កៅអីរបស់លោក Amorim ហាក់កំពុងឡើងកម្តៅខ្លាំង បន្ទាប់ពីលោកដឹកនាំក្រុម Man United មិនទទួលបានលទ្ធផលល្អក្នុងពាន Premier League នាដើមរដូវកាល ២០២៥-២០២៦ ដោយបច្ចុប្បន្ន​ក្លិប​កំពុងឈរនៅលេខរៀងទី ១៤ ខណៈកាលពីថ្ងៃ សៅរិ៍ ទី ២៧ ខែ កញ្ញា កន្លងទៅ ទើបតែបរាជ័យក្រោមថ្វីជើងក្រុម Brentford ក្នុងលទ្ធផល ៣-១។

បន្ទាប់ពីការប្រកួតខាងលើនេះ លោក Amorim បានលើកឡើងផងដែរ ថា លោក​មិនព្រួយបារម្ភអំពីកៅអីរបស់លោកឡើយ ទោះបីជាថ្មីៗនេះមានរបាយការណ៍​ពី ក្លិបបានត្រៀមបេក្ខភាព ៣ នាក់ ដើម្បីជំនួសលោក ក្នុងនោះមានអតីតគ្រូបង្វឹក អង់គ្លេស លោក Gareth Southgate, គ្រូបង្វឹក Crystal Palace លោក Oliver Glasner និងគ្រូបង្វឹកក្លិប Bournemouth លោក Andoni Iraola។

ស្របពេលជាមួយគ្នានេះ លោក Xavi ហាក់កំពុងចាប់អារម្មណ៍លើការងារដឹកនាំ Man United ផងដែរ ដោយថ្មីៗនេះអ្នកកាសែត អ៉ីតាលី លោក Fabrizio Romano បានរាយការណ៍ ថា បុរសសញ្ជាតិ អេស្ប៉ាញ វ័យ ៤៥ ឆ្នាំ នឹងទទួលយកការងារនៅ Man United ភ្លាមៗ ប្រសិនបើ​មាន​សំណើ បើទោះបីជាពួកគេមិនមានពាន អឺរ៉ុប លេងក៏ដោយ។

គួរឱ្យដឹងថា លោក Xavi បច្ចុប្បន្ន មិនទាន់មានការងារថ្មីនៅឡើយទេ ចាប់តាំងពីលោកចាកចេញពី Barcelona នៅរដូវក្តៅឆ្នាំ ២០២៤៕

ប្រែសម្រួល៖ សេម កុសល
ប្រភព៖ Sportbible

The post គ្រូបង្វឹក​វ័យ​ ៤៥ ​ឆ្នាំម្នាក់ ចង់​​ទៅ​ដឹក​នាំ​ក្លិប​ Man United បើ Amorim ត្រូវបណ្តេញចេញ appeared first on Kampuchea Thmey Daily.

យោងតាមការចុះផ្សាយដោយសារព័ត៌មាន beIN Sports បានឱ្យដឹងថា ក្លិប Bayer Leverkusen កំពុងគិតគូអំពីគម្រោងដ៏រឹងមាំមួយ សម្រាប់ក្លិបក្នុងការប្រកួតប្រជែងនៅលីគ Bundesliga និងពាន អឺរ៉ុប។ បច្ចុប្បន្ន ពួកគេបានកំណត់អត្តសញ្ញាណលើលោក Xavi ជាគោលដៅធំបំផុត ដើម្បីមកជំនួសកន្លែងលោក Ten Hag។

ប្រភពដដែលបានបញ្ជាក់ថា ខាងភាគីក្លិប Bayer Leverkusen បានទាក់ទងដោយផ្ទាល់ទៅកាន់លោក Xavi ដើម្បីពិភាក្សារឿងនេះ។ ក្រុមប្រឹក្សាភិបាលរបស់ក្លិប Bayer Leverkusen ពេញចិត្តលើលោក Xavi ចំពោះស្តាយ៍នៃប្រព័ន្ធលេងរបស់លោក និងសមត្ថភាពក្នុងការបណ្តុះបណ្តាលយុវជន ដែលនេះគឺស្របទៅតាមចក្ខុវិស័យ ក្លិបកំពុងចង់បាន។

