បាងកក លែងក្លាយជាទីកន្លែងដែលល្អបំផុតសម្រាប់បរទេសមករស់នៅ

ratanak neang — Fri, 24 Nov 2023 08:19:29 +0000

បើយោងតាមការស្ទង់មតិចុងក្រោយពី InterNations ដែលជាសេវាកម្មលក់ទំនិញអនឡាញទៅកាន់ជនបរទេសនៅជុំវិញពិភពលោកបានឲ្យដឹងថា ទីក្រុងបាងកកបានធ្លាក់ចុះពីចំណាត់ថ្នាក់លេខ ៦ ទៅលេខ ៩ ក្នុងចំណោមទីក្រុងល្អបំផុតសម្រាប់ជនបរទេសមករស់នៅ និងធ្វើការក្នុងឆ្នាំ ២០២៣ នេះ ។

ក្រុងបាងកករបស់ប្រទេសថៃលែងក្លាយជាទីកន្លែងដែលល្អបំផុតសម្រាប់បរទេសមករស់នៅហើយ បន្ទាប់ពីត្រូវបានទម្លាក់ដោយទីក្រុងកូឡាឡាំពួប្រទេសម៉ាឡេស៊ី ដែលបច្ចុប្បន្នបានជាប់ចំណាត់ថ្នាក់លេខ ៨ នៅទូទាំងពិភពលោក និងជាទីក្រុងល្អបំផុតសម្រាប់នៅអាស៊ីអាគ្នេយ៍ ។

ដោយឡែក សម្រាប់ទីក្រុងចំនួន ៣ របស់អេស្ប៉ាញ ឈរនៅលើកំពូលគេសម្រាប់ជនបរទេសរស់នៅល្អបំផុត រួមមាន ទីក្រុង Malaga ស្ថិតនៅលំដាប់លេខ ១, ទីក្រុង Alicante លេខ ២ និងទីក្រុង Valencia ស្ថិតលេខ ៣ ។ ចំណែកចំណាត់ថ្នាក់លេខ ៤ បានទៅលើទីក្រុង Al Khaimah, លេខ ៥ ទីក្រុង Abu Dhabi របស់អារ៉ាប៊ីសាអូឌីត ខណៈទីក្រុង Madrid ស្ថិតនៅទី ៦ ហើយ Mexico City លំដាប់ទី ៧ ។

សូមបញ្ជាក់ថា InterNations មានសមាជិក ៥ លាននាក់នៅទូទាំងពិភពលោក ហើយការស្ទង់មតិត្រូវបានធ្វើឡើងជារៀងរាល់ឆ្នាំ ដើម្បីជ្រើសរើសទីក្រុងល្អបំផុត និងអាក្រក់បំផុតសម្រាប់ជនបរទេសមករស់នៅ និងធ្វើការនៅទូទាំងពិភពលោក ៕

ប្រែសម្រួល៖ នាង រតនៈ

ប្រភព៖ Nation Thailand

The post បាងកក លែងក្លាយជាទីកន្លែងដែលល្អបំផុតសម្រាប់បរទេសមករស់នៅ appeared first on Kampuchea Thmey Daily.

កងទ័ពតំបន់ប្រតិបត្តិការសឹករងកំពង់ធំបង្កបង្កើនផលចិញ្ចឹមសត្វ លើកកម្ពស់ជីវភាពរស់នៅរបស់កងទ័ព ក្នុងបរិបទកូវីដ១៩

Sorn Phanith — Tue, 15 Jun 2021 06:16:31 +0000

កងកម្លាំងផ្នែកសឹករងក្រុងស្ទឹងសែនចំណុះឲ្យ បញ្ជាការដ្ឋានតំបន់ប្រតិបត្តិការសឹករងកំពង់ធំ បានបន្តសកម្មភាពការងារបង្កបង្កើនផល ចិញ្ចឹមសត្វយ៉ាងសកម្ម ដើម្បីលើកកម្ពស់ជីវភាពរស់នៅ របស់កងទ័ពក្នុងបរិបទកូវីដ១៩ ដោយអនុវត្តតាមផែនការប្រឡងប្រណាំងទាំងប្រាំខ្លឹមសារ របស់បញ្ជាការដ្ឋានយោធភូមិភាគទី៤។

