ទីតាំងចត្តាឡីស័ក Archives - Kampuchea Thmey Daily

រដ្ឋមន្ត្រីសុខាភិបាល ណែនាំមន្រ្តីរៀបចំការងារចត្តាឡីស័កនៅអាកាសយានដ្ឋានអន្តរជាតិតេជោ ឱ្យមានប្រសិទ្ធភាពខ្ពស់

Ken Malis — Thu, 28 Aug 2025 03:51:26 +0000

ក្នុងឱកាសចុះពិនិត្យការរៀបចំកន្លែងចត្តាឡីស័ក នៅអាកាសយានដ្ឋានអន្តរជាតិតេជោ នាថ្ងៃទី២៧ ខែសីហា ឆ្នាំ២០២៥ លោក ឈាង រ៉ា រដ្ឋមន្ត្រីក្រសួងសុខាភិបាល បានណែនាំដល់ថ្នាក់ដឹកនាំ ជាពិសេសមន្រ្តីចត្តាឡីស័ក ត្រូវរៀបចំលំហូនៃការងារចត្តាឡីស័កឱ្យមានប្រសិទ្ធភាពខ្ពស់ ជាមួយស្តង់ដារសាកល និងក្នុងករណីមានការសង្ស័យសញ្ញាណាមួយ នោះក្រុមគ្រូពេទ្យក្នុងភារកិច្ច ត្រូវអនុវត្តវិធានការសុខាភិបាលភ្លាមៗ និងរៀបចំ ប្រព័ន្ធ បញ្ជូនបន្តទៅមន្ទីរពេទ្យជាតិបានទាន់ពេលវេលា។

លោករដ្ឋមន្ត្រី បានបញ្ជាក់ថា ការងារចត្តាឡីស័កនៅអាកាសយានដ្ឋានអន្តរជាតិ គឺដើម្បីធានាឱ្យបានសុវត្ថិភាពសុខភាពសាធារណៈ និងពិសេសគិតគូអំពីបញ្ហាសុខភាព និងសុវត្ថិភាព ជូនដល់អ្នកធ្វើដំណើរ និងបុគ្គលិកបម្រើការងារនៅក្នុងនោះ។

ជាមួយគ្នានេះ លោករដ្ឋមន្ត្រីបានសង្កេតឃើញថា នៅក្នុងអាកាសយានដ្ឋានអន្តរជាតិតេជោ បានរៀបចំបានយ៉ាងល្អប្រណិត និងតាមលក្ខណៈស្តង់ដាអន្តរជាតិ ដែលនឹងទទួលស្វាយគមន៍ភ្ញៀវជាតិ និងអន្តរជាតិ ចូលមកប្រទេសកម្ពុជា និងទៅកាន់ពិភពលោក ប្រកបដោយសុវត្ថិភាព និងផាសុខភាព។

ការចុះពិនិត្យនេះដែរ មានការអញ្ជើញចូលរួមពី ថ្នាក់ដឹកនាំក្រសួង មន្ទីរពេទ្យជាតិ និងមន្រ្តីចត្តាឡីស័ក រួមទាំងតំណាងរដ្ឋលេខាធិការដ្ឋានអាកាសចរណ៍ស៊ីវិល ដោយមានការទទួលស្វាគមន៍យ៉ាងកក់ក្ដៅ ពីអ្នកឧកញ៉ា វ៉ាន់ ឆារស៌ជួន នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) និងសហការី៕

The post រដ្ឋមន្ត្រីសុខាភិបាល ណែនាំមន្រ្តីរៀបចំការងារចត្តាឡីស័កនៅអាកាសយានដ្ឋានអន្តរជាតិតេជោ ឱ្យមានប្រសិទ្ធភាពខ្ពស់ appeared first on Kampuchea Thmey Daily.

ទីតាំងចត្តាឡីស័កដែលអាជ្ញាធរ និងគ្រូពេទ្យចុះទៅបើកទើបស្របច្បាប់ មិនអនុញាតិឲ្យបើកដោយឯកឯងនោះទេ

vin vatdara — Tue, 30 Mar 2021 07:59:26 +0000

តាមប្រភពពីកម្លាំងចម្រុះបានឲ្យដឹងថា ទីតាំងដែលគ្រូពេទ្យបានសម្រេចឲ្យបិទដើម្បីធ្វើចត្តាឡីសក័ចំនួន១៤ថ្ងៃនោះគឺបើសិនជាដល់ថ្ងៃកំណត់ហើយមិនត្រូវសម្រេចបើកដោយឯកឯងនោះទេទាល់តែមានលិខិតអនុញាតិត្រឹមត្រូវពីគ្រូពេទ្យទើបបាន។

