VAR Archives - Kampuchea Thmey Daily

ត្រជាក់ភ្នែក! BTV ដាក់កាមេរ៉ាធំ១០គ្រឿងភ្ជាប់ VAR វគ្គផ្តាច់ព្រ័ត្រ AFC Challenge League

chean virakbot — Fri, 25 Apr 2025 01:16:36 +0000

ការប្រកួតវគ្គផ្តាច់ព្រ័ត្រ ពានរង្វាន់ក្លិបអាស៊ីលំដាប់ទី៣ AFC Challenge League រវាង ព្រះខ័នរាជស្វាយរៀង និងក្រុម FK Arkadag នៅថ្ងៃទី១០ ខែឧសភា ឆ្នាំ២០២៥ នៅពហុកីឡដ្ឋានជាតិមរតកតេជោ ផ្សាយផ្ទាល់ដោយស្ថានីយ៍ទូរទស្សន៍ BTV News សហការជាមួយសហព័ន្ធកីឡាបាល់ទាត់អាស៊ី (AFC) បំពាក់ដោយវីដេអូជំនួយអាជ្ញាកណ្តាល ហៅកាត់ VAR។

នេះជាលើកដំបូងដែលបច្ចេកវិទ្យា VAR ត្រូវបានដាក់ផ្ទាល់នៅទឹកដីនៃព្រះរាជាណាចក្រកម្ពុជា បន្ទាប់ពីកន្លងមកធ្លាប់ប្រើ VAR ពីចម្ងាយ តាមរយៈការបញ្ជូនរូបភាពពីប្រទេសកម្ពុជា ទៅទីស្នាក់ការកណ្តាល របស់សហព័ន្ធកីឡាបាល់ទាត់អាស៊ីនៅប្រទេសម៉ាឡេស៊ី។ ប្រការបានធ្វើឲ្យមានភាពយឹតដោយសារប្រើប្រាស់អ៉ីនធឺណេត។

តាមការឲ្យដឹងពីគ ណៈកម្មការរៀបចំការប្រកួតរបស់សហព័ន្ធកីឡាបាល់ទាត់កម្ពុជានៅព្រឹកថ្ងៃទី២៥ ខែមេសា ឆ្នាំ២០២៥ ថា គណៈកម្មការជំនាញនៃសហព័ន្ធកីឡាបាល់ទាត់អាស៊ីបានចុះមកពិនិត្យដល់ពហុកីឡដ្ឋានជាតិមរតកតេជោរួចរាល់ហើយ។ ពួកគេបានសម្រេចដាក់បច្ចេកវិទ្យា VAR ផ្ទាល់នៅទីនេះតែម្តង។

អ្វីដែលកាន់តែពិសេសទៀតនោះ ទូរទស្សន៍ BTV News ដែលបានទទួលសិទ្ធិក្នុងការផ្សាយផ្ទាល់ បានសម្រេចប្រើប្រាស់កាមេរ៉ាធំរហូតដល់១០គ្រឿងដើម្បីបង្កើតភាពល្អឥតខ្ចោះក្នុងការចាប់រូបភាពគ្រប់ជ្រុងជ្រោយ និងតាមរយៈការភ្ជាប់បច្ចេកវិទ្យា VAR ដូច្នេះភាពត្រឹមត្រូវនៃការកាត់សេចក្តីរបស់អាជ្ញាកណ្តាល និងផ្តល់រូបភាពល្អឥតខ្ចោះដល់អ្នកទស្សនាទាំងក្នុង និងក្រៅប្រទេសរាប់រយលាននាក់។

ក្រុមតំណាងកម្ពុជា ព្រះខ័នរាជស្វាយរៀង ជាក្រុមកម្ពុជាទី២បានឡើងវគ្គផ្តាច់ព្រ័ត្រពានរង្វាន់ក្លិបអាស៊ីលំដាប់ទី៣នេះ បន្ទាប់ពីភ្នំពេញក្រោនបានឡើងកាលពីឆ្នាំ២០១១ ដែលពេលនោះប្រើឈ្មោះ AFC President’s Cup។ យ៉ាងណា ព្រះខ័នរាជស្វាយរៀងជាក្រុមកម្ពុជាទី១ដែលបាននាំការប្រកួតវគ្គផ្តាច់ព្រ័ត្រ ពានរង្វាន់អាស៊ី មកទឹកដីកម្ពុជា ជាលើកដំបូង។

