​ក្នុង​សន្ទរកថា​របស់ខ្លួន លោក​ឧកញ៉ា ឡេង ប្រុស បាន​ថ្លែងថា លោក​ពិត​ជាមាន​ក្ដី​សោមនស្ស​ក្រៃលែង ដែល​បាន​ចូលរួម​កម្មវិធី ខ្មុក​ខោល​។ លោក​ថា កម្មវិធី​នេះ ពិតជា​បានរួម​ចំណែក​យ៉ាងសំខាន់ ក្នុងការ​បំផុស​ការចូលរួម​រប​ស់​ប្រជាពលរដ្ឋ​ខ្មែរ និង​យុវជន ឱ្យ​ឈ្វេងយល់​កាន់តែច្បាស់​អំពី​ទម្រង់​សិល្បៈ​បុរាណ ជាពិសេស​ល្ខោនខោល​ខ្មែរ ដើម្បី​បន្ត​សាមគ្គី​គ្នា​ថែរក្សា ការពារ ឱ្យបាន​ស្ថិតស្ថេរ​គង់វង្ស​ជានិច្ច​និរន្ត​។

​ទន្ទឹមគ្នា​នោះ លោក​ឧកញ៉ា អគ្គនាយក​ក្រុមហ៊ុន ណា​វ៉ា​ត់​ត្រា ខ្នាត​យក្ស ក៏បាន​អំពាវនាវ សូម​ប្រជាពលរដ្ឋ​ខ្មែរ​បន្ត​ចូលរួម​ទាំងអស់គ្នា ថែរក្សា​បេតិកភណ្ឌ​វប្បធម៌​ដ៏​សម្បូរបែប​ដែល​បុព្វបុរស​យើង បាន​បន្សល់ទុក​រហូត​ដល់​សព្វថ្ងៃ​។ លោក​បន្តថា ការចូលរួម​គ្រប់រូប​ភាព​នៃ​ការថែរក្សា អភិរក្ស និង​ជួយ​ផ្សព្វផ្សាយ​ពី​សិល្បៈ​វប្បធម៌​ដូនតា​យើង មិន​ត្រឹមតែ​ជា​សក្ខីភាព​បង្ហាញ​ពី​ភាពរុងរឿង​ថ្កុំថ្កើង​គួរ​ជាទី​ស្ញប់ស្ញែង​នៃ​មនុស្សជាតិ​ប៉ុណ្ណោះ​ទេ ថែមទាំង​មាន​តួនាទី​ដ៏​សំខាន់​ក្នុងការ​ផ្សារភ្ជាប់​រវាង​មនុស្ស និង​មនុស្ស សង្គម និង​សង្គម ព្រមទាំង​រួមចំណែក​លើកកម្ពស់​សេដ្ឋកិច្ចជាតិ និង​ភាពសុខសាន្ត​របស់​ប្រជាពលរដ្ឋ​ប្រកបដោយ​ប្រសិទ្ធភាព​ផងដែរ​។

​កម្មវិធី “​ខ្មុក​ខោល​” គឺ​គម្រោង​មូលនិធិ ១០០០​រៀល ដើម្បី​ឆ្ពោះទៅកាន់​ព្រឹត្តិការណ៍ សម្ដែង​ល្ខោនខោល​ដ៏​អស្ចារ្យ នា​ចុងឆ្នាំ​ ២០២២ ក្រោម​ការរៀបចំ និង​កៀរ​គង​មូលនិធិ​សប្បុរសជន​ក្នុង និង​ក្រៅប្រទេស ដោយ​លោក ស៊ុប ស័​ក្ខ​រា ប្រធាន​គណៈកម្មការ​រៀប​ចំ​ព្រឹត្តិការណ៍​សម្ដែង​សិល្បៈ​ល្ខោនខោល​ខ្នាត​ធំ រួមទាំង​សហការី​ជាច្រើនរូប​ទៀត​។

