Xi Jinping Archives - Kampuchea Thmey Daily

ស្វែងយល់រាជដំណើរទស្សនកិច្ចរបស់មហាក្សត្រថៃទៅកាន់មហាយក្សចិនពេលនេះ

Rann Reuy — Thu, 13 Nov 2025 02:46:14 +0000

មហាក្សត្រថៃ មហា វ៉ាជីរ៉ាឡុងកន (Maha Vajiralongkorn) រាមាទី១០នៃការឡើងគ្រងរាជតាមបែបសន្តតិវង្សក្នុងត្រកូលចក្រី នឹងចាប់ផ្តើមយាងទៅទស្សនកិច្ចនៅទីក្រុងប៉េកាំងនៅថ្ងៃព្រហស្បតិ៍ទី១៣ខែវិច្ឆិកានេះ ដែលទ្រង់នឹងក្លាយជាមហាក្សត្រថៃសោយរាជ្យដែលយាងធ្វើទស្សនកិច្ចផ្លូវរដ្ឋដំបូងគេទៅកាន់សាធារណៈរដ្ឋប្រជាមានិតចិន។

រាជវង្សានុវង្សរបស់ក្សត្រថៃ វ៉ាជីរ៉ាឡុងកន រាមាទី១០។

ក្រុមអ្នកវិភាគ បានចាប់អារម្មណ៍ចំពោះរាជដំណើរទស្សនកិច្ចលើកដំបូងក្នុងចំណងទំនាក់ទំនងការទូតផ្លូវការរវាងរាជាណាចក្រថៃនិងរដ្ឋាភិបាលចិនកុម្មុយនីស្តរយៈពេលកន្លះសតវត្សរ៍នេះ ដោយចាត់ទុកថាវាជាសញ្ញានៃការកើនឡើងឥទ្ធិពលរបស់មហាយក្សចិនប្រចាំតំបន់អាស៊ីលើព្រះរាជាណាចក្រថៃ ដែលគេដឹងថា ជាសម្ព័ន្ធមិត្តដ៏ជិតស្និទ្ធជាមួយសហរដ្ឋអាមេរិករាប់សិបទសវត្សរ៍មកហើយនោះ។

មានការកត់សម្គាល់ដែរថា របបរាជានិយមអាស្រ័យធម្មនុញ្ញរបស់ប្រទេសថៃចាប់តាំងពីឆ្នាំ១៩៣២ ប្រទេសថៃបានប្រើប្រាស់ព្រះរាជទស្សនកិច្ចរបស់មហាក្សត្រគ្រងរាជសម្បត្តិជាឧបករណ៍គោលនយោបាយការបរទេសដ៏សំខាន់បំផុត នៅក្នុងនោះ រួមទាំងដំណើរទៅកាន់សហរដ្ឋអាមេរិកចំនួនពីរលើកក្នុងកំឡុងសម័យសង្គ្រាមត្រជាក់ក្នុងទសវត្សរ៍ឆ្នាំ១៩៦០ របស់អតីតមហាក្សត្រថៃ ភូមិបុល អាឌុលយ៉ាដេត ( Bhumibol Adulyadej) ដែលសោយរាជ្យ៧០ឆ្នាំ ដោយទ្រង់មិនដែលយាងទស្សនកិច្ចនៅប្រទេសចិនម្តងណាឡើយ។ មកដល់រាជរបស់មហាក្សត្របច្ចុប្បន្ន វ៉ាជីរ៉ាឡុងកូន (Vajiralongkorn) គឺព្រះមហាក្សត្រថៃដែលយាងទៅទស្សនកិច្ចដោយផ្ទាល់ក្រោយពីការឡើងគ្រងរាជ៩ឆ្នាំ។

អត្ថបទស្រាវជ្រាវអំពីរាជដំណើរស្តេចថៃទៅកាន់ទីទីក្រុងប៉េកាំងលើកនេះ ដោយសារព័ត៌មានរ៉យទ័រ បានកត់សម្គាល់ថា រដ្ឋាភិបាលទីក្រុងបាងកកដែលគ្រប់គ្រងប្រទេសតាមបែបរាជាធិបតេយ្យអាស្រ័យរដ្ឋធម្មនុញ្ញនេះ បានបង្កើតទំនាក់ទំនងការទូតជាមួយរដ្ឋាភិបាលទីក្រុងប៉េកាំងនៅឆ្នាំ១៩៧៥ ហើយទំនាក់ទំនងទ្វេភាគីរបស់ពួកគេបានវិវត្តន៍ពីឆ្នាំក្រោយសង្គ្រាមត្រជាក់ ដោយមានការពង្រីកយ៉ាងសំខាន់ក្នុងពាណិជ្ជកម្ម និងការវិនិយោគទ្វេភាគី។

ប្រទេសចិនគឺជាទីផ្សារនាំចូលដ៏ធំបំផុតសម្រាប់ប្រទេសថៃ ដែលបានដឹកជញ្ជូនទំនិញរបស់ចិនមានតម្លៃ ៨០ពាន់លានដុល្លារកាលពីឆ្នាំមុន ក៏ដូចជាប្រភពកំពូលនៃអ្នកទេសចរសម្រាប់វិស័យទេសចរណ៍ដ៏សំខាន់របស់ព្រះរាជាណាចក្រថៃ និងជាអ្នកវិនិយោគធំនៅក្នុងវិស័យឧស្សាហកម្មដូចជារថយន្តជាដើម។

ការធ្វើចំណាកស្រុកពីប្រទេសចិនទៅប្រទេសថៃក៏មានរយៈពេលរាប់សតវត្សដែរ ហើយគ្រួសារថៃជាច្រើន រួមទាំងប្រធានផ្នែកឧស្សាហកម្ម អាជីវកម្ម និងនយោបាយ មានដើមកំណើតជាជនជាតិចិន។

នៅក្នុងសេចក្តីថ្លែងការណ៍មួយ ដែលប្រកាសអំពីដំណើរទស្សនកិច្ចរបស់ព្រះមហាក្សត្រ វ៉ាជីរ៉ាឡុងកន និងរាជក្សត្រី ស៊ុតធីតា (Suthida) រដ្ឋាភិបាលថៃបានរៀបរាប់ថា វាជាការឆ្លុះបញ្ចាំងពី «មិត្តភាពដ៏ស៊ីជម្រៅ និងការយោគយល់គ្នារវាងប្រទេសថៃ និងចិននៅគ្រប់កម្រិតទាំងអស់»។

តាមអ្នកនាំពាក្យក្រសួងការបរទេសទេសចិន អ្នកនាង ម៉ៅ នីង (Mao Ning) ដែលបានប្រកាសរាជដំណើរយាងទស្សនកិច្ចរបស់មហាក្សត្រថៃ គឺថា ព្រះមហាក្សត្រគ្រោងនឹងយាងទស្សនកិច្ចនៅប្រទេសចិនចំនួន៥ថ្ងៃ ចាប់ពីថ្ងៃទី១៣ដល់ថ្ងៃទី១៧ខែវិច្ឆិកា ដោយទ្រង់គ្រោងជួបសវនាជាមួយប្រធានាធិបតីចិន ស៊ី ជីនពីង (Xi Jinping) និងនាយករដ្ឋមន្ត្រីលោក លី ឈាង (Li Qiang)។

