តាមរយបាយការណ៍របស់ លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ដ្រីក្រសួងអប់រំ យុវជន​​​ និងកីឡា បានឱ្យដឹងថា ការបង្កើតបណ្តាញសាកលវិទ្យាល័យសាយប័រកម្ពុជា (ប.ស.ស.ក) មានគោលបំណង ចំនួន៤ ទី១).បន្តនិរន្តរភាពនៃការបណ្តុះបណ្តាលនៅកម្រិតឧត្តមសិក្សា ក្នុងអំឡុងពេលនៃការប្រយុទ្ធប្រឆាំងនឹងជំងឺកូវីដ-១៩ និងក្រោយ​ពេលមានវិបត្តិ ២).ពង្រឹងគុណភាពនៃការបណ្តុះបណ្តាលនៅកម្រិតឧត្តមសិក្សា ដោយប្រើប្រាស់នូវថ្នាលអបរំឌីជីថលរួមគ្នា និងចែករំលែកការប្រើប្រាស់ ឱ្យអស់លទ្ធភាពនូវធនធានហេដ្ឋារចនាសម្ព័ន្ធ និងធនធានសិក្សាក្នុងចំណោមសាកលវិទ្យាល័យជាសមាជិក ៣).ផ្តល់លទ្ធភាពក្នុងការផ្ទេរឥណទានសិក្សារវាងសាកលវិទ្យាល័យជាសមាជិក និង៤).បើកចំហធនធានសិក្សាទៅកាន់អ្នកសិក្សាក្នុងតំបន់និងសាកលលោក។

លោករដ្ឋមន្ដ្រីក្រសួងអប់រំ បានគូសបញ្ជាក់ថា គិតចាប់ពីឆ្នាំ២០២២ រហូតដល់បច្ចុប្បន្ន បណ្តាញសាកលវិទ្យាល័យសាយប័រកម្ពុជា មានគ្រឹះស្ថានឧត្តមសិក្សាសាធារណៈ និងឯកជនបានចូលជាសមាជិកចំនួន១២ រួមមាន៖ វិទ្យាស្ថានបច្ចេកវិទ្យាកម្ពុជា សាកលវិទ្យាល័យភូមិន្ទភ្នំពេញ សាកលវិទ្យាល័យជាតិបាត់ដំបង សាកលវិទ្យាល័យស្វាយរៀង សាកលវិទ្យាល័យ ហេង សំរិន ត្បូងឃ្មុំ សាកលវិទ្យាល័យភូមិន្ទកសិកម្ម សាកលវិទ្យាល័យជាតិគ្រប់គ្រង សាកលវិទ្យាល័យជាស៊ីមកំចាយមារ សាកលវិទ្យាល័យក្រចេះ វិទ្យាស្ថានគរុកោសល្យបាត់ដំបង សាកលវិទ្យាល័យភ្នំពេញអន្តរជាតិ និងសាកលវិទ្យាល័យអង្គរ។

ក្នុងនោះដែរ ដើម្បីសម្រេចគោលបំណងខាងលើនេះ បណ្តាញសាកលវិទ្យាល័យសាយប័រកម្ពុជា បានដាក់ចេញនូវផែនការសកម្មភាពរយៈពេល ៣ឆ្នាំ ជា ៣ដំណាក់កាលធំៗ។ ដំណាក់កាលទី១ ក្នុងឆ្នាំ២០២៣ ផ្តោតទៅលើការកសាងហេដ្ឋារចនាសម្ព័ន្ធ និងពង្រឹងសមត្ថភាព ដោយក្នុងនោះសាកលវិទ្យាល័យចំនួន៦ ដែលជាសមាជិកដំបូងបានចាប់ផ្តើមផលិត និងដំណើរការមាតិកា និងខ្លឹមសារមេរៀនតាមអនឡាញ។ ដំណាក់កាលទី២ ក្នុងឆ្នាំ ២០២៤ ផ្តោតលើការបង្កើតមេរៀនរួមគ្នា ឬកម្មវិធីរួមគ្នារវាងសាកលវិទ្យាល័យជាសមាជិក ដើម្បីផ្តល់លទ្ធភាពក្នុងការផ្ទេរឥណទានសិក្សា និងដំណាក់កាលទី៣ ក្នុងឆ្នាំ២០២៥ គឺជាការបើកចំហធនធានសិក្សារបស់កម្ពុជាទៅកាន់តំបន់ និងពិភពលោក។