ទោះបីជាយ៉ាងណា ប្រភពជិតស្និទ្ធនឹងលោក Xavi បានបញ្ជាក់ ថា បច្ចុប្បន្នបុរសសញ្ជាតិ អេស្ប៉ាញ វ័យ ៤៥ ឆ្នាំរូបនេះ គឺមិនទាន់មានបំណងវិលមកធ្វើជាគ្រូបង្វឹកវិញឡើយ ដោយសារលោកកំពុងផ្តោតលើជីវិតផ្ទាល់ខ្លួន និងគម្រោងផ្ទាល់ខ្លួនរបស់លោក ក្រៅអំពីការបង្វឹកក្រុមបាល់ទាត់។

គួរបញ្ជាក់ថា លោក Xavi បច្ចុប្បន្ន គឺមិនទាន់មានព័ត៌មានណាមួយ បញ្ជាក់អំពីការវិលត្រឡប់មកក្នុងវិថីជាគ្រូបង្វឹកវិញឡើយ បន្ទាប់ពីលោកចាកចេញពី Barcelona កាលពីរដូវក្តៅឆ្នាំ ២០២៤៕

ប្រែសម្រួល៖ សេម កុសល
ប្រភព៖ beIN Sports

The post Bayer Leverkusen សម្លឹងឃើញអតីតគ្រូ Barcelona ម្នាក់ ជំនួសលោក Ten Hag appeared first on Kampuchea Thmey Daily.

ក្លិប Juventus ត្រូវបានគេរាយការណ៍​ពី​កំពុងពិចារណាក្នុងការនាំយកអតីតអ្នកចាត់ការក្រុម Barcelona លោក Xavi នៅរដូវក្តៅនេះ បន្ទាប់ពីលោក Thiago Motta ជាអ្នកចាត់ការបច្ចុប្បន្នដឹកនាំក្រុមមិនសូវបានល្អ។

លោក Thiago Motta ត្រូវបានតែងតាំងជាគ្រូបង្វឹក Juventus ក្រោយ​បាន​ដឹកនាំក្លិប Bologna បានយ៉ាងល្អកាលពីរដូវកាលមុន។ ទោះជាយ៉ាងណា អតីតកីឡាករជម្រើសជាតិអុីតាលីរូបនេះ មិនទទួលបានជោគជ័យខ្លាំងជាមួយក្លិបសេះបង្គង់​ឡើយ។ បច្ចុប្បន្នពួកគេកំពុងឈរនៅលេខ៥ ក្នុងតារាងពិន្ទុលីគកំពូលអុីតាលី ក្រោយប្រកួត២២លើក ឈ្នះ៨លើក ស្មើ១៣លើក និងចាញ់១លើក មាន៣៧ពិន្ទុ។

យោងតាម ​​L’Equipe ពេលនេះ Old Lady បានកំណត់យក Xavi ជាជម្រើសដំបូង​ដើម្បីជំនួសតំណែងលោក Motta នៅរដូវក្ដៅក្រោយនេះ ក្នុងករណីដែលពួកគេបានចែកផ្លូវជាមួយបុរសវ័យ៤២ឆ្នាំជាគ្រូបង្វឹកបច្ចុប្បន្ន។