​គួរ​រំ​ឮ​ក​ឡើងវិញ​ដែរ​ថា របាំ​ព្រះរាជ​ទ្រព្យ ត្រូវបាន​ប្រកាស​ទទួល​ស្គាល់​ដោយ​អង្គការ​យូណេស្កូថា​ ជា​ស្នាដៃឯក​ផ្នែក​វេហា​កោសល្យ​នៃ​មនុស្សជាតិ នៅ​ថ្ងៃទី​ ០៧ ខែវិច្ឆិកា ឆ្នាំ​ ២០០៣​។ ដោយឡែក ល្ខោន​ស្រមោល​ស្បែក​ធំ ត្រូវបាន​ប្រកាស​ទទួល​ស្គាល់ នៅ​ថ្ងៃទី ​២៥ ខែវិច្ឆិកា ឆ្នាំ​ ២០០៥​។ សម្រាប់​ល្ខោនខោលវិញ​ ក៏ត្រូវ​បានដាក់​បញ្ចូល​ក្នុង​បញ្ជី​សម្បត្តិ​បេតិកភណ្ឌ​អរូបី​នៃ​មនុស្សជាតិ ដោយ​អង្គការ​យូណេស្កូថា​ ទម្រង់​ល្ខោន​ដ៏​ចំណាស់​របស់​កម្ពុជា ដែល​ត្រូវ​គាំពារ និង​ត្រូវ​យកចិត្តទុកដាក់​ជា​បន្ទាន់ កាលពី​ថ្ងៃទី​ ២៨ ខែវិច្ឆិកា ឆ្នាំ​ ២០១៨៕​

The post ឧកញ៉ា ឡេង ប្រុស ឧបត្ថម្ភ ២០ លានរៀល ក្នុងកម្មវិធីខ្មុកខោល ជំរុញ និងលើកទឹកចិត្តយុវជនផ្សព្វផ្សាយសិល្ប:វប្បធម៌បុរាណខ្មែរទៅអន្តរជាតិ ក្នុងនាមកូនចៅជំនាន់ក្រោយ appeared first on Kampuchea Thmey Daily.

ការសម្ដែងនេះ បានរំលឹក និងគាស់កកាយនូវកេតនភណ្ឌឧបករណ៍តន្ត្រីខ្មែរ ដែលបានកប់បាត់ និងអវត្តមានក្នុងសង្គមកម្ពុជាបច្ចុប្បន្ន ដោយសារតែប្រទេសជួបប្រទះនូវសង្គ្រាម និងសម័យអន្តរកាលជាច្រើនជំនាន់ ឯឧបករណ៍តន្ត្រីខ្លះទៀត ក៏មានវ័យចំណាស់ខ្លាំង សឹងតែលែងមានគេស្គាល់ តួយ៉ាងរួមមាន អង្កួច ស្លឹក ស្នែង គែន និង ពិណជាដើម។

ម្យ៉ាងវិញទៀត ទស្សនីយភាពដ៏ពិសេសនេះ គឺដើម្បីបង្ហាញពីភាពច្នៃប្រឌិត នៃការច្របាច់បញ្ចូលគ្នា នៃឧបករណ៍ដ៏កម្រទាំងអស់នេះ រួមជាមួយឧបករណ៍ភ្លេងដទៃទៀត ក្នុងគោលបំណង បំផុសទឹកចិត្តស្រឡាញ់ និងគាំទ្រ ហើយរួមគ្នាថែរក្សាការពារ កេរដំណែលវប្បធម៌ដ៏វិសេសវិសាលរបស់បុព្វបុរសខ្មែរ ដែលបានបន្សល់ទុកតាំងពីបុរាណកាលមក ក្រោមម្លប់នៃសុខសន្តិភាពនាពេលបច្ចុប្បន្ននេះ។

គួររំឭកថា កម្មវិធី “វង់តន្រ្តីខ្មែរ” រដូវកាលទី២ ត្រូវបានផ្តួចផ្តើមគំនិត​ និងរៀបចំឡើងដោយ សហភាពសហព័ន្ធយុវជនកម្ពុជា ខេត្តស្វាយរៀង ហើយមានការគាំទ្រដោយ ក្រសួងវប្បធម៌ និងវិចិត្រសិល្បៈ និងសមាគមមិត្តតន្រ្តីករ​ និងសហការផ្សព្វផ្សាយដោយ ស្ថានីយទូរទស្សន៍ BTV។

