លោក សៀ សុភ័ក្ត្រ មាន​ប្រសាសន៍​ថា ពិធី​នេះ ត្រូវ​បាន​គ្រោង​តាំងពី​ឆ្នាំមុន​មក​ម្ល៉េះ តែ​គួរ​ឲ្យ​សោកស្ដាយ ដោយសារ​មាន​ការ​ប៉ះទង្គិច​រវាង​កងទ័ព​នៅ​តាម​បណ្ដោយ​ព្រំដែន​កម្ពុជា​-​ថៃ ធ្វើ​ឲ្យ​មាន​ការ​ផ្លាស់ប្ដូរ​មួយ​ចំនួន នៃ​ពិធី​ដែល​បាន​គ្រោង។ ទោះបី​យ៉ាងណា ពិធី​នា​ពេលនេះ យើង​អាច​ជួបជុំ​គ្នា អធិស្ឋាន​ជាមួយគ្នា សម្រាប់​ប្រទេសជាតិ​យើង សម្រាប់​ប្រជាជន​ខ្មែរ នា​ដំណាក់កាល​នេះ និង​ក្រុម​ជំនុំ​នៅ​តាម​បណ្ដោយ​ព្រំដែន​ផង​ដែរ។ យើង​មាន​ព្រះ​យេស៊ូវ​តែមួយ ក្នុង​ប្រជាជាតិ​តែមួយ យើង​ជា​ចំណែក​រួមគ្នា​ក្នុង​ព្រះ​គ្រិស្ត យើង​នៅ​ជាមួយគ្នា យើង​ឈរ​ជាមួយគ្នា។

លោក​បន្ត​ថា នៅ​ក្នុង​ព្រះ​គ្រិស្ត យើង​ជា​គ្រួសារ​តែមួយ អ្វី​ដែល​យើង​គួរ​ចាប់ផ្ដើម គឺ ឯកភាព​គ្នា ចុះ​សម្រុង​នឹង​គ្នា ជ្រោមជ្រែង​គ្នា ពង្រីក​ទំនាក់ទំនង​គ្នា ពង្រឹង​សាមគ្គីភាព បង្ហាញ​សិរី​ល្អ​របស់​ព្រះ បង្ហាញ​ភាព​ជា​ក្រុម​គ្រួសារ​ដ៏​រឹងមាំ។ គ្រិស្តបរិស័ទ ជា​កម្លាំង​មហា​សាមគ្គី ក្នុង​ការ​រួមចំណែក​ក្នុង​បុព្វហេតុ​ព្រះនាម​ព្រះ​យេស៊ូ​វ​គ្រិស្ត​ក្នុង​បុព្វហេតុ​គ្រិស្តបរិស័ទ រួមចំណែក​ក្នុង​សង្គមជាតិ ក្នុង​ព្រះនាម​ព្រះ​យេស៊ូ​វ​គ្រិស្ត។

ក្នុង​នាម​តំណាង​ឲ្យ​គ្រិស្តបរិស័ទ​កម្ពុជា លោក​សូម​សម្តែង​ការ​អរគុណ​ដល់​សមាគម​ដំណឹង​ល្អ ប៊ី​លី​ហ្ក្រា​ហាំ ពិសេស​លោកគ្រូ​គង្វាល Franklin Graham និង​សហការី ដែល​បាន​សហការ​ជាមួយ​គ្រិស្ត​បរិស័ទ​ខ្មែរ ពិសេស​គឺ​ជ្រោមជ្រែង​ទាំងស្រុង ទាំង​ថវិកា និង​បច្ចេកទេស ដល់​ការ​រៀបចំ​ពិធី​អាហារ​សាមគ្គី​នា​ពេលនេះ និង​ឆ្ពោះ​ទៅ​ប្រារព្ធ​ពិធី​មហោស្រព​សៀមរាប​ជាទី​ស្រលាញ់ នា​ថ្ងៃ​ទី ២៤-២៥ ខាង​មុខ។

