កីឡាករ Minagawa Yusuke ត្រូវបានក្លិប ណាហ្គាវើលដ៍ ចុះកិច្ចសន្យាយកបានកាលពីខែ កក្កដា ឆ្នាំ ២០២៤ ដោយគិតមកដល់បច្ចុប្បន្នកីឡាករលេងជិតបាន ២ រដូវកាលហើយ។ ទោះបីជាយ៉ាងណា កីឡាករសញ្ជាតិ ជប៉ុន វ័យ ៣៤ ឆ្នាំរូបនេះ មិនសូវមានអ្នកចាប់អារម្មណ៍ច្រើននោះទេ នៅពេលចូលរួមជាមួយ ណាហ្គាវើលដ៍ ដំបូង។

រហូតមកដល់រដូវកាលនេះ ក្រោយរូបគេបង្ហាញថ្វីជើងស៊ុតយ៉ាងអស្ចារ្យ ទើបមានអ្នកលើកយកមកនិយាយច្រើន។ កីឡាករ Yusuke រកគ្រាប់បាល់បានចំនួន ១២ គ្រាប់ហើយ ដោយកំពុងតាមពីក្រោយម្ចាស់តំណែងកំពូលតារាងខ្សែប្រយុទ្ធរបស់ក្រុម ព្រះខ័នរាជស្វាយរៀង Kwame Peprah ដែលរកបាន ១៧ គ្រាប់។

Yusuke ជាកីឡាករស្ងប់ស្ងាត់ ប៉ុន្តែពិតជាមិនអាចប្រហែសបាននោះទេ ព្រោះរូបគេជាកីឡាករមួយរូប ដែលមានបទពិសោធជោគជាំលេងនៅលីគ ជប៉ុន។ រម្លឹកប្រវត្តិត្រួសៗ Yusuke ​ជា​យុវជន​នៅ​សាកល​វិទ្យាល័យ Chuo University មុន​ពេល​បោះ​ជំហាន​ចូលក្លិប​អាជីព Sanfrecce Hiroshima ​នៅ​ក្នុង​ក្រប​ខណ្ឌ​លីគ​កំពូល​ជប៉ុន​​ ៤ ​រដូវ​កាល​ពី​ឆ្នាំ ២០១៤-២០១៧ ដោយ​បង្ហាញ​ខ្លួន​​លើ​ទី​លាន​បាន​៦៥​ដង រក​បាន​៥​គ្រាប់។

ឆ្នាំ​២០២១ រូប​គេ​បាន​ចូល​រួម​ជា​មួយ​ក្លិប Vegalta Sendai នៅ​លីគ​កំពូល ប៉ុន្តែ​ធ្លាក់​មក​លីគ​ទី ២ ​វិញនៅ​ឆ្នាំ​ ២០២២ ដោយ​បាន​បង្ហាញ​ខ្លួន​លើ​ទី​លាន ​​៣៩​ដង រក​បាន​៥​គ្រាប់​។ ចុង​ក្រោយ Yusuke Minagawa បាន​ចូល​រួម​ជា​មួយ​ក្លិប Renofa Yamaguchi FC នៅ​លីគ​ទី២ ដោយ​លេង​បាន​ ៣០ ​ដង រក​បាន​តែ​ ២​ គ្រាប់​។ រូប​គេ​ធ្លាប់​ត្រូវ​បាន​កោះ​ហៅ​ចូល​ជម្រើស​ជាតិ​ជប៉ុន​ម្តង​កាល​ពី​ឆ្នាំ​២០១៤ និង​​បាន​បង្ហាញ​ខ្លួន​នៅ​លើ​ទី​លាន។

គួរឱ្យដឹងថា Minagawa Yusuke លេងនៅ ណាហ្គាវើលដ៍ ជិត ២ រដូវកាលមកនេះ រកបានគ្រាប់បាល់សរុប ២៦ គ្រាប់ និង ៥ បញ្ជូន (assists) ពីការលេងសរុប ៤៥ ប្រកួត៕

អត្ថបទ៖ សេម កុសល

The post Yusuke កំពុងឈរលេខ ២ ជាកីឡាករស៊ុតច្រើនជាងគេក្នុង​លីគ កម្ពុជា មានប្រវត្តិមិនធម្មតា appeared first on Kampuchea Thmey Daily.

ការប្រកួតពានរង្វាន់ពានសម្តេចតេជោថ្នាក់ជាតិ បានរៀបចំឡើងចំនួន ១៨ លើកហើយ ខណៈនៅរដូវកាល ២០២៥-២០២៦ គឺជាលើកទី ១៩។ បើក្រឡេកមើលអំពីសមាសក្រុមឈ្នះពានសម្តេចតេជោនេះច្រើនជាងគេ គឺជាក្រុម ព្រះខ័នរាជស្វាយរៀង ដោយឈ្នះសរុបចំនួន ៥ ដង ប៉ុន្តែបើក្រឡេកមើល ក្រុមដែលចាញ់នៅវគ្គផ្តាច់ព្រ័ត្រច្រើនជាងគេវិញ គឺជាក្រុម ណាហ្គាវើលដ៍ ដោយមានកំណត់ត្រារហូតដល់ទៅ ៦ លើក។