កម្មវិធី “វង់តន្ត្រីខ្មែរ” រៀបចំឡើងក្នុងគោលបំណង ចូលរួមលើកកម្ពស់ ការថែរក្សា ការពារសិល្បៈ ទំនៀមទម្លាប់ ប្រពៃណី វប្បធម៌ដែលជាអត្តសញ្ញាណជាតិ និងផ្សព្វផ្សាយឧបករណ៍តន្ត្រីខ្មែរទៅ កាន់ប្រជាពលរដ្ឋ ជាពិសេសយុវជនខ្មែរជំនាន់ក្រោយ និងបរទេសបានស្គាល់ឱ្យកាន់តែច្រើន។ ទន្ទឹមនេះ កម្មវិធី “វង់តន្ត្រីខ្មែរ” ក៏បានលើកតម្លៃ និងសម្រស់នៃឧបករណ៍បុរាណ និងសម្លៀកបំពាក់ប្រពៃណីខ្មែរ ដោយតម្រូវឱ្យ បេក្ខភាពចូលរួមប្រកួត រៀបចំខ្លួន ស្លៀកពាក់ទៅ តាមទម្រង់ ស្រស់ស្អាតតាមបែបប្រពៃណីបុរាណខ្មែរក្នុងអំឡុងពេលប្រគំក្នុងការប្រកួត ហើយក្រុមបេក្ខភាពចូលរួមប្រកួតគឺ ត្រូវវាយតម្លៃដោយគណៈកម្មការសាស្រ្តាចារ្យមេប្រយោគ ដែលពោរពេញដោយបទពិសោធក្នុងវិស័យសិល្បៈបុរាណខ្មែរ។

គួរបញ្ជាក់ថា ជយលាភីលេខ១ កម្មវិធី “វង់តន្រ្តីខ្មែរ” រដូវកាលទី២ ឆ្នាំ ២០២១ បានទៅ លើ ក្រុមទេពបទុមវង្សពិណពាទ្យ, ម្ចាស់ជយលាភីលេខ២ គឺក្រុមយុវជនល្ខោនខោលកម្ពុជា និងម្ចាស់ជយលាភីលេខ៣ គឺក្រុមមន្ទីរវប្បធម៌ខេត្តបន្ទាយមានជ័យ៕

The post វង់សុនន្ទកវីតន្ត្រីខ្មែរ បង្ហាញឧបករណ៍ភ្លេងសឹងបាត់បង់ ក្នុងកម្មវិធីវង់តន្ត្រីខ្មែរ វគ្គផ្ដាច់ព្រ័ត្រ appeared first on Kampuchea Thmey Daily.

លោក ឃីម មាឃ ប្រធានសមាគម សុវណ្ណភូមិ មានប្រសាសន៍ប្រាប់ កម្ពុជាថ្មី ថា សមាគមរបស់លោកនឹងមានការសម្ដែងសិល្បៈបុរាណចម្រុះឡើងវិញនៅចុងឆ្នាំ ២០២១នេះ ព្រោះសិស្សសិល្បៈ កំពុងជាប់ត្រៀមប្រឡងបញ្ចប់ឆ្នាំសិក្សារបស់ពួកគេនៅឡើយ។

លោក ឃីម មាឃ មានប្រសាសន៍បញ្ជាក់ថា៖ “យើងបានរៀបចំប្រព័ន្ធភ្លើង ប្រព័ន្ធសំឡេង ឆាកសម្ដែងរួចរាល់អស់ហើយ យើងនៅរង់ចាំតែរៀបចំកម្មវិធីពេវេលាសម្ដែង និងការផ្សព្វផ្សាយ។ ប្រហែលជានៅចុងឆ្នាំនេះ គឺនៅពាក់កណ្ដាលខែ ១២ [ខែធ្នូ] នឹងរៀបចំសម្ដែងសាកល្បង ដោយជាដំបូងគឺជាការសម្ដែងជាលក្ខណៈអញ្ជើញចូលទស្សនា ដោយមិនលក់សំបុត្រ ដើម្បី [ការសម្ដែងសិល្បៈបុរាណ] មានសកម្មភាពឡើងវិញ”។

ប្រធានសមាគម សុវណ្ណភូមិ រូបនេះ លើកឡើងថា នៅពេលរដ្ឋបើកឡើងវិញបែបនេះ លោក ក៏ដូចជាសិល្បករទាំងអស់ មានទឹកចិត្តសប្បាយរីករាយ និងសង្ឃឹមថា សិល្បករនឹងមកជុំគ្នា ដើម្បីកសាងក្រុមការងារឡើងវិញ បន្ទាប់ពីខកខានសម្ដែងយូរហើយ ប្រហែលជាង២ឆ្នាំមកនេះ។

