ការកោះហៅមកសួរនាំ និងអប់រំនេះ ធ្វើឡើងបន្ទាប់ពីកាលពីពេលថ្មីៗនេះ បានឃើញយុវជនរូបនេះថតវីដេអូពាក់ឯកសណ្ឋានយោធា សម្ដែង និងរាំ បង្ហោះក្នុងបណ្តាញសង្គមតិកតុក (TikTok) ចំនួនពីរឃ្លីប ដោយបានសរសេរខ្លឹមសារ “Make up ចូលជួរបិះមិនទាន់ ជីវិតជូនជាតិធាតុជូនម្តាយ រាងកាយជូនបងៗទាហាន” លើគណនីតិកតុក (TikTok) របស់ខ្លួន ក្នុងគោលបំណងទាក់ទាញចំណាប់អារម្មណ៍ឱ្យមានគេចូលមកមើលគណនីតិកតុកហាង របស់ខ្លួន។

តាមការសាកសួរ យុវជនម្នាក់នោះមានទីលំនៅក្នុងភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប មានមុខរបរជាបុគ្គលិកផ្នែកលក់ និងថតប្រម៉ូតហាង។ បន្ទាប់ពីសួរនាំ កម្លាំងជំនាញបានណែនាំ និងអប់រំឱ្យលុប និងបញ្ឈប់រាល់ការបង្ហោះវីដេអូ ដែលធ្វើឲ្យប៉ះពាល់កិត្តិយស សេចក្តីថ្លៃថ្នូរ របស់ក្រសួងការពារជាតិ និងកងយោធពលខេមរភូមិន្ទ បន្តទៀត ទើបឱ្យត្រឡប់ទៅលំនៅដ្ឋានវិញ។

យុវជនរូបនេះ បានទទួលស្គាល់កំហុស ដែលបានប្រព្រឹត្តនាពេលកន្លងមក ដោយខ្វះការពិចារណា ក្នុងការបង្ហោះវីដេអូខាងលើ និងបានសន្យាថា លុបវីដេអូទាំងនោះចោលវិញ ព្រមទាំងបានធ្វើការសុំទោសជាសាធារណៈចំពោះបងៗកងទ័ពទាំងអស់ផងដែរ៕

អត្ថបទ៖ ជុន កុសល

The post អាវុធហត្ថខេត្តសៀមរាប ហៅយុវជនម្នាក់ណែនាំអប់រំ ពាក់ព័ន្ធករណីយកឯកសណ្ឋានយោធាស្លៀក​រាំលេងបង្ហោះលើបណ្ដាញសង្គម appeared first on Kampuchea Thmey Daily.

ការចេញមុខពីសំណាក់ផលិតករនិងជាអ្នកដឹកនាំសម្តែងរឿង”ដើម្បីកូន”លោក ហ៊ុយ យ៉ាឡេង នាពេលនេះ គឺធ្វើឡើងដោយសង្កេតឃើញថា មួយរយ:ពេលចុងក្រោយនេះ មានបុគ្គលមួយចំនួនតូច បានចេញមុខអះអាងថាជាអ្នកស្នងបារមីដូនតាឬចាប់ជាតិផងដែរ។ ទង្វើនេះត្រូវបានមហាជនយល់ថាជារឿងប៉ះពាល់ដ៏ធ្ងន់ធ្ងរនិងជាការបំពុងសង្គម។

ផលិតករភាពយន្តលោក ហ៊ុយ យ៉ាឡេង ក៏បានលើកឡើងតាមរយ:ការអំពាវនាវថា “ល្មមបញ្ឈប់ទៅកុំយកដូនតាមកលែងសើចចាប់ជាតិអីនោះ កម្មពារធ្លាក់នរកមិនចាំជាតិក្រោយទេ” ។ ការលើកឡើងរបស់ផលិតករលោក ហ៊ុយ យ៉ាងឡេង បានធ្វើឱ្យមហាជនបង្ហាញការគាំទ្រនឹងស្នើឲ្យបុគ្គលទាំងនោះបញ្ឈប់សកម្ម ភាពបំភ័ន្តមហាជនទៀតទៅ។

គួរកត់សម្គាល់ថា ថ្មីៗនេះបានផ្ទុះនូវរឿងរ៉ាវដ៏ហួសចិត្ត ក្រោយឃើញមានបុគ្គលមួយចំនួនតូច បានចេញមុខដោយខ្លះអះអាងខ្លួនថា ជាវីរ:សិល្បករល្បីឈ្មោះចាប់ជាតិ រីឯខ្លះទៀតក៏បានតាំងខ្លួនថាជាអ្នកស្នងបារមីមហាបុព្វបុរសខ្មែរ ឬដូនតាខ្មែរទៀតផង។ ខណ:មហាជនបានរិះគន់និងថ្កោលទោស ថាជាទង្វើបំពុលសង្គមដ៏អគតិនិងថោកទាបបំផុត៕ អត្ថបទ៖ ចាន់រ៉ា

The post លោក ហ៊ុយ យ៉ាងឡេង ស្នើឱ្យបញ្ឈប់ទង្វើយកឈ្មោះដូនតាមកលេងសើច ឬអះអាងថាចាប់ជាតិ appeared first on Kampuchea Thmey Daily.

តាមរយៈបណ្តាញទំនាក់ទំនងសង្គមផ្ទាល់ខ្លួន DJ Kdep បានលើកឡើងថា គ្មានអីពិបាកទេ ក្នុងការកម្ចាត់ក្រុមអ្នកបំពុលសង្គម។ បើរាល់ផលិតផលណាដែលធ្វើទីផ្សារថោកទាប យកបុគ្គលមិនគ្រប់ទឹកឆ្កួតៗយកមកបំពុលសង្គម សាធារណជនគ្រាន់តែបញ្ឈប់ការគាំទ្រ និងទិញប្រើប្រាស់ទៅ គឺវាចប់ហើយ។

ក្នុងន័យនេះ លោកទំនងជាសំដៅដល់ការធ្វើទីផ្សារនានា ដែលនិយមផ្សព្វផ្សាយផលិតផល ឬរបររកទទួលទានរបស់ខ្លួន បែបមិនសមរម្យ ខណៈកន្លងមក ក៏តែងឃើញមានការធ្វើទីផ្សារ ដោយយកមនុស្សមានបញ្ហាសតិអារម្មណ៍មកធ្វើទីផ្សារផងដែរ។ ក្រៅពីនេះ ក៏នៅមានសកម្មភាពបំពុលសង្គមមួយចំនួនទៀត ដូចជាការប្រើរូបភាពមិនសមរម្យ និងបង្កើតរឿងរ៉ាវជម្លោះដើម្បីធ្វើទីផ្សារជាដើម។

ដោយមើលឃើញពីសកម្មភាពនៃការធ្វើទីផ្សារបែបនេះជារឿយ ទើប DJ Kdep បង្ហាញបំណងចង់ឱ្យមហាជនរួមគ្នាលុបបំបាត់សកម្មភាពទាំងនេះឱ្យអស់ពីសង្គម តាមរយៈការណែនាំឱ្យសាធារណជនកុំបន្តគាំទ្រ៕ អត្ថបទ៖ សុធាវី

The post DJ Kdep ថា ឱ្យតែឈប់គាំទ្រ​ការធ្វើទីផ្សារបែបបំពុលសង្គម គឺលែងមានក្រុមអ្នកបំពុលសង្គមហើយ appeared first on Kampuchea Thmey Daily.