មហាក្សត្រថៃ វ៉ាជីរ៉ាឡុងកន និងក្សត្រី ក្នុងរាជពិធីបុណ្យឈាបនកិច្ចនៃមហាក្សត្រយានី។ REUTERS

ដំណើរទស្សនកិច្ចដ៏កម្រនិងកំពូលនៃមហាក្សត្រដ៏មានឥទ្ធិពលនៅអាស៊ីអាគ្នេយ៍ ប៉ុន្តែគ្មានកិច្ចព្រមព្រៀងណាមួយត្រូវបានគេរំពឹងថានឹងត្រូវបានចុះហត្ថលេខារវាងប្រទេសទាំងពីរក្នុងអំឡុងពេលនេះនោះទេ។

ចាប់តាំងពីការឡើងសោយរាជ្យនៅឆ្នាំ ២០១៦ ព្រះមហាក្សត្រ វ៉ាជីរ៉ាឡុងកន បានយាងធ្វើដំណើរជាផ្លូវការនៅរដ្ឋបរទេសតែមួយគត់គឺទៅកាន់ប្រទេស Bhutan ក្នុងតំបន់អាស៊ីខាងត្បូងកាលពីខែមេសា។

ទោះបីជាមានការយាងជាផ្លូវការក៏ដោយ អតីតព្រះមហាក្សត្រ Bhumibol ដែលបានចំណាយពេលប្រាំពីរទសវត្សរ៍នៅលើបល្ល័ង្កថៃដ៏មានឥទ្ធិពល មិនដែលបានទៅទស្សនាប្រទេសចិនទេ នោះក៏ដោយសារតែសម្ព័ន្ធមិត្តដ៏ស្អិតរមួតជាមួយសហរដ្ឋអាមេរិក។

តាមការដកស្រង់របស់រ៉យទ័រ អ្នកជំនាញទំនាក់ទំនងអន្តរជាតិនៃសាកលវិទ្យាល័យ Thammasat នៃទីក្រុងបាងកក លោក Sitthiphon Kruarattikan បាននិយាយថា ក្នុងអំឡុងពេលទ្រង់កាន់អំណាច ទោះបីមានការអញ្ជើញផ្លូវការក៏ដោយ អតីតព្រះមហាក្សត្រថៃ Bhumibol បានត្រឹមបញ្ជូនអ្នកតំណាង រួមទាំងស្តេចបច្ចុប្បន្នកាលដែលទ្រង់ត្រូវបានតែងតាំងជាអ្នកស្នងរាជ្យបន្តនៅឆ្នាំ ១៩៨៧។

អ្នកវិភាគរូបនេះ ត្រូវបានស្រង់សម្តីដូចនិយាយថា៖«ក្រឡេកមើលប្រទេសទាំងអស់ដែលចិនមានទំនាក់ទំនងការទូតជាមួយ ប្រមុខរដ្ឋនៃប្រទេសទាំងនោះភាគច្រើនបានទៅប្រទេសចិន ដោយប្រទេសថៃមានករណីលើកលែងជាយូរមកហើយ» ។
លោក Sitthiphon បន្ថែមថា៖«ដើម្បីមានព្រះមហាក្សត្រថៃដែលសោយរាជ្យមកទស្សនកិច្ចនេះគឺជាអ្វីដែលចិនចង់បាន»។

ដំណើរទស្សនកិច្ចនេះធ្វើឡើងក្នុងអំឡុងពេលកាន់ទុក្ខជាផ្លូវការតែប៉ុន្មានសប្តាហ៍បន្ទាប់ពីការសោយទិវង្គតរបស់មាតារបស់ព្រះមហាក្សត្រ ដែលជាសញ្ញាបញ្ជាក់ពីសារៈសំខាន់ដែលរាជវាំងផ្តល់ដល់ក្រុងប៉េកាំង៕

រ៉ាន់ រើយ

The post ស្វែងយល់រាជដំណើរទស្សនកិច្ចរបស់មហាក្សត្រថៃទៅកាន់មហាយក្សចិនពេលនេះ appeared first on Kampuchea Thmey Daily.

មន្ត្រីជាន់ខ្ពស់ អាមេរិក-ចិន ត្រៀមជួបគ្នាផ្ទាល់នៅម៉ាឡេស៊ី

Rann Reuy — Sat, 18 Oct 2025 06:34:06 +0000

តាមសេចក្តីរាយការណ៍របស់ Bloomberg កិច្ចប្រជុំលើកក្រោយនៃកិច្ចចរចាពាណិជ្ជកម្មរវាងសហរដ្ឋអាមេរិក និងចិន ត្រូវបានកំណត់សម្រាប់សប្តាហ៍ក្រោយ ដោយរដ្ឋមន្ត្រីក្រសួងរតនាគារសហរដ្ឋអមេរិក លោក Scott Bessent និងឧបនាយករដ្ឋមន្ត្រីចិន លោក He Lifeng នឹងត្រូវប្រឈមមុខគ្នាចរចា ដើម្បីរកច្រកចេញកាត់បន្ថយវិធានការកើនឡើងកម្តៅថ្មីក្នុងវិវាទពន្ធគយរវាងមហាអំណាចសេដ្ឋកិច្ចនិងយោធាធំបំផុតទាំងពីរ។

រដ្ឋមន្ត្រីក្រសួងរតនាគារសហរដ្ឋអមេរិក លោក Scott Bessent និងឧបនាយករដ្ឋមន្ត្រីចិន លោក He Lifeng

ប្រទេសម៉ាឡេស៊ីហាក់ត្រូវប៉ាន់យ៉ាងខ្លាំងក្នុងការជ្រើសរើសជាទីតាំងសម្របសម្រួលជម្លោះរវាងមហាអំណាច បន្ទាប់ពីម៉ាឡេស៊ី បានធ្វើជាអ្នកសម្របសម្រួលដោយជោគជ័យក្នុងជម្លោះកម្ពុជានិងប្រទេសថៃ ដែលបានផ្ទុះអាវុធទ្រង់ទ្រាយធំកាលពីចុងខែកក្កដា ដែលបានបណ្តាលឲ្យមានទាហានរាប់សិបនាក់បានស្លាប់ និងមានជនភៀសសឹករាប់សែននាក់។

Bloomberg រាយការណ៍ថា រដ្ឋមន្ត្រីក្រសួងរតនាគារអាមេរិក លោក Bessent បាននិយាយថា លោកបាននិយាយតាមអនឡាញជាមួយឧបនាយករដ្ឋមន្ត្រីចិន កាលពីល្ងាចថ្ងៃទី ១៧ ខែតុលា។ តំណាងពាណិជ្ជកម្មអាមេរិក Jamieson Greer ក៏បានចូលរួមក្នុងកិច្ចពិភាក្សាតាមអ៊ីនធឺណិតផងដែរ។

ប្រធានរតនាគារមុននេះ បានពណ៌នាការពិភាក្សាជាមួយលោក He ថា «ស្មោះត្រង់ និងលម្អិត» ហើយបានបញ្ជាក់ជាថ្មីនូវផែនការដើម្បីជួបដោយផ្ទាល់នៅសប្តាហ៍ក្រោយ។

