ការលើកឡើងនេះត្រូវបានលោក រដ្ឋ សារ៉ាវុធ រដ្ឋលេខាធិការ នៃក្រសួងពាណិជ្ជកម្ម​ ក្នុងជំនួប​ពិភាក្សាការងារជាមួយ លោក Fahd Al-Dosari ប្រធានផ្នែកទំនាក់ទំនង និងជាទីប្រឹក្សាពិសេសនៃ Sheikh Mansour bin Jabor Al Thani និងគណៈប្រតិភូនៃក្រុមហ៊ុន AI MANSOUR HOLDING (AMH) នៅថ្ងៃទី២២ ខែកក្កដា ឆ្នាំ២០២៥ នេះ លោកបាន​លើក​ឡើងអំពីកិច្ចសហប្រតិបត្តិការពាណិជ្ជកម្មទ្វេភាគីរវាងកម្ពុជា-កាតា និង​ការ​អភិវឌ្ឍគោលនយោបាយសម្រាប់ផលិតផលកសិកម្មសំខាន់ៗ ព្រមទាំង​កិច្ចសម្រួល​ពាណិជ្ជកម្ម និងវិនិយោគនៅកម្ពុជា តាមរយៈ​ការផ្តល់​ការលើក​ទឹកចិត្ត​ផ្នែកពន្ធដារ​សម្រាប់​គម្រោង​ដែលមាន​លក្ខណៈ​សម្បត្តិ​គ្រប់គ្រាន់ និង​ការរៀបចំ​ប្រព័ន្ធស្វ័យប្រវត្តកម្ម និងធ្វើសាមញ្ញកម្មនៃនីតិវិធីចុះបញ្ជីពាណិជ្ជកម្ម និងនាំចេញ។

ទន្ទឹមនឹងការចាប់អារម្មណ៍ខ្ពស់របស់ក្រុមហ៊ុន AMH ក្នុងការវិនិយោគនៅកម្ពុជា រដ្ឋលេខាធិការ​ក្រសួង​ពាណិជ្ជកម្ម​រូប​នេះ​ ក៏​បានសំណូមពរឱ្យក្រុមហ៊ុន​វិនិយោគលើការកែច្នៃម្ហូបអាហារ ដើម្បីបម្រើទីផ្សារក្នុងស្រុក និង​ធ្វើការនាំចេញ តាមរយៈការចាប់ដៃគូសហការជាមួយបណ្តាក្រុមហ៊ុនក្នុងស្រុក។

លោក​ បានលើកទឹកចិត្តឱ្យក្រុមហ៊ុន AMH ធ្វើការបណ្តាក់ទុនលើផលិតផលកសិកម្មរបស់កម្ពុជា ដើម្បីបង្កើនការនាំចេញ និងទំហំពាណិជ្ជកម្មទ្វេភាគី ព្រមទាំង​បន្តពង្រឹង និងពង្រីក​កិច្ចសហប្រតិបត្តិការ​លើ​វិស័យ​ថាមវ័ន្ត ដែល​រួមមាន វិស័យថាមពល ទេសចរណ៍ និងហិរញវត្ថុ នៃប្រទេសកម្ពុជានិងកាតា ផងដែរ។

ជំនួប​នេះ​ត្រូវ​បាន​ធ្វើ​ឡើង​ដើម្បីពិភាក្សាអំពីកាលានុវត្តភាពធុរកិច្ច និងវិនិយោគ​លើផលិតផល​កសិកម្ម​សក្តានុពល​របស់កម្ពុជា រួមមាន អង្ករ ស្វាយចន្ទី ដំឡូងមី និងកៅស៊ូជាដើម ដែលជួយបង្កើន​ការនាំចេញ​ទៅកាន់​ទីផ្សារ​ប្រទេសកាតា  និងប​ណ្តាប្រទេសដទៃទៀតនៅតំបន់មជ្ឈិមបូព៌ា ទ្វីបអឺរ៉ុប និងពិភពលោក៕

The post កម្ពុជា លើកទឹកចិត្តឱ្យកាតា បណ្តាក់ទុនលើវិស័យកសិកម្មរបស់កម្ពុជា ដើម្បីបង្កើនការនាំចេញ appeared first on Kampuchea Thmey Daily.

ក្នុងជំនួបកាលពីថ្ងៃទី១០ ខែធ្នូ ឆ្នាំ២០២៤ នៅវិមានរដ្ឋសភា រាជធានីដូហា សម្តេចតេជោ ហ៊ុន សែន ប្រធានព្រឹទ្ធសភា កម្ពុជា និងលោក ហាសាន់ ប៊ីន អាបឌុលឡា អាល-ហ្កានីម ប្រធានសភានៃរដ្ឋកាតា បានជជែកគ្នាអំពីការជំរុញទំនាក់ទំនង និងកិច្ចសហប្រតិបត្តិការសភារវាងប្រទេសទាំងពីរ ក៏ដូចជាការផ្លាស់ប្តូរយោបល់គ្នាលើស្ថានការណ៍បច្ចុប្បន្នរបស់តំបន់ និងពិភពលោក ដែលកំពុងវិវត្តគួរឱ្យព្រួយបារម្ភ។ ថ្នាក់ដឹកនាំទាំងពីរ ក៏បានបង្ហាញការយល់ឃើញដូចគ្នាចំពោះតួនាទីដ៏សំខាន់របស់សភាក្នុងការដោះស្រាយបញ្ហាតំបន់ និងពិភពលោក។

ប្រធានសភាកាតា បានលើកជាយោបល់ឱ្យមានកិច្ចប្រជុំកំពូលសភាមួយ ដើម្បីពង្រឹងទំនាក់ទំនង និងកិច្ចសហប្រតិបត្តិការឱ្យប្រសើរឡើង ខណៈលោកកត់សម្គាល់ឃើញថា ទំនាក់ទំនង និងកិច្ចសហប្រតិបត្តិការសភានៃបណ្ដាប្រទេសជាមិត្តនៅអាស៊ីមិនទាន់មានភាពរឹងមាំនៅឡើយ។ ក្នុងន័យនេះ ប្រធានសភាកាតា នឹងធ្វើការជាមួយសម្តេចតេជោ ហ៊ុន សែន លើកិច្ចការនេះ។

