ទិវាសម្អាតពិភពលោក Archives - Kampuchea Thmey Daily

មន្ទីរការងារ គ្រឹះស្ថានអប់រំបណ្ដុះបណ្តាលបច្ចេកទេស រួមនឹងសហគ្រាស គ្រឹះស្ថាននៅទូទាំងប្រទេស រៀបចំប្រារព្ធទិវាសម្អាតពិភពលោកលើកទី៧

Kang Tola — Mon, 23 Sep 2024 15:11:56 +0000

នាចុងសប្តាហ៍កន្លងទៅនេះ គ្រឹះស្ថានអប់រំបណ្ដុះបណ្តាលបច្ចេកទេស និងវិជ្ជាជីវៈ មន្ទីរការងារ និងបណ្តុះបណ្តាលវិជ្ជាជីវៈ រួមនឹងម្ចាស់ នាយកសហគ្រាស គ្រឹះស្ថានទាំងអស់ក្នុងរាជធានី-ខេត្តទូទាំងប្រទេស បានប្រារព្ធទិវាសម្អាតពិភពលោកលើកទី៧ (7th World Cleanup Day) ដើម្បីរួមចំណែកជាមួយពិភពលោកក្នុងការសម្អាតបរិស្ថាន លើកកម្ពស់ការយល់ដឹង និងចូលរួមក្នុងការគ្រប់គ្រងសំរាម សំណល់រឹងនៅប្រទេសកម្ពុជា។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា នៅតាមគ្រឹះស្ថានអប់រំបណ្ដុះបណ្តាលបច្ចេកទេស និងវិជ្ជាជីវៈ, មន្ទីរការងារ និងបណ្តុះបណ្តាល វិជ្ជាជីវៈ, រួមនិងសហគ្រាស គ្រឹះស្ថានានានៅក្នុងរាជធានី-ខេត្តទូទាំងប្រទេស បានចូលរួមអនុវត្តយ៉ាងសកម្មក្នុងការចូលរួមរៀបចំទិវាសម្អាតពិភពលោកលើកទី៧ (7th World Cleanup Day) ស្របទៅតាមការជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ក្នុងថ្ងៃប្រាព្វទិវាសម្អាតពិភពលោកលើកទី៧ កាលពីថ្ងៃទី២១ ខែកញ្ញា ឆ្នាំ២០២៤ កន្លងទៅ។

លោករដ្ឋលេខាធិការ បានគូសបញ្ជាក់ថា ការរៀបចំទិវាសម្អាតពិភពលោកលើកទី៧ (7th World Cleanup Day) នេះគឺជាទិវាមួយដ៏ល្អប្រសើរមួយដែលផ្តល់ឱកាសដល់យុវជន សិស្ស និស្សិត និង បុគ្គលិក កម្មករនិយោជិត ចូលរួមដើម្បីបរិស្ថាននៅប្រទេសកម្ពុជា។ ទិវាសម្អាតពិភពលោកលើកទី៧ រៀបចំឡើងស្របទៅ នឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ក្នុងការកសាង និងពង្រឹងមូលដ្ឋានគ្រឹះ ដើម្បីពន្លឿនការអភិវឌ្ឍជាតិ និងគាំទ្រដល់យុទ្ធសាស្ត្រចក្រាវិស័យបរិស្ថាន ឆ្នាំ២០២៣-២០២៨ រួមមាន៖ ភាពស្អាត ភាពបៃតង និងចីរភាព និងរួមចំណែកដល់យុទ្ធនាការទឹកស្អាត កាត់បន្ថយប្លាស្ទិក និងគោលដៅអភិវឌ្ឍន៍។

បើតាមលោករដ្ឋលេខាធិការ សម្រាប់ការរៀបចំប្រារព្ធទិវានេះផងដែរ អាជ្ញាធរមូលដ្ឋានក៏បានសហការជាមួយសាស្ត្រាចារ្យ លោកគ្រូ អ្នកគ្រូ សិស្ស និស្សិត ម្ចាស់ ឬ នាយកសហគ្រាស គ្រឹះស្ថាន និងកម្មករនិយោជិត រៀបចំទិវាសម្អាតពិភពលោកលើកទី៧នេះ ដោយធ្វើអនាម័យសម្អាតសំរាមដំណាលគ្នានៅតាមមូលដ្ឋានរៀងៗខ្លួន ដើម្បីធានាបានបរិស្ថាន និងបរិយាកាសនៅកន្លែង ធ្វើការស្អាត បង្កើនប្រសិទ្ធភាព ផលិតភាពការងារ ការរស់នៅស្អាត និងបរិស្ថានបៃតង៕

The post មន្ទីរការងារ គ្រឹះស្ថានអប់រំបណ្ដុះបណ្តាលបច្ចេកទេស រួមនឹងសហគ្រាស គ្រឹះស្ថាននៅទូទាំងប្រទេស រៀបចំប្រារព្ធទិវាសម្អាតពិភពលោកលើកទី៧ appeared first on Kampuchea Thmey Daily.