កាលពីថ្ងៃពុធសប្តាហ៍នេះ មន្ត្រីជាន់ខ្ពស់អាមេរិកទាំងពីររូបខាងលើនេះ បានស្តីបន្ទោសភាគីចិនចំពោះការរឹតត្បិតការនាំចេញរ៉ែកម្រទៅកាន់ទីផ្សារអន្តរជាតិដែលសំដៅជាសំខាន់ទៅកាន់ទីផ្សារអាមេរិក ដែលនាំទៅដល់ផលប៉ះពាល់ធ្ងន់ធ្ងរដល់ឧស្សាហកម្មរបស់សហរដ្ឋអាមេរិក។ ជាការឆ្លើយតប លោក ដូណាល់ ត្រាំ បានលើកឡើងពីការដាក់វិធានការពន្ធថ្មីរហូតដល់១០០%លើទំនិញនាំចូលរបស់ចិន។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម និង ប្រធានាធិបតីអាមេរិក ដូណាល់ ត្រាំ។

តាមការចេញផ្សាយចុងក្រោយនេះ លោក Bessent បាននិយាយក្នុងព្រឹត្តិការណ៍មួយនៅសេតវិមានថា «គាត់ និងខ្ញុំ និងគណៈប្រតិភូមួយក្រុម នឹងជួបប្រជុំគ្នានៅប្រទេសម៉ាឡេស៊ី ប្រហែលជាមួយសប្តាហ៍ចាប់ពីថ្ងៃស្អែក ដើម្បីរៀបចំសម្រាប់ប្រធានាធិបតីទាំងពីរជួបគ្នា»។

ទីភ្នាក់ងារព័ត៌មានស៊ីនហួររបស់រដ្ឋរបស់ប្រទេសចិនបានរាយការណ៍ថា ភាគីទាំងពីរមានការផ្លាស់ប្តូរទស្សនៈដោយស្មោះត្រង់ ស៊ីជម្រៅ និងស្ថាបនាលើបញ្ហាសំខាន់ៗក្នុងទំនាក់ទំនងសេដ្ឋកិច្ច និងពាណិជ្ជកម្មទ្វេភាគី។

ការអត្ថាធិប្បាយរបស់លោក Bessent បានកើតឡើងបន្ទាប់ពីប្រធានាធិបតីអាមេរិក ដូណាល់ ត្រាំ បង្ហាញសុទិដ្ឋិនិយមថា ការពិភាក្សាជាមួយមន្ត្រីចិនអាចទទួលបានកិច្ចព្រមព្រៀងមួយដើម្បីដោះស្រាយវិបត្តិដែលឃើញលោក ត្រាំ គំរាមដំឡើងពន្ធយ៉ាងខ្លាំង៕

រ៉ាន់ រើយ

The post មន្ត្រីជាន់ខ្ពស់ អាមេរិក-ចិន ត្រៀមជួបគ្នាផ្ទាល់នៅម៉ាឡេស៊ី appeared first on Kampuchea Thmey Daily.

កិច្ចប្រជុំកំពូល SCO នៅចិន ធ្វើឲ្យផ្អៀងពិភពលោក ទប់ទល់អំណាចបស្ចឹមលោក

Rann Reuy — Mon, 01 Sep 2025 03:58:29 +0000

ពិភពលោកហាក់បែកចែកឥទ្ធិពលកាន់តែច្បាស់ក្នុងពេលនេះ តាមរយៈកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO) ឆ្នាំ ២០២៥ ដែលប្រទេសចិនធ្វើជាម្ចាស់ផ្ទះក្នុងឆ្នាំនេះ ដោយសារតែវត្តមានប្រមុខមេដឹកនាំនៃប្រទេសសំខាន់ជាច្រើន ក្នុងបរិបទដែលពិភពលោកកំពុងមានការបែកបាក់យ៉ាងខ្លាំង ហើយវាក៏ក្លាយជាវេទិកាអន្តរជាតិដ៏សំខាន់ដើម្បីទប់ទល់អំណាចបស្ចឹមប្រទេស។

រូបថតជុំគ្នារបស់មេដឹកនាំបណ្តាប្រទេសចូលរួមកិច្ចប្រជុំ SCO រៀបចំដោយប្រទេសចិន។ Reuters

ប្រមុខរដ្ឋចិន ប្រធានាធិបតីចិនលោក ស៊ី ជីនពីង (Xi Jinping) នៅល្ងាចថ្ងៃអាទិត្យបានរៀបចំពិធីបដិសណ្ឋារកិច្ចកម្រិតខ្ពស់ដល់មេដឹកនាំនៃបណ្តាប្រទេសជាច្រើនជាង២០ និង ប្រមុខអង្គការអន្តរជាតិមានអង្គការសហប្រជាជាតិ អាស៊ានជាដើម សម្រាប់កិច្ចប្រជុំកំពូលដែលនឹងប្រព្រឹត្តទៅនៅថ្ងៃទី១ខែកញ្ញានេះ។ មេដឹកនាំមកពីប្រទេសជាង២០ និងប្រធានអង្គការអន្តរជាតិចំនួន ១០ បានធ្វើដំណើរមកចូលរួមកិច្ចប្រជុំដ៏សំខាន់នេះ។

ប្រធានាធិបតីចិន ស៊ី ជីនពីង បានស្វាគមន៍ប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) ប្រធានាធិបតីតួកគី រ៉េស៊ីប តាយយីប អឺដូហ្គាន (Recep Tayyip Erdogan) នាយករដ្ឋមន្ត្រីឥណ្ឌា លោក ណារ៉េនដ្រា ម៉ូឌី (Narendra Modi) នាយករដ្ឋមន្ត្រីប៉ាគីស្ថាន សេបាស សារីហ្វ (Shehbaz Sharif) និងប្រមុខរដ្ឋជាច្រើនទៀតមកពីតំបន់អាស៊ានកណ្តាល និងពីអាស៊ីអាគ្នេយ៍។

ទីភ្នាក់ងារសារព័ត៌មានរដ្ឋចិន ស៊ីនហ៊ួ (Xinhua) ដែលមានមូលដ្ឋាននៅទីក្រុងប៉េកាំង បានផ្សាយថា ប្រធានាធិបតីចិនលោក ស៊ី ជីនពីង កាលពីថ្ងៃអាទិត្យបានរៀបចំពិធីជប់លៀងនៅទីក្រុងកំពង់ផែ Tianjin ភាគខាងជើង ដើម្បីស្វាគមន៍ភ្ញៀវអន្តរជាតិដែលកំពុងចូលរួមកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO) ឆ្នាំ ២០២៥ ។

អង្គការសហប្រតិបត្តិការសៀងហៃ (SCO) ដែលក្រុមបណ្តាមេដឹកនាំបស្ចឹមប្រទេសប្រៀបធៀបទៅនឹង «អង្គការណាតូប្រចាំតំបន់អាស៊ី» ដែលជាផ្នែកនៃការទប់ឥទ្ធិពលភូមិសាស្រ្តនយោបាយរបស់បស្ចឹមប្រទេសមកកាន់តំបន់អាស៊ី។ អង្គការនេះបានក្លាយជាស្ថាប័នអន្តរជាតិកាន់តែលេចធ្លោឡើង នៅពេលដែលពិភពលោកប្រឈមប្រឈមសង្គ្រាម ដូចជា នៅអ៊ុយក្រែន និងនៅតំបន់មជ្ឈឹមបូព៌ា។

