ជាមួយគ្នានេះដែរ ACU បានអន្តរាគមន៍ឱ្យជួយដោះស្រាយ ៤ពាក្យប្តឹង, កសាងសំណុំរឿងបញ្ជូនទៅតុលាការ ១១សំណុំរឿង។ ដោយឡែកក្នុងខែនេះ ACU ក៏បានដំណើរការពិនិត្យ វិភាគ និងធ្វើការសម្រេចលើពាក្យប្ដឹងដែលមានក្នុងខែនេះចំនួន ៥២ពាក្យប្ដឹងផងដែរ។យោងរបាយការណ៍របស់កិតិ្តនីតិកោសលបណ្ឌិត ទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងធំពើពុករលួយ (អ.ប.ព.) បានឱ្យដឹងថា គិតទាំងការប្រកាសទ្រព្រសម្បត្តិ និងបំណុល តាមរបប ២ឆ្នាំ (១៩ ៤៧២រូប) តែងតាំងថ្មី (៣៥៣រូប) លាឈប់ ចប់អាណត្តិ (៣៣៨រូប) បញ្ឈប់ពីតំណែង (១២រូប) ចូលនិវត្តន៍ (៣៣៩រូប) សរុបអ្នកបានមកប្រកាសទ្រព្យសម្បត្តិ និងបំណុល ក្នុងឆមាសទី១ ឆ្នាំ២០២៦ មាន (២០ ៥២១រូប)។ដោយឡែកក្នុងខែនេះ

ដោយឡែកនៅក្នុងខែនេះ មន្ដ្រីចំនួន ១៦៤រូប បានមកប្រកាសទ្រព្យសម្បត្តិនិងបំណុល ក្នុងនោះមន្ដ្រីទើបទទួលបានការតែងតាំងថ្មីចំនួន ៤៩រូប និង ១១៥រូបទៀត បានមកប្រកាសទ្រព្យសម្បត្តិ និងបំណុល ដោយមូលហេតុលាឈប់ ចូលនិវត្តន៍និងចប់អាណត្តិ។

ទេសរដ្ឋមន្រ្តី ឱម យ៉ិនទៀង បានបញ្ជាក់ថា ចំពោះការងារអប់រំ ផ្សព្វផ្សាយច្បាប់ស្តីពីការប្រឆាំងអំពើពុករលួយ ក្នុងឆមាសទី១ ACU បានផ្សព្វផ្សាយតាមការធ្វើបទឧទ្ទេសនាមដោយផ្ទាល់ ជូនថ្នាក់ដឹកនាំ មន្រ្តីរាជការថ្នាក់ជាតិ ក្រោមជាតិ សិស្ស និស្សិត និងកម្មសិក្សាការីនៅមជ្ឈមណ្ឌលបណ្តុះបណ្តាលវិជ្ជាជីវៈមេធាវី និងគ្រឹះស្ថាន បណ្តុះបណ្តាលសាធារណៈចំនួន ១៤លើក ដោយមានចែកជូននូវឯកសារអប់រំ ដល់អ្នកចូលរួមចំនួន ៤២៦៤នាក់ ផ្សព្វផ្សាយតាមរយៈសោតទស្សន៍ ១៩ឃ្លីបវីដេអូ និងផ្ទាំងរូបភាពអប់រំ ៧៨ផ្ទាំងរូបភាព, ត្រៀមផែនការសម្រាប់យុទ្ធនាការចុះផ្សព្វផ្សាយទិវាជាតិ-អន្តរជាតិប្រយុទ្ធប្រឆាំងអំពើពុករលួយ ៩ធ្នូ សម្រាប់ឆ្នាំ២០២៦។

ទេសរដ្ឋមន្រ្តី ឱម យ៉ិនទៀង បានបន្តថា ការងារបង្ការ និងទប់ស្កាត់អំពើពុករលួយ ក្នុងឆមាសទី១ ACU បានចូលរួមពង្រឹងប្រសិទ្ធភាពការផ្តល់សេវាសាធារណៈ ទាំងនៅថ្នាក់ជាតិ និងថ្នាក់ក្រោមជាតិ, ចូលរួមកៀរគរចំណូលរដ្ឋ ជូនក្រសួងសេដ្ឋកិច្ច និងហិរញ្ញវត្ថុ និងក្រសួង-ស្ថាប័នផ្សេងៗ, ចុះអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាង អ.ប.ព. និងក្រុមហ៊ុន Charles River Laboratories (Cambodia) ដែលនាំឱ្យចំនួនអនុស្សរណៈសរុបកើនដល់ ១០៧។

ជាមួយគ្នានេះដែរ ទេសរដ្ឋមន្រ្តី ឱម យ៉ិនទៀង បានលើកឡើងថា ACU ចេញលិខិតព្រមាន ៧លិខិតព្រមាន, ចូលរួមសង្កេតការណ៍ការប្រឡងប្រជែងជ្រើសរើសមន្រ្តីរាជការ និងការជ្រើសរើសមន្ត្រីជាប់កិច្ចសន្យាតាមក្រសួង-ស្ថាប័នថ្នាក់ជាតិ ថ្នាក់ក្រោមជាតិ ព្រមទាំងការប្រឡងជ្រើសរើសឱ្យចូលសិក្សាតាមគ្រឹះស្ថានបណ្តុះបណ្តាលសាធារណៈចំនួន ១០លើក នៃក្រសួង-ស្ថាប័ន ចំនួន៧, បានពិនិត្យឯកសារដេញថ្លៃចំនួន ៧៤១ គម្រោង និងត្រៀមផែនការការងារសម្រាប់ចូលរួមសង្កេតការណ៍ ការប្រឡងសញ្ញាបត្រមធ្យមសិក្សាទុតិយភូមិ ក្នុងឆ្នាំ២០២៦។