ប្រធានសភាកាតា បញ្ជាក់ប្រាប់សម្ដេចតេជោ ថា កាតាមានតួនាទីសំខាន់នៅក្នុងតំបន់ និងពិភពលោក ហើយកាតាបានចូលរួមចំណែកយ៉ាងសកម្មក្នុងការសម្របសម្រួល ដើម្បីឱ្យមានដំណោះស្រាយបញ្ហាអន្តរជាតិ ដូចជា បញ្ហាអ៊ុយក្រែន ប៉ាឡេស្ទីន និងអាហ្វានីស្ថាន ជាដើម។ ទន្ទឹមការបញ្ជាក់នេះ លោក ក៏បានកោតសរសើរចំពោះជំហរអព្យាក្រឹត្យរបស់កម្ពុជា ទៅលើបញ្ហាប៉ាឡេស្ទីន ហើយលោក យល់ថា បណ្តាសភានៅក្នុងសកលលោក ដែលស្រឡាញ់សន្តិភាព គប្បីរួមដៃគ្នាដោះស្រាយបញ្ហាទាំងនេះ ក្នុងផលប្រយោជន៍សន្តិភាព និងប្រជាជន។

សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានទទួលស្គាល់ដោយការពេញចិត្ត និងវាយតម្លៃខ្ពស់តួនាទីរបស់កាតានៅលើឆាកអន្តរជាតិ ដោយសម្តេច បានបញ្ជាក់ថា ជំហររបស់កាតា និងកម្ពុជាលើបញ្ហាអន្តរជាតិ និងតំបន់ មិនខុសគ្នាទេ។ សម្តេចតេជោ សង្កត់ធ្ងន់ថា ទោះបីប្រទេសយើងជាប្រទេសតូចយ៉ាងណាក៏ដោយ យើងត្រូវចូលរួមចំណែកក្នុងការដោះស្រាយបញ្ហាតំបន់ និងអន្តរជាតិ។ សម្ដេច បានប្រាប់ប្រធានសភាកាតា ថា កម្ពុជា បានចូលរួមក្នុងប្រតិបត្តិការរក្សាសន្តិភាពក្រោមឆត្រអង្គការសហប្រជាជាតិយ៉ាងសកម្ម ដោយបានបញ្ជូនកម្លាំងទៅតាមបណ្ដាប្រទេសជាច្រើននៅលើពិភពលោក រហូតមកទល់នឹងពេលបច្ចុប្បន្ន។

ចំពោះការលើកឡើងពីកិច្ចប្រជុំអន្តរជាតិសភារបស់លោកប្រធានសភាកាតា សម្តេចតេជោ បានបញ្ជាក់ថា កម្ពុជា បានរៀបចំសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱន និងសន្តិភាព (IPTP) កាលពីរសប្តាហ៍កន្លងទៅនេះ ក្នុងនោះ ថែមទាំងបានអនុម័តធម្មនុញសន្តិភាពសកលលោក ដែលបើកចំហរសម្រាប់សភាផ្សេងៗទៀតចូលជាសមាជិកផងដែរ។ សម្តេច បន្ថែមថា ក្នុងនាមសភាកាតា លោកអាចផ្តួចផ្តើមគំនិតបង្កើតកិច្ចប្រជុំសភាអាស៊ីមួយ ហើយកម្ពុជាពេញចិត្តចូលរួមដើម្បីដោះស្រាយបញ្ហាតំបន់ និងសកល។ សម្តេច ថា សម្លេងរបស់សភារួមគ្នា អាចរួមសម្លេងជាមួយរដ្ឋាភិបាល នៅអង្គការសហប្រជាជាតិ បើទោះបីជាសម្លេងស្រាល តែប្រសើរជាងមិនបានធ្វើអ្វីទាំងអស់។

ឆ្លើយតបការលើកឡើងរបស់សម្ដេចតេជោ, លោកប្រធានសភាកាតា យល់ស្របថា ធម្មនុញសន្តិភាពសកលលោកមានសារៈសំខាន់យ៉ាងខ្លាំងក្នុងការពង្រីកទំនាក់ទំនងសភា និងអ្នកស្រឡាញ់សន្តិភាព ហើយលោក នឹងធ្វើការជាមួយកម្ពុជាដើម្បីសន្តិភាពពិភពលោកប្រឆាំងសង្គ្រាម៕

The post ប្រធានសភាកាតា គាំទ្រធម្មនុញ្ញសន្តិភាព ហើយប្រកាសធ្វើការជាមួយកម្ពុជាក្នុងបុព្វហេតុសន្តិភាពសកល   appeared first on Kampuchea Thmey Daily.

ក្នុងឱកាសទទួលជួបជាមួយរដ្ឋមន្ត្រីក្រសួងពាណិជ្ជកម្ម និងឧស្សាហកម្ម និងថ្នាក់ដឹកនាំអាជ្ញាធរវិនិយោគនៃរដ្ឋកាតា នារសៀលថ្ងៃទី១០ ខែធ្នូ ឆ្នាំ២០២៤ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានប្រាប់រដ្ឋមន្ត្រីកាតារូបនេះ អំពីសក្តានុពលខាងវិស័យកសិកម្មរបស់កម្ពុជា ជាពិសេស ស្រូវ គ្រាប់ស្វាយចន្ទី ដំឡូងមី និងផលិតផលកសិកម្មជាច្រើនទៀត ដែលផ្តល់ឱកាសដល់វិនិយោគិនពីកាតាក្នុងការកែច្នៃ ដើម្បីនាំចេញមកប្រទេសកាតា និងប្រទេសនានាក្នុងតំបន់ និងពិភពលោក។