លោក Franklin Graham ប្រធាន និង​ជា​នាយក​ប្រតិបត្តិ នៃ​សមាគម ផ្សព្វផ្សាយ​ដំណឹង​ល្អ Billy Graham (BGEA) មាន​ប្រសាសន៍​ថា ប្រទេស​កម្ពុជា ពិត​ជា​មាន​ការ​អភិវឌ្ឍ​រីកចម្រើន​យ៉ាង​ខ្លាំង បើ​ប្រៀបធៀប​កាលពី​ជាង ២០ ឆ្នាំមុន ដោយ​ពេលនេះ មាន​អគារ​ខ្ពស់ៗ យ៉ាង​ច្រើន។ យើង​ទាំងអស់ សូម​អធិស្ឋាន​ដល់​ថ្នាក់ដឹកនាំ​កំពូលៗ របស់​កម្ពុជា និង​អធិស្ឋាន​ដល់​ថ្នាក់ដឹកនាំ​នៅ​ថ្នាក់​ក្រោម​ជាតិ​ទាំងអស់៕

អត្ថបទ ៖ ស្រីរ័ត្ន

The post តំណាងគ្រិស្តបរិស័ទកម្ពុជា ៖ អ្វីដែលគួរចាប់ផ្ដើម គឺ ឯកភាពគ្នា ចុះសម្រុងគ្នា ជ្រោមជ្រែងគ្នា ពង្រីកទំនាក់ទំនងគ្នា ពង្រឹងសាមគ្គីភាព appeared first on Kampuchea Thmey Daily.

 «ដោយសារកត្តាសន្តិភាព និងសេរីភាព គ្រិស្តសាសនិកជននៅកម្ពុជា មានឱកាសពេញលេញក្នុងការប្រតិបត្តិជំនឿរបស់ខ្លួន»។ នេះ គឺជាគូសបញ្ជាក់របស់ឯកឧត្តម ហ៊ុន ម៉ាណែត តំណាងដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងពិធីអបអរសាទរមរតកដំណឹងល្អ ១០០ ឆ្នាំ (១៩២៣-២០២៣) កាលពីថ្ងៃទី២៨ ខែមករា ឆ្នាំ២០២២។ ឯកឧត្តម ម៉ាណែត បានបន្តទៀតថា កត្តាទាំង២នេះ អាចឲ្យគ្រិស្តសាសនិកជននៅកម្ពុជា បន្តចែករំលែកសេចក្តីស្រឡាញ់ និងមេត្រីភាពដល់អ្នកប្រតិបត្តិជំនឿដូចគ្នា និងដល់សង្គមជាតិទាំងមូល។

មិនតែប៉ុណ្ណោះ វាក៏បានរួមចំណែកក្នុងការលើកស្ទួយសុខដុមនីយកម្មសាសនានៅកម្ពុជា តាមរយៈការទប់ស្កាត់ ការកាត់បន្ថយ និងការលុបបំបាត់រាល់អំពើខុសច្បាប់ និងអំពើអកុសលទាំងពួង ដើម្បីរក្សាសន្តិភាព ស្ថិរភាព សន្តិសុខ  សណ្តាប់ធ្នាប់សាធារណៈ និងសុវត្ថិភាពដ៏ពេញលេញ ទាំងផ្លូវកាយ ផ្លូវចិត្ត និងផ្លូវស្មារតី ដើម្បីរួមចំណែកក្នុងការអភិវឌ្ឍសង្គម-សេដ្ឋកិច្ច សម្រាប់ជាផលប្រយោជន៍រួម ប្រកបដោយភាពសុខដុមរមនាជាដរាបតទៅ។

