ថ្លែងក្នុងវេទិកាការងារ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ឯកឧត្តម យឹម ស៊ីណន រដ្ឋលេខាធិការ តំណាងដ៏ខ្ពង់ខ្ពស់របស់ លោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានមានប្រសាសន៍ថា បច្ចុប្បន្ន មានឱកាសការងាររហូតដល់ទៅជាង ៩ ម៉ឺនកន្លែងនៅទូទាំងប្រទេស ដែលក្នុងនោះ ឱកាសការងារជាង ៥ពាន់កន្លែងត្រូវបានយកមកផ្សព្វផ្សាយជូនដល់មូលដ្ឋាននៅថ្ងៃនេះ។ នាពេលបច្ចុប្បន្ន ការងាររត់រកបងប្អូនដល់ផ្ទះ ដែលមិនចាំបាច់ចំណាយទាំងពេលវេលា និងថវិកាទៅរកការងារធ្វើដូចកាលពីមុនទៀតនោះទេ។

លោក រដ្ឋលេខាធិការ បានលើកឡើងថា វេទិកាការងារនេះ គឺជាយន្តការដ៏មានប្រសិទ្ធភាព និងចំពេលវេលា ដែលផ្តល់ «ឱកាសមាស» ជូនដល់បងប្អូន ជាពិសេសអតីតពលករមកពីថៃអាចកសាងជីវភាពក្នុងប្រទេសកំណើត និងរួមចំណែកជួយកសាងសេដ្ឋកិច្ចជាតិដោយផ្ទាល់។ ឯកឧត្តមបានធ្វើការពន្យល់ដល់បងប្អូនពីការប្រឈមនៃការងារចំណាកស្រុកនៅប្រទេសថៃ ដូចជា៖ ជួបប្រទះហានិភ័យសុវត្ថិភាព ការកេងប្រវ័ញ្ចកម្លាំងពលកម្ម ការរើសអើង ខ្វះការគាំពារសុខភាព អំពើហិង្សា និងមិនអាចរស់នៅជួបជុំក្រុមគ្រួសារជាដើម។ ផ្ទុយទៅវិញ ការធ្វើការក្នុងស្រុក គឺជាជម្រើសដ៏ប្រសើរ ដែលផ្ដល់នូវសុភមង្គលក្នុងគ្រួសារ ហើយនៅពេលចូលធ្វើការតាមរោងចក្រ សហគ្រាស បងប្អូននឹងទទួលបានអត្ថប្រយោជន៍ដ៏ច្រើនពីបណ្ណ ប.ស.ស. ជាពិសេស ផ្នែកហានិភ័យការងារ ផ្នែកថែទាំសុខភាព និងផ្នែកសោធន។

លោក​បានបន្តថា ក្រៅពីបង្កើតគ្រឹះស្ថានបណ្ដុះបណ្ដាលបច្ចេកទេស និងវិជ្ជាជីវៈនៅតាមខេត្ត ក្រសួងការងារនិងបណ្តុះបណ្តាលវិជ្ជាជីវៈ ក៏បានបង្កើតថ្នាក់បណ្ដុះបណ្ដាលជំនាញតាមរថយន្តចល័ត សម្រាប់ចុះបណ្ដុះបណ្ដាលជូនប្រជាពលរដ្ឋដល់មូលដ្ឋាន ដូចជា ផ្នែកសម្ផស្ស សំណង់ ជួសជុលគ្រឿងម៉ាស៊ីន គ្រឿងអគ្គិសនី ម៉ាស៊ីនត្រជាក់ និងឆុងកាហ្វេជាដើម។ ក្រោយបញ្ចប់ការសិក្សា បងប្អូនអាចបង្កើតមុខរបរដោយខ្លួនឯង ឬក្រសួងក៏អាចជួយរកការងារឱ្យធ្វើផងដែរ។ សម្រាប់អតីតពលករដែលមានជំនាញស្រាប់ផ្នែកសំណង់ ប៉ុន្តែមិនទាន់មានវិញ្ញាបនបត្របញ្ជាក់ ក្រសួងក៏បានដាក់ឱ្យអនុវត្តការធ្វើតេស្តទទួលស្គាល់ជំនាញពីមុន (RPL) ដើម្បីឱ្យបងប្អូនទទួលបានវិញ្ញាបនបត្របញ្ជាក់ជំនាញជាផ្លូវការផងដែរ។

ដោយឡែកសម្រាប់បងប្អូនដែលមានបំណងចង់ទៅធ្វើការនៅក្រៅប្រទេស លោក​រដ្ឋលេខាធិកាបញ្ជាក់ថា ក្រសួងបានខិតខំស្វែងរកទីផ្សារការងារដែលមានស្ដង់ដាខ្ពស់ លក្ខខណ្ឌការងារល្អ និងប្រាក់ចំណូលខ្ពស់ ដូចជានៅប្រទេស ជប៉ុន កូរ៉េខាងត្បូង និងសិង្ហបុរី ជាដើម។ ចំពោះព័ត៌មានបន្ថែម សូមទាក់ទងលេខទូរស័ព្ទ Hotline ១២៩៧ សម្រាប់ព័ត៌មានពាក់ព័ន្ធនឹងឱកាសការងារ និងលេខ ១២៨៦ សម្រាប់ព័ត៌មានពាក់ព័ន្ធនឹងអត្ថប្រយោជន៍ ប.ស.ស.។ លោក​ក៏បានលើកទឹកចិត្តឱ្យបងប្អូនបន្តជួយគាំទ្រផលិតផលខ្មែរ ដើម្បីចូលរួមលើកស្ទួយសេដ្ឋកិច្ចជាតិ មោទនភាពជាតិ និងបង្កើតការងារផងដែរ។

