ទិដ្ឋភាព​ប្រគល់​ព្រឹកមិញ

លោក​ វ៉ាត់​ ចំរើន​ បាន​ឲ្យ​ដឹង​ថា​ ថ្ងៃ​នេះ​តំណាង​ឲ្យ​គណៈកម្មាធិការ​ជាតិ​អូឡាំពិក​កម្ពុជា​ បាន​នាំ​យក​ជំនួយ​មួយ​ចំនួន​ធំ​ពី​អូឡាំពិក​អន្តរជាតិ​ (IOC) ប្រគល់​ជូន​តាម​រយៈ​ក្រសួង​អប់រំ​ យុវជន​ និង​កីឡា ​ស្រប​តាម​ការ​អំពាវនាវ​កន្លង​ទៅ​ដើម្បី​ជួយ​សម្រួល​ដល់​ជនភៀសសឹក​។ ពិសេស​នោះ​គឺ​សិស្សានុសិស្ស​ដែល​កំពុង​ភៀស​ខ្លួន​ និង​កំពុង​ផ្អាក​ការ​សិក្សា​អំឡុង​ពេល​ឈ្លានពាន​ពេល​នេះ។​

ទិដ្ឋភាព​ប្រគល់​ព្រឹកមិញ

តំណាង​ផ្នែក​កីឡា​រូប​នេះ​បន្ថែម​ទៀត​ថា​ សម្ភារ​កីឡា​ដូច​ជា​បាល់​ សី​ និង​ឧបករណ៍​ជា​ច្រើន​នេះ​នឹង​ជួយ​ដល់​សិស្សានុសិស្ស​​បាន​លេង​កម្សាន្ត​សប្បាយ​កាត់​បន្ថយ​ភាព​តានតឹង​ ភាព​ស្មុគស្មាញ​ និង​បាន​លេង​កីឡា​នៅ​តាម​ទីកន្លែង​ដែល​ភៀស​ខ្លួន។​ មួយ​វិញ​ទៀត​ជា​ការ​លើក​ទឹកចិត្ត​ដល់​គ្រូ​ៗ​ សិស្សានុសិស្ស​ និង​ក្រុម​គ្រួសារ​ជន​ភៀសសឹក​ផង​ដែរ​អំឡុង​ស្ថានភាព​លំបាក​។​

ទិដ្ឋភាព​ប្រគល់​ព្រឹកមិញ

បញ្ជាក់​ដែរ​ថា​ សម្ភារ​ដែល​ប្រគល់​ជូន​ទៅ​ក្រសួង​អប់រំ​ យុវជន​ និង​កីឡា​ កាល​ពី​ព្រឹកមិញ​នេះ​មាន​ជា​អង្ករ​ បាល់​ សី​ អាវ​កីឡា​ ក្រមា​ និង​របស់​ប្រើប្រាស់​ផ្សេងៗ​ជា​ច្រើន​មុខ​ទៀត។​ នេះ​ជា​លើក​ទី២​ ផង​ដែរ​ដែល​គណៈកម្មាធិការ​ជាតិ​អូឡាំពិក​កម្ពុជា​បាន​ជួយ​ដល់​ជន​ភៀសសឹក​អំឡុង​ការ​ឈ្លានពាន​របស់​សៀម​មក​លើ​ខ្មែរ​អំឡុង​ពេល​នេះ៕​

ទិដ្ឋភាព​ប្រគល់​ព្រឹកមិញ

អត្ថបទ៖ នួន ស៊ីណា​

The post គណៈកម្មាធិការ​អូឡាំពិក​អន្តរជាតិ​ ឧបត្ថម្ភ​ជំនួយ​តាម​រយៈ​ក្រសួង​អប់រំ​ ដល់​សិស្សានុសិស្ស​​ភៀស​សឹក appeared first on Kampuchea Thmey Daily.

តំណែងជាប្រធានគណៈកម្មាធិការជាតិរៀបចំបុណ្យជាតិ-អន្តរជាតិ របស់សម្ដេចមហាមន្ត្រី គុយ សុផល  គឺជំនួសតំណែងរបស់សម្ដេចចៅហ្វាវាំងវរវៀងជ័យអធិបតីស្រឹង្គា​ គង់ សំអុល ដែលទទួលមរណៈភាព កាលពីថ្ងៃទី០២ ខែកញ្ញា ឆ្នាំ២០២៤ ថ្មីៗកន្លងទៅនេះ។

ក្នុងព្រះរាជក្រឹត្យដដែល ព្រះមហាក្សត្រ ក៏បានតែងតាំង ទីប្រឹក្សារាជរដ្ឋាភិបាល អនុប្រធានអចិន្ត្រៃយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិ  លោក ឈិន កេតនា ឱ្យធ្វើជាអនុប្រធានអចិន្ត្រៃយ៍គណៈកម្មាធិការជាតិរៀបចំបុណ្យជាតិ-អន្តរជាតិ  បន្ថែមលើមុខងារបច្ចុប្បន្ន ដែលមានឋានៈនិងបុព្វសិទ្ធិស្មើឧបនាយករដ្ឋមន្ត្រី។