កិច្ចប្រជុំ SCO កំពុងត្រូវបានប្រារព្ធឡើងនៅថ្ងៃចន្ទនេះ ដែលជាការកត់សម្គាល់កិច្ចប្រជុំកំពូលប្រចាំឆ្នាំលើកទីប្រាំដែលរៀបចំដោយប្រទេសចិន ចាប់តាំងពីវេទិកានេះត្រូវបានបង្កើតឡើងក្នុងឆ្នាំ២០០១។ កិច្ចប្រជុំកំពូលនេះត្រូវបានកោះប្រជុំចំពេលមានភាពតានតឹងផ្នែកភូមិសាស្ត្រនយោបាយកាន់តែខ្លាំងឡើង រួមទាំងសង្គ្រាមរបស់អ៊ីស្រាអែលនៅលើតំបន់ហ្គាហ្សាស្ទ្រីប ជម្លោះអ៊ុយក្រែន និងជម្លោះពន្ធអន្តរជាតិ។

នៅក្នុងកិច្ចប្រជុំទ្វេភាគីជាមួយរដ្ឋមន្ត្រីការបរទេសចិន លោក វ៉ាង យី និង អគ្គលេខាធិការអង្គការសហប្រជាជាតិ លោក Antonio Guterres បានកោតសរសើរចិនចំពោះការប្តេជ្ញាចិត្តចំពោះពហុភាគីនិយម និងបន្តការប្តេជ្ញាចិត្តចំពោះកិច្ចសហប្រតិបត្តិការកាន់តែស៊ីជម្រៅបន្តែមទៀត។ យោងការផ្សព្វផ្សាយរបស់ក្រសួងការបរទេសចិន fmprc.gov.cn។

តាមការចុះផ្សាយរបស់បណ្តាញសារព័ត៌មានអន្តរជាតិនានា អគ្គលេខាធិការអង្គការសហប្រជាជាតិ លោក Antonio Guterres និងអគ្គលេខាធិការ SCO លោក Nurlan Yermekbayev ដែលបានចូលរួមក្នុងការជួបជុំនេះ។

មេដឹកនាំនៃបណ្តាប្រទេសនានា ត្រូវបានគេរំពឹងថានឹងចុះហត្ថលេខាលើសេចក្តីប្រកាស Tianjin និងអនុម័តយុទ្ធសាស្រ្តរយៈពេល១០ឆ្នាំ រួមជាមួយនឹងឯកសារលទ្ធផលស្តីពីសន្តិសុខ ពាណិជ្ជកម្ម ថាមពល និងកិច្ចសហប្រតិបត្តិការវប្បធម៌។

កិច្ចប្រជុំកំពូលក៏នឹងចេញសេចក្តីថ្លែងការណ៍ស្តីពីខួបលើកទី ៨០នៃការបញ្ចប់សង្គ្រាមលោកលើកទី២ និងការបង្កើតអង្គការសហប្រជាជាតិផងដែរ។

SCO បានវិវត្តន៍ចេញពីយន្តការ «Shanghai Five» ដែលរួមមានចិន រុស្ស៊ី កាហ្សាក់ស្ថាន កៀហ្ស៊ីស៊ីស្ថាន និងតាជីគីស្ថាន មុនពេលអ៊ូសបេគីស្ថានចូលជាសមាជិកទីប្រាំមួយ។ សព្វថ្ងៃនេះ វារួមបញ្ចូលទាំងរដ្ឋសមាជិកចំនួន១០ប្រទេសសង្កេតការណ៍ចំនួន២ និងដៃគូសន្ទនាចំនួន១៤ នៅទូទាំងអាស៊ី អឺរ៉ុប និងអាហ្វ្រិក។

អង្គការនេះគ្របដណ្តប់ប្រហែល ២៤ភាគរយ នៃផ្ទៃដីសកលលោក និង ៤២ភាគរយនៃចំនួនប្រជាជនពិភពលោក ដោយរដ្ឋជាសមាជិកមានចំនួនប្រហែលមួយភាគបួននៃផលិតផលក្នុងស្រុកសរុបពិភពលោក ហើយពាណិជ្ជកម្មកើនឡើងជិត ១០០ដងក្នុងរយៈពេលពីរទសវត្សរ៍៕

រ៉ាន់ រើយ

The post កិច្ចប្រជុំកំពូល SCO នៅចិន ធ្វើឲ្យផ្អៀងពិភពលោក ទប់ទល់អំណាចបស្ចឹមលោក appeared first on Kampuchea Thmey Daily.

ព័ត៌មានរដ្ឋចិន៖ ប្រធានាធិបតីចិនអះអាងពីការ គាំទ្រកម្ពុជាពេញទំហឹង

Rann Reuy — Wed, 27 Aug 2025 02:49:02 +0000

ប្រធានាធិបតីចិន លោក ស៊ី ជីនពីង (Xi Jinping) បានអះអាងចំពោះព្រះភ័ក្ត្រព្រះមហាក្សត្រកម្ពុជា ព្រះបរមនាថ នរោត្តម សីហមុនី និងសម្តេចម៉ែ នរោត្តម មុនីនាថ សីហនុ ថា ប្រទេសចិនគាំទ្រយ៉ាងមុតមាំចំពោះប្រជាជនកម្ពុជាក្នុងការដើរតាមមាគ៌ាអភិវឌ្ឍន៍ដែលសមស្របនឹងលក្ខខណ្ឌជាតិរបស់ប្រជាជាតិកម្ពុជា និងសម្រេចបាននូវសន្តិភាព និងស្ថិរភាពយូរអង្វែង សម្រាប់ជាប្រយោជន៍របស់ប្រជាជនកម្ពុជា។

ប្រធានាធិបតីចិន ស៊ី ជីនពីង និងលោកជំទាវផេង លីយ៉ន (Peng Liyuan) បានទទួលស្វាគមន៍ព្រះវត្តមារបស់ព្រះមហាក្សត្រខ្មែរ ព្រះបរមនាថ នរោត្តម សីហមុនី និងសម្តេចម៉ែ នរោត្តម មុនីនាថ សីហនុ នៅទីក្រុងប៉េកាំង។ Xinhua

ការបញ្ជាក់ជំហរបែបនេះរបស់ប្រមុខរដ្ឋចិន បានធ្វើឡើងនៅពេលដែល ប្រធានាធិបតីចិន ស៊ី ជីនពីង និងលោកជំទាវផេង លីយ៉ន (Peng Liyuan) បានទទួលស្វាគមន៍ព្រះវត្តមារបស់ព្រះមហាក្សត្រខ្មែរ ព្រះបរមនាថ នរោត្តម សីហមុនី និងសម្តេចម៉ែ នរោត្តម មុនីនាថ សីហនុ នៅទីក្រុងប៉េកាំង កាលពីល្ងាចថ្ងៃអង្គារ ក្នុងឱកាសដែលព្រះអង្គយាងទៅចូលរួមព្រឹត្តិការណ៍រំលឹកខួបលើកទី៨០នៃជ័យជំនះក្នុងសង្គ្រាមប្រជាជនចិនប្រឆាំងនឹងការឈ្លានពានរបស់ជប៉ុន និងសង្រ្គាមប្រឆាំងហ្វាស៊ីសពិភពលោក។