សូមបញ្ជាក់ថា ឱកាសការងារជាង ៥ពាន់កន្លែង ដែលបានផ្ដល់ជូនក្នុងវេទិកានេះ មានការចូលរួមពីរោងចក្រ និងសហគ្រាសចំនួន ៧ រួមមាន រោងចក្រ វេនធូរ៉ា លេឌើវែរ អឹមអេហ្វវ៉ាយ (ស៊ីឌី) ឯ.ក, រោងចក្រ យូលីអ៊ីនធើណេស៊ិនណល (ខេមបូឌា) ហ្គាមេន ខូអិលធីឌី, រោងចក្រ អខេធី (ខេមបូឌា), រោងចក្រ សាន ហ្វេង (ខេមបូឌា) ខមភេនី លីមីធីត, ក្រុមហ៊ុន ថាកូ អាហ្រ្គី ព្រមទាំងក្រុមហ៊ុនជ្រើសរើសកម្លាំងពលកម្មទៅក្រៅប្រទេសចំនួន ២ គឺ ក្រុមហ៊ុន អ៊ែកស៊ល អេស៊ា យូមេន រីសសស៍ និងក្រុមហ៊ុន មីណាមី (ខេមបូឌា) អ៊ិនធើណេសិនសល សឺវីស ឯ.ក ដែលបាននាំយកឱកាសការងារនៅប្រទេសជប៉ុន មកផ្សព្វផ្សាយ និងជ្រើសរើសបុគ្គលិកដោយផ្ទាល់ផងដែរ៕

The post មន្រ្តីជាន់ខ្ពស់ក្រសួងការងារ ៖ បច្ចុប្បន្ន ការងារ និងសាលារៀន រត់រកមនុស្សដល់មូលដ្ឋាន ហើយការធ្វើការងារក្នុងស្រុកជួយកសាងសេដ្ឋកិច្ចជាតិ appeared first on Kampuchea Thmey Daily.

កម្មវិធីនេះធ្វើឡើងនៅព្រឹកថ្ងៃទី២៦ ខែមិថុនា ឆ្នាំ២០២៦ នៅសាកលវិទ្យាល័យ ប៊ែលធី អន្តរជាតិ ទីតាំងទី២ (ស្ពានអាកាសចោមចៅ) ដោយមានអ្នកចូលរួមផ្ទាល់ជាង ១,៤០០នាក់ និងចូលរួមតាមប្រព័ន្ធនិម្មិតពីទីតាំងទី១ (ទួលស្លែង) ប្រមាណ ១,៥០០នាក់។

លោក លី ណាវុឌ្ឍ សាកលវិទ្យាធិការសាកលវិទ្យាល័យ ប៊ែលធី អន្តរជាតិ បានឱ្យដឹងថា សាកលវិទ្យាល័យបច្ចុប្បន្នមាន៣ទីតាំង និងផ្តល់ការបណ្តុះបណ្តាលលើកម្មវិធីសិក្សាចាប់ពីថ្នាក់បំប៉ន រហូតដល់ថ្នាក់បណ្ឌិត ជាមួយជំនាញជាច្រើនតាមកម្មវិធីសិក្សាជាតិ និងអន្តរជាតិ។

លោកបន្តថា សាកលវិទ្យាល័យបានដាក់បញ្ចូលកម្មវិធីចែករំលែកបទពិសោធន៍ជាប្រចាំក្នុងកម្មវិធីសិក្សា ដើម្បីផ្តល់ឱកាសដល់និស្សិតក្នុងការបង្កើនចំណេះដឹង ជំនាញ សមត្ថភាព វិន័យ និងវិជ្ជាជីវៈ តាមបាវចនា «គុណភាព ប្រសិទ្ធភាព ឧត្តមភាព សីលធម៌ គុណធម៌»។

លោកបណ្ឌិត លី ឆេង ស្ថាបនិក និងអគ្គនាយក ប៊ែលធី គ្រុប បានថ្លែងអំណរគុណចំពោះសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដែលបានអនុញ្ញាតឱ្យលោកជំទាវ ឡោក ខេង អញ្ជើញចែករំលែកចំណេះដឹង និងបទពិសោធន៍ការងារជូនដល់និស្សិត និងសហគមន៍ប៊ែលធី។

ក្នុងឱកាសនោះ លោកជំទាវ ឡោក ខេង បានលើកឡើងពីតួនាទី និងភារកិច្ចរបស់គណៈកម្មការទី៨ នៃរដ្ឋសភា ដែលទទួលបន្ទុកលើវិស័យសុខាភិបាល សង្គមកិច្ច ការងារ បណ្តុះបណ្តាលវិជ្ជាជីវៈ និងកិច្ចការនារី ព្រមទាំងបង្ហាញពីតួនាទីរបស់ក្រុមសភាជាតិកម្ពុជានៃអ្នកនយោបាយសភាស្ត្រីក្នុងការលើកកម្ពស់ភាពជាអ្នកដឹកនាំរបស់ស្ត្រី។

លោកជំទាវបានផ្តល់សារលើកទឹកចិត្តដល់យុវជនឱ្យខិតខំសិក្សា បង្កើនចំណេះដឹង ពង្រឹងជំនាញ ធ្វើបច្ចុប្បន្នភាពជាមួយបច្ចេកវិទ្យាឌីជីថល និង AI ព្រមទាំងរក្សាសីលធម៌ វិន័យ និងការទទួលខុសត្រូវក្នុងសង្គម។

លោកជំទាវក៏បានសង្កត់ធ្ងន់លើសារៈសំខាន់នៃសុខភាពសាធារណៈ ដោយលើកឡើងថា សុខភាពជាមូលដ្ឋានសំខាន់សម្រាប់ការកាត់បន្ថយភាពក្រីក្រ និងជំរុញឱ្យប្រជាពលរដ្ឋយកចិត្តទុកដាក់លើការរស់នៅប្រកបដោយសុខភាពល្អ។

ជាចុងក្រោយ លោកជំទាវបានប្រគល់សៀវភៅឯកសារពាក់ព័ន្ធនឹងការងាររបស់គណៈកម្មការទី៨ និងក្រុមសភាជាតិកម្ពុជានៃអ្នកនយោបាយសភាស្ត្រី ជូនសាកលវិទ្យាល័យ ប៊ែលធី អន្តរជាតិ ដើម្បីទុកជាឯកសារសិក្សាស្រាវជ្រាវ៕

ដោយ ៖សុខា

The post លោកជំទាវ ឡោក ខេង ជំរុញយុវជនបង្កើនចំណេះដឹង និងសមត្ថភាពក្នុងយុគសម័យឌីជីថល appeared first on Kampuchea Thmey Daily.

