផ្តល់ប្រឹក្សា ដើម្បីលើកកម្ពស់សុខភាពផ្លូវចិត្ត កាត់បន្ថយភាពតានតឹងរបស់កុមារ និងគ្រួសារ។

ដោយឡែក តាមរយៈកិច្ចសហការជាមួយ ក្រសួងអភិវឌ្ឍន៍ជនបទ Ministry of Rural Development យូនីសេហ្វ បាននឹងកំពុងចែកចាយសម្ភារៈអនាម័យ ទឹកស្អាត និងជំរុញការអនុវត្តអនាម័យឱ្យបានត្រឹមត្រូវ ដើម្បីជួយការពារសុខភាពរបស់គ្រួសារភៀសសឹកផងដែរ។

ទន្ទឹមនឹងនេះ យូនីសេហ្វ ក៏កំពុងសហការជាមួយក្រសួងអប់រំ យុវជន និងកីឡា MoEYS Cambodia ដើម្បីរៀបចំទីកន្លែងសិក្សាបណ្តោះអាសន្ន ដោយបាននាំយកសម្ភារៈបង្រៀន និងរៀនសូត្រទៅកាន់ជំរំភៀសសឹកនានា ដើម្បីឱ្យកុមារអាចបន្តទទួលបានការសិក្សា ទោះបីជាស្ថិតក្នុងកំឡុងពេលដែលមានវិបត្តិក៏ដោយ៕

The post យូនីសេហ្វបង្កើត«ទីកន្លែងកុមារមេត្រី» សម្រាប់កុមារភៀសសឹកលេងកម្សាន្ត និងរៀនសូត្រ appeared first on Kampuchea Thmey Daily.

ការក្រើនរំលឹកនេះ ស្របពេលដែលភៀសសឹកកម្ពុជាកើនដល់ជិត ៤៥ម៉ឺននាក់ហើយ ក្នុងនោះមានកុមាររាប់ម៉ឺននាក់ដែលកំពុងរស់នៅជាមួយឪពុកម្តាយនៅតាមជំរុំភៀសសឹក ហើយជំរុំខ្លះស្ថិតនៅក្បែរស្រះ ឬស្ទឹង អូរ ជាដើម។
បើតាម យូនីសេហ្វ សព្វថ្ងៃមានកុមាររាប់ម៉ឺននាក់កំពុងស្នាក់នៅតាមជំរំភៀសសឹក ហើយពួកគេអាចប្រឈមនឹងហានិភ័យនៃការលង់ទឹកប្រសិនបើមិនមានការមើលថែដិតដល់ពីមនុស្សពេញវ័យ។ យូនីសេហ្វ ក្រើនរំលឹកថា៖«សូមឪពុកម្តាយ អាណាព្យាបាល និងអាជ្ញាធរមានសមត្ថកិច្ចនៅតាមជំរុំ បង្កើនការប្រុងប្រយ័ត្នខ្ពស់ដើម្បីបង្ការ និងទប់ស្កាត់គ្រោះថ្នាក់ជាយថាហេតុនេះ។ សូមក្រុមការងារចម្រុះដែលចុះជួយនៅតាមជំរុំវជួយក្រើនរំលឹកអំពីហានិភ័យនេះដល់កុមារ និងអាណាព្យាបាលផង»។

ជារៀងរាល់ឆ្នាំ ការលង់ទឹកនៅកម្ពុជាបានសម្លាប់មនុស្សជាង ១ ៣០០ នាក់ ក្នុងនោះកុមាររងគ្រោះខ្លាំងបំផុត។ ស្ថិតិដ៏សោកសៅនេះធ្វើឱ្យកម្ពុជាស្ថិតនៅក្នុងចំណោមប្រជាជាតិដែលមានអត្រាលង់ទឹកខ្ពស់បំផុតនៅតំបន់ប៉ាស៊ីហ្វិកខាងលិច។ អត្រាលង់ទឹករបស់ប្រទេសកម្ពុជាស្ថិតក្នុងកម្រិត ៧,៦ នាក់ ក្នុងចំណោម ១០០.០០០នាក់ ដែលជាចំនួនស្ទើរតែទ្វេដងនៃចំនួនមធ្យមថ្នាក់តំបន់ (៤,៣នាក់ក្នុងចំណោម ១០០.០០០នាក់) និងច្រើនជាងពីរដងនៃអត្រាសកល (៣,៨នាក់ក្នុងចំណោម ១០០.០០០នាក់)។ ការលង់ទឹក គឺជាមូលហេតុនាំមុខនៃការស្លាប់របស់កុមារអាយុ៥ទៅ១៤ឆ្នាំនៅកម្ពុជា។ នេះបើតាមរបាយការណ៍យូនីសេហ្វ។