លោក Xavi បាន​បញ្ចប់​រដូវកាលជាមួយភាព​តានតឹង​កាលពី​រដូវ​កាល​មុន អំឡុងពេលដឹកនាំក្រុម Barcelona បន្ទាប់ពី​ប្រធាន​ក្លិបលោក Joan Laporta បាន​សុំអង្វរគាត់កុំ​ឲ្យ​ចាកចេញ​។ ទោះបី​ជា​ លោកទទួល​​យកការផ្តល់ជូននេះ ក៏​លោក Laporta បានបញ្ចប់តំណែងគ្រូបង្វឹកវ័យ៤៥ឆ្នាំ បន្ទាប់ពីគាត់បាន​និយាយ​ពាក់​ព័ន្ធនឹងស្ថានភាពហិរញ្ញវត្ថុរបស់ក្លិប។ ចំពោះក្លិប​ Juventus ទំនងជានៅតែបន្ដគាំទ្រលោក Motta ឲ្យដឹកនាំក្រុមក្នុងការស្វែងរកជោគជ័យជូនក្រុម៕

ប្រែសម្រួល៖ ផា រតនា

The post ក្លិប Juventus កំពុង​ចង់​បាន Xavi ជាគ្រូបង្វឹក​ថ្មី appeared first on Kampuchea Thmey Daily.

ក្រុម Barcelona កំពុងស្ថិតនៅស្ថានភាពលំបាកផ្នែកហិរញ្ញវត្ថុ។ ពួកគេពិបាកបន្តកិច្ចសន្យាជាមួយកីឡាករដែលមានស្រាប់ ដោយសារច្បាប់ហិរញ្ញវត្ថុរបស់ LaLiga ជាពិសេសការនាំយកកីឡាករថ្មីចូលរួមជាមួយក្រុម។ រឿងនេះវាបានកើតឡើងក្នុងរយៈពេលប៉ុន្មានឆ្នាំចុងក្រោយជាមួយក្រុម Barcelona​។ លោក Xavi គ្រូបង្វឹកក្រុម Barcelona ពិតជាយល់ច្បាស់ពីស្ថានភាពនេះ ហើយលោកក៏បានព្យាយាមជួយក្រុមតាមលទ្ធភាពដែលអាចធ្វើទៅបាន។

លោក Xavi បាននិយាយថា ៖«ខ្ញុំគ្រាន់តែនិយាយថា ស្ថានភាពសេដ្ឋកិច្ចនៅ Barcelona គឺមិនល្អនោះទេ។ យើង​កំពុង​ព្យាយាម​ធ្វើ​ការ​ជាមួយ​ក្លិប​ដើម្បី​ទទួល​បាន​ស្ថានភាព​ល្អ​ប្រសើរ​​ឡើង​វិញ​។ ពីទីនេះទៅពួកយើងរីករាយនឹងការប្រឈមមុខកាន់តែខ្លាំងនៅរដូវកាល​ក្រោយ​ដើម្បី​ប្រជែង​ជើងឯក»។

ក្លិប​ Barcelona ប៉ុន្មានឆ្នាំចុងក្រោយបានព្យាយាម​ប្រើប្រាស់យុវជនរបស់ក្លិប ដើម្បីកាត់បន្ថយការចំណាយក្នុងការនាំ​ចូល​កីឡាករ​ថ្មី និងបានព្យាយាមខ្ចីជើងកីឡាករមួយចំនួនដើម្បីពង្រឹងក្រុម ប៉ុន្តែ​ពួកគេ​នៅ​តែ​មិន​អាច​​​ល្អ​ប្រសើរ​សម្រាប់​ការ​ប្រជែង​ជើង​ឯក​លីគ​ជាមួយ Real Madrid ជាពិសេសក្នុងការប្រកួតក្នុងពានរង្វាន់ UEFA Champions League៕

ប្រែសម្រួល៖ ផា រតនា

The post Xavi បន្ត​ជួយ Barcelona ទោះស្ថានភាពហិរញ្ញវត្ថុមិនសូវល្អ appeared first on Kampuchea Thmey Daily.