ចំណែក លោក សេង ទៀង រដ្ឋលេខាធិការទីស្ដីការគណៈរដ្ឋមន្ត្រីត្រូវបានតែងតាំងជាអនុប្រធានគណៈកម្មាធិការជាតិរៀបចំបុណ្យជាតិ-អន្តរជាតិ   មានឋានៈស្មើរដ្ឋមន្ត្រី។ លោក គង់ សោភ័ណ ដែលបច្ចុប្បន្នជារដ្ឋលេខាធិការក្រសួងមហាផ្ទៃ, លោក ជូ គឹមឡេង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ, លោក វង្ស ពិសេន អគ្គមេបញ្ជាការកងយោធពលខេមរភូមិន្ទ, លោក ស សុខា​ អគ្គមេបញ្ជាការ និងជាមេបញ្ជាការកងរាជអាវុធហត្ថ, លោក លោក ស ថេត អគ្គស្នងការនគរបាលជាតិ និងលោក សុក ខា  ត្រូវបានតែងតាំងជាអនុប្រធានគណៈកម្មាធិការជាតិរៀបចំបុណ្យជាតិ-អន្តរជាតិ៕

ដោយ៖ ង៉ិល ណារ៉ាត់

The post សម្ដេច គុយ សុផល ត្រូវបានតែងតាំងជាប្រធានគណៈកម្មាធិការរៀបចំបុណ្យជាតិ-អន្តរជាតិ ជំនួសសម្ដេច គង់ សំអុល appeared first on Kampuchea Thmey Daily.

ដើម្បីរៀបចំបុណ្យកាន់បិណ្ឌ ភ្ជុំបិណ្ឌ និងកឋិនទាន ឱ្យប្រព្រឹត្តទៅស្របតាមទំនៀមទម្លាប់ប្រពៃណី ព្រះពុទ្ធសាសនា គណៈកម្មាធិការជាតិរៀបចំបុណ្យជាតិ-អន្តរជាតិ ណែនាំឱ្យគ្រប់ក្រសួង រដ្ឋលេខាធិការដ្ឋាន ស្ថាប័ន និងរដ្ឋបាលរាជធានី ខេត្ត ត្រូវផ្សព្វផ្សាយអំពីខ្លឹមសារបុណ្យទាំងពីរ ខាងលើឱ្យបានជ្រួតជ្រាបទូលំទូលាយ និងបំផុសលើកទឹកចិត្ត បង្កលក្ខណៈ​ងាយ​ស្រួល​ជូនមន្ត្រីរាជការ​ក្រោមឱវាទ បានចូលរួមបំពេញកុសលជាប្រពៃណី នៅតាមវត្តអារាម ឬនៅក្នុងអង្គភាពរបស់ខ្លួន ព្រមទាំងបានជួបជុំឪពុកម្តាយ បងប្អូន ជីដូនជីតា តាមបំណងប្រាថ្នា។

ទន្ទឹមនេះ ត្រូវតុបតែងលម្អដោយទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក និងបំភ្លឺភ្លើងពណ៌ តាមក្រសួង រដ្ឋលេខាធិការដ្ឋាន ស្ថាប័ន រដ្ឋបាលរាជធានី ខេត្ត ក្រុង ស្រុក ខណ្ឌ ឃុំ សង្កាត់ រោងចក្រ សហគ្រាស សាលារៀន តាមសួនច្បារទីសាធារណៈ និងតាមគេហដ្ឋានប្រជាពលរដ្ឋ។

ចំពោះ ក្រសួងធម្មការ និងសាសនា ត្រូវធ្វើសេចក្តីណែនាំលម្អិតជូនគ្រប់មន្ទីរធម្មការ និងសាសនា រាជធានី-ខេត្ត យកចិត្តទុកដាក់រៀបចំពិធីបុណ្យ និងរម្លឹកគ្រប់វត្តអារាម ឱ្យរៀបចំសម្អាតបូជនីយដ្ឋាន ស្កូប កន្លែងតម្កល់អដ្ឋិធាតុ បងប្អូនជនរួមជាតិ ដែលបានបាត់បង់ជីវិតក្នុងរបបប្រល័យពូជសាសន៍ និងតុបតែងលម្អ ដោយបំភ្លឺភ្លើងពណ៌ លើកទង់ជាតិ ទង់សាសនា ទង់ព្រះមហាក្សត្រ និង បដាពាក្យស្លោក។