សូមជម្រាបថា នៅរសៀលថ្ងៃទី២៩ ខែមិថុនា ឆ្នាំ២០២៦នេះ ក្រុមប្រឹក្សាជាតិប្រឆាំងអំពើពុករលួយ(ក.ជ.ប.ព.) បានកិច្ចប្រជុំលើកទី១១ អាណត្តិទី៤ ក្រោមអធិបតីភាពដ៏ខ្ពង់ខ្ពស់របស់សម្ដេចកិត្តិសង្គហបណ្ឌិត ម៉ែន សំអន ប្រធាន ក.ជ.ប.ព. ដើម្បីឆ្លងកំណត់ហេតុ ឆ្លង និងអនុម័តរបាយការណ៍ឆមាសទី១ ប្រចាំឆ្នាំ២០២៦ សម្រាប់គោរពជូន សម្តេចមហាបវរធិបតី នាយករដ្ឋមន្រ្តី, របាយការណ៍ក្នុងខែ របស់អង្គភាពប្រឆាំងអំពើពុករលួយ (អ.ប.ព.) និងបញ្ហាផ្សេងៗ៕

The post ក្នុងឆមាសទី១ ឆ្នាំ២០២៦ ACU ទទួលពាក្យប្តឹងចំនួន២៣៤ ក្នុងនោះញ្ជូនទៅតុលាការ ១១សំណុំរឿង appeared first on Kampuchea Thmey Daily.

គំនិតផ្ដួចផ្ដើមរបស់ ឧបនាយករដ្ឋមន្ត្រី ឧបនាយករដ្ឋមន្ត្រី ស សុខា  រដ្ឋមន្ត្រីក្រសួងមហាផ្ទៃ ស្ដីពីការបង្កើតយន្តការឱ្យមានមន្ត្រីកម្ពុជា ឡាវ និងវៀតណាម ប្រចាំការ ផ្លាស់ប្ដូរព័ត៌មាន និងសម្របសម្រួលនីតិវិធីផ្សេងៗ ពាក់ព័ន្ធការបង្ក្រាបបទល្មើស រួមទាំងបទល្មើសឆបោកតាមប្រព័ន្ធបច្ចេកវិទ្យា និងការសម្របសម្រួលនីតិវិធីអន្តោប្រវេសន៍ ត្រូវបាន ឧត្តមសេនីយ៍ឯក លឿង តាមខ្វាង រដ្ឋមន្ត្រីក្រសួងនគរបាលវៀតណាម ផ្ដល់ការគាំទ្រប្រកបដោយទំនុកចិត្តខ្ពស់។

គំនិតផ្ដួចផ្ដើម និងការបញ្ជាក់គាំទ្រនេះ បានធ្វើឡើងក្នុងឱកាស ដែល ឧត្តមសេនីយ៍ឯក លឿង តាមខ្វាង ដឹកនាំគណៈប្រតិភូជួបពិភាក្សាការងារ ជាមួយឧបនាយករដ្ឋមន្ត្រី ស សុខា នៅទីស្ដីការក្រសួងមហាផ្ទៃ នារសៀលថ្ងៃទី២៩ ខែមិថុនា ឆ្នាំ២០២៦ ក្នុងឱកាសបំពេញទស្សនកិច្ច ដើម្បីចូលរួមកិច្ចប្រជុំថ្នាក់រដ្ឋមន្ត្រី លើកទី២ កម្ពុជា-ឡាវ-វៀតណាម ដែលក្រសួងមហាផ្ទៃនៃព្រះរាជាណាចក្រកម្ពុជា ទទួលធ្វើជាម្ចាស់ផ្ទះ នៅថ្ងៃទី៣០ ខែមិថុនានេះ។

បើតាមឧបនាយករដ្ឋមន្ត្រី ស សុខា យន្តការមន្ត្រីប្រចាំការត្រីភាគីនេះ មានគោលបំណងពង្រឹង និងពង្រីកកិច្ចសហប្រតិបត្តិការផ្លាស់ប្ដូរព័ត៌មានដល់គ្នាទៅវិញទៅមក ឱ្យបានលឿនរហ័ស និងប្រកបដោយប្រសិទ្ធភាព ឆ្លើយតបបានទាន់ពេលវេលា ទៅនឹងសភាពការណ៍នៃការប្រឈមបទល្មើសជាអាទិ៍ ការផ្លាស់ប្ដូរទិន្នន័យជនបរទេសធ្លាប់ប្រព្រឹត្ត ឬពាក់ព័ន្ធនឹងបទល្មើសដែលត្រូវបានដាក់ក្នុងបញ្ជីខ្មៅហាមចូលប្រទេសនីមួយៗ និងការសម្របសម្រួលនីតិវិធីអន្តោប្រវេសន៍ ដើម្បីបញ្ជូនពលរដ្ឋឱ្យគ្នាទៅវិញទៅមក ក្រោយការរកឃើញពាក់ព័ន្ធនឹងការប្រព្រឹត្តបទល្មើសផ្សេងៗជាដើម។

