ក្រុមអ្នកអង្កេតការណ៍ Archives - Kampuchea Thmey Daily

កម្ពុជានាំក្រុមអ្នកសង្កេតការណ៍អាស៊ានពិនិត្យស្ថានភាពព្រំដែន ក្រោយថៃសាងសង់របងដោយឯកតោភាគី

Kang Tola — Mon, 06 Jul 2026 14:28:00 +0000

ភ្នំពេញ ៖ អ្នកនាំពាក្យក្រសួងការពារជាតិ បានឱ្យដឹងថា នៅថ្ងៃទី៦ ខែកក្កដា ឆ្នាំ២០២៦ ក្រុមអ្នកសម្របសម្រួល (CLG) របស់កម្ពុជា បានសម្របសម្រួលដឹកនាំក្រុមអ្នកសង្កេតការណ៍អាស៊ាន (AOT) ដឹកនាំដោយប្រធានបេសកកម្មមកពីហ្វីលីពីន ចុះសង្កេតការណ៍ ផ្ទៀងផ្ទាត់ និងប្រមូលព័ត៌មានអំពីស្ថានភាពជាក់ស្តែងនៅតាមបង្គោលព្រំដែនលេខ៥២ ដល់លេខ៥៩ ក្នុងស្រុកកំរៀង ខេត្តបាត់ដំបង បន្ទាប់ពីបានជូនដំណឹងដល់ភាគីថៃ និងមានការចូលរួមពីអាជ្ញាធរពាក់ព័ន្ធ។

ក្នុងដំណើរចុះពិនិត្យនេះ ក្រុមអ្នកសង្កេតការណ៍អាស៊ានបានពិនិត្យស្ថានភាពជាក់ស្តែងពាក់ព័ន្ធនឹងការសាងសង់របងព្រំដែនដោយឯកតោភាគីពីសំណាក់យោធាថៃ នៅក្បែរបង្គោលព្រំដែនលេខ៥២ ដល់លេខ៥៤ ហើយក៏បានឃើញការបែកបាក់បង្គោលបណ្ដោះអាសន្ន ដែលបង្កឡើងដោយសកម្មភាពខាងលើផងដែរ។

បន្ទាប់ពីទទួលបានព័ត៌មានបច្ចេកទេសអំពីការវាស់វែងរួម និងការបោះបង្គោលបណ្ដោះអាសន្ន ក្រុមអ្នកសង្កេតការណ៍អាស៊ានក៏បានចុះពិនិត្យទីតាំងដែលមានប្រជាពលរដ្ឋថៃធ្វើស្រែចម្ការហួសចូលក្នុងដីកម្ពុជា នៅចន្លោះបង្គោលព្រំដែនលេខ៥២ ដល់លេខ៥៩។

ក្រសួងការពារជាតិបានបញ្ជាក់ថា កម្ពុជាបានតវ៉ាទៅភាគីថៃតាមរយៈកំណត់ទូត ដោយចាត់ទុកថាសកម្មភាពទាំងនេះប៉ះពាល់ដល់នីតិវិធីទ្វេភាគីក្រោមយន្តការគណៈកម្មការចម្រុះខណ្ឌសីមាព្រំដែនគោក (JBC)។ ជាមួយគ្នានេះ កម្ពុជាក៏បានជំរុញឱ្យមានការរៀបចំកិច្ចប្រជុំ JBC ឱ្យបានឆាប់បំផុត ដើម្បីដោះស្រាយបញ្ហាតាមយន្តការដែលមានស្រាប់។

ក្រសួងបញ្ជាក់ថា ការចុះសង្កេតការណ៍នេះ មានគោលបំណងផ្តល់ឱ្យក្រុមអ្នកសង្កេតការណ៍អាស៊ានបានឃើញស្ថានភាពជាក់ស្តែងនៅតំបន់ព្រំដែន និងបង្ហាញពីគោលជំហររបស់រាជរដ្ឋាភិបាលកម្ពុជា ដែលបន្តប្រកាន់ខ្ជាប់ការដោះស្រាយបញ្ហាព្រំដែនដោយសន្តិវិធី តាមរយៈការពិភាក្សា យន្តការទ្វេភាគី ច្បាប់អន្តរជាតិ និងកិច្ចព្រមព្រៀងដែលមានជាធរមាន៕