តាមប្រភពពីលោក សេង វ៉ាន់ថា ចៅរងទី១សង្កាត់ស្ទឹងមានជ័យទី២បានឲ្យដឹងថារាល់ទីតាំងធ្វើចត្តាឡីសក័ទាំងអស់បើសិនជាពុំមានលិខិតអនុញាតិពីគ្រូពេទ្យនិងកម្លាំងចម្រុះចុះទៅបើកទេ គឺទីតាំងនោះត្រូវបន្តដាក់ជាចត្តាឡីសក័រហូតដល់មានលិខិតពីគ្រូពេទ្យសិន។

ជាក់ស្តែងដូចថ្ងៃទី៣០ខែមីនានេះអាជ្ញាធរខណ្ឌមានជ័យបានទទួលលិខិតអនុញាតិឲ្យបើកទីតាំងចត្តាឡីសក័មួយកន្លែងស្ថិតនៅផ្ទះឈ្មោះ មុំ គិរីសុវណ្ណ មានទីតាំងក្នុងក្រុមទី៨ភូមិឬស្សី៣សង្កាត់ស្ទឹងមានជ័យ២ខណ្ឌមានជ័យរាជធានីភ្នំពេញ។

លោកចៅរងសង្កាត់បានបញ្ជាក់ថារាល់ទីតាំងដែលធ្វើចត្តាឡីសក័គឺបើដល់ថ្ងៃកំណត់គឺមិនត្រូវបើកការចត្តាឡីសក័ដោយឯកឯងបានទេទាល់តែមានលិខិតអនុញាតិពីគ្រូពេទ្យដែលកំពុងតាមដានពីសភាពជំងឺជាប្រចាំនោះ។ដូច្នេះសូមបងប្អូនដែលធ្វើចត្តាឡីសក័ទាំងអស់សូមចងចាំកុំឲ្យខុសនិងផ្លូវច្បាប់ថ្មីស្តីពីការទប់ស្កាត់ជំងឺកូវីដ១៩នេះ៕

អត្ថបទ៖ នរា

The post ទីតាំងចត្តាឡីស័កដែលអាជ្ញាធរ និងគ្រូពេទ្យចុះទៅបើកទើបស្របច្បាប់ មិនអនុញាតិឲ្យបើកដោយឯកឯងនោះទេ appeared first on Kampuchea Thmey Daily.

រាជរដ្ឋាភិបាល យល់ព្រមឲ្យអនុវត្តនូវវិធានការច្បាប់ចំពោះបុគ្គល និងទីតាំង ដែលមិនអនុវត្តវិធានការសុខាភិបាល

Sorn Phanith — Fri, 26 Feb 2021 08:15:46 +0000

រាជរដ្ឋាភិបាល បានសម្រេចជាគោលការណ៍យល់ព្រមឲ្យអនុវត្តនូវវិធានការច្បាប់បន្ថែមចំពោះបុគ្គល និងទីតាំងដែលមិនសហការនូវវិធានការសុខាភិបាល ដែលក្នុងនោះ ទី១, ចំពោះជនបរទេស ត្រូវបណ្ដេញចេញពីកម្ពុជា និងហាមចូលប្រទេសសារជាថ្មី ទី២, ចំពោះជនជាតិខ្មែរ ត្រូវចាត់វិធានការតាមផ្លូវច្បាប់ ទី៣, ចំពោះទីតាំង ត្រូវដកហូតអាជ្ញាប័ណ្ណ និងបិទអាជីវកម្មក្នុងទីតាំង។

ការសម្រេចនេះ បានធ្វើឡើងតាមរយៈលិខិតចុះថ្ងៃទី២៥ ខែកុម្ភៈ ឆ្នាំ២០២១ របស់ ទីស្ដីការគណៈរដ្ឋមន្ត្រី ចុះហត្ថលេខាដោយលោក កែន សត្ថា រដ្ឋលេខាធិការ ទីស្ដីការគណៈរដ្ឋមន្ត្រី និងយោងទៅលើការស្នើសុំរបស់អនុគណៈកម្មការស្រាវជ្រាវ និងតាមដានបុគ្គលសង្ស័យថា មានជំងឺកូវីដ-១៩ នៃគណៈកម្មការអន្តរក្រសួង ដើម្បីប្រយុទ្ធប្រឆាំងជំងឺកូវីដ-១៩ ព្រមទាំងលិខិតចុះថ្ងៃទី២៤ ខែកុម្ភៈ ឆ្នាំ២០២១ របស់ខុទ្ទកាល័យសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងចំណារដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ចុះថ្ងៃទី២២ ខែកុម្ភៈ ឆ្នាំ២០២១។

