លោក ថាច់ ផាណារ៉ា ប្រធានមន្ទីរពិសោធន៍នៃវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប បានទទួលព័ត៌មានត្រីរាជពីគ្រួសាររស់នៅស្គន់ ស្រុកព្រៃឈរ ខេត្តកំពង់ចាម កំពុង​ស្វែង​រក​មធ្យោបាយ និង​អ្នកជំនាញ​ដើម្បីជួយពួកគាត់ព្រលែងត្រីរាជចូលទៅក្នុងជម្រកធម្មជាតិវិញ។

កូនត្រីរាជទាំង៥ក្បាលដែលទទួលបានពីការបរិច្ចាកដោយកសិករមានប្រវែងចន្លោះពី១៤៧ ទៅ ១៦៨សង់ទីម៉ែត្រក្នុងមួយក្បាល និងមានទំងន់ពី៤៥ ទៅ៦០គីឡូក្រាមក្នុងមួយក្បាល។ ​គ្រួសារ​កសិករចិញ្ចឹមត្រីជាច្រើនប្រភេទសម្រាប់ទុកបរិភោគ និងសម្រាប់លក់។ ក្រៅពីរបរចិញ្ចឹមត្រី សមាជិកក្នុងគ្រួសាររបស់គាត់ក៏ប្រកបរបរធ្វើម្ហូបសម្រាប់ពិធីបុណ្យទាន ឬមង្គលការ​តាម​តំបន់​នានា​នៃ​ប្រទេសកម្ពុជា។ កសិករបានរៀបរាប់ប្រាប់លោក ផាណារ៉ា ពីរឿងរ៉ាវដែលគាត់បានជួបប្រទះ និង​ចិញ្ចឹមកូនត្រីរាជ ដូចដំណាលថា៖ កាលពី១៣ឆ្នាំមុន គ្រួសារ​កសិករ​បាន​ទិញ​កូន​ត្រី​ពី​អ្នក​នេសាទ​យក​មកចិញ្ចឹមក្នុងស្រះ។

នៅពេលត្រីធំល្មមតម្រូវការទីផ្សារ កសិករនឹងចាប់ត្រីទាំងអស់ពីក្នុងស្រះយកទៅលក់ ឬទុក​ខ្លះ​សម្រាប់​ធ្វើ​ម្ហូបការបុណ្យតាមតែគេកម៉្មង់។ មានថ្ងៃមួយ ដល់​រដូវកាល​ទិញ​កូន​ត្រី​ប្រាធំ​យក​មក​ដាក់​ចិញ្ចឹម ក្រុមគ្រួសាររបស់គាត់សំគាល់ឃើញកូនត្រីចំនួន៧ក្បាលគឺមានរូបរាងធំជាងគេ។ អ្នក​នេសាទ​ប្រាប់​គ្រួសារកសិករថា ប្រហែល​ជា​ត្រីរាជ ប៉ុន្តែ​ពួក​គាត់​ម្នាក់​ៗគឺ​មិន​ច្បាស់ដូចគ្នា។ អ្នក​នេសាទ​ក៏​ប្រាប់កសិករ​ឱ្យ​យកទៅចិញ្ចឹមសាកមើលសិនទៅ ប្រហែល​ជា​វា​ជា​ត្រី​នាំ​សំណាង​មក​ដល់​គ្រួសារកសិករ។

ស្របតាមយោបល់អ្នកនេសាទ គ្រួសារកសិករក៏បានទិញ និងយកកូនត្រីទាំងអស់ពីអ្នកនេសាទ មកចិញ្ចឹមក្នុងស្រះ ដោយ​សន្មត​ជាកូនត្រីប្រាធំ ។ កសិករតែងផ្តល់ចំណីដែលផ្សំចេញពីផ្ទះបាយ លាយជាមួយចំណីគ្រាប់។ តាមការសង្កេតពីមួយថ្ងៃទៅមួយថ្ងៃ កូនត្រីដែលអ្នកនេសាទប្រាប់ថា អាចជាត្រីរាជ បានលូតលាស់មានខ្លួនធំចម្លែកខុសពីត្រីប្រា។

