តួកមេនីស្ថាន Archives - Kampuchea Thmey Daily

ប្រទេសនៅអាស៊ីកណ្ដាលមួយ ចង់ភ្ជាប់ជើងហោះហើរជាមួយកម្ពុជាឱ្យបានមុនគេ

Din Thary — Tue, 15 Aug 2023 04:57:27 +0000

ក្នុងជំនួបជាមួយរដ្ឋមន្ត្រីក្រសួងទេសចរណ៍នារសៀលថ្ងៃទី១៤ ខែសីហា នេះ ឯកអគ្គរដ្ឋទូតតួកម៉េនីស្ថានប្រចាំកម្ពុជាដែលមាននិវេសនដ្ឋាននៅប្រទេសម៉ាឡេស៊ី បានបង្ហាញពីគោលបំណងភ្ជាប់ជើងហោះហើរជាមួយកម្ពុជាឱ្យបានមុនគេ ក្នុងចំណោមប្រទេសនៅតំបន់អាស៊ីកណ្ដាល ព្រមទាំងចង់ពង្រឹងកិច្ចសហប្រតិបត្តិការលើវិស័យទេសចរណ៍រវាងប្រទេសទាំងពីរឱ្យកាន់តែរឹងមាំដើម្បីជំរុញរំហូរទេសចរទៅវិញទៅមក។

លោក មូហាំម៉េតនីយ៉ះ ម៉ាស្សាឡូវ ឯកអគ្គរដ្ឋទូតតួកម៉េនីស្ថានបានលើកឡើងថា រដ្ឋាភិបាលតួកម៉េនីស្ថានមានបំណងចង់ភ្ជាប់ជើងហោះហើរត្រង់ពីប្រទេសខ្លួនមកខេត្តសៀមរាប ដែលជាគោលដៅទេសចរណ៍ដ៏សំខាន់ក្នុងតំបន់អាស៊ាន ដើម្បីឱ្យភ្ញៀវទេសចរនៅប្រទេសតួកម៉េនីស្ថាន និងភ្ញៀវទេសចរប្រទេសជុំវិញបានមកទស្សនាខេត្តសៀមរាប តំបន់រមណីយដ្ឋានអង្គរដែលជាតំបន់បេតិកភណ្ឌ ពិភពលោក ក៏ដូចជាទូទាំងប្រទេសកម្ពុជាផងដែរ។

បន្ទាប់ពីបានមើលឃើញនៅកត្តាសក្ដានុពលអំពីវិស័យទេសចរណ៍នៅក្នុងប្រទេសកម្ពុជា លោក មូហាំម៉េតនីយ៉ះ ម៉ាស្សាឡូវ ក៏មានគោលបំណងចង់ពង្រឹងទំនាក់ទំនងជាមួយកម្ពុជាលើវិស័យទេសចរណ៍នេះឱ្យកាន់តែរឹងមាំឡើង និងដើម្បីជំរុញរំហូរទេសចរទៅវិញទៅមក និងទេសចរប្រទេសទី៣។

ជាក់ស្ដែង លោកក៏បានលើកជាសំណើឱ្យមានការរៀបចំព្រឹត្តិការណ៍ទេសចរណ៍នៅប្រទេសកម្ពុជា និងនៅប្រទេសតួកម៉េនីស្ថាន ក្នុងហេតុផលមួយផ្សព្វផ្សាយពីសក្ដានុពលទេសចរណ៍ គោលដៅទេសចរណ៍រវាងប្រទេសទាំងពីរទៅកាន់ប្រតិបត្តិករទេសចរណ៍ ក៏ដូចជាភ្ញៀវទេសចរជាតិ-អន្តរជាតិបន្ថែមទៀត។

នៅក្នុងសប្ដាហ៍នេះដែរ ឯកអគ្គរដ្ឋទូតតួកម៉េនីស្ថានក៏នឹងទៅទស្សនកិច្ចនៅតំបន់រមណីយដ្ឋានអង្គរ ខេត្តសៀមរាប ដើម្បីស្វែងយល់ពីសក្ដានុពលទេសចរណ៍បន្ថែម។