គណ:បញ្ជាការឯកភាពខណ្ឌទួលគោក នៅថ្ងៃទី២៦ខែមិថុនា ឆ្នាំ២០២៦ បានចុះរដ្ឋបាល និងស្រង់ស្ថិតិជនបរទេសនៅតាមបុរី សណ្ឋាគារ ខុនដូ អាផាតមិន ការដ្ឋានសំណង់ អគារស្នាក់នៅរួម ផ្ទះសំណាក់ និងផ្ទះជួលបាន ៩ទីតាំង ក្នុងនោះមានជនបរទេសស្នាក់នៅសរុបចំនួន៣៥នាក់ ប៉ុន្តែពុំមានបទល្មើសOnline Scam កើតឡើងឡើយ។

តាមរបាយការណ៍របស់រដ្ឋបាលខណ្ឌទួលគោក បានឱ្យដឹងថា៖ អនុវត្តតាមអនុក្រឹត្យលេខ០៣ អនក្រ.បក ចុះថ្ងៃទី០៥ ខែមករា ឆ្នាំ២០២៦ និងបទញ្ជាលេខ០១ បប ចុះថ្ងៃទី១៤ ខែកក្កដា ឆ្នាំ២០២៥ របស់រាជរដ្ឋាភិបាល និងក្រោមការដឹកនាំរបស់លោក ឃួង ស្រេងអភិបាល នៃគណៈអភិបាលរាជធានីភ្នំពេញ នៅថ្ងៃទី២៦ ខែមិថុនា ឆ្នាំ២០២៦ លោក ជា ពិសី អភិបាល នៃគណៈអភិបាលខណ្ឌ និងជាប្រធានគណៈបញ្ជាការឯកភាពរដ្ឋបាលខណ្ឌទួលគោក បានដឹកនាំ និងប្រគល់ភារកិច្ចជូនគណៈអភិបាលខណ្ឌ ដឹកនាំកម្លាំងចុះរដ្ឋបាល និងស្រង់ស្ថិតិជនបរទេសនៅតាមបុរី សណ្ឋាគារ ខុនដូ អាផាតមិន ការដ្ឋានសំណង់ អគារស្នាក់នៅរួម ផ្ទះសំណាក់ និងផ្ទះជួល នៅតាមសង្កាត់ទាំង១០ បានចំនួន៩ទីតាំង។

ក្នុងនោះមានជនបរទេសស្នាក់នៅសរុបចំនួន៣៥នាក់ (ស្រីចំនួន ៦នាក់) និងចំនួន១៤សញ្ជាតិ មានលិខិតឆ្លងដែន និងទិដ្ឋការត្រឹមត្រូវ ពុំមានបទល្មើស Online Scam កើតឡើងឡើយ៕

ដោយ ៖ ស្រីរ័ត្ន

The post អាជ្ញាធរខណ្ឌទួលគោកចុះពិនិត្យ៩ទីតាំងរកឃើញជនបរទេស៣៥នាក់តែពុំមានបទល្មើស Online Scam appeared first on Kampuchea Thmey Daily.

លោក ផែ ច័ន្ទត្រាវុឌ្ឍ អគ្គនាយកឧស្សាហកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បាន លើកឡើងថាបច្ចុប្បន្នកម្ពុជាកំពុងស្ថិតក្នុងដំណាក់កាលដ៏សំខាន់នៃការធ្វើបរិវត្តកម្ម និងការ ធ្វើទំនើបកម្មវិស័យ ឧស្សាហកម្ម ប្រែក្លាយជាកម្លាំងចលករដ៏សំខាន់ ក្នុងការអ ភិវឌ្ឍសេដ្ឋ កិច្ចជាតិ ប្រកបដោយចីរភាព។ 

លោកថាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចូលរួមយ៉ា ងសកម្មក្នុងការជំរុញ និង ធ្វើឱ្យប្រសើរឡើង នៃរចនាសម្ព័ន្ធឧស្សាហកម្ម ពង្រឹងកិច្ចសហប្រតិ បត្តិការអន្តរជាតិ ដើម្បីទាក់ទាញ វិនិយោគគិន ដែលមានគុណភាពខ្ពស់ឱ្យ ចូលមកវិនិយោគ នៅព្រះរាជាណាចក្រកម្ពុជា។

លោកបានបន្តថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តែងតែ គាំទ្រយ៉ាងសកម្មចំពោះវេទិកា និង សកម្មភាពនានា ដែលរួមចំ ណែកដល់ការអភិវឌ្ឍវិស័ យឧស្សាហកម្មរបស់កម្ពុជា។

លោកបញ្ជាក់ថា «ខ្ញុំសូមកោតសរសើរ យ៉ាងខ្លាំងចំពោះសមាគម លើកកម្ពស់សេ ដ្ឋកិច្ចឧ ស្សាហកម្មកម្ពុជា ដែលបានខិតខំប្រឹងប្រែងយ៉ាងសកម្ម ក្នុងការជំរុញកិច្ចស ហប្រតិបត្តិកា រវិស័យឧស្សាហកម្មរវាងកម្ពុជា-ចិន។ យើងបានទទួលព័ ត៌មានថា សមាគ មគ្រោងនឹងរៀបចំ «សន្និសីទ អភិវឌ្ឍន៍ឧស្សាហកម្មកម្ពុជា និងពិព័រ ណ៍ឧស្សាហកម្មកម្ពុជា-ចិន ឆ្នាំ២០២៦ នៅថ្ងៃទី១៧ និងទី១៨ ខែកក្កដា ឆ្នាំ ២០២៦ នៅមជ្ឈមណ្ឌលសន្និបាត និងពិព័រណ៍អន្តរជាតិ កោះពេជ្រ »។