ព្រះខ័នរាជស្វាយរៀង អាចនឹងក្លាយជាក្រុមអាស៊ានទី២ ដែលឈ្នះពាន AFC Challenge League បន្ទាប់ពីក្រុមរបស់ប្រទេសមីយ៉ាន់ម៉ា Yadanarbon ជាក្លិបអាស៊ានទី១បានឈ្នះពាននេះកាលពីឆ្នាំ២០១០៕

អត្ថបទ៖ វីរបុត្រ
ប្រភព៖ CPL

The post ត្រជាក់ភ្នែក! BTV ដាក់កាមេរ៉ាធំ១០គ្រឿងភ្ជាប់ VAR វគ្គផ្តាច់ព្រ័ត្រ AFC Challenge League appeared first on Kampuchea Thmey Daily.

គ្រូទីម័រខាងកើតថា VAR ពេលខ្លះល្អ ពេលខ្លះមិនល្អក្នុងបាល់ទាត់សម័យទំនើប

Pha Rothana — Wed, 18 Dec 2024 03:35:34 +0000

ក្រុមបាល់ទាត់ជម្រើសជាតិទីម័រខាងកើត បានបរាជ័យដោយលទ្ធផល ១-២ ក្នុងការប្រកួតជាមួយម្ចាស់ផ្ទះកម្ពុជា វគ្គសន្សំពិន្ទុក្នុងពូល ពានរង្វាន់ ASEAN Championship ថ្ងៃទី១៧ ខែធ្នូ ឆ្នាំ២០២៤។

ការប្រកួតនៅពហុកីឡដ្ឋានជាតិអូឡាំពិក សង្កេតឃើញថា ប្រព័ន្ធបច្ចេកវិទ្យាជំនួយអាជ្ញាកណ្តាល «VAR» ត្រូវបានប្រើប្រាស់ច្រើន។ ក្រោយចប់ការប្រកួត លោក Simón Elissetche គ្រូបង្វឹកទីម័រខាងកើត ត្រូវបានអ្នកសារព័ត៌មានចោទសួរថា លោកយល់ឃើញយ៉ាងណា ចំពោះការសម្រេចមិនផ្ដល់គ្រាប់បាល់ទី២ដល់ទីម័រខាងកើត ក្រោយការត្រួតពិនិត្យ VAR។

លោក Simón Elissetche បាននិយាយថា ៖«ខ្ញុំមិនអាចនិយាយអ្វីបានទេ ទាល់តែខ្ញុំមើលវីដេអូឡើងវិញទើបអាចនិយាយបាន។ បើនៅលើទីលាន ខ្ញុំមើលឃើញគ្រាប់ទី២របស់ទីម័រខាងកើតគួរតែផ្ដល់ឲ្យ តែ VAR ពិនិត្យមើលហើយគឺមិនឲ្យ។ នៅក្នុងបាល់ទាត់សម័យទំនើបមានបចេ្ចកវិទ្យាមកជំនួយ តែងតែមានចំណុចវិជ្ជមាន និងអវិជ្ជមាន។ យ៉ាងណានេះជាលទ្ធផល ខ្ញុំត្រូវតែទទួលយក»។