ជាការឆ្លើយតប រដ្ឋមន្ត្រីក្រសួងទេសចរណ៍បានបង្ហាញនូវការគាំទ្រពេញទំហឹងចំពោះគោលបំណងពង្រឹងកិច្ចសហប្រតិបត្តិការលើវិស័យទេសចរណ៍ និងផ្ដល់ជាយោបល់ឱ្យមានការរៀបចំអនុស្សរណៈនៃការយោគយល់គ្នារវាងភាគីកម្ពុជា និងភាគីតួកម៉េនីស្ថាន ដើម្បីជាផែនទីបង្ហាញផ្លូវមួយសម្រាប់អនុវត្តផែនការសកម្មភាពដែលពាក់ព័ន្ធកិច្ច សហប្រតិបត្តិការលើវិស័យទេសចរណ៍ និងជាសក្ខីភាពដ៏រឹងមាំនៃចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ។

លោក ថោង ខុន រដ្ឋមន្ត្រីក្រសួងទេសចរណ៍ក៏បានចង្អុលបង្ហាញបន្ថែមដល់ឯកអគ្គរដ្ឋទូតតួកម៉េនីស្ថាននៅប្រទេសកម្ពុជា ពីសក្ដានុពលនៃវិស័យទេសចរណ៍នៅក្នុងប្រទេសកម្ពុជា និងកត្តាសុខសន្តិភាព ស្ថិរភាព និងការអភិវឌ្ឍនៅប្រទេសកម្ពុជានាពេលបច្ចុប្បន្ន។

លោករដ្ឋមន្រ្តីបានបង្ហាញថា ត្រឹមរយៈពេលតែ ៧ ខែ ដើមឆ្នាំ ២០២៣ កម្ពុជាទទួលទេសចរអន្តរជាតិជាង ៣.០៤លាននាក់។

គួរជម្រាបថា តួកម៉េនីស្ថានជាប្រទេសមួយក្នុងចំណោមក្រុមប្រទេសនៅតំបន់អាស៊ីកណ្ដាលទាំង ៥ (កាហ្សាក់ស្ថាន កៀរហ្ស៉ីស៊ីស្ថាន តាជីគីស្ថាន តួកម៉េនីស្ថាន និងអ៊ូបេគីស្ថាន) ដែលក្រុមប្រទេសនៅតំបន់អាស៊ីកណ្ដាលទាំង ៥ នេះ នៅមិនទាន់មានប្រទេសណាភ្ជាប់ជើងហោះហើរត្រង់មកកាន់កម្ពុជានៅឡើយទេ៕

The post ប្រទេសនៅអាស៊ីកណ្ដាលមួយ ចង់ភ្ជាប់ជើងហោះហើរជាមួយកម្ពុជាឱ្យបានមុនគេ appeared first on Kampuchea Thmey Daily.

ប្រទេសនេះអះអាងថា គ្មានអ្នកឆ្លងកូវីដសោះ តែសកម្មជនថា កុហក

chean virakbot — Sat, 25 Sep 2021 03:04:22 +0000

កូវីដ-១៩បានចាប់ផ្តើមរាតត្បាតពិភពលោកជិត២ឆ្នាំហើយ និងរាលដាលជុំវិញពិភពលោក ប៉ុន្តែរដ្ឋាភិបាលប្រទេសតួកមេនីស្ថានបានអះអាងថា ប្រទេសរបស់ខ្លួនមិនមានអ្នកឆ្លងកូវីដ-១៩ឡើយ។

តួកមេនីស្ថាន ដែលជាអតីតសហភាពសូវៀតមានប្រជាជនជិត៦លាននាក់គឺជាប្រទេសមួយក្នុងចំណោមប្រទេស៥ដែលមិនមានសេចក្តីរាយការណ៍ពីករណីឆ្លងកូវីដ-១៩ សូម្បីម្នាក់គ្មាន។ នេះបើយោងតាមការពិនិត្យមើលសាឡើងវិញចំពោះទិន្នន័យរបស់សាកលវិទ្យាល័យ Johns Hopkin និងអង្គការសុខភាពពិភពលោក (WHO)។ ៤ផ្សេងទៀតគឺមានកោះ៣នៅប៉ាស៊ីហ្វិក និងមួយទៀតគឺប្រទេសកូរ៉េខាងជើង។

ស្ត្រីតួកមេនីស្ថាន

ប្រធានាធិបតីដ៏កៀបសង្កត់របស់តួកមេនីស្ថាន លោក Gurbanguly Berdymukhamedov បានកាន់អំណាចតាំងពីឆ្នាំ២០០៦បានបដិសេធចំពោះសេចក្តីរាយការណ៍ដែលថា«គ្មានករណីកូវីដក្នុងប្រទេសរបស់ខ្លួនគឺក្លែងក្លាយ» និងប្រាប់អង្គការសហប្រជាជាតិ (UN) ក្នុងសន្ទរកថាមួយកាលពីថ្ងៃអង្គារ៍ថា ការដោះស្រាយវិបត្តិកូវីដ-១៩មិនគួរជារឿងនយោបាយទេ។