សូមជម្រាបថា ការអនុវត្ត ប.ស.ស.ក. ជាចំណែកមួយក្នុងការចូលរួមធានាបាននូវសមធម៌ តាមរយៈការកែលម្អការចូលរៀន និងលើកកម្ពស់គុណភាពសិក្សាដល់និស្សិត ក៏ដូចជាផ្តល់ឱកាសដល់គ្រឹះស្ថានឧត្តមសិក្សា ក្នុងការបង្កើតកិច្ចសហប្រតិបត្តិការ រវាងគ្រឹះស្ថានឧត្តមសិក្សា ក្នុងប្រទេស និងជាមួយគ្រឹះស្ថានឧត្តមសិក្សាក្នុងតំបន់ និងក្នុងពិភពលោក៕

The post គោលបំណង នៃការបង្កើតបណ្តាញសាកលវិទ្យាល័យសាយប័រកម្ពុជា (ប.ស.ស.ក) appeared first on Kampuchea Thmey Daily.

ប្រឡាយទឹកជាព្រំប្រទល់នេះ មានជម្រៅ ២ម៉ែត្រទទឹង ៣ម៉ែត្រ បណ្តោយ ៥២គីឡូម៉ែត្រ ហើយគម្រោងនេះគ្រោងចំណាយថវិកាប្រមាណ ៥២ម៉ឺនដុល្លារ សហរដ្ឋអាម៉េរិក។ រាជបណ្ឌិត្យសភាកម្ពុជា បានអះអាងថា គម្រោងជីកប្រឡាយទឹកព្រំប្រទល់ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ក្នុងគោលបំណងសំខាន់ៗចំនួន៥ គឺឆ្មាំអាចមានលទ្ធភាពចល័តពេលយាមកាម តាមព្រំដែនបានយ៉ាងងាយស្រួល ផ្តល់ភាពទាក់ទាញ សោភណភាពនិងភាពស្រស់ស្រាយជូនដល់ភ្ញៀវទេសចរណ៍ដែលមកកាន់ទីនេះ ជាប្រភពទឹកសម្រាប់សត្វព្រៃនិងសត្វបក្សាបក្សីគ្រប់ប្រភេទ ផ្តល់ភាពងាយស្រួលដល់ការគ្រប់គ្រងធនធាននៅក្នុងឧទ្យាន និងសត្វព្រៃគ្រប់ប្រភេទងាយស្រួលក្នុងការផ្លាស់ទីពីកន្លែងមួយទៅកន្លែងមួយទៀត។

ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ត្រូវបានបង្កើត និងទទួលស្គាល់ដោយព្រះរាជក្រឹត្យលេខ នស/រកត/០៤១៤/៤៣៦ ចុះថ្ងៃទី៨ ខែមេសា ឆ្នាំ២០១៤ មានទំហំ ផ្ទៃដី ១១.៤៣៥ហិកតា មានទីតាំងស្ថិតក្នុងឃុំឆែបមួយ និង ឃុំឆែបពីរ ស្រុកឆែប ខេត្តព្រះវិហារ។ ឧទ្យាននេះ មានតំបន់ជីវៈចម្រុះ និងមានសក្តានុពលច្រើនដូចជា ធនធានព្រៃឈើ សត្វព្រៃ កេរដំណែលប្រវត្តិសាស្ត្រ បុរាណវត្ថុវិទ្យា (ឡស្លដែកបុរាណ) និងជាតិពន្ធុកួយ ដែលអាចបម្រើឱ្យមុខងារក្នុងបរិស្ថានព្រៃឈើ វប្បធម៌ ប្រវត្តិសាស្ត្រ និងទេសចរណ៍ បានយ៉ាងប្រសើរ៕

The post រាជបណ្ឌិត្យសភាកម្ពុជា គ្រោងជីកប្រឡាយទឹកព្រំប្រទល់ឧទ្យាន តេ​ជោសែន ឫស្សីត្រឹប appeared first on Kampuchea Thmey Daily.

