ចេកអំបូង Archives - Kampuchea Thmey Daily

ការនាំចេញចេកអំបូងលឿងកម្ពុជា ថយចុះក្នុងរង្វង់ ៧ % កាលពីឆ្នាំ២០២៤

Din Thary — Fri, 07 Feb 2025 07:04:00 +0000

អ្នកនាំពាក្យក្រសួងកសិកម្មរុក្ខាប្រមាញ់ និងនេសាទលោក ឃឹម ហ្វីណង់បានឱ្យដឹងថា ការនាំចេញចេកអំបូងលឿងរបស់កម្ពុជាទៅកាន់ទីផ្សារបរទេសមានការថយចុះក្នុងរង្វង់ប្រមាណ ៧ % បើធៀបទៅនិងរយៈពេលដូចគ្នាកាលពីឆ្នាំ២០២៣ ដោយសារតែការប្រកួតប្រជែងជាមួយប្រទេសជិតខាង។

ថ្លែងមកកាន់កម្ពុជាថ្មីនៅរសៀលថ្ងៃទី០៦ ខែកុម្ភៈ ឆ្នាំ២០២៥ ជុំវិញការនាំចេញចេកអំបូងលឿងរបស់កម្ពុជានេះ លោក ឃឹម ហ្វីណង់ ថា ការថយចុះនៃការនាំចេញចេកអំបូងលឿងកម្ពុជាទីផ្សារបរទេសនេះ ដោយលោកសង្កេតឃើញថា កម្ពុជារងការប្រកួតប្រជែងទីផ្សារពីប្រទេសវៀតណាម ដែលជាប្រទេសធ្វើផលិតកម្មចេកអំបូងលឿងនេះផងដែរ ជាពិសេសការប្រកួតប្រជែងខាងផ្នែកថ្លៃដើមផលិតនេះតែម្តង។

ទោះជាបែបនេះក្តី អ្នកនាំពាក្យរូបនេះបានអះអាងថា៖ «ស្ថានភាពបែបនេះនឹងមានភាពល្អប្រសើរឡើងវិញនៅឆ្នាំ២០២៥ ដែលជាការរំពឹងទុកនៃការងើបឡើងវិញនៃសេដ្ឋកិច្ចប្រទេសចិនដែលជាទីផ្សារក្នុងការនាំចេញចេកអំបូងលឿង»។

លោកថា៖ក្នុងនាមជាក្រសួងកសិកម្ម គឺផ្ដោតយកចិត្តទុកដាក់ក្នុងការជំរុញឱ្យអ្នកផលិត ឬក្រុមហ៊ុនដែលធ្វើផលិតកម្ម និងនាំចេញចេកអំបូងលឿងនេះ ធ្វើយ៉ាងណាដើម្បីឱ្យពួកគាត់អាចកាត់បន្ថយថ្លៃដើមឱ្យបានទាបជាងមុន សំដៅធ្វើយ៉ាងណាបង្កើនសមត្ថភាពប្រកួតប្រជែងខាងផ្នែកតម្លៃជាមួយប្រទេសដែលដាំចេកអំបូងលឿងនេះដូចគ្នាតួយ៉ាងដូចជាប្រទេសវៀតណាមជាដើម។

លោក ឃឹម ហ្វីណង់ បានអះអាងថា « ទោះកម្ពុជារងការប្រកួតប្រជែងលើទីផ្សារចែកអំបូងលឿងក៏ពិតមែន ប៉ុន្តែទោះជាយ៉ាងណាក៏ដោយ សម្រាប់កម្ពុជាយើង គឺនៅតែជាប្រទេសដែលមានព្រាបសម្រាប់ទីផ្សារចេកអំបូងលឿងនេះ ជាពិសេសទៅលើផ្នែកគុណភាពតែម្តង»។

ទន្ទឹមនេះ បើតាមលោក ខេន ថាញ់ ប្រធានការិយាល័យ ក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តកំពត បានឱ្យដឹងថា ក្នុងឆ្នាំ២០២៤ ខេត្តកំពតមានផ្ទៃដីដាំដុះចែកអំបូងលឿងសរុបប្រមាណ ១៤១១ ហិតា ក្នុងនោះមានក្រុមហ៊ុនចំនួន ២ ដែលដាំដុះ និងវិនិយោគលើដំណាំនេះ។