ប៉ុន្តែអង្គការក្រៅរដ្ឋាភិបាល អ្នកសារព័ត៌មាន និងសកម្មជនឯករាជ្យនៅក្រៅប្រទេសតួកមេនីស្ថាននិយាយថា មានភស្តុតាងដែលប្រទេសនេះកំពុងប្រយុទ្ធនឹងរលកទី៣នៃកូវីដដែលបានធ្វើឲ្យមានអ្នកជំងឺច្រើននៅមន្ទីរពេទ្យ និងអ្នកស្លាប់ជាច្រើន ហើយបានព្រមានថា ប្រធានាធិបតីកំពុងរារាំងការគំរាមកំហែងមេរោគដ៏សាហាវនេះដើម្បីរក្សាមុខមាត់សាធារណៈ។

លោក Ruslan Turkmen ជាជននិរទេសខ្លួនពីប្រទេសតួកមេនីស្ថាន និងនិពន្ធនាយកកាសែតឯករាជ្យ Turkmen News ស្ថិតនៅប្រទេសហុល្លង់បាននិយាយថា លោកបានប្រមូលឈ្មោះមនុស្សជាង៦០នាក់ដែលលោកអះអាងថា បានស្លាប់ដោយសារកូវីដនៅប្រទេសនេះក្នុងនោះមានគ្រូបង្រៀន អ្នកសិល្បៈ និងគ្រូពេទ្យផងដែរ។

លោក Turkmen បាននិយាយថា លោកបានផ្ទៀងផ្ទាត់ករណីស្លាប់ដែលបានកត់ត្រាទាំងអស់ជាមួយនឹងកំណត់ហេតុពេទ្យ និងការថតកាំរស្មីអ៉ិច បង្ហាញពីការខូចសួតធ្ងន់ធ្ងរ និងការព្យាបាលតាមវេជ្ជសាស្ត្រលើជនរងគ្រោះដោយកូវីដ។

លោក Turkmen បាននញ្ជាក់ថា ៖«ផ្ទុយពីការទទួលស្គាល់ និងមិនសហការជាមួយសហគមន៍អន្តរជាតិ ប្រទេសតួកមេនីស្ថានបានសម្រេចដាក់ក្បាលរបស់ខ្លួនចូលក្នុងដីខ្សាច់»។

ស្ត្រីតួកមេនីស្ថាន

យោងតាម WHO បានឲ្យដឹងថា អ៉ីរ៉ង់ដែលមានព្រំដែនដ៏វែងជាមួយតួកមេនីស្ថាន ជាប្រទេសមានករណីឆ្លងកូវីដ-១៩ធ្ងន់ធ្ងរបំផុតមួយក្នុងពិភពលោកដែលមានអ្នកឆ្លងសរុប៥.៥លាននាក់។

លោក Rachel Denber អនុប្រធានឃ្លាំមើលសិទ្ធិមនុស្សប្រចាំទ្វីបអឺរ៉ុប និងប្រធានប្រចាំអាស៊ីកណ្តាលបាននិយាយថា ៖«ក្រឡេកមើលអ្វីដែលកំពុងកើតឡើងនៅប្រទេសផ្សេងក្នុងតំបន់ ហើយតួកមេនីស្ថានអាចខុសគេយ៉ាងដូចម្តេចខ្លះ?

យោងតាមវេបសាយរបស់រដ្ឋមន្ត្រីក្រសួងការបរទេសចក្រភពអង់គ្លេស និងអូស្ត្រាលីបង្ហាញថា ការហោះហើរទាំងអស់ចូលទៅតួកមេនីស្ថានឥឡូវនេះត្រូវបានផ្អាក ហើយមានតែជនជាតិតួកមេនីស្ថានប៉ុណ្ណោះដែលត្រូវបានអនុញ្ញាតឲ្យចូលទៅក្នុងប្រទេស៕

ប្រែសម្រួល៖ វីរបុត្រ
ប្រភព៖ CNN

The post ប្រទេសនេះអះអាងថា គ្មានអ្នកឆ្លងកូវីដសោះ តែសកម្មជនថា កុហក appeared first on Kampuchea Thmey Daily.