ស្របគ្នានឹងការផ្លាស់ប្ដូរយោបល់ក្នុងជំនួបជាមួយរដ្ឋមន្ត្រីក្រសួងសន្តិសុខសាធារណៈឡាវដែរ  ឧបនាយករដ្ឋមន្ត្រី ស សុខា និង រដ្ឋមន្ត្រីក្រសួងនគរបាលវៀតណាម បានឯកភាពគ្នាបង្កលក្ខណៈ ឱ្យថ្នាក់ដឹកនាំ និងមន្ត្រីជាន់ខ្ពស់ ឆ្លៀតពិភាក្សា និងផ្លាស់ប្ដូរយោបល់គ្នាបន្ថែមទៀត ក្នុងឱកាសក្រៅកិច្ចប្រជុំថ្នាក់រដ្ឋមន្ត្រីលើកទី២នេះ ដោយមានជំនឿយ៉ាងមុតមាំថា យន្តការនេះនឹងលេចចេញជារូបរាង ហើយចាប់ផ្ដើមធ្វើការជាមួយគ្នាក្នុងស្មារតីសហប្រតិបត្តិការប្រកបដោយមិត្តភាព សំដៅរួមចំណែកលើកកម្ពស់ប្រសិទ្ធភាពការងារបង្ការ ទប់ស្កាត់ និងបង្ក្រាបបទល្មើស។

ក្រៅពីនេះ ប្រមុខក្រសួងមហាផ្ទៃកម្ពុជា និងក្រសួងនគរបាលវៀតណាម ក៏បានពិភាក្សា និងផ្លាស់ប្ដូរយោបល់គ្នា អំពីបទពិសោធ និងលទ្ធផល នៃការអនុវត្តយន្តការសហប្រតិបត្តិការប្រចាំឆ្នាំ ដោយបានបង្ហាញការប្ដេជ្ញាចិត្តខ្ពស់ អនុវត្តឱ្យបានសម្រេចជោគជ័យ តាមស្មារតីនៃជំនួបពិភាក្សា និងការឯកភាពគ្នា របស់ថ្នាក់ដឹកនាំកំពូលនៃប្រទេសទាំងពីរ៕

The post វៀតណាមគាំទ្រគំនិតរបស់រដ្ឋមន្ត្រីមហាផ្ទៃកម្ពុជាបង្កើតក្រុមប្រចាំការផ្លាស់ប្ដូរព័ត៌មាន និងសម្របសម្រួលនីតិវិធីពាក់ព័ន្ធការបង្ក្រាបបទល្មើស រួមទាំង Online Scam appeared first on Kampuchea Thmey Daily.

ការព្យាយាមគូសផែនទីថ្មីមួយទៀតបែបនេះ កើតឡើងបន្ទាប់ពីយោធាថៃបានឈ្លានពានកម្ពុជាចំនួន២លើកនៅក្នុងឆ្នាំ២០២៥ ប្រើប្រាស់មធ្យោបាយយោធា អាវុធយុទ្ធភ័ណ្ឌខុស​ច្បាប់ជាច្រើនប្រភេទ​ ប្រើប្រាស់កម្លាំងកែប្រែខ្សែបន្ទាត់ព្រំដែនដណ្ដើមយកប្រាសាទ និងទីតាំងមួយចំនួនដែលកម្ពុជាធ្លាប់ឈរជើង ហើយបច្ចុប្បន្ន បាននិងកំពុងបង្កើតអង្គហេតុសម្រេចនៅលើទីតាំងជាក់ស្ដែង ក្នុងទឹកដីកម្ពុជា។

រដ្ឋលេខាធិការប្រចាំការ នៃរដ្ឋលេខាធិការដ្ឋានកិច្ចការព្រំដែន លោក អ៊ិត សុត្ថា  គូសបញ្ជាក់ថា៖« ផែនទីសេរ៊ី L7017 (មាត្រដ្ឋាន១/៥០០០០)ដែលថៃបានគូសដោយឯកតោភាគី ហើយបានប្រើប្រាស់កន្លងមកដោយខុសច្បាប់ហ្នឹង គឺបានបង្ហាញថាប្រាសាទខ្នារ និងប្រាសាទតាមន្តធំ និងប្រាសាទមួយចំនួនទៀតនៅតាមបណ្ដោយព្រំដែនគឺស្ថិតនៅក្នុងទឹកដីខ្មែរ។ ហើយបច្ចុប្បន្ននេះ បើតាមខ្ញុំដឹង យោធាថៃកំពុងព្យាយាមគូសខ្សែរព្រំដែនថ្មី ដើម្បីបញ្ចូលតំបន់ដែលថៃឈ្លានពាន និងកាន់កាប់ដោយខុសច្បាប់ដាក់បញ្ចូលទៅក្នុងទឹកដីរបស់ថៃ។»។

លោក អ៊ិត សុត្ថា គូសបញ្ជាក់ថា កុំថាឡើយផែនទីថៃគូសដោយឯកតោភាគីខ្នាត១លើ៥០ពាន់  ដែលថៃបានប្រើ ទោះបីផែនទីផ្សេងទៀតដែលថៃផលិត ឬគូសជាឯកតោភាគីក៏ផែនទីទាំងនោះ គ្មានតម្លៃ ឬអានុភាពតាមផ្លូវច្បាប់នោះឡើយ។

