លោក ឆាយ វិសុទ្ធ មានប្រសាសន៍បន្តថា៖ “ក្រុមការងារកំពុងពិនិត្យមើលលទ្ធភាពក្នុងការលើកគម្រោងផែនការសម្រាប់ជួលជុលឡើងវិញ ដោយសារកិច្ចការហ្នឹងសម្ដេចសង្ឃ (សម្ដេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្ដេចព្រះចៅអធិការ សម្ដេចព្រះសង្ឃនាយក នៃព្រះរាជាណាចក្រកម្ពុជា) បានឯកភាពភាពឱ្យក្រសួងជាអ្នកជួសជុល។ ព្រះចៅអធិការវត្ត ជាអ្នកចំណាយការជួសជុលនេះ ចំពោះខ្ទង់ចំណាយមិនទាន់អាចបញ្ជាក់បានទេ ព្រោះកំពុងសិក្សានៅឡើយ”។​

ប្រធាននាយកដ្ឋានសារមន្ទីរ រូបនេះបានបញ្ជាក់បន្ថែមថា ឥឡូវក្នុងដំណាក់កាលមួយដែលមន្ត្រីជំនាញកំពុងសិក្សាប្លង់ ដែលកិច្ចការនេះត្រូវការពេលវេលា ព្រោះត្រូវការផ្ទៀងផ្ទាត់ជាមួយរូបថតចាស់ៗ និងប្លង់ចាស់ៗ ដើម្បីមានការសន្និដ្ឋានមួយ ដោយសារកំពូលខាងលើក៏បាក់់ ចេតិយផ្នែកខាងក្រោមក៏ខូចខាតមួយចំនួន។

លោក ឆាយ វិសុទ្ធ មានប្រសាសន៍បន្តថា៖ “យើងកំពុងពិនិត្យស្ថានភាពរចនាសម្ព័ន្ធនៃសំណង់ ទាំងវត្ថុធាតុសាងសង់ ព្រោះលក្ខណៈបច្ចេកទេសសាងសង់សំណង់បុរាណ យើងត្រូវគិតគូរណាស់។ ពេលយើង ពិនិត្យមើលរួចអស់ហើយ យើងនឹងចេញជារបាយការណ៍រួមមួយដើម្បីផ្ញើជូនទៅរដ្ឋមន្ត្រីក្រសួងវប្បធម៌ ដើម្បីសុំគោលការណ៍ នីតិវិធីបន្តទៀត សម្រាប់ការជួសជុលនេះ”។

លោក ឆាយ វិសុទ្ធ បានបង្ហាញការសោកស្ដាយចំពោះការខូចខាតរតនសម្បត្តិដែលបន្សល់ពីដូនតា ខណៈក្រសួងបានក៏តែងផ្សព្វផ្សាយណែនាំរួចមកហើយ ពិសេសនៅតំបន់បណ្ដាខេត្តដែលមានហនិភ័យខ្ពស់ក្នុងការជីកកកាយ និងលល់វត្ថុបុរាណចេញទៅក្រៅប្រទេស។ ជាមួយគ្នានេះ លោកបញ្ជាក់ថា កិច្ចការពារបេតិកភណ្ឌវប្បធម៌ជាភារកិច្ចរបស់កូនខ្មែរគ្រប់ៗរូប ពោលពេលឃើញភាពមិនប្រក្រតីអ្វីមួយ ប្រជាពលរដ្ឋអាចចូលរួមទប់ស្កាត់ និងរាយការណ៍មកអាជ្ញាធរ ស្ថាប័នពាក់ព័ន្ធដើម្បីចុះពិនិត្យ និងមានវិធានការទាន់ពេលវេលា។

គួររំលឹកថា កាលពីនៅថ្ងៃទី២ ខែមករា ឆ្នាំ២០២៣នេះ តំណាងខាងមន្ទីរ និងក្រសួងវប្បធម៌ និងវិចិត្រសិល្បៈ ព្រមទាំងអ្នកជំនាញបានចុះមកពិនិត្យ និងជួបព្រះចៅអធិការវត្តបទុមវតី ដើម្បីសាកសួរ និងបញ្ឈប់ការវាយបន្តសំណង់ចេតិយបុរាណដែលមានទីតាំងនៅទិសខាងត្បូងជាប់នឹងព្រះវិហារវត្ត។ មូលហេតុរហូតដល់ការវាយកម្ទេចសំណង់ចេតិយនេះ លោក អ៊ុក សុខា អគ្គនាយកបេតិកភណ្ឌនៃក្រសួងវប្បធ៌ម និងវិចិត្រសិល្បៈ បញ្ជាក់ថា សម្តេចព្រះចៅអធិការមានបំណងចង់រៀបចំចាក់រៀបឥដ្ឋការ៉ូឡា តែព្រះសង្ឃ និងគណៈកម្មការដែលទទួលការងារនេះ ក្តាប់ព័ត៌មានមិនច្បាស់ពីបំណងនៃការរៀបចំ ទើបមានការវាយប៉ះចំចេតិយបុរាណនេះ។