មិនមែនមានទីម័រខាងកើតទេ ប៉ុន្តែគ្រាប់បាល់ទាត់ទី១ដែលស៊ុតចូលដោយកីឡាករកម្ពុជា Nieto នៅដើមវគ្គទី១ត្រូវបានសម្រេចមិនផ្ដល់ឲ្យវិញ ក្រោយការឆែក VAR។ គ្រាប់ទី២ក៏ដូចគ្នា ក្រោយកីឡាករទីម័រខាងកើត រំខានអ្នកចាំទីកម្ពុជា។ ក្នុងបាល់ទាត់សម័យនេះ ទោះបីមានបច្ចេកវិទ្យាទំនើប ជួយសម្រួលដល់អាជ្ញាកណ្ដាលក្នុងការកាត់សេចក្ដីនៅលើទីលានពិតមែន ប៉ុន្តែក៏នៅតែកើតមានបញ្ហាអសកម្មភាពខ្លះ។ យ៉ាងមិញភាពអវិជ្ជមានត្រូវបានកាត់បន្ថយឲ្យនៅសល់តិច៕

អត្ថបទ៖ ផា រតនា

The post គ្រូទីម័រខាងកើតថា VAR ពេលខ្លះល្អ ពេលខ្លះមិនល្អក្នុងបាល់ទាត់សម័យទំនើប appeared first on Kampuchea Thmey Daily.

Mourinho ត្រូវសហព័ន្ធបាល់ទាត់តួកគីពិន័យក្រោយរិះគន់ក្រុមមន្ត្រី VAR

Pha Rothana — Mon, 11 Nov 2024 03:44:02 +0000

លោក Jose Mourinho គ្រូបង្វឹក្រុម Fenerbahce បានប្រើពាក្យសម្ដីមិនសមរម្យសំដៅទៅលើមន្ត្រី VAR លោក Atilla Karaoglan បន្ទាប់ពីទទួលបានជ័យជម្នះលើក្រុម Trabzonspor ក្នុងលទ្ធផល ៣-២ កាលពីថ្ងៃអាទិត្យមុនបានធ្វើឲ្យគ្រូបង្វឹករូបនេះរងការពិន័យពីសហព័ន្ធបាល់ទាត់តួកគី។

ទោះបីជាទទួលបានជ័យជម្នះក្នុងការប្រកួតពិតមែន ប៉ុន្តែលោក Mourinho មិនសប្បាយចិត្តទេ ដោយលើកហេតុផលថាមន្ត្រី VAR ហាក់លម្អៀងទៅក្រុម Trabzonspor។ ជាពិសេសតាមរយៈការពិន័យហើយផ្ដល់បាល់ពិន័យ១១ម៉ែត្រឲ្យក្រុមម្ចាស់ផ្ទះ។

ក្រោយបញ្ចប់ការប្រកួតលោក Jose Mourinho បាននិយាយថា ៖«ថ្ងៃនេះកីឡាករល្អប្រចាំការប្រកួតបានទៅលើមន្ត្រី VAR លោក Atilla Karaoglan។ យើងមិនបានឃើញមុខគាត់ទេ ប៉ុន្តែគាត់គឺកាត់ក្ដីដ៏ល្អក្នុងការប្រកួត។ យើងមិនចង់ជួបគាត់ទៀតទេ ព្រោះថាវាគួរឲ្យខ្ពើមណាស់។ យើងមិនចង់បានគាត់ទេ។ យើងមិនចង់បានគាត់នៅលើទីលានទេ»។

ការរិះគន់របស់លោក Mourinho បានរំលោភដល់សិទ្ធិបុគ្គល ហើយបានចោទប្រកាន់ថាការសម្រេចចិត្តរបស់មន្ត្រី VAR មានភាពលំអៀង ហើយថាលេងក្នុងកាលៈទេសៈបែបនេះវាពិតជាពិបាកណាស់។ លោក Mourinho ក៏បានបន្ថែមថា៖«យើងលេងប្រឆាំងនឹងប្រព័ន្ធបច្ចេកវិទ្យា។ ហើយការលេងទល់នឹងប្រព័ន្ធបចេ្ចកវិទ្យាគឺជារឿងពិបាកបំផុត»។