នៅកម្រិតគោលនយោបាយ រាជរដ្ឋាភិបាលកំពុងដាក់ដំណើរការផែនការយុទ្ធសាស្រ្តជាតិទីមួយស្ដីពីការបង្ការទប់ស្កាត់ការលង់ទឹក (ឆ្នាំ២០២៥-២០៣០) និងផ្ដល់សិទ្ធិអំណាចជូនអាជ្ញាធរមូលដ្ឋានដើម្បីធ្វើសមាហរណកម្មសុវត្ថិភាពផ្លូវទឹកទៅក្នុងការរៀបចំផែនការ និងថវិការបស់ខ្លួន។ យុទ្ធនាការលើកកម្ពស់ការយល់ដឹងជាសាធារណៈក៏កំពុងជួយគ្រួសារឱ្យយល់អំពីរបៀបរក្សាសុវត្ថិភាពរបស់កុមារនៅជិតទន្លេ ស្រះទឹក និងតំបន់ទឹកជំនន់ផងដែរ។

ដោយមានកិច្ចគាំទ្រពីយូនីសេហ្វ និងដៃគូ រាជរដ្ឋាភិបាលកម្ពុជាកំពុងដាក់ដំណើរការយុទ្ធនាការជាតិ ដើម្បីទប់ស្កាត់ការស្លាប់របស់កុមារពីការលង់ទឹក ដែលជាមូលហេតុមួយក្នុងចំណោមមូលហេតុផ្សេងទៀតនៃការស្លាប់របស់កុមារ៕

The post យូនីសេហ្វ ក្រើនរំលឹកមាតាបិតាមើលថែកុមារឱ្យដិតដល់ប្រយ័ត្នលង់ទឹកអំឡុងពេលស្នាក់នៅជំរុំភៀសសឹក appeared first on Kampuchea Thmey Daily.

យោងតាមអនុសញ្ញាស្តីពីសិទ្ធិកុមារ កុមារត្រូវតែទទួលបានសិទ្ធិរស់នៅក្នុងបរិយាកាសសុវត្ថិភាព និងការការពារពេញលេញពីអំពើហិង្សា។ ជាមួយនឹងស្ថានភាពចំពោះមុខ យូនីសេហ្វ កំពុងសហការយ៉ាងជិតស្និទ្ធជាមួយនឹងដៃគូ ដើម្បីផ្តល់ការគាំទ្រផ្នែកផ្លូវចិត្តដល់កុមារដើម្បីជួយការពារពួកគេ ជាពិសេសក្នុងអំឡុងពេលដ៏លំបាកនេះ។ក្នុងស្ថានភាពនេះ អង្គការ អំពាវនាវដល់សប្បុរសជនជាតិ និងអន្តរជាតិ ចូលរួមគាំទ្រមូលនិធិជំនួយបន្ទាន់របស់យូនីសេហ្វ ដើម្បីឱ្យខ្លួនអាចផ្តល់នូវការគាំទ្រចាំបាច់ និងទាន់ពេលវេលា ទៅកាន់កុមារដែលរងផលប៉ះពាល់គ្រប់រូប។