The post កម្ពុជានាំក្រុមអ្នកសង្កេតការណ៍អាស៊ានពិនិត្យស្ថានភាពព្រំដែន ក្រោយថៃសាងសង់របងដោយឯកតោភាគី appeared first on Kampuchea Thmey Daily.

ក្រុមអ្នកសង្កេតការណ៍ជាតិវាយតម្លៃថា ការបោះឆ្នោតឆ្នាំនេះ ប្រព្រឹត្តទៅដោយ សេរី ត្រឹមត្រូវ មានតម្លាភាព និងអាចទទួលយកបាន

Kang Tola — Mon, 06 Jun 2022 10:43:48 +0000

ថ្លែងនៅក្នុងសន្និសីទសារព័ត៌មាននារសៀលថ្ងៃទី០៦ ខែមីថុនា ឆ្នាំ២០២២ នេះ ក្រុមអ្នកសង្កេតការណ៍ជាតិ ដែលបានដាក់ភ្នាក់ងារចូលរួមតាមដានយ៉ាងយកចិត្តទុកដាក់លើការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នេះ បានសង្កេតឃើញថា ការបោះឆ្នោតឆ្នាំ២០២២នេះ ប្រព្រឹត្តទៅដោយ សេរី ត្រឹមត្រូវ មានតម្លាភាព និងអាចទទួលយកបាន ពីព្រោះការ បោះឆ្នោតនេះ មានការចូលរួមពីប្រជាជន ដោយគ្មានការបំភិតបំភ័យ និងការគំរាមកំហែងនោះឡើយ។

លោក សុខុន បូរិន ដែលជាអ្នកសង្កេតការណ៍របស់សហព័ន្ធនិស្សិតបញ្ញវ័ន្តប្រជាធិបតេយ្យកម្ពុជា (ក្រុមកែវភ្នែកយុត្តិធម៌) បានលើកឡើងថា សហព័ន្ធនិស្សិតបញ្ញវ័ន្តប្រជាធិបតេយ្យកម្ពុជា (ក្រុមកែវភ្នែកយុត្តិធម៌) ដែលមានសមាជិក សមាជិកា ចូលរួមសង្កេតការណ៍ទូទាំងប្រទេសសរុប១០៥៨ នាក់ ហើយបានចូលរួមសង្កេតការណ៍នៅទូទាំង២៥ រាជធានី ខេត្ត ។ តាមរបាយការណ៍ពីភ្នាក់ងារទាំងអស់បានឲ្យដឹងថា ដំណើរការបោះឆ្នោត ចាប់តាំងពីការបើកការិយាល័យពីម៉ោង៧ ព្រឹក រហូតម៉ោង៣ រសៀលដែលត្រូវបិទការិយាល័យ មានប្រជាពលរដ្ឋយ៉ាងច្រើនបានទៅបោះឆ្នោត ហើយភ្នាក់ងារកែវភ្នែកយុត្តិធម៌ បានបន្តតាមដានការរាប់សន្លឹកឆ្នោតបន្តទៀត។ លោកថា ផ្នែកតាមការតាមដាននេះ ការបោះឆ្នោត ការរាប់សន្លឹកឆ្នោត មានភាពត្រឹមត្រូវល្អប្រសើរ ។

លោកអះអាងថា សកម្មភាពនេះមានការចូលរួមពីប្រជាជន គ្មានការបំភិតបំភ័យ នោះឡើយ។ នេះសបញ្ជាក់ឲ្យឃើញថា ប្រទេសកម្ពុជាមានលទ្ធិប្រជាធិបតេយ្យពេញលេញ និងអាចទទួលយកបាន។ ក្នុងនាមក្រុមកែវភ្នែកយុត្តិធម៌ បានវាយតម្លៃខ្ពស់ចំពោះការបោះឆ្នោត និងគាំទ្រយ៉ាងពេញទំហឹងចំពោះការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ គឺប្រព្រឹត្តទៅដោយសេរី ត្រឹមត្រូវ មានតម្លាភាព និងអាចទទួលយកបាន។