តាមសេចក្តីរាយការណ៍របស់សារព័ត៌មារដ្ឋ ស៊ីនហួរ (Xinhua) ប្រធានាធិធបតី ស៊ី ជីនពីង បានទូលថ្វាយព្រះមហាក្សត្រខ្មែរថា ទំនាក់ទំនងចិន-កម្ពុជា បានទប់ទល់នឹងការសាកល្បងនៃបញ្ហាអន្តរជាតិ ហើយភាគីទាំងពីរបានពង្រឹងមិត្តភាពដែកថែប ដោយការចែករំលែកភាពសុខដុមរមនា ដែលបានក្លាយជាទ្រព្យសម្បត្តិដ៏មានតម្លៃសម្រាប់ប្រជាជនទាំងពីរ និងសមនឹងទទួលបានការស្រឡាញ់រាប់អានបន្ថែមទៀតពីភាគីទាំងពីរ។

ក្នុងវរោកាសនោះ ប្រធានាធិបតីចិន បានលើកឡើងផងដែរថា ដោយប្រឈមមុខនឹងស្ថានការណ៍អន្តរជាតិដែលជាប់ពាក់ព័ន្ធទៅនឹងការផ្លាស់ប្តូរនិងភាពចលាចល ប្រទេសចិន និងកម្ពុជាគួរតែឈរជាមួយគ្នាឱ្យកាន់តែរឹងមាំ បន្តទំនាក់ទំនងមិត្តភាពជាប្រពៃណី ពង្រឹងសាមគ្គីភាព និងកិច្ចសហប្រតិបត្តិការ ពន្លឿនការកសាងសហគមន៍ចិន-កម្ពុជាដែលមានគ្រប់ទិដ្ឋភាពជាមួយនឹងអនាគតរួមគ្នាក្នុងយុគសម័យថ្មី និងនាំមកនូវផលប្រយោជន៍បន្ថែមទៀតដល់ប្រជាជនទាំងពីរ។

សារព័ត៌មានចិនស៊ីនហួរ បានស្រង់ព្រះរាជបន្ទូលរបស់ព្រះមហាក្សត្រ សីហមុនី និងមុនីនាថ ដោយព្រះអង្គទាំងទ្វេ បានមានព្រះរាជបន្ទួលថា ព្រះអង្គទាំងទ្វេរីករាយដែលបានបំពេញទស្សនកិច្ចប្រទេសចិនម្តងទៀត ហើយត្រូវបានអញ្ជើញឱ្យចូលរួមក្នុងព្រឹត្តិការណ៍រំលឹកខួបលើកទី៨០ឆ្នាំនៃជ័យជំនះក្នុងសង្រ្គាមប្រជាជនចិននៃការតស៊ូប្រឆាំងនឹងការឈ្លានពានរបស់ជប៉ុន និងសង្រ្គាមប្រឆាំងហ្វាស៊ីសពិភពលោក។

ព្រះអង្គក៏មានរាជបន្ទូលដែរថា ប្រជាជនចិនបានរួមចំណែកយ៉ាងសំខាន់ក្នុងការរក្សាសន្តិភាពពិភពលោក ដែលសមនឹងត្រូវបានចងចាំជារៀងរហូត។

ភាគីទាំងពីរបានពិភាក្សាគ្នាអំពីមិត្តភាព ពិភាក្សាអំពីកិច្ចសហប្រតិបត្តិការ និងសម្រេចបានលទ្ធផលសំខាន់ៗក្នុងអំឡុងពេលទស្សនកិច្ចផ្លូវរដ្ឋជាប្រវត្តិសាស្ត្ររបស់ប្រធានាធិបតី ស៊ី ជីនពីង មកកាន់ប្រទេសកម្ពុជាកាលពីខែមេសា។

ភាគីចិននិងកម្ពុជា បាននិយាយថា កម្ពុជាតែងតែមើលទំនាក់ទំនងទ្វេភាគីតាមទស្សនៈយុទ្ធសាស្ត្រ ហើយខ្លួនមានឆន្ទៈក្នុងការបន្តទំនាក់ទំនងមិត្តភាពជាប្រពៃណី និងរួមគ្នាកសាងសហគមន៍កម្ពុជា-ចិនគ្រប់អាកាសធាតុដែលមានអនាគតរួមគ្នាក្នុងយុគសម័យថ្មី៕

រ៉ាន់ រើយ

The post ព័ត៌មានរដ្ឋចិន៖ ប្រធានាធិបតីចិនអះអាងពីការ គាំទ្រកម្ពុជាពេញទំហឹង appeared first on Kampuchea Thmey Daily.

The Times៖ លោក ស៊ី ត្រាំ និង ពូទីន ទំនងជួបគ្នានៅទីក្រុងប៉េកាំងនៅដើមខែកញ្ញា

Rann Reuy — Sat, 19 Jul 2025 12:51:56 +0000

សារព័ត៌មានលោកខាងលិច បានរាយការណ៍ថា ប្រធានាធិបតីអាមេរិក លោក ដូណាល់ ត្រាំ (Donald Trump) អាចនឹងត្រូវជួបប្រធានាធិបតីចិន លោក ស៊ី ជីនពីង និងប្រធានាធិបតីរុស្ស៊ី លោក វ៉្លាឌីមៀរ ពូទីន នៅក្នុងទីក្រុងប៉េកាំងនៅដើមខែកញ្ញាខាងមុខនេះ។

រូបគំនូរលោក ត្រាំ លោកស៊ី និង លោក ពូទីន។ SCMP

សេចក្តីរាយការណ៍របស់កាសែត The Times បានផ្តល់ហេតុផលថា ជំនួបរបស់ប្រមុខរដ្ឋមហាអំណាចទាំង៣នៅទីក្រុងប៉េកាំង ដោយសារតែប្រទេសចិននឹងត្រូវរៀបចំការអបអរសាទរខួបទី៨០នៃការបិទបញ្ចប់សង្គ្រាមប្រឆាំងអាណានិគមជប៉ុន និងជាការបិទបញ្ចប់សង្គ្រាមលោកលើកទី២ នៅតំបន់អាស៊ីរវាងចិននិងជប៉ុន ហើយនៅពេលនោះ លោក ដូណាល់ ត្រាំ និង លោក ពូទីន នឹងត្រូវបានអញ្ជើញឲ្យទៅចូលរួមក្នុងពិធីហែក្បួនព្យុហយាត្រាយោធា។

កាសែត The Times បាននិយាយថា សង្គ្រាមពាក្យសម្តីលើកិច្ចព្រមព្រៀងពាណិជ្ជកម្មជាបន្តបន្ទាប់រវាងសហរដ្ឋអាមេរិក និងចិន បានបង្ខំឱ្យលោក ត្រាំ ពិចារណាឡើងវិញនូវគន្លងអរិភាពរបស់គាត់ចំពោះទីក្រុងប៉េកាំង ដែលបណ្តាលឱ្យមានការរំពឹងទុកអំពីការអញ្ជើញមេដឹកនាំអាមេរិកដែលអាចធ្វើទៅបានទៅកាន់រដ្ឋធានីរបស់ប្រទេសចិនសម្រាប់ព្យុហយាត្រាយោធាជាកិត្តិយសនៃខួបលើកទី ៨០នៃជ័យជំនះក្នុងសង្គ្រាមលោកលើកទីពីរនៅតំបន់អាស៊ី ដែលជាការធ្វើសង្គ្រាមរវាងចិននិងជប៉ុនដ៏ធំសម្បើម។

តាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS ជំនួយការវិមានក្រឹមឡាំងរុស្ស៊ី លោក Yury Ushakov បាននិយាយថា លោកពូទីននឹងធ្វើទស្សនកិច្ចនៅប្រទេសចិននៅចុងខែសីហា និងដើមខែកញ្ញា ដើម្បីចូលរួមក្នុងព្រឹត្តិការណ៍រំឭកខួបនៃជ័យជំនះក្នុងសង្គ្រាមលោកលើកទីពីរ។