សម្រាប់ឯកឧត្តម ហ៊ុន ម៉ាណែត សុខដុមនីយកម្ម គឺជាមូលដ្ឋានដ៏សំខាន់សម្រាប់ការទទួលបាននូវសុខសន្តិភាពពេញលេញ ទាំងសន្តិភាពផ្លូវកាយ និងសន្តិភាពផ្លូវចិត្ត។ ក្នុងបរិបទនេះ សុខដុមនីយកម្មសាសនា អាចកើតមានទ្បើងទៅបាន គឺអាស្រ័យលើកត្តាចម្បងពីរយ៉ាង ជាអាទិ៍ ចំណុចទី១ គឺការបើកចំហរនៃសហគមន៍សាសនានីមួយៗ ដោយទាំងថ្នាក់ដឹក និងសាសនិកជនទាំងអស់ ប្រកាន់នូវគោលជំហរទន់ភ្លន់ មិនចង្អៀតចង្អល់ ព្រមទាំងប្រតិបត្តិខ្ជាប់ខ្ជាប់នូវការបង្រៀនរបស់ព្រះតាមរយៈព្រះគម្ពីជាអាទិភាពចម្បងបំផុត នៅក្នុងរបៀបរបបរស់នៅប្រចាំថ្ងៃ ជាពិសេស ការចែកចាយសេចក្តីស្រឡាញ់ និងការប្រតិបត្តិនូវអំពើជាកុសលល្អដល់ជនទាំងទ្បាយទាំងពួង។ 

ចំណុច ទី២ គឺការផ្តល់សិទ្ធិស្មើភាពគ្នារបស់រាជរដ្ឋាភិបាលទៅដល់គ្រប់សាសនាទាំងអស់ដែលមានវត្តមាននៅក្នុងប្រទេសខ្លួន ដែលជាកត្តាចម្បងក្នុងការនាំមកនូវភាពជឿទុកចិត្ត ការគោរពស្រឡាញ់ និងការយោគយល់អធ្យាស្រ័យគ្នា ដោយបង្កើតបានជាបរិស្ថានសុខដុមរមនានៅក្នុងសង្គមជាតិទាំងមូល។ ក្នុងន័យនេះ រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ប្តេជ្ញាបន្តការផ្តល់សិទ្ធិសេរីភាពពេញលេញក្នុងការគោរពប្រតិបត្តិជំនឿសាសនាទាំងអស់ ដែលមានវត្តមាននៅក្នុងប្រទេសកម្ពុជា ដើម្បីប្រជាជនបន្តរស់នៅប្រកបដោយសុខសន្តិភាពគ្រប់ជ្រុងជ្រោយយូរអង្វែងតរៀងទៅ។

ឯកឧត្តម ហ៊ុន ម៉ាណែត បានរលឹកឲ្យដឹងផងដែរថា គណបក្សប្រជាជនកម្ពុជា បានដឹកនាំកសាងប្រទេសជាតិដោយចេញពីបាតដៃទទេ ក្រោមគំនរផេះផង់ រហូតមានការអភិវឌ្ឍរីកចម្រើនដូចពេលបច្ចុប្បន្ន គឺដោយសារកិច្ចខិតខំប្រឹងប្រែងរបស់ថ្នាក់ដឹកនាំ និង សមាជិក-សមាជិកាបក្សគ្រប់លំដាប់ថ្នាក់ ព្រមទាំងការចូលរួមចំណែកមិនអាចខ្វះបានពីសំណាក់ប្រជាពលរដ្ឋគ្រប់ស្រទាប់។ ក្នុងន័យនេះ បេក្ខភាពបន្តវេនរបស់គណបក្សគ្រប់ជំនាន់ ត្រូវបេ្តជ្ញាបន្តអនុវត្តនូវមាគាដ៏ប្រពៃនេះ ព្រមទាំង ប្រកាន់យកគោលការណ៍នីតិរដ្ឋជាគោល ដើម្បីកាន់តែទទួលបាននូវការគោរពស្រឡាញ់ និងជំនឿទុកចិត្តពីសំណាក់មជ្ឈដ្ឋានប្រជាពលរដ្ឋគ្រប់ជំនាន់៕

The post ឯកឧត្តម ហ៊ុន ម៉ាណែត៖ សន្តិភាព និងសេរីភាព ជាកត្តាធ្វើឲ្យគ្រិស្តសាសនិក ប្រតិបត្តិជំនឿរបស់ខ្លួនបានពេញលេញ appeared first on Kampuchea Thmey Daily.