ការបោសសំអាត Archives - Kampuchea Thmey Daily

នារដូវវស្សានេះ ក្រុមការងារដករុក្ខជាតិតាមប្រាសាទ បង្កើនកម្លាំងសម្អាតកាន់តែខ្លាំង

Sorn Phanith — Mon, 01 Nov 2021 07:27:57 +0000

ភ្លៀងធ្លាក់ជាបន្តបន្ទាប់នារដូវវស្សានេះ ជាអំណោយផលដល់រុក្ខជាតិចម្រុះបង្កើនការលូតលាស់នៅលើថ្មប្រាសាទ។ ករណីនេះ ធ្វើឱ្យក្រុមការងារដករុក្ខជាតិតាមប្រាសាទ ត្រូវបង្កើនកម្លាំងកាន់តែខ្លាំង ដើម្បីសម្អាតរុក្ខជាតិទាំងនោះមិនឱ្យប៉ះពាល់ថ្ម និងសោភ័ណភាពប្រាសាទឡើយ។

លោក ងិន ធី អ្នកគ្រប់គ្រងពលករកាត់សម្អាតរុក្ខជាតិលើប្រាសាទ នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរា ឱ្យដឹងថា ដើមរុក្ខជាតិតូចធំមានដុះច្រើនតាមថ្មប្រាសាទក្នុងរដូវវស្សានេះ ពិសេសវត្តមានរុក្ខជាតិតូចៗ។ ទោះរុក្ខជាតិទាំងនោះហាក់ដុះលឿនខ្លាំងក្នុងរដូវវស្សា តែក្រុមការងាររបស់លោក ងិន ធី មិនបានបង្អង់កម្លាំងនោះទេ ផ្ទុយទៅវិញក្រុមការងារបានបង្កើនកម្លាំងទ្វេ ដើម្បីដកកាត់រុក្ខជាតិតូចធំទាំងនោះ មិនឱ្យដុះស្ដុកទ្រុប ធ្វើឱ្យបាត់បង់សោភ័ណភាព និងប៉ះពាល់ថ្មប្រាសាទទេ។

ក្រុមការងារបានបែងចែកគោលដៅសម្អាតបានច្បាស់លាស់ ពិសេសទីតាំងដែលមានចរាចរណ៍ទេសចរមមាញឹក និងបានដកឃ្លាតាមគោលដៅខ្លះដែលពុំមានចរាចរណ៍ទេសចរចូលទៅទស្សនាច្រើន ដោយទុកសម្អាតពេលក្រោយ តែមិនទុកឱ្យដុះស្ដុកច្រើនឡើយ។

សូមបន្ថែមថា ក្រៅពីក្រុមការងារកាត់សម្អាតរុក្ខជាតិលើប្រាសាទនេះ ក្នុងនោះក៏មានក្រុមការងារដទៃទៀតក៏ចូលរួមលើការកាត់សម្អាត និងការងារអនាម័យក្នុងប្រាសាទផងដែរ ក្នុងនោះមានភ្នាក់ងារទេសចរណ៍ និងភ្នាក់ងារសណ្ដាប់ធ្នាប់ជាដើម ដែលជានិច្ចកាលតែងចូលរួមយ៉ាងសកម្ម៕

អត្ថបទ៖ គឿនវេត

The post នារដូវវស្សានេះ ក្រុមការងារដករុក្ខជាតិតាមប្រាសាទ បង្កើនកម្លាំងសម្អាតកាន់តែខ្លាំង appeared first on Kampuchea Thmey Daily.

អាជ្ញាធរខណ្ឌមានជ័យ បន្តលាងសម្អាតផ្លូវសំខាន់ៗ២ខ្សែ ដើម្បីសោភ័ណភាពដងផ្លូវ

Sorn Phanith — Tue, 19 Oct 2021 09:04:13 +0000

នៅវេលាព្រឹកថ្ងៃទី១៩ ខែតុលា ឆ្នាំ២០២១ អាជ្ញាធរខណ្ឌមានជ័យ ដឹកនាំដោយលោកឌី រ័ត្នខេមរុណ អភិបាលរងខណ្ឌ សហការជាមួយមន្ទីរសាធារណការរាជធានីភ្នំពេញ បានបន្តចុះលាងសម្អាតផ្លូវសំខាន់ៗចំនួន២ខ្សែ ក្នុងមូលដ្ឋាន ដើម្បីសោភ័ណភាព និងបរិស្ថានស្អាតលើដងផ្លូវ។