គួររំលឹកថា កាលពីថ្មីៗនេះ លោកឧត្តមសេនីយ៍ ឌី វិជ្ជា អនុគណៈកម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ១៩ បានស្នើសុំទៅសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីអនុវត្តច្បាប់ចំពោះបុគ្គល ដែលមិនធ្វើតាមវិធានការរបស់ក្រសួងសុខាភិបាល និងគេចវេះមិនព្រមចូលខ្លួនធ្វើចត្តាឡីស័ក ព្រមទាំងមិនសហការផ្តល់ការសម្ភាសន៍ជាដើម។

ក្នុងលិខិតគោរពជូនសម្តេចតេជោលើកឡើងថា កន្លងមកក្នុងព្រឹត្តិការណ៍៣ វិច្ឆិកា ២៨ វិច្ឆិកា និងព្រឹត្តិការណ៍ ២០កុម្ភៈ អនុគណៈកម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ១៩ តែងតែជួបប្រទះនូវបញ្ហាប្រឈមមួយចំនួន ក្នុងប្រតិបត្តិការរបស់ខ្លួន ក្នុងនោះបញ្ហាបុគ្គល ជាប់ពាក់ព័ន្ធជំងឺកូវីដ១៩ មិនព្រមសហការផ្តល់ការសម្ភាសន៍ ផ្តាច់ទំនាក់ទំនង និងករណីរត់គេចមិនព្រមធ្វើចត្តាឡីស័ក ព្រមទាំងទីតាំងមិនសហការចំពោះកិច្ចប្រតិបត្តិការស្រាវជ្រាវ និងតាមដានបុគ្គល ផ្ទុកជំងឺកូវីដ១៩ ដែលឲ្យធ្វើប្រតិបត្តិការមានភាពយឺតយ៉ាវ និង ខ្វះចន្លោះ ហេតុដូចនេះដើម្បីពង្រឹងប្រសិទ្ធភាពការងារ ទប់ស្កាត់ការរីករាលដាលនៃកូវីដ១៩ ក្នុងសហគមន៍ អនុគណៈកម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ១៩ បានស្នើសុំ គោលការណ៍ដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នូវវិធានការច្បាប់បន្ថែមចំពោះបុគ្គល និងទីតាំង ដែលមិនសហការ ។

ចំណុចដែលស្នើសុំគោលការណ៍នោះរួមមាន: ១. ចំពោះជនបរទេសសូម គោរពស្នើសុំ បណ្តេញ ចេញពីព្រះរាជាណាចក្រកម្ពុជា និង ហាមចូល ប្រទេសសារជាថ្មី។ ២. ចំពោះជន ជាតិ ខ្មែរ សូម គោរពស្នើសុំចាត់ វិធានការតាម ផ្លូវច្បាប់។ ៣. ចំពោះ ទីតាំង សូម ដកហូតអាជ្ញាប័ណ្ណ និងបិទអាជីវកម្មក្នុងទីតាំង។ ផ្អែកតាមសំណើនោះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចុះហត្ថលេខាយល់ ព្រមតាម សំណើរ ៕

អត្ថបទ៖ កោះកែវ

សូមចុចអាន៖ រកឃើញបុរសម្នាក់ ឆ្លងកូវីដ១៩ នៅឫស្សីកែវ

The post រាជរដ្ឋាភិបាល យល់ព្រមឲ្យអនុវត្តនូវវិធានការច្បាប់ចំពោះបុគ្គល និងទីតាំង ដែលមិនអនុវត្តវិធានការសុខាភិបាល appeared first on Kampuchea Thmey Daily.

មកស្គាល់ទីតាំងធ្វើចត្តាឡីស័កទាំង ១៩ កន្លែងនៅភ្នំពេញ

deth leng — Thu, 25 Feb 2021 02:23:27 +0000

ខាងក្រោមជាទីតាំងទាំង ១៩ កន្លែងនៃការធ្វើចត្តាឡីស័កនៅរាជធានីភ្នំពេញ ដែលមានមនុស្សសរុប១៥០១ នាក់ កំពុងធ្វើចត្តាឡីស័ក គិតត្រឹមថ្ងៃទី ២៤ ខែកុម្ភៈឆ្នាំ២០២១៖

– សណ្ឋាគារ កាំបូឌីយ៉ាណា មានមនុស្សសរុប ១៤៤ នាក់ ស្រី ៤០ នាក់ នៅសង្កាត់ចតុមុខ

– សណ្ឋាគារ សាន់វ៉េ មនុស្សសរុប ៨៣នាក់ ស្រី ០៩នាក់ សង្កាត់វត្តភ្នំ

– ភោជនីយដ្ឋាន រ៉ូមែនទិច មនុស្សសរុប ២៧នាក់ ស្រី ១០នាក់ សង្កាត់វត្តភ្នំ

– សណ្ឋាគារ អង្គរអន្តរជាតិ មនុស្សសរុប ៥៦នាក់ ស្រី ២៣នាក់ សង្កាត់ផ្សារកណ្តាល១

– អគារលេខ២៨ ផ្លូវ១៧២ ក្រុម៩០ ភូមិ១៤ មនុស្សសរុប ១០នាក់ ស្រី ០៣នាក់ សង្កាត់ផ្សារថ្មី៣។