ក្រៅ​ពី​នេះ គណៈកម្មការ​រៀប​ចំបុណ្យជាតិ-អន្តរជាតិ ក៏បានស្នើដល់ស្ថាប័នពាក់ព័ន្ធ​មួយ​ចំនួន​ទៀតរួមមាន ក្រសួង​ព័ត៌មាន ឱ្យជួយផ្សព្វផ្សាយពីប្រវត្តិខ្លឹមសារ និងសកម្មភាពនៃពិធីបុណ្យប្រពៃណី ឱ្យបានទូលំទូលាយ។ ស្នើឱ្យ ក្រសួងមហាផ្ទៃ និងក្រសួងការពារជាតិ ណែនាំដល់អង្គភាពក្រោមឱវាទឱ្យសហការ ការពាររក្សាសន្តិសុខ របៀបរៀបរយ សណ្តាប់​ធ្នាប់សង្គម និងចរាចរណ៍ ក្នុងឱកាសពិធីបុណ្យ និងអំពាវនាវគ្រប់ក្រសួង រដ្ឋលេខាធិការដ្ឋាន ស្ថាប័ន អង្គភាព ឱ្យចូលរួមជួយឧបត្ថម្ភអំណោយជាសម្ភារថវិកា ដល់អ្នកជំងឺដែលកំពុងសម្រាកព្យាបាលនៅតាមមន្ទីរពេទ្យនានា និងចាស់ជរាគ្មានទីពឹង៕

អត្ថបទ៖ សុធាវី

The post ក្រសួង ស្ថាប័ន និងកន្លែងសំខាន់ៗ តម្រូវឱ្យរៀបចំលម្អ អបអរបុណ្យភ្ជុំបិណ្ឌ appeared first on Kampuchea Thmey Daily.

យោងតាមសចក្តីជូនដំណឹងរបស់ គណៈកម្មាធិការជាតិរៀបចំបុណ្យជាតិ-អន្តរជាតិ ដែលទើបទទួលបាននៅថ្ងៃទី០៧ ចឬមិថុនានេះ បានឱ្យដឹងថា ត្រូវចាត់តាំងរៀបចំព្រះរាជពិធីបុណ្យចម្រើនព្រះជន្ម ហ្លួងម៉ែ គម្រប់ព្រះជន្ម ៨៦ យាង ចូល ៨៧ ព្រះវស្សា ដើម្បីចូលរួមអបអរសាទរថ្វាយព្រះរាជសព្ទសាធុការពរបវរមហាប្រសើរ ថ្វាយសម្តេចព្រះមហាក្សត្រីនរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លែងថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់ផង និងដើម្បីសម្តែងនូវកតញ្ញូតាធម៌ តបស្នងព្រះមហាករុណាទិគុណដ៏ធំធេង ដែលព្រះអង្គបានលះបង់ ព្រះកាយពល ព្រះបញ្ញាញាណ ក្នុងព្រះរាជសកម្មភាពដ៏ឧត្តុង្គឧត្តម ដើម្បីបុព្វហេតុជាតិមាតុភូមិ និងប្រជារាស្ត្រ ជាកូនចៅ ចៅទួតរបស់ព្រះអង្គ ពិសេសលើវិស័យមនុស្សធម៌ អប់រំ សង្គមកិច្ច សុខុមាលភាពទូទៅ។

ដើម្បីញាំងឱ្យការរៀបចំ ព្រះរាជពិធីបុណ្យចម្រើនព្រះជន្មហ្លួងម៉ែប្រព្រឹត្តទៅស្របតាមព្រះរាជប្បវេណីពីបុរាណ គណៈកម្មា ធិការជាតិរៀបចំបុណ្យជាតិ-អន្តរជាតិ បានណែនាំដល់ គ្រប់ក្រសួង ស្ថាប័ន រាជធានី ខេត្ត និងគ្រប់វត្តអារាម ក្រុមហ៊ុន រោងចក្រ សហគ្រាសត្រូវ រៀបចំតាំងព្រះបរមឆាយាល័ក្ខណ៍សម្ដេចម៉ែ សម្ដេចយាយ សម្ដេចយាយទួត ជាទីគោរពសក្ការៈដ៏ខ្ពង់ខ្ពស់ ដោយមានតុបតែងលម្អដោយភ្លើងពណ៌ ពាក្យស្លោកថ្វាយព្រះពរ សារលិខិតថ្វាយព្រះពរ និងលើក ទង់ជាតិ ទង់សាសនា ទង់ព្រះមហាក្សត្រ បដាពាក្យ ស្លោក អរបររសាទរ ឱ្យបានគ្រប់អង្គភាព និងលំនៅដ្ឋាន។

រីឯក្រសួងព័ត៌មាន ក៏ត្រូវចាត់ចែងឱ្យបណ្តាញវិទ្យុ ទូរទស្សន៍ជាតិ និងឯកជន ផ្សព្វផ្សាយឱ្យបានទូលំទូលាយ អំពីព្រះរាជសកម្មភាព និងស្នាព្រះហស្ត របស់ សម្តេចព្រះមហាក្សត្រី ព្រះវររាជមាតាជាតិខ្មែរ ដែលព្រះអង្គបានបម្រើប្រទេសជាតិ និងប្រជារាស្ត្រ ឱ្យបានទូលំទូលាយ។