ផ្លូវសំខាន់ទាំង២ខ្សែ ដែលអាជ្ញាធរចុះធ្វើការលាងសម្អាត គឺ ១.តាមបណ្តោយមហាវិថី សម្តេចតេជោ (ផ្លូវ៦០ម៉ែត្រ)ចាប់ពីចំណុចស្ពានថ្ម ព្រំប្រទល់ខណ្ឌដង្កោ និង ខណ្ឌមានជ័យ រហូតដល់ច្រមុះជ្រូកក្បាលថ្នល់ និងទី២. មហាវិថី លោកឧកញ៉ា មហាភក្តី ហ៊ុននាង (ផ្លូវ ៣០ម៉ែត្រ) នៅទល់មុខវត្តចាក់អង្រែក្រោម។

លោក ឌី រ័ត្នខេមរុណ អភិបាលរងខណ្ឌមានជ័យ ឲ្យដឹងថា ៖ ក្នុងការចុះបាញ់ និងលាងសម្អាតផ្លូវនេះដែរបានប្រើប្រាស់ រថយន្ត បាញ់ទឹករបស់សាលាខណ្ឌ ចំនួន០២គ្រឿង , រថយន្ត បោសសំអាតផ្លូវ ចំនួន០១គ្រឿង ព្រមទាំងមានការចូលរួមសហការពី រថយន្តបាញ់ទឹករបស់ មន្ទីរសាធារណការ រាជធានីភ្នំពេញ ចំនួន០៤គ្រឿង ផងដែរ ។

ទន្ទឹមនឹងការលាងសម្អាតនោះដែរ លោកអភិបាលរង តាមរយៈសារព័ត៌មាន បានសំណូមពរឲ្យម្ចាស់ រថយន្តដឹកជញ្ជូនខ្សាច់ ឬដី ដែលកំពង់ចរាចរលើកំណាត់ផ្លូវ៦០ម៉ែត្រ ( វិថីសម្តេចតេជោ)និង មហាវិថី លោកឧកញ៉ា មហាភក្តីហ៊ុននាង (ផ្លូវ ៣០ម៉ែត្រ)ទាំងអស់ ត្រូវគ្រប់តង់ ឬសំណាញ់ឲ្យបានត្រឹមត្រូវល្អជៀសវៀងការធ្លាក់កម្ទេចដី ឬខ្សាច់ធ្លាក់ទៅលើដងផ្លូវ ធ្វើឲ្យខូចខាតដល់បរិស្ថានផ្លូវ ឬអាចបង្កឲ្យមានជាគ្រោះថ្នាក់ដល់ពលរដ្ឋអ្នកដំណើរ ដោយសារតែកត្តាអាចរអិលខ្លាំង។ ក្នុងនោះដែរ លោកអភិបាលរង ក៏បានសំណូមពរឲ្យម្ចាស់អាជីវកម្មដឹកដី ដឹកខ្សាច់ ឬទំនិញធុនធន់ទាំងអស់ សូមដឹកក្នុងចំណុះដែលច្បាប់បានកំណត់ ចៀសវាងការដឹកលើសទម្ងន់ ធ្វើឲ្យមានការប៉ះពាល់ធ្ងន់ធ្ងរ ដល់សណ្ឋានផ្លូវ ឬគុណភាពផ្លូវជាដើម៕

អត្ថបទ៖ លីហេង

The post អាជ្ញាធរខណ្ឌមានជ័យ បន្តលាងសម្អាតផ្លូវសំខាន់ៗ២ខ្សែ ដើម្បីសោភ័ណភាពដងផ្លូវ appeared first on Kampuchea Thmey Daily.

អាជ្ញាធរបន្តធ្វើអនាម័យតាមដងផ្លូវនិងស្ពាន ដើម្បីចូលរួមថែរក្សាបរិស្ថានក្នុងមូលដ្ឋាន

Sorn Phanith — Sun, 25 Oct 2020 04:27:08 +0000

អាជ្ញាធរមូលដ្ឋានខណ្ឌច្បារអំពៅរាជធានីភ្នំពេញ បានចុះធ្វើអនាម័យតាមដងផ្លូវនឹងលើស្ពាន ដើម្បីចូលរួមថែរក្សាបរិស្ថានក្នុងមូលដ្ឋាន បើទោះបីជាថ្ងៃឈប់សម្រាកការងារក៏ដោយ។