ក្នុងន័យនេះ ដើម្បីពង្រឹងពង្រីកកិច្ចសហប្រតិបត្តិការទ្វេភាគីក្នុងវិស័យសេដ្ឋកិច្ច ពាណិជ្ជកម្ម និងវិនិយោគ សម្ដេចតេជោ សែន សែន បានលើកឡើងថា ឯកសារសំខាន់ពីរ រួមមាន កិច្ចព្រមព្រៀងស្តីពីការជំរុញនិងការការពារវិនិយោគទៅវិញទៅមក និងកិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងបច្ចេកទេស គួរត្រូវបានចុះហត្ថលេខាឱ្យបានឆាប់នាពេលដ៏ខ្លីខាងមុខ។

ជាការឆ្លើយតប លោក Sheikh Faisal bin Thani bin Faisal Al Thani រដ្ឋមន្ត្រីក្រសួងពាណិជ្ជកម្ម និងឧស្សាហកម្មកាតា បានអរគុណសម្តេចតេជោ ចំពោះព័ត៌មានដ៏មានសារៈសំខាន់ស្តីពីកាលានុវត្តន៍ភាព និងសក្តានុពលសេដ្ឋកិច្ច និងវិនិយោគនៅកម្ពុជា។ នៅចំពោះមុខសម្ដេចតេជោ រដ្ឋមន្ត្រីក្រសួងពាណិជ្ជកម្មកាតា បានសន្យាថា នឹងធ្វើការឱ្យបានជិតស្និទ្ធបន្ថែមទៀតជាមួយភាគីកម្ពុជា ដើម្បីឈានទៅចុះហត្ថលេខាឱ្យបានឆាប់លើកិច្ចព្រមព្រៀងទាំងពីរ ដែលសម្តេចបានលើកឡើង។

គួរជម្រាបថា ជំនួបសម្ដេចតេជោ ហ៊ុន សែន ជាមួយរដ្ឋមន្ត្រីក្រសួងពាណិជ្ជកម្ម និងឧស្សាហកម្ម និងថ្នាក់ដឹកនាំអាជ្ញាធរវិនិយោគនៃរដ្ឋកាតា ពេលនេះ បានធ្វើឡើងបន្ទាប់ពីសម្ដេចតេជោ ហ៊ុន សែន បានជួបលោកនាយករដ្ឋមន្ត្រីកាតា ដើម្បីបង្ហាញពីសក្តានុពល និងកាលានុវត្តន៍ភាពសេដ្ឋកិច្ច និងវិនិយោគនៅកម្ពុជា។

កិច្ចពិភាក្សារបស់សម្តេចតេជោ ប្រធានព្រឹទ្ធសភាកម្ពុជា និងលោកនាយករដ្ឋមន្ត្រីកាតា នៅវិមានរដ្ឋាភិបាល នារាជធានីដូហា សម្ដេចតេជោ ហ៊ុន សែន បានលើកឡើងថា កាតា ជាប្រទេសអ្នកមាន ដែលគួរវិនិយោគនៅកម្ពុជា ជាពិសេស នៅក្នុងវិស័យកសិឧស្សាហកម្មកែច្នៃដើម្បីនាំចេញ។ សម្ដេចតេជោ បានបញ្ជាក់ប្រាប់នាយករដ្ឋមន្ត្រីកាតា ថា កម្ពុជាមានផលិតផលកសិកម្មច្រើន ដូចជា គ្រាប់ស្វាយចន្ទី ដែលកម្ពុជាផលិតច្រើនជាងគេនៅក្នុងពិភពលោក តែខ្វះលទ្ធភាពកែច្នៃ និងផលិតផលកសិកម្មជាច្រើនទៀត។ ដូច្នេះ សម្តេច បានស្នើនាយករដ្ឋមន្ត្រី បញ្ជូនវិនិយោគិនទៅកម្ពុជា ដើម្បីជំរុញការវិនិយោគ និងពាណិជ្ជកម្ម។

ក្នុងជំនួបនេះ នាយករដ្ឋមន្ត្រីកាតា បានឆ្លើយតបទៅកាន់សម្ដេចតេជោ ថា កាតា កំពុងសម្លឹងឃើញឱកាសវិនិយោគលើវិស័យកសិកម្មនៅកម្ពុជា ហើយលោក រំពឹងថា នៅពេលដែលកិច្ចព្រមព្រៀងពាណិជ្ជកម្មដែលត្រូវបានចុះហត្ថលេខាចប់សព្វគ្រប់នាពេលខាងមុខ នឹងជំរុញការវិនិយោគទៅប្រទេសកម្ពុជាឱ្យបានច្រើន៕

The post កម្ពុជា-កាតា គ្រោងចុះកិច្ចព្រមព្រៀងចំនួនពីរពាក់ព័ន្ធវិស័យសេដ្ឋកិច្ច ពាណិជ្ជកម្ម វិនិយោគ appeared first on Kampuchea Thmey Daily.

ការឯកភាពនេះបានធ្វើឡើងក្នុងកិច្ចប្រជុំលើកិច្ចព្រមព្រៀងស្ដីពីការចៀសវាងការយកពន្ធត្រួតស៊ីគ្នា (DTA) រវាងលោក សេង ជា សិទ្ធ ប្រធាននាយកដ្ឋាននីតិកម្ម គោលនយោបាយ សារពើពន្ធ និងសហប្រតិបត្តិការពន្ធដារអន្តរជាតិ ជាមួយលោក Abdulla Ahmed Al-Sulaitl ប្រធានផ្នែកសន្ធិសញ្ញាពន្ធ និងការចរចា នៃនាយកដ្ឋានសន្ធិសញ្ញាពន្ធនិង កិច្ចសហប្រតិបត្តិការអន្តរជាតិ នៃអគ្គអាជ្ញាធរពន្ធដាររបស់រដ្ឋកាតា ចាប់ពីថ្ងៃទិ ២១-២៤ ខែតុលា ឆ្នាំ ២០២៤ រាជធានីដូហា រដ្ឋកាតា។

