បើតាម​លិខិត​លោក នៅ សំអាត ប្រធាន​គណបក្ស​ឯកភាព​ជាតិខ្មែរ មូលហេតុ ដែល​ឈានដល់​ការបណ្តេញ​លោក អ៊ុន ជឹម ចេញពី​គណបក្ស គឺ​ដោយ​សារបាន​សាង​កំហុស​យ៉ាងធ្ងន់ធ្ងរ​នៅក្នុង​គណបក្ស​រួមមាន ៖ ទី​១- បាន​ក្លែង​សារ​សំឡេង​សម្តេច​តេ​ជោ ហ៊ុន សែន ហើយ​ចែកចាយ​ដល់​សមាជិក​មូលដ្ឋាន និង​នៅ​សហរដ្ឋ​អាម​រិ​ក ដែល​ធ្វើ​ឲ្យ​ប៉ះពាល់​ដល់​កិត្តិយស​របស់​សម្តេច​តេ​ជោ ហ៊ុន សែន នាយករដ្ឋមន្ត្រី ទី​២- ធ្វើ​បក្ស​ប្រហារ ទី​៣- កោះប្រជុំ​សមាជិក​ដោយ​គ្មាន​ការ​អនុញ្ញាត​ពី​ប្រធាន​បក្ស និង​ប្រធាន​ស្តីទី ទី​៤- បង្កើត​អប្ប​គម​ក្នុង​បក្ស ទី​៥-ញុះញង់​នាំ​ឲ្យ​មានការ​បែកបាក់​ផ្ទៃក្នុង​បក្ស នៅ​តាម​មូលដ្ឋាន ទី​៦- មាន​ចេតនា ដណ្តើម​តំណែង​ជា​ប្រធាន​បក្ស និង​ប្រធាន​ស្តីទី ដោយ​គ្មាន​ការឯកភាព ពី​គណៈកម្មការ​អចិន្ត្រៃយ៍ និង​គណៈកម្មការ​នាយ​ក​។

លោកស្រី ឡាក់ សុភាព ក្នុងនាម​ប្រធាន​ស្តីទី​គណបក្ស​ឯកភាព​ជាតិខ្មែរ បាន​ថ្លែង​ក្នុង​សន្និសីទ​សារព័ត៌មាន​កាលពី​រសៀល​ថ្ងៃទី​១៦ ខែមករា ថា លោកស្រី​នឹង​ដាក់​ពាក្យបណ្តឹង (​នៅ​ថ្ងៃទី​១៧ ខែមករា ឆ្នាំ​២០២២ ប្តឹង​លោក អ៊ុន ជឹម ទៅ​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ពី​បទ​ក្លែង​សារ​សំឡេង​សម្តេច​តេ​ជោ ហ៊ុន សែន ដើម្បី​វាយប្រហារ​មកលើ​លោកស្រី ដែល​បាន​ធ្វើ​ឲ្យ​ប៉ះពាល់​ដល់​កិត្តិយស​របស់​លោក​ស្រី និង​ថ្នាក់ដឹកនាំ​យ៉ាងធ្ងន់ធ្ងរ​។

គួរ​រំលឹក​ថា កាលពី​រសៀល​ថ្ងៃទី​១១ ខែមករា ឆ្នាំ​២០២២ លោកស្រី ឡាក់ សុភាព បានដាក់​ពាក្យបណ្តឹង​ប្តឹង​លោក អ៊ុន ជឹម ទៅ​ឯកឧត្តម​នាយ​ឧ​ត្ត​ម​សេនីយ៍ សន្តិ​បណ្ឌិត នេ​ត សាវឿន អគ្គស្នងការ​នគរបាល​ជាតិ ពី​បទ​ក្លែង​សារ​សំឡេង​សម្តេច​តេ​ជោ ហ៊ុន សែន ដែល​ធ្វើ​ឲ្យ​ប៉ះពាល់​ដល់​កិត្តិយស​របស់​លោក​ស្រី និង​ថ្នាក់ដឹកនាំ​យ៉ាងធ្ងន់ធ្ងរ ហើយ​បណ្តឹង​នេះ​ត្រូវបាន​អគ្គស្នងការ​នគរបាល​ជាតិ​ចាត់វិធានការ​តាម​នីតិវិធី​។