កីឡាករ Vitor Roque មិនសូវ​ទទួលបាន​ឱកាស​បង្ហាញខ្លូនជាមួយក្រុមសោះ។ បច្ចុប្បន្នរូបគេបង្ហាញខ្លួនបាន​តែ​១១លើក ស៊ុតបញ្ចូលទី២គ្រាប់។ រូប​គេ​បានជ្រើសរើសចូល​រួម​ជា​មួយ​ Barcelona ជា​មួយ​ក្ដីស្រមៃ​ធំ​របស់​ខ្លួន​ ប៉ុន្តែអ្វីៗហាក់មិនសមប្រកបសោះ។ លោក Xavi គ្រូបង្វឹកក្រុម Barcelona មិនសូវផ្ដល់​ឱកាស​​ដល់​រូប​គេ​ឡើយ។ ស្របពេលនោះលោក Andre Cury ភ្នាក់ងាររបស់កីឡាករ Vitor Roque ​បាន​ខកចិត្តខ្លាំង ហើយក៏បានលើកឡើងថា រូបគេគួរតែចេញចេញពីក្រុម Barcelona។

លោក Andre Cury បាននិយាយថា ៖«យើងមិនអាចបន្តក្នុងស្ថានភាពបែបនេះទេ។ Vitor Roque ​អាចចាកចេញពី Barcelona។ រូបគេនឹងមិនចាកចេញក្នុងលក្ខខណ្ឌខ្ចីជើងទេ ខ្ញុំអាចធានាបាន។ ប្រសិនបើគាត់ចាកចេញនៅរដូវក្តៅនេះ វានឹងផ្ទេរជាអចិន្ត្រៃយ៍»។

«គ្មាននរណាម្នាក់យល់ពីមូលហេតុដែល Xavi មិនដាក់ឲ្យរូបគេលេងទេ ហើយមិននិយាយអ្វីជាមួយ Vitor សោះ។ខ្ញុំជឿថា វាមិនជារឿងត្រឹមត្រូវទេ។ យើងបានជ្រើសរើស Barcelona ពីព្រោះ Vitor ស្រឡាញ់ក្លិបមួយនេះ ប៉ុន្តែយើងមិនអាចបន្តជាមួយ Xavi មិន​ផ្តល់ឱកាសឲ្យ»។

នៅថ្ងៃទី១២ ខែកក្កដា ឆ្នាំ២០២៣ ក្លិប Barcelona ​​បាន​​ប្រកាស​ពី​កិច្ចព្រមព្រៀង​នាំ​យក​ Roque ពី​ក្លិប​ Athletico ដោយយល់ព្រមលើកិច្ចសន្យារហូតដល់ ២០៣០-៣១៕

ប្រែសម្រួល៖ ផា រតនា

The post លោក Andre ថា Vitor Roque អាចនឹងចាកចេញពីក្រុម Barcelona appeared first on Kampuchea Thmey Daily.

Xavi បាននិយាយថា អាជ្ញាកណ្តាលសញ្ជាតិរូម៉ានីលោក Istvan Kovacs ជាគ្រោះមហន្តរាយសម្រាប់ការប្រកួតយប់មិញ បន្ទាប់ពីក្រុមរបស់លោកនាំមុខ ១-០ ប៉ុន្តែអ្វីបានផ្លាស់ប្ដូរទាំងស្រុង បន្ទាប់ពីនាទី២៩ ខ្សែការពារឆ្នើម Araújo ទទួលបានកាតក្រហម ធ្វើឲ្យក្រុម Barcelona មាន​តែ​សមាជិក១០នាក់លើទីលាន។

លោក Xavi បាន​និយាយ​ថា ​៖«យើង​មាន​ការ​រំខានខ្លះ បន្ទាបប់ពីទទួលបានកាត​ក្រហម។ យើងរៀបចំយ៉ាងល្អពេលលេង១១នាក់ដំបូង ប៉ុន្តែអ្វីៗវាបានផ្លាស់ប្តូរទាំងស្រុង។ សម្រាប់ខ្ញុំហាក់ពិបាកទទួលយក​ដែល Araújo ត្រូវបានបណ្ដេញចេញ។ អាជ្ញាកណ្តាលពិតជាកាត់សេចក្ដីអាក្រក់ណាស់។ ខ្ញុំបានប្រាប់គាត់ថា គាត់គឺជាគ្រោះមហន្តរាយ។ គាត់បានបំផា្លញក្ដីសង្ឃឹមយើង។ ខ្ញុំមិនចូលចិត្តនិយាយអំពីអាជ្ញាកណ្តាលទេ ប៉ុន្តែត្រូវតែនិយាយ ពីព្រោះខ្ញុំមិនយល់អំពីការកាត់ក្ដីបែបនេះទេ»។