ជាក់ស្តែងនៅថ្ងៃអាទិត្យទី២៥ខែតុលានេះ បងប្អូនប្រជាពលរដ្ឋបានដើរលេងកម្សាន្តជាថ្ងៃឈប់សម្រាក ប៉ុន្តែអាជ្ញាធរខណ្ឌច្បារអំពៅចាប់តាំងពីថ្នាក់ខណ្ឌដល់សង្កាត់ទាំង៨បានសហការណ៍គ្នាធ្វើអនាម័យបោសសំអាតនឹងលាងផ្លូវទាំងលើកំណាត់ស្ពាន ដើម្បីកុំឲ្យមានសំរាមលើទីតាំង ដែលកំពុងធ្វើអនាម័យ។

ទាក់ទិននឹងការចុះធ្វើអនាម័យលើស្ពានព្រះមុនីវង្សចាស់ លោកយុិន វុធ ចៅសង្កាត់ច្បារអំពៅទី២បាននិយាយថា កម្លាំងអាជ្ញាធរសង្កាត់របស់លោកកំពុងបោសនិងលាងសំអាតលើស្ពានព្រះមុនីវង្សចាស់តាំងពីព្រឹកព្រលឹមអុរមកម្ល៉េះ។ លោកចៅសង្កាត់បន្តថា នៅលើទ្រូងស្ពាន គឺច្រើនតែកំណកខ្សាច់ដែលបង្កឡើងដោយរថយន្តដឹកខ្សាច់ឆ្លងកាត់ស្ពានហើយភាគច្រើនជាខ្សាច់សើមទើបធ្លាក់លើស្ពានបែបនេះ។

ដោយឡែកលោក គុយ គឹមហ៊ាង ប្រធានការិយាល័យសាធារណៈការសាលាខណ្ឌច្បារអំពៅបានឲ្យដឹងថា ការសំអាតអនាម័យលើដងផ្លូវរាល់ថ្ងៃនេះ គឺអាជ្ញាធរខណ្ឌច្បារអំពៅបានអនុវត្តន៍ជាប្រចាំបើពុំដូច្នោះទេ គឺកំណកដីនឹងសំរាមច្បាស់ជាពេញលើផ្លូវ ដោយសារអ្នកដំណើរមួយចំនួនបោះសំរាមចោលលើផ្លូវនឹងលើស្ពានតែម្តង។ ក្នុងនោះលោកប្រធានការវិន័យ បានសំណូមពរដល់បងប្អូនអ្នកធ្វើដំណើរក៏ដូចជាប្រជាពលរដ្ឋមេត្តាចូលរួមថែរក្សាបរិស្ថាន ដើម្បីឲ្យមូលដ្ឋានខណ្ឌច្បារអំពៅបានល្អស្អាតនិងគ្មានសំរាម ហើយអាជ្ញាធរក៏សុំការចូលរួមពីសំណាក់ប្រជាពលរដ្ឋទើបដំណើរការរក្សាបរិស្ថានបានទៅដោយជោគជ័យ៕

អត្ថបទ៖ នរា

សូមចុចអាន៖ អ្នកស្លាប់ស្លាប់ដោយទឹកជំនន់កើនដល់ ៤០នាក់ និងប៉ះពាល់២០ រាជធានី ខេត្ត

The post អាជ្ញាធរបន្តធ្វើអនាម័យតាមដងផ្លូវនិងស្ពាន ដើម្បីចូលរួមថែរក្សាបរិស្ថានក្នុងមូលដ្ឋាន appeared first on Kampuchea Thmey Daily.

ការបោសសំអាត Archives - Kampuchea Thmey Daily

នារដូវវស្សានេះ ក្រុមការងារដករុក្ខជាតិតាមប្រាសាទ បង្កើនកម្លាំងសម្អាតកាន់តែខ្លាំង

អាជ្ញាធរខណ្ឌមានជ័យ បន្តលាងសម្អាតផ្លូវសំខាន់ៗ២ខ្សែ ដើម្បីសោភ័ណភាពដងផ្លូវ

អាជ្ញាធរ​បន្ត​ធ្វើ​អនាម័យ​តាម​ដង​ផ្លូវ​និង​ស្ពាន​ ដើម្បី​ចូលរួម​ថែរក្សា​បរិស្ថាន​ក្នុង​មូលដ្ឋាន

អាជ្ញាធរបន្តធ្វើអនាម័យតាមដងផ្លូវនិងស្ពាន ដើម្បីចូលរួមថែរក្សាបរិស្ថានក្នុងមូលដ្ឋាន