១.ក្រុមហ៊ុនវើលទ្រីស្ដារ ដែលក្រុមហ៊ុននេះ បានធ្វើការដាំដុះចែកសម្រាប់នាំចេញទៅចិនលើផ្ទៃដីប្រមាណ ៥ ៣៩៩,៩ ហិតា។ ក្នុងនោះ ក្រុមហ៊ុន បានធ្វើការនាំចេញចេកទៅកាន់ទីផ្សារប្រទេសចិន ក្នុងតម្លៃជាមធ្យមលក់ចេញ ៧ ដុល្លារ/កេស បច្ចុប្បន្នបានប្រើប្រាស់កម្លាំងពលកម្ម ១ ០០០នាក់។

ដោយឡែក ក្រុមហ៊ុន Longmate ប្រើប្រាស់កម្លាំងពលកម្មជាប្រចាំប្រមាណ ៣៦០ នាក់ និងកម្លាំងបណ្តោះអសន្ន ១៩០ នាក់ ផងដែរ សម្រាប់ផលិតកម្មចេកអំបូងលឿង។

ជាមួយគ្នានោះ ក្រុមហ៊ុន ទទួលបានបរិមាណផលនាំចេញសរុប ៨ ០០០ តោន ទៅកាន់ទីផ្សារប្រទេសចិន ដែលមានតម្លៃជាមធ្យមប្រមាណ ៩–១០ ដុល្លារ/កេស ដោយឡែកតម្លៃជាមធ្យមលក់ក្នុងស្រុក ៨ ដុល្លារ/កេស ១ (៥០០ ទៅ ១៥៥០ កេស ក្នុងមួយកុងតឺន័រ)។

កម្ពុជាមានផ្ទៃដីដាំដុះចេក ប្រមាណជាង ១៦ ពាន់ហិកតា និងផ្ទៃដីកំពុងប្រមូលផលជាង១១ពាន់ហិកតា នៅក្នុងឆ្នាំ២០២២ និងអាចមានការកើនឡើងតិចតួច ក្នុងឆ្នាំ២០២៣ កន្លងមកនេះ ដោយក្នុងនោះខេត្តដែលមានដាំដុះចេកច្រើនជាងគេ រួមមានខេត្តរតនគិរី ក្រចេះ ស្ទឹងត្រែង កំពត កំពង់ចាម កំពង់ស្ពឺជាដើម៕

The post ការនាំចេញចេកអំបូងលឿងកម្ពុជា ថយចុះក្នុងរង្វង់ ៧ % កាលពីឆ្នាំ២០២៤ appeared first on Kampuchea Thmey Daily.

បាងកកប៉ុស្តិ៍៖ កសិករថៃកំពុងត្រូវប៉ាន់លើជំនួញចេកអំបូង

Huon Dina — Thu, 12 Sep 2024 04:40:28 +0000

កាសែតបាងកកប៉ុស្តិ៍បានចុះផ្សាយកាលពីពេលថ្មីៗនេះថា កសិករថៃដាំចេកអំបូងកំពុងត្រូវប៉ាន់លើទីផ្សារចេកប្រភេទនេះ ដោយសារតែតម្រូវការកើនឡើង ហើយតម្លៃនៅតែបន្តខ្ពស់ដដែល ខណៈការប្រមូលផលបានថយចុះក្ដី។

ប្រធានក្រុមសុវត្ថិភាពចេកអំបូង និងផ្លែឈើនៅស្រុក Bang Kaew ក្នុងខេត្ត Phathalung លោក Somchai Nunual បាននិយាយថា ស្លាកតម្លៃលើពូជចេកនេះ បានកើនឡើងទ្វេដងពីប្រហែល ១៥ បាត/គីឡូក្រាម ដល់ ៣០ បាត/គីឡូក្រាម។

ការឡើងថ្លៃនេះ កើតចេញពីការពេញនិយមចេកប្រភេទនេះ ខណៈកង្វះភ្លៀងធ្លាក់ចាប់តាំងពីឆមាសទី២នៃឆ្នាំមុន បានកាត់បន្ថយការផ្គត់ផ្គង់ចេកទៅកាន់ទីផ្សារ។ លោក Somchai បន្តថា កសិករដាំចេកអំបូងក្នុងសហគមន៍ បានឃើញពីកំណើនប្រាក់ចំណូល ១០០ ភាគរយ។

បើតាមការព្យាកររបស់លោក Somchai ការត្រូវប៉ាន់ចេកអំបូងនឹងបន្តទៀត ដោយសារកសិករផ្សេងទៀតមានភាពយឺតយ៉ាវក្នុងការប្តូរមកដាំចេក។ ការមើលឃើញរបស់លោក គឺស្របតាមការព្យាករណ៍ដែលបានចេញផ្សាយកាលពីខែមេសា របស់នាយកដ្ឋានពាណិជ្ជកម្មផ្ទៃក្នុង ចំណុះឱ្យក្រសួងពាណិជ្ជកម្ម និងក្រសួងកសិកម្ម និងសហករណ៍ថៃ។