“គម្រោងអភិវឌ្ឍន៍ក្របខណ្ឌគ្រប់គ្រងហានិភ័យសន្តិសុខសង្គម” ដែលបានលើកមកពិភាក្សា​នៅក្នុងកិច្ចប្រជុំនេះ​ មានគោលបំណងសំខាន់ៗ ដើម្បី (១) ណែនាំទីប្រឹក្សាថ្នាក់ជាតិ និងទីប្រឹក្សាអន្តរជាតិសម្រាប់អភិវឌ្ឍក្របខណ្ឌគ្រប់គ្រង ហានិភ័យសន្តិសុខសង្គម, (២) ធ្វើបទបង្ហាញអំពីវិធីសាស្ត្រការងារ និងផែនការនៃការអភិវឌ្ឍក្របខណ្ឌគ្រប់គ្រង ហានិភ័យសន្តិសុខសង្គម, (៣) ពិនិត្យ និងពិភាក្សាអំពីតម្រូវការទិន្នន័យ និងព័ត៌មានសម្រាប់ជាធាតុចូលក្នុងការ អភិវឌ្ឍក្របខណ្ឌគ្រប់គ្រងហានិភ័យសន្តិសុខសង្គម និង (៤) ផែនការការងារជំហានបន្ទាប់។

នៅក្នុងកិច្ចប្រជុំនេះដែរ គឺអាចប្រមូលធាតុចូលសំខាន់ៗសម្រាប់ការរៀបចំ “គម្រោងអភិវឌ្ឍន៍ក្របខណ្ឌគ្រប់គ្រង ហានិភ័យសន្តិសុខសង្គម” ឲ្យកាន់តែមានលក្ខណៈល្អប្រសើរ និងមានប្រសិទ្ធភាព ដែលអាចជួយដល់ ប.ស.ស. ក៏ដូចជានិយ័តករសន្តិសុខសង្គម លើការអនុវត្តកិច្ចការងាររបស់ខ្លួនពាក់ព័ន្ធទៅនឹងការគ្រប់គ្រងហានិភ័យសន្តិសុខ សង្គមផងដែរ។ គម្រោងខាងលើនេះត្រូវបានផ្តួចផ្តើមបង្កើតឡើងដោយ និយ័តករសន្តិសុខសង្គម៕

The post គោលបំណងសំខាន់ៗ ស្តីពី “គម្រោងអភិវឌ្ឍន៍ក្របខណ្ឌគ្រប់គ្រងហានិភ័យសន្តិសុខសង្គម”  appeared first on Kampuchea Thmey Daily.

កញ្ញា ហាន ស្រីល័ក្ខ គឺជាសិស្សមកពីវិទ្យាល័យបាក់ទូក ដោយប្រឡងបាក់ឌុបទទួលបាននិទ្ទេស A ឆ្នាំ២០២២។ សព្វថ្ងៃ កញ្ញា ហាន ស្រីល័ក្ខ កំពុងសិក្សាថ្នាក់ឧត្តមសិក្សានៅសាកលវិទ្យាល័យអន្តរជាតិ ផារ៉ាហ្គន ជំនាញគ្រប់គ្រងប្រព័ន្ធព័ត៌មានវិទ្យា។ មុខជំនាញនេះ គឺបង្រៀនពីការគ្រប់គ្រងអាជីវកម្ម និងប្រព័ន្ធបច្ចេកវិទ្យា ដែលគួបផ្សំជាមួយនឹងភាពជាអ្នកដឹកនាំ ការបង្កើតយុទ្ធសាស្ត្រជាមួយនឹងជំនាញទន់ និងជំនាញរឹង នាំឱ្យអាជីវកម្មមួយដំណើរការបានរលូនល្អ។