ព្រំដែនកម្ពុជា-ថៃ គឺខ្សែព្រំដែនអន្តរជាតិត្រូវបានកំណត់រួចមកហើយតាមរយៈខណ្ឌសីមា បោះបង្គោលព្រំដែនចំនួន៧៤ ទាំងនៅឯកសារផ្លូវការរួមមាន អនុសញ្ញា សន្ធិសញ្ញា ផែនទី កំណត់ហេតុបោះបង្គោលព្រំដែន និងឯកសារផ្សេងៗដោយ អាណាព្យាបាលបារាំងតំណាងឱ្យកម្ពុជា ជាមួយភាគីសៀម ដែលជាថៃនាពេលបច្ចុប្បន្ន៕

ដោយ៖ ង៉ិល ណារ៉ាត់

The post មន្ត្រីជំនាញព្រំដែន៖យោធាថៃកំពុងព្យាយាមគូសផែនទីថ្មីដាក់បញ្ចូលតំបន់ឈ្លានពាន កាន់កាប់លើដីកម្ពុជា ទៅក្នុងទឹកដីខ្លួន appeared first on Kampuchea Thmey Daily.

តាមរយៈសេចក្ដីប្រកាសព័ត៌មានក្រសួងប្រៃសណីយ៍ និងទូរគមនាគមន៍ ចាត់ទុកការទទួលបានពានរង្វាន់នេះ ថាបង្ហាញអំពីសមិទ្ធផលប្រកបដោយផ្លែផ្កានៃការខិតខំ បង្កើតដំណោះស្រាយឌីជីថលរបស់ ក.ប.ទ. និងគណៈកម្មាធិការរដ្ឋាភិបាលឌីជីថល ដើម្បីបម្រើសេវាសាធារណៈ ឱ្យកាន់តែល្អប្រសើរ ដែលមានការទទួលស្គាល់ក្នុងក្របខណ្ឌជាតិ និងអន្តរជាតិ ព្រមទាំងធ្វើឱ្យពិភពលោកបានស្គាល់ នូវស្នាដៃរបស់កូនខ្មែរ ក្នុងការអភិវឌ្ឍបច្ចេកវិទ្យាឌីជីថល។

កាលពីឆ្នាំ២០២៣ រាជរដ្ឋាភិបាលបានសម្រេចដាក់ ឱ្យប្រើប្រាស់ថ្នាល verify.gov.kh ជាថ្នាលផ្ទៀងផ្ទាត់ឯកសាររបស់រាជរដ្ឋាភិបាល ដើម្បីលុបបំបាត់ ការក្លែងបន្លំឯកសារ ផ្ទៀងផ្ទាត់ភាពត្រឹមត្រូវនៃឯកសារ ចំណេញពេលវេលា និងកាត់បន្ថយចំណាយនានា ព្រមទាំង ជំរុញបរិវត្តកម្មឌីជីថលសេវាសាធារណៈ។ ក្រសួងប្រៃសណីយ៍អះអាងថា ខិតខំអភិវឌ្ឍថ្នាល និងកម្មវិធីរដ្ឋាភិបាលឌីជីថលជាបន្តបន្ទាប់ ដើម្បីជំរុញល្បឿនបរិវត្តកម្មរដ្ឋាភិបាលឌីជីថល។

ក្រសួងប្រៃសណីយ៍ គូសបញ្ជាក់ថា ថ្នាល verify.gov.kh ត្រូវបានធ្វើវិសិដ្ឋកម្មជាបន្តបន្ទាប់ ដែលធ្វើឱ្យផ្ទាលនេះកាន់តែមានសក្តានុពល ដោយបាន បំពាក់បច្ចេកវិទ្យាបញ្ញាសិប្បនិម្មិត មាត្រសម្បទា មានភាពបត់បែន និងភាពធន់ផ្នែកសន្តិសុខសាយប័រ ស្របតាម ឧត្តមានុវត្តន៍អន្តរជាតិ រហូតធ្វើឱ្យផ្ទាល verify.gov.kh ត្រូវបានទទួលស្គាល់ថាជាហេដ្ឋារចនាសម្ព័ន្ធសាធារណៈ ឌីជីថលទី៤ នៅលើសកលលោក និងបាននិងកំពុងចែករំលែកជាមួយបណ្តាប្រទេសមួយចំនួនផងដែរ។

នេះមិនមែនទើបជាលើកទី១ឡើយ ដែលថ្នាល verify.gov.kh របស់កម្ពុជាឈ្នះពានរង្វាន់ ពោលថ្នាលនេះ ក៏ធ្លាប់ដណ្តើមបានមេដាយមាស នៃពានរង្វាន់ ឌីជីថលអាស៊ាន ឆ្នាំ២០២៤ នៅប្រទេសសិង្ហបុរី និងពានរង្វាន់សេវាឌីជីថលឆ្នើមនៃវេទិកាកំពូលសកលស្តីពីសង្គម ព័ត៌មានវិទ្យា លើកទី២០ នៅប្រទេសស្វីសផងដែរ៕

The post ថ្នាលផ្ទៀងផ្ទាត់ឯកសារ verify.gov.kh ស្នាដៃកូនខ្មែរ ទទួលបានពានរង្វាន់សេវាសាធារណៈអង្គការសហប្រជាជាតិ​ appeared first on Kampuchea Thmey Daily.