គណបក្ស​ឯកភាព​ជាតិខ្មែរ បាន​ដាក់​ពាក្យស្នើសុំ​បង្កើត​គណបក្ស ទៅ​ក្រសួងមហាផ្ទៃ​កាលពី​ថ្ងៃទី​២៣ ខែមីនា ឆ្នាំ​២០២០ ហើយ​ត្រូវ​បាន​ក្រសួងមហាផ្ទៃ អនុញ្ញាត​ឲ្យ​បង្កើត​នៅ​ថ្ងៃទី​២១ ខែមេសា ឆ្នាំ​២០២០ និង​ត្រូវ​បាន​ក្រសួងមហាផ្ទៃ សម្រេច​ចុះឈ្មោះ​ក្នុង​បញ្ជី​គណបក្ស​នយោបាយ នៅ​ថ្ងៃទី​២ ខែតុលា ឆ្នាំ​២០២០​។

​ទាក់ទង​បញ្ហា​នេះ កម្ពុជា​ថ្មី​នៅ​មិនអាច​ស្វែងរក​ការ​អត្ថាធិប្បាយ​ពី​លោក អ៊ុន ជឹម បានទេ រហូតដល់​ថ្ងៃទី​១៧ ខែមករា នេះ​៕

ដោយ ៖ កោះ​កែវ​

The post គណបក្ស​ឯកភាព​ជាតិខ្មែរ ប្រកាស​បណ្តេញ​អនុប្រធាន​ទី​១ ដោយសារ​សាង​កំហុស​យ៉ាងធ្ងន់ធ្ងរ​ appeared first on Kampuchea Thmey Daily.

លោកស្រី ឡាក់ សុភាព ប្រធានស្តីទីគណបក្សឯកភាពជាតិខ្មែរ បានថ្លែងថា លោកស្រីនឹងប្ដឹងលោក អ៊ុន ជឹម ដែលមានតួនាទីជាអនុប្រធានទី១ គណបក្សទៅសាលាដំបូងរាជធានីភ្នំពេញ ទាក់ទងទៅនឹងការក្លែងសារសំឡេងថ្នាក់ដឹកនាំ បានធ្វើឲ្យប៉ះពាល់កិត្តិយសរបស់លោកស្រី ក៏ដូចជាថ្នាក់ដឹកនាំប្រទេស គឺសម្តេចនាយករដ្ឋមន្រ្តីយ៉ាងខ្លាំង។ លោកស្រីថ្លែងបែបនេះ នៅក្នុងសន្និសីទសារព័ត៌មានមួយ កាលពីរសៀលថ្ងៃទី០៨ ខែមករា ឆ្នាំ២០២២ ម្សិលមិញ។

លោកស្រី ឡាក់ សុភាព បានអះអាងថា រចនាសម្ព័ន្ធដែលបានដាក់ទៅក្រសួងមហាផ្ទៃនៅក្នុងគណបក្សនេះ គឺលោក នៅ សំអាត ជាប្រធានគណបក្ស លោក អ៊ុន ជឹម ជាអនុប្រធានទី១ ហើយលោកស្រី គឺជាអនុប្រធានទី២ ហើយលោកស្រីត្រូវបានតែងតាំងជាប្រធានស្តីទី ក្រោយពីថ្នាក់ដឹកនាំគណបក្ស គឺលោក នៅ សំអាត បានត្រឡប់ទៅក្រៅប្រទេសវិញ ប៉ុន្តែលោក លោក អ៊ុន ជឹម បែរជាចុះអនុវត្តការងារដោយអនាធិបតេយ្យ ផ្ទុយពីខ្លឹមសារនៅក្នុងលក្ខន្តិកៈរបស់គណបក្ស ។

លោកស្រីអះអាងថា ជាធម្មតានៅក្នុងគណបក្សគេតែងសហការគ្នាធ្វើការងារ ប៉ុន្តែលោក អ៊ុន ជឹម បានចុះធ្វើការដោយខ្លួនឯង ហើយអះអាងថា បានចាយលុយផ្ទាល់ខ្លួន។ លោកស្រីបន្តថា លោក អ៊ុន ជឹម ចង់ធ្វើថៅកែបក្ស ចង់ដណ្ដើមអំណាច ហើយនៅពេលខាងមុខ លោក អ៊ុន ជឹម នឹងប្លន់យកគណបក្សឯកភាពជាតិខ្មែរ ហើយធ្វើជាប្រធានបក្សតែម្ដង។ បើតាមលោកស្រី ឡាក់ សុភាព លោក អ៊ុន ជឹម បានរៀបចំសមាសភាពរួចហើយ ដើម្បីប្លន់យកគណបក្សនេះធ្វើជាកម្មសិទ្ធិរបស់គាត់ ហើយនៅថ្ងៃស្អែក (ថ្ងៃទី០៩ ខែមករា ឆ្នាំ២០២២) លោក អ៊ុន ជឹម នឹងធ្វើកិច្ចប្រជុំមួយនៅឈូកវ៉ា ដោយប្រមូលគណៈកម្មាធិការនាយកមួយចំនួន និងប្រើទឹកលុយម្នាក់៣០០ដុល្លារ ដើម្បីចូលរួមប្រជុំនោះ។