លោកបានចាត់ទុកព្រឹត្តិការណ៍នេះ គឺជាវេទិកាឧស្សាហកម្មដ៏មានសារៈសំខាន់ ដែលនឹ ងបង្កើតឱកាសសម្រាប់សហគ្រាសក្នុងការផ្លាស់ប្តូរ បទពិសោធន៍ ពង្រឹងកិច្ចសហប្រ តិបត្តិការ ជំរុញការផ្ទេរបច្ចេកវិទ្យា និងការចែគកំលែកធនធាន។ ទន្ទឹមនឹងនេះ វាក៏នឹងរួម ចំណែកលើក កម្ពស់តួនាទី និងភាពប្រកួតប្រជែងរបស់កម្ពុជា ក្នុងខ្សែសង្វាក់ ឧស្សាហកម្ម និងខ្សែសង្វាក់ផ្គ ត់ផ្គង់ក្នុងតំបន់ផងដែរ។ ក្នុងនាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សូមប្រកាសគាំទ្រ យ៉ាងពេ ញទំហឹងចំពោះ ការរៀបចំព្រឹត្តិការណ៍នេះ និងសូមលើកទឹកចិត្តដល់ សហគ្រាសទាំងក្នុង និងក្រៅប្រទេសឱ្យចូលរួម យ៉ាងសកម្ម។លោកគូសបញ្ជាក់ថា« យើងជឿជាក់ថា តាមរយៈកិច្ចសហការយ៉ាងជិតស្និទ្ធរវាងស្ថាប័នរដ្ឋ សមាគម និងការ ចូលរួមយ៉ាងទូលំទូលាយពីគ្រប់មជ្ឈដ្ឋាន ពិព័រណ៍នេះនឹងទ ទួលបានជោគ ជ័យយ៉ាងត្រចះត្រចង់ និង រួមចំណែកបង្កើតកម្លាំងជំរុញថ្មីសម្រាប់ការ អភិវឌ្ឍវិស័យឧស្សាហកម្មរបស់កម្ពុជា»។

លោកបន្ថែមថា នៅពេលខាងមុខ ក្រសួងនឹងបន្តពង្រឹងការដាក់ចេញនូវវិធានការគាំទ្រ កែលម្អបរិយាកាសធុរកិច្ច និង ជំរុញដំណើរការធ្វើទំនើបកម្មឧស្សាហកម្មឱ្យកាន់តែមានប្រសិទ្ធភាព។ យើងក៏ទន្ទឹងរង់ចាំធ្វើការជាមួយ ដៃគូជាតិ និងអន្តរជាតិបន្ថែមទៀត ដើម្បីរួមគ្នាជំរុញវិស័យឧស្សាហកម្មកម្ពុជា ឱ្យឈានទៅកាន់ ការអភិវឌ្ឍប្រកបដោយ គុណភាពខ្ពស់ និងចីរភាព។

ចំណែកលោក ហៃ ស៊ីន ប្រធានប្រតិបត្តិនៃសមាគមន៍លើកកម្ពស់សេដ្ឋកិច្ចឧស្សាហកម្មកម្ពុជាបានលើកឡើងថាសន្នីសីទអភិវឌ្ឍន៍ឧស្សាហកម្មកម្ពុជា និងពិព័រណ៍ឧស្សាហកម្មកម្ពុជាលើកទី១ ឆ្នាំ២០២៦ ជាព្រឹត្តិ ការ ណ៍ស្របយ៉ាងជិតស្នីទ្នទៅនឹងយុទ្ធសាស្ត្រឧស្សាហកម្មជាតិរបស់កម្ពុជា និងផ្តោតលើការដោះ ស្រាយបញ្ហាប្រឈមសំខាន់នៃវិស័យឧស្សាសហកម្ម ដូចជា ការខ្វះខាតឧស្សាហកម្មគាំទ្រ  កាារពឹងផ្អែកលើការនាំចូលវត្ថុធាតុដើម និងគ្រឿងចក្រ ការបែកខ្ញែងនៃធនធានឧស្សាហកម្ម និងបណ្តាញទាក់ទាញវិនិយោគនៅមានកម្រិត។ លោកបន្តថាក្រោមការណែនាំ និងគាំទ្រពីក្រសួងឧស្សាហកម្ម  វិទ្យាសាស្ត្រ បច្ចេកវិទ្យា និង នវានុវត្តន៍ សហគមន៍លោកបានផ្តូចផ្តើមរៀបចំព្រឹត្តិការណ៍ថ្នាក់ជាតិនេះក្នុងគោលបំណពង្រឹង  ខ្សែចង្វាក់ឧស្សាហកម្ម  បំពេញប្រព័ន្ធគាំទ្រផលិតកម្ម  លើកកម្ពស់វិស័យផលិតកម្មជាក់ស្តែង   និងជំរុញការអភិវឌ្ឍសេដ្ឋកិច្ចកម្ពុជា ប្រកបដោយគុណភាពខ្ពស់៕

ដោយ ៖សុខា

The post ព្រឹត្តិការណ៍ឧស្សាហកម្មកម្ពុជា-ចិន ឆ្នាំ២០២៦ នឹងបើកឱកាសថ្មីសម្រាប់វិនិយោគ និងផ្ទេរបច្ចេកវិទ្យា appeared first on Kampuchea Thmey Daily.

