ព័ត៌មានជាតិ

តំណាងគ្រិស្តបរិស័ទកម្ពុជា ៖ អ្វីដែលគួរចាប់ផ្ដើម គឺ ឯកភាពគ្នា ចុះសម្រុងគ្នា ជ្រោមជ្រែងគ្នា ពង្រីកទំនាក់ទំនងគ្នា ពង្រឹងសាមគ្គីភាព

បានផុស

៦ ខែ មុន

នៅ

ថ្ងៃព្រហស្បតិ៍ ២២ មករា ២០២៦

ដោយ

នៅក្នុងព្រះគ្រិស្ត យើងជាគ្រួសារតែមួយ អ្វីដែលយើងគួរចាប់ផ្ដើម គឺ ឯកភាពគ្នា ចុះសម្រុងនឹងគ្នា ជ្រោមជ្រែងគ្នា ពង្រីកទំនាក់ទំនងគ្នា ពង្រឹងសាមគ្គីភាព បង្ហាញសិរីល្អរបស់ព្រះ បង្ហាញភាពជាក្រុមគ្រួសារដ៏រឹងមាំ។ នេះជាការលើកឡើងរបស់លោក សៀ សុភ័ក្ត្រ រដ្ឋលេខាធិការ ក្រសួងធម្មការ និងសាសនា និងជាតំណាងគ្រិស្តបរិស័ទកម្ពុជា ក្នុងកម្មពិធីអាហារសាមគ្គី កាលពីព្រឹកថ្ងៃទី ២២ ខែមករា ឆ្នាំ ២០២៦ នៅមជ្ឈមណ្ឌលពិព័រណ៍ និងសន្និបាតកោះពេជ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សៀ សុភ័ក្ត្រ មានប្រសាសន៍ថា ពិធីនេះ ត្រូវបានគ្រោងតាំងពីឆ្នាំមុនមកម្ល៉េះ តែគួរឲ្យសោកស្ដាយ ដោយសារមានការប៉ះទង្គិចរវាងកងទ័ពនៅតាមបណ្ដោយព្រំដែនកម្ពុជា-ថៃ ធ្វើឲ្យមានការផ្លាស់ប្ដូរមួយចំនួន នៃពិធីដែលបានគ្រោង។ ទោះបីយ៉ាងណា ពិធីនាពេលនេះ យើងអាចជួបជុំគ្នា អធិស្ឋានជាមួយគ្នា សម្រាប់ប្រទេសជាតិយើង សម្រាប់ប្រជាជនខ្មែរ នាដំណាក់កាលនេះ និងក្រុមជំនុំនៅតាមបណ្ដោយព្រំដែនផងដែរ។ យើងមានព្រះយេស៊ូវតែមួយ ក្នុងប្រជាជាតិតែមួយ យើងជាចំណែករួមគ្នាក្នុងព្រះគ្រិស្ត យើងនៅជាមួយគ្នា យើងឈរជាមួយគ្នា។

លោកបន្តថា នៅក្នុងព្រះគ្រិស្ត យើងជាគ្រួសារតែមួយ អ្វីដែលយើងគួរចាប់ផ្ដើម គឺ ឯកភាពគ្នា ចុះសម្រុងនឹងគ្នា ជ្រោមជ្រែងគ្នា ពង្រីកទំនាក់ទំនងគ្នា ពង្រឹងសាមគ្គីភាព បង្ហាញសិរីល្អរបស់ព្រះ បង្ហាញភាពជាក្រុមគ្រួសារដ៏រឹងមាំ។ គ្រិស្តបរិស័ទ ជាកម្លាំងមហាសាមគ្គី ក្នុងការរួមចំណែកក្នុងបុព្វហេតុព្រះនាមព្រះយេស៊ូវគ្រិស្តក្នុងបុព្វហេតុគ្រិស្តបរិស័ទ រួមចំណែកក្នុងសង្គមជាតិ ក្នុងព្រះនាមព្រះយេស៊ូវគ្រិស្ត។

ក្នុងនាមតំណាងឲ្យគ្រិស្តបរិស័ទកម្ពុជា លោកសូមសម្តែងការអរគុណដល់សមាគមដំណឹងល្អ ប៊ីលីហ្ក្រាហាំ ពិសេសលោកគ្រូគង្វាល Franklin Graham និងសហការី ដែលបានសហការជាមួយគ្រិស្តបរិស័ទខ្មែរ ពិសេសគឺជ្រោមជ្រែងទាំងស្រុង ទាំងថវិកា និងបច្ចេកទេស ដល់ការរៀបចំពិធីអាហារសាមគ្គីនាពេលនេះ និងឆ្ពោះទៅប្រារព្ធពិធីមហោស្រពសៀមរាបជាទីស្រលាញ់ នាថ្ងៃទី ២៤-២៥ ខាងមុខ។

លោក Franklin Graham ប្រធាន និងជានាយកប្រតិបត្តិ នៃសមាគម ផ្សព្វផ្សាយដំណឹងល្អ Billy Graham (BGEA) មានប្រសាសន៍ថា ប្រទេសកម្ពុជា ពិតជាមានការអភិវឌ្ឍរីកចម្រើនយ៉ាងខ្លាំង បើប្រៀបធៀបកាលពីជាង ២០ ឆ្នាំមុន ដោយពេលនេះ មានអគារខ្ពស់ៗ យ៉ាងច្រើន។ យើងទាំងអស់ សូមអធិស្ឋានដល់ថ្នាក់ដឹកនាំកំពូលៗ របស់កម្ពុជា និងអធិស្ឋានដល់ថ្នាក់ដឹកនាំនៅថ្នាក់ក្រោមជាតិទាំងអស់៕

អត្ថបទ ៖ ស្រីរ័ត្ន