ក្រោយការលើកឡើងរបស់លោក Mourinho បានធ្វើសហព័ន្ធកីឡាបាល់ទាត់តួគី (TFF) មិនសប្បាយចិត្តទេហើយក៏ធ្វើការផាកពិន័យនិងទណ្ឌកម្មបន្ថែមទៀត បន្ទាប់ពីធ្វើឲ្យប៉ះពាល់ដល់កេរ្ដិ៍បាល់ទាត់ប្រទេសតួកគី។ កាលពីថ្ងៃព្រហស្បតិ៍សហព័ន្ធបានចេញសេចក្តីថ្លែងការណ៍ថ្កោលទោសការថ្លែងលើលោក Mourinho ពីមិនមានសារត្មីសមជាអ្នកកីឡាទល់តែសោះ ហើយលើកហេតុផលថាការលើកឡើងរបស់គ្រូបង្វឹករូបនេះ ធ្វើឲ្យប៉ះពាល់ដល់សុចរិតភាពបាល់ទាត់ប្រទេសតួកគី។

លោក Mourinho ទទួលបានការផាកពិន័យបន្ថែមប្រហែល១៦០០ដុល្លារផងដែរ ហើយត្រូវបានហាមចូលរួមដឹកនាំក្រុមមួយប្រកួត ដោយហាមចូលបន្ទប់ផ្លាស់សំល្លៀកបំពាក់ជាពិសេសតំបន់ Touchline៕

ប្រែសម្រួល៖ ផា រតនា

The post Mourinho ត្រូវសហព័ន្ធបាល់ទាត់តួកគីពិន័យក្រោយរិះគន់ក្រុមមន្ត្រី VAR appeared first on Kampuchea Thmey Daily.

ក្រោយឃើញ ថៃ និងសិង្ហបុរី មាន VAR វៀតណាម បណ្ដុះបណ្ដាលអាជ្ញាកណ្ដាល VAR ដែរហើយ

អ៊ិន ពិសី — Wed, 22 Feb 2023 07:23:18 +0000

អាជ្ញាកណ្ដាលវៀតណាម កំពុងចូលរួមក្នុងវគ្គបណ្ដុះបណ្ដាលស្ដីពីបច្ចេកវិទ្យាវីដេអូជំនួយអាជ្ញាកណ្ដាល (VAR) ដែលត្រូវបានគេរំពឹងថា នឹងអនុវត្តនៅក្នុងលីគបាល់ទាត់ជាតិ ក្នុងរដូវកាល ២០២៣-២៤។

គ្រូឧទ្ទេសរបស់ FIFA នឹងបើកវគ្គបណ្ដុះបណ្ដាលតាមអនឡាញ ដោយមានការគាំទ្រពីអ្នកជំនាញវៀតណាម។ អ្នកសិក្សា នឹងត្រូវបានណែនាំពីរបៀបដោះស្រាយស្ថានភាពផ្សេងៗ។

លោក Đặng Thanh Hạ ប្រធាននាយកដ្ឋានអាជ្ញាកណ្ដាល នៃសហព័ន្ធកីឡាបាល់ទាត់វៀតណាមបាននិយាយថា «ក្រុមអាជ្ញាកណ្ដាលចំនួន ១៨ នាក់ ត្រូវបានជ្រើសរើសសម្រាប់វគ្គដំបូងនេះ។ … ក្នុងរយៈពេល ១៤ ថ្ងៃ ពួកគេនឹងស្គាល់ឧបករណ៍ រៀនពីរបៀបវិភាគស្ថានភាពចំនួន ៧៥ ពីវីដេអូឃ្លីបដែលផ្ដល់ដោយ FIFA។ បន្ទាប់មកពួកគេអនុវត្តការងាររបស់ពួកគេតាមរយៈអ្វីដែលពួកគេបានរៀន។ នៅពេលដែល VAR ត្រូវបានអនុវត្តនៅក្នុងហ្គេមជាក់ស្ដែង»។

ប្រធានក្រុមហ៊ុនបាល់ទាត់អាជីពវៀតណាម លោក Trần Anh Tú បានចែករំលែកថា វត្តមានរបស់ VAR ក្នុងការប្រកួតលីគបាល់ទាត់អាជីពរបស់វៀតណាម គឺជាក្ដីស្រមៃរបស់មន្ត្រីបាល់ទាត់ទាំងអស់។