អង្គការសម្អាតទន្លេសមុទ្រ ប្ដេជ្ញាសម្អាតសំរាមចេញពីទន្លេនៅរាជធានីភ្នំពេញ ឲ្យអស់ ត្រឹមឆ្នាំ ២០២៨

អ៊ិន ពិសី — Sun, 17 Sep 2023 01:32:06 +0000

លោក នូ សុវណ្ណ នាយកប្រតិបត្តិអង្គការសម្អាតទន្លេសមុទ្រ បានមានប្រសាសន៍ថា អង្គការ នឹងសហការជាមួយក្រុមការងារស្ម័គ្រចិត្តធ្វើការសម្អាតសំរាមចេញពីទន្លេនៅរាជធានីភ្នំពេញឲ្យអស់ នៅត្រឹមឆ្នាំ ២០២៨ ខាងមុខ។

ថ្លែងក្នុងទិវាសម្អាតបរិស្ថានពិភពលោកលើកទី ៦ ដែលរៀបចំឡើងដោយគណៈកម្មាធិការជាតិវាយតម្លៃទីក្រុងស្អាត ក្រសួងទេសចរណ៍ ក្រសួងបរិស្ថាន រដ្ឋបាលរាជធានីភ្នំពេញ សហភាពសហព័ន្ធយុវជនកម្ពុជា ក្រុមហ៊ុន ខេមប្រ៊ូវ (ស្រាបៀរអង្គរ) ក្រោមប្រធានបទ «ទន្លេគ្មានសំរាម» នៅតាមច្រាំងទន្លេសាបត្រើយម្ខាងនៅខណ្ឌជ្រោយចង្វារ រាជធានីភ្នំពេញ កាលពីថ្ងៃទី ១៦ កញ្ញា លោកបានបន្តថា អង្គការកំពុងនាំចូលទូកប្រមូលសំរាមនៅតាមទន្លេមួយគ្រឿងទៀត ដែលមានសមត្ថភាពប្រមូលសំរាមបន្ថែម ខណៈបច្ចុប្បន្នអង្គការមានទូកចំនួន ១ គ្រឿង កំពុងដំណើរការហើយស្រាប់ ហើយក៏មានក្រុមការងារស្ម័គ្រចិត្តចំនួន ១០០ នាក់ បន្ថែមទៀត ដើម្បីប្រមូលសំរាមតាមច្រាំងទន្លេជារៀងរាល់ថ្ងៃ។

លោក ហួត ហៃ អភិបាលរង នៃគណៈអភិបាលរាជធានីភ្នំពេញ បានមានប្រសាសន៍ថា បច្ចុប្បន្នរាជធានីភ្នំពេញមានការរីកចម្រើនកាន់តែឈានឡើង ដូច្នេះធ្វើឲ្យចំនួនប្រជាពលរដ្ឋកើនឡើងពីមួយថ្ងៃទៅមួយថ្ងៃ ក្នុងនោះចំនួនសំរាមចេញពីការប្រើប្រាស់ក៏មានការកើនឡើងផងដែរ ក្នុងរង្វង់ ៣៧០០ តោន ក្នុងមួយថ្ងៃ។

លោកបានបន្តថា ការរៀបចំទិវាសម្អាតបរិស្ថានពិភពលោកនេះ ក៏ជាឱកាសមួយក្នុងការផ្សព្វផ្សាយ និងដាស់តឿនដល់ប្រជាពលរដ្ឋឲ្យចូលរួមក្នុងកិច្ចការពារបរិស្ថាន ក៏ដូចជាបញ្ជ្រាបការយល់ដឹងជាសាធារណៈជូនពួកគាត់ឲ្យចេះគ្រប់គ្រងសំរាម។