លោក Xavi ក៏ត្រូវបានបណ្ដេញចេញក្នុង​វគ្គ​ទី​២​ សម្រាប់ការតវ៉ាចំពោះការសម្រេចចិត្តមិនផ្តល់បាល់ពិន័យសម្រាប់ការប្រជែងរបស់ខ្សែការពារ Marquinhos លើទៅខ្សែបម្រើ Ilkay Gündogan។

សរុប​ទាំង​ពីរ​ជើង Bacelona បាន​ចាញ់ PSG ដោយ​លទ្ធផល ៤-៦ ដូច្នេះ PSG បាន​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ​ជួប​ក្រុម​អាល្លឺម៉ង់ Dortmund៕

ប្រែសម្រួល៖ ផា រតនា
ប្រភព៖ ESPN

The post លោក Xavi ថា ក្ដីសង្ឃឹមរបស់ Barcelona ត្រូវបានបំផ្លាញដោយអាជ្ញាកណ្ដាល appeared first on Kampuchea Thmey Daily.

របួស​របស់ Pedri បាន​កើត​ឡើង​កាល​ពី​ថ្ងៃ​ទី៤ ខែមីនា ហើយរូបគេត្រូវប្ដូរ​ចេញ​ជំនួសវិញ​ដោយកីឡាករវ័យក្មេង Lamine Yamal នៅនាទី៤៥។ ស្រប​ពេល​ក្រុម Barcelona កំពុង​មាន​បញ្ហាកីឡាកររបួសច្រើន​ផង​នោះ Pedri រំពឹងថា ខ្លួននឹង​ឆាប់វិលចូលទីលានវិញ។ ជា​ពិសេស ស្របពេល​ FC Barcelona ត្រូវធ្វើការងារធ្ងន់ក្នុងពានរង្វាន់ UEFA Champion League វគ្គ៨ក្រុមចុងក្រោយ ទល់​នឹង​ក្រុមយក្ស​បារាំង Paris Saint-Germain។

កីឡាករ Pedri បាននិយាយថា ៖«មិនមានកាលបរិច្ឆេទជាក់លាក់​ទេ​ចំពោះការវិលត្រឡប់មកវិញរបស់ខ្ញុំ ប៉ុន្តែសម្រាប់ពេលនេះអ្វីៗ​ល្អ​ប្រសើរហើយ។ ខ្ញុំសង្ឃឹមថា នឹង​ត្រឡប់​មកវិញឆាប់ៗ។ ផ្លូវចិត្តរបស់ខ្ញុំល្អប្រសើរច្រើន។ បញ្ហារបួសក៏បានធូរស្រាល។ ខ្ញុំកំពុងតែគិតអំពីការត្រឡប់មកវិញ និងរីករាយជាមួយរឿងនេះ»។

បើនិយាយ​ដល់​កីឡាករ​ក្មេងមាន​ទេពកោសល្យ​​ជួប​បញ្ហា​របួសក្នុងនោះក៏មានកីឡាករ Gavi ម្នាក់ដែរក្រោយជួបបញ្ហារបួសរយៈពេលវែង។

លោក Xavi គ្រូបង្វឹក Barcelona បាននិយាយថា​ ៖«អ្វី​ដែល​យើង​ព្យាយាម​គឺ​​ការពារ ​ជៀង​វាង​​មាន​ការ​របួស​បន្ថែម​ទៀត។ របួសរបស់ Pedri មិន​ធ្ងន់​ធ្ងរ​ដូច​យើង​គិត​ពី​ដំបូង​ទេ ប៉ុន្តែ​វា​ដល់​ពេល​​​ត្រូវ​គិត​វិជ្ជមាន។ ការវិល​មក​វិញ​នៅ​ពេល​ណា​​​គឺ​ចាំ​មើល​គាត់​ជា​សះស្បើយ​ពេញលេញ»៕

ប្រែសម្រួល៖ ផា រតនា

The post ខ្សែបម្រើ Pedri រំពឹងវិលចូលទីលានវិញឆាប់ៗ appeared first on Kampuchea Thmey Daily.

