កិច្ចប្រជុំនេះ ដឹកនាំដោយលោក សៀក សុជាតិ រដ្ឋលេខាធិការក្រសួងការពារជាតិ និងជាអនុប្រធានគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញចូលរបស់ពលករខ្មែរតាមព្រំដែនកម្ពុជា ដើម្បីពង្រឹងការអនុវត្តការងាររបស់មន្ត្រីមានសមត្ថកិច្ច និងអាជ្ញាធរពាក់ព័ន្ធ ដែលឈរជើងនៅច្រកទ្វារព្រំដែនក្នុងភូមិសាស្ត្រខេត្តឧត្តរមានជ័យក្នុងការសម្របសម្រួលការឆ្លងដែនជូនប្រជាពលរដ្ឋដោយស្របច្បាប់។

ដើម្បីពង្រឹងការងារនៅតាមព្រំដែននេះ លោក សៀក សុជាតិ បានដាក់ចេញនូវវិធានការដល់មន្ត្រីឈរជើងតាមច្រកទ្វារព្រំដែន ក៏ដូចជាសមត្ថកិច្ចពាក់ព័ន្ធ ត្រូវបង្កលក្ខណៈងាយស្រួលជូនដល់ប្រជាពលរដ្ឋដែលធ្វើការឆ្លងដែនចេញចូលក្នុងទឹកដីថៃ ឱ្យបានទាន់ពេលវេលាជៀសវាងកុំឱ្យមានកកស្ទះនៅតាមច្រកទ្វារព្រំដែន។ ក្នុងនោះ លោក បានប្រាប់សមត្ថកិច្ចទាំងអស់ ត្រូវបញ្ឈប់ជាបន្ទាន់ការយកប្រាក់កម្រៃក្រៅផ្លូវការ ហើយត្រូវមានការទទួលខុសត្រូវលើសន្តិសុខ សុវត្ថិភាព សណ្តាប់ធ្នាប់សាធារណៈ របៀបរៀបរយជូនប្រជាពលរដ្ឋតាមច្រកទ្វារព្រំដែនឱ្យបានប្រសើរ។

លោក សៀក សុជាតិ ក៏បានណែនាំឱ្យមន្ត្រីឈរជើងតាមច្រកទ្វារព្រំដែន តាមដានជាប់ជាប្រចាំអំពីស្ថានភាពនៃការធ្វើដំណើរចេញចូលរបស់ពលករខ្មែរ ហើយត្រូវរាយការណ៍មកក្រុមការងារត្រួតពិនិត្យដំណើរចេញចូលរបស់ពលករខ្មែរតាមព្រំដែនឱ្យបានទាន់ពេលវេលាកំណត់។

ទន្ទឹមនេះ ការងារគ្រប់គ្រងស្ថិតិ និងលំហូរពលករចេញចូលឆ្លងកាត់ព្រំដែន ក៏ត្រូវត្រួតពិនិត្យឱ្យបានច្បាស់លាស់ និងចាត់វិធានការទប់ស្កាត់ បង្ក្រាបរាល់សកម្មភាពរបស់មេខ្យល់ និងអ្នកសមគំនិត ដែលអូសទាញពលករឱ្យឆ្លងដែនខុសច្បាប់តាមគ្រប់រូបភាព ហើយលើសពីនេះ ត្រូវបិទច្រករបៀងខុសច្បាប់ទាំងអស់ក្នុងដែនសមត្ថកិច្ចរបស់ខ្លួន ដើម្បីបញ្ជៀសកុំឱ្យពលករចាញ់បោកមេខ្យល់ឆ្លងដែនដោយខុសច្បាប់បន្តទៀត៕

The post អនុប្រធានគណៈកម្មការចំពោះកិច្ច ប្រាប់មន្ត្រីឈរជើងតាមច្រកព្រំដែន ត្រូវបញ្ឈប់ការយកកម្រៃក្រៅផ្លូវការ appeared first on Kampuchea Thmey Daily.

សេចក្តីជូនដំណឹងរបស់គណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញ-ចូលរបស់ពលករខ្មែរតាមព្រំដែនកម្ពុជា ចុះថ្ងៃទី១៦ ខែវិច្ឆិកា ឆ្នាំ២០២៣ បានជូនដំណឹងដល់សាធារណជន ឬពលករខ្មែរ ដែលធ្វើដំណើរចេញ-ចូលតាមច្រកព្រំដែនទាំងអស់ ឱ្យបានដឹងថា គណៈកម្មការចំពោះកិច្ច បានរៀបចំប្រព័ន្ធទំនាក់ទំនងទាន់ហេតុការណ៍ ដែលមានមធ្យោបាយសម្រាប់ទំនាក់ទំនងជាលេខទូរស័ព្ទ Hotline ១២៤៤ ដោយឥតគិតថ្លៃ និងប្រព័ន្ធតេលេក្រាម (Telegram) ០៩៧ ៥៥៥ ១២៤៤។