លោក ឃាន តួក  វាយតម្លៃខ្ពស់ និងកោតសរសើរចំពោះលោក ទីវ តារារិទ្ធ ដែលបានលះបង់កម្លាំងកាយ​ កម្លាំងចិត្ត ពេលវេលា ជិះកង់ធ្វើដំណើរឆ្លងកាត់ប្រទេសចំនួន៤០ លើចម្ងាយដ៏វែងឆ្ងាយ ជួបប្រទះគ្រោះថ្នាក់ជាច្រើន  ដើម្បីកៀរគថវិកាសម្រាប់អនាគតកុមារនៅកម្ពុជា។  ប្រធានផ្នែកទំនាក់ទំនងសាធារណៈនៃមូលនិធិគន្ធបុប្ផាកម្ពុជាអំពាវនាវយុវជនកម្ពុជា យកគំរូតាមលោក ទីវ តារារិទ្ធ រួមគ្នាបង្កើតកម្មវិធីកៀរគថវិកាសង្គ្រោះកុមារកម្ពុជាដែលកំពុងសម្រាកព្យាបាលជំងឺនៅតាមមន្ទីរពេទ្យនានា។

លោក ឃាន តួក  ចាត់ទុកបេសកកម្មជិះកង់រៃអង្គាសប្រាក់សង្គ្រោះជីវិតកុមារកម្ពុជារបស់លោក ទីវ តារារិទ្ធ​ថាពិតជាមានសារៈសំខាន់ខ្លាំង ក្នុងការធានានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាទាំងនៅរាជធានីភ្នំពេញ និងនៅខេត្តសៀមរាប ដើម្បីបន្តបេសកកម្មសង្គ្រោះជីវិតទារក កុមារ និងស្ត្រីនៅកម្ពុជាបន្តទៀត។  

ក្នុងគោលដៅជិះកង់រៃអង្គាសថវិកាឱ្យបាន២៥ម៉ឺនដុល្លារ ដើម្បីជួយដល់មន្ទីរពេទ្យកុមារអង្គរ និងមន្ទីរពេទ្យគន្ធបុប្ផាសម្រាប់កិច្ចការសង្រ្គោះជីវិតកុមារកម្ពុជា  កាលពីថ្ងៃទី៦ មិថុនា ឆ្នាំ២០២៤ លោក ទីវ តារារិទ្ធិ បានជិះកង់ចេញពីមន្ទីរពេទ្យកុមារអង្គរ ខេត្តសៀមរាប ទៅកាន់ប្រទេសចំនួន៤០ លើចម្ងាយផ្លូវ៥៧០០០គីឡូម៉ែត្រ រយៈពេល៧៣០ថ្ងៃ។  

ក្នុងដំណើរផ្សងព្រេងជិះកង់ដោយប្រើកម្លាំងលើផ្លូវដ៏វែងឆ្ងាយ ឆ្លងកាត់អាកាសធាតុអាក្រក់ លោក ទីវ តារារិទ្ធិ រៀបរាប់ថា លោកជួបប្រទះស្ថានភាពអាក្រក់ជាច្រើនស្ទើរតែបណ្ដាលឱ្យបាត់បង់ជីវិត ក្នុងនោះប្រឈមនឹងគ្រោះថ្នាក់ចរាចរណ៍ក្នុងពេលធ្វើដំណើរនៅលើផ្លូវដែលមានរថយន្តបើកក្នុងល្បឿនលឿន ជួបប្រទះអាកាសធាតុត្រជាក់ខ្លាំងរហូតដល់-៤០អង្សារ ការធ្វើដំណើរឆ្លងកាត់តំបន់កងទ័ពតាលីបង់ដែលមិនគោរពច្បាប់ ក្នុងប្រទេសអាហ្គានីស្ថាន ជួបប្រទះសត្វព្រៃកាចសាហាវ។

បេសកកម្មជិះកង់ផ្សងព្រេងឆ្លងកាត់របស់លោក ទីវ តារា បានបញ្ចប់ទៅដោយមិនអាចរក​ប្រាក់បានគ្រប់២៥ម៉ឺនដុល្លារតាមផែនការលោកកំណត់មុនពេលធ្វើដំណើរឡើយ។ លោកឱ្យដឹងថា លោករៃអង្គាសប្រាក់បានជាង២១មួយម៉ឺនដុល្លារប៉ុណ្ណោះ ដូច្នេះហើយដើម្បីរៃអង្គាសប្រាក់ឱ្យគ្រប់លោកនឹងជិះកង់ពីភ្នំពេញទៅសៀមរាប ដើម្បីរៃអង្គាសប្រាក់ឱ្យគ្រប់តាមការកំណត់។ យ៉ាងណា ភ្លាមៗក្រោយបទសម្ភាសន៍ជាមួយអ្នកសារព័ត៌មានបញ្ចប់ទៅ លោក ទីវ តារារិទ្ធិ​ ទទួលបានការឧបត្ថម្ភប្រាក់ចំនួន៣ម៉ឺន៥ពាន់ដុល្លារ ពីក្រុមហ៊ុនភេសជ្ជៈមួយ ដែលការណ៍នេះ ជួយឱ្យផែនការរៃអង្គាសប្រាក់ឱ្យបាន២៥ម៉ឺនដុល្លាររបស់លោកទទួលបានជោគជ័យ។