លោក Abdulla Ahmed Al-Sulaiti បានបញ្ជាក់អំពីសារៈសំខាន់នៃកិច្ចព្រមព្រៀង DTA ក្នុងការពង្រីកកិច្ចសហប្រតិបត្តិការពន្ធដារទ្វេភាគីរវាងកម្ពុជា និងកាតា។ លោកក៏បានបន្ថែមទៀតថា លោកមានបំណងចង់ឱ្យការចរចានេះ អាចបញ្ចប់ទៅឱ្យបានឆាប់។

លោក សេង ជាសិទ្ធ បានសម្តែងអំណរគុណចំពោះការទទួលស្វាគមន៍យ៉ាងកក់ក្តៅពីភាគីកាតា និងវាយតម្លៃខ្ពស់ចំពោះកិច្ចខិតខំរបស់ភាគីកាតា ក្នុងការរៀបចំឱ្យមានកិច្ចប្រជុំចរចាលើកិច្ចព្រមព្រៀង DTA ជុំទី១ ជាលក្ខណៈរូបវន្ត នាពេលនេះ។

ទន្ទឹមនឹងនេះ លោកក៏បានឯកភាពជាមួយភាគីកាតា ដើម្បីព្យាយាមបញ្ចប់ការចរចាកិច្ចព្រមព្រៀង DTA នេះ ឱ្យបានឆាប់​ផងដែរ និងបានលើកឡើងអំពីសារបានដែលនាំឱ្យភាគីទាំងពីរឈានដល់ការឯកភាពគ្នារៀបចំកិច្ចប្រជុំចរចាលើកិច្ច ព្រមព្រៀង DTA ជុំទី១ ព្រមទាំងបានគូសរំលេចអំពីសារៈសំខាន់នៃកិច្ចព្រមព្រៀងនេះ ក្នុងការជំរុញកំណើនពាណិជ្ជកម្ម និងការវិនិយោគទៅវិញទៅមក ជាពិសេសអត្ថប្រយោជន៍ដែលសហគ្រាសក្នុងវិស័យដឹកជញ្ជូនតាមផ្លូវអាកាស និងផ្លូវទឹក រវាងកម្ពុជា និងកាតា អាចទទួលបានពីកិច្ចព្រមព្រៀងនេះ៕

The post កម្ពុជា-កាតា ឯកភាពពន្លឿន បញ្ចប់ការចរចារកិច្ចព្រមព្រៀងស្ដីពីការមិនយកពន្ធត្រួតស៊ីគ្នា appeared first on Kampuchea Thmey Daily.

តាមសេចក្ដីប្រកាសព័ត៌មានរបស់ក្រសួងការបរទេសបានឱ្យដឹងថា លោកឧបនាយករដ្ឋមន្ត្រី និងលោកឯកអគ្គរាជទូត បានសម្ដែងនូវការពេញចិត្តចំពោះមិត្តភាពយូរអង្វែង និងកិច្ចសហប្រតិបត្តិការដ៏រឹងមាំរវាងកម្ពុជា និងកាតា ចាប់តាំងពីការបង្កើតទំនាក់ទំនងការទូតនៅឆ្នាំ២០០៨ និងបានបញ្ជាក់ពីការប្តេជ្ញាចិត្តក្នុងការពង្រឹងបន្ថែមទៀតនូវទំនាក់ទំនងទ្វេភាគី និងផ្ដល់ការគាំទ្រគ្នានៅលើឆាកអន្តរជាតិ ដើម្បីជាប្រយោជន៍រួមសម្រាប់ប្រទេសទាំងពីរ។

បន្ថែមពីនេះ លោកឧបនាយករដ្ឋមន្ត្រី និងលោកឯកអគ្គរាជទូត ក៏បានឯកភាពលើសារៈសំខាន់នៃការបង្កើតយន្តការពិគ្រោះយោបល់ទ្វេភាគីរវាងក្រសួងការបរទេសទាំងពីរ ដែលវេទិកានេះនឹងបម្រើ ជាកម្លាំងចលករប្រកបដោយប្រសិទ្ធភាពមួយ ក្នុងការស្វែងរកមធ្យោបាយបន្ថែមសម្រាប់កិច្ចសហប្រតិបត្តិការទ្វេភាគី។

លោកឧបនាយករដ្ឋមន្ត្រី   បានសម្ដែងនូវសោមនស្សដោយស្មោះ  និងទទួលយកការអញ្ជើញទៅបំពេញទស្សនកិច្ចនៅកាតា ពីលោក ហ្សេក មហាម៉េដ ប៊ីន អាប់ឌុលរ៉ាហ្សម៉ាន់ ប៊ីន ចាសស៊ីម អាល់-ថានី (Sheikh Mohammed bin Abdulrahman bin Jassim Al Thani) នាយករដ្ឋមន្រ្តី និងជារដ្ឋមន្រ្តីការបរទេសនៃរដ្ឋកាតា តាមពេលវេលាសមស្របសម្រាប់ភាគីទាំងពីរ នាពេលឆាប់ៗខាងមុខ៕

The post កម្ពុជា កាតា ឯកភាពគ្នាបង្កើតយន្តការពិគ្រោះយោបល់ទ្វេភាគីរវាងក្រសួងការបរទេសទាំងពីរ appeared first on Kampuchea Thmey Daily.