– សណ្ឋាគារ ពូលូវ៉ៃ មានមនុស្សសរុប ១២៥នាក់ ស្រី ៣៣នាក់ សង្កាត់ផ្សារថ្មី៣

– សណ្ឋាគារ ថោនវីយូ មានមនុស្សសរុប ៩០នាក់ ស្រី ២៣នាក់ សង្កាត់ផ្សារថ្មី៣

– សណ្ឋាគារ ខតយ៉ាត មានមនុស្សសរុប ១៨២នាក់ ស្រី ៣៩នាក់ សង្កាត់បឹងរាំង

– សណ្ឋាគារ ញូវយ៉ក មានមនុស្សសរុប ១១៧នាក់ ស្រី ៣៩នាក់ សង្កាត់បឹងរាំង

– សណ្ឋាគារ អ៊ីស្គាលែន (យៀកវៃ) មានមនុស្សសរុប ១២៣នាក់ សង្កាត់បឹងរាំង

– ភោជនីយដ្ឋាន គ្រឿងសមុទ្រ សាន សាន មានមនុស្សសរុប ១៨នាក់ ស្រី ១១នាក់ សង្កាត់បឹងរាំង

– ក្លឹប Love មានមនុស្សសរុប ៥៣នាក់ ស្រី ១០នាក់ សង្កាត់បឹងរាំង

– សណ្ឋាគារ អូខេ ផាលេស មានមនុស្សសរុប ៦០នាក់ ស្រី ២០នាក់ សង្កាត់ជ័យជំនះ

– សណ្ឋាគារ អូខេ ប៊ូទិច មនុស្សសរុប ១០១នាក់ ស្រី ២៤នាក់ សង្កាត់ជ័យជំនះ។

– សណ្ឋាគារ ដឺហ្រ្តែងជីភែនីរ៉ូយ៉ាល់ ផាលេស ពុំមានភ្ញៀវស្នាក់នៅទេ សង្កាត់ជ័យជំនះ

– សណ្ឋាគារ ភ្នំពេញ មានមនុស្សសរុប ១១៥នាក់ ស្រី ១៨នាក់ សង្កាត់ស្រះចក

– សណ្ឋាគារ LCS និងអាផាតមែន មនុស្សសរុប ៣៧នាក់ ស្រី ០៧នាក់ សង្កាត់ស្រះចក

– សណ្ឋាគារ អាស៊ី មនុស្សសរុប ១២១នាក់ ស្រី ៣៩នាក់ សង្កាត់ផ្សារថ្មី២

-សណ្ឋាគារ អូរៀ មានមនុស្សសរុប ៣៩នាក់ ស្រី ០១នាក់ សង្កាត់ផ្សារថ្មី២។

ក្រៅពីនេះ ក្រោយព្រឹត្តិការណ៍សហគមន៍ ២០ កុម្ភៈ ២០២១ អាជ្ញាធរបានផ្អាកដំណើរការអាជីវកម្មបណ្ដោះអាសន្នចំនួន ០៦គោលដៅ៖

១. អគារលេខ២៨ ផ្លូវ១៧២ សង្កាត់ផ្សារថ្មី៣ បិទថ្ងៃទី ២០ ខែកុម្ភៈ ឆ្នាំ២០២១។

២. ក្លឹប coco សណ្ឋាគារ កណ្តាលសួនច្បារ សង្កាត់ចតុមុខ បិទថ្ងៃទី ២១ ខែកុម្ភៈ ឆ្នាំ២០២១។

៣. ក្លឹប love សង្កាត់បឹងរាំង (ខាងក្រោយ X2) បិទថ្ងៃទី ២១ ខែកុម្ភៈ ឆ្នាំ២០២១។

៤. សាលាបឋមសិក្សាកូលាបទី១ សង្កាត់ស្រះចក បិទថ្ងៃទី ២២ ខែកុម្ភៈ ឆ្នាំ២០២១។

៥. ភោជនីយដ្ឋាន រ៉ូមែនទិច សង្កាត់វត្តភ្នំ បិទថ្ងៃទី ២២ ខែកុម្ភៈ ឆ្នាំ២០២១។

៦. ភោជនីយដ្ឋាន គ្រឿងសមុទ្រ សាន សាន សង្កាត់បឹងរាំង បិទថ្ងៃទី ២៤ ខែកុម្ភៈ ឆ្នាំ២០២១៕

The post មកស្គាល់ទីតាំងធ្វើចត្តាឡីស័កទាំង ១៩ កន្លែងនៅភ្នំពេញ appeared first on Kampuchea Thmey Daily.