ចំពោះក្រសួងវប្បធម៌ និងវិចិត្រសិល្បៈក៏ត្រូវផលិតកម្មវិធីប្រគំតន្ត្រីបុរាណ សម័យផ្សព្វផ្សាយតាមវិទ្យុ ទូរទស្សន៍ជាតិ និងឯកជន ហើយនៅយប់ថ្ងៃទី១៨ ខែមិថុនានេះ ក៏នឹងមានចាត់ចែងអុជកាំជ្រួច ដើម្បីអបអរសាទរ ទិវាដ៏ឧត្តុង្គឧត្តមនេះផងដែរ។

សូមបញ្ជាក់ថា ឆ្នាំនេះព្រះរាជពិធីបុណ្យចម្រើនព្រះជន្ម វស្សាថ្វាយ សម្ដេចព្រះមហាក្សត្រី នឹងប្រព្រឹត្តទៅនៅថ្ងៃសៅរ៍ ៤រោច ខែជេស្ឋ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៨ ខែមិថុនា ឆ្នាំ២០២២៕

អត្ថបទ៖ សំអឿន

The post គណៈកម្មាធិការបុណ្យជាតិ ណែនាំរៀបចំពិធីបុណ្យចម្រើនព្រះជន្ម សម្តេចម៉ែ ឱ្យស្របព្រះរាជប្បវេណី appeared first on Kampuchea Thmey Daily.

មន្ត្រី នៃគណៈកម្មាធិការជាតិរៀបចំបុណ្យជាតិ-អន្តរជាតិ បានឱ្យដឹងបន្ថែមថា ព្រះរាជពិធីច្រត់ព្រះនង្គ័ល មិនអាចប្រារព្ធបាន ដោយសារស្ថានភាពការឆ្លងរាលដានជំងឺកូវីដទើបបានថមថយ ចំណែក ព្រះរាជពិធីច្រង់ព្រះនង្គ័ល បើប្រារព្ធ គឺត្រូវប្រើពេលច្រើនខែមុនថ្ងៃកំណត់មកដល់ ដើម្បីរៀបចំទីតាំង និងពិធីសាសនាផ្សេងៗ។

ព្រះរាជពិធីបុណ្យច្រត់ព្រះនង្គ័លមានតាំងពី​បុរាណនៅក្នុងទំនៀមទម្លាប់ខ្មែរ។ ពិធីនេះតែងប្រារព្ធឡើងនៅថ្ងៃ ៤រោច ខែពិសាខ​ ជារៀងរាល់ឆ្នាំ ចំណែកនៅក្នុងគម្ពីរបាលីហៅថា វប្បមង្គល មានន័យថា “មង្គលសាបព្រោះបណ្ដុះដាំ” ដែលជាព្រះរាជពិធីសំខាន់មួយក្នុងចំណោមព្រះរាជពិធីសំខាន់ៗប្រចាំឆ្នាំ។ អត្ថន័យនៃព្រះរាជពិធីនេះ ត្រូវបានអ្នកជំនាញវប្បធម៌ខ្មែរលើកឡើងថា ច្រត់ព្រះនង្គ័ល ជាមង្គលចម្រើននៃការសាបព្រោះបណ្ដុះដាំក្នុងរដូវភ្លៀងរបស់ប្រជាជន​ ដែលមានព្រះមហាក្សត្រជានិមិត្តរូបយកព្រះទ័យទុកដាក់ដល់ការបង្កបង្កើនផលដំណាំ។ ទ្រង់តែងបួងសួងសុំទឹកភ្លៀង សុំសេក្តីសុខសន្តិភាព កុំឱ្យមានរោគ និងបង្ហាញពីព្រហ្មវិហារធម៌ និងទសពិធរាជធម៌ទៅដល់ប្រជារាស្រ្តទូទាំងប្រទេស។

ព្រះរាជពិធីនេះធ្វើឡើងដើម្បីផ្សងមើលប្រផ្នូលក្នុងស្រុកទៅតាមការទស្សន៍ទាន ដោយផ្អែកសំខាន់លើតួអង្គ “គោឧសភរាជ”។ នៅក្នុងកម្មវិធីច្រត់ព្រះនង្គ័លគេបានរៀបចំគោចំនួនបីនឹម ដែលមួយនឹមជាសម្រាប់ទឹមច្រត់ព្រះនង្គ័លហៅថា គោឧសភរាជ មានសម្បុសខ្មៅ ស្នែងរាងឈ្នក់ ឬប្រក់នាគ។ ចំណែកឯគោពីរនឹមទៀតសម្រាប់ទឹមមុខក្រោយ ហើយមិនសូវមានកំណត់លក្ខណៈទេ។ គោឧសភរាជមានប្រដាប់ដោយគ្រឿងពាក់ស្រោមមុខ ស្រោមស្នែង និងពាក់សំពត់កម្រាលក្រហមលើខ្នង។