នៅក្នុងវគ្គសិក្សាដំបូង អាជ្ញាកណ្ដាល នឹងធ្វើការលើស្ថានភាពកម្រិត ១។ កម្រិតបន្ទាប់ នឹងមាននៅក្នុងវគ្គសិក្សាក្រោយទៀត។ VAR នឹងត្រូវបានអនុវត្តនៅក្នុងទីលានបាល់ទាត់របស់ប្រទេសវៀតណាម នៅពេលដែលអាជ្ញាកណ្ដាលបំពេញការងាររបស់ពួកគេបានយ៉ាងល្អនៅគ្រប់វគ្គបណ្ដុះបណ្ដាល និងឆ្លងកាត់ការសាកល្បងរបស់ FIFA។

ទន្ទឹមនឹងនោះ ប្រធានគណៈកម្មាធិការរៀបចំ V-League លោក Nguyễn Minh Ngọc បាននិយាយថា បន្ទាប់ពីវគ្គបណ្ដុះបណ្ដាលនៅក្នុងថ្នាក់ អ្នកសិក្សា នឹងបន្តវគ្គបន្ទាប់ទៀតតាមតម្រូវការរបស់ FIFA។

យោងតាមលោក Ngọc បានឲ្យដឹងថា គេរំពឹងថាបច្ចេកវិទ្យានេះនឹងត្រូវប្រើប្រាស់ចាប់ពីរដូវកាល ២០២៣-២៤។

ចាប់តាំងពីឆ្នាំ ២០១៩ លីគបាល់ទាត់វៀតណាម (VPF) បានទាក់ទងទៅ FIFA ដើម្បីសុំការណែនាំ និងបង្រៀនអំពី VAR ក៏ដូចជានីតិវិធីក្នុងការអនុវត្ត VAR នៅក្នុងប្រទេសវៀតណាម។ VPF ក៏បានពិគ្រោះអំពីការដាក់បញ្ចូលប្រព័ន្ធ VAR នៅប្រទេសថៃ មុននឹងនាំវាទៅប្រទេសវៀតណាម។

នៅចុងខែមីនា និងដើមខែមេសា វគ្គបណ្ដុះបណ្ដាល VAR កម្រិត ២ ត្រូវបានគេរំពឹងថា នឹងធ្វើឡើង អំឡុងពេលអាជ្ញាកណ្ដាលនឹងធ្វើការលើស្ថានភាពស្មុគស្មាញ ៣-៥ នាទី ខណៈនៅក្នុងខែឧសភា ឬខែមិថុនា ពួកគេនឹងសាកល្បង VAR ក្នុងការប្រកួតក្រៅផ្លូវការ។

ឧបករណ៍ VAR ត្រូវបាននាំចូល ហើយនឹងមានមន្ទីរពិសោធន៍ VAR ចំនួនពីរ ដែលមួយនៅភាគខាងជើង និងមួយនៅតំបន់ខាងត្បូង។

អ្នកជំនាញរបស់ FIFA នឹងធ្វើការវាយតម្លៃចុងក្រោយរបស់ពួកគេ និងផ្ដល់វិញ្ញាបនបត្រដល់មន្ទីរពិសោធន៍ VAR របស់វៀតណាម ប្រសិនបើពួកគេឈានដល់ស្តង់ដារ។

បច្ចេកវិទ្យានេះ នឹងត្រូវអនុវត្តជាផ្លូវការនៅពេល FIFA អនុម័តនីតិវិធីទាំងអស់លើបច្ចេកទេសមន្ទីរពិសោធន៍ VAR និងដំណើរការបណ្ដុះបណ្ដាលអាជ្ញាកណ្ដាល។

នៅពេល VAR បើក VPF នឹងមិនចាំបាច់ជួលអាជ្ញាកណ្ដាលបរទេសដើម្បីធ្វើការប្រកួតសំខាន់ៗ ខណៈដែលអាជ្ញាកណ្ដាលក្នុងស្រុកនឹងមិនដាក់សម្ពាធខ្លាំងនោះទេ។ ភាពយុត្តិធម៌ នៃការប្រកួត នឹងត្រូវបានធានា ខណៈគុណភាព នៃការប្រកួតនឹងត្រូវបានកែលម្អ៕

ប្រភព ៖ vietnamnews.vn

អត្ថបទ ៖ មន្នីរ័ត្ន

The post ក្រោយឃើញ ថៃ និងសិង្ហបុរី មាន VAR វៀតណាម បណ្ដុះបណ្ដាលអាជ្ញាកណ្ដាល VAR ដែរហើយ appeared first on Kampuchea Thmey Daily.