គ្រួសារកសិករមានស្រះចិញ្ចឹមត្រីចំនួន៣ ស្រះនីមួយៗមានប្រវែង១៥ម៉ែត្រ គុណនឹង២០ម៉ែត្រ។ ក្រោយ​ពេល​ប្រមូលផលត្រីប្រាធំម្តងៗ កសិករ​តែ​ចាប់​ផ្ទេរ​កូន​ត្រីរាជ​ពី​ស្រះ​មួយ​ទៅ​ស្រះ​មួយ​ ដើម្បី​រៀប​ចំ​ស្រះអោយស្អាត មុនពេលដាក់កូនត្រីចិញ្ចឹមសាជាថ្មី។ ជាអកុសល កាលពីប៉ុន្មានឆ្នាំកន្លងទៅ កូន​ត្រីរាជចំនួន២ក្បាលបានស្លាប់ ក្រោយ​ពេលគ្រួសារកសិករសំអាតស្រះ បាចកំបោរ និង​បញ្ចូល​ទឹក​ដើម្បី​ដាក់​កូន​ត្រី​ចិញ្ចឹមថ្មី។

គ្រួសារកសិករ ពិតជាសោកស្តាយខ្លាំងណាស់ចំពោះការស្លាប់របស់កូនត្រីរាជទាំង២ក្បាលនេះ ដូច​នេះ គ្រួសារកសិករបានជីកដីក្បែរស្រះ ហើយកប់សពត្រីរាជទាំងពីរក្បាលនោះ និង​សូម​បួង​សួង​សុំសេចក្តីសុខសប្បាយ។កាល​ពីឆ្នាំ២០២០ គ្រួសារកសិករ​មាន​បំណង​ចង់​ប្រលែង​កូន​ត្រីរាជ​ទាំង​៥ក្បាល​ដែល​នៅ​សល់​ក្នុងស្រះ ទៅក្នុងទន្លេមេគង្គវិញ ប៉ុន្តែពួកគាត់​មិន​ដឹងថា​គួរយក​ទៅ​ប្រលែង​ដោយ​វិធីណា ឬក៏ទំនាក់ទំនងទៅមន្ត្រីជំនាញឯណា ដើម្បីជួយពួកគាត់ព្រលែងត្រីរាជទាំងអស់នេះ ទើបកសិកររក្សាទុកចិញ្ចឹមថែទាំបន្តទៀត។

នៅដើមខែមិថុនាឆ្នាំ២០២១ មានគេមកប្រាប់គ្រួសារកសិករពីគម្រោងអភិរក្សត្រី នៃគម្រោង​អច្ឆរិយភាព​នៃទន្លេមេគង្គ និងមន្ត្រីរដ្ឋបាលជលផលអាចជួយគាត់​យកត្រីនេះទៅប្រលែង​ក្នុង​ធម្មជាតិវិញ។ ក្រោយពេលទទួលដំណឹងនេះ ក្រុមគ្រួសារកសិករក៏បានទំនាក់ទំនងមកលោក ផាណារ៉ា ដើម្បីជួយសម្រេចបំណងព្រលែងត្រីរាជទៅកាន់ជម្រកធម្មជាតិវិញ។

មុនពេលចាប់ត្រីរាជគ្រួសារកសិករបានអុចធូបបន់ស្រន់សុំសេចក្តីសុខដល់កូនត្រីរាជដែលផ្លាស់

ចេញទៅនៅទីកន្លែងថ្មី និងក្រុមគ្រួសាររបស់គាត់។ បន្ទាប់ពីបន់ស្រន់ ទើបលោក ផាណារ៉ា និង​អ្នក​ភូមិ​បាន​ចុះ​ចាប់​កូនត្រីរាជទាំង៥ក្បាលពីស្រះកសិករ ​។ដើម្បី​ដឹក​ជញ្ជូន​កូនត្រីរាជ​រស់​ទាំង​៥ក្បាល​នេះ ​លោក ផាន់ណារ៉ា ប្រើរថយន្តទ្រុងចំហក្រោយចំណុះ២,៥តោន ក្រាល​តង់​កៅស៊ូ ដាក់​ទឹក​ បំពាក់​ឧបករណ៍​ខ្យល់អុកស៊ីសែន ពាក់​ស្លាកសំគាល់ត្រីនីមួយៗ និង​ធ្វើ​ដំណើរ​ដោយ​ប្រុង​ប្រយ័ត្ន​ទៅ​ស្ថានីយ៍​ថែ​បំប៉នកូនត្រីអោយបានលឿនតាមដែលអាចធ្វើទៅបាន។