ជាផែនការបន្ទាប់ពីការជិះកង់លើផ្លូវដ៏វែងឆ្ងាយនេះ លោក តារារិទ្ធិ​ គ្រោងផលិតភាពយន្តឯកសារ នឹងសរសេរសៀវភៅអំពីរឿងរ៉ាវអនុស្សាវរីយ៍ បទពិសោធន៍ល្វីង ជូរចត់ ការប្រឈមគ្រោះថ្នាក់ស្ទើរតែបាត់បង់ជីវិត កើតចេញពីការជិះកង់រយៈពេល២ឆ្នាំ រួចបោះពុម្ពដើម្បីរកប្រាក់បរិច្ចាគជូនមន្ទីរពេទ្យព្យាបាលកុមារបន្តទៀត។

លោក ទីវ តារារិទ្ធិ អំពាវនាវយុវជនកម្ពុជាត្រូវចេះទាញប្រយោជន៍ពីអ្វីដែលខ្លួនស្រឡាញ់ចូលចិត្ត បង្កើតជាប្រយោជន៍រួមសម្រាប់សង្គម ជាពិសេសបង្កើតព្រឹត្តិការណ៍រៃអង្គាសជួយដល់កុមារដែលកំពុងត្រូវការការសង្គ្រោះជីវិតនៅតាមមន្ទីរពេទ្យ ដោយមិនត្រូវធ្វើអ្វីតាមអំពើចិត្តខ្លួនបំពុលសង្គមឡើយ៕

ដោយ៖ ង៉ិល ណារ៉ាត់​

The post មូលនិធិគន្ធបុប្ផាអរគុណគ្រួសារលោក ទីវ តារារិទ្ធិ ដែលអនុញ្ញាតឱ្យកូនប្រុសតែមួយគត់ជិះកង់ផ្សងព្រេងរៃអង្គាស ដើម្បីជីវិតកូនអ្នកដទៃ appeared first on Kampuchea Thmey Daily.

ប្រធានកិត្តិយសមូលនិធិគន្ធបុប្ផាកម្ពុជា លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត គូសបញ្ជាក់ថា ការផ្ដល់សេវាសុខាភិបាល របស់មន្ទីរពេទ្យគន្ធបុប្ផា គឺគ្មានការរើសអើង មិនថាកូនអ្នកមាន ឬកូនអ្នក្រ ដោយក្រុមវេជ្ជបណ្ឌិត និងគ្រូពេទ្យប្រើប្រាស់ថ្នាំព្យាបាល និងការថែទាំដូចៗគ្នា។ លោកជំទាវថ្លែងដូច្នេះ នាថ្ងៃទី២៣ ខែមិថុនា ឆ្នាំ២០២៦ ក្នុងពិធីប្រគល់-ទទួលថវិកាបរិច្ចាគ ពីគណៈសង្ឃនាយក នៃព្រះរាជាណាចក្រកម្ពុជាជូនមូលនិធិគន្ធបុប្ផាកម្ពុជា។

លោកជំទាវបណ្ឌិត ពេជ ចន្ទមុន្នី គូសបញ្ជាក់បែបនេះ៖”
មន្ទីរពេទ្យគន្ធបុប្ផាផ្ទះនៅរាជធានីភ្នំពេញនិងនៅសៀមរាប
ប្រជុំទៅដោយក្រុមគ្រូពេទ្យជំនាញឯកទេសកុមារ ព្យាបាលកុមារមកពីគ្រប់ស្រទាប់វណ្ណៈ ទាំងកូនអ្នកមាន ទាំងកូនអ្នកក្រ ប្រើប្រាស់ឱសថដូចៗគ្នា គ្មានការបែងចែក និងថែទាំដោយយកចិត្តទុកដាក់ គ្មានការរើសអើងឡើយ។”។

លោកជំទាវបណ្ឌិតបន្ថែមថា នៅពេលកុមារឈឺ អាណាព្យាបាលបានបញ្ជូនកូនមកកាន់មន្ទីរពេទ្យគន្ធបុប្ផា ព្រោះមានជំនឿជាក់និងទំនុកចិត្តលើមន្ទីរពេទ្យមួយនេះ។

គូរគូសបញ្ជាក់ថា ក្នុងមួយឆ្នាំៗ មន្ទីរពេទ្យគន្ធបុប្ផា ទាំងនៅរាជធានីភ្នំពេញ និងនៅខេត្តសៀមរាប ត្រូវការថវិកាចំនួនប្រមាណ ៤៥ លានដុល្លារអាម៉េរិក ឬ ជាង ១២ ម៉ឺនដុល្លារអារម៉េរិក ក្នុងមួយថ្ងៃៗ ដើម្បីបំពេញបេសកកម្មសង្រ្គោះជីវិតទារក និងកុមារ ក៏ដូចជាការផ្ដល់សេវាសម្ភពនេះ។

ប្រធានកិត្តិយសនៃមូលនិធិគន្ធបុប្ផាកម្ពុជា ចាត់ទុកការបរិច្ចាគរបស់សប្បុរសជនចូលមូលនិធិគន្ធបុប្ផាកម្ពុជា ការពិតជាមានតម្លៃខ្លាំងណាស់ក្នុងការធានានិរន្តរភាពរបស់មន្ទីរពេទ្យ ដើម្បីបន្តបេសកកម្មសង្គ្រោះជីវិតកុមារកម្ពុជា៕

The post ស្រ្តីទីមួយ៖មន្ទីរពេទ្យគន្ធបុប្ផាព្យាបាល ថែទាំកុមារដោយគ្មានការរើសអើង ប្រើឱសថដូចៗគ្នា ទោះបីកូនអ្នកមាន ឬកូនអ្នកក្រ appeared first on Kampuchea Thmey Daily.