សិង្ហបុរី ប្រទេសអាស៊ានទី២ ប្រើប្រាស់ VAR ក្នុងលីគរបស់ខ្លួនសម្រាប់រដូវកាលឆ្នាំ២០២៣

Kang Tola — Tue, 14 Feb 2023 12:43:35 +0000

សមាគមបាល់ទាត់សិង្ហបុរី (FAS) បាននិយាយកាលពីថ្ងៃសុក្រថា បច្ចេកវិទ្យាវីដេអូជំនួយការអាជ្ញាកណ្តាល (VAR) នឹងត្រូវប្រើប្រាស់ជាលើកដំបូងក្នុងរដូវកាល២០២៣ នៃលីគកំពូលសិង្ហបុរី (Singapore Premier League) ដែលចាប់ផ្តើមនៅថ្ងៃទី២៤ ខែកុម្ភៈ។

បន្ទាប់ពីឆ្លងកាត់ការវាយតម្លៃចុងក្រោយដោយស្ថាប័នគ្រប់គ្រងពិភពលោក (FIFA) សមាគមបាល់ទាត់សិង្ហបុរី (FAS) ត្រូវបានផ្តល់ភ្លើងខៀវ ដែលនឹងធ្វើឱ្យលីគកំពូលសិង្ហបុរី (SPL) ក្លាយជាលីគអាជីពទី២ នៅអាស៊ីអាគ្នេយ៍បន្ទាប់ពីប្រទេសថៃ ដែលប្រើប្រាស់ VAR។

នាយកអាជ្ញាកណ្តាលនៃសមាគមបាល់ទាត់សិង្ហបុរី (FAS) លោក Nazeer Hussain បាននិយាយថា៖ «ប្រព័ន្ធ VAR កំពុងក្លាយជាមុខងារសំខាន់នៅក្នុងកីឡាបាល់ទាត់ចាប់តាំងពីការណែនាំរបស់វាមក ហើយយើងរីករាយដែលមានការសាកល្បងនេះសម្រាប់ SPL ដែលនឹងជួយពង្រឹង និងលើកកំពស់កម្រិតនៃមន្ត្រីនៅទីនេះ»។

វានឹងត្រូវបានប្រើប្រាស់លើកដំបូងក្នុងការប្រកួត Community Shield ដែលជាប្រពៃណីសម្រាប់លីគក្នុងស្រុក មុនពេលលីគចាប់ផ្តើមនៅថ្ងៃទី២៤ ខែកុម្ភៈ ដោយម្ចាស់ជើងឯកលីគកំពូលសិង្ហបុរី (SPL) ក្លិប Albirex Niigata FC នឹងត្រូវប្រឈមមុខនឹងម្ចាស់ជើងឯក Singapore Cup ក្លិប Hougang United នៅថ្ងៃទី១៩ ខែកុម្ភៈ។

រដូវកាល២០២៣ នៃលីគកំពូលសិង្ហបុរី ដែលអូសបន្លាយរហូតដល់ចុងខែសីហា នឹងត្រឡប់ពីទម្រង់ប្រកួត ៤ជុំទៅជាទម្រង់ ៣ជុំវិញ ដោយក្រុមនីមួយៗលេង ២៤ប្រកួត៕

ប្រភព ៖ straitstimes.com

អត្ថបទ ៖ មន្នីរ័ត្ន

The post សិង្ហបុរី ប្រទេសអាស៊ានទី២ ប្រើប្រាស់ VAR ក្នុងលីគរបស់ខ្លួនសម្រាប់រដូវកាលឆ្នាំ២០២៣ appeared first on Kampuchea Thmey Daily.