គួររម្លឹកថា ព្រះរាជពិធីបុណ្យច្រត់ព្រះនង្គ័ល កាលឆ្នាំ២០១៧ បានប្រារព្ធនៅខេត្តព្រៃវែង ឆ្នាំ២០១៨ បានប្រារព្ធនៅខេត្តស្វាយរៀង ឆ្នាំ២០១៩ ប្រារព្ធនៅខេត្តតាកែវ ហើយត្រូវបានខកខានប្រារព្ធចាប់តាំងពីឆ្នាំ ២០២០ ដោយសារបង្ការវិបត្តិសាកលការឆ្លងជំងឺកូវីដ-១៩។

អត្ថន័យពិតប្រាកដក្នុងព្រះរាជពិធីច្រត់ព្រះន័ង្គលគឺមាន ៤ចំណុចសំខាន់ៗ ទី១ ប្រាប់​កសិករ​ថា​ ដល់​រដូវ​ធ្វើ​ស្រែ​ហើយ ទី២ ផ្សង​ការ​បរិភោគ​របស់​គោ​ឧសភរាជ​ និង​ការ​បួង​សួង​សុំ​ទឹក​ភ្លៀង​ និង​ទិន្នផល​ដំណាំ ទី៣ ការ​ដឹង​គុណ​ សំដៅ​ដល់​ការ​ដឹង​គុណ​របស់​ប្រជានុរាស្ត្រ​ចំពោះ​អាទិទេព​ ក៏​ដូចជា​មេឃ​ ដែល​បាន​បង្អុរ​ភ្លៀង និងទី៤ គេ​ជឿ​ជាក់​ថា​ ស្ដេច​មេឃ គឺ​ជា​មនុស្ស​ដែល​មាន​ឥទ្ធិពល​លើ​ការ​គ្រប់គ្រង​ ឬ​បញ្ជា​ធរណី​ និង​មេឃ​បាន​៕

The post ឆ្នាំនេះ បុណ្យពិសាខបូជាប្រារព្ធធម្មតា ចំណែកព្រះរាជពិធីច្រត់ព្រះនង្គ័ល តើប្រារព្ធ ឬទេ? appeared first on Kampuchea Thmey Daily.

ជាមួយគ្នានេះ គណៈកម្មាធិការជាតិរៀបចំបុណ្យជាតិ-អន្តរជាតិ សហការជាមួយក្រសួង រដ្ឋលេខាធិកាដ្ឋាន ស្ថាប័ន និងរដ្ឋបាលរាជធានី ខេត្តពាក់ព័ន្ធ ចាត់តាំងរៀបចំពិធីបុណ្យវិសាខបូជាជាផ្លូវការរយៈពេលមួយថ្ងៃ គឺនៅថ្ងៃពេញបូណ៌មី ១៥កើត ខែពិសាខ ដោយមានកម្មវិធី ហែប្រទក្សិណ ព្រះមហាសក្យមុនីចេតិយ និងថ្វាយគ្រឿងសក្ការបូជា នមស្ការព្រះរតនត្រ័យ សហទានសីល វេរភត្ត ឧទ្ទិសកុសល និងនិមន្តព្រះសង្ឃបិណ្ឌបាត នៅឧបដ្ឋានសាលាខាងក្រោម ដែលស្ថិតខាងកើត ព្រះមហាសក្យមុនីចេតិយ។ ចំណែកនៅពេលល្ងាច និងថ្ងៃបន្ទាប់ ជាឱកាសប្រគេនព្រះសង្ឃ ជូនពុទ្ធបរិស័ទ ថ្វាយគ្រឿងសក្ការបូជា នមស្ការព្រះរតនត្រ័យ សូត្រនមស្ការគាថាបំពេញកុសលតាមសទ្ធាជ្រះថ្លា ស្របតាមប្រពៃណីព្រះពុទ្ធសាសនា។

គណៈកម្មាធិការ អំពាវនាវសប្បុរសជន ពុទ្ធបរិស័ទ ប្រជាពលរដ្ឋ អញ្ជើញចូលរួមបំពេញកុសល តាមសទ្ធាជ្រះថ្លា ដើម្បីជាគុណប្រយោជន៍ដល់ការអភិរក្សអត្តសញ្ញាណជាតិ ប្រពៃណីព្រះពុទ្ធសាសនា និងអនុមោទនាយកផលានិសង្ស រៀងៗខ្លួន ដោយប្រព្រឹត្តស្របតាមប្រពៃណីព្រះពុទ្ធសាសនា និងអនុវត្តតាមវិធានការ សុខាភិបាល និងវិធានការរដ្ឋបាលរបស់អាជ្ញាធរដែនដី សំដៅបង្ការ និងទប់ស្កាត់ការឆ្លងជំងឺកូវីដ-១៩។