ថ្លែងក្នុងពិធីប្រគល់-ទទួលថវិកា លោកជំទាវបណ្ឌិត ពេជ ចន្ទមុន្ទី សូមអរព្រះគុណ «សម្តេចព្រះមហាសុមេធាធិបតី អំ លីមហេង សម្តេចព្រះសង្ឃនាយកគណៈមហានិកាយ នៃព្រះរាជាណាចក្រកម្ពុជា» ព្រមទាំងសម្តេច ព្រះរាជាគណៈ ព្រះមេគណ ព្រះអនុគណ ព្រះមន្ត្រីសង្ឃ ព្រះចៅអធិការ ព្រះថេរានុត្ថេរៈគ្រប់ព្រះអង្គ នៃគណៈសង្ឃនាយកនៃព្រះរាជាណាចក្រកម្ពុជា ចំពោះព្រះរាជអំណោយដ៏ខ្ពង់ខ្ពស់ជាបច្ច័យចំនួន ១៦០លានរៀល ប្រគល់ជូនមូលនិធិគន្ធបុប្ផាកម្ពុជា ដើម្បីឱ្យមន្ទីរពេទ្យគន្ធបុប្ផាបន្តបេសកកម្មជួយសង្គ្រោះអាយុជីវិត រួមទាំងផ្តល់នូវក្តីសង្ឃឹមវិជ្ជមាន ស្នាមញញឹម និងអនាគតយ៉ាងត្រចះត្រចង់ដល់កុមារកម្ពុជា ព្រមទាំងមហាគ្រួសារខ្មែរទាំងអស់។

បន្ថែមពីនេះ លោកជំទាវបណ្ឌិត ក៏បានអំពាវនាវដល់សប្បុរសជនទាំងអស់មេត្តាបន្តគាំទ្រ ចូលរួម និងបរិច្ចាគដល់មូលនិធិគន្ធបុប្ផាកម្ពុជា ពិសេស យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៦ ដែលជាចលនាកៀរគរមូលនិធិដើម្បីទ្រទ្រង់ដល់បេសកកម្មពិនិត្យព្យាបាលរបស់មន្ទីរពេទ្យគន្ធបុប្ផាភ្នំពេញ និងមន្ទីរពេទ្យគន្ធបុប្ផាសៀមរាប ជូនដល់ទារក កុមារ ស្ត្រីមានផ្ទៃពោះ ហើយក៏ជាព្រឹត្តិការណ៍ប្រចាំឆ្នាំដ៏ធំមួយ ក្នុងចំណោមព្រឹត្តិការណ៍សំខាន់ៗដទៃទៀត ក្នុងស្មារតីខ្មែរជួយខ្មែរដើម្បីអនាគតប្រទេសកម្ពុជាទាំងមូលផងដែរ។​

គូរគូសបញ្ជាក់ថា ក្នុងមួយឆ្នាំៗ មន្ទីរពេទ្យគន្ធបុប្ផា ទាំងនៅរាជធានីភ្នំពេញ និងនៅខេត្តសៀមរាប ត្រូវការថវិកាចំនួនប្រមាណ ៤៥ លានដុល្លារអាម៉េរិក ឬ ជាង ១២ ម៉ឺនដុល្លារអារម៉េរិក ក្នុងមួយថ្ងៃៗ ដើម្បីបំពេញបេសកកម្មសង្រ្គោះជីវិតទារក និងកុមារ ក៏ដូចជាការផ្ដល់សេវាសម្ភពជាង១លានករណីក្នុង១ឆ្នាំ៕

The post លោកជំទាវ ពេជ ចន្ទមុន្នី អញ្ជើញទទួលបច្ច័យបរិច្ចាគចំនួន១៦០លានរៀលពីគណៈសង្ឃនាយកនៃកម្ពុជាជូនមូលនិធិគន្ធបុប្ផាកម្ពុជា appeared first on Kampuchea Thmey Daily.