ជាកិច្ចចាប់ផ្ដើម បន្ទាប់ពីបានសម្តែងការស្វាគមន៍យ៉ាងកក់ក្តៅចំពោះ ឯកឧត្តម ឯកអគ្គរាជទូតដែលបានធ្វើដំណើរមកកម្ពុជា សម្តេចតេជោ ប្រធានព្រឹទ្ធសភា បានមានប្រសាសន៍ថា កាតា មានថវិកាច្រើនគួរតែបើកស្ថានទូតផ្ទាល់នៅកម្ពុជា ប្រសើរជាជាងមាននិវេសដ្ឋាននៅប្រទេសផ្សេង។ សម្តេចតេជោ បានរំឭកថា នៅពេលសម្ដេចនៅជានាយករដ្ឋមន្ត្រី សម្តេចពុំមានពេលគ្រប់គ្រាន់ក្នុងការទទួលទូតដែលគ្មាននិវេសដ្ឋាននៅកម្ពុជានោះទេ។ សម្ដេចតេជោ បានលើកឡើងថា នៅឆ្នាំ២០០៨ ដែលព្រះអង្គម្ចាស់នាយករដ្ឋមន្ត្រីរបស់កាតា បានមកបំពេញព្រះរាជទស្សនកិច្ចនៅកម្ពុជា គឺជាពេលដែលយើងបានចាប់ផ្ដើមទំនាក់ទំនងការទូតរវាងកម្ពុជា និងកាតា។

ក្នុងឱកាសដដែល សម្ដេចតេជោ បានសម្ដែងការសោកស្ដាយដោយមិនបានចូលរួមក្នុងកម្មវិធីបើកព្រឹត្តិការណ៍ World Cup ចុងក្រោយនៅកាតា ដោយសារសម្តេចជាប់រវល់កិច្ចការជាប្រធានអាស៊ាន និងបានជូនបាល់ទាត់ដែលបានប្រើក្នុងវគ្គចុងក្រោយនៅក្នុងព្រឹត្តិការណ៍ World Cup ជូន សម្ដេចទុកជាអនុស្សាវរីយ៍។

សម្ដេចតេជោ បានរំឭកថា សម្តេច បានជួបរដ្ឋមន្ត្រីការបរទេសកាតា នៅពេលកម្ពុជាជាម្ចាស់ផ្ទះ និង ប្រធានអាស៊ានឆ្នាំ២០២២ នៅភ្នំពេញ ។ នៅពេលនោះ កាតាបានចុះហត្ថលេខាលើកិច្ចព្រមព្រៀង TAC (Treaty of Amity and Cooperation) ជាមួយនឹងអាស៊ាន ។ សម្ដចតេជោ បានលើកឡើងថា កម្ពុជា-កាតាមានកិច្ចការធ្វើច្រើន ដោយសារថាកាតាជាប្រទេសដែលមានសន្តិសុខថាមពល ហើយកម្ពុជាជាប្រទេសធានាបាននូវសន្តិសុខស្បៀង មានផលិតផលកសិកម្មច្រើនជាពិសេសគឺស្រូវ និងគ្រាប់ស្វាយចន្ទីដែលកម្ពុជាជាប្រទេសផលិតគ្រាប់ស្វាយចន្ទីច្រើនជាងគេ ។ កម្ពុជាមានគោលការណ៍ពិសេសអនុញ្ញាតឱ្យក្រុមហ៊ុនបរទេសប្រមូលទិញស្រូវ ស្តុកទុកក្នុងឃ្លាំង បើករោងចក្រកិនស្រូវ និង កែច្នៃ វេចខ្ចប់ ហើយនាំចេញទៅក្រៅប្រទេស និងមានវិធានភាពអនុគ្រោះជាច្រើនដល់វិនិយោគិនពីបរទេស។

សម្ដេចតេជោ បានរំឭកថាកាតាគួរតែចាប់ផ្ដើមហោះហើរឡើងវិញនូវ Qatar Airline បន្ទាប់ពីបានផ្អាកដំណើរការដោយសារកូវីដកន្លងទៅ ដើម្បីឱ្យការទំនាក់ទំនងរវាងប្រជាជននិងប្រជាជន ក៏ដូចជាការនាំភ្ញៀវពីតំបន់មជ្ឈិមបូព៌ានិងអឺរ៉ុបមកកាន់កម្ពុជា ហើយក៏នាំភ្ញៀវពីកម្ពុជានិងតំបន់អាស៊ានទៅកាន់កាតាវិញផងដែរ។

ឯកអគ្គរាជទូតបានថ្លែងអំណរគុណចំពោះ សម្តេច ដែលបានពន្យល់យ៉ាងក្បោះក្បាយអំពីបរិយាកាសវិនិយោគ លោក បានគូសបញ្ជាក់ថាមូលហេតុដែលលោក មកទីនេះគឺដើម្បី គាស់នូវអ្វីៗដែលជាផលប្រយោជន៍ប្រទេសទាំងពីរឱ្យមានដំណើរការឡើងវិញ។ លោក សន្យាថានឹងខិតខំទាក់ទាញវិនិយោគិន ពីកាតា មកកម្ពុជាក៏ដូចជានាំវិនិយោគិនពីកម្ពុជាទៅកាតា ដើម្បីពិនិត្យមើលលទ្ធភាពដែលអាចសហប្រតិបត្តិការវិនិយោគ ។ ឯកអគ្គរដ្ឋទូតបានលើកឡើងថាកំពុងតែស្វែងយល់ពីកត្តាអនុគ្រោះអ្វីខ្លះដែលធានាដល់ការវិនិយោគរបស់កាតានៅកម្ពុជា។ កាតាមានលទ្ធភាពនៃការវិនិយោគលើវិស័យច្រើនដូចជា វិស័យថាមពល ប្រេង ឧស្ម័ន វិស័យហេដ្ឋារចនាសម្ព័ន្ធ ការកសាងមន្ទីរពេទ្យ ព្រលានយន្តហោះ និងវិស័យផ្សេងៗជាច្រើនទៀត ហើយកាតាក៏កំពុងពិនិត្យ សិក្សាពី Qatar Airlines ចាប់ដំណើរការឡើងវិញ ដោយលើកពីភាពអនុគ្រោះដែលទេសចរកាតាទៅតំបន់ផ្សេងៗ។