មូលហេតុដែលកញ្ញា ហាន ស្រីល័ក្ខ ជ្រើសរើសយកមុខជំនាញនេះ ព្រោះកញ្ញាយល់ថា ខ្លួនមានទំនោរ បូករួមជាមួយនឹងការស្រឡាញ់ចូលចិត្ត ទេពកោសល្យទៅនឹងជំនាញធុរកិច្ច អាជីវកម្ម និងបច្ចេកវិទ្យា ព្រោះបច្ចុប្បន្នពិភពលោកកំពុងឈានទៅរកសម័យបច្ចេកវិទ្យា។

ក្រោយពីជ្រើសរើសមុខជំនាញបានហើយ សិស្សនិទ្ទេស A រូបនេះ ក៏បានដាក់ផែនការគោលដៅជីវិតរបស់ខ្លួនរយៈពេលវែងមួយ (Long term goal) គឺការបើកអាជីវកម្មខ្លួនឯង និងបង្កើត App សម្រាប់ប្រើប្រាស់ជួយដល់សង្គម។ កញ្ញា ហាន ស្រីល័ក្ខ និយាយថា៖ “មូលហេតុដែលខ្ញុំជ្រើសរើសថាចង់ក្លាយទៅជាអ្នកបង្កើត App ឬ អាជីវកម្មព្រោះចង់បង្កើតអ្វីមួយដែលអាចមានផលចំណេញក្នុងពេលតែមួយ គឺអាចជួយសង្គមបានដោយប្រើប្រាស់បច្ចេកវិទ្យាក្នុងការដោះស្រាយបញ្ហាផ្សេងៗ និងជួយពន្លឿនបច្ចេកវិទ្យានៅកម្ពុជាដំណើរការល្អ”។

ចំណែក កញ្ញា សន សុវណ្ណារ័ត្ន មកពីវិទ្យាល័យសម្តេចឳ ខេត្តសៀមរាប ដែលជាសិស្សទទួលបាននិទ្ទេស A ប្រឡងបាក់ឌុបឆ្នាំ២០២២ បានលើកឡើងថា បន្ទាប់ពីប្រឡងចប់ទី១២ ខ្លួនបានជ្រើសរើសមុខជំនាញធុរកិច្ចឌីជីថល នៅបណ្ឌិតសភាបច្ចេកវិទ្យាកម្ពុជា (CADT)។ មូលហេតុដែលនាំឱ្យ កញ្ញា សន សុវណ្ណារ័ត្ន ជ្រើសរើសយកមុខជំនាញនេះ ព្រោះកញ្ញាមានគ្រឹះស្ថានរឹងមាំតាំងពីថ្នាក់តូចៗ ដោយខ្លួនពូកែផ្នែកគណិតវិទ្យា និងបច្ចេកវិទ្យាផ្សេងៗ។ ហេតុផលមួយទៀត ព្រោះកញ្ញាយល់ថា បច្ចេកវិទ្យាត្រូវបានគេប្រើប្រាស់សឹងគ្រប់វិស័យ។ ដូចនេះហើយវាពិតជាសំខាន់ណាស់ដែលមនុស្សយល់ដឹងពីបច្ចេកវិទ្យាផង ពីជំនួញផង ទើបគេអាចប្រកបអាជីវកម្មបានល្អ។

នាថ្ងៃអនាគត សិស្សនិទ្ទេស A មកពីខេត្តសៀមរាបរូបនេះ មានបំណងចង់ក្លាយជាអ្នកឯកទេសប្រព័ន្ធផ្សព្វផ្សាយឌីជីថល។ កញ្ញា សន សុវណ្ណារ័ត្ន និយាយថា៖ “អ្នកឯកទេសប្រព័ន្ធផ្សព្វផ្សាយ ធ្វើជាស្ពានសម្រាប់ខាងព័ត៌មានវិទ្យា និងខាងទីផ្សារនៅក្រុមហ៊ុនមួយ ឬក៏ជាសហគ្រិនវ័យក្មេងមួយដែលបង្កើតផលិតផលខ្លួនឯង ទាក់ទងនឹងបរិស្ថានជុំវិញ”។

