លោក Avichay Adraee អ្នកនាំពាក្យយោធាអ៊ីស្រាអែលខាង​ភាសាអារ៉ាប់ បានប្រកាស​ល់ើបណ្តាញ​សង្គម​​ X កាល​ថ្ងៃចន្ទថា កងទ័ពអ៊ីស្រាអែល​កំពុងវិលត្រឡប់ទៅកាន់​ការ​ «ប្រយុទ្ធជាមួយកម្លាំងដ៏មហិ​​​​មា​​» នៅ Rafah ដែលជាទីក្រុងធំ​បំផុតមួយរបស់ហ្គាហ្សានិងតំបន់ជុំវិញ។

លោក​បាន​អំពាវនាវ​ឲ្យ​ប្រជាជន​ប៉ាឡេស្ទីន​នៅ al-Mawasi ក្នុងក្រុង Rafah ផ្លាស់​ទី​ជម្រក​ជា​បន្ទាន់​ ខណៈតំបន់​នេះ​បាន​ស្ថិត​ក្រោម​ការ​បាញ់​ប្រហារ​របស់​អ៊ីស្រាអែល​ជា​ប្រចាំ​ក្នុង​អំឡុង​ពេល​សង្រ្គាម​នៅ​ហ្គាហ្សា បើ​ទោះ​បី​ជា​ត្រូវ​បាន​គេ​កំណត់​ថា​ជា «តំបន់​សុវត្ថិភាព» ក៏ដោយ។

ភ្លាមៗបន្ទាប់ពីការប្រកាសបញ្ជា​ឲ្យ​មាន​ការ​ជម្លៀសចេញ សារព័ត៌មាន Al Jazeera Arabic បានរាយការណ៍ថា យ៉ាង​ហោចណាស់​មនុស្ស ២​នាក់ត្រូវបានសម្លាប់ក្នុងការវាយប្រហាររបស់អ៊ីស្រាអែលទៅលើលំនៅដ្ឋានតង់ដែលបានផ្លាស់​ទីលំនៅនៅ Rafah ផងដែរ។

សូមបញ្ជាក់ថា កាលពីសប្តាហ៍មុន ទីភ្នាក់ងារមនុស្សធម៌របស់អង្គការសហប្រជាជាតិ (OCHA) បានរាយការណ៍ថា មនុស្សជាង​​១៤ម៉ឺន​​នាក់ ត្រូវបានផ្លាស់ទីលំនៅចាប់តាំងពីអ៊ីស្រាអែលបាន​​ទម្លាក់​ចោល​បទឈប់បាញ់និងបន្តសង្រ្គាមឡើងវិញលើតំបន់ជុំវិញកាលពីថ្ងៃទី១៨ខែមីនា។

ក្រសួងសុខាភិបាលនៅហ្គាហ្សាបានរាយការណ៍ថា មនុស្សជាង ៩០០នាក់ត្រូវបានសម្លាប់ចាប់តាំងពីការទម្លាក់គ្រាប់បែកជាថ្មី​របស់អ៊ីស្រាអែល ដែលនាំឲ្យចំនួនអ្នកស្លាប់ចាប់តាំងពីសង្រ្គាមនៅក្នុងខែតុលាឆ្នាំ ២០២៣ កើនដល់ជាង ៥ម៉ឺន​នាក់។ ​ចំពោះការវាយប្រហារកាលពីថ្ងៃទី ៧ខែតុលា របស់ក្រុមហាម៉ាសលើតំបន់ហ្គាហ្សាភាគខាងត្បូងបានសម្លាប់មនុស្ស ១១៣៩ នាក់ ហើយប្រហែល ២៥០នាក់ត្រូវបានចាប់ជាចំណាប់ខ្មាំង ដែលវាបានបញ្ឆេះការវាយលុករបស់អ៊ីស្រាអែល៕

អត្ថបទ៖ ប៊ុន សុភាព

The post អ៊ីស្រាអែល​បញ្ជា​ឲ្យ​ជម្លៀសប្រជាជននៅ​ក្រុង Rafah ខណៈខ្លួន​នឹងវាយលុក​​​ដ៏ខ្លាំង​ appeared first on Kampuchea Thmey Daily.

កងកម្លាំងអ៊ីស្រាអែល បានវាយលុកតំបន់នានានៅកណ្ដាល​តំបន់​ហ្គាហ្សាពេញមួយយប់ ដោយបានសម្លាប់មនុស្ស ១៤ នាក់ និងរាប់សិបនាក់ផ្សេងទៀតរងរបួស ខណៈពេលដែលរថក្រោះបានបង្កើនការឈ្លានពានចូលទៅក្នុងទីក្រុង Rafah នៅភាគខាងត្បូងកាន់តែជ្រៅ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី ២១ ខែ មិថុនានេះ។

យោងតាមមន្ត្រីសុខាភិបាលហ្គាហ្សា បានឲ្យដឹងថា យន្តហោះអ៊ីស្រាអែលបានវាយប្រហារផ្ទះមួយខ្នងក្នុងជំរំ Al-Nuseirat ដោយបានសម្លាប់មនុស្ស ២ នាក់ និងរបួស ១២ នាក់ទៀត ខណៈដែលរថក្រោះបានបាញ់ផ្លោងទៅកាន់តំបន់ក្នុងជំរុំ Al-Maghazi និង Al-Bureij ដែលបណ្តាលឱ្យមនុស្សជាច្រើននាក់ផ្សេងទៀតរងរបួស ខណៈដែល Nuseirat, Maghazi, និង Bureij គឺជាជំរុំជនភៀសខ្លួនដ៏ធំរបស់តំបន់ហ្គាហ្សា។