លោក Vladimir Vava អគ្គនាយកគ្រប់គ្រងក្រុមហ៊ុន ខេមប្រ៊ូវ (ស្រាបៀរអង្គរ) បានសម្ដែងនូវក្ដីរីករាយ និងសាទរជាខ្លាំង ដែលក្រុមហ៊ុនបានក្លាយជាចំណែកមួយក្នុងចលនានេះ។ លោកបន្តថា «សកម្មភាពនៅថ្ងៃនេះ គឺជាផ្នែកមួយ នៃទំនួលខុសត្រូវសង្គមរបស់ក្រុមហ៊ុន ខេមប្រ៊ូវ ក្នុងការចូលរួមការពារបរិស្ថាន និងសង្គម ស្របតាមគោលដៅចីរភាពរបស់ក្រុមហ៊ុន ‘អភិវឌ្ឍន៍ឲ្យកាន់តែប្រសើរទាំងថ្ងៃនេះ &ថ្ងៃស្អែក’។ ចលនានេះ នឹងកាន់តែសំខាន់ៗ ទៅ ព្រោះជាការផ្តល់សារស្ដែងចេញជាសកម្មភាពបំផុសស្មារតីអំពីការគ្រប់គ្រងកាកសំណល់ប្រចាំថ្ងៃ ក៏ដូចជាជួយជំរុញឲ្យមានការផ្លាស់ប្ដូរជាវិជ្ជមាននូវទម្លាប់ទុកដាក់សំរាម ហើយក៏ឆ្លុះបញ្ចាំងពីចក្ខុវិស័យរួមគ្នារបស់រាជរដ្ឋាភិបាល ឯកជន អង្គការសង្គមស៊ីវិល និងប្រជាជន ក្នុងការជំរុញឲ្យមានការអភិវឌ្ឍប្រកបដោយចីរភាព»។ លោកជឿជាក់ថា ការចូលរួមរបស់យើងទាំងអស់គ្នា នឹងនាំមកនូវការផ្លាស់ប្ដូរជាវិជ្ជមាន និងបង្កើតអនាគតរួមគ្នាដ៏ប្រសើរសម្រាប់យើងទាំងអស់គ្នា។

ចំណែកលោក អាំង សុវណ្ណរ័ត្ន អគ្គនាយកគ្រប់គ្រងឧស្សាហកម្មទេសចរណ៍ ក៏បានអំពាវនាវឲ្យមានការចូលរួមកាន់តែច្រើន កាន់តែសកម្មក្នុងយុទ្ធនាការ «កម្ពុជាស្អាត កម្ពុជាបៃតង» របស់ក្រសួងទេសចរណ៍ ដែលជាសកម្មភាពដ៏សំខាន់មួយ ក្នុងការចូលរួមក្នុងយុទ្ធនាការទីក្រុងស្អាត ដើម្បីលើកស្ទួយមុខមាត់ប្រទេសកម្ពុជា ទាក់ទាញភ្ញៀវទេសចរឲ្យចូលមកទស្សនាកម្ពុជាកាន់តែច្រើន។

គួរបញ្ជាក់ថា នៅក្នុងទិវាសម្អាតពិភពលោកលើកទី ៦ នេះ ក៏មានការដាំដើមឈើនៅសាលាបឋមសិក្សាជ្រោយចង្វារ ចំនួន ១០០ ដើម និងទិវាអំពើល្អ ដោយមានការចែកសម្ភារៈប្រើប្រាស់ជូនប្រជាពលរដ្ឋខ្វះខាត ក៏ដូចជាសកម្មភាពនានា ដើម្បីបង្កើនការចូលរួមពីយុវជន ប្រជាពលរដ្ឋ កាន់តែច្រើន៕

អត្ថបទ ៖ សំអឿន

The post អង្គការសម្អាតទន្លេសមុទ្រ ប្ដេជ្ញាសម្អាតសំរាមចេញពីទន្លេនៅរាជធានីភ្នំពេញ ឲ្យអស់ ត្រឹមឆ្នាំ ២០២៨ appeared first on Kampuchea Thmey Daily.

ទិវាសម្អាតពិភពលោក​ Archives - Kampuchea Thmey Daily

អង្គការសម្អាតទន្លេសមុទ្រ ប្ដេជ្ញាសម្អាតសំរាមចេញពីទន្លេ​នៅរាជធានីភ្នំពេញ ឲ្យអស់ ត្រឹមឆ្នាំ ២០២៨

ទិវាសម្អាតពិភពលោក Archives - Kampuchea Thmey Daily

អង្គការសម្អាតទន្លេសមុទ្រ ប្ដេជ្ញាសម្អាតសំរាមចេញពីទន្លេនៅរាជធានីភ្នំពេញ ឲ្យអស់ ត្រឹមឆ្នាំ ២០២៨