ឧត្តមសេនីយ៍ទោ សោម ស៊ុន រួមទាំងថ្នាក់ដឹកនាំ នៃបញ្ជាការតំបន់ប្រតិបត្តិការសឹករងកំពង់ធំ បានចុះត្រួតពិនិត្យសកម្មភាព ការងារបង្កបង្កើនផលនិងចិញ្ចឹមសត្វ តាមការចាត់តាំងរបស់ប្រធានផែន ចលនាប្រលងប្រឡងប្រណាំង ចំណោមខេត្តទាំងបួនចំណុះយោធភូមិភាគ ក្នុងដំណាក់កាល ប្រឆាំងការពារទប់ស្កាត់ការឆ្លងមេរោគកូវីដ១៩ នៅរសៀលថ្ងៃទី១៣ ខែមិថុនា ឆ្នាំ២០២១។

ឧត្តមសេនីយ៍ទោ សោម ស៊ុន បានមានប្រសាសន៍ថា លោកវរសេនីយ៍ទោ សៀង ហុកឃាន់ មេបញ្ជាការផ្នែកសឹករងក្រុងស្ទឹងសែន ដែលត្រូវបានថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ចាត់តាំងជាប្រធានផែន ប្រឡងប្រណាំងរបស់ផ្នែកសឹករងក្រុងស្រុកទាំង៩ជាថ្មីម្ដងទៀត ក្រៅពីភារកិច្ចត្រៀមកម្លាំងចល័តអន្តរាគមន៍តាមបទបញ្ជារបស់ថ្នាក់លើ ការហ្វឹកហ្វឺនរៀនសូត្រ និងការសហការការពារសន្តិសុខសុវត្ថិភាពនៅក្នុងមូលដ្ឋាន អង្គភាពបានដំណើរការចិញ្ចឹមសត្វ ។

សកម្មភាពសត្វ ដែលកំពុងចិញ្ចឹម មានសត្វមាន់ទាជាង៣០០ក្បាល ស្រះចិញ្ចឹមត្រីមានចំនួន២ស្រះ មានត្រីជាង ៤ ម៉ឺន ៥ពាន់ក្បាល សម្រាប់ផ្គត់ផ្គង់ការហូបចុកប្រចាំថ្ងៃនៅក្នុងអង្គភាព និងសត្វគោចំនួន 20 ក្បាលសម្រាប់ត្រៀមចែកជូនដល់យោធិនដែលត្រូវចូលនិវត្តន៍ក្នុងមួយនាក់មួយក្បាល និងសម្រាប់លក់ដូរដោះស្រាយការងារក្នុងអង្គភាព ក្នុងនោះដំណាំ មានត្រកួន ស្ពៃ ឆៃថាវ តាំងអោ ជីគ្រប់មុខ សម្រាប់ហូបចុកប្រចាំថ្ងៃនៅក្នុងរោងបាយរបស់អង្គភាពនឹងបានផ្ដល់ជូនដល់ក្រុមគ្រួសារនៅខាងក្រោយសម្រាប់ហូបចុកផងដែរ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះអង្គភាពផ្នែកសឹករងក្រុងស្ទឹងសែន ប្រធានផែនចលនាប្រឡងប្រណាំងលើផ្នែកសឹករងក្រុងស្រុកទាំង៩ បានអនុវត្តបានយ៉ាងល្អប្រសើរ ក្នុងចលនាប្រឡងប្រណាំងទាំង៥ ដែលយោធភូមិភាគទី៤ បានដាក់ចេញ ពិសេសចលនាប្រឡងប្រណាំងបង្កបង្កើនផលចិញ្ចឹមសត្វលើកស្ទួយជីវភាពរបស់កងទ័ពក្នុងបរិបទដែលប្រទេសជាតិយើងកំពុងរងផលប៉ះពាល់ដោយសារការឆ្លងរីករាលដាលមេរោគកូវី១៩៕

អត្ថបទ៖ ប៊ុន រដ្ឋា

The post កងទ័ពតំបន់ប្រតិបត្តិការសឹករងកំពង់ធំបង្កបង្កើនផលចិញ្ចឹមសត្វ លើកកម្ពស់ជីវភាពរស់នៅរបស់កងទ័ព ក្នុងបរិបទកូវីដ១៩ appeared first on Kampuchea Thmey Daily.

ការរស់នៅ Archives - Kampuchea Thmey Daily

បាងកក លែងក្លាយជាទីកន្លែងដែលល្អបំផុតសម្រាប់បរទេសមករស់នៅ