លោកស្រីបានស្នើឲ្យសមត្ថកិច្ចអនុវត្តវិធានការលើបុគ្គល អ៊ុន ជឹម ជាបន្ទាន់ ពីព្រោះសកម្មភាពរបស់បុគ្គលនេះ ធ្វើឡើងដោយគ្មានការអនុញ្ញាតពីគណបក្ស ហើយក៏គ្មានត្រានៅក្នុងដៃដែរ។ លោកស្រីអះអាងថា សកម្មភាពនោះអាចនិយាយបានថា ជាការធ្វើដោយអនាធិបតេយ្យ ជាការធ្វើបដិវត្តពណ៌ ក៏អាចថាបានដែរ។ មិនតែប៉ុណ្ណោះបុគ្គល អ៊ុន ជឹម បានផ្សព្វផ្សាយសាសំឡេងមួយ ដែលបុគ្គល អ៊ុន ជឹម អះអាងថា ជាសារសំឡេងរបស់សម្តេចតេជោ ហ៊ុន សែន ផងដែរ។

លោកស្រីថា សារសំឡេងនោះមិនមែនជាសាសំឡេងរបស់សម្តេចតេជោ ហ៊ុន សែន ដូច្នេះជាសាសំឡេងកាត់តក្លែងក្លាយ ហើយលោកស្រីនឹងដាក់ពាក្យប្ដឹងទៅតុលាការ ពីព្រោះបានធ្វើប៉ះពាល់កិត្តិយសរបស់ប្រមុខរាជរដ្ឋាភិបាល កិត្តិយសរបស់លោកស្រី និងកិត្តិយសរបស់លោកឧត្តមសេនីយ៍ ហ៊ុន ម៉ាណែត ដែលជាបេក្ខភាពនាយករដ្ឋមន្ត្រីនាពេលអនាគតផងដែរ ខណៈដែលពួកគាត់មិនបានដឹងអីទាល់តែសោះ។ លោកស្រី ឡាក់ សុភាព ថា លោក អ៊ុន ជឹម បានយកសារនេះបង្ហោះឲ្យកូនចៅនៅខេត្តព្រះសីហនុ នៅខេត្តសៀមរាបទាំងអស់ ធ្វើឲ្យសមាជិកគណបក្សមួយចំនួនខ្លោចចិត្តក្រោយពីឮសំឡេងនេះ។

ទាក់ទងទៅនឹងសារសំឡេងនេះលោក នៅ សំអាត ដែលជាប្រធាន “គណបក្សឯកភាពជាតិខ្មែរ” បានបញ្ជាក់នៅលើហ្វេសប៊ុករបស់ខ្លួនថា លោកទទួលសារសំឡេងនេះ ដែលបែកធ្លាយមកពីលោក អ៊ុន ជឹម ដែលបញ្ជូនសាសំឡេងនេះឲ្យមនុស្សគ្រប់គ្នា។ លោកថា ពេលលោក អ៊ុន ជឹម ទៅដល់ស្រុកខ្មែរ ចាប់ផ្ដើមចង់ធ្វើជាប្រធានគណបក្ស រករឿងដល់ប្រធានស្ដីទី គឺលោកស្រីដុកទ័រឡាក់ សុភាព។ ឥឡូវនេះ លោក អ៊ុន ជឹម នៅស្រុកខ្មែរ លោកបានស្នើឲ្យសម្ដេចនាយករដ្ឋមន្ត្រី ដែលជាថ្នាក់ដឹកនាំកំពូលចាត់វិធានការលើបុគ្គល អ៊ុន ជឹម ដែលចង់ធ្វើបក្សប្រហារ ហើយលោកនឹងបញ្ជូនសារនេះទៅដល់ទីប្រឹក្សារបស់សម្ដេច ព្រមទាំងសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងក្រសួងពាក់ព័ន្ធផងដែរ ដើម្បីរកមូលហេតុ វែកមុខជនដែលបញ្ចេញសារសំឡេងក្លែងក្លាយនេះ។

រហូតមកដល់ពេលនេះ កម្ពុជាថ្មីមិនទាន់អាចស្វែងរកការបញ្ជាក់ពីលោក អ៊ុន ជឹម នៅឡើយទេ៕ កោះកែវ

The post ជម្លោះផ្ទៃក្នុងគណបក្សឯកភាពជាតិខ្មែរ ប្រធានស្ដីទីគ្រោងប្ដឹងលោក អ៊ុន ជឹម ទៅតុលាការទាក់ទងទៅនឹងការក្លែងសាសម្លេងថ្នាក់ដឹកនាំ appeared first on Kampuchea Thmey Daily.