ចំណែកលោក នរពិទូរ្យ ប្រធានអង្គការ ពន្លឺអភិវឌ្ឍន៍ជនក្រីក្របានលើកឡើងថា តាមរយៈការចុះស្រាវជ្រាវលើការបោះឆ្នោតក្រុមប្រឹក្សាឃុំសង្កាត់លោកបានមើលឃើញថា ការបោះឆ្នោតនេះបានប្រព្រឹត្តទៅដោយរលូន សេរីត្រឹមត្រូវ អាចទទួលយកបាន។ តាមលោក នរពិទូរ្យ ក្រុមកែវភ្នែកយុត្តិធម៌នេះ បានចូលរួមសង្កេតការណ៍បោះឆ្នោតតាំងពីឆ្នាំ១៩៩៣ មកម្ល៉េះ ហើយក៏បានរៀនសូត្រលើការបោះឆ្នោតនេះ និងមានភាពចាស់ទុំផងដែរ ។ លោកថា រហូតមកដល់ពេលនេះប្រជាពលរដ្ឋមានការចេះដឹងច្រើនលើការបោះឆ្នោត ហើយពីរអាណត្តិមួយទៅអាណត្តិមួយ ការបោះឆ្នោតមានលក្ខណៈប្រសើរ។

យោងតាមសេចក្តីថ្លែងការណ៍ របស់ក្រុមអង្គការសង្គមស៊ីវិលចំនួន៣៧ ស្ថាប័ន ដែលបានដាក់ភ្នាក់ងារចូលរួមសង្កេតការណ៍បោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ នេះបានលើកឡើងប្រហាក់ប្រហែលគ្នាថា ការបោះឆ្នោតនេះបានប្រព្រឹត្តទៅក្នុងបរិយាកាសសេរី យុត្តិធម៌ និងមានតម្លាភាព ដោយមានការចូលរួមយ៉ាងផុលផុសពីគណបក្សនយោបាយទាំងអស់ ដើម្បីប្រជែងយកអាសនៈក្រុមប្រឹក្សាឃុំ សង្កាត់ ដែលនេះឆ្លុះបញ្ចាំងនូវការអនុវត្តលទ្ធិប្រជាធិបតេយ្យ សេរីពហុបក្ស នៅព្រះរាជាណាចក្រកម្ពុជាយ៉ាងពិតប្រាកដ។

ជាមួយគ្នានោះក្រមអង្គការសង្គមស៊ីវិលក៏បានប្រកាសគាំទ្រយ៉ាងពេញទំហឹងចំពោះលទ្ធផលនៃការបោះឆ្នោតជ្រើស រើសក្រុមប្រឹក្សា ឃុំ សង្កាត់ ដែលមានប្រជាពលរដ្ឋយ៉ាងច្រើនបានចេញទៅបោះឆ្នោត ហើយថា នេះជាការអនុវត្តនូវសិទ្ធិស្របច្បាប់របស់ខ្លួន ស្របតាមមនសិការស្នេហាជាតិ ហើយបានចេញទៅបោះ ឆ្នោតយ៉ាងច្រើនកុះករ ប្រកបដោយទឹកមុខរីករាយ គ្មានការគំរាមកំហែង៕

ដោយ ៖ កោះកែវ

The post ក្រុមអ្នកសង្កេតការណ៍ជាតិវាយតម្លៃថា ការបោះឆ្នោតឆ្នាំនេះ ប្រព្រឹត្តទៅដោយ សេរី ត្រឹមត្រូវ មានតម្លាភាព និងអាចទទួលយកបាន appeared first on Kampuchea Thmey Daily.