សម្ដេចតេជោ បានលើកឡើងថា ទំនាក់ទំនងរវាងប្រទេសពីរ គឺពឹងផ្អែកទៅលើទំនាក់ទំនងខាងសេដ្ឋកិច្ច ពេលណា ទំនាក់ទំនងសេដ្ឋកិច្ចរឹងមាំ ទំនាក់ទំនងខាងនយោបាយក៏រឹងមាំទៅតាមនោះដែរ ។ សម្ដេចតេជោ ជម្រុញឱ្យពិនិត្យមើលលទ្ធភាពរវាងប្រទេសទាំងពីរ ទី១) ឱ្យមានកិច្ចព្រមព្រៀងការពារវិនិយោគ ដើម្បីផ្តល់ទំនុកចិត្តដល់វិនិយោគិន ទី២)ឱ្យមានកិច្ចព្រមព្រៀងស្តីពីការពុំយកពន្ធត្រួតគ្នា ហើយកាន់តែប្រសើរជាងនេះទៅទៀត បើអាចធ្វើបាន សម្រេច កិច្ចព្រមព្រៀងពាណិជ្ជកម្មសេរី ដូចដែលកម្ពុជាបានធ្វើជាមួយ ចិន កូរ៉េ អារ៉ាប៊ីសាអូឌីត។

បន្ទាប់ពីបញ្ចប់ជំនួប ជំនួសឱ្យការខកខាមិនបានចូលរួមរបស់សម្តេចតេជោ ឯកអគ្គរាជទូតនៃរដ្ឋកាតា(State of Qatar) ប្រចាំព្រះរាជាណាចក្រកម្ពុជា បានជូនបាល់ទាត់ដែលត្រូវបានប្រើនៅក្នុងការប្រកួតវគ្គចុងក្រោយនៃព្រឹត្តិការណ៍ World Cup ២០២២ ក្នុងប្រទេសកាតា ជូន សម្ដេចតេជោ ប្រធានព្រឹទ្ធសភា ទុកជាអនុស្សាវរីយ៍៕

The post សម្ដេចតេជោ​ លើកទឹកចិត្តឱ្យកាតា ​បើកស្ថានទូតផ្ទាល់នៅកម្ពុជា appeared first on Kampuchea Thmey Daily.

ក្នុងឱកាសនៃជំនួប លោក Khalid Ali Abdullah Abel បានថ្លែងអំណរគុណជូនចំពោះ សម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបលោក និងគណៈប្រតិភូ ចូលជួបសម្តែងការគួរសម និងពិភាក្សាការងារ ព្រមទាំងបានពាំនាំនូវការសួរសុខទុក្ខពីលោកនាយករដ្ឋមន្រ្តីកាតា ជូនចំពោះសម្តេចធិបតី និងប្រជាជនកម្ពុជាផងដែរ។ បន្ថែមលើនេះ លោកឯកអគ្គរាជទូត ក៏បានគោរពជម្រាបជូនសម្តេចធិបតី ថា ក្នុងអាណត្តិការទូតនៅព្រះរាជាណាចក្រកម្ពុជា លោកប្តេជ្ញា ជំរុញ និងលើកកម្ពស់ទំនាក់ទំនងនៃប្រទេសទាំងពីរឱ្យឈានដល់កម្រិតខ្ពស់បន្ថែមទៀត។ ជាមួយគ្នានេះ លោកឯកអគ្គរាជទូត បានគោរពជម្រាបជូនសម្តេចធិបតី អំពីបំណងក្នុងការសម្របសម្រួល និងជំរុញវិនិយោគិនរបស់ប្រទេសកាតាឱ្យមកទស្សនកិច្ចនៅកម្ពុជា ដើម្បីស្វែងរកឱកាសវិនិយោគ និងដៃគូអាជីវកម្ម។

ជាការឆ្លើយតប សម្តេចធិបតី បានស្វាគមន៍ចំពោះវត្តមានរបស់ លោក Khalid Ali Abdullah Abel និងគណៈប្រតិភូ ព្រមទាំងបានសម្តែងនូវការអបអរសាទរជូនចំពោះលោក ដែលត្រូវបានតែងតាំងជាឯកអគ្គរាជទូត ប្រចាំព្រះរាជាណាចក្រកម្ពុជា។ សម្តេចធិបតី ក៏បានសម្តែងនូវការវាយតម្លៃខ្ពស់ចំពោះការប្តេជ្ញាចិត្តរបស់លោកឯកអគ្គរាជទូតក្នុងការជំរុញ ក៏ដូចជាពង្រឹង និងពង្រីកទំនាក់ទំនងការទូត និងកិច្ចសហប្រតិបត្តិការរវាងកម្ពុជា-កាតាឱ្យឈានដល់កម្រិតខ្ពស់បន្ថែមទៀត ដោយសម្តេចធិបតី បានគូសបញ្ជាក់ផងថា រាជរដ្ឋាភិបាលកម្ពុជាតែងតែបើកចំហ ស្វាគមន៍ និងគាំទ្រក្នុងការពង្រឹង និងពង្រីកទំនាក់ទំនងរវាងប្រទេសទាំងពីរ។

សម្តេចធិបតី និងលោកឯកអគ្គរាជទូត ក៏បានពិភាក្សា និងឯកភាពគ្នាក្នុងការបន្តជំរុញ និងលើកកម្ពស់នូវទំនាក់ទំនងការទូត ក៏ដូចជាកិច្ចសហប្រតិបត្តិការលើវិស័យសំខាន់ៗ រួមមាន៖ វិស័យពាណិជ្ជកម្ម វិនិយោគ អប់រំ និងការបណ្តុះបណ្តាលវិជ្ជាជីវ:។