ទោះបីជាបែបនេះក្តី អ្នកនាំពាក្យវិមានក្រឹមឡាំងបានបញ្ជាក់ដល់ព័ត៌មានរុស្ស៊ីថា លោកមិនទាន់ដឹងច្បាស់អំពីផែនការជួបគ្នាដែលត្រូវបានគេផ្សព្វផ្សាយនោះទេ។

នៅចុងខែសីហា ប្រទេសចិននឹងរៀបចំកិច្ចប្រជុំកំពូលនៃប្រទេសជាសមាជិកនៃអង្គការកិច្ចសហប្រតិបត្តិការសៀងហៃ ដែលត្រូវបានគេចាត់ទុកថា ជាណាតូប្រចាំតំបន់អាស៊ី ដែលមានបេសកកម្មពង្រឹងវិស័យយោធា និងការពារគ្នានៅក្នុងតំបន់អាស៊ីកណ្តាលដែលងាយទទួលឥទ្ធិពលពីការពង្រីកខ្លួនរបស់អង្គការណាតូនៅតំបន់កូកាស៕

រ៉ាន់ រើយ

The post The Times៖ លោក ស៊ី ត្រាំ និង ពូទីន ទំនងជួបគ្នានៅទីក្រុងប៉េកាំងនៅដើមខែកញ្ញា appeared first on Kampuchea Thmey Daily.

ចិននិងវៀតណាមបង្ហាញបំណងរួមអភិវឌ្ឍការតភ្ជាប់ផ្លូវដែក ប្រើប្រាស់ឥណទានចិន

Rann Reuy — Tue, 15 Apr 2025 09:33:26 +0000

ក្នុងជំនួបជាមួយប្រធានាធិបតីចិន លោក ស៊ី ជីនពីង (Xi Jinping) នៅទីក្រុងហាណូយកាលពីថ្ងៃទី១៤ខែមេសា នាយករដ្ឋមន្ត្រីវៀតណាម លោក ផាម មិញ ជិញ (Pham Minh Chinh) បានស្នើវៀតណាម និងចិនធ្វើការងាររួមគ្នាលើកកម្ពស់គុណភាព និងប្រសិទ្ធភាពនៃកិច្ចសហប្រតិបត្តិការ ជាពិសេសក្នុងការអភិវឌ្ឍន៍ផ្លូវដែក ដោយផ្តល់អាទិភាពដល់ការរៀបចំឥណទាន ការផ្ទេរបច្ចេកវិទ្យា និងការបណ្តុះបណ្តាលកម្លាំងពលកម្ម។

លោក ស៊ី ជីនពីង (Xi Jinping) ចាប់ដៃជាមួយនាយករដ្ឋមន្ត្រីវៀតណាម លោក ផាម មិញ ជិញ (Pham Minh Chinh) ក្នុងជំនួបនៅទីក្រុងហាណូយ។ VnEconomy

សារព័ត៌មានវៀតណាម VnEconomy បានរាយការណ៍ថា នាយករដ្ឋមន្ត្រីវៀតណាម ជិញ (Chinh) បានស្នើឱ្យមានការចុះហត្ថលេខាលើកិច្ចព្រមព្រៀងកម្ចីជំនួយអភិវឌ្ឍន៍ផ្លូវការ (ODA) ដើម្បីចាប់ផ្តើមការសាងសង់ផ្លូវដែក Lao Cai-Hanoi-Hai Phong ក្នុងឆ្នាំ២០២៥ រួមនឹងការជំរុញផ្លូវសំខាន់ៗផ្សេងទៀតដូចជា Dong Dang-Hanoi និង Mong Cai-Ha Long-Hai Phong។

លោកក៏បានអំពាវនាវឱ្យមានកំណើនពាណិជ្ជកម្មប្រកបដោយតុល្យភាព និងនិរន្តរភាព ដោយជំរុញឱ្យប្រទេសចិនជួយសម្រួលដល់ការចូលទៅកាន់ទីផ្សារកាន់តែច្រើនសម្រាប់ផលិតផលកសិកម្មវៀតណាម និងទំនិញផ្សេងៗទៀត។

នាយករដ្ឋមន្ត្រីវៀតណាម បានអំពាវនាវឱ្យមានភាពជាដៃគូបង្កើនល្បឿនក្នុងការអភិវឌ្ឍកម្លាំងផលិតភាពថ្មី ដោយផ្តោតជាចម្បងលើវិទ្យាសាស្ត្របច្ចេកវិទ្យា ការច្នៃប្រឌិត និងការផ្លាស់ប្តូរឌីជីថល។

សេចក្តីរាយការណ៍ដដែលបានលើកឡើងថា ប្រធានាធិបតីចិន លោក ស៊ី ជីនពីង បានស្នើឱ្យភាគីទាំងពីរចាប់យកឱកាសអភិវឌ្ឍន៍ផ្នែកវិទ្យាសាស្ត្រ និងបច្ចេកវិទ្យា បង្កើនភាពជិតខាងភូមិសាស្ត្ររវាងប្រទេសទាំងពីរដើម្បីទាញយកសក្តានុពលនៃកិច្ចសហប្រតិបត្តិការសេដ្ឋកិច្ច និងជំរុញយ៉ាងសកម្មយន្តការកិច្ចសហប្រតិបត្តិការផ្លូវដែក។

លោកបានអះអាងថា ប្រទេសចិនមានឆន្ទៈពង្រីកការនាំចូលកសិផលវៀតណាម និងលើកទឹកចិត្តសហគ្រាសចិនបង្កើនការវិនិយោគប្រកបដោយគុណភាពខ្ពស់នៅវៀតណាម៕

ដោយ រ៉ាន់ រើយ

ស្ថានីយរថភ្លើងនៅក្នុងប្រទេសចិន។ REUTERS

The post ចិននិងវៀតណាមបង្ហាញបំណងរួមអភិវឌ្ឍការតភ្ជាប់ផ្លូវដែក ប្រើប្រាស់ឥណទានចិន appeared first on Kampuchea Thmey Daily.

នាយករដ្ឋមន្ត្រីវៀតណាម ស្នើឲ្យចិនធ្វើការរួមគ្នាបន្ថែមទៀតអភិវឌ្ឍវិស័យអាកាសចរណ៍

Rann Reuy — Tue, 15 Apr 2025 08:58:00 +0000

នាយករដ្ឋមន្ត្រីវៀតណាម លោក ផាម មិញ ជិញ (Pham Minh Chinh) ក្នុងជំនួបជាមួយលោក He Dongfeng ប្រធានសាជីវកម្មយន្តហោះពាណិជ្ជកម្មរបស់រដ្ឋចិន (COMAC) នៅថ្ងៃទី១៤ខែមេសា បានអំពាវនាវឱ្យក្រុមហ៊ុនផលិតយន្តហោះរបស់ចិននេះ សហការជាមួយវៀតណាមក្នុងការជំរុញឧស្សាហកម្មអាកាសចរណ៍របស់ខ្លួន និងស្វែងរកឱកាសអភិវឌ្ឍន៍ក្នុងវិស័យអវកាស។

