កាល​ពី​ពេល​ថ្មី​ៗ កញ្ញា ទូច ចាន់វត្តី បាន​បង្ហាញ​រថយន្ត​ Ford Ranger XL 2023 ថ្មី​សន្លាង​១​គ្រឿង​ដោយ​កញ្ញា​បាន​សរសេរថា «ហេងហេង! កាដូ​ជូន​ម៉ាក់ប៉ា»។ លទ្ធភាព​នេះ​កើត​ចេញ​ពីកម្លាំង​ញើស​ឈាម​​​ដែល​នាងបាន​តស៊ូ​លះបង់​គ្រប់​បែប​យ៉ាង​ដើម្បី​កីឡា​ប្រដាល់​គុន​ខ្មែរ។

បើ​គិត​លើ​ចំណូល​ដែល​កញ្ញា ទូច ចាន់វត្តិ រក​បាន​គឺ​គ្រប់​គ្រាន់​សម្រាប់​រថយន្ត​ថ្មី១​គ្រឿង​នេះ។ ក្នុង​​នាម​ជា​ម្ចាស់​មេដាយ​មាស​កីឡា​ស៊ីហ្គេម លើក​ទី​៣២ កញ្ញា​ទទួល​បាន​ប្រាក់​រង្វាន់​១​ម៉ឺន​ដុល្លារ​អាមេរិក​ពី​រាជ​រដ្ឋាភិបាល​កម្ពុជា​កាល​ពី​ខែ​មិថុនា និង​កាល​ពីថ្ងៃ​ទី​១៤ ខែ​វិច្ឆិកា ឆ្នាំ​២០២៣​​ ទទួល​បាន​ប្រាក់​រង្វាន់​​៥​ពាន់​​ដុល្លារ​​ពី​សម្តេច​តេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ។

អ្វី​ដែល​កាន់​តែ​គួរ​ឲ្យ​សរសើរ​ទៀត​ ទូច ចាន់វត្តី បាន​​ប្រកួត​មិន​​ទាន់​​ចាញ់​ម្តង​ណា​​ឡើយ​គិត​ចាប់​តាំង​ពី​បាន​ឈ្នះ​មេដាយ​មាស​កីឡា​ស៊ីហ្គេម លើក​ទី​៣២ កាល​ពី​ខែ​ឧសភា រហូត​ដល់​ចុង​ឆ្នាំ​២០២៣​ ដែល​​ការ​ប្រកួតទាំងនេះ​​ទទួល​បាន​ប្រាក់​តម្លៃ​ខ្លួន​ច្រើន។

កញ្ញា ទូច ចាន់វត្តី ក៏​មាន​បង​ប្រុស​ជា​អ្នក​ប្រដាល់​ដែរ​គឺ​កីឡាករ ទូច ដេវីត ដែល​​ជា​អ្នក​ប្រដាល់​មាន​កេរ្តិ៍​ឈ្មោះ​បោះ​សំឡេង​ម្នាក់​ដែរ​ក្នុង​ពិភព​ប្រដាល់​គុន​ខ្មែរ។

ទូច ចាន់វត្តី បាន​ឈ្នះ​មេដាយ​មាស​​កីឡា​ស៊ីហ្គេម ឆ្នាំ​២០២៣ បន្ទាប់​ពី​បាន​យក​ឈ្នះ​កីឡាការិនី​វៀតណាម Nguyen Thi Chieu ក្នុង​វគ្គ​ផ្តាច់​ព្រ័ត្រ​លើ​វិញ្ញាសា​ទម្ងន់​៥៤​គីឡូក្រាម ហើយ​នេះ​ជា​ក្តី​ស្រមៃ​ធំ​បំផុត​ដែល​កញ្ញា​សម្រេច​បាន​ជូន​ជាតិ។ ចាប់​តាំង​ពីកីឡា​ស៊ីហ្គេម​នោះ​មក កញ្ញា​កាន់​តែ​មាន​សមត្ថភាព​ឡើង​​ខ្លាំង​រហូត​ដល់​ដោយ​ប្រកួត​មិន​ទាន់​ស្គាល់​បរាជ័យ​ឡើយ៕

អត្ថបទ៖ វីរបុត្រ

The post លះបង់ភាពស្រស់ស្អាត កីឡាការិនី ទូច ចាន់វត្តី មានលទ្ធភាពទិញឡានជូនអ្នកមានគុណ appeared first on Kampuchea Thmey Daily.