សម្តេចធិបតី បានលើកទឹកចិត្តឱ្យមានជំនួបធុរកិច្ចរវាងបណ្តាក្រុមហ៊ុននៃប្រទេសកាតា ជាមួយនឹងក្រសួង-ស្ថាប័នពាក់ព័ន្ធនៅកម្ពុជា និងលើកទឹកចិត្តឱ្យ លោកឯកអគ្គរាជទូត ដើរតួនាទីជាអ្នកសម្របសម្រួល ដើម្បីជាស្ពានផ្សារភ្ជាប់ទំនាក់ទំនងនេះឱ្យកាន់តែប្រសើរឡើង។ ជាទីបញ្ចប់ សម្ដេចធិបតី ក៏បានថ្លែងអំណរគុណ និងជូនពរលោកឯកអគ្គរាជទូត ឱ្យទទួលបានជោគជ័យជាបន្តបន្ទាប់ នៅក្នុងការបំពេញបេសកកម្មការទូតនៅព្រះរាជាណាចក្រកម្ពុជា៕

The post ទូតកាតា មានបំណងជំរុញអ្នករកស៊ីគ្រាក់ៗរបស់ខ្លួនឱ្យមករកស៊ីនៅកម្ពុជា ខណៈសម្ដេចធិបតី ផ្ដល់ការគាំទ្រ​ appeared first on Kampuchea Thmey Daily.

ការប្ដេជ្ញានេះ គ្រាដែលសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីល្ងាចថ្ងៃទី ៣ ខែសីហា ឆ្នាំ ២០២២ បានអនុញ្ញាតឲ្យលោក Sheikh Mohammed bin Abdulrahman al-Thani ឧប​នាយករដ្ឋមន្ត្រី និងជារដ្ឋមន្រ្តីក្រសួងការបរទេសនៃប្រទេសកាតា ចូលជួបសម្ដែងការគួរសម និងពិភាក្សាការងារ។

សម្ដេចតេជោ ហ៊ុន សែន បានស្វាគមន៍រដ្ឋមន្ត្រីការបរទេសកាតា និងគណៈប្រតិភូដែលអញ្ជើញមកចូលរួមក្នុងកិច្ចប្រជុំ រដ្ឋមន្ត្រីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធនេះ។ សម្ដេចតេជោ បានលើកឡើងថា បច្ចុប្បន្ននេះ ទំនាក់ទំនងទ្វេភាគីរវាងកម្ពុជា-កាតា មានភាពល្អប្រសើរទៅមុខ ហើយទស្សនកិច្ចរបស់លោកឧបនាយករដ្ឋមន្ត្រី និងជារដ្ឋមន្ត្រីការបរទេសនាពេលនេះ នឹងរួមចំណែកក្នុងការពង្រឹង ពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ជាពិសេសពង្រីកទំនាក់ទំនងរវាងប្រទេសកាតា និងប្រទេសអាស៊ានផងដែរ។

លោកឧបនាយករដ្ឋមន្ត្រី និងជារដ្ឋមន្ត្រីការបរទេសកាតា បានថ្លែងអំណរគុណសម្ដេចតេជោនាយករដ្ឋមន្ត្រី ចំពោះការទទួលស្វាគមន៍រូបលោក ក៏ដូចជាការទទួលជួបសម្ដែងការគួរសមនាពេលនេះ។ លោកក៏បានអបអរសាទរនូវភាពជោគជ័យ នៃកិច្ចប្រជុំរដ្ឋមន្ត្រីការបរទេសអាស៊ាន។  ឧបនាយករដ្ឋមន្ត្រីកាតា បានលើកឡើងបន្តថា នេះគឺជាឱកាសដ៏ល្អ ដែលលោកបានមកប្រទេសកម្ពុជានាពេលនេះ ហើយលោកពិតជាចង់ឃើញនូវដំណើរការវិវត្តនៃទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។

លោកបានគូសបញ្ជាក់ថា រហូតមកដល់ពេលនេះ ទំនាក់ទំនងរវាងកាតា-កម្ពុជា ចាប់ផ្ដើមមានភាពល្អប្រសើរ ហើយប្រទេសទាំងពីរនៅមានសក្តានុពលជាច្រើនទៀត ដែលអាចសហការគ្នា ជាពិសេសទៅលើវិស័យសេដ្ឋកិច្ច។ លោកថា បច្ចុប្បន្នកាតា-កម្ពុជា មានកិច្ចសហប្រតិបត្តិការគ្នាខ្លះហើយ លើវិស័យអប់រំ ហើយនឹងរកកិច្ចសហប្រតិបត្តិការលើវិស័យផ្សេងៗជាច្រើនទៀតនៅពេលខាងមុខ។

លោក Sheikh Mohammed bin Abdulrahman al-Thani បានជម្រាបសម្ដេចតេជោថា លោកបានជួបពិភាក្សាជាមួយលោកឧបនាយករដ្ឋមន្ត្រី ​ប្រាក់ សុខុន រួចហើយ។ ក្នុងជំនួបនោះ អ្វីដែលលោកចាប់អារម្មណ៍ គឺប្រទេសកាតា អាចមានកិច្ចសហប្រតិបត្តិការល្អជាមួយកម្ពុជាទៅ លើវិស័យទេសចរណ៍ និងការពង្រីកទំហំពាណិជ្ជកម្ម និងការវិនិយោគ។ លោកបានប្ដេជ្ញាចិត្តថា នឹងជំរុញឲ្យមានគណៈប្រតិភូធុរកិច្ចមកប្រទេសកម្ពុជានាពេលខាងមុខ ដើម្បីជួបពិភាក្សាជាមួយធុរកិច្ចកម្ពុជា ក្នុងការពង្រីកកិច្ចសហប្រតិបត្តិការលើវិស័យធុរកិច្ចនេះតែម្ដង។