លោក ឃីម មាឃ មានប្រសាសន៍អំពីការបង្ការសុវត្ថិភាពសុខភាពពីជំងឺកូវីដ-១៩ ថា៖ “ចំពោះការសម្ដែង យើងនៅតែគោរពវិធានការសុខាភិបាល និងការណែនាំរបស់រាជរដ្ឋាភិបាល ដោយសិល្បករ និងទស្សនិកជន ត្រូវអនុវត្ត ៣កុំ៣ការពារ មានបណ្ណចាក់វ៉ាក់សាំង ហើយត្រូវកំណត់ចំនួនអ្នកចូលរួម”។

ប្រធានសមាគម សុវណ្ណភូមិ ដដែលនេះ បានរំលឹកថា មួយរយៈកន្លងមកមិនមានការសម្ដែងជូនសាធារណជនចូលទស្សនាក្ដី ប៉ុន្តែការមានការសម្ដែងដោយថតទុកសម្រាប់អបអរពិធីបុណ្យជាតិធំៗ ជាក់ស្ដែងកាលពីខែតុលា កន្លងទៅថ្មីៗនេះ ក្រុមសិល្បៈ សុវណ្ណភូមិ ទើបបានថតការសម្ដែងល្ខោនស្បែកតូច រយៈពេល ១៥នាទី  ក្រោមប្រធានបទ “ស្ថានភាពរាតត្បាតនៃជំងឺកូវីដ-១៩” ដើម្បីរៀបចំថតជាវីដេអូ សម្រាប់ការចាក់ផ្សាយក្នុងមហោស្រព International Rain Festival តាមបណ្ដាញ YouTube ក្នុងខែមករា ឆ្នាំ២០២២ ខាងមុខនេះ ជាមួយនឹងប្រទេសជប៉ុន ថៃ និងឥណ្ឌូនេស៊ី។

ប្រធានសមាគម សុវណ្ណភូមិ ខាងលើ មានក្ដីសង្ឃឹមថា បងប្អូនប្រជាពលរដ្ឋខ្មែរនឹងគាំទ្រសិល្បៈបុរាណជាតិជាបន្តទៀតនៅពេលបើកសម្ដែងឡើងវិញ ជាមួយគ្នានេះ លោកសំណូមពរ នៅពេលមានការសម្ដែងសិល្បៈបុរាណ សូមមហាជនអញ្ជើញចូលមកទស្សនា ក៏ដូចជាលើកទឹកចិត្តដល់សិល្បករ។

លោក ឃីម មាឃ មានប្រសាសន៍ថា៖ “សមាគមគ្រោងនឹងបើកការសម្ដែងប្រចាំសប្ដាហ៍ឡើងវិញនេះ ដោយការសម្ដែងនឹងមានការផ្លាស់ប្ដូរទស្សនីយភាពផ្សេងៗ មានដូចជា ល្ខោនស្បែងតូច ស្បែកធំ យីកេ ល្ខោនបាសាក់ របាំ ជាដើម។

ជាមួយគ្នានេះ លោក ឃីម មាឃ មានក្ដីរំពឹងថា បន្ទាប់ពី កម្ពុជាបើកប្រទេសឡើងវិញ ក៏ដូចជាទទួលទេសចរវ៉ាក់សាំង នោះនឹងមានភ្ញៀវទេសចរបរទេសថែមទៀតចូលមកទស្សនាការសម្ដែងសិល្បៈបុរាណជាតិកាន់តែច្រើន។

គួរបញ្ជាក់ថា នៅទីតាំងសមាគមន ដែលនៅក្នុងបរិវេណ សាលាមធ្យមវិចិត្រសិល្បៈ នៃក្រសួងវប្បធម៌ និង វិចិត្រសិល្បៈ ដែលស្ថិតនៅ វិថីបណ្ឌិតម៉ុងឬទ្ធី ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

គួររំលឹកថា ក្រសួង​វប្ប​ធម៌​ និង​វិ​ចិត្រ​សិល្បៈ​ បាន​ប្រកាស​បើក​ដំ​ណើរ​ការ​ឡើង​វិញ​នូវ​ការ​ចូល​​ទស្សនា​​សារ​មន្ទី​រ រោង​​ភាព​​យន្ត និង​រោង​សម្ដែង​សិល្បៈ ក្នុង​រាជ​ធា​នី​ភ្នំ​ពេញ​ ចាប់​ពី​ថ្ងៃ​ទី​៣០ ខែ​តុ​លា ឆ្នាំ​២០២១​នេះ​​ទៅ។

