ក្រោយបញ្ចប់ការបង្ហាញខ្លួននៅតុលាការដំបូងរបស់ Robinson ព្រះរាជអាជ្ញាបានបង្ហាញការចោទប្រកាន់ចំនួន ៧ ជុំវិញការសម្លាប់ Charlie Kirk ហើយបាននិយាយថាពួកគេនឹងស្វែងរកការកាត់ទោសប្រហារជីវិត។

ឯកសាររបស់តុលាការបានបង្ហាញសារជាអក្សរដែល Robinson បានសារភាពថាគាត់ជាអ្នកបាញ់។ រូបគេបាននិយាយថារូបគេបានសម្លាប់ Charlie Kirk ដោយសារតែមិនអាចទ្រាំការស្អប់របស់ខ្លួនលើ Kirk ។

Robinson ប្រឈមមុខនឹងការចោទប្រកាន់ចំនួនប្រាំពីរ រួមទាំងឃាតកម្មធ្ងន់ធ្ងរ ការរាំងស្ទះដល់យុត្តិធ៌ម និងការបំភ្លៃសាក្សី។ ព្រះរាជអាជ្ញាបានលើកឡើងពីកត្តាធ្វើឱ្យមានស្ថានទម្ងន់ទោស រួមទាំងហេតុផលនយោបាយ និងការដែលកុមារបានឃើញការសម្លាប់នេះ។

យ៉ាងណានេះគ្រាន់តែជាការចាប់ផ្តើមដំណើរការផ្លូវច្បាប់ដែលទំនងជាយូរអង្វែង និងមានការត្រួតពិនិត្យយ៉ាងច្បាស់លាស់។ ព្រះរាជអាជ្ញា និងអ្នកអនុវត្តច្បាប់ក៏កំពុងស៊ើបអង្កេតករណីនេះផងដែរ ដែលអាចចំណាយពេលច្រើនសប្តាហ៍ ឬច្រើនខែ។

គួរបញ្ជាក់ថា ការស្លាប់របស់ Kirk ដែលត្រូវបានថតជាប់ក្នុងវីដេអូ ដែលបានបង្កភាពតានតឹងផ្នែកនយោបាយ ដោយលោកប្រធានាធិបតី ដូណាល់ ត្តាំ និងអ្នកនយោបាយផ្សេងទៀតទាមទារឱ្យមានការដាក់ទោសជាធ្ងន់ធ្ងរ ខណៈពេលដែលអ្នករិះគន់ព្រមានអំពីភាពលំអៀង និងអំពើហិង្សាបន្ថែមទៀត៕

អត្ថបទ៖ ប៊ុន​ សុភាព

The post ឃាតករសម្លាប់ Charlie Kirk ប្រឈមទោសប្រហារជីវិត appeared first on Kampuchea Thmey Daily.

លោកស្រី Iryna Farion អាយុ៦០ឆ្នាំ ត្រូវបានខ្មាន់កាំភ្លើងបាញ់សម្លាប់នៅលើផ្លូវមួយក្នុងទីក្រុង Lviv ភាគខាងលិច ខណៈប៉ូលិស​នៅ​មិន​ទាន់​ចាប់ខ្លួន​បុរសដែលជាក្មាន់កាំភ្លើងនោះ​នៅឡើយ​ទេ​​។ ​សារព័ត៌មាន​ BBC បាន​ផ្សាយ​ក្នុង​ពេលថ្មីៗ​នេះ ឱ្យ​ដឹង​ថា យោងតាមរដ្ឋមន្ត្រីមហាផ្ទៃក លោក Ihor Klymenko អ្នកស៊ើបអង្កេតគឺបានភ្ជាប់ការបាញ់ប្រហារនេះ ទៅនឹងសកម្មភាពនយោបាយរបស់លោកស្រី Farion ឬជាហេតុផលផ្ទាល់ខ្លួន ដោយមានប៉ូលិស និងភ្នាក់ងារ​សន្តិសុខ SBU របស់អ៊ុយក្រែន​កំពុងធ្វើការរួមគ្នាដើម្បីតាមដានអ្នកវាយប្រហារ។

ជាមួយគ្នានេះប្រធានាធិបតី Volodymyr Zelenskiy ក៏កំពុងទទួលបានរបាយការណ៍ជាប្រចាំ ស្តីពីកិច្ចខិតខំប្រឹងប្រែងដើម្បីចាប់ខ្លួនខ្មាន់កាំភ្លើង ដែលលោកជុំរុញឲ្យអំពើ​ហិង្សា​នេះត្រូវតែទទួលបានការថ្កោលទោស។

លោកស្រី Farion ជាអ្នកភាសាវិទ្យាបានក្លាយជាសមាជិកនៃគណបក្សជាតិនិយម Svoboda ក្នុងឆ្នាំ២០០៥ ហើយត្រូវបានឈរឈ្មោះ​បោះឆ្នោតសភាក្នុងឆ្នាំ ២០១២ ប៉ុន្តែបានបរាជ័យក្នុងការប៉ុនប៉ងជាបន្តបន្ទាប់ដើម្បីឈ្នះអាសនៈ។ ​លោកស្រីសមាជិក​សភា ក៏បានបម្រើការនៅក្រុមប្រឹក្សាតំបន់ Lviv ផងដែរ។ លោកស្រីទទួលបានភាពល្បីល្បាញសម្រាប់យុទ្ធនាការជាញឹកញាប់ដើម្បីផ្សព្វផ្សាយភាសាអ៊ុយក្រែន និងបង្ខូចកិត្តិយសមន្ត្រីសាធារណៈដែលនិយាយភាសារុស្សី។

នៅឆ្នាំ២០១៨នៅពេលដែលអ៊ុយក្រែនកំពុងប្រយុទ្ធជាមួយពួកបំបែកខ្លួនដែលផ្តល់ហិរញ្ញប្បទានដោយរុស្ស៊ីដែលបានដណ្តើមយកទឹកដីនៅភាគខាងកើត លោកស្រីបានអំពាវនាវឱ្យមានការជំរុញឱ្យ «ដាល់អ្នកនិយាយភាសារុស្ស៊ីទាំងអស់ឱ្យបាក់ថ្គាម»​។

ទោះបីជាភាសាអ៊ុយក្រែនជាភាសារដ្ឋតែមួយគត់របស់អ៊ុយក្រែនក៏ដោយ អ្នកស្រុកជាច្រើននិយាយភាសារុស្សីជាភាសាទីមួយ ដែលជាកេរដំណែលនៃការគ្រប់គ្រងរបស់សូវៀត នៅពេលដែលអ៊ុយក្រែនស្ថិតនៅក្រោមសម្ពាធជាផ្លូវការ។ ការលើកកម្ពស់ភាសាគឺជាបញ្ហាដ៏សំខាន់ជាយូរមកហើយ ដោយសភាបានអនុម័តច្បាប់ដើម្បីពង្រឹងការប្រើប្រាស់ភាសារបស់ខ្លួននៅក្នុងជីវិតសាធារណៈ និងក្នុងឧស្សាហកម្មសេវាកម្ម៕

អត្ថបទ៖ ប៊ុន សុភាព

The post សមាជិកសភាជាតិនិយមអ៊ុយក្រែន​ដែល​ប្រឆាំង​ការ​ប្រើ​ភាសារុស្ស៊ី​ត្រូវគេ​ធ្វើឃាត appeared first on Kampuchea Thmey Daily.