សម្ដេចតេជោ ហ៊ុន សែន បានស្វាគមន៍ និងអបអរសាទរ ដែលប្រទេសកាតាបានយកចិត្តទុកដាក់ចំពោះអាស៊ាន ក៏ដូចជាចំពោះប្រទេសកម្ពុជា និងពិតជារីករាយដែលលោកបានជួបជាមួយលោក ប្រាក់ សុខុន ក្នុងការជំរុញនូវកិច្ចសហប្រតិបត្តិការនេះផងដែរ។ សម្ដេចតេជោ មានក្តីសង្ឃឹមថា ប្រទេសកាតា នឹងទទួលបានភាពជោគជ័យក្នុងការរៀប Word Cup នៅចុងឆ្នាំ ២០២២នេះ ពីព្រោះប្រទេសកត្តាជាអ្នករៀបចំព្រឹត្តិការណ៍ World Cup នេះតែម្ដង។

សម្ដេចតេជោ បានបន្ថែមថា ប្រទេសទាំងពីរ គឺនៅមានសក្កានុពលជាច្រើន ដែលអាចពង្រឹងនូវកិច្ចសហប្រតិបត្តិការគ្នាបាននាពេលខាងមុខ។ ពាក់ព័ន្ធទៅនឹងវិស័យទេសចរណ៍ សម្តេចតេជោ បានមានប្រសាសន៍ថា ប្រទេសកាតាពិតជាមានភាពរឹងមាំ ជាពិសេសប្រទេសកាតា គឺមានសមត្ថភាពក្នុងការពង្រឹងជើងហោះហើរ ហើយប្រទេសកាតា គឺមានភូមិសាស្រ្តនៅមជ្ឈិមបូព៌ា ដែលអាចធ្វើការហោះហើរមកកម្ពុជាដោយផ្ទាល់បាន។

សម្ដេចតេជោ បានមានប្រសាសន៍ថា មុនវិបត្តិជំងឺកូវីដ-១៩ កម្ពុជាមានទេសចរបរទេសប្រមាណជាង ៦ លាន ៦សែននាក់ តែពេលនេះធ្លាក់មកដល់ត្រឹមជិត ១លាននាក់ប៉ុណ្ណោះ។ សម្ដេចតេជោបញ្ជាក់ថាគោលដៅកម្ពុជា គឺចង់ទទួលបានភ្ញៀវទេសចរប្រមាណជា ១៥លាននាក់ ឯណ្ណោះ។ សម្ដេចតេជោបានមានប្រសាសន៍ថា ពេលនេះកម្ពុជាមានការលើកលែងនូវលក្ខខណ្ឌជាច្រើន ដើម្បីឲ្យភ្ញៀវទេសចរមកកាន់កម្ពុជា។

សម្តេចតេជោ បានលើកឡើងទៀតថា ប្រទេសកាតាអាចគាំទ្រ ជាពិសេសធ្វើឲ្យមានជំនួបរវាងអ្នកធុរកិច្ច និងធុរកិច្ចនៃប្រទេសទាំងពីរ ដូចជាអោយអ្នកធុរកិច្ចនៃប្រទេសទាំងពីរ អាចចូលរួមក្នុងការតាំងពិព័រណ៍ ពាណិជ្ជកម្មក្នុងខែ ១២ ចុងឆ្នាំនេះផងដែរ ធ្វើយ៉ាងណាជំរុញផ្នែកធុរកិច្ច និងធុរកិច្ចឲ្យមានទំនាក់ទំនងគ្នា។

សម្តេចតេជោ ក៏បានលើកទឹកចិត្តឲ្យប្រទេសកាតា ជំរុញដល់វិស័យឯកជន ដើម្បីមកធ្វើការរួមគ្នាជាមួយវិស័យឯកជននៅប្រទេសកម្ពុជា។ សម្ដេចចង់ឃើញអ្នកវិនិយោគប្រទេសកាតា មកវិនិយោគនៅក្នុងប្រទេសកម្ពុជា ហើយនាំចេញទៅកាន់ទីផ្សារបរទេស ពិសេសពាក់ព័ន្ធទៅនឹងវិស័យស្បៀង ដូចជាស្រូវ អង្ករតែម្ដង។ សម្ដេចតេជោជំរុញឲ្យប្រទេសកាតា អាចមកវិនិយោគលើវិស័យនេះ ហើយធ្វើការនាំចេញទៅកាន់ទីផ្សារអន្តរជាតិផងដែរ។

លោករដ្ឋមន្ត្រីការបរទេសកាតា បានថ្លែងអរគុណចំពោះសម្ដេចតេជោ ចំពោះអនុសាសន៍ដ៏មានអត្ថន័យក្នុងការពង្រឹងទំនាក់ទំនង ក៏ដូចជាការពង្រីកពង្រឹងកិច្ចសហប្រតិបត្តិការ លើវិស័យសេដ្ឋកិច្ចពាណិជ្ជកម្មរវាងប្រទេសទាំងពីរនេះ។ លោកសន្យាថា លោកនឹងបញ្ជូនអ្នកធុរកិច្ចពីប្រទេសកាតាមកកាន់ប្រទេសកម្ពុជា ដើម្បីធ្វើការជាមួយធុរកិច្ចកម្ពុជា ក្នុងការពង្រឹងពង្រីកកិច្ចសហប្រតិបត្តិការ ក៏ដូចជា វិនិយោគទៅលើវិស័យអ្វី ដែលប្រទេសទាំងពីរអាចសហការគ្នាបាន។ លោកក៏បានសន្យាថា នឹងជំរុញឲ្យមានការហោះហើរឡើងវិញ តភ្ជាប់រវាងកម្ពុជា និងប្រទេសកាតាផងដែរ ដើម្បីធ្វើយ៉ាងណាជំរុញវិស័យទេសចរណ៍រវាងប្រទេសទាំងពីរ ភាពល្អប្រសើរផងដែរនៅពេលខាងមុខ៕

The post រដ្ឋមន្រ្តីការបរទេសកាតា ប្ដេជ្ញាចិត្តជំរុញឲ្យមានគណៈប្រតិភូធុរកិច្ចមកប្រទេសកម្ពុជា នាពេលខាងមុខ appeared first on Kampuchea Thmey Daily.