ភ្នំពេញ ៖  លោក ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានជួបពិភាក្សាការងារជាមួយលោកស្រី ម៉ាទីលដា បូកន័រ (Matilda Bogner) តំណាងប្រចាំប្រទេសនៃការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (OHCHR) នារសៀលថ្ងៃទី២៥ ខែមិថុនា ឆ្នាំ២០២៦ នៅទីស្តីការក្រសួង ដើម្បីស្វែងរកឱកាសពង្រឹងកិច្ចសហប្រតិបត្តិការលើវិស័យសិទ្ធិការងារ រួមមានសិទ្ធិគាំពារសង្គម សិទ្ធិពលករទេសន្តរប្រវេសន៍ សិទ្ធិការងារសម្រាប់ជនមានពិការភាព និងក្រុមជនងាយរងគ្រោះ។

នាឱកាសនោះ លោករដ្ឋមន្រ្តីបានស្វាគមន៍យ៉ាងកក់ក្តៅ និងអបអរសាទរចំពោះលោកស្រី ម៉ាទីលដា បូកន័រ ដែលទទួលបានការតែងតាំងជាអ្នកតំណាងប្រចាំប្រទេសនៃ OHCHR ប្រចាំកម្ពុជា ព្រមទាំងបានថ្លែងអំណរគុណ OHCHR ចំពោះកិច្ចសហការល្អជាមួយក្រសួងការងារនិងបណ្ដុះបណ្ដាលវិជ្ជាជីវៈ។ ទន្ទឹមនឹងនេះ កិច្ចសន្ទនាប្រកបដោយស្ថាបនា កិច្ចសហប្រតិបត្តិការបច្ចេកទេស និងគំនិតផ្តួចផ្តើមកសាងសមត្ថភាព ភាពជាដៃគូជាមួយ OHCHR ក៏បានរួមចំណែកក្នុងការពង្រឹងស្ថាប័ន លើកកម្ពស់នីតិរដ្ឋ បង្កើនការយល់ដឹងពីសិទ្ធិមនុស្ស និងគាំទ្រកិច្ចខិតខំប្រឹងប្រែងរបស់កម្ពុជាក្នុងការបំពេញកាតព្វកិច្ចសិទ្ធិមនុស្សអន្តរជាតិ ព្រមទាំងជំរុញការអភិ​វឌ្ឍប្រកបដោយចីរភាព និងបរិយាបន្នផងដែរ។

លោកបានជម្រាបជូនលោកស្រីពីវឌ្ឍនភាពក្នុងវិស័យការងារសំខាន់ៗ ជាពិសេសការពង្រឹងវិស័យទំនាក់ទំនងវិជ្ជាជីវៈ និងកិច្ចសន្ទនាសង្គម កំណើននៃអនុសញ្ញារួម អត្រាខ្ពស់នៃការដោះស្រាយវិវាទការងារដោយជោគជ័យ ការកែទម្រង់អធិការកិច្ចការងារ ការកសាងសមត្ថភាព និងកម្រិតអនុលោមភាពខ្ពស់នៃសហគ្រាស ជាពិសេសការអនុវត្តរបបសន្តិសុខសង្គម ដែលកំពុងពង្រីកវិសាលភាព កាន់តែទូលំទូលាយទាំងកម្មករនិយោជិតនៃសេដ្ឋកិច្ចក្នុងប្រព័ន្ធ និងបុគ្គលស្វ័យនិយោជន៍នៃអ្នកសេដ្ឋកិច្ចក្រៅប្រព័ន្ធ។ ក្រៅពីនេះ កម្ពុជាបន្តប្រយុទ្ធប្រឆាំងនឹងពលកម្មដោយបង្ខំ ពលកម្មកុមារ អំពើហិង្សានិងការបៀតបៀននៅកន្លែងធ្វើការ ព្រមទាំងផ្តល់អាទិភាពខ្ពស់ដល់សុវត្ថិភាព និងសុខភាពការងារ (OSH)​ តាមរយៈការពង្រឹងអធិការកិច្ចការងារ ការធ្វើទំនើបកម្មប្រព័ន្ធអនុ​លោមភាព ការរៀបចំក្របខ័ណ្ឌច្បាប់និងការអភិវឌ្ឍប្រព័ន្ធតាមដានដោយឌីជីថលសាកល្បង ដើម្បីលើកកម្ពស់សុវត្ថិភាព និងសុខភាពការងារ គ្រប់គ្រងហានិភ័យ និងតម្លាភាពក្នុងច្រវាក់ផលិតកម្ម។

លោក ហេង សួរ ក៏បានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា តាមរយៈក្រសួងការងារនិងបណ្តុះបណ្តាលវិជ្ជាជីវៈចំពោះពលករដែលវិលត្រឡប់ពីប្រទេសថៃចាប់តាំងពីពេលពួកគាត់មកដល់ច្រកព្រំដែន ដូចជា៖ ការរៀបចំមណ្ឌលសំចត ផ្តល់មធ្យោបាយធ្វើដំណើរត្រឡប់ទៅស្រុកកំណើតដោយឥតគិតថ្លៃ ផ្តល់អាហារសម្រន់ សម្រួលឯកសារអត្តសញ្ញាណកម្ម ចែកខិត្តបណ្ណពីឱកាសការងារ និងការចុះឈ្មោះស្វែងរកការងារឱ្យធ្វើក្រោមយុទ្ធនាការ “ខ្មែរជួយខ្មែររកការងារឱ្យធ្វើ” ជាដើម។ ជាមួយនឹង យុទ្ធនាការចុះឈ្មោះផ្តល់ការងារតាមប្រព័ន្ធទូរស័ព្ទ និងអនឡាញ ក្រសួងក៏កំពុងរៀបចំវេទិកាការងារដល់មូលដ្ឋាន ដោយនាំតំណាងសហគ្រាស ក្រុមហ៊ុន រោងចក្រ ទៅជួបសម្ភាសផ្តល់ការងារផ្ទាល់តែម្តង។ បន្ថែមពីនេះ ក្រសួងក៏រៀបចំកម្មវិធីអប់រំបណ្តុះបណ្តាល​ប​ច្ចេក​ទេស និងវិជ្ជាជីវៈ និងការធ្វើតេស្ដទទួលស្គាល់ជំនាញពីមុនជូនពួកគាត់ដោយមិនគិតថ្លៃផងដែរ។