ប្រធានាធិបតី តួកមេនីស្ថាន បង្ហាញរូបសំណាកឆ្កែសំណព្វ ស្រោបមាស២៤ការ៉ាត់ (មានវីដេអូ)

Sok Sovann — Fri, 13 Nov 2020 06:44:20 +0000

ប្រធានាធិបតីប្រទេសតួកមេនីស្ថានបានសម្តែងការគោរពចំពោះពូជឆ្កែសំណព្វរបស់គាត់និងបានបង្ហាញរូបសំណាកមាសដ៏ធំមួយ។

លោក Gurbanguly Berdymukhamedov បានបង្ហាញរូបចម្លាក់ឆ្កែ Alabi ដ៏ចម្លែកមួយកាលពីថ្ងៃពុធអំឡុងពិធីមួយ។

លោក Berdymukhamedov បានបង្ហាញក្តីស្រឡាញ់របស់គាត់ចំពោះពូជឆ្កែនេះហើយជារឿយៗគាត់តែងតែតែងកំណាព្យនិងសរសេរសៀវភៅអំពីសត្វឆ្កែប្រភេទនេះ។

គាត់ធ្លាប់បានពិពណ៌នាថាវាជា “និមិត្តរូបនៃសមិទ្ធិផលនិងជ័យជម្នះ”។

មេដឹកនាំដែលបានឡើងកាន់អំណាចក្នុងឆ្នាំ២០០៧រូបនេះថែមទាំងបានផ្តល់អំណោយកូនឆ្កែ Alabi ដល់ប្រធានាធិបតីរុស្ស៊ីលោក Vladimir Putin ទៀតផង។

យោងតាមរដ្ឋាភិបាលតួកមេនីស្ថានបានឲ្យដឹងថា រូបចម្លាក់មាសដ៏ធំនេះមានកម្ពស់៦ម៉ែត្រនិងស្រោបដោយមាសសុទ្ធ២៤ការ៉ាត់។

វាត្រូវបានគេសាងសង់នៅក្នុងតំបន់ថ្មីមួយនៃទីក្រុង Ashgabat ក្នុងរដ្ឋធានី។

តំបន់នេះត្រូវបានបង្កើតឡើងសម្រាប់ធ្វើជាទីតាំងរបស់មន្រ្តីរដ្ឋការនិងមានសាលារៀន សួន ហាង រោងកុន កន្លែងរៀបអាពាហ៍ពិពាហ៍និងកន្លែងលេងកីឡាក៏ដូចជាអគារផ្ទះល្វែងផងដែរ។

នៅក្នុងសេចក្តីប្រកាសព័ត៌មានដែលចេញផ្សាយដោយរដ្ឋាភិបាលក្នុងតំបន់បានឲ្យដឹងថា ប្រទេសនេះចាត់ទុករូបសំណាកនេះថាជាការបង្ហាញអំពីការគោរពនិងកិត្តិយសចំពោះភាពក្លាហាននិងដួងចិត្តដ៏ស្មោះត្រង់របស់សត្វដ៏អស្ចារ្យទាំងនេះ៕

សូមទស្សនាវីដេអូខាងក្រោម៖

ប្រែសម្រួលដោយ៖ Vann Vann

ប្រភព៖ Daily Star

The post ប្រធានាធិបតី តួកមេនីស្ថាន បង្ហាញរូបសំណាកឆ្កែសំណព្វ ស្រោបមាស២៤ការ៉ាត់ (មានវីដេអូ) appeared first on Kampuchea Thmey Daily.

តួកមេនីស្ថាន Archives - Kampuchea Thmey Daily

ប្រទេសនៅអាស៊ីកណ្ដាល​មួយ​ ចង់ភ្ជាប់ជើង​ហោះហើរ​ជាមួយកម្ពុជា​ឱ្យបានមុនគេ

ប្រទេសនេះអះអាងថា គ្មានអ្នកឆ្លងកូវីដសោះ តែសកម្មជនថា កុហក

ប្រធានាធិបតី តួកមេនីស្ថាន បង្ហាញរូបសំណាកឆ្កែសំណព្វ ស្រោបមាស២៤ការ៉ាត់ (មានវីដេអូ)

ប្រទេសនៅអាស៊ីកណ្ដាលមួយ ចង់ភ្ជាប់ជើងហោះហើរជាមួយកម្ពុជាឱ្យបានមុនគេ