នៅ​ក្នុង​ពិធី​បិទ​ការ​ប្រកួត​ស៊ី​ហ្គេម​ដ៏​មហោឡារិក​នៅ​កម្ពុជា​នេះ មាន​ការ​អញ្ជើញ​ចូលរួម​ពី​ថ្នាក់​ដឹកនាំ​កីឡា​ជាតិ-អន្តរជាតិ ប្រតិភូ​កីឡា​ទាំង ១១ ប្រទេស ព្រមទាំង​ភ្ញៀវ​ជាតិ អន្តរជាតិ មហាជន​សរុប​ប្រមាណ​ជាង ៦ ម៉ឺន​នាក់។ ព្រឹត្តិការណ៍​បិទ​ស៊ីហ្គេម​នេះ​បាន​ប្រព្រឹត្ត​ទៅ​ជាមួយ​ផ្ទាំង​ទស្សនីយភាព​ដ៏​អស្ចារ្យ​ដូចជា ការ​អុជ​កាំជ្រួច​អបអរសាទរ, ការ​សម្ដែង​, សិល្បៈ​ចម្រៀង​កីឡា, ទស្សនីយភាព​មហា​ព្រលឹង​ក្បាច់គុន​ល្បុក្កតោ​ជាដើម។

យ៉ាងណា​ពិធី​បិទ​ព្រឹត្តិការណ៍ Sea Games កាលពី​យប់មិញ​នេះ​ដែរ ក៏​មាន​ភ្លៀង​ធ្លាក់​មួយ​មេ​ធំ ធ្វើ​ឲ្យ​ក្រុម​កំប្លែង និង​សិល្បករ​-​សិល្ប​ការិនី​មួយ​ចំនួន ត្រូវ​ខកខាន​ឱកាស​ចេញ​សម្ដែង​នា​ពិធី​បិទ​ព្រឹត្តិការណ៍​ស៊ីហ្គេម​ជូន​ភ្ញៀវកិត្តិយស និង​មហាជន​ទស្សនា ព្រោះតែ​អស់​ពេលវេលា។ នៅ​លើ​ទំព័រ​ហ្វេស​ប៊ុក លោក ឯម រៀម បាន​បង្ហោះ​សារ​សោកស្ដាយ​ថា «អាណិត​ពួកគាត់​ដែល​បាន​ខិតខំ​ទៅ​ហាត់​សម ដោយសារ​តែ​ភ្លៀង​ខ្លាំង​ពេក ត្រូវ​អស់​ម៉ោង អត់​បាន​ចេញ​សម្ដែង ពេល​បិទ​ព្រឹត្តិការណ៍​ស៊ីហ្គេម​ល្ងាច​មិញ»។

ចំណែក​ឯ​តារា​កំប្លែង​ជើងចាស់​នាយ ចាប ចៀន បាន​ធ្វើការ​ស៊ែរ​ចែករំលែក​បន្ត ដោយ​ភ្ជាប់​ខ្លឹមសារ​ថា «មិន​នឹកស្មាន បាន​ភ្លៀង​មួយ​មេ វេ​អស់​ការ​សម្ដែង ប្រឆាំង​អី​បាន​សូម​គ្រប់​ប្រាណ​កុំ​ប្រឆាំង​ជាមួយ​ធម្មជាតិ»។

សូម​បញ្ជាក់​ថា ព្រឹត្តិការណ៍​ប្រកួត​កីឡា​អាស៊ីអាគ្នេយ៍​លើក​ទី ៣២ ឆ្នាំ ២០២៣ ដែល​កម្ពុជា​ទទួល​ធ្វើជា​ម្ចាស់ផ្ទះ បាន​ប្រារព្ធ​ពិធី​បើក​ជា​ផ្លូវការ​កាលពី​ថ្ងៃ​ទី ០៥ ខែ​ឧសភា ក្នុង​ពហុ​កីឡដ្ឋាន​ជាតិ​មរតក​តេ​ជោ។ រីឯ​ពិធី​បិទ​ព្រឹត្តិការណ៍​ប្រកួត​កីឡា​អាស៊ីអាគ្នេយ៍​លើក​ទី ៣២ នេះ បាន​ធ្វើឡើង​កាលពី​ល្ងាច​ថ្ងៃ​ទី ១៧ ខែ​ឧសភា ឆ្នាំ ២០២៣៕

អត្ថបទ ៖ ចាន់រ៉ា

The post នាយ ចាប ចៀន និងសិល្បករមួយចំនួន ខកខានឱកាសចេញសម្ដែង ក្នុងពិធីបិទព្រឹត្តិការណ៍ស៊ីហ្គេម appeared first on Kampuchea Thmey Daily.