បើតាមសេចក្ដីជូនដំណឹងនេះ សាធារណជន ឬជាពិសេសពលករខ្មែរទាំងឡាយ ដែលមានបំណងចង់ផ្តល់ព័ត៌មាន ឬ សំណូមពរផ្សេងៗពាក់ព័ន្ធនឹងភាពមិនប្រក្រតីក្នុងពេលធ្វើដំណើរចេញ-ចូល និងឆ្លងកាត់ព្រំដែនកម្ពុជា អាចទាក់ទងមកគណៈកម្មការចំពោះកិច្ចបាន តាមប្រព័ន្ធទំនាក់ទំនងទាន់ហេតុការណ៍ខាងលើនេះ។

គួរជម្រាបថា កាលពីពាក់កណ្ដាលខែកញ្ញា កន្លងទៅ សម្ដេចធិបតី ហ៊ុន ម៉ាណែត បានចេញសេចក្ដីសម្រេចមួយឱ្យបង្កើតគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញ-ចូលរបស់ពលករខ្មែរនៅតាមព្រំដែនរបស់កម្ពុជា។ គណៈកម្មការចំពោះកិច្ចនេះ ត្រូវដឹកនាំដោយលោកឧបនាយករដ្ឋមន្ត្រី នេត សាវឿន ជាប្រធាន លោក គៀត ច័ន្ទថារិទ្ធ រដ្ឋលេខាធិការក្រសួងមហាផ្ទៃ ជាអនុប្រធានប្រចាំការ លោក សំរិទ្ធ ឌី រដ្ឋលេខាធិការក្រសួងមហាផ្ទៃ ជាអនុប្រធាន លោក សៀក សុជាតិ រដ្ឋលេខាធិការក្រសួងការពារជាតិ ជាអនុប្រធាន និងប្រធានអង្គភាពជំនាញមួយចំនួនទៀត រួមទាំងអភិបាលខេត្តជាប់ព្រំដែនផង ជាសមាជិក។

ការបង្កើតគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញ-ចូលរបស់ពលករខ្មែរនៅតាមព្រំដែន នាពេលនេះ ខណៈកន្លងមក រាល់ការចេញចូល និងការឆ្លងដែនរបស់ពលរដ្ឋ ជាពិសេសពលករ ដែលតែងជួបបញ្ហាលំបាកមួយចំនួនលើភាពមិនប្រក្រតីផ្សេង ពិសេសការទារកម្រៃក្រៅផ្លូវការ៕

The post មានបញ្ហាពេលឆ្លងកាត់ព្រំដែន ពលករខ្មែរអាចទាក់ទងមកលេខ Hotline ចំនួនពីរខ្សែ appeared first on Kampuchea Thmey Daily.

ក្រោយពីសមត្ថកិច្ចថៃ សួរនាំទើបដឹងថា ពលករទាំង៧នាក់នេះ ទៅស៊ីឈ្នួលធ្វើការងារនៅផ្សាររោងគ្លឿ ស្រុក​អារញ្ញ ហើយបាននាំមកទៅបញ្ជារការកងទាហានប៉ារ៉ាលេខ1205នាថ្ងៃទី១៣ ខែធ្នូ ឆ្នាំ២០២០ ​។

​​សមត្ថកិច្ចថៃ ​​ឲ្យដឹងបន្ត​ថា ពលរដ្ឋខ្មែរទាំង៧នាក់នេះ រស់ក្រុងប៉ោយប៉ែត ខេត្តបន្ទាយមានជ័យ មិន​មាន​លិខិត​ឆ្លងដែនឡើយ ហើយពួកគេបានបបួលគ្នាលួចឆ្លងចូលទៅប្រទេសថៃ តាមច្រករបៀង ដើម្បីទៅស៊ី​ឈ្នួលធ្វើការងារនៅផ្សាររោងគ្លឿ ។

​សមត្ថកិច្ចថៃ បញ្ជាក់ថា ពួកគេត្រូវបានឃាត់ខ្លួន និងបញ្ជូន​ទៅឲ្យនគបាល​ការពារ​ព្រំដែនលេខ124 ភូមិ​ណូន​ម៉ាក​មុន ស្រុកគោកឃ្យូង ដើម្បីឲ្យត្រឡប់ទៅប្រទេសកម្ពុជាវិញ តាមផ្លូវដែល​បានឯកភាពគ្នា។

