លោក ស៊ុយ កុកធាន អនុប្រធានសមាគមស្វាយចន្ទីកម្ពុជាប្រាប់កម្ពុជាថ្មីនៅថ្ងៃទី ២៥ ខែកញ្ញា ឆ្នាំ ២០២៤ថា ក្រុមហ៊ុន CSNC Agriculture Co., Ltd. សហការជាមួយក្រុមហ៊ុន Midori Climate Partner Pte បានសាងសង់រោងចក្របាន ៨០% នៅក្នុងខេត្តកំពង់ធំ ហើយគ្រោងបញ្ចប់នៅចុងឆ្នាំនេះ។ រោងចក្រមានទំហំដី ៦០ ហិកតា ដែលមានសមត្ថភាពផលិតកាបូន ៤០ តោន ក្នុងមួយថ្ងៃ។

លោក ស៊ុយ កុកធានថ្លែងថា៖ «​នៅពេលដែលរោងចក្រដំណើរការ ជាអត្ថប្រយោជន៍មួយសម្រាប់ប្រជាកសិករ ដែលជារបបគំឃើញថ្មី»។

លោក អួន ស៊ីឡុត ប្រធានសមាគស្វាយចន្ទីកម្ពុជាបានប្រាប់ថា ដំណើរការកែច្នៃគ្រាប់ស្វាយ​ចន្ទីឆៅមាន ៣ ដំណាក់កាល​ទី១ យើងត្រូវការរោង​ចក្រ​កែច្នៃ ក្នុងនោះ ១ តោនគ្រាប់ចន្ទីឆៅ ទទួលបានសំបក ៧៥០ គីឡូ​ក្រាម។ ទី២ យើងត្រូវ យកសំបក ទៅគាបយកប្រេង ដោយ ៣ គីឡូក្រាមសំបក ទទួលបានប្រេងមួយគីឡូ។

ទី៣ កាកសំណល់ចុងក្រោយដែលសល់ពីគាប យកទៅឱ្យរោងចក្រទី៣ ដែលអាចកែច្នៃទៅ​ជា​កាកសំណល់សរីរាង្គ ផលិតជាជី និងធ្យូងឧស្សាហកម្ម។

បើតាមប្រធានសមាគមរូបនេះ ក្រុមហ៊ុនសិង្ហបុរីនេះ ជាក្រុមហ៊ុនទី៣ ដែលប្រធានក្រុមហ៊ុន​បាន​លើកសំណើរថា ប្រសិនបើកម្ពុជាអាចផ្គត់ផ្គង់សំបកចុងក្រោយ ១ ម៉ឺនតោន ក្រុមហ៊ុននឹងបើក​រោង​ចក្រផលិត ដើម្បីទ្រទ្រង់អព្យាក្រឹត្យកាបោន ហើយយកសំណល់​ទាំងអស់ពីស្វាយចន្ទី ដើម្បី​យក​មកធ្វើធ្យូងឧស្សាហកម្ម។

លោក អួន ស៊ីឡុត បញ្ជាក់ថា លទ្ធផលផ្គត់ផ្គង់សំបកចុងក្រោយ នៅកម្ពុជានៅមានកម្រិត ដោយ​សារ​បច្ចុប្បន្ន មានតែក្រុមហ៊ុន Santana Agro Products តែមួយ ដែលបានចាប់ផ្ដើម​គាបប្រេង​នៅឆ្នាំនេះ ហើយមិនដឹងថា សមត្ថភាពទទួលបានប៉ុណ្ណា ប៉ុន្តែលោក សង្ឃឹមថា ២ ឬ៣ ឆ្នាំខាង​មុខ ក្រុមហ៊ុនជប៉ុន MIRATH Agri Tech អាចកែច្នៃបាន នោះនឹងនៅសល់សំបក​ហើយ​បន្ត​រុញទៅរោងចក្ររោងចក្រកែច្នៃចុងក្រោយ៕

អត្ថបទ៖ ឡេង ដេត

The post ក្រុមហ៊ុនសិង្ហបុរី សាងសង់រោងចក្រ ផលិតកាកសំណល់ពីស្វាយចន្ទីនៅកម្ពុជា appeared first on Kampuchea Thmey Daily.