ក្នុងដំណើរការនៃការចុះធ្វើជំរឿនមន្ត្រីជាក់ស្តែងនេះ មានការអញ្ជើញចូលរួមធ្វើជំរឿនដោយផ្ទាល់ពី ឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ព្រមទាំងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ បានចូលរួមសហការយ៉ាងសកម្ម ដោយបានមកបង្ហាញខ្លួនផ្ទាល់ និងភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែនកម្ពុជាច្បាប់ដើម ទៅតាមការកំណត់របស់គណៈកម្មការជំរឿន។

​លោក សុខ សង្វារ រដ្ឋលេខាធិការក្រសួងមុខងារសាធារណៈ និងជាប្រធានក្រុមការងារជំរឿនមន្រ្តីជាក់ស្ដែងនៃក្រសួងរៀបចំដែនដី អះអាងថា ដំណើរការជំរឿននេះ ធ្វើឡើងរយៈពេល២ថ្ងៃលើមន្ត្រីជាង១ពាន់នាក់ ជាពេលវេលាមួយដ៏សមស្រប ដើម្បីធានាសង្គតិភាពទិន្នន័យ និងធានាមិនឱ្យមានកំហុសបច្ចេកទេស និងមិនរំខានដល់ដំណើរការងាររបស់ក្រសួងរៀបចំដែនដី។

លោក សុខ សង្វារ​ សង្កត់ធ្ងន់ដូច្នេះ៖« យើងគ្រោងចំណាយពេល២ថ្ងៃ ក្នុងការធ្វើជំរឿនលើចំនួនមន្ត្រីរង្វង់ជាង១ពាន់នាក់នេះ ដែលជាពេលវេលាមួយមិនយូរពេក ហើយមិនលឿនពេក ពីព្រោះបើធ្វើជំរឿនលឿនពេក អាចបណ្ដាលឱ្យមានកំហុសបច្ចេកទេស។ អ៊ីចឹងយើងចង់ធ្វើជំរឿនមួយ កុំឱ្យលឿនពេក ធ្វើជំរឿនក្នុងពេលវេលាមួយដែលគ្រប់គ្រាន់ ដើម្បីធានានូវសង្គតិភាពទិន្នន័យមន្ត្រី ប៉ុន្តែមិនធ្វើជំរឿនយូរពេករហូតរំខានការងាររបស់មន្ត្រីក្រសួង។»។

លោក សុខ សង្វារ បន្ថែមថា ក្រោយដំណើរជំរឿនបញ្ចប់ទៅ គណៈកម្មការ នឹងផ្ទៀងផ្ទាត់ទិន្នន័យមន្ត្រីឱ្យបានច្បាស់លាស់ រៀបចំរបាយការណ៍រួមរវាងក្រសួងមុខងារសាធារណៈ និងក្រសួងរៀបចំដែនដី ដើម្បីទទួលស្គាល់ទិន្នន័យដែលបានពីជំរឿន រៀបចំរបាយការណ៍ទៅលេខាធិការដ្ឋានគណៈកម្មការជំរឿន សម្រាប់ជាមូលដ្ឋានជូនឧបនាយករដ្ឋមន្ត្រី ហ៊ុន ម៉ានី ធ្វើជារបាយការណ៍សម្រេចជូនទៅសម្ដេច ហ៊ុន ម៉ាណែត នាយករដ្ឋមន្ត្រីកម្ពុជា។

រដ្ឋលេខាធិការក្រសួងរៀបចំដែន លោក រស់ សាលីន ឱ្យដឹងថា មន្ត្រីក្រសួងដែលចូលរួមធ្វើជំរឿននាពេលនេះ គឺមានចំនួន១១៣៥រូប។ មន្ត្រីជាន់ខ្ពស់ក្រសួងរៀបចំដែនដីរូបនេះ រំពឹងថា ក្រសួងរៀបចំដែនដី នឹងទទួលបានទិន្នន័យមន្ត្រីកាន់តែលម្អិតបន្ថែមទៀតពីការធ្វើជំរឿននេះ សម្រាប់យកទៅរៀបចំផែនការផ្សេងៗ និងដើម្បីប្រើឱ្យបំពេញការងារឱ្យចំគោលដៅ និងមានលទ្ធផលល្អ។

លោក រស់ សាលីន សង្កត់ធ្ងន់ថា៖«ការធ្វើជំរឿននេះ យើងអាចបានព័ត៌មានកាន់តែលម្អិត បច្ចុប្បន្នភាពបន្ថែមទៀត ទី១លើចំនួនមន្ត្រី ទី២កម្រិតនៃគុណវុឌ្ឍិមន្ត្រី ទី៣កម្រិតជំនាញរបស់មន្ត្រី ដើម្បីងាយស្រួលធ្វើផែនការបណ្ដុះបណ្ដាលទៅថ្ងៃអនាគត ការប្រើប្រាស់មន្ត្រីឱ្យស្របតាមរចនាសម្ព័ន្ធ ហើយការប្រើប្រាស់មន្ត្រីអាចបំពេញមុខងារស្នូលរបស់ក្រសួងបានកាន់តែមានប្រសិទ្ធភាពខ្ពស់។»។

ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែង ធ្វើឡើងដើម្បីទទួលបានទិន្នន័យច្បាស់លាស់ ឯកភាពគ្នា និងប្រើប្រាស់បានរួមគ្នា។ ការជំរឿនមន្ត្រី ធ្លាប់បានធ្វើឡើង ចំនួន៣លើករួចមក កាលណោះលើកទី១ ធ្វើនៅឆ្នាំ១៩៩៥ ទី២ ធ្វើនៅឆ្នាំ១៩៩៩ និងទី៣ ធ្វើនៅឆ្នាំ២០១០៕

The post គណៈកម្មការចាប់ផ្ដើមចាប់ផ្តើមជំរឿនមន្ត្រីជាក់ស្ដែងនៅក្រសួងរៀបចំដែនដី appeared first on Kampuchea Thmey Daily.