សាស្ត្រាចារ្យ ព្រាប ចាន់ម៉ារ៉ា ព្រឹទ្ធបុរសរង មហាវិទ្យាល័យបុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ ចែករំលែកលើបណ្ដាញសង្គមហ្វេសបុកថា ចេតិយនេះមានរចនាតុបតែងវិចិត្របិទក្បាច់ “ផ្កាចាន” (កុលាលភាជន៍ = Ceramic) សាងដោយក្រុមអ្នកឧកញ៉ាអនុរក្ខធានិន្ទ បែន និងអ្នកឧកញ៉ារាជានុភាព ឌុច នៅថ្ងៃសៅរ៍ ១កើត ខែចេត្រ ឆ្នាំជូត ឯកស័ក ព.ស. ២៤៤៣, ម.ស. ១៨២២, ច.ស. ១២៦២ គ.ស. ១៩០០ ដែលមកដល់បច្ចុប្បន្ន ចេតិយនេះ អាយុកាល ១២៣ឆ្នាំ៕

អត្ថបទ៖ ច័ន្ទ វីរៈ

The post ចេតិយវ័យ១២៣ឆ្នាំរងការវាយខូចខាត គ្រោងជួសជុលឡើងវិញ ជាបន្ទុកចំណាយខាងណា? appeared first on Kampuchea Thmey Daily.

លោក ថូវ ប៊ុនកេ មេឃុំប៉ាក់ខ្លង ឲ្យដឹងនៅរសៀលថ្ងៃទី ២០ ខែតុលានេះថា រូបលោក និងលោកស្រី  ប្រាក់ គឹមហ៊ន សមាជិកក្រុមប្រឹក្សាឃុំ រួមសហការជាមួយអនុប្រធានភូមិនាងកុក បានចុះពិនិត្យសកម្មភាពចាក់អាចម៍ដី ឈូសឆាយកែលម្អសោភ័ណ្ឌភាព នៅចំណុចតំបន់ទេសចរណ៍ ឃុនឆាង ឃុនផែន ក្នុងភូមិនាងកុក។

លោកមេឃុំប៉ាក់ខ្លង បានបន្ថែមថា ការរៀបចំសណ្តាប់ធ្នាប់ និងលើកកម្ពស់សោភ័ណ្ឌភាពនៅទីនេះ ក្នុងគោលបំណង ដើម្បីបង្កើនភាពទាក់ទាញពីអ្នកទេសចរមកលេងកម្សាន្ត ដោយលុបបំបាត់ការលក់ដូរគ្មានរៀបរយល្អ ពីព្រោះកន្លងមក មានភាពអនាធិបតេយ្យច្រើន។

ក្រៅពីការចាក់ដីឈូសឆាយ រដ្ឋបាលស្រុកមណ្ឌលសីមា និងរដ្ឋបាលឃុំប៉ាក់ខ្លង គ្រោងធ្វើជាចំណតរថយន្ត បង្គន់អនាម័យ ឬកន្លែងអង្គុយលំហែស្រូបយកខ្យល់អាកាសដ៏បរិសុទ្ធ បន្ទាប់ពីអ្នកទេសចរ បានទៅគោរពបូជាទីសក្ការៈចេតិយឃុនឆាងឃុនផែន រួច។

រដ្ឋបាលឃុំប៉ាក់ខ្លង កាលពីថ្ងៃទី ៧ ខែតុលា បានចេញលិខិតជូនដំណឹងពលរដ្ឋអាជីវករ លក់ដូរនៅតំបន់រមណីយដ្ឋាន ទេសចរចេតិយឃុនឆាងឃុនផែន រុះរើតូចលក់ដូរជិត ១០តូបថយចេញ ក្រោយ ៣ម៉ែត្រ ដោយទុកអាទិភាពដល់អាជ្ញាធររៀបចំសោភ័ណ្ឌភាព និងសណ្តាប់ធ្នាប់ឲ្យត្រឹមត្រូវ។

ករណីអាជីវករណារមិនអនុវត្ត នឹងត្រូវចាត់វិធានការតាមច្បាប់ ដោយអាជ្ញាធរមិនទទួលខុសត្រូវរាល់ការខូចខាតទ្រព្យសម្បត្តិ ឬការបាត់បង់ផលប្រយោជន៍ណាមួយ នោះឡើយ។ អាជ្ញាធរជឿជាក់លើស្មារតីចូលរួមសហការ និងសូមម្ចាស់តូបទាំងអស់ អនុវត្តប្រកបដោយប្រសិទ្ធិភាព និងការទទួលខុសត្រូវខ្ពស់។

ក្រោយអាជ្ញាធរជូនដំណឹងបែបនេះ ពលរដ្ឋជាអាជីវករ ក៏ស្ម័គ្រចិត្តរុះរើអនុវត្តតាមដោយក្តីរីករាយ ព្រោះជាគោលបំណងរបស់ពួកគាត់យូរឆ្នាំមកហើយដែរ លើការធ្វើឲ្យបញ្ហាសណ្តាប់ធ្នាប់ និងសោភ័ណ្ឌភាពនៅទីនេះ មានការអភិវឌ្ឍទាក់ ទាញអ្នកទេសចរ។ ពលរដ្ឋ អះអាងទៀតថា ប្រសិនបើអាជ្ញាធរអភិវឌ្ឍ កែលម្អមណីយដ្ឋានស្អាត អ្នកទេសចរ ក៏មកចូលលេងកម្សាន្តច្រើន។ រីឯការលក់ដូរ និងប្រកបអាជីវកម្ម ក៏ទទួលបានចំណូលទៅតាមនោះ ផងដែរ៕

អត្តបទ៖ សិរីវឌ្ឍនៈ

The post អាជ្ញាធរឃុំប៉ាក់ខ្លង កំពុងរៀបចំសោភ័ណ្ឌភាពរមណីយដ្ឋានចេតិយឃុនឆាងឃុនផែន ដើម្បីទាក់ទាញភ្ញៀវទេសចរ appeared first on Kampuchea Thmey Daily.