ក្រោយពេលទទួលបានកូនត្រីរាជ គម្រោងមានផែនការចិញ្ចឹម និងថែបំប៉នកូនត្រីរាជទាំង​៥ក្បាល​នេះ​សិន នៅក្នុងស្រះពិសោធន៍នៃមជ្ឈមណ្ឌលអភិវឌ្ឍន៍ និងស្រាវជ្រាវវារីវប្បកម្មទឹកសាប ស្ថិត​នៅ​ភូមិបាទី ស្រុកពាមរក៍ ខេត្តព្រៃវែង ដើម្បីរៀនសូត្រពីប្រភេទត្រីកម្រនេះ។ នៅពេលដែលកូនត្រីនេះលូតលាស់បានល្អ គម្រោងនឹងប្រលែងពួកវា​ទៅ​ជម្រក​ធម្មជាតិ​របស់​ពួក​វា​វិញ៕

ប្រភព៖ Wonders of the Mekong​

The post គំរូល្អ ! កសិករម្នាក់​​​បរិច្ចាគ​​ត្រីរាជ​​ ៥​​ក្បាល​​ ​​ប្រលែង​ចូល​ជម្រក​ធម្មជាតិ​វិញ​ appeared first on Kampuchea Thmey Daily.

ក្រុមអ្នកជំនាញ នៃក្រសួងកសិកម្ម រុក្ខាប្រមាញ់ និងនេសាទ និងអ្នកវិទ្យាសាស្ត្រ នៃអង្គការ WWF បានថតរូបកូនសត្វផ្សោតដែលទើបកើតថ្មី ខណៈកូនសត្វផ្សោតមួយក្បាលនេះ កំពុងហែលជាមួយសត្វផ្សោតពេញវ័យ ចំនួន ០៧ ក្បាលផ្សេងទៀត នៅទីតាំង កាំពី ស្ថិតក្នុងឃុំសំបុក ស្រុកចិត្របុរី ខេត្ដក្រចេះ។

ក្រុមស្រាវជ្រាវបានសន្និដ្ឋានថា សត្វផ្សោតដែលទើបកើតថ្មីនេះ មានអាយុប្រមាណ ៤ ថ្ងៃ (មកទល់ថ្ងៃថតរូប ២៥,១២,២០២០) ហើយជាកូនផ្សោតទី៩ ដែលត្រូវបានអ្នកវិទ្យាសាស្ត្រកត់ត្រាទុកក្នុងឆ្នាំ ២០២០ នេះ។

យោងតាមរបាយការណ៍ជំរឿនសត្វផ្សោត ឆ្នាំ២០២០ បានបង្ហាញថា ចំនួនសត្វផ្សោតសរុបមានត្រឹម ៨៩ ក្បាលប៉ុណ្ណោះ ដែលកំពុងរស់នៅក្នុងទន្លេមេគង្គ។

មន្រ្តីអង្គការ WWF បានឱ្យដឹងថា កាំពី គឺជាអន្លង់សត្វផ្សោតសំខាន់មួយក្នុងចំណោមអន្លង់សំខាន់ៗ ផ្សេងទៀត ស្ថិតនៅចន្លោះពីទីរួមខេត្តក្រចេះ និងព្រំដែនកម្ពុជា-ឡាវ ដែលផ្តល់ជាទីជម្រកដ៏ចាំបាច់សម្រាប់ការរស់នៅរបស់ថនិកសត្វទឹកសាបប្រភេទ រងគ្រោះជិតផុតពូជមួយនេះ៕

The post កូនផ្សោតថ្មី ចំណងដៃចុងឆ្នាំ ២០២០ ​បានកើតនៅប្លុកកាំពី appeared first on Kampuchea Thmey Daily.