កន្លងមក ក្រសួងកសិកម្មបានព្យាករថា ការប្រមូលផលចេកអំបូងរបស់ថៃនៅឆ្នាំនេះ នឹងមានត្រឹមតែ ៣២ ០០០ តោនប៉ុណ្ណោះ ពោលគឺធ្លាក់ចុះជាគំហុកពី ១២០ ០០០ តោន កាលពីឆ្នាំមុន។ យ៉ាងណាមិញ ក្រសួងបានឱ្យដឹងថា តម្លៃចេកបានកើនឡើងពី ២៤៣ បាត/ចេក ១០០ ផ្លែ នៅឆ្នាំ ២០២១ ដល់ ២៧៨ បាត កាលពីឆ្នាំមុន ហើយរំពឹងថានឹងដល់ ២៩៣ បាត/ចេក ១០០ ផ្លែ ឆ្នាំនេះ។

បើតាមបាងកកប៉ុស្តិ៍ ចេកអំបូងជាផ្លែឈើមួយក្នុងចំណោមផ្លែឈើសំខាន់ៗ ដែលថៃនាំចេញទៅប្រទេសផ្សេងទៀត ដោយ ៨០ ភាគរយ នាំទៅប្រទេសជប៉ុន និងសល់ជាច្រើនទៀតនាំទៅចិន និងកម្ពុជា៕

The post បាងកកប៉ុស្តិ៍៖ កសិករថៃកំពុងត្រូវប៉ាន់លើជំនួញចេកអំបូង appeared first on Kampuchea Thmey Daily.

ក្រុមហ៊ុនដាំចេកអំបូងនៅខេត្តក្រចេះ នាំចេញចេកជាង២ ម៉ឺនតោន ទៅទីផ្សារចិន

deth leng — Wed, 04 Sep 2024 07:02:55 +0000

ក្រុមហ៊ុនដាំដុះចេកអំបូង Cambodian Banana Agricultural Co.,Ltd ស្ថិតនៅក្នុងស្រុកសំបូរ ខេត្តក្រចេះបាននាំចេញទិន្នផលចេក ២២០០០ តោន ទៅកាន់ទីផ្សារសាធារណរដ្ឋប្រជាមានិតចិន។

ក្រុមហ៊ុន Cambodian Banana Agricultural Co.,Ltd គឺជាក្រុមហ៊ុនដាំដុះចេកអំបូងរបស់ក្រុមហ៊ុន Green Island Agricultural Development (Cambodia) Co.,Ltd ស្ថិតនៅក្នុងស្រុកសំបូរ ខេត្តក្រចេះ ដោយមានកម្មករបម្រើការជិត ៦០០នាក់ និងបុគ្គលិកការិយាល័យជនជាតិខ្មែរ ៩នាក់ ព្រមទាំងបរទេស ២៩នាក់។

យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងឆមាសទី១ ឆ្នាំ ២០២៤ កម្ពុជានាំចេញចេកសម្រេចបានទឹកប្រាក់ ៧០ លានដុល្លារ មានការធ្លាក់ចុះ ៣៥,៧៤% បើធៀបរយៈពេលដូចគ្នាក្នុងឆ្នាំ ២០២៣៕

The post ក្រុមហ៊ុនដាំចេកអំបូងនៅខេត្តក្រចេះ នាំចេញចេកជាង២ ម៉ឺនតោន ទៅទីផ្សារចិន appeared first on Kampuchea Thmey Daily.

ចេកអំបូង Archives - Kampuchea Thmey Daily

ការនាំចេញចេកអំបូងលឿងកម្ពុជា ថយចុះក្នុងរង្វង់ ៧ % កាលពីឆ្នាំ២០២៤

បាងកកប៉ុស្តិ៍៖ កសិករថៃកំពុង​​ត្រូវ​ប៉ាន់​លើ​ជំនួញ​ចេក​អំបូង

ក្រុមហ៊ុនដាំចេកអំបូងនៅខេត្តក្រចេះ នាំចេញចេកជាង២ ម៉ឺនតោន ទៅទីផ្សារចិន

បាងកកប៉ុស្តិ៍៖ កសិករថៃកំពុងត្រូវប៉ាន់លើជំនួញចេកអំបូង