គួរបញ្ជាក់ថា បុណ្យវិសាខបូជា គឺជាបុណ្យមួយក្នុងចំណោមបុណ្យធំៗទាំងឡាយ ក្នុងព្រះពុទ្ធសាសនា ដែលប្រទេសកាន់ព្រះពុទ្ធសាសនា នៅលើសកលលោក តែងប្រារព្ធធ្វើជារៀងរាល់ឆ្នាំ។ ពិធីបុណ្យនេះ ប្រារព្ធធ្វើឡើងដើម្បីរម្លឹកដល់អភិលក្ខិតសម័យទាំងបី ដែលព្រះសម្មាសម្ពុទ្ធបរមគ្រូ ទ្រង់ប្រសូតចាកឧទរព្រះមាតា ទ្រង់បានត្រាស់ដឹងនូវអនុត្តរសម្មាសម្ពោធិញ្ញាណ និងទ្រង់រម្លត់ខន្ធចូលកាន់ ព្រះបរិនិព្វាន។

តាម​ការ​ស្រាវ​ជ្រាវ​​បាន​បង្ហាញ​ថា បុណ្យវិសាខ​បូជា ​ទំនង​ជា​ធ្វើ​នៅ​ក្រោយ​ពុទ្ធ​បរិនិព្វាន​ច្រើន​រយឆ្នាំ។ ប្រភព​មួយ​ចំនួន​បានលើកឡើងថា ​ប្រទេសឥណ្ឌា និង​ប្រទេស​លង្កា បាន​​ប្រារព្ធ​ពិធី​បុណ្យ​​នេះ​យូរ​យារ​ណាស់មក​ហើយ​។ ចំណែក​ប្រទេស​សៀម និង​ប្រទេស​ខ្មែរ​ទើប​​ចាត់​ចែង​ធ្វើ​នៅ​គ្រឹស្តសតវត្សទី១៩។ នៅ​ក្នុង​ប្រទេស​កម្ពុជា បាន​ផ្តើម​ធ្វើ​ក្នុង​​រជ្ជកាល​​ព្រះបាទ​​សម្តេច​​ព្រះ​ហរិរក្សមារា (ព្រះអង្គដួង) ដែល​គង់​​នៅ​ក្រុង​ឧត្តុង្គ ក្នុង​ពុទ្ធសករាជ ២៣៩៧​ គ្រឹស្តសករាជ ១៨៥៤​ ដោយ​មហាប៉ាន ដែល​ស្តេច​សៀម បាន​បញ្ជូន​មក​កាន់​ឧត្តុង្គ តាម​សំណើ​ព្រះបាទ អង្គដួង។

សមាជិក​ នៃ​អង្គការ​សហប្រជាជាតិ​ជិត ២០០ប្រទេស​ បាន​អនុម័ត​ជា​ឯកច្ឆន្ទ​ទទួលស្គាល់ និង​ចាត់​ទុក​បុណ្យ​វិសាខ​បូជា​របស់​ព្រះពុទ្ធសាសនា​ ជា​បុណ្យ​អន្តរជាតិ នៅឆ្នាំ ១៩៩៩៕

អត្ថបទ៖ ច័ន្ទ វីរៈ

The post ពិធីបុណ្យវិសាខបូជាឆ្នាំនេះនឹងរៀបចំ ក្រោមអធិបតីភាព សម្ដេចវិបុលសេនាភក្ដី សាយ ឈុំ appeared first on Kampuchea Thmey Daily.

យោងតាមសេចក្តីណែនាំរបស់គណៈកម្មាធិការជាតិរៀបចំបុណ្យជាតិ-អន្តរជាតិ ដែលទើបទទួលបាននៅថ្ងៃនេះបានដាក់ផែនការណែនាំដល់គ្រប់ក្រសួងស្ថាប័ន រាជធានីខេត្ត ឲ្យត្រៀមលក្ខណៈរៀបចំពិធីបុណ្យចម្រើនព្រះជន្មថ្វាយព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត នៃព្រះរាជាណាចក្រកម្ពុជា គម្រប់ព្រះជន្ម៦៩ យាងចូល ៧០ព្រះវស្សា ឲ្យបានស្របទៅតាមព្រះរាជប្បវេណីពីបុរាណ។