យោង​តាម​សេចក្ដីជូន​ដំ​ណឹង​របស់​ក្រសួង​វប្បធម៌ ​និងវិចិត្រ​សិល្បៈ​ បាន​បញ្ជាក់​ ការ​​បើក​​ដំណើរ​ការ​ឡើង​វិញ​នូវ​ការ​​ទ​ស្សនា​សារមន្ទី​រ រោង​ភាព​យន្ត និង​រោង​សិល្បៈ​នេះ ត្រូវធ្វើឡើង​ដោយ​​​ប្រតិ​បត្តិនិង​អនុ​វត្តយ៉ាង​តឹង​រ៉ឹង​​នូវ​គោលការណ៍​ប្រ​តិបត្តិ​ស្ដង់​ដារ ​(SOP) និង​វិធាន​សុខា​ភិ​បាល ក្នុងនោះ​​​ អ្នកចូលទស្សនាចាប់ពីអាយុ ៦ឆ្នាំ​ឡើងទៅ ត្រូវតែបង្ហាញកាតវ៉ាក់សាំងការពារជំងឺកូវីដ-១៩ និងស្កេនកូដ QR។

បន្ថែម​ពី​នោះ​ ក្រសួងបានណែនាំឱ្យ​​​ពាក់​ម៉ាសការពារជានិច្ច​​ វាស់​កម្ដៅចំពោះ​​ទស្សនិកជន​គ្រប់រូប ដែល​ចេញចូល​ក្នុង​បរិវេណ​រោងភាពយន្តឬ​រោង​សម្ដែង​សិល្បៈ ខណៈការ​ទិញ​សំ​បុត្រ​ ក្រសួង​លើក​ទឹក​ចិត្ត​ឱ្យទស្សនិក​ជន​​ទិញ​តាម​​ប្រ​ព័ន្ធ​អនឡាញ (online) ឬតាម​អែប (App) របស់​រោង​ភាពយន្ត ​ឬរោង​​សម្ដែង ដើម្បី​​កាត់​​បន្ថយ​ការ​លក់​សំ​​បុត្រ​ដោយ​ផ្ទាល់។ ចំពោះ​ការ​ទិ​ញ​អាហា​រសម្រន់ ត្រូវរក្សា​អនាម័យ​ឱ្យ​​បាន​ខ្ពស់ រោង​ភាព​យន្តឬ​រោង​សម្ដែង ​ត្រូវ​រក​វិ​ធាន​ការ​បង់​ប្រាក់​ដែល​ចៀស​វាង​ការ​បង់​ប្រាក់​ដោយ​ផ្ទាល់​តាម​ដែល​អាច​ធ្វើ​ទៅ​បាន។

លើស​ពី​នេះ​ ក្រសួងបាន​​​​តម្រូវ​​ឱ្យ​ទស្សនិកជន​ចូល​បានតែ ៥០ ​ភាគរយនៃ​ចំនួន​កៅអី​សរុប​តែប៉ុណ្ណោះ​ នៅក្នុង​រោង​បញ្ចាំង ​​ឬ​រោង​សម្ដែង​សិល្បៈនីមួយៗ និង​ត្រូវ​រក្សា​គម្លាតរវាង​ទស្សនិកជន​ពី​ម្នាក់​ទៅ​ម្នាក់ទៀតយ៉ាងតិចចន្លោះ​មួយ​ម៉ែត្រ​​កន្លះ។ ជាមួយគ្នា​នោះ ទ្វារ​នៃ​រោង​ប​ញ្ចាំង ​រោង​សម្ដែង​សិល្បៈ ត្រូវ​ទុក​ឱ្យ​ចំហ ​មុននឹង​ចាប់​ប​ញ្ចាំ​ង​ភាពយន្តឬ​សម្តែងសិល្បៈ​ម្តងៗ និងត្រូវ​រក្សា​សីតុណ្ហភាព​ក្នុង​រោង​ប​ញ្ចាំង​ឬ​រោង​សម្ដែង​សិល្បៈ ជា​មធ្យម​ចន្លោះ​ពី២៤ទៅ៣០អង្សា៕

អត្ថបទ៖ ​ច័ន្ទ វីរៈ

The post ការសម្ដែងសិល្បៈបុរាណប្រចាំសប្ដាហ៍ ត្រៀមដំណើរការឡើងវិញ នៅខែក្រោយ appeared first on Kampuchea Thmey Daily.