ក្រុមមានមូលដ្ឋាននៅខេត្ត កំពង់ស្ពឺ ក៏ត្រូវបានគេចាត់ទុកជាក្រុមខ្លាំងមួយផងដែរ ក្នុងពានសម្តេចតេជោ ដោយបានឈានចូលដល់វគ្គផ្តាច់ព្រ័ត្ររហូតដល់ទៅ ៧ ដង ប៉ុន្តែជារឿងសោកស្តាយ គឺពួកគេបានឈ្នះត្រឹមតែ ១ លើកប៉ុណ្ណោះនៅឆ្នាំ ២០១៣ ខណៈ ៦ លើកទៀត គឺបរាជ័យទាំងអស់។ ឆ្នាំ ដែល ណាហ្គាវើលដ៍ បរាជ័យក្នុងការប្រកួតវគ្គផ្តាច់ព្រ័ត្ររួមមានឆ្នាំ ២០០៧ ២០០៩ ២០១២ ២០១៥ ២០១៧ និងចុងឆ្នាំ ២០២០។

គួរឱ្យដឹងថា ការប្រកួតចាប់ឆ្នោតវគ្គ ១៦ ក្រុមចុងក្រោយនៃពានរង្វាន់សម្តេចតេជោបានធ្វើឡើងរួចរាល់ហើយ ក្នុងនោះក្រុម ណាហ្គាវើលដ៍ ត្រូវជួបជាមួយក្រុម ឡាយហ្វ ខេត្តព្រះសីហនុ។ ព្រឹត្តិការណ៍ទាំងមូលក៏បានប្រកាសរួចរាល់ហើយដែរ ដោយនឹងចាប់ផ្តើមពីថ្ងៃទី ២១ ខែ មករា រហូតដល់ថ្ងៃទី ២៤ ខែ ឧសភា ឆ្នាំ ២០២៦៕

អត្ថបទ៖ សេម កុសល

The post ណាហ្គាវើលដ៍ កាន់កំណត់ត្រា ជាក្រុមចាញ់វគ្គផ្តាច់ព្រ័ត្រច្រើនជាងគេក្នុងពានសម្តេចតេជោ appeared first on Kampuchea Thmey Daily.

ក្លិបបាល់ទាត់ ណាហ្គាវើលដ៍ ជាក្លិបដំបូងគេ ដែលបានប្រកាសផ្តាច់ដៃគូជាមួយក្រុមហ៊ុនផ្គត់ផ្គង់សម្លៀកបំពាក់កីឡា FBT របស់ ថៃ។ ក្លិបដែលមានមូលដ្ឋាននៅខេត្ត កំពង់ស្ពឺ បានប្រើប្រាស់សម្លៀកបំពាក់ស្លាកយីហោ FBT តាំងពីឆ្នាំ ២០១៣ មកម្ល៉េះ ប៉ុន្តែនៅរដូវកាល ២០២៥-២០២៦ ក្លិប និងក្រុមហ៊ុន បានព្រមព្រៀងគ្នាផ្តាច់កិច្ចសន្យាជាផ្លូវការ ដោយសារ​បញ្ហាព្រំដែនរវាង កម្ពុជា-ថៃ នៅតែបន្តឡើងកម្តៅខ្លាំង។

ក្រោមហេតុផលនេះដូចគ្នា ភ្នំពេញក្រោន បានក្លាយជាក្លិបទី ២ ដែលបានផ្តាច់ដៃគូសហការជាមួយក្រុមហ៊ុនផ្គត់ផ្គង់សម្លៀកបំពាក់កីឡាថៃ Warrix ដោយភាគីទាំង ២ បានព្រមព្រៀងគ្នាដោយសន្តិវិធី។ ចំណែក បឹងកេត ជាក្លិបទី ៣ ដែលបានផ្តាច់ដៃគូសហការជាមួយក្រុមហ៊ុនផ្គត់ផ្គង់សម្លៀងបំពាក់ Ego Sport របស់ថៃ។ តាមរយៈការប្រកាសរបស់ក្លិប គឺភាគីទាំង ២ បានព្រមព្រៀងគ្នា ក្នុងការផ្តាច់កិច្ចសន្យាដោយសន្តិវិធី បន្ទាប់ពីចាប់ដៃគូគ្នាអស់រយៈពេល ៦ ឆ្នាំ។

គួរឱ្យដឹងថា ក្លិបទាំង ៣ ខាងលើ មិនទាន់មាន​ដៃ​គូ​សហការ​ថ្មីនៅឡើយទេ​សម្រាប់​ឯកសណ្ឋាន​ ដោយពួកគេកំពុងតែស្វែងរក​ថ្មី៕

អត្ថបទ៖ សេម កុសល

The post បឹងកេត ជាក្លិបកម្ពុជាទី ៣ ផ្តាច់ដៃគូជាមួយក្រុមហ៊ុនផ្គត់ផ្គង់សម្លៀកបំពាក់របស់ ថៃ appeared first on Kampuchea Thmey Daily.