សព្វថ្ងៃកញ្ញា ក៏កំពុងរង់ចាំអាហារូបករណ៍ក្នុងសាលាដែលខ្លួនកំពុងតែរៀនផងដែរ ព្រោះបណ្ឌិតសភាបច្ចេកវិទ្យាកម្ពុជា (CADT) មានទំនាក់ទំនងច្រើនជាមួយក្រុមហ៊ុនធំៗក្នុងប្រទេសកម្ពុជា ដែលកញ្ញាអាចហាត់ការងារបាន មុននឹងចេញទៅរកការងារខ្លួនឯង។ កញ្ញា សន សុវណ្ណារ័ត្ន ក៏ចង់ស្វែងរកការងារស្ម័គ្រចិត្តដែលទាក់ទងនឹងបរិស្ថាន ឬការជួយកុមារផងដែរ៕

ដោយ៖ អុន ស្រីមាន

The post សិស្សនិទ្ទេស A ពីររូប បង្ហាញក្តីស្រមៃក្នុងចង់ប្រឡូកក្នុងវិស័យបច្ចេកវិទ្យានាពេលអនាគត appeared first on Kampuchea Thmey Daily.

ដំបូង​ត្រូវ​ដឹង​ពី​ភាព​ខុស​គ្នា ​រវាង​ចំណង់ចំណូលចិត្ត​ និង​គោលបំណង​ជា​មុន​សិន៖

១. ចំណង់ចំណូលចិត្ត​គឺ​ជា​អារម្មណ៍

អ្វី​ដែល​អ្នក​ធ្វើ​ក្នុង​ជីវិត​សព្វថ្ងៃ​ ព្រោះ​ចូលចិត្ត​ ហើយ​អាច​ឲ្យអ្នក​មាន​អារម្មណ៍​ល្អ។ ចំណង់ចំណូលចិត្ត​គឺ​ជា​កម្លាំង​ជំរុញ​ការ​ធ្វើ ​ជា​ផ្កាភ្លើង​ដែល​ធ្វើ​ឲ្យ​អ្នក​ឈាន​ទៅ​មុខ​ ជា​អារម្មណ៍​ដែល​ទាក់ទាញ​នៅ​ពី​ក្រោយ​ក្ដី​សុបិន​មួយ។

២. គោលបំណង​គឺ​ជា​មូលហេតុ​ពី​ក្រោយ

កន្លែង​ដែល​ចំណង់ចំណូលចិត្ត​រំជួល​ចិត្ត​ គឺ​គោលបំណង ​ដែល​ជា​មូលហេតុ​នៅ​ពី​ក្រោយ។ គោលបំណង​គឺ​ការ​លើក​ទឹកចិត្ត​មួយ ​វា​នាំ​មក​នូវ​សកម្មភាព​ជាក់ស្ដែង ។ ចងចាំ​ថា ​គោលបំណង​គឺ​ជា​ហេតុផល​ដែល​អ្នក​កំពុង​ធ្វើ។ បើ​អ្នក​មាន​គោលបំណង​នៅ​ពី​ក្រោយ​ចំណង់ចំណូលចិត្ត​ នោះ​ហើយ​ជា​ហេតុផល​ដែល​ធ្វើ​ឲ្យមាន​កម្លាំង​ជំរុញ។

៣. ចំណង់ចំណូលចិត្ត​ក៏​អាច​អាត្មានិយម

ចំណង់ចំណូលចិត្ត​អាច​អាត្មានិយម​បាន ​នៅ​ពេល​ដែល​អ្នក​ធ្វើអ្វី​មួយ​ដើម្បី​ការ​សប្បាយ​ផ្ទាល់ខ្លួន ដោយ​មិន​គិត​ពី​អារម្មណ៍​អ្នក​ដទៃ។ ចំណែក​គោលបំណង​ អាច​នឹង​ពាក់ព័ន្ធ​ការ​បម្រើ​អ្នក​ដទៃ ​ប៉ុន្តែ​មិនមែន​ជា​ខ្ញុំ​បម្រើ​ទេ។ អ្នក​នឹង​មាន​អារម្មណ៍​រីករាយ​អំពី​ការ​បង្កើត​អំណរ​មួយ​នេះ ​ដោយ​ការ​បន្ថែម​តម្លៃ​ទៅ​ក្នុង​ជីវិត​អ្នក​ដទៃ​ ខណៈ​អ្នក​ដទៃ​ក៏​បាន​បន្ថែម​តម្លៃ​មក​អ្នក​ដូចគ្នា។