ដើម្បីរៀបចំព្រះរាជពិធីបុណ្យឱ្យប្រព្រឹត្តទៅស្របតាមព្រះរាជប្បវេណីពីបុរាណ គណៈកម្មាធិការជាតិរៀបចំបុណ្យជាតិ-អន្តរជាតិបានធ្វើការណែនាំដល់គ្រប់ក្រសួងស្ថាប័ន រាជធានី ខេត្ត និងគ្រប់វត្តអារាម ក្រុមហ៊ុន រោងចក្រសហគ្រាសត្រូវ
រៀបចំតាំងព្រះបរមឆាយាល័ក្ខណ៍ ព្រះករុណាជាអម្ចាស់ជីវិតលើត្បូង ដោយមានតុបតែងលម្អដោយភ្លើងពណ៌ ពាក្យ ស្លោកថ្វាយ ព្រះពរ សារលិខិតថ្វាយព្រះពរ និងលើកទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក អបអសាទរឲ្យបានគ្រប់អង្គភាព និងលំនៅដ្ឋាន។ រីឯក្រសួងព័ត៌មាន ត្រូវចាត់ចែងឱ្យបណ្តាញវិទ្យុ ទូរទស្សន៍ជាតិ និងឯកជន
ផ្សព្វផ្សាយឱ្យបានទូលំទូលាយនូវព្រះរាជជីវប្រវត្តិ និងព្រះរាជសកម្មភាព ព្រះករុណា ដែលយាងចុះសួរសុខទុក្ខ ជួបប្រាស្រ័យផ្ទាល់ជាមួយព្រះសង្ឃ និងប្រជារាស្ត្ររបស់ព្រះអង្គ។ ដោយឡែកក្រសួងវប្បធម៌ និងវិចិត្រសិល្បៈ ត្រូវផលិតកម្មវិធីប្រគំតន្ត្រីបុរាណ សម័យ ផ្សព្វផ្សាយតាមវិទ្យុ ទូរទស្សន៍ជាតិ និងឯកជន ដើម្បីអបអរសាទរព្រះរាជពិធីបុណ្យចម្រើនព្រះជន្ម និងចាត់តាំងការអុជកាំជ្រួចនៅយប់ថ្ងៃទី១៤ ខែឧសភា ឆ្នាំ២០២២ ដើម្បីញ៉ាំងឱ្យព្រះរាជពិធីបុណ្យប្រព្រឹត្តទៅយ៉ាងមហោឡារិក។

គួរបញ្ជាក់ថា ជារៀងរាល់ឆ្នាំ រាជរដ្ឋាភិបាលកម្ពុជា រួមជាមួយព្រះរាជវង្សានុវង្ស ថ្នាក់ដឹកនាំ មន្ត្រីរាជការ គ្រប់ក្រសួង រដ្ឋលេខាធិការដ្ឋាន ស្ថាប័ន និងរដ្ឋបាលរាជធានី ខេត្ត ព្រមទាំងប្រជារាស្ត្រទូទាំងប្រទេស តែងរៀបចំប្រារព្ធព្រះរាជពិធី
បុណ្យ​ចម្រើនព្រះជន្មថ្វាយព្រះមហាក្សត្រ ដោយចាត់ទុកព្រះរាជពិធីបុណ្យចម្រើនព្រះជន្មនេះ គឺជាអាយុវឌ្ឍនមង្គលមួយដ៏ប្រសើរថ្លៃថ្លា ដែលប្រារព្ធឡើងដើម្បីសម្តែងនូវកតញ្ញូតាធម៌ ចំពោះព្រះមហាករុណាទិគុណរបស់ព្រះមហាក្សត្រដើម្បីថ្វាយ​ព្រះពរសព្ទសាធុការ និងថ្វាយព្រះរាជកុសលចំពោះ ព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុត ដើម្បីបានគង់ប្រថាប់នៅក្នុងព្រះបរមសិរីរាជសម្បត្តិ និងជាម្លប់ដ៏ត្រជាក់ត្រជំរបស់ប្រជារាស្ត្រយូរអង្វែងតរៀងទៅ។

សម្រាប់ឆ្នាំនេះ ព្រះរាជពិធីបុណ្យចម្រើនព្រះជន្ម ព្រះករុណាជាអម្ចាស់ជីវិតលើត្បូង ព្រះមហាក្សត នៃព្រះរាជាណាចក្រកម្ពុជា គម្រប់ព្រះជន្ម៦៩ យាងចូល៧០ព្រះវស្សា នឹងប្រព្រឹត្តទៅនៅថ្ងៃសៅរ៍ទី១៤ ខែឧសភា ឆ្នាំ២០២២៕

អត្ថបទ៖ សំអឿន

The post គណៈកម្មាធិការបុណ្យជាតិ ណែនាំឱ្យរៀបចំបុណ្យចម្រើនព្រះជន្មព្រះមហាក្សត្រឆ្នាំនេះឱ្យបានអធិកអធម appeared first on Kampuchea Thmey Daily.