នាយករដ្ឋមន្ត្រីវៀតណាម លោក ផាម មិញ ជិញ (Pham Minh Chinh) ក្នុងជំនួបជាមួយលោក He Dongfeng ប្រធានសាជីវកម្មយន្តហោះពាណិជ្ជកម្មរបស់រដ្ឋចិន (COMAC)។ VnEconomy

ការស្នើរបស់នាយករដ្ឋមន្ត្រីវៀតណាម បានធ្វើឡើងក្នុងពេលដែល ថ្នាក់ដឹកនាំក្រុមហ៊ុនផលិតយន្តហោះរបស់ចិន COMAC បំពេញទស្សនកិច្ចការងារនៅវៀតណាម សម្រាប់ដំណើរអមប្រធានាធិបតីចិនលោក ស៊ី ជីនពីង (Xi Jinping) រយៈ២ថ្ងៃពីថ្ងៃទី១៤ដល់ថ្ងៃទី១៥ខែមេសា។

នាយករដ្ឋមន្ត្រីវៀតណាម បានសង្កត់ធ្ងន់លើការប្តេជ្ញាចិត្តរបស់វៀតណាមក្នុងការជំរុញភាពជាដៃគូជាមួយសហគ្រាសធំៗតំណាងឱ្យវិទ្យាសាស្ត្រ និងបច្ចេកវិទ្យាទំនើបរបស់ចិន។ លោកបានលើកទឹកចិត្តការវិនិយោគលើគម្រោងហេដ្ឋារចនាសម្ព័ន្ធផ្លូវថ្នល់ ផ្លូវដែក និងអាកាសចរណ៍នៅវៀតណាម។ យោងសារព័ត៌មាន VnEconomy។

រដ្ឋាភិបាលវៀតណាម រួមជាមួយនឹងក្រសួង ស្ថាប័នពាក់ព័ន្ធនានា បានត្រៀមលក្ខណៈដើម្បីជួយសម្រួលដល់ក្រុមហ៊ុនអាកាសចរណ៍ក្នុងការរៀបចំ និងប្រតិបត្តិការជើងហោះហើររវាងវៀតណាម និងប្រទេសដទៃទៀត រួមចំណែកដល់ពាណិជ្ជកម្ម ទេសចរណ៍ និងការអភិវឌ្ឍន៍សេដ្ឋកិច្ចសង្គម។ នាយករដ្ឋមន្ត្រីបានស្នើថា ក្រុមហ៊ុនសាជីវកម្ម COMAC បន្ថែមលើកិច្ចព្រមព្រៀងជួល និងជួល សហការជាមួយដៃគូវៀតណាម ដើម្បីបង្កើតមជ្ឈមណ្ឌលថែទាំ និងជួសជុលយន្តហោះនៅវៀតណាម។

ដោយសង្កត់ធ្ងន់លើនិន្នាការអាកាសចរណ៍ពិភពលោក និងសក្ដានុពលទីផ្សារ នាយករដ្ឋមន្ត្រីវៀតណាម បានស្នើថា COMAC គាំទ្រដៃគូវៀតណាមក្នុងការពង្រីកកងយន្តហោះ និងផ្លូវអាកាស។

លោកក៏បានជំរុញកិច្ចសហប្រតិបត្តិការក្នុងការផលិតគ្រឿងបន្លាស់ ផលិតយន្តហោះ អភិវឌ្ឍប្រព័ន្ធអេកូឡូស៊ីឧស្សាហកម្មអាកាសចរណ៍ បណ្តុះបណ្តាលធនធានមនុស្សប្រកបដោយគុណភាពខ្ពស់ និងស្វែងយល់ពីសក្តានុពលអវកាសរបស់វៀតណាម។ កិច្ចខិតខំប្រឹងប្រែងទាំងនេះមានគោលបំណងពង្រឹងទំនាក់ទំនងវៀតណាម-ចិនឱ្យកាន់តែរឹងមាំ និងមានប្រសិទ្ធភាព។

តាមការចុះផ្សាយនោះ ប្រធាន COMAC លោក He Dongfeng បានចែករំលែកការយល់ដឹងអំពីការរីកចម្រើនយ៉ាងឆាប់រហ័សរបស់ក្រុមហ៊ុន ដោយកត់សម្គាល់ថា ក្នុងរយៈពេលត្រឹមតែ១៧ឆ្នាំ ក្រុមហ៊ុនសាជីវកម្ម COMAC បានលេចចេញជាក្រុមហ៊ុនផលិតយន្តហោះឈានមុខគេ ដោយបម្រើដៃគូជាសកលជាច្រើន។

លោកបានសម្តែងការព្រមព្រៀងជាមួយនឹងចក្ខុវិស័យរបស់នាយករដ្ឋមន្ត្រីវៀតណាម ហើយសង្ឃឹមថានឹងមានការបន្តគាំទ្រពីថ្នាក់ដឹកនាំវៀតណាម ដើម្បីពង្រីកកិច្ចសហប្រតិបត្តិការមិនត្រឹមតែលើការដឹកជញ្ជូនតាមផ្លូវអាកាសប៉ុណ្ណោះទេ ថែមទាំងក្នុងការអភិវឌ្ឍន៍ឧស្សាហកម្មអាកាសចរណ៍របស់វៀតណាមទៀតផង៕

ដោយ រ៉ាន់ រើយ

The post នាយករដ្ឋមន្ត្រីវៀតណាម ស្នើឲ្យចិនធ្វើការរួមគ្នាបន្ថែមទៀតអភិវឌ្ឍវិស័យអាកាសចរណ៍ appeared first on Kampuchea Thmey Daily.

មិនធម្មតាទេលើកនេះ វៀតណាមស្វាគមន៍មេដឹកនាំចិន ដោយបាញ់កាំភ្លើងធំ២១ដើម

Rann Reuy — Mon, 14 Apr 2025 10:23:56 +0000

ការទទួលបដិសណ្ឋារកិច្ចប្រមុខរដ្ឋ ដោយការបាញ់កាំភ្លើងធំចំនួន២១ដើម ត្រូវបានគេចាត់ទុកជាទម្រង់បដិសណ្ឋារកិច្ចដ៏ខ្ពស់បំផុតនៃកិត្តិយសយោធា ហើយត្រូវបានរក្សាទុកសម្រាប់ឥស្សរជនដ៏ខ្ពស់បំផុត។ ប្រធានាធិបតីចិន ស៊ី ជីនពីង បានធ្វើដំណើរទស្សនកិច្ចទៅកាន់ប្រទេសចិនលើកនេះ ក្នុងពេលដ៏មានសារសំខាន់បំផុត ដែលពិភពលោកញាំញីដោយសង្ក្រាមសព្វាវុធ សង្គ្រាមពាណិជ្ជកម្ម សង្គ្រាមការទូត និងឥទ្ធិពលភូមិសាស្រ្តនយោបាយ។

ប្រទេសវៀតណាម បានទទួលបដិសណ្ឋារកិច្ចប្រធានាធិបតីចិន លោក ស៊ី ជីនពីងសម្រាប់ដំណើរទស្សនកិច្ច២ថ្ងៃ ពីថ្ងៃទិ១៤ដល់ថ្ងៃទី១៥ខែមេសានេះ ហើយ ក្នុងដំណើរទស្សនកិច្ចដែលត្រូវបានគេរំពឹងថា មានកិច្ចព្រមព្រៀងជាច្រើនរហូតដល់ជិត៥០នឹងត្រូវចុះហត្ថលេខា ដោយរាប់ចាប់តាំងពីវិស័យការពារជាតិ ពាណិជ្ជកម្ម ហេដ្ឋារចនាសម្ព័ន្ធ សន្តិសុខ ជាដើម។