លោក Xavi Hernandez បានប្រកាសថា លោក​នឹងលាលែងពីតំណែងជាគ្រូបង្វឹករបស់ Barcelona នៅចុងរដូវកាលនេះ ដោយសារ​រងសម្ពោធ​ការដឹកនាំ ជាពិសេសមិនអាចជួយឲ្យក្រុមឈរនៅកំពូលតារាង​លីគកំពូលអេស្ប៉ាញ។

បើតាមការគ្រោងទុក លោក Xavi នឹងបន្តការងារជាគ្រូ​ដល់​ថ្ងៃទី៣០ ខែមិថុនា ឆ្នាំ​២០២៤ បើទោះបីជាកិច្ចសន្យារបស់​លោកមានសុពលភាពរហូតដល់រដូវក្តៅបន្ទាប់។ បច្ចុប្បន្ន ក្រុម Barcelona នៅសល់​ឱកាស​ប្រជែង​ពាន​ធំ UEFA Champions League ដោយត្រូវជួយជាមួយក្រុម PSG ក្នុងវគ្គ៨ក្រុមចុងក្រោយ។

ពាក់ព័ន្ធជាមួយករណីនេះ ប្រធានក្លិប Barcelona លោក Joan Laporta មិនមានគំនិត​ឲ្យលោក Xavi Hernandez​ បញ្ចាប់តួនាទីរបស់គាត់លឿន​ពេក​​ទេ ទោះបីរដូវកាលនេះ​លទ្ធផល​មិនសូវ​ល្អក៏ដោយ។ អ្នកគាំទ្រមួយចំនួន​មិនសប្បាយចិត្តក្នុងការដឹកនាំរបស់លោក Xavi ក្នុងរដូវកាលនេះ​ទេ។ ពួកគេ​សប្បាយចិត្តពេល​ឮដំណឹងថា គ្រូបង្វឹករូបនេះនឹងចាកពីក្រុមមុន​កាល​កំណត់។ សម្រាប់ប្រធានក្លិប Barcelona នៅ​ពេញចិត្ត និង​ជំរុញឲ្យគ្រូបង្វឹក​វ័យ៤៤ឆ្នាំ​ផ្លាស់ប្ដូរ​ការ​សម្រេច​ចិត្ត និង​បន្ត​ដឹក​នាំ​ទៀត។

លោក Joan Laporta បាននិយាយថា ៖«ខ្ញុំ​ពិត​ជា​ចង់​ឲ្យ Xavi ផ្លាស់​ប្តូរ​ចិត្ត ហើយ​បន្ត​ធ្វើ​ជា​អ្នក​ចាត់​ការ​ Barca ទៀត។ ខ្ញុំនឹងមិនដាក់សម្ពាធលើ Xavi ទេ។ វាអាស្រ័យលើគាត់។ គាត់ដឹងពីបំណងប្រាថ្នារបស់ខ្ញុំចង់ឲ្យគាត់នៅទីនេះបន្ត។ យើងនឹងឃើញពីជាក់ស្ដែងនៅចុងបញ្ចប់រដូវកាល»។

ប្រែសម្រួល៖ ផា រតនា​
ប្រភព៖ Fabrizio

The post ប្រធានក្លិប Barcelona ចង់ឲ្យ Xavi ផ្លាស់ប្តូរការសម្រេចិត្ត appeared first on Kampuchea Thmey Daily.