លោក អ៊ឹម បុរិន បញ្ជាក់ថា មួយរយៈកន្លងទៅនេះ លោក ប៊ុន វាស្នារ បានបោះពុម្ពសៀវភៅ “តម្រាព្យាករណ៍ លេខអត្តៈ ៧តួ ៩ថាន” លក់ជាសាធារណៈ។ លោក អ៊ឹម បុរិន បានឱ្យដឹងថា លោកបានទិញ ទើបដឹងថា ខ្លឹមសារក្នុងសៀវភៅនេះសុទ្ធតែបានចម្លងពីសៀវភៅ “ព្រហ្មលិខិតពិស្ដារ” និងឯកសារជា Excel របស់លោក ដែល លោក ប៊ុន វាស្នារ សុំពីលោកយកទៅសម្រាប់សិក្សា និងដោយយល់ថា ជាមិត្តរួមការងារ និងជាអ្នកហោរាដូចគ្នា ទើបជូនទៅ លោក ប៊ុន វាស្នារ។

លោក អ៊ឹម បុរិន មានប្រសាសន៍បន្តថា៖ “តែផ្ទុយទៅវិញ គាត់បែរជាក្បត់ទំនុកចិត្ត យកឯកសារនោះទៅបោះពុម្ពលក់ និងផ្សព្វផ្សាយតាម Page សមាគមស្រាវជ្រាវវិជ្ចាហោរាសាស្ត្រ Page បណ្ណាល័យហោរាសាស្រ្ត តាម Facebook ឈ្មោះ Heng Ty ចាត់ទុកជាឯកសាររបស់ខ្លួន ដោយមិនមានការសុំអនុញ្ញាតិពីខ្ញុំសោះឡើយ”។

លោក អ៊ឹម បុរិន បន្តទៀតថា៖ “ក្នុងមួយរយៈកន្លងទៅនេះ ខ្ញុំបានទុកពេលឱ្យគាត់ចូលមកដោះស្រាយ តែគាត់មិនបានចូលមកទេ។ ខ្ញុំបានឱ្យមេធាវីរបស់ខ្ញុំធ្វើលិខិតអញ្ជើញគាត់ នៅថ្ងៃទី១៦ ខែកុម្ភៈ ២០២២ វេលាម៉ោង ៣រសៀល គាត់នៅតែគេចវេសមិនព្រមចូលមកដោះស្រ័យដដែល”។

លោក អ៊ឹម បុរិន លើកឡើងថា នេះអំពើដ៏អាក្រក់ ក្បត់ទំនុកចិត្តមិត្តរួមការងាររបស់ លោក ប៊ុន វាស្នារ ដែលមិនអាចអត់ឱនឱ្យបាន និងសូមឱ្យ លោក ប៊ុន វាស្នារ និងបក្ខពួកបញ្ឈប់រាល់ការបោះពុម្ព និងចែកចាយសៀវភៅដែលមានជាប់ពាក់ព័ន្ធឯកសារដែលជាស្នាដៃរបស់លោក និងបញ្ឈប់រាល់ការយករបស់អ្នកដទៃមកកាឡៃធ្វើជារបស់ខ្លួនឯង។

លោក អ៊ឹម បុរិន បញ្ជាក់បន្តថា នៅមានសៀវភៅពីរក្បាលទៀតដែល លោក ប៊ុន វាស្នារ បានចម្លងពីឯកសាររបស់លោក និងបានបោះពុម្ព ដូចជា៖

១. ប្រជុំទំនៀមក្បួនតម្រាខ្មែរ បានយកឯកសារ “តារាសាស្ត្រខ្មែរ តម្រាមហានាទី” ចំនួន ២៤ទំព័រ និងយកលំនាំដោយកែតួលេខ ៣៣ ទំព័រ និងដកពីសៀវភៅ “វិធីគណនាប្រតិទិនខ្មែរ សាកល ៨០០ឆ្នាំ” មួយចំនួនទៀត ព្រមទាំងយកលំនាំគំនិតដោយកែតួលេខជាច្រើនទំព័រទៀត។

២. ប្រតិទិនប្រចាំឆ្នាំ បានចម្លងចេញពីសៀវភៅ “មហាសង្ក្រានឆ្នាំខាល ឆ្នាំ២០២២” “តម្រាព្យាករណ៍ជោគជតារាសី” បោះពុម្ព ឆ្នាំ២០០៣ និង “មហាសង្ក្រានឆ្នាំខាល ទោស័ក២០១០” សរុបទាំងអស់ចំនួន ៤៧ទំព័រ ក្នុងសៀវភៅ ១០៣ទំព័រ។

“កម្ពុជាថ្មី” មិនទាន់អាចទាក់ទង លោក ប៊ុន វាស្នារ ឆ្លើយតបបានទេ នៅពេលនេះ៕

អត្ថបទ៖ ច័ន្ទ វីរៈ

The post ឯកឧត្ដម អ៊ឹម បុរិន្ទ ប្ដឹង ឯកឧត្ដម ប៊ុន វាស្នារ ពីបទ ក្បត់ទំនុកចិត្ត appeared first on Kampuchea Thmey Daily.