ការធ្វើបដិសណ្ឋារកិច្ចដោយការបាញ់កាំភ្លើងធំចំនួន២១ដើម ត្រូវបានធ្វើឡើងនៅពេលវិមាន Thang Long ពេលដែលអគ្គលេខាធិការបក្សកម្មុយនីស្តវៀតណាម លោក To Lam ទទួលបដិសណ្ឋារកិច្ចប្រធានាធិបតីចិន លោក ស៊ី ជីនពីង ដែលជាអគ្គលេខាធិការបក្សកុម្មុយនីស្តចិនផងដែរ។

ការប្រើប្រាស់កាំភ្លើងបាញ់សម្រាប់ពិធីការទទួលបដិសណ្ឋារកិច្ចត្រូវបានកំណត់ដោយឋានៈ ឬសារៈសំខាន់នៃឥស្សរជន។ ការគោរពកាំភ្លើង ២១ដើមត្រូវបានទុកសម្រាប់ប្រមុខរដ្ឋ ខណៈមន្ត្រីជាន់ខ្ពស់ផ្សេងទៀតអាចទទួលការគោរពកាំភ្លើង ១៩ ឬ ១៧ដើម ទៅតាមកម្រិតនៃសារសំខាន់របស់ថ្នាក់ដឹកនាំរដ្ឋដែលប្រទេសសាមីទទួលស្វាគមន៍។

អគ្គលេខាធិការបក្សកម្មុយនីស្តវៀតណាម លោក To Lam។ VN Express

អគ្គលេខាធិកាគណៈកម្មាធិការមជ្ឈិមបក្សកុម្មុយនិស្តចិន និងជាប្រធានរដ្ឋចិន Xi Jinping នឹងបំពេញទស្សនកិច្ចផ្លូវរដ្ឋនៅវៀតណាមចាប់ពីថ្ងៃទី ១៤ ដល់ ១៥ មេសា។ ដំណើរទស្សនកិច្ចនេះ ធ្វើឡើងតបតាមការអញ្ជើញរបស់អគ្គលេខាបក្សកុម្មុយនិស្តវៀតណាម To Lam និងប្រធានរដ្ឋ Luong Cuong។

មេដឹកនាំកំពូលនៃប្រទេសចិននឹងត្រូវបានអមដោយ លោក Cai Qi សមាជិកនៃគណៈកម្មាធិការអចិន្ត្រៃយ៍នៃការិយាល័យនយោបាយនៃគណៈកម្មាធិការកណ្តាល CPC សមាជិកនៃលេខាធិការដ្ឋាននៃគណៈកម្មាធិការ និងជាប្រធានការិយាល័យរបស់គណៈកម្មាធិការ។ លោក Wang Yi សមាជិកការិយាល័យនយោបាយ ប្រធានការិយាល័យគណៈកម្មាធិការកណ្តាល CPC សម្រាប់កិច្ចការបរទេស និងជារដ្ឋមន្ត្រីក្រសួងការបរទេស។ លោក Wang Xiaohong រដ្ឋមន្ត្រីក្រសួងសន្តិសុខសាធារណៈ; លោក Liu Jianchao ប្រធានគណៈកម្មការទំនាក់ទំនងអន្តរជាតិនៃគណៈកម្មាធិការកណ្តាល CPC; Dong Jun រដ្ឋមន្ត្រីក្រសួងការពារជាតិ; និងមន្ត្រីផ្សេងទៀត៕

The post មិនធម្មតាទេលើកនេះ វៀតណាមស្វាគមន៍មេដឹកនាំចិន ដោយបាញ់កាំភ្លើងធំ២១ដើម appeared first on Kampuchea Thmey Daily.

Xi Jinping Archives - Kampuchea Thmey Daily

​​​​​​​​​ស្វែងយល់រាជដំណើរ​ទស្សនកិច្ច​របស់មហាក្សត្រថៃ​ទៅកាន់​មហាយក្សចិន​ពេលនេះ​​

​​​មន្ត្រី​ជាន់ខ្ពស់ អាមេរិក​-​ចិន​ ត្រៀម​ជួបគ្នា​​ផ្ទាល់​នៅ​​​ម៉ាឡេស៊ី​​​​

កិច្ច​ប្រជុំ​កំពូល SCO នៅចិន​​ ធ្វើ​ឲ្យ​​ផ្អៀង​ពិភព​លោក​ ទប់​ទល់​អំណាច​​បស្ចឹមលោក​

ព័ត៌មានរដ្ឋចិន៖ ប្រធានាធិបតីចិន​អះអាងពី​ការ​ គាំទ្រ​កម្ពុជា​ពេញទំហឹង​

​​​The Times៖ លោក ស៊ី ត្រាំ និង ​ពូទីន ទំនង​ជួប​គ្នា​នៅ​ទីក្រុង​ប៉េកាំង​នៅដើមខែកញ្ញា​

​ចិន​និង​វៀតណាម​​​​បង្ហាញ​បំណងរួម​អភិវឌ្ឍ​​​​ការ​តភ្ជាប់ផ្លូវដែក​​​​ ប្រើប្រាស់​ឥណទានចិន​​

នាយករដ្ឋមន្ត្រី​​វៀតណាម​ ស្នើ​ឲ្យ​ចិន​ធ្វើការ​​រួមគ្នា​​បន្ថែមទៀត​អភិវឌ្ឍ​​វិស័យ​​អាកាសចរណ៍​​

​មិនធម្មតាទេ​លើក​នេះ​ វៀតណាមស្វាគមន៍​មេដឹកនាំចិន ​ដោយ​បាញ់​កាំភ្លើង​ធំ​២១ដើម​​

ស្វែងយល់រាជដំណើរទស្សនកិច្ចរបស់មហាក្សត្រថៃទៅកាន់មហាយក្សចិនពេលនេះ

មន្ត្រីជាន់ខ្ពស់ អាមេរិក-ចិន ត្រៀមជួបគ្នាផ្ទាល់នៅម៉ាឡេស៊ី

កិច្ចប្រជុំកំពូល SCO នៅចិន ធ្វើឲ្យផ្អៀងពិភពលោក ទប់ទល់អំណាចបស្ចឹមលោក

ព័ត៌មានរដ្ឋចិន៖ ប្រធានាធិបតីចិនអះអាងពីការ គាំទ្រកម្ពុជាពេញទំហឹង

The Times៖ លោក ស៊ី ត្រាំ និង ពូទីន ទំនងជួបគ្នានៅទីក្រុងប៉េកាំងនៅដើមខែកញ្ញា

ចិននិងវៀតណាមបង្ហាញបំណងរួមអភិវឌ្ឍការតភ្ជាប់ផ្លូវដែក ប្រើប្រាស់ឥណទានចិន

នាយករដ្ឋមន្ត្រីវៀតណាម ស្នើឲ្យចិនធ្វើការរួមគ្នាបន្ថែមទៀតអភិវឌ្ឍវិស័យអាកាសចរណ៍

មិនធម្មតាទេលើកនេះ វៀតណាមស្វាគមន៍មេដឹកនាំចិន ដោយបាញ់កាំភ្លើងធំ២១ដើម