សង្រ្គាមតម្លៃនៅចិន ជំរុញឱ្យ Starbucks បញ្ចុះតម្លៃកាហ្វេដើម្បីប្រកួតប្រជែង

Huon Dina — Mon, 09 Jun 2025 07:14:14 +0000

ក្រុមហ៊ុនហាងកាហ្វេអាមេរិក Starbucks នៅចិន នាថ្ងៃចន្ទនេះ បានប្រកាសពីការបញ្ចុះតម្លៃនៃមុខកាហ្វេរបស់ខ្លួនជាមធ្យម ៥ យន់ (០,៧០ ដុល្លារ) ទូទាំងប្រទេស ចំពេលការប្រកួតប្រជែងក្នុងសង្រ្គាមតម្លៃកាន់តែក្ដៅឡើងៗ ខណៈអតិថិជនបង្កើនការប្រុងប្រយ័ត្នចំពោះការចំណាយរបស់ខ្លួនដោយសារបញ្ហាសេដ្ឋកិច្ច។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ក្នុងសេចក្ដីប្រកាសចេញផ្សាយនៅលើបណ្ដាញសង្គមចិន Weixin ក្រុមហ៊ុន Starbucks បាននិយាយថា ខ្លួននឹងផ្តល់ជូននូវតម្លៃសមរម្យសម្រាប់ភេសជ្ជៈរាប់សិបមុខ រួមទាំងភេសជ្ជៈមិនមែនកាហ្វេ និងហ្វ្រាបពូឈីណូ (Frappuccino) ចាប់ពីថ្ងៃអង្គារ។

គេសម្គាល់ឃើញថា ចិនគឺជាទីផ្សារលក់ធំទី២របស់ក្រុមហ៊ុន Starbucks បន្ទាប់ពីសហរដ្ឋអាមេរិក ប៉ុន្តែការប្រកួតប្រជែងនៅទីនោះមានភាពស្វិតស្វាញ ខណៈអ្នកប្រើប្រាស់បានចំណាយតិច ដោយសារតែបញ្ហាសេដ្ឋកិច្ចនិងការព្រួយបារម្ភខាងវិស័យការងារ។

បើតាម Starbucks ការបញ្ចុះតម្លៃ នឹងធ្វើឱ្យគ្រឿងផឹករបស់ខ្លួនមានតម្លៃទាបបំផុតត្រឹម ២៣ យន់។ ដៃគូប្រកួតប្រជែងក្នុងស្រុកចិន ដូចជាកាហ្វេ Luckin និង Cotti លក់គ្រឿងផឹករបស់ខ្លួនក្នុងតម្លៃទាបបំផុតត្រឹម ៨,៨ យន់។ ជាមួយនឹងការបញ្ចុះតម្លៃផង តម្លៃគ្រឿងផឹកខ្លះធ្លាក់ចុះទាបរហូតដល់ ២,៩ យន់។

យ៉ាងណាមិញ ប្រភពស្និទ្ធនឹង Starbucks បាននិយាយថា ការបញ្ចុះតម្លៃរបស់ខ្លួន មិនមែនដើម្បីការប្រកួតប្រជែងក្នុងស្រុកចិននោះទេ ប៉ុន្តែជាការទាក់ទាញអតិថិជនពេលរសៀល ឱ្យបានកាន់តែច្រើន។ Starbucks ធ្លាប់បាននិយាយពីមុនថា ខ្លួននឹងមិនចូលរួមក្នុងសង្គ្រាមតម្លៃទេ។ ប៉ុន្តែក្រុមហ៊ុននេះ ក៏ចេញមុខភេសជ្ជៈ ដែលមានទំហំតូចជាងមុន និងថែមទាំងបានចេញប័ណ្ណបញ្ចុះតម្លៃសម្រាប់អតិថិជនទៀតផង៕

The post សង្រ្គាមតម្លៃនៅចិន ជំរុញឱ្យ Starbucks បញ្ចុះតម្លៃកាហ្វេដើម្បីប្រកួតប្រជែង appeared first on Kampuchea Thmey Daily.

Starbucks ប្រឈមនឹងសង្រ្គាមតម្លៃនៅចិន ខណៈកាហ្វេគូប្រជែងស្ទុះការលក់ក្នុងតម្លៃថោកជាង

Huon Dina — Tue, 28 May 2024 09:01:00 +0000

ក្រុមហ៊ុនកាហ្វេអាមេរិក Starbucks កំពុងប្រឈមមុខនឹងការប្រកួតប្រជែងដ៏តឹងតែងសម្រាប់ការលក់របស់ខ្លួននៅក្នុងប្រទេសចិន ដោយសារតែការរីកស្ទុះយ៉ាងឆាប់រហ័សរបស់គូប្រជែងផ្សេងៗ ដែលលក់កាហ្វេក្នុងតម្លៃទាបជាង ដែលការណ៍នេះធ្វើឱ្យមាន «សង្រ្គាមតម្លៃ»។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ការប្រកួតប្រជែងតឹងតែងសម្រាប់ Starbucks ដែលស្ថិតនៅក្រោមសម្ពាធកាន់តែខ្លាំងឡើងៗពីអ្នកវិនិយោគរួចស្រាប់ទៅហើយ ដោយសារតែការលក់ធ្លាក់ចុះនៅក្នុងទីផ្សារធំៗបំផុតទាំង២របស់ខ្លួន រួមមានសហរដ្ឋអាមេរិក និងចិន។ កាលពីឆ្នាំមុន ម៉ាកកាហ្វេក្នុងស្រុកចិន Luckin Coffee បានជាប់ចំណាត់ថ្នាក់កំពូល លើការលក់ប្រចាំឆ្នាំជាលើកដំបូង។

