កីឡា

លះបង់ភាពស្រស់ស្អាត កីឡាការិនី ទូច ចាន់វត្តី មានលទ្ធភាពទិញឡានជូនអ្នកមានគុណ

បានផុស

៧ ម៉ោង មុន

នៅ

ថ្ងៃព្រហស្បតិ៍ ១៦ វិច្ឆិកា ២០២៣

ដោយ

កីឡាការិនីប្រដាល់ដ៏ស្រស់ស្អាត កញ្ញា ទូច ចាន់វត្តី មានលទ្ធភាពទិញរថយន្តថ្មីសន្លាង១គ្រឿងដើម្បីបំពេញក្តីស្រមៃរបស់អ្នកមានគុណទាំងទ្វេ បន្ទាប់ពីកញ្ញាលះបង់ភាពស្រស់ស្អាតដើម្បីអាជីពឈឺខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីពេលថ្មីៗ កញ្ញា ទូច ចាន់វត្តី បានបង្ហាញរថយន្ត Ford Ranger XL 2023 ថ្មីសន្លាង១គ្រឿងដោយកញ្ញាបានសរសេរថា «ហេងហេង! កាដូជូនម៉ាក់ប៉ា»។ លទ្ធភាពនេះកើតចេញពីកម្លាំងញើសឈាមដែលនាងបានតស៊ូលះបង់គ្រប់បែបយ៉ាងដើម្បីកីឡាប្រដាល់គុនខ្មែរ។

បើគិតលើចំណូលដែលកញ្ញា ទូច ចាន់វត្តិ រកបានគឺគ្រប់គ្រាន់សម្រាប់រថយន្តថ្មី១គ្រឿងនេះ។ ក្នុងនាមជាម្ចាស់មេដាយមាសកីឡាស៊ីហ្គេម លើកទី៣២ កញ្ញាទទួលបានប្រាក់រង្វាន់១ម៉ឺនដុល្លារអាមេរិកពីរាជរដ្ឋាភិបាលកម្ពុជាកាលពីខែមិថុនា និងកាលពីថ្ងៃទី១៤ ខែវិច្ឆិកា ឆ្នាំ២០២៣ ទទួលបានប្រាក់រង្វាន់៥ពាន់ដុល្លារពីសម្តេចតេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ។

អ្វីដែលកាន់តែគួរឲ្យសរសើរទៀត ទូច ចាន់វត្តី បានប្រកួតមិនទាន់ចាញ់ម្តងណាឡើយគិតចាប់តាំងពីបានឈ្នះមេដាយមាសកីឡាស៊ីហ្គេម លើកទី៣២ កាលពីខែឧសភា រហូតដល់ចុងឆ្នាំ២០២៣ ដែលការប្រកួតទាំងនេះទទួលបានប្រាក់តម្លៃខ្លួនច្រើន។

កញ្ញា ទូច ចាន់វត្តី ក៏មានបងប្រុសជាអ្នកប្រដាល់ដែរគឺកីឡាករ ទូច ដេវីត ដែលជាអ្នកប្រដាល់មានកេរ្តិ៍ឈ្មោះបោះសំឡេងម្នាក់ដែរក្នុងពិភពប្រដាល់គុនខ្មែរ។

ទូច ចាន់វត្តី បានឈ្នះមេដាយមាសកីឡាស៊ីហ្គេម ឆ្នាំ២០២៣ បន្ទាប់ពីបានយកឈ្នះកីឡាការិនីវៀតណាម Nguyen Thi Chieu ក្នុងវគ្គផ្តាច់ព្រ័ត្រលើវិញ្ញាសាទម្ងន់៥៤គីឡូក្រាម ហើយនេះជាក្តីស្រមៃធំបំផុតដែលកញ្ញាសម្រេចបានជូនជាតិ។ ចាប់តាំងពីកីឡាស៊ីហ្គេមនោះមក កញ្ញាកាន់តែមានសមត្ថភាពឡើងខ្លាំងរហូតដល់ដោយប្រកួតមិនទាន់ស្គាល់បរាជ័យឡើយ៕

អត្ថបទ៖ វីរបុត្រ