សមត្ថកិច្ចថៃ បានអះអាងថា ស្រុកតាប្រាយ៉ា ខេត្តស្រះកែវ កងកម្លាំង​ទាហាន​បូរផា បានធ្វើការរឹតបន្តឹង​ការពារការ​ត្បាត តឹងរឹងដើម្បីទប់ស្គាត់ពលករចំណាក​ស្រុក និងដើម្បីការពាររីករាលដាលជំងឺ កូវីដ-19 ផងដែរ៕

អត្ថបទ៖ វ៉ាន់ ណាង

The post ទាហានថៃ ចាប់ពលរដ្ឋខ្មែរ​៧នាក់ លួចឆ្លងដែនខុសច្បាប់​ ទៅ​ផ្សាររុងគ្លឿ appeared first on Kampuchea Thmey Daily.

ប្រភពច្បាស់ការមួយ ដែលផ្តិតយករូបភាពជាភស្តុតាង កាលព្រឹកថ្ងៃទី៩ ខែធ្នូ ឆ្នាំ២០២០នេះ បានឲ្យដឹងថា មានប្រជាពលរដ្ឋជាច្រើន ក្នុងនោះក៏មានពលករ និងអាជីវករ បាននាំគ្នាសម្រុកឆ្លងដែនចូលទៅក្នុងទឹកដីថៃ តាមច្រករបៀង ស្វាយចេក ហៅច្រក ច័ន្ទគិរី ក្រោមការគ្រប់គ្រងរបស់លោកមេប៉ុស្តិ៍ យ៉ុង សម្បត្តិ ចំណុះឲ្យនគរបាលការពារព្រំដែនគោកលេខ ៨១៩ រួមនឹងកម្លាំងសឹករងស្រុក ដែលច្រកនេះ ស្ថិតក្នុងភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង ។

ប្រភពដដែល បានបន្តថា ការធ្វើដំណើរឆ្លងដែនចូលទៅក្នុងទឹកដីថៃ គឺត្រូវបង់ប្រាក់ទៅឲ្យកម្លាំងដែលឈរជើងចាប់ពី ១០០ ទៅ ២០០ បាតជាថ្នូរ នឹងការបើកច្រក ដើម្បីបានចូលទៅក្នុងទឹកដីថៃទិញទំនិញនានា ឬទៅធ្វើការងារប្រចាំថ្ងៃ នៅទីនោះ។ ច្រានចោលការចោទប្រកាន់នេះ លោកមេ ប៉ុស្តិ៍ យ៉ុង សម្បត្តិ បានលើកឡើងថា លោកមិនបានចំហ ឬ បើកភ្លើងខៀវ ឲ្យពលករខ្មែរចេញចូលដោយសេរីនោះទេ។ លោកថា ច្រកស្វាយចេក ឬច្រកច័ន្ទគិរីនេះ ត្រូវបានថ្នាក់ដឹកនាំបញ្ជាឲ្យបើក ដើម្បីទទួលយកពលករខ្មែរ ដែលវិលត្រឡប់មកពីប្រទេសថៃ ដោយសាតែច្រកតំបន់ឬច្រកអន្តរជាតិ បានបិទអស់ហើយ។

លោកបានបន្តថា ខណៈពេលដែលច្រកបើក ទទួលពលករខ្មែរវិលត្រឡប់មកស្រុកកំណើតនេះ ក៏មានប្រជាពលរដ្ឋដែលរស់នៅក្បែព្រំដែន បានសុំឆ្លងចូលទៅផ្សារថៃ ដើម្បីទិញទំនិញផ្សេងៗ ផងដែរ ឯខ្លះទៀតសុំឆ្លងចូលទៅធ្វើការងារឲ្យថៃ ដើម្បីចិញ្ចឹមជីវភាពគ្រួសារ ដោយចូលព្រឹកចេញមកវិញពេលល្ងាចប៉ុណ្ណោះ៕

សូមទស្សនាវីដេអូ៖

អត្ថបទ ៖ សោ និយមរ័ត្ន

សូមចុចអាន៖ អ្នក​ធ្វើ​ដំណើរ​តាម​បណ្ដោយ​ផ្លូវជាតិ​លេខ​៣ ប្រុងប្រយ័ត្ន​ផង រថយន្ត​ធុន​ធំ​បង្ក​គ្រោះថ្នាក់​ញឹកញាប់​ណាស់

The post (មានវីដេអូ) ពលរដ្ឋខ្មែរ ឆ្លងដែនចូលទឹកដីថៃ តាមច្រករបៀងច័ន្ទគិរី ដោយមិនខ្លាចរអា appeared first on Kampuchea Thmey Daily.