ជាការឆ្លើយតប លោកស្រី ម៉ាទីលដា បូកន័រ បានថ្លែងអំណរគុណចំពោះឯកឧត្តមរដ្ឋមន្រ្តីដែលបានជម្រាបជូនពីការងារ និងគោលនយោបាយគាំទ្រដល់កម្មករនិយោជិត និងប្រជាពលរដ្ឋ ហើយបានវាយតម្លៃខ្ពស់ចំពោះវឌ្ឍនភាព និងចក្ខុវិស័យដ៏វែងឆ្ងាយរបស់ក្រសួងការងារនិងបណ្តុះបណ្តាលវិជ្ជាជីវៈ ជាពិសេសភាពរីកចម្រើននៃរបបសន្តិសុខសង្គម និងវិធានការដ៏មានប្រសិទ្ធភាពនៃការគាំទ្រដល់អតីតពលករពីប្រទេសថៃ។ លោកស្រីបានបញ្ជាក់ថា OHCHR ត្រៀមខ្លួនជានិច្ចក្នុងការបន្តកិច្ចពិភាក្សា និងការគាំទ្រដល់ក្រសួងសម្រាប់ភាពរីកចម្រើនបន្ថែមទៀតនាពេលអនាគត។

ភាគីទាំងពីរបានសម្តែងក្តីសោមនស្សរីករាយ សម្រាប់កិច្ចពិភាក្សាប្រកបដោយស្ថាបនា និងបានបញ្ជាក់ពីការប្តេជ្ញាចិត្តក្នុងការបន្តពង្រឹងនិងពង្រីកកិច្ចសហប្រតិបត្តិការឱ្យកាន់តែជិតស្និទ្ធ ដើម្បីបន្តនាំមកនូវអត្ថប្រយោជន៍ និងការអភិវឌ្ឍជាក់ស្តែងសម្រាប់ប្រជាជនកម្ពុជា៕

The post OHCHR សរសើរវឌ្ឍនភាពកម្ពុជាលើការងារ និងការគាំទ្រពលករវិលត្រឡប់ពីថៃ appeared first on Kampuchea Thmey Daily.

តាមរបាយការណ៍របស់រដ្ឋបាលខណ្ឌទួលគោក បានឱ្យដឹងថា អនុវត្តតាមអនុក្រឹត្យលេខ០៣ អនក្រ.បក ចុះថ្ងៃទី០៥ ខែមករា ឆ្នាំ២០២៦ និងបទញ្ជាលេខ០១ បប ចុះថ្ងៃទី១៤ ខែកក្កដា ឆ្នាំ២០២៥ របស់រាជរដ្ឋាភិបាល និងក្រោមការដឹកនាំរបស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ ។

នៅថ្ងៃទី២៥ខែមិថុនា ឆ្នាំ២០២៦ លោក ជា ពិសី អភិបាល នៃគណៈអភិបាលខណ្ឌ និងជាប្រធានគណៈបញ្ជាការឯកភាពរដ្ឋបាលខណ្ឌទួលគោក បានដឹកនាំ និងប្រគល់ភារកិច្ចជូនគណៈអភិបាលខណ្ឌ ដឹកនាំកម្លាំងចុះរដ្ឋបាល និងស្រង់ស្ថិតិជនបរទេសនៅតាមបុរី សណ្ឋាគារ ខុនដូ អាផាតមិន ការដ្ឋានសំណង់ អគារស្នាក់នៅរួម ផ្ទះសំណាក់ និងផ្ទះជួល នៅតាមសង្កាត់ទាំង១០ បានចំនួន ១៣ទីតាំង។

ក្នុងនោះមានជនបរទេសស្នាក់នៅសរុបចំនួន៤៤នាក់ (ស្រីចំនួន ១៧នាក់) និងចំនួន ១៤សញ្ជាតិ មានលិខិតឆ្លងដែន និងទិដ្ឋការត្រឹមត្រូវ ពុំមានបទល្មើស Online Scam កើតឡើងឡើយ៕

ដោយ ៖ ស្រីរ័ត្ន

The post អាជ្ញាធរខណ្ឌទួលគោក ចុះពិនិត្យ១៣ទីតាំងរកឃើញជនបរទេស៤៤នាក់តែពុំមានបទល្មើសOnline Scam appeared first on Kampuchea Thmey Daily.

ការជំរុញ ញបែបនេះរបស់លោក ឃួង ស្រេង បានធ្វើឡើងកាលពីរសៀលថ្ងៃទី២៤ ខែមិថុនា ឆ្នាំ២០២៦នេះ ខណៈលោក និងលោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយក នៃ អគ្គនាយកដ្ឋានពន្ធដារ អញ្ជេីញដឹកនាំកិច្ចប្រជុំនៅ សាលា រាជធានីភ្នំពេញ ស្តីពីការពិភាក្សាលេីការជំរុញ 

ការផ្តល់សេវាសាធារណៈជាពិសេស សេវាសុរិយោដី ជូន ប្រជាពលរដ្ឋក្នុង មូលដ្ឋាន រាជធានីភ្នំពេញឱ្យកាន់តែល្អប្រសើរថែមទៀត ។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា បន្ទាប់ពីស្តាប់របាយការណ៍របស់លោកប្រធានមន្ទីររៀបចំដែនដីនគរូបនីយកម្ម សំណង់និងសុរិយោដីស្តីពីវឌ្ឍនភាពនៃការផ្តល់សេវាសុរិយោដីរួចមកលោក គង់ វិបុល បានបញ្ជាក់ថា កិច្ចប្រជុំថ្ងៃនេះគឺជារឿងល្អបំផុតធ្វើ យ៉ាងណាឲ្យមន្ត្រីជំនាញពាក់ព័ន្ធអាច បន្ស៊ីការងាររបស់ខ្លូននិងពិភាក្សារិះរកមធ្យោបាយដើម្បីជំរុញការផ្តល់សេវាជូនប្រជាពលរដ្ឋបានកាន់តែល្អ ប្រសេីរ ។ ជាមួយគ្នានេះដែរលោកបានអនុញ្ញាតជូនអគ្គនាយករធ្វេីបទបង្ហាញខ្លីស្តីពីយន្តការនៃការផ្តល់ សេវាបង់ពន្ធប្រថាប់ត្រា និងការបង់ពន្ធ នានាដែលអគ្គនាយកដ្ឋានបាននឹងកំពុងអនុវត្តដោយប្រេីប្រាស់ប្រព័ន្ធបច្ចេកវិទ្យាហើយផ្តល់លទ្ធភាពជូនមន្ត្រីនិងប្រជាពលរដ្ឋអាចមេីលឃេីញពីលំហូរចរន្តនៃលិខិតស្នាម បានដោយងាយស្រួល ។