យ៉ាងណាមិញ ខណៈ Starbucks បានកាត់បន្ថយការងាររបស់ខ្លួននៅចិន អ្នកគ្រប់គ្រងប្រចាំប្រទេសបានជឿជាក់ថា ខ្លួនមិនចាំបាច់ចូលទៅក្នុងការប្រកួតប្រជែងតម្លៃទាបនោះទេ។ នាយិកាប្រតិបត្តិក្រុមហ៊ុន Starbucks ប្រចាំប្រទេសចិន លោកស្រី Belinda Wong បានថ្លែងកាលពីខែមករាថា៖ «យើងមិនចាប់អារម្មណ៍ ក្នុងការប្រឡូកទៅក្នុងសង្រ្គាមតម្លៃទេ។ យើងកំពុងផ្តោតលើការចាប់យកគុណភាពខ្ពស់ ប៉ុន្តែនៅតែអាចរកប្រាក់ចំណេញ កំណើនប្រកបដោយនិរន្តរភាព»។

ទោះបែបនេះក្ដី អ្នកវិភាគ ទិន្នន័យពីការត្រួតពិនិត្យរបស់រ៉យទ័រ និងការបង្ហោះលើបណ្ដាញសង្គមរបស់អតិថិជន បានចង្អុលបង្ហាញពីការកើនឡើងនៃប័ណ្ណបញ្ចុះតម្លៃដែល Starbucks ផ្ដល់ជូនតាមរយៈកម្មវិធីខ្នាតតូច ក៏ដូចជាតាមរយៈការផ្សាយផ្ទាល់របស់អ្នកផលិតកាហ្វេនៅលើកម្មវិធី Douyin (វេទិកា TikTok ក្នុងស្រុកចិន) និងវេទិកាកម្មង់កាហ្វេផ្សេងៗ។

គេមើលឃើញថា សង្រ្គាមតម្លៃកាហ្វេក្នុងប្រទេសចិន កើតឡើងចំពេលអត្រាបរិត្តផរណាជាប់លាប់ ធ្វើឱ្យកាន់តែធ្ងន់ធ្ងរលើការកាត់បន្ថយការចំណាយរបស់អតិថិជន ខណៈសេដ្ឋកិច្ចត្រដាបត្រដួសនឹងការស្ទុះងើបឡើងវិញ ហើយប្រាក់ឈ្នួលក៏នៅជាប់គាំងទ្រឹង។

នាយកគ្រប់គ្រងនៃក្រុមហ៊ុនស្រាវជ្រាវទីផ្សារ Kantar Worldpanel នៅប្រទេសចិន លោក Jason Yu បាននិយាយថា ជាអកុសលសម្រាប់ Starbucks វាពិតជាគ្មានជម្រើសក្រៅពីការប្រកួតប្រជែងតម្លៃក្នុងកម្រិតណាមួយ នៅលើទីផ្សារដែលការប្រយុទ្ធតម្លៃទាបបានក្លាយជា «រឿងធម្មតាថ្មី» នោះទេ។ លោកបានបន្ថែមថា៖ «ការពង្រឹងការផ្តល់ជូនពិសេស និងការបង្កើនការផ្សព្វផ្សាយ ភាពសកម្មខ្លាំងនៅលើបណ្ដាញសង្គម គឺជាការផ្លាស់ប្តូរដ៏សំខាន់ដើម្បីរក្សាជំហររបស់ពួកគេ ដូច្នេះចំណែកទីផ្សារនឹងមិនត្រូវបាត់បង់បន្ថែមទៀតនោះទេ»។

យ៉ាងណាមិញ លោក Yu បានគូសបញ្ជាក់ថា ទោះបីជាតម្លៃនឹងក្លាយជាកត្តាសំខាន់ក្នុងការសម្រេចចិត្តរបស់អតិថិជននាពេលអនាគតដ៏ខ្លីខាងមុខក្ដី ក៏ Starbucks នឹងមិនយកឈ្នះការប្រកួតប្រជែងដោយការបញ្ជុះតម្លៃផលិតផលខ្លួនដល់កម្រិតទាបនោះដែរ។ លោកថ្លែងថា ក្រុមហ៊ុនអាមេរិកនេះគួរតែបន្តជាមួយនឹងយុទ្ធសាស្រ្តរបស់ខ្លួន ក្នុងការផ្តល់ជូននូវគុណភាពផលិតផល ដែលគូប្រជែងរបស់ខ្លួនមិនអាចផ្គូផ្គងបាន៕

The post Starbucks ប្រឈមនឹងសង្រ្គាមតម្លៃនៅចិន ខណៈកាហ្វេគូប្រជែងស្ទុះការលក់ក្នុងតម្លៃថោកជាង appeared first on Kampuchea Thmey Daily.

ក្រុមហ៊ុន​Starbucks Archives - Kampuchea Thmey Daily

សង្រ្គាមតម្លៃនៅចិន ជំរុញឱ្យ Starbucks ​​បញ្ចុះតម្លៃកាហ្វេដើម្បីប្រកួតប្រជែង

Starbucks ប្រឈម​នឹង​សង្រ្គាម​តម្លៃនៅ​ចិន​ ខណៈ​កាហ្វេ​គូ​ប្រជែង​​ស្ទុះការ​​លក់​ក្នុងតម្លៃ​ថោក​ជាង​

ក្រុមហ៊ុនStarbucks Archives - Kampuchea Thmey Daily

សង្រ្គាមតម្លៃនៅចិន ជំរុញឱ្យ Starbucks បញ្ចុះតម្លៃកាហ្វេដើម្បីប្រកួតប្រជែង

Starbucks ប្រឈមនឹងសង្រ្គាមតម្លៃនៅចិន ខណៈកាហ្វេគូប្រជែងស្ទុះការលក់ក្នុងតម្លៃថោកជាង