៤. គោលបំណង​មាន​អត្តសញ្ញាណ​ត្រឹមត្រូវ

កន្លែង​ដែល​ចំណង់ចំណូលចិត្ត​អាច​មាន​ គឺ​នៅ​គ្រប់​ទីកន្លែង​នៃ​អារម្មណ៍​ងប់ងុល។ ប៉ុន្តែ​គោលបំណង​មិន​ងាយ​បញ្ឈប់​បាន​ឡើយ ​ប្រសិន​បើ​លទ្ធផល​មិន​ត្រូវ​តាម​ផែនការ ​កំលុងពេល​ព្យាយាម។ គោលបំណង​គឺ​ជា​ឯកវចនៈ នៅ​ពេល​អ្នករកឃើញ​គោល​បំណង​ជាក់លាក់​ណា​មួយ វា​គឺ​ជា​រឿង​មួយ​ដែល​បំពេញ​នូវ​ជីវិត​របស់​អ្នក។

ចំណង់ចំណូលចិត្ត​ អាច​មក​ហើយ​ទៅ ​ប៉ុន្តែ​គោល​បំណង​ជា​រៀង​រហូត ឬ​រហូត​ដល់​អ្នក​បាន​សម្រេច​គោលបំណង​របស់​អ្នក ​ហើយ​រក​ឃើញ​គោល​បំណង​មួយ​ទៀត។

៥. គោលបំណង​ផ្ដើម​ដោយ ​តើ​ ចំណែក​ចំណង់ចំណូលចិត្ត​ ផ្ដើម​ដោយ ​ហេតុអ្វី

បើ​អ្នក​ងប់ងុល​និង​អ្វី​មួយ ​អ្នក​នឹង​សួរ​ខ្លួនឯង​ថា ​ហេតុអ្វី​ចូលចិត្ត​វា ​ហេតុអ្វី​ក៏​ស្រលាញ់? ក្នុង​ពេល​ដែល​គោលបំណង ​គឺ​ផ្ដោត​ទៅ​លើ​ការ​លើកទឹកចិត្ត​ក្នុង​ការ​ធ្វើអ្វី​ដែល​អ្នក​បាន​ធ្វើ​ ទោះបី​មិន​មាន​អ្វី​ក៏​ដោយ។

គោលបំណង​ពិត​ជា​មាន​សារៈសំខាន់​ខ្លាំង​ណាស់ ​សម្រាប់​ជីវិត ​វា​និង​ជួយ​អ្នកឲ្យកំណត់​ថា ​អ្នក​ជា​មនុស្ស​បែប​ណា។ ខណៈ​ពេល​ដែល​ចំណង់ចំណូលចិត្ត​ ជួយ​បង្កើត​បុគ្គលិក​លក្ខណៈ​នៃ​គោលបំណង​របស់​អ្នក៕

ប្រែសម្រួល៖ សាង ស្រីល័ក្ខ

ចុចអាន៖ស្រលាញ់គ្នា៧ឆ្នាំ គ្រួសារដឹងឮ ចុងក្រោយទំាងម្តាយទំាងកូន​រៀបគម្រោង​បោកយកដីខ្ញុំ

ចុចអាន៖​ការ​ស្រាវជ្រាវ​រកឃើញថាមាន​បងស្រី​ធ្វើ​ឱ្យ​ប្អូនៗ​ក្លាយ​ជា​មនុស្ស​ល្អ​ ទោះ​​កាចជាងបងប្រុស

The post ភាព​ខុសគ្នាដាច់ស្រលះរវាង​ចំណង់ចំណូលចិត្ត​និង​គោលបំណង appeared first on Kampuchea Thmey Daily.