កិច្ចប្រជុំនេះដែរ លោកឃួង ស្រេងបានផ្តល់យោបល់ថាគួរមានយន្តការទំនាក់ទំនងផ្ទៃក្នុងរវាងមន្ត្រីផ្តល់សេវាទាំងភាគីអគ្គនាយកដ្ឋានពន្ធដារទាំងអង្គភាព ច្រកចេញ ចូលតែមួយនិងមន្ទីររៀបចំដែនដីនគរូបនីយកម្មសំណង់និងសុរិយោដី ដេីម្បីជំរុញនីតិវិធីផ្តល់សេវាជូនប្រជាពលរដ្ឋកាន់តែល្អប្រសេីរ ហើយការលេីកឡេីងនេះ ត្រូវបានទទួលការឯកភាពពី លោក គង់ វិបុល ផងដែរ។ 

ជាមួយ គ្នា នេះដែរ លោក ឃួង ស្រេង ក៏បានណែនាំមន្ត្រីពាក់ព័ន្ធគ្រប់ផ្នែក ត្រូវពង្រឹងការផ្ដល់សេវាសាធារណៈក្នុងភូមិសាស្រ្តរាជធានីភ្នំពេញ ឱ្យកាន់តែល្អប្រសេីរ ពិសេសការផ្ដល់សេវាសុរិយោដី និង ជំរុញផ្សព្វផ្សាយបន្ថែមពីផ្តល់សេវារដ្ឋបាលតាមប្រព័ន្ធអនឡាញ(Online) នៅអង្គភាពច្រកចេញចូលតែមួយរាជធានីភ្នំពេញផងដែរ៕

ដោយ ៖ ស្រីរ័ត្ន

The post អភិបាលរាជធានី ជំរុញឱ្យមន្ត្រីពាក់ព័ន្ធគ្រប់ផ្នែកពង្រឹងការផ្ដល់សេវាសាធារណ: ជូនពលរដ្ឋ ពិសេសសេវាសុរិយោដី appeared first on Kampuchea Thmey Daily.

ភ្នំពេញ ៖ លោក ហេង សួរ រដ្ឋមន្រ្តីក្រសួងការងារនិងបណ្ដុះបណ្ដាលវិជ្ជាជីវៈ ក្នុងនាមរាជរដ្ឋាភិបាលកម្ពុជាបានអញ្ជើញ​ជាអធិបតីក្នុងទិវាបុណ្យឯករាជ្យជាតិរដ្ឋអ៉ីស្រាអែល ដែលប្រារព្ធឡើងនាថ្ងៃពុធ ទី២៤ ខែមិថុនា ឆ្នាំ២០២៦ នៅសណ្ឋាគារ Raffles Le Royal។ ក្នុងឱកាសដ៏វិសេសវិសាលនោះ ឯកឧត្តមបានគូសបញ្ជាក់ថា ការប្រារព្ធទិវានេះ មិនត្រឹមតែជាការគោរពដល់ប្រវត្តិសាស្ត្រដ៏សម្បូរបែប បេតិកភណ្ឌវប្បធម៌ដ៏ស្ថិតស្ថេរយូរអង្វែង និងវឌ្ឍនភាព ព្រមទាំងសមិទ្ធផលដ៏អស្ចារ្យដែលរដ្ឋអ៉ីស្រាអែល សម្រេចបានក្នុងរយៈពេល ៧៨ ឆ្នាំនៃការកសាង និងអភិវឌ្ឍជាតិប៉ុណ្ណោះទេ ប៉ុន្តែថែមទាំងជាការអបអរសាទរចំណងសហប្រតិបត្តិការដ៏រឹងមាំ និងកំពុងរីកចម្រើន ដែលបានភ្ជាប់ប្រទេសកម្ពុជា-អ៉ីស្រាអែល ឱ្យកាន់តែជិតស្និទ្ធផងដែរ។

លោករដ្ឋមន្រ្តីមានប្រសាសន៍ថា ចាប់តាំងពីការស្តារឡើងវិញនូវទំនាក់ទំនងការទូតនៅឆ្នាំ១៩៩៣ មក ប្រទេសទាំងពីរបានខិតខំពង្រឹងទំនាក់ទំនងដោយឈរលើការគោរពគ្នា ផលប្រយោជន៍រួម និងចក្ខុវិស័យរួមសម្រាប់ការអភិវឌ្ឍសេដ្ឋកិច្ច និងសង្គម។ ក្នុងរយៈពេលជាច្រើនទសវត្សរ៍កន្លងមកនេះ អ៉ីស្រាអែលបានបង្ហាញពីសមត្ថភាពដ៏អស្ចារ្យក្នុងការច្នៃប្រឌិត ដោយបានបំប្លែងបញ្ហាប្រឈមទៅជាជោគជ័យ និងក្លាយជាគំរូដ៏លេចធ្លោលើពិភពលោកក្នុងវិស័យបច្ចេកវិទ្យាទំនើប កសិកម្មទំនើប និងឧត្តមភាពផ្នែកវិទ្យាសាស្ត្រ។

លោកក៏បានរំលឹកពីការសម្ពោធស្ថានកុងស៊ុលកិត្តិយសរបស់អ៉ីស្រាអែលប្រចាំកម្ពុជា កាលពីខែកុម្ភៈ ឆ្នាំ២០២៥ ដែលជាជំហានដ៏សំខាន់មួយទៀតក្នុងការពង្រឹងទំនាក់ទំនងទ្វេភាគី។ ស្ថានកុងស៊ុលកិត្តិយសនេះដើរតួនាទីជាស្ពានដ៏មានតម្លៃក្នុងការជំរុញការតភ្ជាប់កាន់តែជិតស្និទ្ធរវាងប្រជាជន វិស័យឯកជន លើកកម្ពស់កិច្ចសហប្រតិបត្តិការសេដ្ឋកិច្ច ព្រមទាំងសម្របសម្រួលឱកាសថ្មីៗសម្រាប់កិច្ចសហប្រតិបត្តិការ និងការផ្លាស់ប្តូរនានា។