សិង្ហបុរី ប្រទេសអាស៊ានមួយទៀត កំពុងដំណើរការអនុវត្ត VAR ក្នុងលីគ សម្រាប់ឆ្នាំ ២០២៣

អ៊ិន ពិសី — Tue, 18 Oct 2022 07:41:34 +0000

មន្ត្រីអាជ្ញាកណ្ដាលក្នុងលីគកំពូលសិង្ហបុរី (SPL) អាចទន្ទឹងរង់ចាំការប្រើប្រាស់បច្ចេកវិទ្យា Video Assistant Referee (VAR) នៅរដូវកាលក្រោយ។

អ្នកដឹកនាំគម្រោង និងសមាគមកីឡាបាល់ទាត់សិង្ហបុរី (FAS) នាយកអាជ្ញាកណ្ដាល លោក Nazeer Hussain បានប្រាប់ FAS.org.sg ថា «ដំណើរការអនុវត្ត VAR ទាំងមូល អាចចំណាយពេលចន្លោះពី ១២ ទៅ ១៨ ខែ យោងតាមកម្មវិធីជំនួយ និងការអនុវត្តការអនុម័ត (IAAP) ដែលបានបង្កើតឡើងដោយ FIFA»។

«បច្ចុប្បន្នយើងស្ថិតនៅដំណាក់កាលទី ៣ នៃដំណាក់កាលទាំង ៥ របស់ IAAP ដែលផ្តោតលើការរៀបចំ និងការបណ្ដុះបណ្ដាលមន្ត្រីអាជ្ញាកណ្ដាល និងបច្ចេកវិទ្យា VAR។ វគ្គហ្វឹកហ្វឺនដំណើរការបានល្អ ហើយយើងកំពុងស្ថិតក្នុងដំណើរការរៀបចំកាលវិភាគ នៃដំណើរទស្សនកិច្ចសម្រាប់មន្ត្រី FIFA ដើម្បីចុះមកវាយតម្លៃវឌ្ឍនភាពរបស់យើង និងអនុម័តការប្រើប្រាស់ VAR នៅទីនេះ ក្នុងប្រទេសសិង្ហបុរី។ នៅមានកិច្ចការដែលត្រូវធ្វើ ប៉ុន្តែប្រសិនបើអ្វីៗដំណើរការល្អ យើងមានទំនុកចិត្តក្នុងការអនុវត្ត VAR ក្នុង SPL នៅឆ្នាំក្រោយ»។ លោកនាយកអាជ្ញាកណ្ដាលដដែលបានសង្កត់ធ្ងន់។

ការប្ដេជ្ញាចិត្តរបស់ លោក Nazeer និងក្រុមរបស់គាត់ក្នុងការអនុវត្ត VAR នៅក្នុងប្រទេសសិង្ហបុរី គឺផ្តើមចេញពីបំណងប្រាថ្នារបស់ពួកគេក្នុងការលើកកម្ពស់ស្តង់ដារ នៃភាតរភាពកីឡាបាល់ទាត់ក្នុងតំបន់ និងបង្កើនកម្រិត នៃការគ្រប់គ្រងដោយមន្ត្រីការប្រកួតទីនេះ។

បញ្ជាក់ថា ពេលអនុវត្តដោយជោគជ័យ សិង្ហបុរី នឹងក្លាយជាប្រទេសទី ៣ ក្នុងសហព័ន្ធបាល់ទាត់អាស៊ាន និងទី ១១ នៅអាស៊ី ដែលប្រើប្រាស់ VAR ក្នុងលីគអាជីពក្នុងស្រុករបស់ខ្លួន៕

ប្រភព ៖ fas.org.sg

អត្ថបទ ៖ មន្នីរ័ត្ន

The post សិង្ហបុរី ប្រទេសអាស៊ានមួយទៀត កំពុងដំណើរការអនុវត្ត VAR ក្នុងលីគ សម្រាប់ឆ្នាំ ២០២៣ appeared first on Kampuchea Thmey Daily.