កុមារី ណាង ចាន់ណា រៀនថ្នាក់ទី ៧ នៅវិទ្យាល័យតេជោសែនសំរោង ខេត្តឧត្តរមានជ័យ រៀបរាប់ទាំងទឹកភ្នែកចេញពីជំរុំភៀសសឹក​ ថា កន្លែងដែលខ្លួនរស់នៅគេងមិនគ្រប់គ្រាន់ និងខ្វះចំណីអាហារ ជាពិសេសបាត់បង់ឱកាសសិក្សា។ ចាន់ណា និយាយថា៖«នៅនេះខ្ញុំអត់សូវមានអីញាំទេ ហើយដេកពិបាក នៅជាមួយប៉ាម៉ាកខ្ញុំកក់ក្តៅ ដោយសារគាត់ឱ្យខ្ញុំទៅរៀន ហើយនៅទីនេះអត់បានរៀន ខ្ញុំចង់ទៅរៀនវិញ»។

ក្នុងសង្គ្រាមថៃឈ្លានពានដែនអធិបតេយ្យភាពកម្ពុជាគិតចាប់ពីថ្ងៃទី ៧ ខែធ្នូ ឆ្នាំ ២០២៥ មក បណ្តាលឱ្យមានជនភៀសសឹកកើនដល់ ១១៧ ១២០ គ្រួសារ ស្មើនឹងមនុស្ស ៣៩៤ ៧០៦ នាក់។ ក្នុងនោះជនស៊ីវិលកម្ពុជាស្លាប់កើនដល់ ១២នាក់ និងរបួសធ្ងន់ស្រាល ៧៤ នាក់។ នេះបើយោងតាមរបាយការណ៍ក្រសួងមហាផ្ទៃ គិតត្រឹមរសៀលថ្ងៃទី​១៤ ខែធ្នូ ឆ្នាំ ២០២៥៕

The post យូនីសេហ្វ កំពុងសហការជាមួយដៃគូ ដើម្បីគាំទ្រផ្លូវចិត្តដល់កុមារនៅជំរុំភៀសសឹក appeared first on Kampuchea Thmey Daily.

ក្នុងនោះដែរ កម្មវិធីដំបូងនៃ មហោស្រពសិល្បៈ «បុណ្យភូមិមានជើង» បានចាប់ផ្តើមតាំងពីព្រលឹមវេលាម៉ោង ៦ ព្រឹក ដែលជាកម្មវិធី “រត់ចម្ងាយខ្លី” នៅជុំវិញប្រាសាទកោះកេរ ជាការរត់រួមគ្នាដើម្បីសន្តិភាព និងសិទ្ធិកុមារ ក្នុងទិវាកុមារពិភពលោកឆ្នាំ ២០២៥ ដែល មហោស្រពសិល្បៈបុណ្យភូមិមានជើង បានសហការរៀបចំជាមួយនឹង UNICEF Cambodia។

កម្មវិធីរត់ចម្ងាយខ្លីនេះ ទទួលបានការចូលរួមយ៉ាងច្រើនពីសំណាក់ ថ្នាក់ដឹកនាំខេត្ត រដ្ឋបាលស្រុក កុមារៗសិស្សនិសិត បងប្អូនប្រជាពលរដ្ធ ស្ថាប័នពាក់ព័ន្ធ និង ឡេឡេប្រាង្គ (យុវជនស្ម័គ្រចិត្ត)សរុបចំនួនមិនតិចជាង ១០០០នាក់ពោរពេញដោយស្នាមញញឹម។

ចូលរួមទាំងអស់គ្នាសម្រាប់ ថ្ងៃទី ២២-២៣ វិច្ឆិកា នៅឯវិទ្យាល័យ ជា ស៊ីម ត្បែងមានជ័យ ខេត្តព្រះវិហារ ដោយមានសកម្មភាពជាច្រើនដូចជា សម្មភាពអប់រំនៅភូមិ UNICEF ល្បែងកំសាន្ត សិល្បៈបុរាណ របាំ តួត្លុក ពេទ្យសិល្បៈ និងតន្រ្តីសម័យ៕

The post កុមារៗ និងអ្នកចូលរួមបង្ហាញស្នាមញញឹមក្នុងកម្មវិធីថ្ងៃទី១បុណ្យភូមិមានជើងនៅប្រាសាទកោះកេរ appeared first on Kampuchea Thmey Daily.