លោក ហេង សួរ ក៏បានអបអរសាទរផងដែរចំពោះការចូលជាធរមាននៃកិច្ចព្រមព្រៀងរវាងប្រទេសទាំងពីរ ស្តីពីការងារបណ្តោះអាសន្នសម្រាប់ពលករកម្ពុជា ក្នុងវិស័យទីផ្សារការងារនៅអ៉ីស្រាអែល។ សមិទ្ធផលដ៏សំខាន់នេះ គឺជាព្រឹត្តិការណ៍ប្រវត្តិសាស្ត្រមួយក្នុងការវិវត្តនៃទំនាក់ទំនងកម្ពុជា-អ៉ីស្រាអែល និងឆ្លុះបញ្ចាំងពីការកើនឡើងនៃទំនុកចិត្ត និងកិច្ចសហប្រតិបត្តិការជាក់ស្តែងរវាងប្រទេសទាំងពីរ។ លើសពីការបង្កើតឱកាសការងារសម្រាប់ពលករកម្ពុជា កិច្ចព្រមព្រៀងនេះនឹងរួមចំណែកដល់ការអភិវឌ្ឍជំនាញ ការផ្ទេរចំណេះដឹង និងការពង្រឹងទំនាក់ទំនងរវាងប្រជាជននៃប្រទេសទាំងពីរ។ ខណៈកំពុងបន្តកិច្ចខិតខំប្រឹងប្រែងអភិវឌ្ឍកម្លាំងពលកម្ម ផលិតភាព និងសមត្ថភាពប្រកួតប្រជែង ដើម្បីគាំទ្រកំណើនសេដ្ឋកិច្ចប្រកបដោយចីរភាព និងបរិយាបន្ន កម្ពុជាវាយតម្លៃខ្ពស់ចំពោះកិច្ចសហប្រតិបត្តិការជាមួយអ៉ីស្រាអែល ក្នុងការលើកកម្ពស់ការអភិវឌ្ឍធនធានមនុស្ស និងពង្រីកឱកាសសម្រាប់ប្រជាជន។

លោកបានបង្ហាញពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការបន្តពង្រឹងចំណងមិត្តភាព សាមគ្គីភាព និងកិច្ចសហប្រតិបត្តិការជាមួយរដ្ឋអ៉ីស្រាអែល ឱ្យកាន់តែរឹងមាំថែមទៀត ដោយជឿជាក់ថា ចំណងមិត្តភាព និងកិច្ចសហប្រតិបត្តិការនេះ នឹងបន្តរីកចម្រើនកាន់តែស៊ីជម្រៅ ដើម្បីផ្តល់ផលប្រយោជន៍ជាក់ស្តែងដល់ប្រជាជននៃប្រទេសទាំងពីរ។

ទន្ទឹមនឹងនេះ លោកជំទាវបណ្ឌិត Alona Fisher-Kamm ឯកអគ្គរដ្ឋទូតអ៉ីស្រាអែលប្រចាំកម្ពុជាបានលើកឡើងថា អ៊ីស្រាអែល និងកម្ពុជាមានតម្លៃរួមគ្នាដ៏សំខាន់ជាច្រើន ជាពិសេសការប្តេជ្ញាចិត្តយ៉ាងមុតមាំចំពោះការអប់រំ នវានុវត្តន៍ និងភាពធន់ក្នុងការជម្នះសោកនាដកម្មនៃអំពើប្រល័យពូជសាសន៍ ដើម្បីកសាងប្រទេសជាតិឱ្យទទួលបានភាពជោគជ័យ។

លោកជំទាវមានប្រសាសន៍ថា ទំនាក់ទំនងទ្វេភាគីនៃប្រទេសទាំងពីរបានកំពុងរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះតាមរយៈកិច្ចព្រមព្រៀងសហប្រតិបត្តិការឆ្នាំ២០២៥ លើវិស័យវប្បធម៌ អប់រំ វិទ្យាសាស្ត្រ និងយុវជន។ បន្ថែមពីនេះ ការផ្តល់សច្ចាប័ននាពេលថ្មីៗនេះលើកិច្ចព្រមព្រៀងស្តីពីការងារបណ្តោះអាសន្នសម្រាប់ពលករកម្ពុជានៅអ៉ីស្រាអែល ក៏កំពុងពង្រឹងទំនាក់ទំនងទ្វេភាគីឱ្យកាន់តែស៊ីជម្រៅ ដោយបង្កើតឱកាសសម្រាប់ការងារ ការអភិវឌ្ឍជំនាញ និងការពង្រឹងទំនាក់ទំនងរវាងប្រជាជននិងប្រជាជន។

ដោយផ្អែកលើកិច្ចសហប្រតិបត្តិការជាច្រើនឆ្នាំក្នុងវិស័យជាច្រើន អ៉ីស្រាអែលនៅតែបន្តប្តេជ្ញាចិត្តធ្វើជាដៃគូដ៏សំខាន់ជាមួយកម្ពុជាក្នុងការពង្រឹង និងពង្រីកកិច្ចសហប្រតិបត្តិការឱ្យកាន់តែស៊ីជម្រៅ ដើម្បីជាផលប្រយោជន៍ និងសេចក្តីប្រាថ្នារួមនៃប្រជាជាតិទាំងពីរ៕

The post លោករដ្ឋមន្រ្តី ហេង សួរ អញ្ជើញជាអធិបតីអបអរសាទរខួបលើកទី៧៨ នៃទិវាបុណ្យឯករាជ្យជាតិរបស់រដ្ឋអ៉ីស្រាអែល appeared first on Kampuchea Thmey Daily.