ក្នុងឯកសារ​ចុះថ្ងៃទី ៣០ ខែមុន ក្រុមហ៊ុនមេ Central Plaza Hotel Public Company Limited (Centel) ខ្លួននឹង​រំលាយក្រុមហ៊ុនបណ្តាក់ទុនរួមគ្នា ORC Coffee Passion Group (ORCG) ដែលដំណើរការហាងកាហ្វេអាម៉ាហ្សូន នៅទូទាំងប្រទេសវៀតណាម​។

ក្រុមហ៊ុនបណ្តាក់ទុនរួមគ្នានេះ ត្រូវបានបង្កើតឡើងរវាងក្រុមហ៊ុនបុត្រសម្ព័ន្ធដោយប្រយោលរបស់ Centel គឺ Central Restaurants Group (Vietnam) ដែលមានភាគហ៊ុន ៤០ ភាគរយ​ និងក្រុមហ៊ុន PTTOR International Holdings (Singapore) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនថាមពលរដ្ឋថៃ PTTOR (PTT Oil and Retail Business) ដែលកាន់កាប់ភាគហ៊ុន ៦០ ភាគរយ។​

ឯកសារដែលផ្ញើរទៅកាន់ ផ្សារភាគហ៊ុនថៃ (SET) ក្រុមហ៊ុន Centel បាននិយាយថា ការរំលាយក្រុមហ៊ុនដំណើរការហាងកាហ្វេអាម៉ាហ្សូននេះ ​ឆ្លុះបញ្ចាំងពីចេតនារបស់ខ្លួនក្នុងការ «កែសម្រួលអាទិភាពអាជីវកម្មឡើងវិញ» ដើម្បីឆ្លើយតបទៅនឹងទីផ្សារកាហ្វេដែលមាន «ការប្រកួតប្រជែងដ៏ខ្លាំងក្លា​នៅ​វៀតណាម»។

គួររំឭកថា កាហ្វេអាម៉ាហ្សូន របស់ក្រុមហ៊ុនថៃ PTTOR ​បាន​ចាប់ផ្ដើមប្រតិបត្តិការនៅវៀតណាម​ដំបូងនៅឆ្នាំ ២០២០ ដើម្បីជាផ្នែកមួយ​នៃការពង្រីកម៉ាកយីហោរបស់ខ្លួន​លើទីផ្សារអន្តរជាតិ​។ យ៉ាងណាមិញ វាបាន​រងនូវការប្រកួតប្រជែងយ៉ាងខ្លាំងក្លាទាំងទីផ្សារក្នុងស្រុក និងក្រៅស្រុក។ កាហ្វេធំំៗនៅវៀតណាម វាតទីលើទីផ្សារយ៉ាងរឹងមាំរួចហើយ ដូចជាហាងកាហ្វេ Highlands Coffee, Phuc Long, និង The Coffee House ​រួមទាំង​ម៉ាកយីហោអាមេរិក Starbucks ​ជាដើម៕

​

The post កាហ្វេអាម៉ាហ្សូន ថៃ ​ដកខ្លួនពីវៀតណាម ដោយសារចាញ់ការប្រកួតប្រជែង appeared first on Kampuchea Thmey Daily.