ស្របពេលជាមួយគ្នានេះដែរ ការវាយប្រហារតាមអាកាសរបស់អ៊ីស្រាអែលបានសម្លាប់ជនជាតិប៉ាឡេស្ទីនម្នាក់ និងជាច្រើននាក់ទៀតរងរបួសកាលពីថ្ងៃព្រហស្បតិ៍ នៅទីក្រុង Deir al-Balah ដែលជាទីក្រុងប្រមូលផ្តុំទៅដោយជនភៀសខ្លួន និង​ស្លាប់ ៧ នាក់ផ្សេងទៀតនៅ​សង្កាត់ Zeitoun តំបន់ហ្គាហ្សា។ខណៈយោធាអ៊ីស្រាអែលកំពុងបន្តប្រតិបត្តិការរបស់ពួកគេនៅទូទាំងតំបន់ទាំងនេះផ្តោតលើក្រុមសកម្មប្រយុទ្ធ និងហេដ្ឋារចនាសម្ព័ន្ធយោធា។

ប្រព័ន្ធផ្សព្វផ្សាយ​​ហាម៉ាស ថា ការវាយប្រហារតាមអាកាសមួយផ្សេងទៀតទៅលើផ្ទះមួយនៅភាគខាងលិចទីក្រុងបានសម្លាប់អ្នកកាសែតនៃទូរទស្សន៍ Al-Aqsa TV របស់ហាម៉ាស។ ខណៈការិយាល័យប្រព័ន្ធផ្សព្វផ្សាយរបស់រដ្ឋាភិបាលតំបន់ហ្គាហ្សាដែលគ្រប់គ្រងដោយក្រុមហាម៉ាសបានឲ្យដឹងថាការបាញ់ប្រហាររបស់អ៊ីស្រាអែលបានសម្លាប់អ្នកកាសែតចំនួន ១៥២ នាក់ចាប់តាំងពីថ្ងៃទី ៧ ខែតុលាឆ្នាំមុនមក។

ទោះបីជាយ៉ាងណាកាលពីថ្ងៃព្រហស្បតិ៍ អាជ្ញាធរអ៊ីស្រាអែលក៏បានដោះលែងជនជាតិប៉ាឡេស្ទីន ៣៣ នាក់ដែលត្រូវបានចាប់ខ្លួនក្នុងអំឡុងពេលប៉ុន្មានខែកន្លងមកពីតាមតំបន់ផ្សេងគ្នាដែលខ្លួនបានវាយប្រហារ ។ អ្នកជាប់ឃុំដែលត្រូវបានដោះលែងនិងបញ្ជូនទៅមន្ទីរពេទ្យ Al-Aqsa នៅ Deir Al-Balah បន្ទាប់ពីពួកគេទទួលរងនូងការធ្វើទារុណកម្ម និងការធ្វើបាបដោយអ្នកទោសអ៊ីស្រាអែល។

សូម​រំឭក​ថា ជាងប្រាំបីខែនៅក្នុងសង្រ្គាមនៅហ្គាហ្សា អ៊ីស្រាអែលឥឡូវនេះគឺផ្តោតលើតំបន់ចុងក្រោយពីរដែលកងកម្លាំងរបស់ខ្លួនមិនទាន់បានវាយលុកបានសម្រេចគឺ Rafah ដែលនៅលើគែមភាគខាងត្បូងតំបន់ហ្គាហ្សា និងតំបន់ជុំវិញ Deir al-Balah ។ ប្រតិបត្តិការនេះបានបង្ខំមនុស្សជាងមួយលាននាក់ឱ្យភៀសខ្លួនចាប់តាំងពីខែឧសភា ដោយសាររថក្រោះអ៊ីស្រាអែលវាយប្រហារចូលកាន់តែជ្រៅ និងបង្កើនការទម្លាក់គ្រាប់បែកនៅ Rafah ដោយបង្ខំឱ្យគ្រួសារជាច្រើនទៀតដែលរស់នៅក្នុងតំបន់ឆ្នេរឆ្ងាយត្រូវភៀសខ្លួនទៅភាគខាងជើង។ អ្នកស្រុកខ្លះបាននិយាយថា ល្បឿននៃការវាយឆ្មក់ត្រូវបានពន្លឿនក្នុងរយៈពេលពីរថ្ងៃកន្លងមកនេះ។

គួរបញ្ជាក់ផងដែរថាមិនទាន់មានសញ្ញាណាមួយនៃការថយចុះការប្រយុទ្ធនោះទេ ខណៈដែលកិច្ចខិតខំប្រឹងប្រែងរបស់អ្នកសម្របសម្រួលអន្តរជាតិ គាំទ្រដោយសហរដ្ឋអាមេរិក បានបរាជ័យក្នុងការបញ្ចុះបញ្ចូលអ៊ីស្រាអែល និងក្រុមហាម៉ាស់ឱ្យយល់ព្រមលើបទឈប់បាញ់៕

អត្ថបទ៖ ប៊ុន សុភាព

The post អ៊ីស្រាអែល​ បង្កើនការវាយលុក​កាន់តែជ្រៅចូលទីក្រុង Rafah appeared first on Kampuchea Thmey Daily.